5. ஹத்த²கஸுத்தவண்ணனா

35. பஞ்சமே ஆளவியந்தி ஆளவிரட்டே², ந ஆளவினக³ரே. தேனாஹ ‘‘ஆளவியந்தி ஆளவிரட்டே²’’தி. அதா²தி அவிச்சே²த³த்தே² நிபாதோ. தத்த² ப⁴க³வதோ நிஸஜ்ஜாய அவிச்சி²ன்னாய ஏவாதி அத்தோ². தேனாஹ ‘‘ஏவ’’ந்திஆதி³. ஹத்த²தோ ஹத்த²ம் க³தத்தாதி ஆளவகஸ்ஸ யக்க²ஸ்ஸ ஹத்த²தோ ஸம்மாஸம்பு³த்³த⁴ஸ்ஸ ஹத்த²ம், ததோ ராஜபுரிஸானம் ஹத்த²ம் க³தத்தா.

மாக⁴ஸ்ஸாதி மாக⁴மாஸஸ்ஸ. ஏவம் ப²க்³கு³னஸ்ஸாதி ஏத்தா²பி. கு²ரந்தரேஹி கத்³த³மோ உக்³க³ந்த்வா திட்ட²தீதி கத்³த³மோ கு²ரந்தரேஹி உக்³க³ந்த்வா திட்ட²தி. சதூஹி தி³ஸாஹி வாயந்தோ வாதோ வேரம்போ⁴தி வுச்சதி வேரம்ப⁴வாதஸதி³ஸத்தா.

பஞ்சத்³வாரகாயந்தி பஞ்சத்³வாரானுஸாரேன பவத்தம் விஞ்ஞாணகாயம். கோ²ப⁴யமானாதி கிலேஸகோ²ப⁴வஸேன கோ²ப⁴யமானா சித்தம் ஸங்கோ²ப⁴ம் கரோந்தா. சேதஸிகாதி மனோத்³வாரிகசித்தஸன்னிஸ்ஸிதா. தேனாஹ ‘‘மனோத்³வாரம் கோ²ப⁴யமானா’’தி. ஸோ ராகோ³தி தம்ஸதி³ஸோ ராகோ³. ப⁴வதி ஹி தம்ஸதி³ஸே தப்³போ³ஹாரோ யதா² ‘‘ஸா ஏவ தித்திரிகா, தானி ஏவ ஓஸதா⁴னீ’’தி. யாதி³ஸோ ஹி ஏகஸ்ஸ புக்³க³லஸ்ஸ உப்பஜ்ஜனகராகோ³, தாதி³ஸோ ஏவ ததோ அஞ்ஞஸ்ஸ ராக³பா⁴வஸாமஞ்ஞதோ. தேன வுத்தம் ‘‘ததா²ரூபோ ராகோ³’’திஆதி³. இச்சி²தாலாபே⁴ன ரஜனீயேஸு வா நிருத்³தே⁴ஸு வத்தூ²ஸு தோ³மனஸ்ஸுப்பத்தியா தோ³ஸபரிளாஹானம் ஸம்ப⁴வோ வேதி³தப்³போ³.

ந லிம்பதி அனுபலித்தசித்தத்தா. ஸீதிபூ⁴தோ நிப்³பு³தஸப்³ப³பரிளாஹத்தா. ஆஸத்தியோ வுச்சந்தி தண்ஹாயோ தத்த² தத்த² ஆஸஞ்ஜனட்டே²ன. த³ரத²ந்தி பரிளாஹஜாதம். சேதஸோதி ஸாமிவசனம்.

ஹத்த²கஸுத்தவண்ணனா நிட்டி²தா.