4. நிதா³னஸுத்தவண்ணனா

34. சதுத்தே² பிண்ட³கரணத்தா²யாதி ஆயூஹனவஸேன ராஸிகரணத்தா²ய. அபி⁴ன்னானீதி ஏகதே³ஸேனபி அக²ண்டி³தானி. பி⁴ன்னகாலதோ பட்டா²ய ஹி பீ³ஜம் பீ³ஜகிச்சாய ந உபகப்பதி. அபூதீனீதி உத³கதேமனேன பூதிபா⁴வம் ந உபக³தானி. பூதிபீ³ஜஞ்ஹி பீ³ஜத்தா²ய ந உபகப்பதி. தேனாஹ ‘‘பூதிபா⁴வேன அபீ³ஜத்தம் அப்பத்தானீ’’தி. ந வாதேன ந ச ஆதபேன ஹதானீதி வாதேன ச ஆதபேன ச ந ஹதானி, நிரோஜதம் ந பாபிதானி. நிரோஜஞ்ஹி கஸடபீ³ஜம் பீ³ஜத்தா²ய ந உபகப்பதி. ஸாராதா³னீதி தண்டு³லஸாரஸ்ஸ ஆதா³னதோ ஸாராதா³னி. நிஸ்ஸாரஞ்ஹி பீ³ஜம் பீ³ஜத்தா²ய ந உபகப்பதி. தேனாஹ ‘‘க³ஹிதஸாரானீ’’தி, பதிட்டி²தஸாரானீதி அத்தோ². ஸன்னிசயபா⁴வேன ஸுக²ம் ஸயிதானீதி சத்தாரோ மாஸே கோட்ட²பக்கி²த்தனியாமேனேவ ஸுக²ஸயிதானி.

கம்மவிப⁴த்தீதி கம்மவிபா⁴கோ³. தி³ட்ட²த⁴ம்மோ வுச்சதி பச்சக்க²பூ⁴தோ பச்சுப்பன்னோ அத்தபா⁴வோ, தத்த² வேதி³தப்³ப³ப²லம் கம்மம் தி³ட்ட²த⁴ம்மவேத³னீயம். பச்சுபன்னப⁴வதோ அனந்தரம் வேதி³தப்³ப³ப²லம் கம்மம் உபபஜ்ஜவேத³னீயம். அபரபரியாயவேத³னீயந்தி தி³ட்ட²த⁴ம்மானந்தரப⁴வதோ அஞ்ஞஸ்மிம் அத்தபா⁴வபரியாயே அத்தபா⁴வபரிவத்தே வேதி³தப்³ப³ப²லம் கம்மம். படிபக்கே²ஹி அனபி⁴பூ⁴ததாய பச்சயவிஸேஸேன படிலத்³த⁴விஸேஸதாய ச ப³லவபா⁴வப்பத்தா தாதி³ஸஸ்ஸ புப்³பா³பி⁴ஸங்கா²ரஸ்ஸ வஸேன ஸாதிஸயா ஹுத்வா பவத்தா பட²மஜவனசேதனா தஸ்மிம்யேவ அத்தபா⁴வே ப²லதா³யினீ தி³ட்ட²த⁴ம்மவேத³னீயகம்மம் நாம. ஸா ஹி வுத்தாகாரேன ப³லவதீ ஜவனஸந்தானே கு³ணவிஸேஸயுத்தேஸு உபகாரானுபகாரவஸப்பவத்தியா ஆஸேவனாலாபே⁴ன அப்பவிபாகதாய ச பட²மஜவனசேதனா இதரத்³வயம் விய பவத்தஸந்தானுபரமாபேக்க²ம் ஓகாஸலாபா⁴பேக்க²ஞ்ச கம்மம் ந ஹோதீதி இதே⁴வ புப்ப²மத்தம் விய பவத்திவிபாகமத்தம் ப²லம் தே³தி. ததா² அஸக்கோந்தந்தி கம்மஸ்ஸ விபாகதா³னம் நாம உபதி⁴ப்பயோகா³தி³பச்சயந்தரஸமவாயேனேவ ஹோதீதி தத³பா⁴வதோ தஸ்மிம்யேவ அத்தபா⁴வே விபாகம் தா³தும் அஸக்கோந்தம். அஹோஸிகம்மந்தி அஹோஸி ஏவ கம்மம், ந தஸ்ஸ விபாகோ அஹோஸி அத்தி² ப⁴விஸ்ஸதி சாதி ஏவம் வேதி³தப்³ப³ம் கம்மம்.

அத்த²ஸாதி⁴காதி தா³னாதி³பாணாதிபாதாதி³அத்த²ஸ்ஸ நிப்பா²தி³கா. கா பன ஸாதி ஆஹ ‘‘ஸத்தமஜவனசேதனா’’தி. ஸா ஹி ஸன்னிட்டா²பகசேதனா வுத்தனயேன படிலத்³த⁴விஸேஸா புரிமஜவனசேதனாஹி லத்³தா⁴ஸேவனா ச ஸமானா அனந்தரத்தபா⁴வே விபாகதா³யினீ உபபஜ்ஜவேத³னீயகம்மம் நாம. புரிமஉபமாயயேவாதி மிக³லுத்³த³கோபமாயயேவ.

ஸதி ஸம்ஸாரப்பவத்தியாதி இமினா அஸதி ஸம்ஸாரப்பவத்தியம் அஹோஸிகம்மபக்கே² திட்ட²தி விபச்சனோகாஸஸ்ஸ அபா⁴வதோதி தீ³பேதி. யம் க³ருகந்தி யம் அகுஸலம் மஹாஸாவஜ்ஜம், குஸலஞ்ச மஹானுபா⁴வம் கம்மம். குஸலம் வா ஹி ஹோது அகுஸலம் வா, யம் க³ருகம் மாதுகா⁴தாதி³கம்மம் வா மஹக்³க³தகம்மம் வா, ததே³வ பட²மம் விபச்சதி. தேனாஹ ‘‘குஸலாகுஸலேஸு பனா’’திஆதி³. யம் ப³ஹுலந்தி யம் ப³ஹுலம் அபி⁴ண்ஹஸோ கதம் ஸமாஸேவிதம். தேனாஹ ‘‘குஸலாகுஸலேஸு பன யம் ப³ஹுலம் ஹோதீ’’திஆதி³. யதா³ஸன்னம் நாம மரணகாலே அனுஸ்ஸரிதம் கம்மம், ஆஸன்னகாலே கதே பன வத்தப்³ப³மேவ நத்தீ²தி ஆஹ ‘‘யம் பன குஸலாகுஸலேஸு ஆஸன்னமரணே’’திஆதி³. அனுஸ்ஸரிதுந்தி பரிப்³யத்தபா⁴வேன அனுஸ்ஸரிதும்.

தேஸம் அபா⁴வேதி தேஸம் யம்க³ருகாதீ³னம் திண்ணம் கம்மானம் அபா⁴வே. யத்த² கத்த²சி விபாகம் தே³தீதி படிஸந்தி⁴ஜனகவஸேன விபாகம் தே³தி. படிஸந்தி⁴ஜனகவஸேன ஹி க³ருகாதி³கம்மசதுக்கம் வுத்தம். தத்த² க³ருகம் ஸப்³ப³பட²மம் விபச்சதி, க³ருகே அஸதி ப³ஹுலீகதம், தஸ்மிம் அஸதி யதா³ஸன்னம், தஸ்மிம் அஸதி ‘‘கடத்தா வா பனா’’தி வுத்தம் புரிமஜாதீஸு கதகம்மம் விபச்சதி. ப³ஹுலாஸன்னபுப்³ப³கதேஸு ச ப³லாப³லம் ஜானிதப்³ப³ம். பாபதோ பாபந்தரம் கல்யாணஞ்ச, கல்யாணதோ கல்யாணந்தரம் பாபஞ்ச ப³ஹுலீகதம். ததோ மஹதோவ புப்³ப³கதாதி³ அப்பஞ்ச ப³ஹுலானுஸ்ஸரணேன விப்படிஸாராதி³ஜனனதோ, படிபக்க²ஸ்ஸ அபரிபுண்ணதாய ஆரத்³த⁴விபாகஸ்ஸ கம்மஸ்ஸ கம்மஸேஸஸ்ஸ வா அபரபரியாயவேத³னீயஸ்ஸ அபரிக்கீ²ணதாய ஸந்ததியா பரிணாமவிஸேஸதோதி தேஹி தேஹி காரணேஹி ஆயூஹிதப²லம் பட²மம் விபச்சதி. மஹானாரத³கஸ்ஸபஜாதகே (ஜா. 2.22.1153 ஆத³யோ) விதே³ஹரஞ்ஞோ ஸேனாபதி அலாதோ, பீ³ஜகோ தா³ஸோ, ராஜகஞ்ஞா ருசா ச ஏத்த² நித³ஸ்ஸனம். ததா² ஹி வுத்தம் ப⁴க³வதா –

‘‘தத்ரானந்த³, ய்வாயம் புக்³க³லோ இத⁴ பாணாதிபாதீ…பே… மிச்சா²தி³ட்டி². காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி, புப்³பே³ வாஸ்ஸ தம் கதம் ஹோதி பாபகம்மம் து³க்க²வேத³னீயம், பச்சா² வாஸ்ஸ தம் கதம் ஹோதி பாபகம்மம் து³க்க²வேத³னீயம், மரணகாலே வாஸ்ஸ ஹோதி மிச்சா²தி³ட்டி² ஸமத்தா ஸமாதி³ன்னா, தேன ஸோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதீ’’தி –

ஆதி³. ஸப்³ப³ம் மஹாகம்மவிப⁴ங்க³ஸுத்தம் (ம. நி. 3.303) வித்தா²ரேதப்³ப³ம். கிம் ப³ஹுனா. யம் தம் ததா²க³தஸ்ஸ மஹாகம்மவிப⁴ங்க³ஞாணம், தஸ்ஸேவாயம் விஸயோ, யதி³த³ம் தஸ்ஸ தஸ்ஸ கம்மஸ்ஸ தேன தேன காரணேன புப்³பா³பரவிபாகதா ஸமத்தீ²யதி.

இதா³னி ஜனகாதி³கம்மசதுக்கம் விப⁴ஜந்தோ ‘‘ஜனகம் நாமா’’திஆதி³மாஹ. பவத்திம் ந ஜனேதீதி பவத்திவிபாகம் ந ஜனேதி. பட²மனயே ஜனககம்மஸ்ஸ படிஸந்தி⁴விபாகமத்தஸ்ஸேவ வுத்தத்தா தஸ்ஸ பவத்திவிபாகதா³யகத்தம்பி அனுஜானந்தோ ‘‘அபரோ நயோ’’திஆதி³மாஹ. தத்த² படிஸந்தி⁴தா³னாதி³வஸேன விபாகஸந்தானஸ்ஸ நிப்³ப³த்தகம் ஜனகம். ஸுக²து³க்க²ஸந்தானஸ்ஸ நாமரூபப்பப³ந்த⁴ஸ்ஸ வா சிரதரம் பவத்திஹேதுபூ⁴தம் உபத்த²ம்ப⁴கம். தேனாஹ ‘‘ஸுக²து³க்க²ம் உபத்த²ம்பே⁴தி, அத்³தா⁴னம் பவத்தேதீ’’தி. உபபீளகம் ஸுக²து³க்க²ப்பப³ந்தே⁴ பவத்தமானே ஸணிகம் ஸணிகம் ஹாபேதி. தேனாஹ ‘‘ஸுக²து³க்க²ம் பீளேதி பா³தே⁴தி, அத்³தா⁴னம் பவத்திதும் ந தே³தீ’’தி.

வாதகாளகோ மஹல்லகோ சோரே கா⁴தேதும் ந ஸக்கோதீதி ஸோ கிர மஹல்லககாலே ஏகப்பஹாரேன ஸீஸம் சி²ந்தி³தும் ந ஸக்கோதி, த்³வே தயோ வாரே பஹரந்தோ மனுஸ்ஸே கிலமேதி, தஸ்மா தே ஏவமாஹம்ஸு. அனுலோமிகம் க²ந்திம் படிலபி⁴த்வாதி ஸோதாபத்திமக்³க³ஸ்ஸ ஓரதோ அனுலோமிகம் க²ந்திம் லபி⁴த்வா. தருணவச்சா²ய கா³வியா மத்³தி³த்வா ஜீவிதக்க²யம் பாபிதோதி ஏகா கிர யக்கி²னீ தே⁴னுவேஸேன ஆக³ந்த்வா உரே பஹரித்வா மாரேஸி, தம் ஸந்தா⁴யேதம் வுத்தம். நக³ரே ப⁴வோ நாக³ரியோ.

கா⁴தேத்வாதி உபச்சி²ந்தி³த்வா. கம்மஸ்ஸ உபச்சி²ந்த³னம் நாம தஸ்ஸ விபாகப்படிபா³ஹனமேவாதி ஆஹ ‘‘தஸ்ஸ விபாகம் படிபா³ஹித்வா’’தி. தஞ்ச அத்தனோ விபாகுப்பத்தியா ஓகாஸகரணந்தி வுத்தம் ‘‘அத்தனோ விபாகஸ்ஸ ஓகாஸம் கரோதீ’’தி. விபச்சனாய கதோகாஸம் கம்மம் விபக்கம்மேவ நாம ஹோதீதி ஆஹ ‘‘ஏவம் பன கம்மேன கதே ஓகாஸே தம் விபாகம் உப்பன்னம் நாம வுச்சதீ’’தி. உபபீளகம் அஞ்ஞஸ்ஸ விபாகம் உபச்சி²ந்த³தி, ந ஸயம் அத்தனோ விபாகம் தே³தி. உபகா⁴தகம் பன து³ப்³ப³லகம்மம் உபச்சி²ந்தி³த்வா அத்தனோ விபாகம் உப்பாதே³தீதி அயமேதேஸம் விஸேஸோ. கிஞ்சி ப³ஹ்வாபா³த⁴தாதி³பச்சயூபஸன்னிபாதேன விபாகஸ்ஸ விபா³த⁴கம் உபபீளகம், ததா² விபாகஸ்ஸேவ உபச்சே²த³கம். உபகா⁴தககம்மம் பன உபகா⁴தேத்வா அத்தனோ விபாகஸ்ஸ ஓகாஸகரணேன விபச்சனே ஸதி ஜனகமேவ ஸியா. ஜனகாதி³பா⁴வோ நாம விபாகம் பதி இச்சி²தப்³போ³, ந கம்மம் பதீதி விபாகஸ்ஸேவ உபகா⁴தகதா யுத்தா விய தி³ஸ்ஸதி, வீமம்ஸிதப்³ப³ம்.

அபரோ நயோ – யஸ்மிம் கம்மே கதே படிஸந்தி⁴யம் பவத்தே ச விபாககடத்தாரூபானம் உப்பத்தி ஹோதி, தம் ஜனகம். யஸ்மிம் பன கதே அஞ்ஞேன ஜனிதஸ்ஸ இட்ட²ஸ்ஸ வா அனிட்ட²ஸ்ஸ வா ப²லஸ்ஸ விபா³த⁴கவிச்சே²த³கபச்சயானுப்பத்தியா உபப்³ரூஹனபச்சயுப்பத்தியா ஜனகஸாமத்தி²யானுரூபம் பரிஸுத்³தி⁴சிரதரப்பப³ந்தா⁴ ஹோதி, தம் உபத்த²ம்ப⁴கம். ஜனகேன நிப்³ப³த்திதம் குஸலப²லம் வா அகுஸலப²லம் வா யேன பச்சனீகபூ⁴தேன ரோக³தா⁴துவிஸமதாதி³னிமித்ததாய விபா³த⁴யதி, தம் உபபீளகம். யேன பன கம்முனா ஜனகஸாமத்தி²யவஸேன சிரதரப்பப³ந்தா⁴ரஹம்பி ஸமானம் ப²லம் விச்சே²த³கபச்சயுப்பத்தியா உபஹஞ்ஞதி விச்சி²ஜ்ஜதி, தம் உபகா⁴தகந்தி அயமேத்த² ஸாரோ.

தத்த² கேசி து³தியஸ்ஸ குஸலபா⁴வம் இத்த²த்தமாக³தஸ்ஸ அப்பாபா³த⁴தீ³கா⁴யுகதாஸம்வத்தனவஸேன, பச்சி²மானம் த்³வின்னம் அகுஸலபா⁴வம் ப³ஹ்வாபா³த⁴அப்பாயுகதாஸம்வத்தனவஸேன வண்ணேந்தி. ததா² ச வுத்தம் மஜ்ஜி²மனிகாயே சூளகம்மவிப⁴ங்க³ஸுத்தவண்ணனாயம் (ம. நி. அட்ட². 3.290) –

‘‘சத்தாரி ஹி கம்மானி – உபபீளகம், உபச்சே²த³கம், ஜனகம், உபத்த²ம்ப⁴கந்தி. ப³லவகம்மேன ஹி நிப்³ப³த்தம் பவத்தே உபபீளகம் ஆக³ந்த்வா அத்த²தோ ஏவம் வத³தி நாம ‘ஸசாஹம் பட²மதரம் ஜானேய்யம், ந தே இத⁴ நிப்³ப³த்திதும் த³தே³ய்யம், சதூஸுயேவ தம் அபாயேஸு நிப்³ப³த்தாபேய்யம். ஹோது, த்வம் யத்த² கத்த²சி நிப்³ப³த்த, அஹம் உபபீளககம்மம் நாம தம் பீளேத்வா நிரோஜம் நியூஸம் கஸடம் கரிஸ்ஸாமீ’தி. ததோ பட்டா²ய தம் தாதி³ஸம் கரோதி. கிம் கரோதி? பரிஸ்ஸயம் உபனேதி, போ⁴கே³ வினாஸேதி.

‘‘தத்த² தா³ரகஸ்ஸ மாதுகுச்சி²யம் நிப்³ப³த்தகாலதோ பட்டா²ய மாது அஸ்ஸாதோ³ வா ஸுக²ம் வா ந ஹோதி, மாதாபிதூனம் பீளாவ உப்பஜ்ஜதி. ஏவம் பரிஸ்ஸயம் உபனேதி. தா³ரகஸ்ஸ பன மாதுகுச்சி²ம்ஹி நிப்³ப³த்தகாலதோ பட்டா²ய கே³ஹே போ⁴கா³ உத³கம் பத்வா லோணம் விய ராஜாதீ³னம் வஸேன நஸ்ஸந்தி, கும்ப⁴தோ³ஹனதே⁴னுயோ கீ²ரம் ந தே³ந்தி, ஸூரதா கோ³ணா சண்டா³ ஹோந்தி, காணா ஹோந்தி, க²ஞ்ஜா ஹோந்தி, கோ³மண்ட³லே ரோகோ³ பததி, தா³ஸாத³யோ வசனம் ந கரோந்தி, வாபிதம் ஸஸ்ஸம் ந ஜாயதி, கே³ஹக³தம் கே³ஹே, அரஞ்ஞக³தம் அரஞ்ஞே நஸ்ஸதி, அனுபுப்³பே³ன கா⁴ஸச்சா²த³னமத்தம் து³ல்லப⁴ம் ஹோதி, க³ப்³ப⁴பரிஹாரோ ந ஹோதி, விஜாதகாலே மாது த²ஞ்ஞம் சி²ஜ்ஜதி, தா³ரகோ பரிஹாரம் அலப⁴ந்தோ பீளிதோ நிரோஜோ நியூஸோ கஸடோ ஹோதி. இத³ம் உபபீளககம்மம் நாம.

‘‘தீ³கா⁴யுககம்மேன பன நிப்³ப³த்தஸ்ஸ உபச்சே²த³ககம்மம் ஆக³ந்த்வா ஆயும் சி²ந்த³தி. யதா² ஹி புரிஸோ அட்டு²ஸப⁴க³மனம் கத்வா ஸரம் கி²பேய்ய, தமஞ்ஞோ த⁴னுதோ முத்தமத்தம் முக்³க³ரேன பஹரித்வா தத்தே²வ பாதேய்ய, ஏவம் தீ³கா⁴யுககம்மேன நிப்³ப³த்தஸ்ஸ உபச்சே²த³ககம்மம் ஆயும் சி²ந்த³தி. கிம் கரோதி? சோரானம் அடவிம் பவேஸேதி, வாளமச்சோ²த³கம் ஓதாரேதி, அஞ்ஞதரம் வா பன ஸபரிஸ்ஸயடா²னம் உபனேதி. இத³ம் உபச்சே²த³ககம்மம் நாம. ‘உபகா⁴தக’ந்திபி ஏதஸ்ஸேவ நாமம். படிஸந்தி⁴னிப்³ப³த்தகம் பன கம்மம் ஜனககம்மம் நாம. அப்பபோ⁴க³குலாதீ³ஸு நிப்³ப³த்தஸ்ஸ போ⁴க³ஸம்பதா³தி³கரணேன உபத்த²ம்ப⁴ககம்மம் உபத்த²ம்ப⁴ககம்மம் நாம.

‘‘பரித்தகம்மேனபி நிப்³ப³த்தம் ஏதம் பவத்தே பாணாதிபாதாதி³விரதிகம்மம் ஆக³ந்த்வா அத்த²தோ ஏவம் வத³தி நாம ‘ஸசாஹம் பட²மதரம் ஜானேய்யம், ந தே இத⁴ நிப்³ப³த்திதும் த³தே³ய்யம், தே³வலோகேயேவ தம் நிப்³ப³த்தாபேய்யம், ஹோது, த்வம் யத்த² கத்த²சி நிப்³ப³த்த, அஹம் உபத்த²ம்ப⁴ககம்மம் நாம உபத்த²ம்ப⁴ம் தே கரிஸ்ஸாமீ’தி உபத்த²ம்ப⁴ம் கரோதி. கிம் கரோதி? பரிஸ்ஸயம் நாஸேதி, போ⁴கே³ உப்பாதே³தி.

‘‘தத்த² தா³ரகஸ்ஸ மாதுகுச்சி²யம் நிப்³ப³த்தகாலதோ பட்டா²ய மாதாபிதூனம் ஸுக²மேவ ஸாதமேவ ஹோதி. யேபி பகதியா மனுஸ்ஸாமனுஸ்ஸபரிஸ்ஸயா ஹோந்தி, தே ஸப்³பே³ அபக³ச்ச²ந்தி. ஏவம் பரிஸ்ஸயம் நாஸேதி. தா³ரகஸ்ஸ பன மாதுகுச்சி²ம்ஹி நிப்³ப³த்தகாலதோ பட்டா²ய கே³ஹே போ⁴கா³னம் பமாணம் ந ஹோதி, நிதி⁴கும்பி⁴யோ புரதோபி பச்ச²தோபி கே³ஹம் பரிவட்டமானா பவிஸந்தி. மாதாபிதரோ பரேஹி ட²பிதத⁴னஸ்ஸபி ஸம்முகீ²பா⁴வம் க³ச்ச²ந்தி, தே⁴னுயோ ப³ஹுகீ²ரா ஹோந்தி, கோ³ணா ஸுக²ஸீலா ஹோந்தி, வப்பட்டா²னே ஸஸ்ஸானி ஸம்பஜ்ஜந்தி, வட்³டி⁴யா வா ஸம்பயுத்தம், தாவகாலிகம் வா தி³ன்னம் த⁴னம் அசோதி³தா ஸயமேவ ஆஹரித்வா தே³ந்தி, தா³ஸாத³யோ ஸுப்³ப³சா ஹோந்தி, கம்மந்தா ந பரிஹாயந்தி, தா³ரகோ க³ப்³ப⁴தோ பட்டா²ய பரிஹாரம் லப⁴தி, கோமாரிகவேஜ்ஜா ஸன்னிஹிதாவ ஹோந்தி. க³ஹபதிகுலே ஜாதோ ஸேட்டி²ட்டா²னம், அமச்சகுலாதீ³ஸு ஜாதோ ஸேனாபதிட்டா²னாதீ³னி லப⁴தி. ஏவம் போ⁴கே³ உப்பாதே³தி. ஸோ அபரிஸ்ஸயோ ஸபோ⁴கோ³ சிரம் ஜீவதி. இத³ம் உபத்த²ம்ப⁴ககம்மம் நாம. இமேஸு சதூஸு புரிமானி த்³வே அகுஸலானேவ, ஜனகம் குஸலம்பி அகுஸலம்பி, உபத்த²ம்ப⁴கம் குஸலமேவா’’தி.

ஏத்த² விபா³தூ⁴பகா⁴தா நாம குஸலவிபாகம்ஹி ந யுத்தாதி அதி⁴ப்பாயேன ‘‘த்³வே அகுஸலானேவா’’தி வுத்தம். தே³வத³த்தாதீ³னம் பன நாகா³தீ³னம் இதோ அனுப்பதி³ன்னயாபனகபேதானஞ்ச நரகாதீ³ஸு அகுஸலவிபாகூபத்த²ம்ப⁴னூபபீளனூபகா⁴தகானி ஸந்தீதி சதுன்னம்பி குஸலாகுஸலபா⁴வோ ந விருஜ்ஜ²தி. ஏவஞ்ச கத்வா யா ப³ஹூஸு ஆனந்தரியேஸு கதேஸு ஏகேன க³ஹிதப்படிஸந்தி⁴கஸ்ஸ இதரேஸம் தஸ்ஸ அனுப³லப்பதா³யிதா வுத்தா, ஸாபி ஸமத்தி²தா ஹோதி.

ஸுத்தந்தபரியாயேன ஏகாத³ஸ கம்மானி விப⁴ஜித்வா இதா³னி அபி⁴த⁴ம்மபரியாபன்னம் த³ஸ்ஸேந்தோ ‘‘அத்தே²கச்சானி பாபகானி கம்மஸமாதா³னானீ’’திஆதி³னா விப⁴ங்க³பாளிம் (விப⁴. 810) த³ஸ்ஸேதி. தத்த² க³திஸம்பத்திபடிபா³ள்ஹானீதி க³திஸம்பத்தியா படிபா³ஹிதானி நிவாரிதானி படிஸேதி⁴தானி. ஸேஸபதே³ஸுபி ஏஸேவ நயோ. தத்த² ச க³திஸம்பத்தீதி ஸம்பன்னக³தி தே³வலோகோ ச மனுஸ்ஸலோகோ ச. க³திவிபத்தீதி விபன்னக³தி சத்தாரோ அபாயா. உபதி⁴ஸம்பத்தீதி அத்தபா⁴வஸமித்³தி⁴. உபதி⁴விபத்தீதி ஹீனஅத்தபா⁴வதா. காலஸம்பத்தீதி ஸுராஜஸுமனுஸ்ஸகாலஸங்கா²தோ ஸம்பன்னகாலோ. காலவிபத்தீதி து³ராஜது³ம்மனுஸ்ஸகாலஸங்கா²தோ விபன்னகாலோ. பயோக³ஸம்பத்தீதி ஸம்மாபயோகோ³. பயோக³விபத்தீதி மிச்சா²பயோகோ³.

இதா³னி யதா²வுத்தபாளியா அத்த²ம் த³ஸ்ஸேந்தோ ‘‘தத்தா²’’திஆதி³மாஹ. தத்த² அனிட்டா²ரம்மணானுப⁴வனாரஹே கம்மே விஜ்ஜமானேயேவாதி இமினா அனிட்டா²ரம்மணானுப⁴வனனிம்மித்தகஸ்ஸ பாபகம்மஸ்ஸ ஸப்³பா⁴வம் த³ஸ்ஸேதி. தம் கம்மந்தி தம் பாபகம் கம்மம். ஏகச்சஸ்ஸ ஹி அனிட்டா²ரம்மணானுப⁴வனனிமித்தம் ப³ஹுபாபகம்மம் விஜ்ஜமானம்பி க³திவிபத்தியம் டி²தஸ்ஸேவ விபச்சதி. யதி³ பன ஸோ ஏகேன கல்யாணகம்மேன க³திஸம்பத்தியம் தே³வேஸு வா மனுஸ்ஸேஸு வா நிப்³ப³த்தேய்ய, தாதி³ஸே டா²னே அகுஸலஸ்ஸ வாரோ நத்தி², ஏகந்தம் குஸலஸ்ஸேவாதி தம் கம்மம் க³திஸம்பத்திபடிபா³ள்ஹம் ந விபச்சதி. பதிபா³ஹிதம் ஹுத்வாதி பா³தி⁴தம் ஹுத்வா. அத்தபா⁴வஸமித்³தி⁴யந்தி ஸரீரஸம்பத்தியம். கிலிட்ட²கம்மஸ்ஸாதி ஹத்தி²மேண்ட³அஸ்ஸப³ந்த⁴ககோ³பாலகாதி³கம்மஸ்ஸ. பலாயிதப்³ப³யுத்தகாலேதி ஹத்தி²ஆதி³பச்சத்தி²கஸமாக³மகாலே. லஞ்ஜம் தே³தீதி ஏவம் மே பா³த⁴தம் பரேஸம் வஸே ந ஹோதீதி தே³தி. சோரிகயுத்தகாலேதி பக்க²ப³லாதீ³னம் லப்³ப⁴மானகாலே. அந்தரகப்பேதி பரியோஸானப்பத்தே அந்தரகப்பே.

அபி⁴த⁴ம்மனயேன ஸோளஸ கம்மானி விப⁴ஜித்வா படிஸம்பி⁴தா³மக்³க³பரியாயேன (படி. ம. 1.234-235) த்³வாத³ஸ கம்மானி விப⁴ஜித்வா த³ஸ்ஸேதும் ‘‘அபரானிபீ’’திஆதி³மாஹ. தத்த² அதீதப⁴வேஸு கதஸ்ஸ கம்மஸ்ஸ அதீதப⁴வேஸுயேவ விபக்கவிபாகம் க³ஹேத்வா ‘‘அஹோஸி கம்மம் அஹோஸி கம்மவிபாகோ’’தி வுத்தந்தி ஆஹ ‘‘யம் கம்மம் அதீதே ஆயூஹித’’ந்திஆதி³. விபாகவாரந்தி விபச்சனாவஸரம் விபாகவாரம். ‘‘விபாகவாரம் லப⁴தீ’’தி இமினா வுத்தமேவத்த²ம் ‘‘படிஸந்தி⁴ம் ஜனேஸீ’’திஆதி³னா விபா⁴வேதி. தத்த² படிஸந்தி⁴ம் ஜனேஸீதி இமினா ச படிஸந்தி⁴தா³யகஸ்ஸ கம்மஸ்ஸ பவத்திவிபாகதா³யிதாபி வுத்தா ஹோதி. பவத்திவிபாகஸ்ஸேவ பன தா³யகம் ரூபஜனகஸீஸேன வத³தி. தஸ்ஸேவ அதீதஸ்ஸ கம்மஸ்ஸ தி³ட்ட²த⁴ம்மவேத³னீயஸ்ஸ உபபஜ்ஜவேத³னீயஸ்ஸ ச பச்சயவேகல்லேன அதீதப⁴வேஸுயேவ அவிபக்கவிபாகஞ்ச, அதீதேயேவ பரினிப்³பு³தஸ்ஸ தி³ட்ட²த⁴ம்மவேத³னீயஉபபஜ்ஜவேத³னீயஅபரபரியாயவேத³னீயஸ்ஸ கம்மஸ்ஸ அவிபக்கவிபாகஞ்ச க³ஹேத்வா ‘‘அஹோஸி கம்மம் நாஹோஸி கம்மவிபாகோ’’திபி வுத்தந்தி ஆஹ ‘‘யம் பன விபாகவாரம் ந லபீ⁴’’திஆதி³.

அதீதஸ்ஸேவ கம்மஸ்ஸ அவிபக்கவிபாகஸ்ஸ பச்சுப்பன்னப⁴வே பச்சயஸம்பத்தியா விபச்சமானம் விபாகம் க³ஹேத்வா ‘‘அஹோஸி கம்மம் அத்தி² கம்மவிபாகோ’’தி வுத்தந்தி ஆஹ ‘‘யம் பன அதீதே ஆயூஹித’’ந்திஆதி³மாஹ. அதீதஸ்ஸேவ கம்மஸ்ஸ அதிக்கந்தவிபாககாலஸ்ஸ ச பச்சுப்பன்னப⁴வே பரினிப்³பா³யந்தஸ்ஸ ச அவிபச்சமானவிபாகம் க³ஹேத்வா ‘‘அஹோஸி கம்மம் நத்தி² கம்மவிபாகோ’’தி வுத்தந்தி ஆஹ ‘‘அலத்³த⁴விபாகவார’’ந்திஆதி³. அதீதஸ்ஸேவ கம்மஸ்ஸ விபாகாரஹஸ்ஸ அவிபக்கவிபாகஸ்ஸ அனாக³தப⁴வே பச்சயஸம்பத்தியா விபச்சிதப்³ப³ம் விபாகம் க³ஹேத்வா ‘‘அஹோஸி கம்மம் ப⁴விஸ்ஸதி கம்மவிபாகோ’’தி வுத்தந்தி த³ஸ்ஸேந்தோ ‘‘யம் பன அதீதே ஆயூஹித’’ந்திஆதி³மாஹ. அதீதஸ்ஸேவ கம்மஸ்ஸ அதிக்கந்தவிபாககாலஸ்ஸ ச அனாக³தப⁴வே பரினிப்³பா³யிதப்³ப³ஸ்ஸ அவிபச்சிதப்³ப³விபாகஞ்ச க³ஹேத்வா ‘‘அஹோஸி கம்மம் ந ப⁴விஸ்ஸதி கம்மவிபாகோ’’தி வுத்தந்தி ஆஹ ‘‘யம் அனாக³தே விபாகவாரம் ந லபி⁴ஸ்ஸதீ’’திஆதி³. ஏவம் தாவ அதீதகம்மம் அதீதபச்சுப்பன்னானாக³தவிபாகாவிபாகவஸேன ச²தா⁴ த³ஸ்ஸிதம்.

இதா³னி பச்சுப்பன்னப⁴வே கதஸ்ஸ தி³ட்ட²த⁴ம்மவேத³னீயஸ்ஸ இதே⁴வ விபச்சமானம் விபாகம் க³ஹேத்வா ‘‘அத்தி² கம்மம் அத்தி² கம்மவிபாகோ’’தி வுத்தந்தி த³ஸ்ஸேந்தோ ‘‘யம் பன ஏதரஹி ஆயூஹித’’ந்திஆதி³மாஹ. யம் பன ஏதரஹி விபாகவாரம் ந லப⁴தீதிஆதி³னா தஸ்ஸேவ பச்சுப்பன்னஸ்ஸ கம்மஸ்ஸ பச்சயவேகல்லேன இத⁴ அவிபச்சமானஞ்ச தி³ட்டே²வ த⁴ம்மே பரினிப்³பா³யந்தஸ்ஸ இத⁴ அவிபச்சமானஞ்ச விபாகம் க³ஹேத்வா ‘‘அத்தி² கம்மம் நத்தி² கம்மவிபாகோ’’தி வுத்தந்தி த³ஸ்ஸேதி. பச்சுப்பன்னஸ்ஸேவ கம்மஸ்ஸ உபபஜ்ஜவேத³னீயஸ்ஸ அபரபரியாயவேத³னீயஸ்ஸ ச அனாக³தப⁴வே விபச்சிதப்³ப³விபாகம் க³ஹேத்வா ‘‘அத்தி² கம்மம் ப⁴விஸ்ஸதி கம்மவிபாகோ’’தி வுத்தந்தி ஆஹ ‘‘யம் பன ஏதரஹி ஆயூஹிதம் அனாக³தே விபாகவாரம் லபி⁴ஸ்ஸதீ’’திஆதி³. பச்சுப்பன்னஸ்ஸேவ கம்மஸ்ஸ உபபஜ்ஜவேத³னீயஸ்ஸ பச்சயவேகல்லேன அனாக³தப⁴வே அவிபச்சிதப்³ப³ஞ்ச அனாக³தப⁴வே பரினிப்³பா³யிதப்³ப³ஸ்ஸ அபரபரியாயவேத³னீயஸ்ஸ அவிபச்சிதப்³ப³ஞ்ச விபாகம் க³ஹேத்வா ‘‘அத்தி² கம்மம் ந ப⁴விஸ்ஸதி கம்மவிபாகோ’’தி வுத்தந்தி ஆஹ ‘‘யம் பன விபாகவாரம் ந லபி⁴ஸ்ஸதீ’’திஆதி³.

ஏவஞ்ச பச்சுப்பன்னகம்மம் பச்சுப்பன்னானாக³தவிபாகாவிபாகவஸேன சதுதா⁴ த³ஸ்ஸேத்வா இதா³னி அனாக³தப⁴வே கதஸ்ஸ கம்மஸ்ஸ அனாக³தே விபச்சிதப்³ப³விபாகம் க³ஹேத்வா ‘‘ப⁴விஸ்ஸதி கம்மம் ப⁴விஸ்ஸதி கம்மவிபாகோ’’தி வுத்தந்தி த³ஸ்ஸேந்தோ ‘‘யம் பனானாக³தே ஆயூஹிஸ்ஸதீ’’திஆதி³மாஹ. தஸ்ஸேவ அனாக³தஸ்ஸ கம்மஸ்ஸ பச்சயவேகல்லேன அவிபச்சிதப்³ப³ஞ்ச அனாக³தப⁴வே பரினிப்³பா³யிதப்³ப³ஸ்ஸ அவிபச்சிதப்³ப³ஞ்ச விபாகம் க³ஹேத்வா ‘‘ப⁴விஸ்ஸதி கம்மம் ந ப⁴விஸ்ஸதி கம்மவிபாகோ’’தி வுத்தந்தி ஆஹ ‘‘யம் பன விபாகவாரம் ந லபி⁴ஸ்ஸதீ’’திஆதி³. ஏவம் அனாக³தகம்மம் அனாக³தவிபாகாவிபாகவஸேன த்³விதா⁴ த³ஸ்ஸிதம். ஏவந்திஆதி³னா யதா²வுத்தத்³வாத³ஸகம்மானி நிக³மேதி.

இதா³னி ஸப்³பே³ஸு யதா²வுத்தப்பபே⁴தே³ஸு கம்மேஸு யானி அபி⁴த⁴ம்மனயேன விப⁴த்தானி ஸோளஸ கம்மானி, யானி ச படிஸம்பி⁴தா³மக்³க³பரியாயேன விப⁴த்தானி த்³வாத³ஸ கம்மானி, தானி ஸப்³பா³னி ஸுத்தந்திகபரியாயேன விப⁴த்தேஸு ஏகாத³ஸவிதே⁴ஸுயேவ கம்மேஸு அந்தோக³தா⁴னி, தானி ச தி³ட்ட²த⁴ம்மவேத³னீயஉபபஜ்ஜவேத³னீயஅபரபரியாயவேத³னீயேஸு தீஸுயேவ அந்தோக³தா⁴னீதி த³ஸ்ஸேந்தோ ‘‘இதி இமானி சேவா’’திஆதி³மாஹ. தத்த² அத்தனோ டா²னா ஓஸக்கித்வாதி அத்தனோ யதா²வுத்தத்³வாத³ஸஸோளஸப்பபே⁴த³ஸங்கா²தட்டா²னதோ பரிஹாபேத்வா, தம் தம் பபே⁴த³ம் ஹித்வாதி வுத்தம் ஹோதி. ஏகாத³ஸ கம்மானியேவ ப⁴வந்தீதி தம்ஸபா⁴வானம்யேவ கம்மானம் த்³வாத³ஸதா⁴ ஸோளஸதா⁴ ச விப⁴ஜித்வா வுத்தத்தா ஏவமாஹ. யஸ்மா ஏகாத³ஸதா⁴ வுத்தகம்மானி தி³ட்ட²த⁴ம்மவேத³னீயானி வா ஸியும் உபபஜ்ஜவேத³னீயானி வா அபரபரியாயவேத³னீயானி வா, தஸ்மா வுத்தம் ‘‘தீணியேவ கம்மானி ஹோந்தீ’’தி.

தேஸம் ஸங்கமனம் நத்தீ²தி தேஸம் தி³ட்ட²த⁴ம்மவேத³னீயாதீ³னம் ஸங்கமனம் நத்தி², ஸங்கமனம் உபபஜ்ஜவேத³னீயாதி³பா⁴வாபத்தி. தேனாஹ ‘‘யதா²டா²னேயேவ திட்ட²ந்தீ’’தி, அத்தனோ தி³ட்ட²த⁴ம்மவேத³னீயாதி³ட்டா²னேயேவ திட்ட²ந்தீதி அத்தோ². தி³ட்ட²த⁴ம்மவேத³னீயமேவ ஹி பட²மஜவனசேதனா, உபபஜ்ஜவேத³னீயமேவ ஸத்தமஜவனசேதனா, மஜ்ஜே² பஞ்ச அபரபரியாயவேத³னீயமேவாதி நத்தி² தேஸம் அஞ்ஞமஞ்ஞம் ஸங்க³ஹோ, தஸ்மா அத்தனோ அத்தனோ தி³ட்ட²த⁴ம்மவேத³னீயாதி³ஸபா⁴வேயேவ திட்ட²ந்தி. தேனேவ ப⁴க³வதா – ‘‘தி³ட்டே² வா த⁴ம்மே, உபபஜ்ஜ வா, அபரே வா பரியாயே’’தி தயோ விகப்பா த³ஸ்ஸிதா. தேனேவாஹ ‘‘தி³ட்ட²த⁴ம்மவேத³னீயம் கம்ம’’ந்திஆதி³. தத்த² ‘‘தி³ட்டே² வா த⁴ம்மே’’தி ஸத்தா² ந வதே³ய்யாதி அஸதி நியாமே ந வதே³ய்ய. யஸ்மா பன தேஸம் ஸங்கமனம் நத்தி², நியதஸபா⁴வா ஹி தானி, தஸ்மா ஸத்தா² ‘‘தி³ட்டே² வா த⁴ம்மே’’திஆதி³மவோச.

ஸுக்கபக்கே²தி ‘‘அலோபோ⁴ நிதா³னம் கம்மானம் ஸமுத³யாயா’’திஆதி³னா ஆக³தே குஸலபக்கே². நிருத்³தே⁴தி அரியமக்³கா³தி⁴க³மேன அனுப்பாத³னிரோதே⁴ன நிருத்³தே⁴. தாலவத்து² விய கதந்தி யதா² தாலே சி²ன்னே டி²தட்டா²னே கிஞ்சி ந ஹோதி, ஏவம் கம்மே பஹீனே கிஞ்சி ந ஹோதீதி அத்தோ². தாலவத்தூ²தி வா மத்த²கச்சி²ன்னோ தாலோ வுத்தோ பத்தப²லமகுலஸூசிஆதீ³னம் அபா⁴வதோ. ததோ ஏவ ஸோ அவிருள்ஹித⁴ம்மோ. ஏவம் பஹீனகம்மோ ஸத்தஸந்தானோ. தேனாஹ ‘‘மத்த²கச்சி²ன்னதாலோ வியா’’தி. அனுஅபா⁴வம் கதம் பச்ச²தோ த⁴ம்மப்பவத்தியா அபா⁴வதோ. தேனாஹ ‘‘யதா²’’திஆதி³. அப்பவத்திகதகாலோ வியாதி பீ³ஜானம் ஸப்³ப³ஸோ அப்பவத்தியா கதகாலோ விய. சி²ன்னமூலகானந்தி கிலேஸமூலஸ்ஸ ஸப்³ப³ஸோ சி²ன்னத்தா சி²ன்னமூலகானம். கிலேஸா ஹி க²ந்தா⁴னம் மூலானி.

வேத³னீயந்தி வேதி³தப்³ப³ம். அஞ்ஞம் வத்து² நத்தீ²தி அஞ்ஞம் அதி⁴ட்டா²னம் நத்தி². ஸுக³திஸஞ்ஞிதாபி ஹேட்டி²மந்தேன ஸங்கா²ரது³க்க²தோ அனபக³தத்தா து³க்³க³தியோ ஏவாதி வுத்தம் ‘‘ஸப்³பா³ து³க்³க³தியோ’’தி, ஏவம் வா ஏத்த² அத்தோ² த³ட்ட²ப்³போ³. லோபோ⁴ ஏதஸ்ஸ காரணபூ⁴தோ அத்தீ²தி லோப⁴ம், லோப⁴னிமித்தம் கம்மம். ததா² தோ³ஸந்தி ஏத்தா²பி. தேனாஹ ‘‘லோப⁴தோ³ஸஸீஸேன லோப⁴ஜஞ்ச தோ³ஸஜஞ்ச கம்மமேவ நித்³தி³ட்ட²’’ந்தி. வட்டவிவட்டந்தி வட்டஞ்ச விவட்டஞ்ச.

நிதா³னஸுத்தவண்ணனா நிட்டி²தா.