(11) 1. ஆஸாது³ப்பஜஹவக்³க³வண்ணனா

119. ததியபண்ணாஸகஸ்ஸ பட²மே து³க்கே²ன பஜஹிதப்³பா³தி து³ப்பஜஹா. து³ச்சஜாதிஆதீ³ஸுபி ஏஸேவ நயோ. த்³வின்னம் ஆஸானம் து³ச்சஜபா⁴வோ கத²ம் ஜானிதப்³போ³தி பட²மம் தாவ லாபா⁴ஸாய து³ச்சஜபா⁴வம் விபா⁴வேதி ‘‘லாபா⁴ஸாயா’’திஆதி³னா. உப⁴தோப்³யூள்ஹந்தி யுத்³த⁴த்தா²ய உப⁴தோ ஸன்னிபதிதம். பக்க²ந்த³ந்தீதி அனுப்பவிஸந்தி. ஜீவிதாஸாய து³ப்பஜஹத்தாதிஆதி³னா ஜீவிதாஸாய து³ச்சஜபா⁴வம் விபா⁴வேதி.

120. து³தியே து³ல்லபா⁴தி ந ஸுலபா⁴. இணம் தே³மீதி ஸஞ்ஞம் கரோதீதி ஏவம் ஸஞ்ஞம் கரோந்தோ விய ஹோதீதி அத்தோ². ஏத்த² ச ‘‘புப்³ப³காரீதி பட²மம் உபகாரஸ்ஸ காரகோ. கதஞ்ஞூ கதவேதீ³தி தேன கதம் ஞத்வா பச்சா² காரகோ. தேஸு புப்³ப³காரீ ‘இணம் தே³மீ’தி ஸஞ்ஞம் கரோதி, பச்சா² காரகோ ‘இணம் ஜீராபேமீ’தி ஸஞ்ஞம் கரோதீ’’தி ஏத்தகமேவ இத⁴ வுத்தம். புக்³க³லபண்ணத்திஸம்வண்ணனாயம் (பு. ப. அட்ட². 83) பன –

‘‘புப்³ப³காரீதி பட²மமேவ காரகோ. கதவேதீ³தி கதம் வேதே³தி, விதி³தம் பாகடம் கரோதி. தே அகா³ரியானகா³ரியேஹி தீ³பேதப்³பா³. அகா³ரிகேஸு ஹி மாதாபிதரோ புப்³ப³காரினோ நாம, புத்ததீ⁴தரோ பன மாதாபிதரோ படிஜக்³க³ந்தா அபி⁴வாத³னாதீ³னி தேஸம் குருமானா கதவேதி³னோ நாம. அனகா³ரியேஸு ஆசரியுபஜ்ஜா²யா புப்³ப³காரினோ நாம, அந்தேவாஸிகஸத்³தி⁴விஹாரிகா ஆசரியுபஜ்ஜா²யே படிஜக்³க³ந்தா அபி⁴வாத³னாதீ³னி ச தேஸம் குருமானா கதவேதி³னோ நாம. தேஸம் ஆவிபா⁴வத்தா²ய உபஜ்ஜா²யபோஸகஸோணத்தே²ராதீ³னம் வத்தூ²னி கதே²தப்³பா³னி.

‘‘அபரோ நயோ – பரேன அகதேயேவ உபகாரே அத்தனி கதம் உபகாரம் அனபேக்கி²த்வா காரகோ புப்³ப³காரீ, ஸேய்யதா²பி மாதாபிதரோ சேவ ஆசரியுபஜ்ஜா²யா ச. ஸோ து³ல்லபோ⁴ ஸத்தானம் தண்ஹாபி⁴பூ⁴தத்தா. பரேன கதஸ்ஸ உபகாரஸ்ஸ அனுரூபப்பவத்திம் அத்தனி கதம் உபகாரம் உபகாரதோ ஜானந்தோ வேதி³யந்தோ கதஞ்ஞுகதவேதீ³ ஸேய்யதா²பி மாதாபிதுஆசரியுபஜ்ஜா²யேஸு ஸம்மாபடிபன்னோ. ஸோபி து³ல்லபோ⁴ ஸத்தானம் அவிஜ்ஜாபி⁴பூ⁴தத்தா. அபிச அகாரணவச்ச²லோ புப்³ப³காரீ, ஸகாரணவச்ச²லோ கதஞ்ஞுகதவேதீ³. ‘கரிஸ்ஸதி மே’தி ஏவமாதி³காரணனிரபேக்க²கிரியோ புப்³ப³காரீ, ‘கரிஸ்ஸதி மே’தி ஏவமாதி³காரணஸாபேக்க²கிரியோ கதஞ்ஞுகதவேதீ³. தமோஜோதிபராயணோ புப்³ப³காரீ, ஜோதிஜோதிபராயணோ கதஞ்ஞுகதவேதீ³. தே³ஸேதா புப்³ப³காரீ, படிபஜ்ஜிதா கதஞ்ஞுகதவேதீ³. ஸதே³வகே லோகே அரஹம் ஸம்மாஸம்பு³த்³தோ⁴ புப்³ப³காரீ, அரியஸாவகோ கதஞ்ஞுகதவேதீ³’’தி வுத்தம்.

தத்த² காரணேன வினா பவத்தஹிதசித்தோ அகாரணவச்ச²லோ. அனாக³தம்ஹி பயோஜனம் அபேக்க²மானோ ‘‘கரிஸ்ஸதி மே’’திஆதி³னா சித்தேன பட²மம் க³ஹிதம் தாதி³ஸம் கதம் உபாதா³ய கதஞ்ஞூ ஏவ நாம ஹோதி, ந புப்³ப³காரீதி அதி⁴ப்பாயேன ‘‘கரிஸ்ஸதி மேதி ஏவமாதி³காரணஸாபேக்க²கிரியோ கதஞ்ஞுகதவேதீ³’’தி வுத்தம். தமோஜோதிபராயணோ புஞ்ஞப²லானி அனுபஜீவந்தோ ஏவ புஞ்ஞானி கரோதீதி ‘‘புப்³ப³காரீ’’தி வுத்தோ. புஞ்ஞப²லம் உபஜீவந்தோ ஹி கதஞ்ஞுபக்கே² திட்ட²தி.

121. ததியே தித்தோதி ஸுஹிதோ பரியோஸிதோ நிட்டி²தகிச்சதாய நிருஸ்ஸுக்கோ. கு³ணபாரிபூரியா ஹி பரிபுண்ணோ யாவத³த்தோ² இத⁴ தித்தோ வுத்தோ. தப்பேதாதி அஞ்ஞேஸம்பி தித்திகரோ. பச்சேகபு³த்³தோ⁴ ச ததா²க³தஸாவகோ ச கீ²ணாஸவோ தித்தோதி ஏத்த² பச்சேகபு³த்³தோ⁴ நவலோகுத்தரத⁴ம்மேஹி ஸயம் தித்தோ பரிபுண்ணோ, அஞ்ஞம் பன தப்பேதும் ந ஸக்கோதி. தஸ்ஸ ஹி த⁴ம்மகதா²ய அபி⁴ஸமயோ ந ஹோதி, ஸாவகானம் பன த⁴ம்மகதா²ய அபரிமாணானம் தே³வமனுஸ்ஸானம் அபி⁴ஸமயோ ஹோதி. ஏவம் ஸந்தேபி யஸ்மா தே த⁴ம்மம் தே³ஸேந்தா ந அத்தனோ வசனம் கத்வா கதே²ந்தி, பு³த்³தா⁴னம் வசனம் கத்வா கதே²ந்தி, ஸோதும் நிஸின்னபரிஸாபி – ‘‘அயம் பி⁴க்கு² ந அத்தனா படிவித்³த⁴ம் த⁴ம்மம் கதே²தீ’’தி சித்தீகாரம் கரோதி. இதி ஸோ சித்தீகாரோ பு³த்³தா⁴னம்யேவ ஹோதி. ஏவம் தத்த² ஸம்மாஸம்பு³த்³தோ⁴வ தப்பேதா நாம. யதா² ஹி ‘‘அஸுகஸ்ஸ நாம இத³ஞ்சித³ஞ்ச தே³தா²’’தி ரஞ்ஞா ஆணத்தே கிஞ்சாபி ஆனேத்வா தே³ந்தி, அத² கோ² ராஜாவ தத்த² தா³யகோ. யேஹிபி லத்³த⁴ம் ஹோதி, தே ‘‘ரஞ்ஞா அம்ஹாகம் டா²னந்தரம் தி³ன்னம், இஸ்ஸரியவிப⁴வோ தி³ன்னோ’’த்வேவ க³ண்ஹந்தி, ந ‘‘ராஜபுரிஸேஹீ’’தி ஏவம்ஸம்பத³மித³ம் வேதி³தப்³ப³ம்.

122. சதுத்தே² து³த்தப்பயாதி அதப்பயா, ந ஸக்கா கேனசி தப்பேதும். யோ ஹி உபட்டா²ககுலம் வா ஞாதிகுலம் வா நிஸ்ஸாய வஸமானோ சீவரே ஜிண்ணே தேஹி தி³ன்னம் சீவரம் நிக்கி²பதி, ந பரிபு⁴ஞ்ஜதி. புனப்புனம் தி³ன்னம்பி க³ஹேத்வா நிக்கி²பதேவ. யோ ச தேனேவ நயேன லத்³த⁴ம் லத்³த⁴ம் விஸ்ஸஜ்ஜேதி, பரஸ்ஸ தே³தி, புனப்புனம் லத்³த⁴ம்பி ததே²வ கரோதி. இமே த்³வே புக்³க³லா ஸகடேஹிபி பச்சயே உபனேந்தேன தப்பேதும் ந ஸக்காதி து³த்தப்பயா.

123. பஞ்சமே ந விஸ்ஸஜ்ஜேதீதி அத்தனோ அகத்வா பரஸ்ஸ ந தே³தி, அதிரேகே பன ஸதி ந நிக்கி²பதி, பரஸ்ஸ தே³தி. தேனேவாஹ ‘‘ஸப்³ப³ம்யேவ பரேஸம் ந தே³தீ’’திஆதி³. இத³ம் வுத்தம் ஹோதி ‘‘யோ பி⁴க்கு² உபட்டா²ககுலா வா ஞாதிகுலா வா ஜிண்ணசீவரோ ஸாடகம் லபி⁴த்வா சீவரம் கத்வா பரிபு⁴ஞ்ஜதி ந நிக்கி²பதி, அக்³க³ளம் த³த்வா பாருபந்தோபி புனபி தி³ய்யமானே ஸஹஸா நப்படிக்³க³ண்ஹாதி. யோ ச லத்³த⁴ம் லத்³த⁴ம் அத்தனா பரிபு⁴ஞ்ஜதி, பரேஸம் ந தே³தி. இமே த்³வேபி ஸுகே²ன ஸக்கா தப்பேதுந்தி ஸுதப்பயா’’தி.

124-127. ச²ட்ட²ஸத்தமாதீ³னி உத்தானத்தா²னேவ.

ஆஸாது³ப்பஜஹவக்³க³வண்ணனா நிட்டி²தா.