(10) 5. பா³லவக்³க³வண்ணனா
99. பஞ்சமஸ்ஸ பட²மே அனாக³தம் பா⁴ரம் வஹதீதி அத்தனோ அஸம்பத்தம் பா⁴ரம் வஹதி. அதே²ரோவ ஸமானோ தே²ரேஹி வஹிதப்³ப³ம் பீ³ஜனக்³கா³ஹத⁴ம்மஜ்ஜே²ஸனாதி³பா⁴ரம் வஹதீதி ஏவமேத்த² அத்தோ² த³ட்ட²ப்³போ³. அட்ட²கதா²யம் (மஹாவ. அட்ட². 159-160) பன யஸ்மா ஸம்மஜ்ஜனாதி³னவவித⁴ம் புப்³ப³கிச்சம் ஆணத்தேனேவ காதப்³ப³ம், பாதிமோக்க²ஞ்ச ஆணத்தேனேவ உத்³தி³ஸிதப்³ப³ம், தஸ்மா தம் ஸப்³ப³ம் வினா ஆணத்தியா கரோந்தோ அனாக³தம் பா⁴ரம் வஹதி நாமாதி த³ஸ்ஸேதும் ‘‘ஸம்மஜ்ஜனீ பதீ³போ’’திஆதி³ வுத்தம். யஞ்ஹி ‘‘அனுஜானாமி, பி⁴க்க²வே, உபோஸதா²கா³ரம் ஸம்மஜ்ஜிது’’ந்திஆதி³னா நயேன பாளியம் ஆக³தம். அட்ட²கதா²ஸு ச –
‘‘ஸம்மஜ்ஜனீ பதீ³போ ச, உத³கம் ஆஸனேன ச;
உபோஸத²ஸ்ஸ ஏதானி, ‘புப்³ப³கரண’ந்தி வுச்சதி.
‘‘ச²ந்த³பாரிஸுத்³தி⁴உதுக்கா²னம், பி⁴க்கு²க³ணனா ச ஓவாதோ³;
உபோஸத²ஸ்ஸ ஏதானி, ‘புப்³ப³கிச்ச’ந்தி வுச்சதீ’’தி. (மஹாவ. அட்ட² 168) –
ஏவம் த்³வீஹி நாமேஹி நவவித⁴ம் புப்³ப³கிச்சம் த³ஸ்ஸிதம், தம் அகத்வா உபோஸத²ம் காதும் ந வட்டதி. தஸ்மா ‘‘அனுஜானாமி, பி⁴க்க²வே, தே²ரேன பி⁴க்கு²னா நவம் பி⁴க்கு²ம் ஆணாபேது’’ந்தி வசனதோ தே²ரேன ஆணத்தேன அகி³லானேன பி⁴க்கு²னா உபோஸதா²கா³ரம் ஸம்மஜ்ஜிதப்³ப³ம், பானீயம் பரிபோ⁴ஜனீயம் உபட்ட²பேதப்³ப³ம், ஆஸனம் பஞ்ஞாபேதப்³ப³ம், பதீ³போ காதப்³போ³, அகரோந்தோ து³க்கடம் ஆபஜ்ஜதி.
தே²ரேனபி பதிரூபம் ஞத்வா ஆணாபேதப்³ப³ம், ஆணாபேந்தேனபி யம் கிஞ்சி கம்மம் கரோந்தோ வா ஸதா³ காலமேவ ஏகோ வா பா⁴ரனித்த²ரணகோ வா ஸரபா⁴ணகத⁴ம்மகதி²காதீ³ஸு வா அஞ்ஞதரோ ந உபோஸதா²கா³ரஸம்மஜ்ஜனத்த²ம் ஆணாபேதப்³போ³, அவஸேஸா பன வாரேன ஆணாபேதப்³பா³. ஸசே ஆணத்தோ ஸம்மஜ்ஜனிம் தாவகாலிகம்பி ந லப⁴தி, ஸாகா²ப⁴ங்க³ம் கப்பியம் காரேத்வா ஸம்மஜ்ஜிதப்³ப³ம், தம்பி அலப⁴ந்தஸ்ஸ லத்³த⁴கப்பியம் ஹோதி. பதீ³பகரணேபி வுத்தனயேனேவ ஆணாபேதப்³போ³, ஆணாபேந்தேன ச ‘‘அமுகஸ்மிம் நாம ஓகாஸே தேலம் வா கபல்லிகா வா அத்தி², தம் க³ஹேத்வா கரோஹீ’’தி வத்தப்³போ³. ஸசே தேலாதீ³னி நத்தி², பரியேஸிதப்³பா³னி. பரியேஸித்வா அலப⁴ந்தஸ்ஸ லத்³த⁴கப்பியம் ஹோதி. அபி ச கபாலே அக்³கி³ ஜாலேதப்³போ³. ஆஸனபஞ்ஞாபனாணத்தியம்பி வுத்தனயேனேவ ஆணாபேதப்³போ³, ஆணத்தேன ச ஸசே உபோஸதா²கா³ரே ஆஸனானி நத்தி², ஸங்கி⁴காவாஸதோ ஆஹரித்வா பஞ்ஞாபேத்வா புன ஆஹரிதப்³பா³னி, ஆஸனேஸு அஸதி கடஸாரகேபி தட்டிகாயோபி பஞ்ஞாபேதும் வட்டதி, தாஸுபி அஸதி ஸாகா²ப⁴ங்கா³னி கப்பியம் காரேத்வா பஞ்ஞாபேதப்³பா³னி. கப்பியகாரகம் அலப⁴ந்தஸ்ஸ லத்³த⁴கப்பியம் ஹோதி.
ச²ந்த³பாரிஸுத்³தீ⁴தி ஏத்த² உபோஸத²கரணத்த²ம் ஸன்னிபதிதே ஸங்கே⁴ ப³ஹி உபோஸத²ம் கத்வா ஆக³தேன ஸன்னிபாதட்டா²னம் க³ந்த்வா காயஸாமக்³கி³ம் அதே³ந்தேன ச²ந்தோ³ தா³தப்³போ³. யோபி கி³லானோ வா கிச்சப்பஸுதோ வா, தேன பாரிஸுத்³தி⁴ம் தே³ந்தேன ச²ந்தோ³ தா³தப்³போ³. கத²ம் தா³தப்³போ³? ஏகஸ்ஸ பி⁴க்கு²னோ ஸந்திகே ‘‘ச²ந்த³ம் த³ம்மி, ச²ந்த³ம் மே ஹர, ச²ந்த³ம் மே ஆரோசேஹீ’’தி அயமத்தோ² காயேன வா வாசாய வா உப⁴யேன வா விஞ்ஞாபேதப்³போ³. ஏவம் தி³ன்னோ ஹோதி ச²ந்தோ³. அகதூபோஸதே²ன பன கி³லானேன வா கிச்சப்பஸுதேன வா பாரிஸுத்³தி⁴ தா³தப்³பா³. கத²ம் தா³தப்³பா³? ஏகஸ்ஸ பி⁴க்கு²னோ ஸந்திகே ‘‘பாரிஸுத்³தி⁴ம் த³ம்மி, பாரிஸுத்³தி⁴ம் மே ஹர, பாரிஸுத்³தி⁴ம் மே ஆரோசேஹீ’’தி அயமத்தோ² காயேன வா வாசாய வா உப⁴யேன வா விஞ்ஞாபேதப்³போ³. ஏவம் தி³ன்னா ஹோதி பாரிஸுத்³தி⁴. தம் பன தே³ந்தேன ச²ந்தோ³பி தா³தப்³போ³. வுத்தஞ்ஹேதம் ப⁴க³வதா – ‘‘அனுஜானாமி, பி⁴க்க²வே, தத³ஹுபோஸதே² பாரிஸுத்³தி⁴ம் தே³ந்தேன ச²ந்த³ம்பி தா³தும், ஸந்தி ஸங்க⁴ஸ்ஸ கரணீய’’ந்தி. தத்த² பாரிஸுத்³தி⁴தா³னம் ஸங்க⁴ஸ்ஸபி அத்தனோபி உபோஸத²கரணம் ஸம்பாதே³தி, ந அவஸேஸம் ஸங்க⁴கிச்சம். ச²ந்த³தா³னம் ஸங்க⁴ஸ்ஸேவ உபோஸத²கரணஞ்ச ஸேஸகிச்சஞ்ச ஸம்பாதே³தி, அத்தனோ பன உபோஸதோ² அகதோயேவ ஹோதி, தஸ்மா பாரிஸுத்³தி⁴ம் தே³ந்தேன ச²ந்தோ³பி தா³தப்³போ³.
உதுக்கா²னந்தி ‘‘ஹேமந்தாதீ³னம் உதூனம் ஏத்தகம் அதிக்கந்தம், ஏத்தகம் அவஸிட்ட²’’ந்தி ஏவம் உதூனம் ஆசிக்க²னம். பி⁴க்கு²க³ணனாதி ‘‘ஏத்தகா பி⁴க்கூ² உபோஸத²க்³கே³ ஸன்னிபதிதா’’தி பி⁴க்கூ²னம் க³ணனா. இத³ம்பி உப⁴யம் கத்வாவ உபோஸதோ² காதப்³போ³. ஓவாதோ³தி பி⁴க்கு²னோவாதோ³. ந ஹி பி⁴க்கூ²னீஹி யாசிதம் ஓவாத³ம் அனாரோசேத்வா உபோஸத²ம் காதும் வட்டதி. பி⁴க்கு²னியோ ஹி ‘‘ஸ்வே உபோஸதோ²’’தி ஆக³ந்த்வா ‘‘அயம் உபோஸதோ² சாதுத்³த³ஸோ, பன்னரஸோ’’தி புச்சி²த்வா புன உபோஸத²தி³வஸே ஆக³ந்த்வா ‘‘பி⁴க்கு²னிஸங்கோ⁴, அய்ய, பி⁴க்கு²ஸங்க⁴ஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர, அய்ய, பி⁴க்கு²னிஸங்கோ⁴ ஓவாதூ³பஸங்கமன’’ந்தி ஏவம் ஓவாத³ம் யாசந்தி. தம் ட²பேத்வா பா³லகி³லானக³மியே அஞ்ஞோ ஸசேபி ஆரஞ்ஞகோ ஹோதி, அப்படிக்³க³ஹேதும் ந லப⁴தி, தஸ்மா யேன ஸோ படிக்³க³ஹிதோ, தேன பி⁴க்கு²னா உபோஸத²க்³கே³ பாதிமோக்கு²த்³தே³ஸகோ பி⁴க்கு² ஏவம் வத்தப்³போ³ ‘‘பி⁴க்கு²னிஸங்கோ⁴, ப⁴ந்தே, பி⁴க்கு²ஸங்க⁴ஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர, ப⁴ந்தே, பி⁴க்கு²னிஸங்கோ⁴ ஓவாதூ³பஸங்கமன’’ந்தி.
பாதிமோக்கு²த்³தே³ஸகேன வத்தப்³ப³ம் – ‘‘அத்தி² கோசி பி⁴க்கு² பி⁴க்கு²னோவாத³கோ ஸம்மதோ’’தி. ஸசே ஹோதி கோசி பி⁴க்கு² பி⁴க்கு²னோவாத³கோ ஸம்மதோ, ததோ தேன ஸோ வத்தப்³போ³ – ‘‘இத்த²ன்னாமகோ பி⁴க்கு² பி⁴க்கு²னோவாத³கோ ஸம்மதோ, தம் பி⁴க்கு²னிஸங்கோ⁴ உபஸங்கமதூ’’தி. ஸசே நத்தி², ததோ தேன புச்சி²தப்³ப³ம் – ‘‘கோ ஆயஸ்மா உஸ்ஸஹதி பி⁴க்கு²னியோ ஓவதி³து’’ந்தி. ஸசே கோசி உஸ்ஸஹதி, ஸோபி ச அட்ட²ஹி அங்கே³ஹி ஸமன்னாக³தோ, தம் தத்தே²வ ஸம்மன்னித்வா ஓவாத³ப்படிக்³கா³ஹகோ வத்தப்³போ³ – ‘‘இத்த²ன்னாமோ பி⁴க்கு² பி⁴க்கு²னோவாத³கோ ஸம்மதோ, தம் பி⁴க்கு²னிஸங்கோ⁴ உபஸங்கமதூ’’தி. ஸசே பன ந கோசி உஸ்ஸஹதி, பாதிமோக்கு²த்³தே³ஸகேன வத்தப்³ப³ம் – ‘‘நத்தி² கோசி பி⁴க்கு² பி⁴க்கு²னோவாத³கோ ஸம்மதோ, பாஸாதி³கேன பி⁴க்கு²னிஸங்கோ⁴ ஸம்பாதே³தூ’’தி. ஏத்தாவதா ஹி ஸிக்க²த்தயஸங்க³ஹிதம் ஸகலம் ஸாஸனம் ஆரோசிதம் ஹோதி. தேன பி⁴க்கு²னா ‘‘ஸாதூ⁴’’தி ஸம்படிச்சி²த்வா பாடிபதே³ பி⁴க்கு²னீனம் ஆரோசேதப்³ப³ம். பாதிமோக்க²ம்பி ‘‘ந, பி⁴க்க²வே, அனஜ்ஜி²ட்டே²ன பாதிமோக்க²ம் உத்³தி³ஸிதப்³ப³ம், யோ உத்³தி³ஸேய்ய, ஆபத்தி து³க்கடஸ்ஸா’’தி வசனதோ அனாணத்தேன ந உத்³தி³ஸிதப்³ப³ம். ‘‘தே²ராதே⁴ய்யம் பாதிமோக்க²’’ந்தி ஹி வசனதோ ஸங்க⁴த்தே²ரோ வா பாதிமோக்க²ம் உத்³தி³ஸேய்ய, ‘‘அனுஜானாமி, பி⁴க்க²வே, யோ தத்த² பி⁴க்கு² ப்³யத்தோ படிப³லோ, தஸ்ஸாதே⁴ய்யம் பாதிமோக்க²’’ந்தி வசனதோ நவகதரோ வா தே²ரேன ஆணத்தோ. து³தியாதீ³னி உத்தானத்தா²னேவ.
109. ஏகாத³ஸமே ந குக்குச்சாயிதப்³ப³ம் குக்குச்சாயதீதி ந குக்குச்சாயிதும் யுத்தகம் குக்குச்சாயதி. ஸூகரமம்ஸம் லபி⁴த்வா ‘‘அச்ச²மம்ஸ’’ந்தி குக்குச்சாயதி, ‘‘ஸூகரமம்ஸ’’ந்தி ஜானந்தோபி ‘‘அச்ச²மம்ஸ’’ந்தி குக்குச்சாயதி, ந பரிபு⁴ஞ்ஜதீதி வுத்தம் ஹோதி. ஏவம் மிக³மம்ஸம் ‘‘தீ³பிமம்ஸ’’ந்தி, காலே ஸந்தேயேவ ‘‘காலோ நத்தீ²’’தி, அப்பவாரேத்வா ‘‘பவாரிதோம்ஹீ’’தி, பத்தே ரஜஸ்மிம் அபதிதேயேவ ‘‘பதித’’ந்தி, அத்தானம் உத்³தி³ஸ்ஸ மச்ச²மம்ஸே அகதேயேவ ‘‘மம் உத்³தி³ஸ்ஸ கத’’ந்தி குக்குச்சாயதி. குக்குச்சாயிதப்³ப³ம் ந குக்குச்சாயதீதி குக்குச்சாயிதும் யுத்தம் ந குக்குச்சாயதி. அச்ச²மம்ஸம் லபி⁴த்வா ‘‘ஸூகரமம்ஸ’’ந்தி ந குக்குச்சாயதி, ‘‘அச்ச²மம்ஸ’’ந்தி ஜானந்தோபி ‘‘ஸூகரமம்ஸ’’ந்தி ந குக்குச்சாயதி, மத்³தி³த்வா வீதிக்கமதீதி வுத்தம் ஹோதி. ஏவம் தீ³பிமம்ஸம் மிக³மம்ஸந்தி…பே… அத்தானம் உத்³தி³ஸ்ஸ மச்ச²மம்ஸே கதே ‘‘மம் உத்³தி³ஸ்ஸ கத’’ந்தி ந குக்குச்சாயதீதி ஏவமேத்த² அத்தோ² த³ட்ட²ப்³போ³. அட்ட²கதா²யம் பன ‘‘ந குக்குச்சாயிதப்³ப³ந்தி ஸங்க⁴போ⁴க³ஸ்ஸ அபட்ட²பனம் அவிசாரணம் ந குக்குச்சாயிதப்³ப³ம் நாம, தம் குக்குச்சாயதி. குக்குச்சாயிதப்³ப³ந்தி தஸ்ஸேவ பட்ட²பனம் விசாரணம், தம் ந குக்குச்சாயதீ’’தி ஏத்தகமேவ வுத்தம். தத்த² ஸங்க⁴போ⁴க³ஸ்ஸாதி ஸங்க⁴ஸ்ஸ சதுபச்சயபரிபோ⁴க³த்தா²ய தி³ன்னகே²த்தவத்து²தளாகாதி³கஸ்ஸ, ததோ உப்பன்னத⁴ஞ்ஞஹிரஞ்ஞாதி³கஸ்ஸ ச ஸங்க⁴ஸ்ஸ போ⁴க³ஸ்ஸ. அபட்ட²பனந்தி அஸம்வித³ஹனம். தேனாஹ ‘‘அவிசாரண’’ந்தி. தஸ்ஸேவாதி யதா²வுத்தஸ்ஸேவ ஸங்க⁴போ⁴க³ஸ்ஸ.
பா³லவக்³க³வண்ணனா நிட்டி²தா.
து³தியபண்ணாஸகம் நிட்டி²தம்.