(16) 6. அசேலகவக்³க³வண்ணனா

157-163. இதோ பரேஸு பன ஸுத்தபதே³ஸு ‘‘கா³ள்ஹா’’தி வுத்தமத்த²ம் விவரந்தோ ‘‘கக்க²ளா’’தி ஆஹ. கக்க²ளசாரோ சஸ்ஸா ந லூக²ஸபா⁴வோ. அத² கோ² தண்ஹாவஸேன தி²ரக்³க³ஹணந்தி ஆஹ ‘‘லோப⁴வஸேன தி²ரக்³க³ஹணா’’தி. அகா³ள்ஹா படிபதா³தி வா காமானம் ஓகா³ஹனம் படிபத்தி, காமஸுகா²னுயோகோ³தி அத்தோ². நிஜ்ஜா²மா படிபதா³தி காயஸ்ஸ நிஜ்ஜா²பனவஸேன கே²பனவஸேன பவத்தா படிபத்தி, அத்தகிலமதா²னுயோகோ³தி அத்தோ². நிச்சேலோதி நிஸ்ஸட்ட²சேலோ ஸப்³பே³ன ஸப்³ப³ம் படிக்கி²த்தசேலோ. நக்³கி³யவதஸமாதா³னேன நக்³கோ³. டி²தகோவ உச்சாரம் கரோதீதிஆதி³ நித³ஸ்ஸனமத்தம் வமித்வா முக²விக்கா²லனாதி³ஆசாரஸ்ஸபி தேன விஸ்ஸட்ட²த்தா. ஜிவ்ஹாய ஹத்த²ம் அபலேக²தி அவலேக²தி உத³கேன அதோ⁴வனதோ. து³தியவிகப்பேபி ஏஸேவ நயோ. ‘‘ஏஹி, ப⁴த³ந்தே’’தி வுத்தே உபக³மனஸங்கா²தோ விதி⁴ ஏஹிப⁴த³ந்தோ, தம் சரதீதி ஏஹிப⁴த³ந்திகோ, தப்படிக்கே²பேன ந ஏஹிப⁴த³ந்திகோ. ந கரோதி ‘‘ஸமணேன நாம பரஸ்ஸ வசனகரேன ந ப⁴விதப்³ப³’’ந்தி அதி⁴ப்பாயேன.

புரேதரந்தி தம் டா²னம் அத்தனோ உபக³மனதோ புரேதரம். தம் கிர ஸோ ‘‘பி⁴க்கு²னா நாம யதி³ச்ச²கா ஏவ பி⁴க்கா² க³ஹேதப்³பா³’’தி அதி⁴ப்பாயேன ந க³ண்ஹாதி. உத்³தி³ஸ்ஸ கதம் மம நிமித்தபா⁴வேன ப³ஹூ கு²த்³த³கா பாணா ஸங்கா⁴தம் ஆபாதி³தாதி ந க³ண்ஹாதி. நிமந்தனம் ந ஸாதி³யதி ஏவம் தேஸம் வசனம் கதம் ப⁴விஸ்ஸதீதி. கும்பி⁴ ஆதீ³ஸுபி ஸோ ஸத்தஸஞ்ஞீதி ஆஹ ‘‘கும்பி⁴-களோபியோ’’திஆதி³. கப³ளந்தராயோ ஹோதீதி உட்டி²தஸ்ஸ த்³வின்னம்பி கப³ளந்தராயோ ஹோதி. கா³மஸபா⁴கா³தி³வஸேன ஸங்க³ம்ம கித்தேந்தி ஏதிஸ்ஸாதி ஸங்கித்தி, யதா²ஸம்ஹததண்டு³லாதி³ஸஞ்சயோ. மானுஸகானீதி வேய்யாவச்சகரா மனுஸ்ஸா.

ஸுராபானமேவாதி மஜ்ஜலக்க²ணப்பத்தாய ஸுராய பானமேவ. ஸுராக³ஹணேனேவேத்த² மேரயம்பி ஸங்க³ஹிதம். ஏகாகா³ரமேவ உஞ்ச²தீதி ஏகாகா³ரிகோ. ஏகாலோபேனேவ வத்ததீதி ஏகாலோபிகோ. தீ³யதி ஏதாயாதி த³த்தி, த்³வத்திஆலோபமத்தக்³கா³ஹி கு²த்³த³கம் பி⁴க்கா²தா³னபா⁴ஜனம். தேனாஹ ‘‘கு²த்³த³கபாதீ’’தி. அபு⁴ஞ்ஜனவஸேன ஏகோ அஹோ ஏதஸ்ஸ அத்தீ²தி ஏகாஹிகோ, ஆஹாரோ, தம் ஏகாஹிகம். ஸோ பன அத்த²தோ ஏகதி³வஸம் லங்க⁴கோ ஹோதீதி ஆஹ ‘‘ஏகாதி³வஸந்தரிக’’ந்தி. த்³வாஹிகந்திஆதீ³ஸுபி ஏஸேவ நயோ. ஏகாஹம் அபு⁴ஞ்ஜித்வா ஏகாஹம் பு⁴ஞ்ஜனம் ஏகாஹவாரோ, தம் ஏகாஹிகமேவ அத்த²தோ. த்³வீஹம் அபு⁴ஞ்ஜித்வா த்³வீஹம் பு⁴ஞ்ஜனம் த்³வீஹவாரோ. ஸேஸபத³த்³வயேபி ஏஸேவ நயோ. உக்கட்டோ² பன பரியாயப⁴த்தபோ⁴ஜனிகோ த்³வீஹம் அபு⁴ஞ்ஜித்வா ஏகாஹமேவ பு⁴ஞ்ஜதி. ஸேஸத்³வயேபி ஏஸேவ நயோ.

மிச்சா²வாயாமவஸேனேவ உக்குடிகவதானுயோகோ³தி ஆஹ ‘‘உக்குடிகவீரியமனுயுத்தோ’’தி. அத்தகிலமதா²னுயோக³ந்தி அத்தனோ கிலமதா²னுயோக³ம், ஸரீரது³க்க²காரணந்தி அத்தோ². ஸரீரபரியாயோ ஹி இத⁴ அத்தஸத்³தோ³ ‘‘அத்தந்தபோ’’திஆதீ³ஸு (ம. நி. 2.413) விய. த்³வே அந்தேதி உபோ⁴ கோடியோ, உபோ⁴ லாமகபடிபத்தியோதி அத்தோ². லாமகம்பி ஹி அந்தோதி வுச்சதி ‘‘அந்தமித³ம், பி⁴க்க²வே, ஜீவிகானம் (ஸம். நி. 3.80; இதிவு. 61), கோட்ட²கோ அந்தோ’’தி ஏவமாதீ³ஸு. மஜ்ஜி²மபடிபதா³ய உப்பத²பா⁴வேன அமனீயா க³ந்தப்³பா³ ஞாதப்³பா³தி அந்தா. ததோ ஏவ லாமகா.

அசேலகவக்³க³வண்ணனா நிட்டி²தா.

பேய்யாலவக்³க³வண்ணனா

164-184. ஸமனுஞ்ஞோதி ஸம்மதே³வ கதானுஞ்ஞோ. தேனாஹ ‘‘ஸமானஜ்ஜா²ஸயோ’’தி. ஸேஸமேத்த² உத்தானமேவ.

இதி மனோரத²பூரணியா அங்கு³த்தரனிகாய-அட்ட²கதா²ய

திகனிபாதவண்ணனாய அனுத்தானத்த²தீ³பனா ஸமத்தா.