5-7. பட²மஆஜானீயஸுத்தாதி³வண்ணனா

97-99. பஞ்சமே அனுச்ச²விகோதி ரஞ்ஞோ பரிபு⁴ஞ்ஜனயோக்³கோ³. ஹத்த²பாதா³தி³அங்க³ஸமதாயாதி ஹத்த²பாதா³தி³அவயவஸமதாய, ரஞ்ஞோ வா ஸேனாய அங்க³பூ⁴தத்தா ரஞ்ஞோ அங்க³ந்தி வுச்சதி. ஆனேத்வா ஹுனிதப்³ப³ந்தி ஆஹுனம், ஆஹுதீதி அத்த²தோ ஏகந்தி ஆஹ ‘‘ஆஹுதிஸங்கா²தம் பிண்ட³பாத’’ந்தி. தூ³ரதோபி ஆனேத்வா ஸீலவந்தேஸு தா³தப்³ப³ஸ்ஸேதம் அதி⁴வசனம். பிண்ட³பாதந்தி ச நித³ஸ்ஸனமத்தம். ஆனேத்வா ஹுனிதப்³பா³னஞ்ஹி சீவராதீ³னம் சதுன்னம் பச்சயானமேதம் அதி⁴வசனம் ஆஹுனந்தி. தம் அரஹதீதி ஆஹுனேய்யோ. படிக்³க³ஹேதும் யுத்தோதி தஸ்ஸ மஹப்ப²லபா⁴வகரணதோ படிக்³க³ண்ஹிதும் அனுச்ச²விகோ.

பாஹுனகப⁴த்தஸ்ஸாதி தி³ஸவிதி³ஸதோ ஆக³தானம் பியமனாபானம் ஞாதிமித்தானம் அத்தா²ய ஸக்காரே படியத்தஸ்ஸ ஆக³ந்துகப⁴த்தஸ்ஸ. தஞ்ஹி ட²பேத்வா தே ததா²ரூபே பாஹுனகே ஸங்க⁴ஸ்ஸேவ தா³தும் யுத்தம், ஸங்கோ⁴வ தம் படிக்³க³ஹேதும் யுத்தோ. ஸங்க⁴ஸதி³ஸோ ஹி பாஹுனகோ நத்தி². ததா² ஹேஸ ஏகஸ்மிம் பு³த்³த⁴ந்தரே வீதிவத்தே தி³ஸ்ஸதி, கதா³சி அஸங்க்²யேய்யேபி கப்பே வீதிவத்தே. அப்³போ³கிண்ணஞ்ச பியமனாபதாதி³கரேஹி த⁴ம்மேஹி ஸமன்னாக³தோ. ஏவம் பாஹுனமஸ்ஸ தா³தும் யுத்தம், பாஹுனஞ்ச படிக்³க³ஹேதும் யுத்தோதி பாஹுனேய்யோ. அயஞ்ஹேத்த² அதி⁴ப்பாயோ ‘‘ஞாதிமித்தா விப்பவுட்டா² ந சிரஸ்ஸேவ ஸமாக³ச்ச²ந்தி, அனவட்டி²தா ச தேஸு பியமனாபதா, ந ஏவமரியஸங்கோ⁴, தஸ்மா ஸங்கோ⁴வ பாஹுனேய்யோ’’தி.

த³க்க²ந்தி ஏதாய ஸத்தா யதா²தி⁴ப்பேதாஹி ஸம்பத்தீஹி வட்³ட⁴ந்தீதி த³க்கி²ணா, பரலோகம் ஸத்³த³ஹித்வா தா³னம். தம் த³க்கி²ணம் அரஹதி, த³க்கி²ணாய வா ஹிதோ யஸ்மா மஹப்ப²லகரணதாய விஸோதே⁴தீதி த³க்கி²ணேய்யோ.

புஞ்ஞத்தி²கேஹி அஞ்ஜலி கரணீயோ ஏத்தா²தி அஞ்ஜலிகரணீயோ. உபோ⁴ ஹேத்த² ஸிரஸி பதிட்டா²பேத்வா ஸப்³ப³லோகேன கயிரமானம் அஞ்ஜலிகம்மம் அரஹதீதி வா அஞ்ஜலிகரணீயோ. தேனாஹ ‘‘அஞ்ஜலிபக்³க³ஹணஸ்ஸ அனுச்ச²விகோ’’தி.

யதி³பி பாளியம் ‘‘அனுத்தர’’ந்தி வுத்தம், நத்தி² இதோ உத்தரம் விஸிட்ட²ந்தி ஹி அனுத்தரம், ஸமம்பிஸ்ஸ பன நத்தீ²தி த³ஸ்ஸேந்தோ ‘‘அஸதி³ஸ’’ந்தி ஆஹ. கி²த்தம் வுத்தம் பீ³ஜம் மஹப்ப²லபா⁴வகரணேன தாயதி ரக்க²தி, கி²பந்தி வபந்தி ஏத்த² பீ³ஜானீதி வா கே²த்தம், கேதா³ராதி³, கே²த்தம் விய கே²த்தம், புஞ்ஞானம் கே²த்தம் புஞ்ஞக்கே²த்தம். யதா² ஹி ரஞ்ஞோ வா அமச்சஸ்ஸ வா ஸாலீனம் வா யவானம் வா விருஹனட்டா²னம் ‘‘ரஞ்ஞோ ஸாலிக்கே²தம் யவக்கே²த’’ந்தி வுச்சதி, ஏவம் ஸங்கோ⁴ ஸப்³ப³லோகஸ்ஸ புஞ்ஞானம் விருஹனட்டா²னம். ஸங்க⁴ம் நிஸ்ஸாய ஹி லோகஸ்ஸ நானப்பகாரஹிதஸுக²ஸம்வத்தனிகானி புஞ்ஞானி விருஹந்தி, தஸ்மா ஸங்கோ⁴ அனுத்தரம் புஞ்ஞக்கே²த்தம் லோகஸ்ஸ. ஸேஸம் ஸுவிஞ்ஞேய்யமேவ. ச²ட்ட²ஸத்தமானி உத்தானத்தா²னேவ.

பட²மஆஜானீயஸுத்தாதி³வண்ணனா நிட்டி²தா.