(12) 2. ஆபாயிகவக்³கோ³

1. ஆபாயிகஸுத்தவண்ணனா

114. து³தியஸ்ஸ பட²மே அபாயேஸு நிப்³ப³த்தனஸீலதாய அபாயூபகா³ ஆபாயிகாதி ஆஹ ‘‘அபாயம் க³ச்சி²ஸ்ஸந்தீதி ஆபாயிகா’’தி. அஞ்ஞே ப்³ரஹ்மசாரினோ ஸுனிவத்தே² ஸுபாருதே ஸும்ப⁴கபத்தத⁴ரே கா³மனிக³மராஜதா⁴னீஸு பிண்டா³ய சரித்வா ஜீவிகம் கப்பேந்தே தி³ஸ்வா ஸயம்பி தாதி³ஸேன ஆகாரேன ததா²படிபஜ்ஜனதோ ‘‘அஹம் ப்³ரஹ்மசாரீ’’தி படிஞ்ஞம் தே³ந்தோ விய ஹோதீதி ஆஹ ‘‘ப்³ரஹ்மசாரிபடிஞ்ஞோதி ப்³ரஹ்மசாரிபடிரூபகோ’’தி. ‘‘அஹம்பி பி⁴க்கூ²’’தி வத்வா உபோஸத²ங்கா³தீ³னி பவிஸந்தோ பன ப்³ரஹ்மசாரிபடிஞ்ஞோ ஹோதியேவ, ததா² ஸங்கி⁴கம் லாப⁴ம் க³ண்ஹந்தோ. தேனாஹ ‘‘தேஸம் வா…பே… ஏவம்படிஞ்ஞோ’’தி. அக்கோஸதீதி ‘‘அஸ்ஸமணோஸி, ஸமணபடிஞ்ஞோஸீ’’திஆதி³னா அக்கோஸதி. பரிபா⁴ஸதீதி ‘‘ஸோ த்வம் ‘ஹோது, முண்ட³கஸமணோ அஹ’ந்தி மஞ்ஞஸி, இதா³னி தே அஸ்ஸமணபா⁴வம் ஆரோபேஸ்ஸாமீ’’திஆதி³னா வத³ந்தோ பரிபா⁴ஸதி.

கிலேஸகாமோபி அஸ்ஸாதி³யமானோ வத்து²காமந்தோக³தோ⁴யேவ, கிலேஸகாமவஸேன ச தேஸம் அஸ்ஸாத³னம் ஸியாதி ஆஹ ‘‘கிலேஸகாமேன வத்து²காமே ஸேவந்தஸ்ஸா’’தி. கிலேஸகாமேனாதி கரணத்தே² கரணவசனம். நத்தி² தோ³ஸோதி அஸ்ஸாதே³த்வா விஸயபரிபோ⁴கே³ நத்தி² ஆதீ³னவோ, தப்பச்சயா ந கோசி அந்தராயோதி அதி⁴ப்பாயோ. பாதப்³ப³தம் ஆபஜ்ஜதீதி பரிபு⁴ஞ்ஜனகதம் உபக³ச்ச²தி. பரிபோ⁴க³த்தோ² ஹி அயம் பா-ஸத்³தோ³, கத்துஸாத⁴னோ ச தப்³ப³-ஸத்³தோ³, யதா²ருசி பரிபு⁴ஞ்ஜதீதி அத்தோ². பிவிதப்³ப³தம் பரிபு⁴ஞ்ஜிதப்³ப³தந்தி ஏத்தா²பி கத்துவஸேனேவ அத்தோ² வேதி³தப்³போ³.

ஆபாயிகஸுத்தவண்ணனா நிட்டி²தா.

2. து³ல்லப⁴ஸுத்தவண்ணனா

115. து³தியே பரேன கதஸ்ஸ உபகாரஸ்ஸ அனுரூபப்பவத்தி அத்தனி கதம் உபகாரம் உபகாரதோ ஜானந்தோ வேதி³யந்தோ கதஞ்ஞூ கதவேதீ³தி ஆஹ ‘‘இமினா மய்ஹம் கத’’ந்திஆதி³.

து³ல்லப⁴ஸுத்தவண்ணனா நிட்டி²தா.

3. அப்பமேய்யஸுத்தவண்ணனா

116. ததியே ஸுகே²ன மேதப்³போ³தி யதா² பரித்தஸ்ஸ உத³கஸ்ஸ ஸுகே²ன பமாணம் க³ய்ஹதி, ஏவமேவ ‘‘உத்³த⁴தோ’’திஆதி³னா யதா²வுத்தேஹி அகு³ணங்கே³ஹி ஸமன்னாக³தஸ்ஸ ஸுகே²ன பமாணம் க³ய்ஹதீதி, ஸுகே²ன மேதப்³போ³. து³க்கே²ன மேதப்³போ³தி யதா² மஹாஸமுத்³த³ஸ்ஸ து³க்கே²ன பமாணம் க³ய்ஹதி, ஏவமேவ ‘‘அனுத்³த⁴தோ’’திஆதி³னா த³ஸ்ஸிதேஹி கு³ணங்கே³ஹி ஸமன்னாக³தஸ்ஸ து³க்கே²ன பமாணம் க³ய்ஹதி, ‘‘அனாகா³மீ நு கோ² கீ²ணாஸவோ நு கோ²’’தி வத்தப்³ப³தம் க³ச்ச²தி, தேனேஸ து³க்கே²ன மேதப்³போ³. பமேதும் ந ஸக்கோதீதி யதா² ஆகாஸஸ்ஸ ந ஸக்கா பமாணம் க³ஹேதும், ஏவம் கீ²ணாஸவஸ்ஸ, தேனேஸ பமேதும் ந ஸக்காதி அப்பமேய்யோ.

ஸாராபா⁴வேன துச்ச²த்தா நளோ விய நளோ, மானோதி ஆஹ ‘‘உன்னளோதி உக்³க³தனளோ’’தி, உட்டி²ததுச்ச²மானோதி வுத்தம் ஹோதி. தேனாஹ ‘‘துச்ச²மானம் உக்கி²பித்வா டி²தோதி அத்தோ²’’தி. மனோ ஹி ஸேய்யஸ்ஸ ஸேய்யோதி ஸதி³ஸோதி ச பவத்தியா விஸேஸதோ துச்சோ². சாபல்லேனாதி சபலபா⁴வேன, தண்ஹாலோலுப்பேனாதி அத்தோ². முக²ரோதி முகே²ன ப²ருஸோ, ப²ருஸவாசோதி அத்தோ². விகிண்ணவாசோதி விஸடவசனோ ஸம்ப²ப்பலாபிதாய அபரியந்தவசனோ. தேனாஹ ‘‘அஸஞ்ஞதவசனோ’’தி, தி³வஸம்பி நிரத்த²கவசனம் பலாபீதி வுத்தம் ஹோதி. சித்தேகக்³க³தாரஹிதோதி உபசாரப்பனாஸமாதி⁴ரஹிதோ சண்ட³ஸோதே ப³த்³த⁴னாவா விய அனவட்டி²தகிரியோ. ப⁴ந்தசித்தோதி அனவட்டி²தசித்தோ பண்ணாருள்ஹவாலமிக³ஸதி³ஸோ. விவடிந்த்³ரியோதி ஸம்வராபா⁴வேன கி³ஹிகாலே விய அஸம்வுதசக்கா²தி³இந்த்³ரியோ.

அப்பமேய்யஸுத்தவண்ணனா நிட்டி²தா.

4. ஆனேஞ்ஜஸுத்தவண்ணனா

117. சதுத்தே² ஸஹ ப்³யயதி க³ச்ச²தீதி ஸஹப்³யோ, ஸஹபவத்தனகோ. தஸ்ஸ பா⁴வோ ஸஹப்³யதா, ஸஹபவத்தீதி ஆஹ ‘‘ஸஹபா⁴வம் உபபஜ்ஜதீ’’தி. ‘‘யாவதகம் தேஸம் தே³வானம் ஆயுப்பமாணம், தம் ஸப்³ப³ம் கே²பேத்வா நிரயம்பி க³ச்ச²தீ’’திஆதி³வசனதோ அரூபப⁴வதோ சுதஸ்ஸ அபாயூபபத்தி வுத்தா விய தி³ஸ்ஸதீதி தன்னிவத்தனத்த²ம் ப⁴க³வதோ அதி⁴ப்பாயம் விவரந்தோ ‘‘ஸந்தா⁴யபா⁴ஸிதமித³ம் வசன’’ந்தி தீ³பேதி ‘‘நிரயாதீ³ஹி அவிப்பமுத்தத்தா’’திஆதி³னா. ந ஹி தஸ்ஸ உபசாரஜ்ஜா²னதோ ப³லவதரம் அகுஸலம் அத்தீ²தி. இமினா ததோ சவந்தானம் உபசாரஜ்ஜா²னமேவ படிஸந்தி⁴ஜனகம் கம்மந்தி தீ³பேதி. அதி⁴கம் பயஸதி பயுஜ்ஜதி ஏதேனாதி அதி⁴ப்பயாஸோ, ஸவிஸேஸம் இதிகத்தப்³ப³கிரியா. தேனாஹ ‘‘அதி⁴கப்பயோகோ³’’தி. ஸேஸமேத்த² உத்தானமேவ.

ஆனேஞ்ஜஸுத்தவண்ணனா நிட்டி²தா.

5. விபத்திஸம்பதா³ஸுத்தவண்ணனா

118. பஞ்சமே தி³ன்னந்தி தே³ய்யத⁴ம்மஸீஸேன தா³னம் வுத்தந்தி ஆஹ ‘‘தி³ன்னஸ்ஸ ப²லாபா⁴வம் ஸந்தா⁴ய வத³தீ’’தி. தி³ன்னம் பன அன்னாதி³வத்து²ம் கத²ம் படிக்கி²பதி. ஏஸ நயோ ‘‘யிட்ட²ம் ஹுத’’ந்தி ஏத்தா²பி. மஹாயாகோ³தி ஸப்³ப³ஸாதா⁴ரணம் மஹாதா³னம். பஹேணகஸக்காரோதி பாஹுனகானம் காதப்³ப³ஸக்காரோ. ப²லந்தி ஆனிஸம்ஸப²லம் நிஸ்ஸந்த³ப²லஞ்ச. விபாகோதி ஸதி³ஸப²லம். பரலோகே டி²தஸ்ஸ அயம் லோகோ நத்தீ²தி பரலோகே டி²தஸ்ஸ கம்முனா லத்³த⁴ப்³போ³ அயம் லோகோ ந ஹோதி. இத⁴லோகே டி²தஸ்ஸபி பரலோகோ நத்தீ²தி இத⁴லோகே டி²தஸ்ஸ கம்முனா லத்³த⁴ப்³போ³ பரலோகோ ந ஹோதி. தத்த² காரணமாஹ ‘‘ஸப்³பே³ தத்த² தத்தே²வ உச்சி²ஜ்ஜந்தீ’’தி. இமே ஸத்தா யத்த² யத்த² ப⁴வயோனிக³திஆதீ³ஸு டி²தா, தத்த² தத்தே²வ உச்சி²ஜ்ஜந்தி, த்³வயவினாஸேன வினஸ்ஸந்தி.

ப²லாபா⁴வவஸேனாதி மாதாபிதூஸு ஸம்மாபடிபத்திமிச்சா²படிபத்தீனம் ப²லஸ்ஸ அபா⁴வவஸேன ‘‘நத்தி² மாதா, நத்தி² பிதா’’தி வத³தி, ந மாதாபிதூனம், நாபி தேஸு ஸம்மாபடிபத்திமிச்சா²படிபத்தீனம் அபா⁴வவஸேன தேஸம் லோகபச்சக்க²த்தா. புப்³பு³ளகஸ்ஸ விய இமேஸம் ஸத்தானம் உப்பாதோ³ நாம கேவலோ, ந ச க²னபுப்³ப³கோதி த³ஸ்ஸனத்த²ம் ‘‘நத்தி² ஸத்தா ஓபபாதிகா’’தி வுத்தந்தி ஆஹ ‘‘சவித்வா உப்பஜ்ஜனகா ஸத்தா நாம நத்தீ²தி வத³தீ’’தி. ஸயம் அபி⁴ஞ்ஞா ஸச்சி²கத்வா பவேதே³ந்தீதி யே இமஞ்ச லோகம் பரஞ்ச லோகம் அபி⁴விஸிட்டா²ய பஞ்ஞாய ஸயம் பச்சக்க²ம் கத்வா பவேதே³ந்தி, தே நத்தீ²தி ஸப்³ப³ஞ்ஞுபு³த்³தா⁴னம் அபா⁴வம் தீ³பேதி.

விபத்திஸம்பதா³ஸுத்தவண்ணனா நிட்டி²தா.

6-7. அபண்ணகஸுத்தாதி³வண்ணனா

119-120. ச²ட்டே² ச²ஹி தலேஹி ஸமன்னாக³தோ பாஸகோதி சதூஸு பஸ்ஸேஸு சத்தாரி தலானி, த்³வீஸு கோடீஸு த்³வே தலானீதி ஏவம் ச²ஹி தலேஹி ஸமன்னாக³தோ பாஸககீளாபஸுதானம் மணிஸதி³ஸோ பாஸகவிஸேஸோ. ஸத்தமம் உத்தானமேவ.

அபண்ணகஸுத்தாதி³வண்ணனா நிட்டி²தா.

8. பட²மஸோசேய்யஸுத்தவண்ணனா

121. அட்ட²மே ஸுசிபா⁴வோதி கிலேஸாஸுசிவிக³மேன ஸுத்³த⁴பா⁴வோ அஸம்கிலிட்ட²பா⁴வோ, அத்த²தோ காயஸுசரிதாதீ³னி.

பட²மஸோசேய்யஸுத்தவண்ணனா நிட்டி²தா.

9. து³தியஸோசேய்யஸுத்தவண்ணனா

122. நவமே ஸமுச்சே²த³வஸேன பஹீனஸப்³ப³காயது³ச்சரிததாய காயே, காயேன வா ஸுசி காயஸுசி. தேனாஹ ‘‘காயத்³வாரே’’திஆதி³. ஸோசேய்யஸம்பன்னந்தி படிப்பஸ்ஸத்³த⁴கிலேஸத்தா பரிஸுத்³தா⁴ய ஸோசேய்யஸம்பத்தியா உபேதம். நின்ஹாதா அக்³க³மக்³க³ஸலிலேன விக்கா²லிதா பாபா ஏதேனாதி நின்ஹாதபாபகோ, கீ²ணாஸவோ. தேனாஹ ‘‘கீ²ணாஸவோவ கதி²தோ’’தி.

து³தியஸோசேய்யஸுத்தவண்ணனா நிட்டி²தா.

10. மோனேய்யஸுத்தவண்ணனா

123. த³ஸமே முனினோ பா⁴வா மோனேய்யானி, யேஹி த⁴ம்மேஹி உப⁴யஹிதமுனனதோ முனி நாம ஹோதி, தே முனிபா⁴வகரா மோனேய்யா படிபதா³ த⁴ம்மா ஏவ வுத்தா. முனினோ வா ஏதானி மோனேய்யானி, யதா²வுத்தத⁴ம்மா ஏவ. தத்த² யஸ்மா காயேன அகத்தப்³ப³ஸ்ஸ அகரணம், கத்தப்³ப³ஸ்ஸ ச கரணம், ‘‘அத்தி² இமஸ்மிம் காயே கேஸா’’திஆதி³னா (தீ³. நி. 2.377; ம. நி. 1.110; ஸம். நி. 4.127; கு². பா. 3.த்³வத்திம்ஸாகார) காயஸங்கா²தஸ்ஸ ஆரம்மணஸ்ஸ ஜானனம், காயஸ்ஸ ச ஸமுத³யதோ அத்த²ங்க³மதோ அஸ்ஸாத³தோ ஆதீ³னவதோ நிஸ்ஸரணதோ ச யாதா²வதோ பரிஜானனதா, ததா² பரிஜானனவஸேன பன பவத்தோ விபஸ்ஸனாமக்³கோ³, தேன ச காயே ச²ந்த³ராக³ஸ்ஸ பஜஹனம், காயஸங்கா²ரம் நிரோதே⁴த்வா பத்தப்³ப³ஸமாபத்தி வா, ஸப்³பே³ ஏதே காயமுகே²ன பவத்தா மோனேய்யப்படிபதா³ த⁴ம்மா காயமோனேய்யம் நாம. தஸ்மா தமத்த²ம் த³ஸ்ஸேதும் ‘‘கதமம் காயமோனேய்யம்? திவித⁴காயது³ச்சரிதஸ்ஸ பஹானம் காயமோனேய்யம், திவித⁴காயஸுசரிதம்பி காயமோனேய்ய’’ந்திஆதி³னா (மஹானி. 14) பாளி ஆக³தா. இதா⁴பி தேனேவ பாளினயேன அத்த²ம் த³ஸ்ஸேந்தோ ‘‘திவித⁴காயது³ச்சரிதப்பஹானம் காயமோனேய்யம் நாமா’’திஆதி³மாஹ.

இதா³னி ‘‘கதமம் வசீமோனேய்யம்? சதுப்³பி³த⁴வசீது³ச்சரிதஸ்ஸ பஹானம் வசீமோனேய்யம், சதுப்³பி³த⁴ம் வசீஸுசரிதம், வாசாரம்மணே ஞாணம், வாசாபரிஞ்ஞா, பரிஞ்ஞாஸஹக³தோ மக்³கோ³, வாசாய ச²ந்த³ராக³ஸ்ஸ பஹானம், வசீஸங்கா²ரனிரோதோ⁴ து³தியஜ்ஜா²னஸமாபத்தி வசீமோனேய்ய’’ந்தி இமாய பாளியா வுத்தமத்த²ம் அதிதீ³பேந்தோ ‘‘வசீமோனேய்யேபி ஏஸேவ நயோ’’திஆதி³மாஹ. தத்த² சோபனவாசஞ்சேவ ஸத்³த³வாசஞ்ச ஆரப்³ப⁴ பவத்தா பஞ்ஞா வாசாரம்மணே ஞாணம். தஸ்ஸா வாசாய ஸமுத³யாதி³தோ பரிஜானனம் வாசாபரிஞ்ஞா.

‘‘கதமம் மனோமோனேய்யம்? திவித⁴மனோது³ச்சரிதஸ்ஸ பஹானம் மனோமோனேய்யம், திவித⁴ம் மனோஸுச்சரிதம், மனாரம்மணே ஞாணம், மனபரிஞ்ஞா, பரிஞ்ஞாஸஹக³தோ மக்³கோ³, மனஸ்மிம் ச²ந்த³ராக³ஸ்ஸ பஹானம், சித்தஸங்கா²ரனிரோதோ⁴ ஸஞ்ஞாவேத³யிதனிரோத⁴ஸமாபத்தி மனோமோனேய்ய’’ந்தி இமாய பாளியா ஆக³தனயேன அத்த²ம் விபா⁴வேந்தோ ‘‘மனோமோனேய்யேபி இமினாவ நயேன அத்த²ம் ஞத்வா’’திஆதி³மாஹ. தத்த² ச ஏகாஸீதிவித⁴ம் லோகியசித்தம் ஆரப்³ப⁴ பவத்தஞாணம் மனாரம்மணே ஞாணம். தஸ்ஸ ஸமுத³யாதி³தோ பரிஜானனம் மனபரிஞ்ஞாதி அயம் விஸேஸோ.

மோனேய்யஸுத்தவண்ணனா நிட்டி²தா.

ஆபாயிகவக்³க³வண்ணனா நிட்டி²தா.