(15) 5. ஸமாபத்திவக்³க³வண்ணனா

164. பஞ்சமஸ்ஸ பட²மே ‘‘இதோ புப்³பே³ பரிகம்மம் பவத்தம், இதோ பரம் ப⁴வங்க³ம் மஜ்ஜே² ஸமாபத்தீ’’தி ஏவம் ஸஹ பரிகம்மேன அப்பனாபரிச்சே²த³ப்பஜானனா பஞ்ஞா ஸமாபத்திகுஸலதா. வுட்டா²னே குஸலபா⁴வோ வுட்டா²னகுஸலதா. பகே³வ வுட்டா²னபரிச்சே²த³கஞாணந்தி ஏவமேத்த² அத்தோ² த³ட்ட²ப்³போ³.

165. து³தியே உஜுனோ பா⁴வோ அஜ்ஜவம், அஜிம்ஹதா அகுடிலதா அவங்கதாதி அத்தோ². அபி⁴த⁴ம்மேபி (த⁴. ஸ. 1346) வுத்தம் – ‘‘தத்த² கதமோ அஜ்ஜவோ? யா அஜ்ஜவதா அஜிம்ஹதா அகுடிலதா அவங்கதா, அயம் வுச்சதி அஜ்ஜவோ’’தி. அனஜ்ஜவஞ்ச அஜ்ஜவப்படிக்கே²பேன வேதி³தப்³ப³ம். கோ³முத்தவங்கதா, சந்த³லேகா²வங்கதா, நங்க³லகோடிவங்கதாதி ஹி தயோ அனஜ்ஜவா. ஏகச்சோ ஹி பி⁴க்கு² பட²மவயே மஜ்ஜி²ம-பச்சி²மவயே ச ஏகவீஸதியா அனேஸனாஸு ச²ஸு ச அகோ³சரேஸு சரதி, அயம் கோ³முத்தவங்கதா நாம, ஆதி³தோ பட்டா²ய யாவ பரியோஸானா படிபத்தியா வங்கபா⁴வதோ. ஏகோ பட²மவயே பச்சி²மவயே ச சதுபாரிஸுத்³தி⁴ஸீலம் பூரேதி, லஜ்ஜீ குக்குச்சகோ ஸிக்கா²காமோ ஹோதி, மஜ்ஜி²மவயே புரிமஸதி³ஸோ, அயம் சந்த³லேகா²வங்கதா நாம, படிபத்தியா மஜ்ஜ²ட்டா²னே வங்கபா⁴வாபத்திதோ. ஏகோ பட²மவயேபி மஜ்ஜி²மவயேபி சதுபாரிஸுத்³தி⁴ஸீலம் பூரேதி, லஜ்ஜீ குக்குச்சகோ ஸிக்கா²காமோ ஹோதி, பச்சி²மவயே புரிமஸதி³ஸோ, அயம் நங்க³லகோடிவங்கதா நாம, பரியோஸானே வங்கபா⁴வாபத்திதோ. ஏகோ ஸப்³ப³ம்பேதம் வங்கதம் பஹாய தீஸு வயேஸு பேஸலோ லஜ்ஜீ குக்குச்சகோ ஸிக்கா²காமோ ஹோதி, தஸ்ஸ யோ ஸோ உஜுபா⁴வோ, இத³ம் அஜ்ஜவம் நாம, ஸப்³ப³த்த² உஜுபா⁴வஸித்³தி⁴தோ.

மத்³த³வந்தி ஏத்த² ‘‘லஜ்ஜவ’’ந்திபி பட²ந்தி. ஏவம் பனேத்த² அத்தோ² – ‘‘தத்த² கதமோ லஜ்ஜவோ? யோ ஹிரீயதி ஹிரீயிதப்³பே³ன ஹிரீயதி பாபகானம் அகுஸலானம் த⁴ம்மானம் ஸமாபத்தியா, அயம் வுச்சதி லஜ்ஜவோ’’தி ஏவம் வுத்தோ லஜ்ஜிபா⁴வோ லஜ்ஜவம் நாம. இத³ம் பனேத்த² நிப்³ப³சனம் – லஜ்ஜதீதி லஜ்ஜோ, ஹிரிமா, தஸ்ஸ பா⁴வோ லஜ்ஜவம், ஹிரீதி அத்தோ². லஜ்ஜா ஏதஸ்ஸ அத்தீ²தி லஜ்ஜீ யதா² ‘‘மாலீ மாயீ’’தி, தஸ்ஸ பா⁴வோ லஜ்ஜிபா⁴வோ, ஸா ஏவ லஜ்ஜா.

166. ததியே அதி⁴வாஸனக²ந்தீதி ஏத்த² அதி⁴வாஸனம் வுச்சதி க²மனம். தஞ்ஹி பரேஸம் து³க்கடம் து³ருத்தஞ்ச படிவிரோதா⁴கரணேன அத்தனோ உபரி ஆரோபேத்வா வாஸனதோ ‘‘அதி⁴வாஸன’’ந்தி வுச்சதி. அதி⁴வாஸனலக்க²ணா க²ந்தி அதி⁴வாஸனக²ந்தி. ஸுசிஸீலதா ஸோரச்சம். ஸா ஹி ஸோப⁴னகம்மரததா. ஸுட்டு² வா பாபதோ ஓரதபா⁴வோ விரததாதி ஆஹ ‘‘ஸுரதபா⁴வோ’’தி. தேனேவ அபி⁴த⁴ம்மேபி (த⁴. ஸ. 1349) –

‘‘தத்த² கதமம் ஸோரச்சம்? யோ காயிகோ அவீதிக்கமோ வாசஸிகோ அவீதிக்கமோ காயிகவாசஸிகோ அவீதிக்கமோ, இத³ம் வுச்சதி ஸோரச்சம், ஸப்³போ³பி ஸீலஸம்வரோ ஸோரச்ச’’ந்தி – ஆக³தோ.

167. சதுத்தே² ஸகி²லோ வுச்சதி ஸண்ஹவாசோ, தஸ்ஸ பா⁴வோ ஸாக²ல்யம், ஸண்ஹவாசதா. தேனாஹ ‘‘ஸண்ஹவாசாவஸேன ஸம்மோத³மானபா⁴வோ’’தி. ஸண்ஹவாசாவஸேன ஹி ஸம்மோத³மானஸ்ஸ புக்³க³லஸ்ஸ பா⁴வோ நாம ஸண்ஹவாசதா. தேனேவ அபி⁴த⁴ம்மே (த⁴. ஸ. 1350) –

‘‘தத்த² கதமம் ஸாக²ல்யம்? யா ஸா வாசா அண்ட³கா கக்கஸா பரகடுகா பராபி⁴ஸஜ்ஜனீ கோத⁴ஸாமந்தா அஸமாதி⁴ஸம்வத்தனிகா, ததா²ரூபிம் வாசம் பஹாய யா ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா, ததா²ரூபிம் வாசம் பா⁴ஸிதா ஹோதி, யா தத்த² ஸண்ஹவாசதா ஸகி²லவாசதா அப²ருஸவாசதா, இத³ம் வுச்சதி ஸாக²ல்ய’’ந்தி வுத்தம்.

தத்த² அண்ட³காதி ஸதோ³ஸே ஸவணே ருக்கே² நிய்யாஸபிண்டோ³, அஹிச்ச²த்தாதீ³னி வா உட்டி²தானி அண்ட³கானீதி வத³ந்தி, பே²க்³கு³ருக்க²ஸ்ஸ பன குதி²தஸ்ஸ அண்டா³னி விய உட்டி²தா சுண்ணபிண்டி³யோ வா க³ண்டி²யோ வா அண்ட³கா. இத⁴ பன ப்³யாபஜ்ஜனகக்கஸாதி³ஸபா⁴வதோ கண்டகப்படிபா⁴கே³ன வாசா அண்ட³காதி வுத்தா. பது³மனாளம் விய ஸோதம் க⁴ம்ஸயமானா பவிஸந்தீ கக்கஸா த³ட்ட²ப்³பா³. கோதே⁴ன நிப்³ப³த்தா தஸ்ஸ பரிவாரபூ⁴தா கோத⁴ஸாமந்தா. புரே ஸம்வத்³த⁴னாரீ போரீ. ஸா விய ஸுகுமாரா முது³கா வாசா போரீ வியாதி போரீ. ஸண்ஹவாசதாதிஆதி³னா தம் வாசம் பவத்தமானம் த³ஸ்ஸேதி.

168. பஞ்சமே ‘‘அவிஹிம்ஸாதி கருணாபுப்³ப³பா⁴கோ³’’தி ஏத்தகமேவ இத⁴ வுத்தம், தீ³க⁴னிகாயட்ட²கதா²ய ஸங்கீ³திஸுத்தவண்ணனாயம் (தீ³. நி. அட்ட². 3.304) பன ‘‘அவிஹிம்ஸாதி கருணாபி கருணாபுப்³ப³பா⁴கோ³பீ’’தி வுத்தம். அபி⁴த⁴ம்மேபி (விப⁴. 182) ‘‘தத்த² கதமா அவிஹிம்ஸா? யா ஸத்தேஸு கருணா கருணாயனா கருணாயிதத்தம் கருணாசேதோவிமுத்தி, அயம் வுச்சதி அவிஹிம்ஸா’’தி ஆக³தம். ஏத்தா²பி ஹி யா காசி கருணா ‘‘கருணா’’தி வுத்தா, கருணாசேதோவிமுத்தி பன அப்பனாப்பத்தாவ.

ஸுசிஸத்³த³தோ பா⁴வே யகாரம் இகாரஸ்ஸ ச உகாராதே³ஸம் கத்வா அயம் நித்³தே³ஸோதி ஆஹ ‘‘ஸோசப்³யம் ஸுசிபா⁴வோ’’தி. ஏத்த² ச ஸோசப்³யந்தி ஸீலவஸேன ஸுசிபா⁴வோதி வுத்தம். தீ³க⁴னிகாயட்ட²கதா²ய ஸங்கீ³திஸுத்தவண்ணனாயம் (தீ³. நி. அட்ட². 3.304) பன ‘‘ஸோசேய்யந்தி மேத்தாய ச மேத்தாபுப்³ப³பா⁴க³ஸ்ஸ ச வஸேன ஸுசிபா⁴வோ’’தி வுத்தம். தேனேவ அபி⁴த⁴ம்மேபி ‘‘தத்த² கதமம் ஸோசப்³யம்? யா ஸத்தேஸு மேத்தி மேத்தாயனா மேத்தாயிதத்தம் மேத்தாசேதோவிமுத்தி, இத³ம் வுச்சதி ஸோசப்³ய’’ந்தி நித்³தே³ஸோ கதோ. ஏத்தா²பி ஹி ‘‘மேத்தீ’’திஆதி³னா யா காசி மேத்தா வுத்தா, மேத்தாசேதோவிமுத்தி பன அப்பனாப்பத்தாவ.

169-171. ச²ட்ட²ஸத்தமஅட்ட²மானி ஹேட்டா² வுத்தனயானேவ.

172. நவமே காமம் ஸம்பயுத்தத⁴ம்மேஸு தி²ரபா⁴வோபி ப³லட்டோ² ஏவ, படிபக்கே²ஹி பன அகம்பனீயதம் ஸாதிஸயம் ப³லட்டோ²தி வுத்தம் ‘‘முட்ட²ஸ்ஸச்சே அகம்பனேனா’’திஆதி³.

173. த³ஸமே பச்சனீகத⁴ம்மஸமனதோ ஸமதோ², ஸமாதீ⁴தி ஆஹ ‘‘ஸமதோ²தி சித்தேகக்³க³தா’’தி. அனிச்சாதி³னா விவிதே⁴னாகாரேன த³ஸ்ஸனதோ பஸ்ஸனதோ விபஸ்ஸனா, பஞ்ஞாதி ஆஹ ‘‘ஸங்கா²ரபரிக்³கா³ஹகஞாண’’ந்தி.

174. ஏகாத³ஸமே து³ஸ்ஸீல்யந்தி ஸமாதி³ன்னஸ்ஸ ஸீலஸ்ஸ பே⁴த³கரோ வீதிக்கமோ. தி³ட்டி²விபத்தீதி ‘‘அத்தி² தி³ன்ன’’ந்திஆதி³னயப்பவத்தாய ஸம்மாதி³ட்டி²யா தூ³ஸிகா மிச்சா²தி³ட்டீ²தி ஆஹ ‘‘தி³ட்டி²விபத்தீதி மிச்சா²தி³ட்டீ²’’தி.

175. த்³வாத³ஸமே ஸீலஸம்பதா³தி ஸப்³ப³பா⁴க³தோ தஸ்ஸ அனூனதாபத்தி பரிபுண்ணபா⁴வோ ஸீலஸம்பதா³. பரிபூரணத்தோ² ஹேத்த² ஸம்பதா³ஸத்³தோ³. தேனேவாஹ ‘‘பரிபுண்ணஸீலதா’’தி. தி³ட்டி²ஸம்பதா³தி அத்தி²கதி³ட்டி²ஆதி³ஸம்மாதி³ட்டி²பாரிபூரிபா⁴வேன பவத்தம் ஞாணம். தஞ்ச கம்மஸ்ஸகதாஸம்மாதி³ட்டி²ஆதி³வஸேன பஞ்சவித⁴ம் ஹோதீதி ஆஹ ‘‘தேன கம்மஸ்ஸகதா’’தி.

176. தேரஸமே ஸீலவிஸுத்³தீ⁴தி விஸுத்³தி⁴ம் பாபேதும் ஸமத்த²ம் ஸீலம், சித்தவிஸுத்³தி⁴ஆதி³உபரிவிஸுத்³தி⁴யா பச்சயோ ப⁴விதும் ஸமத்த²ம் விஸுத்³த⁴ஸீலந்தி வுத்தம் ஹோதி. ஸுவிஸுத்³த⁴மேவ ஹி ஸீலம் தஸ்ஸா பத³ட்டா²னம் ஹோதி. தேனாஹ ‘‘ஸீலவிஸுத்³தீ⁴ஹி விஸுத்³தி⁴ஸம்பாபகம் ஸீல’’ந்தி. ஏத்தா²பி விஸுத்³தி⁴ஸம்பாபகந்தி சித்தவிஸுத்³தி⁴ஆதி³உபரிவிஸுத்³தி⁴யா ஸம்பாபகந்தி அத்தோ² த³ட்ட²ப்³போ³. அபி⁴த⁴ம்மே (த⁴. ஸ. 1372) பனாயம் ‘‘தத்த² கதமா ஸீலவிஸுத்³தி⁴? காயிகோ அவீதிக்கமோ வாசஸிகோ அவீதிக்கமோ காயிகவாசஸிகோ அவீதிக்கமோ, அயம் வுச்சதி ஸீலவிஸுத்³தீ⁴’’தி ஏவம் விப⁴த்தா.

தி³ட்டி²விஸுத்³தீ⁴தி விஸுத்³தி⁴ம் பாபேதும் ஸமத்த²ம் த³ஸ்ஸனஞாணம் த³ஸ்ஸனவிஸுத்³தி⁴, பரமத்த²விஸுத்³தி⁴ம் நிப்³பா³னஞ்ச பாபேதும் உபனேதும் ஸமத்த²ம் கம்மஸ்ஸகதஞாணாதி³ ஸம்மாத³ஸ்ஸனந்தி அத்தோ². தேனாஹ ‘‘விஸுத்³தி⁴ஸம்பாபிகா…பே… பஞ்சவிதா⁴பி வா ஸம்மாதி³ட்டீ²’’தி. ஏத்தா²பி விஸுத்³தி⁴ஸம்பாபிகாதி ஞாணத³ஸ்ஸனவிஸுத்³தி⁴யா த³ஸ்ஸனனிப்³பா³னஸங்கா²தாய பரமத்த²விஸுத்³தி⁴யா ச ஸம்பாபிகாதி ஏவமத்தோ² த³ட்ட²ப்³போ³. அபி⁴த⁴ம்மே (த⁴. ஸ. 1373) பனாயம் ‘‘தத்த² கதமா தி³ட்டி²விஸுத்³தி⁴? கம்மஸ்ஸகதஞாணம், ஸச்சானுலோமிகம் ஞாணம், மக்³க³ஸ்ஸ மக்³க³ஸமங்கி³ஸ்ஸ ஞாணம், ப²லஸமங்கி³ஸ்ஸ ஞாண’’ந்தி ஏவம் வுத்தம்.

ஏத்த² ச இத³ம் அகுஸலகம்மம் நோ ஸகம், இத³ம் பன கம்மம் ஸகந்தி ஏவம் ப்³யதிரேகதோ அன்வயதோ ச கம்மஸ்ஸகதஜானனஞாணம் கம்மஸ்ஸகதஞாணம். திவித⁴து³ச்சரிதஞ்ஹி அத்தனா கதம்பி பரேன கதம்பி நோ ஸககம்மம் நாம ஹோதி அத்த²ப⁴ஞ்ஜனதோ, ஸுசரிதம் ஸககம்மம் நாம அத்த²ஜனனதோ. விபஸ்ஸனாஞாணம் பன வசீஸச்சஞ்ச அனுலோமேதி, பரமத்த²ஸச்சஞ்ச ந விலோமேதீதி ஸச்சானுலோமிகஞாணந்தி வுத்தம். விபஸ்ஸனாஞாணஞ்ஹி லக்க²ணானி படிவிஜ்ஜ²னத்த²ம் ஆரம்ப⁴காலே ‘‘அனிச்சம் து³க்க²ம் அனத்தா’’தி பவத்தம் வசீஸச்சஞ்ச அனுலோமேதி, ததே²வ படிவிஜ்ஜ²னதோ பரமத்த²ஸச்சம் நிப்³பா³னஞ்ச ந விலோமேதி ந விராதே⁴தி ஏகந்தேனேவ ஸம்பாபனதோ.

177. சுத்³த³ஸமே தி³ட்டி²விஸுத்³தீ⁴தி பட²மமக்³க³ஸம்மாதி³ட்டி² வுத்தா. யதா²தி³ட்டி²ஸ்ஸ ச பதா⁴னந்தி தம்ஸம்பயுத்தமேவ வீரியம். தேனேவ தீ³க⁴னிகாயட்ட²கதா²யம் (தீ³. நி. அட்ட². 3.304) ‘‘தி³ட்டி²விஸுத்³தீ⁴தி ஞாணத³ஸ்ஸனம் கதி²தம். யதா²தி³ட்டி²ஸ்ஸ ச பதா⁴னந்தி தம்ஸம்பயுத்தமேவ வீரிய’’ந்தி வுத்தம். ஏத்த² ஹி ஞாணத³ஸ்ஸனந்தி ஞாணபூ⁴தம் த³ஸ்ஸனம். தேன த³ஸ்ஸனமக்³க³ம் வத³தி. தம்ஸம்பயுத்தமேவ வீரியந்தி பட²மமக்³க³ஸம்பயுத்தவீரியமாஹ. அபிச தி³ட்டி²விஸுத்³தீ⁴தி ஸப்³பா³பி மக்³க³ஸம்மாதி³ட்டி². யதா²தி³ட்டி²ஸ்ஸ ச பதா⁴னந்தி தம்ஸம்பயுத்தமேவ வீரியம். தேனேவ தீ³க⁴னிகாயட்ட²கதா²யம் ‘‘அபிச புரிமபதே³ன சதுமக்³க³ஞாணம், பச்சி²மபதே³ன தம்ஸம்பயுத்தம் வீரிய’’ந்தி வுத்தம்.

அத² வா தி³ட்டீ²விஸுத்³தீ⁴தி கம்மஸ்ஸகதஞாணாதி³ஸங்கா²தா ஸப்³பா³பி ஸம்மாதி³ட்டி² வுத்தா. யதா²தி³ட்டி²ஸ்ஸ ச பதா⁴னந்தி யோ சேதஸிகோ வீரியாரம்போ⁴…பே… ஸம்மாவாயாமோதி. அயமேவ பாளியா ஸமேதி. அபி⁴த⁴ம்மே ஹி ‘‘தி³ட்டி²விஸுத்³தி⁴ கோ² பனாதி யா பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி². யதா²தி³ட்டி²ஸ்ஸ ச பதா⁴னந்தி யோ சேதஸிகோ வீரியாரம்போ⁴…பே… ஸம்மாவாயாமோ’’தி ஏவமயம் து³கோ விப⁴த்தோ. தேனேவ அபி⁴த⁴ம்மட்ட²கதா²யம் (த⁴. ஸ. அட்ட². 1374) ‘‘யா பஞ்ஞா பஜானனாதிஆதீ³ஹி ஹேட்டா² வுத்தானி கம்மஸ்ஸகதஞாணாதீ³னேவ சத்தாரி ஞாணானி விப⁴த்தானி. ‘யோ சேதஸிகோ வீரியாரம்போ⁴’திஆதீ³ஹி பதே³ஹி நித்³தி³ட்ட²ம் வீரியம் க³ஹிதம் பஞ்ஞாய லோகியட்டா²னே லோகியம், லோகுத்தரட்டா²னே லோகுத்தர’’ந்தி வுத்தம்.

இதா⁴பி விஸுத்³தி⁴ஸம்பாபிகா சதுமக்³க³ஸம்மாதி³ட்டி², பஞ்சவிதா⁴பி வா ஸம்மாதி³ட்டி² தி³ட்டி²விஸுத்³தீ⁴தி அதி⁴ப்பாயேன ‘‘தி³ட்டி²விஸுத்³தீ⁴தி விஸுத்³தி⁴ஸம்பாபிகா ஸம்மாதி³ட்டி²யேவா’’தி வுத்தம். ஹேட்டி²மமக்³க³ஸம்பயுத்தம் வீரியந்தி இத³ம் பன ‘‘யதா²தி³ட்டி²ஸ்ஸ ச பதா⁴னந்தி பட²மமக்³க³ஸம்பயுத்தம் வீரியந்தி வுத்த’’ந்தி அதி⁴ப்பாயேன வத³தி. ஏத்த² ச தம்தம்பா⁴ணகானம் மதபே⁴தே³னாயம் வண்ணனாபே⁴தோ³தி ந அட்ட²கதா²வசனானம் அஞ்ஞமஞ்ஞவிரோதோ⁴ ஸங்கிதப்³போ³. அத² யதா²தி³ட்டி²ஸ்ஸ ச பதா⁴னந்தி ஹேட்டி²மமக்³க³ஸம்பயுத்தமேவ வீரியம் கஸ்மா வுத்தந்தி ஆஹ ‘‘தஞ்ஹி தஸ்ஸா தி³ட்டி²யா அனுரூபத்தா’’திஆதி³. தத்த² தஸ்ஸா தி³ட்டி²யாதி ஹேட்டி²மமக்³க³ஸம்பயுத்தாய தி³ட்டி²யா. யதா²தி³ட்டி²ஸ்ஸாதி அனுரூபதி³ட்டி²ஸ்ஸ கல்யாணதி³ட்டி²ஸ்ஸ நிப்³ப³த்திதப்பகாரதி³ட்டி²ஸ்ஸ வா நிப்³ப³த்தேதப்³ப³பதா⁴னானுரூபதி³ட்டி²ஸ்ஸ யதா²தி³ட்டி²ப்பவத்தகிரியஸ்ஸ வாதி ஏவம்பேத்த² அத்த²ம் ஸம்வண்ணயந்தி.

178. பன்னரஸமே ஸமத்தம் துஸ்ஸனம் தித்தி ஸந்துட்டி², நத்தி² ஏதஸ்ஸ ஸந்துட்டீ²தி அஸந்துட்டி², அஸந்துட்டி²ஸ்ஸ பா⁴வோ அஸந்துட்டி²தா. யா குஸலானம் த⁴ம்மானம் பா⁴வனாய அஸந்துட்ட²ஸ்ஸ பி⁴ய்யோகம்யதா, தஸ்ஸா ஏதம் அதி⁴வசனம். தாய ஹி ஸமங்கி³பூ⁴தோ புக்³க³லோ ஸீலம் பூரேத்வா ஜா²னம் உப்பாதே³தி, ஜா²னம் லபி⁴த்வா விபஸ்ஸனம் ஆரப⁴தி, ஆரத்³த⁴விபஸ்ஸகோ அரஹத்தம் அக்³க³ஹேத்வா அந்தரா வோஸானம் நாபஜ்ஜதி, ‘‘அலமேத்தாவதா கதமேத்தாவதா’’தி ஸங்கோசம் ந பாபுணாதி. தேனாஹ ‘‘அஞ்ஞத்ர அரஹத்தமக்³கா³ குஸலேஸு த⁴ம்மேஸு அஸந்துட்டி²பா⁴வோ’’தி. தத்ர அஞ்ஞத்ர அரஹத்தமக்³கா³தி அரஹத்தமக்³க³ஸம்பத்தம் வினாதி அத்தோ². ‘‘அப்படிவானிதா ச பதா⁴னஸ்மி’’ந்தி இத³ம் ஹேட்டா² வுத்தனயத்தா உத்தானத்த²மேவாதி ந விப⁴த்தம்.

179. ஸோளஸமே முட்டா² நட்டா² ஸதி ஏதஸ்ஸாதி முட்ட²ஸ்ஸதி, தஸ்ஸ பா⁴வோ முட்ட²ஸ்ஸச்சந்தி ஆஹ ‘‘முட்ட²ஸ்ஸச்சந்தி முட்ட²ஸ்ஸதிபா⁴வோ’’தி. முட்ட²ஸ்ஸதிபா⁴வோதி ச ஸதிப்படிபக்கோ² த⁴ம்மோ, ந ஸதியா அபா⁴வமத்தம். அஸம்பஜஞ்ஞந்தி ‘‘தத்த² கதமம் அஸம்பஜஞ்ஞம்? யம் அஞ்ஞாணம் அத³ஸ்ஸனம்…பே… அவிஜ்ஜாலங்கீ⁴ மோஹோ அகுஸலமூல’’ந்தி (த⁴. ஸ. 1357) ஏவம் வுத்தா அவிஜ்ஜாயேவ. ததா² ஹி விஜ்ஜாபடிபக்கோ² அவிஜ்ஜா விஜ்ஜாய பஹாதப்³ப³தோ, ஏவம் ஸம்பஜஞ்ஞப்படிபக்கோ² அஸம்பஜஞ்ஞம். யஸ்மா பன ஸம்பஜஞ்ஞப்படிபக்கே² ஸதி தஸ்ஸ வஸேன ஞாணஸ்ஸ அபா⁴வோ ஹோதி, தஸ்மா வுத்தம் ‘‘அஞ்ஞாணபா⁴வோ’’தி.

180. ஸத்தரஸமே அபிலாபனலக்க²ணா ஸதீதி உத³கே லாபு³ விய யேன சித்தம் ஆரம்மணே பிலவித்வா விய திட்ட²தி, ந ஓகா³ஹதி, தம் பிலாபனம். ந பிலாபனம் அபிலாபனம், தம் லக்க²ணம் ஸபா⁴வோ ஏதிஸ்ஸாதி அபிலாபனலக்க²ணா.

ஸமாபத்திவக்³க³வண்ணனா நிட்டி²தா.

ததியபண்ணாஸகம் நிட்டி²தம்.