(14) 4. யோதா⁴ஜீவவக்³கோ³

1. யோதா⁴ஜீவஸுத்தவண்ணனா

134. சதுத்த²ஸ்ஸ பட²மே யுஜ்ஜ²னம் யோதோ⁴, ஸோ ஆஜீவோ ஏதஸ்ஸாதி யோதா⁴ஜீவோ. யுத்³த⁴முபஜீவதீதி வா ஏதஸ்மிம் அத்தே² யோதா⁴ஜீவோதி நிருத்தினயேன பத³ஸித்³தி⁴ வேதி³தப்³பா³. தேனாஹ ‘‘யுத்³த⁴ம் உபஜீவதீதி யோதா⁴ஜீவோ’’தி. ஸஹ…பே… பஸ்ஸதீதி புப்³ப³பா⁴கே³ விபஸ்ஸனாபஞ்ஞாய ஸம்மஸனவஸேன, மக்³க³க்க²ணே அபி⁴ஸமயவஸேன அத்தபச்சக்கே²ன ஞாணேன பஸ்ஸதி.

யோதா⁴ஜீவஸுத்தவண்ணனா நிட்டி²தா.

2. பரிஸாஸுத்தவண்ணனா

135. து³தியே அப்படிபுச்சி²த்வா வினீதாதி ‘‘தம் கிம் மஞ்ஞத², பி⁴க்க²வே, ரூபம் நிச்சம் வா அனிச்சம் வா’’திஆதி³னா அப்படிபுச்சி²த்வா கேவலம் த⁴ம்மதே³ஸனாவஸேனேவ வினீதபரிஸா. து³ப்³பி³னீதபரிஸாதி து³க்கே²ன வினீதபரிஸா. புச்சி²த்வா வினீதாதி ‘‘தம் கிம் மஞ்ஞத², பி⁴க்க²வே’’திஆதி³னா புச்சி²த்வா அனுமதிக்³க³ஹணவஸேன வினீதா. ஸுவினீதபரிஸாதி ஸுகே²ன வினீதபரிஸா. அனுமதிக்³க³ஹணவஸேன வினயனஞ்ஹி ந து³க்கரம் ஹோதி.

பரிஸாஸுத்தவண்ணனா நிட்டி²தா.

4. உப்பாதா³ஸுத்தவண்ணனா

137. சதுத்தே² உப்பாதா³ வா ததா²க³தானந்தி ததா²க³தானம் உப்பாதே³பி வேனேய்யபுக்³க³லானம் மக்³க³ப²லுப்பத்தி விய ஸங்கா²ரானம் அனிச்சாதி³ஸபா⁴வோ ந ததா²க³துப்பாதா³யத்தோ, அத² கோ² ததா²க³தானம் உப்பாதே³பி அனுப்பாதே³பி ஹோதிமேவாதி வுத்தம் ஹோதி. டி²தாவ ஸா தா⁴தூதி டி²தோ ஏவ ஸோ அனிச்சஸபா⁴வோ ப்³யபி⁴சாராபா⁴வதோ ந கதா³சி ஸங்கா²ரா அனிச்சா ந ஹோதி. காமம் அஸங்க²தா விய தா⁴து ந நிச்சோ ஸோ ஸபா⁴வோ, ததா²பி ஸப்³ப³காலிகோயேவாதி அதி⁴ப்பாயோ.

அபரோ நயோ – டி²தாவ ஸா தா⁴தூதி ‘‘ஸப்³பே³ ஸங்கா²ரா அனிச்சா’’தி ஏஸா தா⁴து ஏஸ ஸபா⁴வோ ததா²க³தானம் உப்பாத³தோ புப்³பே³ உத்³த⁴ஞ்ச அப்படிவிஜ்ஜி²யமானோ ந ததா²க³தேஹி உப்பாதி³தோ, அத² கோ² ஸப்³ப³காலம் ஸப்³பே³ ஸங்கா²ரா அனிச்சா, டி²தாவ ஸா தா⁴து, கேவலம் பன ஸயம்பு⁴ஞாணேன அபி⁴ஸம்பு³ஜ்ஜ²னதோ ‘‘அயம் த⁴ம்மோ ததா²க³தேன அபி⁴ஸம்பு³த்³தோ⁴’’தி பவேத³னதோ ச ததா²க³தோ த⁴ம்மஸ்ஸாமீதி வுச்சதி அபுப்³ப³ஸ்ஸ தஸ்ஸ உப்பாத³னதோ. தேன வுத்தம் ‘‘டி²தாவ ஸா தா⁴தூ’’தி.

அபி⁴ஸம்பு³ஜ்ஜ²தீதி ஞாணேன அபி⁴ஸம்பு³ஜ்ஜ²தி. அபி⁴ஸமேதீதி ஞாணேன அபி⁴ஸமாக³ச்ச²தி. ஆசிக்க²தீதி கதே²தி. தே³ஸேதீதி த³ஸ்ஸேதி. பஞ்ஞாபேதீதி ஜானாபேதி. பட்ட²பேதீதி ஞாணமுகே² ட²பேதி. விவரதீதி விவரித்வா த³ஸ்ஸேதி. விப⁴ஜதீதி விபா⁴க³தோ த³ஸ்ஸேதி. உத்தானீகரோதீதி பாகடம் கரோதி.

அத² வா அபி⁴ஸம்பு³ஜ்ஜ²தீதி பச்சக்க²கரணேன அபி⁴முக²ம் பு³ஜ்ஜ²தி, யாதா²வதோ படிவிஜ்ஜ²தி. ததோ ஏவ அபி⁴ஸமேதி அபி⁴முக²ம் ஸமாக³ச்ச²தி. ஆதி³தோ கதே²ந்தோ ஆசிக்க²தி, உத்³தி³ஸதீதி அத்தோ². தமேவ உத்³தே³ஸம் பரியோஸாபேந்தோ தே³ஸேதி. யதா²உத்³தி³ட்ட²மத்த²ம் நித³ஸ்ஸனவஸேன பகாரேஹி ஞாபேந்தோ பஞ்ஞாபேதி. பகாரேஹி ஏதமத்த²ம் பதிட்ட²பேந்தோ பட்ட²பேதி. யதா²உத்³தி³ட்ட²ம் படினித³ஸ்ஸனவஸேன விவரதி விப⁴ஜதி. விவடம் விப⁴த்தஞ்ச அத்த²ம் ஹேதூதா³ஹரணத³ஸ்ஸனேஹி பாகடம் கரோந்தோ உத்தானீகரோதி.

உப்பாதா³ஸுத்தவண்ணனா நிட்டி²தா.

5-10. கேஸகம்ப³லஸுத்தாதி³வண்ணனா

138-143. பஞ்சமே தந்தாவுதானம் வத்தா²னந்தி இத³ம் ‘‘யானி கானிசீ’’தி இமினா ஸமானாதி⁴கரணந்தி ஆஹ ‘‘பச்சத்தே ஸாமிவசன’’ந்தி. வாயிதானந்தி வீதானம். லாமகோதி நிஹீனோ, மக்க²லி மோக⁴புரிஸோதி ஏத்த² மக்க²லீதி தஸ்ஸ நாமம். தம் கிர ஸகத்³த³மாய பூ⁴மியா தேலக⁴டம் க³ஹேத்வா க³ச்ச²ந்தம், ‘‘தாத, மா க²லீ’’தி ஸாமிகோ ஆஹ. ஸோ பமாதே³ன க²லித்வா பதித்வா ஸாமிகஸ்ஸ ப⁴யேன பலாயிதும் ஆரத்³தோ⁴. ஸாமிகோ உபதா⁴வித்வா நம் து³ஸ்ஸகண்ணே அக்³க³ஹேஸி, ஸாடகம் ச²ட்³டே³த்வா அசேலகோ ஹுத்வா பலாயி. ஸோ பண்ணேன வா திணேன வா படிச்சா²தே³தும்பி அஜானந்தோ ஜாதரூபேனேவ ஏகம் கா³மம் பாவிஸி. மனுஸ்ஸா தம் தி³ஸ்வா ‘‘அயம் ஸமணோ அரஹா அப்பிச்சோ², நத்தி² இமினா ஸதி³ஸோ’’தி பூவப⁴த்தாதீ³னி க³ஹேத்வா உபஸங்கமந்தி. ஸோ ‘‘மய்ஹம் ஸாடகம் அனிவத்த²பா⁴வேன இத³ம் உப்பன்ன’’ந்தி ததோ பட்டா²ய ஸாடகம் லபி⁴த்வாபி ந நிவாஸேஸி, ததே³வ ச பப்³ப³ஜ்ஜம் அக்³க³ஹேஸி. தஸ்ஸ ஸந்திகே அஞ்ஞேபி அஞ்ஞேபீதி பஞ்சஸதா மனுஸ்ஸா பப்³ப³ஜிம்ஸு. தம் ஸந்தா⁴யாஹ ‘‘மக்க²லி மோக⁴புரிஸோ’’தி. ச²ட்டா²தீ³னி உத்தானத்தா²னி ஏவ.

கேஸகம்ப³லஸுத்தாதி³வண்ணனா நிட்டி²தா.

11-13. பட²மமோரனிவாபஸுத்தாதி³வண்ணனா

144-146. ஏகாத³ஸமே அகுப்பத⁴ம்மதாய க²யவயஸங்கா²தம் அந்தம் அதீதாதி அச்சந்தா, ஏவம் அபரிஹாயனஸபா⁴வத்தா அச்சந்தா நிட்டா² அஸ்ஸாதி அச்சந்தனிட்டோ². தேனாஹ ‘‘அந்தம் அதிக்கந்தனிட்டோ²’’திஆதி³. ந ஹி படிவித்³த⁴ஸ்ஸ லோகுத்தரத⁴ம்மஸ்ஸ த³ஸ்ஸனம் குப்பனம் நாம அத்தி². து⁴வனிட்டோ²தி ஸததனிட்டோ². அச்சந்தமேவ சதூஹி யோகே³ஹி கே²மோ ஏதஸ்ஸ அத்தீ²தி அச்சந்தயோக³க்கே²மீ, நிச்சயோக³க்கே²மீதி அத்தோ². மக்³க³ப்³ரஹ்மசரியஸ்ஸ வுஸிதத்தா தஸ்ஸ அவிஹாயனஸபா⁴வத்தா அச்சந்தம் ப்³ரஹ்மசாரீதி அச்சந்தப்³ரஹ்மசாரீ, நிச்சப்³ரஹ்மசாரீதி அத்தோ². பரியோஸானந்தி ப்³ரஹ்மசரியபரியோஸானம் வட்டது³க்க²பரியோஸானஞ்ச. அச்சந்தம் பரியோஸானமஸ்ஸாதி அச்சந்தபரியோஸானோ. த்³வாத³ஸமதேரஸமானி உத்தானத்தா²னேவ.

பட²மமோரனிவாபஸுத்தாதி³வண்ணனா நிட்டி²தா.

யோதா⁴ஜீவவக்³க³வண்ணனா நிட்டி²தா.

147-156. மங்க³லவக்³கோ³ உத்தானத்தோ²யேவ.

ததியபண்ணாஸகம் நிட்டி²தம்.