1. கோத⁴பேய்யாலம்

181. இதோ பரேஸு கோத⁴வக்³கா³தீ³ஸு உபனந்த⁴னலக்க²ணோதி குஜ்ஜ²னவஸேன ‘‘அக்கோச்சி² மம் அவதி⁴ ம’’ந்திஆதி³னா (த⁴. ப. 3, 4) சித்தபரியோனந்த⁴னலக்க²ணோ. புப்³ப³காலிகம் கோத⁴ம் உபனய்ஹதி ப³ந்த⁴தி, குஜ்ஜ²னாகாரம் பப³ந்த⁴தி க⁴டேதி. ஆகா⁴தவத்து²னா சித்தம் ப³ந்த⁴ந்தீ விய ஹோதீதி அபரகாலோ கோதோ⁴ உபனாஹோ. ஸுட்டு² கதம் காரணம் உபகாரோ ஸுகதகாரணம், தஸ்ஸ புப்³ப³காரிதாலக்க²ணஸ்ஸ கு³ணஸ்ஸ மக்க²னம் உத³கபுஞ்ச²னியா விய ஸரீரானுக³தஸ்ஸ உத³கஸ்ஸ புஞ்ச²னம் வினாஸனம் லக்க²ணமேதஸ்ஸாதி ஸுகதகரணமக்க²னலக்க²ணோ. ததா² ஹி ஸோ பரேஸம் கு³ணானம் மக்க²னட்டே²ன மக்கோ²தி வுச்சதி. ப³ஹுஸ்ஸுதேபி புக்³க³லே அஜ்ஜோ²த்த²ரிம்ஸு, ‘‘ஈதி³ஸஸ்ஸ ச ப³ஹுஸ்ஸுதஸ்ஸ அனியதா க³ஹிதா, தவ ச மம ச கோ விஸேஸோ’’திஆதி³னா நயேன உப்பஜ்ஜமானோ யுக³க்³கா³ஹீ பலாஸோதி ஆஹ ‘‘யுக³க்³கா³ஹலக்க²ணோ பலாஸோ’’தி. தத்த² யுக³க்³கா³ஹோ நாம ஸமது⁴ரக்³கா³ஹோ, அஸமம்பி அத்தனா ஸமம் கத்வா க³ண்ஹனம். பலாஸதீதி பலாஸோ, பரேஸம் கு³ணே ட³ம்ஸித்வா த³ந்தேஹி விய சி²ந்தி³த்வா அத்தனோ கு³ணேஹி ஸமே கரோதீதி அத்தோ².

உஸூயனலக்க²ணாதி பரேஸம் ஸக்காராதீ³னி கி²ய்யனலக்க²ணா. மச்சே²ரஸ்ஸ பா⁴வோ மச்ச²ரியம். தஞ்ச ஆவாஸமச்ச²ரியாதி³வஸேன பஞ்சவித⁴ந்தி ஆஹ ‘‘பஞ்சமச்சே²ரபா⁴வோ மச்ச²ரிய’’ந்தி. மச்ச²ராயனலக்க²ணந்தி அத்தனோ ஸம்பத்தியா பரேஹி ஸாதா⁴ரணபா⁴வே அஸஹனலக்க²ணம். கதப்படிச்சா²த³னலக்க²ணாதி கதபாபப்படிச்சா²த³னலக்க²ணா. கேராடிகபா⁴வேன உப்பஜ்ஜமானம் ஸாடே²ய்யந்தி ஆஹ ‘‘கேராடிகலக்க²ணம் ஸாடே²ய்ய’’ந்தி. அஞ்ஞதா² அத்தனோ பவேத³னபுக்³க³லோ கேராடிகோ நேகதிகவாணிஜோதி வத³ந்தி. கேராடிகோ ஹி புக்³க³லோ ஆனந்த³மச்சோ² விய ஹோதி.

187. யதா²ப⁴தம் நிக்கி²த்தோ ஏவம் நிரயேதி யதா² ஆப⁴தம் கஞ்சி ஆஹரித்வா ட²பிதோ, ஏவம் அத்தனோ கம்முனா நிக்கி²த்தோ நிரயே ட²பிதோயேவாதி அத்தோ².