2. நாத²வக்³கோ³

1-4. ஸேனாஸனஸுத்தாதி³வண்ணனா

11-14. து³தியஸ்ஸ பட²மே நாதிதூ³ரந்தி கோ³சரட்டா²னதோ அட்³ட⁴கா³வுததோ ஓரபா⁴க³தாய நாதிதூ³ரம். நாச்சாஸன்னந்தி பச்சி²மேன பமாணேன கோ³சரட்டா²னதோ பஞ்சத⁴னுஸதிகதாய ந அதிஆஸன்னம். தாய ச பன நாதிதூ³ரனாச்சாஸன்னதாய கோ³சரட்டா²னபடிபரிஸ்ஸயாதி³ரஹிதமக்³க³தாய ச க³மனஸ்ஸ ச ஆக³மனஸ்ஸ ச யுத்தரூபத்தா க³மனாக³மனஸம்பன்னம். தி³வஸபா⁴கே³ மஹாஜனஸம்கிண்ணதாபா⁴வேன தி³வா அப்பாகிண்ணம். அபா⁴வத்தோ² ஹி அயம் அப்ப-ஸத்³தோ³ ‘‘அப்பிச்சோ²’’திஆதீ³ஸு விய. ரத்தியம் மனுஸ்ஸஸத்³தா³பா⁴வேன ரத்திம் அப்பஸத்³த³ம். ஸப்³ப³தா³பி ஜனஸன்னிபாதனிக்³கோ⁴ஸாபா⁴வேன அப்பனிக்³கோ⁴ஸம்.

அப்பகஸிரேனாதி அகஸிரேன ஸுகே²னேவ. ஸீலாதி³கு³ணானம் தி²ரபா⁴வப்பத்தியா தே²ரா. ஸுத்தகே³ய்யாதி³ ப³ஹு ஸுதம் ஏதேஸந்தி ப³ஹுஸ்ஸுதா. தமுக்³க³ஹதா⁴ரணேன ஸம்மதே³வ க³ரூனம் ஸந்திகே ஆக³மிதபா⁴வேன ச ஆக³தோ பரியத்தித⁴ம்மஸங்கா²தோ ஆக³மோ ஏதேஸந்தி ஆக³தாக³மா. ஸுத்தாபி⁴த⁴ம்மஸங்கா²தஸ்ஸ த⁴ம்மஸ்ஸ தா⁴ரணேன த⁴ம்மத⁴ரா. வினயஸ்ஸ தா⁴ரணேன வினயத⁴ரா. தேஸம் த⁴ம்மவினயானம் மாதிகாய தா⁴ரணேன மாதிகாத⁴ரா. தத்த² தத்த² த⁴ம்மபரிபுச்சா²ய பரிபுச்ச²தி. அத்த²பரிபுச்சா²ய பரிபஞ்ஹதி வீமம்ஸதி விசாரேதி. இத³ம், ப⁴ந்தே, கத²ம், இமஸ்ஸ கோ அத்தோ²தி பரிபுச்சா²பரிபஞ்ஹாகாரத³ஸ்ஸனம். அவிவடஞ்சேவ பாளியா அத்த²ம் பதே³ஸந்தரபாளித³ஸ்ஸனேன ஆக³மதோ விவரந்தி. அனுத்தானீகதஞ்ச யுத்திவிபா⁴வனேன உத்தானிம் கரோந்தி. கங்கா²டா²னியேஸு த⁴ம்மேஸு ஸம்ஸயுப்பத்தியா ஹேதுதாய க³ண்டி²ட்டா²னபூ⁴தேஸு பாளிப்பதே³ஸேஸு யாதா²வதோ வினிச்ச²யப்பதா³னேன கங்க²ம் படிவினோதே³ந்தி.

ஏத்த² ச நாதிதூ³ரம் நாச்சாஸன்னம் க³மனாக³மனஸம்பன்னந்தி ஏகம் அங்க³ம், தி³வா அப்பாகிண்ணம், ரத்திம் அப்பஸத்³த³ம், அப்பனிக்³கோ⁴ஸந்தி ஏகம், அப்பட³ம்ஸமகஸவாதாதபஸரீஸபஸம்ப²ஸ்ஸந்தி ஏகம், தஸ்மிம் கோ² பன ஸேனாஸனே விஹரந்தஸ்ஸ…பே… பரிக்கா²ராதி ஏகம், தஸ்மிம் கோ² பன ஸேனாஸனே தே²ரா…பே… கங்க²ம் படிவினோதே³ந்தீதி ஏகம். ஏவம் பஞ்ச அங்கா³னி வேதி³தப்³பா³னி. து³தியாதீ³னி உத்தானத்தா²னி.

ஸேனாஸனஸுத்தாதி³வண்ணனா நிட்டி²தா.

5-6. அப்பமாத³ஸுத்தாதி³வண்ணனா

15-16. பஞ்சமே காராபகஅப்பமாதோ³ நாம ‘‘இமே அகுஸலா த⁴ம்மா பஹாதப்³பா³, இமே குஸலா த⁴ம்மா உபஸம்பாதே³தப்³பா³’’தி தம்தம்பரிவஜ்ஜேதப்³ப³வஜ்ஜனஸம்பாதே³தப்³ப³ஸம்பாத³னவஸேன பவத்தோ அப்பமாதோ³. ஏஸாதி அப்பமாதோ³. லோகியோவ ந லோகுத்தரோ. அயஞ்சாதி ச ஏஸாதி ச அப்பமாத³மேவ வத³தி. தேஸந்தி சாதுபூ⁴மகத⁴ம்மானம். படிலாப⁴கத்தேனாதி படிலாபா⁴பனகத்தேன.

ஜங்க³லானந்தி ஜங்க³லசாரீனம். ஜங்க³ல-ஸத்³தோ³ சேத்த² க²ரபா⁴வஸாமஞ்ஞேன பத²வீபரியாயோ, ந அனுபட்டா²னவிதூ³ரதே³ஸவாசீ. தேனாஹ ‘‘பத²வீதலசாரீன’’ந்தி. பதா³னம் வுச்சமானத்தா ‘‘ஸபாத³கபாணான’’ந்தி விஸேஸேத்வா வுத்தம். ஸமோதா⁴னந்தி அந்தோக³த⁴பா⁴வம். தேனாஹ ‘‘ஓதா⁴னம் பக்கே²ப’’ந்தி. ‘‘உபக்கே²ப’’ந்திபி பட²ந்தி, உபனேத்வா பக்கி²பிதப்³ப³ந்தி அத்தோ². வஸ்ஸிகாய புப்ப²ம் வஸ்ஸிகம் யதா² ‘‘ஆமலகியா ப²லம் ஆமலக’’ந்தி. மஹாதலஸ்மிந்தி உபரிபாஸாதே³. ச²ட்ட²ம் உத்தானமேவ.

அப்பமாத³ஸுத்தாதி³வண்ணனா நிட்டி²தா.

7-8. பட²மனாத²ஸுத்தாதி³வண்ணனா

17-18. ஸத்தமே யேஹி ஸீலாதீ³ஹி ஸமன்னாக³தோ பி⁴க்கு² த⁴ம்மஸரணதாய த⁴ம்மேனேவ நாத²தி ஆஸீஸதி அபி⁴ப⁴வதீதி நாதோ² வுச்சதி, தே தஸ்ஸ நாத²பா⁴வகரா த⁴ம்மா நாத²கரணாதி வுத்தாதி ஆஹ ‘‘அத்தனோ ஸனாத²பா⁴வகரா பதிட்ட²கராதி அத்தோ²’’தி. தத்த² அத்தனோ பதிட்ட²கராதி யஸ்ஸ நாத²பா⁴வகரா, தஸ்ஸ அத்தனோ பதிட்டா²விதா⁴யினோ. அப்பதிட்டோ² அனாதோ², ஸப்பதிட்டோ² ஸனாதோ²தி பதிட்ட²த்தோ² நாத²-ஸத்³தோ³. கல்யாணகு³ணயோக³தோ கல்யாணாதி த³ஸ்ஸேந்தோ ‘‘ஸீலாதி³கு³ணஸம்பன்னா’’தி ஆஹ. மிஜ்ஜனலக்க²ணா மேத்தா ஏதஸ்ஸ அத்தீ²தி மித்தோ. ஸோ வுத்தனயேன கல்யாணோ அஸ்ஸ அத்தீ²தி தஸ்ஸ அத்தி²தாமத்தம் கல்யாணமித்தபதே³ன வுத்தம். அஸ்ஸ தேன ஸப்³ப³காலம் அவிஜஹிதவாஸோதி தம் த³ஸ்ஸேதும் ‘‘கல்யாணஸஹாயோ’’தி வுத்தந்தி ஆஹ ‘‘தேவஸ்ஸா’’தி. தே ஏவ கல்யாணமித்தா அஸ்ஸ பி⁴க்கு²னோ. ஸஹ அயனதோதி ஸஹ பவத்தனதோ. அஸமோதா⁴னே சித்தேன, ஸமோதா⁴னே பன சித்தேன சேவ காயேன ச ஸம்பவங்கோ. ஸுக²ம் வசோ ஏதஸ்மிம் அனுகூலகா³ஹிம்ஹி ஆத³ரகா³ரவவதி புக்³க³லேதி ஸுவசோ. தேனாஹ ‘‘ஸுகே²ன வத்தப்³போ³’’திஆதி³. க²மோதி க²ந்தோ. தமேவஸ்ஸ க²மபா⁴வம் த³ஸ்ஸேதும் ‘‘கா³ள்ஹேனா’’திஆதி³ வுத்தம். வாமதோதி மிச்சா², அயோனிஸோ வா க³ண்ஹாதி. படிப்ப²ரதீதி படாணிகபா⁴வேன திட்ட²தி. பத³க்கி²ணம் க³ண்ஹாதீதி ஸம்மா, யோனிஸோ வா க³ண்ஹாதி.

உச்சாவசானீதி விபுலகு²த்³த³கானி. தத்ருபக³மனியாயாதி தத்ர தத்ர மஹந்தே கு²த்³த³கே ச கம்மே ஸாத⁴னவஸேன உபாயேன உபக³ச்ச²ந்தியா, தஸ்ஸ தஸ்ஸ கம்மஸ்ஸ நிப்பா²த³னே ஸமத்தா²யாதி அத்தோ². தத்ருபாயாயாதி வா தத்ர தத்ர கம்மே ஸாதே⁴தப்³பே³ உபாயபூ⁴தாய.

த⁴ம்மே அஸ்ஸ காமோதி த⁴ம்மகாமோதி ப்³யதி⁴கரணானம்பி பா³ஹிரத்தோ² ஸமாஸோ ஹோதீதி கத்வா வுத்தம். காமேதப்³ப³தோ வா பியாயிதப்³ப³தோ காமோ, த⁴ம்மோ. த⁴ம்மோ காமோ அஸ்ஸாதி த⁴ம்மகாமோ. த⁴ம்மோதி பரியத்தித⁴ம்மோ அதி⁴ப்பேதோதி ஆஹ ‘‘தேபிடகம் பு³த்³த⁴வசனம் பியாயதீதி அத்தோ²’’தி. ஸமுதா³ஹரணம் கத²னம் ஸமுதா³ஹாரோ, பியோ ஸமுதா³ஹாரோ ஏதஸ்ஸாதி பியஸமுதா³ஹாரோ. ஸயஞ்சாதி ஏத்த² ச-ஸத்³தே³ன ‘‘ஸக்கச்ச’’ந்தி பத³ம் அனுகட்³ட⁴தி. தேன ஸயஞ்ச ஸக்கச்சம் தே³ஸேதுகாமோ ஹோதீதி யோஜனா. அபி⁴த⁴ம்மோ ஸத்த பகரணானி ‘‘அதி⁴கோ அபி⁴விஸிட்டோ² ச பரியத்தித⁴ம்மோ’’தி கத்வா. வினயோ உப⁴தோவிப⁴ங்கா³ வினயனதோ காயவாசானம். அபி⁴வினயோ க²ந்த⁴கபரிவாரா விஸேஸதோ ஆபி⁴ஸமாசாரிகத⁴ம்மகித்தனதோ. ஆபி⁴ஸமாசாரிகத⁴ம்மபாரிபூரிவஸேனேவ ஹி ஆதி³ப்³ரஹ்மசரியகத⁴ம்மபாரிபூரீ. த⁴ம்மோ ஏவ பிடகத்³வயஸ்ஸபி பரியத்தித⁴ம்மபா⁴வதோ. மக்³க³ப²லானி அபி⁴த⁴ம்மோ ‘‘நிப்³பா³னத⁴ம்மஸ்ஸ அபி⁴முகோ²’’தி கத்வா. கிலேஸவூபஸமகரணம் புப்³ப³பா⁴கி³யா திஸ்ஸோ ஸிக்கா² ஸங்கே²பதோ விவட்டனிஸ்ஸிதோ ஸமதோ² விபஸ்ஸனா ச. உளாரபாமோஜ்ஜோதி ப³லவபாமோஜ்ஜோ. காரணத்தே²தி நிமித்தத்தே². குஸலத⁴ம்மனிமித்தம் ஹிஸ்ஸ வீரியாரம்போ⁴. தேனாஹ ‘‘தேஸம் அதி⁴க³மத்தா²யா’’தி. குஸலேஸு த⁴ம்மேஸூதி வா நிப்பா²தே³தப்³பே³ பு⁴ம்மம் யதா² ‘‘சேதஸோ அவூபஸமே அயோனிஸோமனஸிகாரபத³ட்டா²ன’’ந்தி. அட்ட²மே நத்தி² வத்தப்³ப³ம்.

பட²மனாத²ஸுத்தாதி³வண்ணனா நிட்டி²தா.

9. பட²மஅரியாவாஸஸுத்தவண்ணனா

19. நவமே அரியானம் ஏவ ஆவாஸாதி அரியாவாஸா அனரியானம் தாதி³ஸானம் அஸம்ப⁴வதோ. அரியாதி சேத்த² உக்கட்ட²னித்³தே³ஸேன கீ²ணாஸவா க³ஹிதா. தே ச யஸ்மா தேஹி ஸப்³ப³காலம் அவிஜஹிதவாஸா ஏவ, தஸ்மா வுத்தம் ‘‘தே ஆவஸிம்ஸு ஆவஸந்தி ஆவஸிஸ்ஸந்தீ’’தி. தத்த² ஆவஸிம்ஸூதி நிஸ்ஸாய ஆவஸிம்ஸு. பஞ்சங்க³விப்பஹீனதாத³யோ ஹி அரியானம் அபஸ்ஸயா. தேஸு பஞ்சங்க³விப்பஹானபச்சேகஸச்சபனோத³னஏஸனாஓஸட்டா²னி, ‘‘ஸங்கா²யேகம் படிஸேவதி, அதி⁴வாஸேதி பரிவஜ்ஜேதி வினோதே³தீ’’தி (தீ³. நி. 3.308; ம. நி. 2.168; அ. நி. 10.20) வுத்தேஸு அபஸ்ஸேனேஸு வினோத³னஞ்ச மக்³க³கிச்சானேவ, இதரே மக்³கே³ன ச ஸமிஜ்ஜ²ந்தீதி.

பட²மஅரியாவாஸஸுத்தவண்ணனா நிட்டி²தா.

10. து³தியஅரியாவாஸஸுத்தவண்ணனா

20. த³ஸமே கஸ்மா பன ப⁴க³வா குருஸு விஹரந்தோ இமம் ஸுத்தம் அபா⁴ஸீதி ஆஹ ‘‘யஸ்மா’’திஆதி³. குருரட்ட²ம் கிர ததா³ தன்னிவாஸிஸத்தானம் யோனிஸோமனஸிகாரவந்ததாதி³னா யேபு⁴ய்யேன ஸுப்படிபன்னதாய புப்³பே³ ச கதபுஞ்ஞதாப³லேன வா ததா³ உதுஆதி³ஸம்பத்தியுத்தமேவ அஹோஸி. கேசி பன ‘‘புப்³பே³ பவத்தகுருவத்தத⁴ம்மானுட்டா²னவாஸனாய உத்தரகுரு விய யேபு⁴ய்யேன உதுஆதி³ஸம்பன்னமேவ ஹோதி. ப⁴க³வதோ காலே ஸாதிஸயம் உதுஸப்பாயாதி³யுத்தம் ரட்ட²ம் அஹோஸீ’’தி வத³ந்தி. தத்த² பி⁴க்கூ² பி⁴க்கு²னியோ உபாஸகா உபாஸிகாயோ உதுபச்சயாதி³ஸம்பன்னத்தா தஸ்ஸ ரட்ட²ஸ்ஸ ஸப்பாயஉதுபச்சயஸேவனேன நிச்சம் கல்லஸரீரா கல்லசித்தா ச ஹோந்தி. தே சித்தஸரீரகல்லதாய அனுக்³க³ஹிதபஞ்ஞாப³லா க³ம்பீ⁴ரகத²ம் படிக்³க³ஹேதும் ஸமத்தா² படிச்சஸமுப்பாத³னிஸ்ஸிதானம் க³ம்பீ⁴ரபஞ்ஞானஞ்ச காரகா ஹோந்தி. தேனாஹ ‘‘குருரட்ட²வாஸினோ பி⁴க்கூ² க³ம்பீ⁴ரபஞ்ஞாகாரகா’’திஆதி³.

யுத்தப்பயுத்தாதி ஸதிபட்டா²னபா⁴வனாய யுத்தா சேவ பயுத்தா ச. தஸ்மிஞ்ஹி (தீ³. நி. அட்ட². 2.373; ம. நி. அட்ட². 1.106) ஜனபதே³ சதஸ்ஸோ பரிஸா பகதியாவ ஸதிபட்டா²னபா⁴வனானுயோக³மனுயுத்தா விஹரந்தி, அந்தமஸோ தா³ஸகம்மகரபரிஜனாபி ஸதிபட்டா²னப்படிஸம்யுத்தமேவ கத²ம் கதே²ந்தி. உத³கதித்த²ஸுத்தகந்தனட்டா²னாதீ³ஸுபி நிரத்த²ககதா² நாம நப்பவத்ததி. ஸசே காசி இத்தீ², ‘‘அம்ம, த்வம் கதரம் ஸதிபட்டா²னபா⁴வனம் மனஸி கரோஸீ’’தி புச்சி²தா ‘‘ந கிஞ்சீ’’தி வத³தி, தம் க³ரஹந்தி ‘‘தீ⁴ரத்து² தவ ஜீவிதம், ஜீவமானாபி த்வம் மதஸதி³ஸா’’தி. அத² நம் ‘‘மா தா³னி புன ஏவமகாஸீ’’தி ஓவதி³த்வா அஞ்ஞதரம் ஸதிபட்டா²னம் உக்³க³ண்ஹாபேந்தி. யா பன ‘‘அஹம் அஸுகம் ஸதிபட்டா²னம் நாம மனஸி கரோமீ’’தி வத³தி, தஸ்ஸா ‘‘ஸாது⁴ ஸாதூ⁴’’தி ஸாது⁴காரம் த³த்வா ‘‘தவ ஜீவிதம் ஸுஜீவிதம், த்வம் நாம மனுஸ்ஸத்தம் பத்தா, தவத்தா²ய ஸம்மாஸம்பு³த்³தோ⁴ உப்பன்னோ’’திஆதீ³ஹி பஸம்ஸந்தி. ந கேவலஞ்சேத்த² மனுஸ்ஸஜாதிகாயேவ ஸதிபட்டா²னமனஸிகாரயுத்தா, தே நிஸ்ஸாய விஹரந்தா திரச்சா²னக³தாபி.

தத்ரித³ம் வத்து² – ஏகோ கிர நடகோ ஸுவபோதகம் க³ஹேத்வா ஸிக்கா²பேந்தோ விசரதி. ஸோ பி⁴க்கு²னிஉபஸ்ஸயம் உபனிஸ்ஸாய வஸித்வா க³மனகாலே ஸுவபோதகம் பமுஸ்ஸித்வா க³தோ. தம் ஸாமணேரியோ க³ஹேத்வா படிஜக்³கி³ம்ஸு, ‘‘பு³த்³த⁴ரக்கி²தோ’’தி சஸ்ஸ நாமம் அகம்ஸு. தம் ஏகதி³வஸம் புரதோ நிஸின்னம் தி³ஸ்வா மஹாதே²ரீ ஆஹ ‘‘பு³த்³த⁴ரக்கி²தா’’தி. கிம், அய்யோதி. அத்தி² தே கோசி பா⁴வனாமனஸிகாரோதி? நத்த²ய்யேதி. ஆவுஸோ, பப்³ப³ஜிதானம் ஸந்திகே வஸந்தேன நாம விஸ்ஸட்ட²அத்தபா⁴வேன ப⁴விதும் ந வட்டதி, கோசிதே³வ மனஸிகாரோ இச்சி²தப்³போ³, த்வம் பன அஞ்ஞம் ந ஸக்கி²ஸ்ஸஸி, ‘‘அட்டி² அட்டீ²’’தி ஸஜ்ஜா²யம் கரோஹீதி. ஸோ தே²ரியா ஓவாதே³ ட²த்வா ‘‘அட்டி² அட்டீ²’’தி ஸஜ்ஜா²யந்தோ சரதி.

தம் ஏகதி³வஸம் பாதோவ தோரணக்³கே³ நிஸீதி³த்வா பா³லாதபம் தபமானம் ஏகோ ஸகுணோ நக²பஞ்ஜரேன அக்³க³ஹேஸி. ஸோ ‘‘கிரி கிரீ’’தி ஸத்³த³மகாஸி. ஸாமணேரியோ ஸுத்வா, ‘‘அய்யே, பு³த்³த⁴ரக்கி²தோ ஸகுணேன க³ஹிதோ, மோசேம ந’’ந்தி லேட்³டு³ஆதீ³னி க³ஹேத்வா அனுப³ந்தி⁴த்வா மோசேஸும். தம் ஆனேத்வா புரதோ ட²பிதம் தே²ரீ ஆஹ, ‘‘பு³த்³த⁴ரக்கி²த, ஸகுணேன க³ஹிதகாலே கிம் சிந்தேஸீ’’தி. அய்யே, ந அஞ்ஞம் சிந்தேஸிம், ‘‘அட்டி²புஞ்ஜோவ அட்டி²புஞ்ஜம் க³ஹேத்வா க³ச்ச²தி, கதரஸ்மிம் டா²னே விப்பகிரிஸ்ஸதீ’’தி ஏவம், அய்யே, அட்டி²புஞ்ஜமேவ சிந்தேஸிந்தி. ஸாது⁴ ஸாது⁴, பு³த்³த⁴ரக்கி²த, அனாக³தே ப⁴வக்க²யஸ்ஸ தே பச்சயோ ப⁴விஸ்ஸதீதி. ஏவம் தத்த² திரச்சா²னக³தாபி ஸதிபட்டா²னமனஸிகாரயுத்தா.

தீ³க⁴னிகாயாதீ³ஸு மஹானிதா³னாதீ³னீதி தீ³க⁴னிகாயே மஹானிதா³னம் (தீ³. நி. 2.95 ஆத³யோ) ஸதிபட்டா²னம் (தீ³. நி. 2.372 ஆத³யோ) மஜ்ஜி²மனிகாயே ஸதிபட்டா²னம் (ம. நி. 1.105 ஆத³யோ) ஸாரோபமம் (ம. நி. 1.307 ஆத³யோ) ருக்கோ²பமம் ரட்ட²பாலம் மாக³ண்டி³யம் ஆனேஞ்ஜஸப்பாயந்தி (ம. நி. 3.66 ஆத³யோ) ஏவமாதீ³னி.

ஞாணாத³யோதி ஞாணஞ்சேவ தம்ஸம்பயுத்தத⁴ம்மா ச. தேனாஹ ‘‘ஞாணந்தி வுத்தே’’திஆதி³. ஞாணஸம்பயுத்தசித்தானி லப்³ப⁴ந்தி தேஹி வினா ஸம்பஜானதாய அஸம்ப⁴வதோ. மஹாசித்தானீதி அட்ட²பி மஹாகிரியசித்தானி லப்³ப⁴ந்தி ‘‘ஸததவிஹாரா’’தி வசனதோ ஞாணுப்பத்திபச்சயரஹிதகாலேபி பவத்திஜோதனதோ. த³ஸ சித்தானீதி அட்ட² மஹாகிரியசித்தானி ஹஸிதுப்பாத³வோட்ட²ப்³ப³னசித்தேஹி ஸத்³தி⁴ம் த³ஸ சித்தானி லப்³ப⁴ந்தி. அரஜ்ஜனாது³ஸ்ஸனவஸேன பவத்தி தேஸம்பி ஸாதா⁴ரணாதி. ‘‘உபேக்க²கோ விஹரதீ’’தி வசனதோ ச²ளங்கு³பேக்கா²வஸேன ஆக³தானம் இமேஸம் ஸததவிஹாரானம் ஸோமனஸ்ஸம் கத²ம் லப்³ப⁴தீதி ஆஹ ‘‘ஆஸேவனவஸேன லப்³ப⁴தீ’’தி. கிஞ்சாபி கீ²ணாஸவோ இட்டா²னிட்டே²பி ஆரம்மணே மஜ்ஜ²த்தோ விய ப³ஹுலம் உபேக்க²கோ விஹரதி அத்தனோ பரிஸுத்³த⁴பகதிபா⁴வாவிஜஹனதோ. கதா³சி பன ததா² சேதோபி⁴ஸங்கா²ராபா⁴வே யம் தம் ஸபா⁴வதோ இட்ட²ம் ஆரம்மணம், தத்த² யாதா²வஸபா⁴வக்³க³ஹணவஸேனபி அரஹதோ சித்தம் ஸோமனஸ்ஸஸஹக³தம் ஹுத்வா பவத்ததேவ, தஞ்ச கோ² புப்³பா³ஸேவனவஸேன. தேன வுத்தம் ‘‘ஆஸேவனவஸேன லப்³ப⁴தீ’’தி. ஆரக்க²கிச்சம் ஸாதே⁴தி ஸதிவேபுல்லப்பத்தத்தா. சரதோதிஆதி³னா நிச்சஸமாதா³னம் த³ஸ்ஸேதி, தம் விக்கே²பாபா⁴வேன த³ட்ட²ப்³ப³ம்.

பப்³ப³ஜ்ஜூபக³தாதி யம் கிஞ்சி பப்³ப³ஜ்ஜம் உபக³தா, ந ஸமிதபாபா. போ⁴வாதி³னோதி ஜாதிமத்தப்³ராஹ்மணே வத³தி. பாடேக்கஸச்சானீதி தேஹி தேஹி தி³ட்டி²க³திகேஹி பாடியேக்கம் க³ஹிதானி ‘‘இத³மேவ ஸச்ச’’ந்தி அபி⁴னிவிட்டா²னி தி³ட்டி²ஸச்சாதீ³னி. தானிபி ஹி ‘‘இத³மேவ ஸச்ச’’ந்தி க³ஹணம் உபாதா³ய ‘‘ஸச்சானீ’’தி வோஹரீயந்தி. தேனாஹ ‘‘இத³மேவா’’திஆதி³. நீஹடானீதி அத்தனோ ஸந்தானதோ நீஹரிதானி அபனீதானி. க³ஹிதக்³க³ஹணஸ்ஸாதி அரியமக்³கா³தி⁴க³மதோ புப்³பே³ க³ஹிதஸ்ஸ தி³ட்டி²க்³கா³ஹஸ்ஸ. விஸ்ஸட்ட²பா⁴வவேவசனானீதி அரியமக்³கே³ன ஸப்³ப³ஸோ பரிச்சாக³பா⁴வஸ்ஸ அதி⁴வசனானி.

நத்தி² ஏதாஸம் வயோ வேகல்லந்தி அவயாதி ஆஹ ‘‘அனூனா’’தி, அனவஸேஸோதி அத்தோ². ஏஸனாதி காமேஸனாத³யோ. மக்³க³ஸ்ஸ கிச்சனிப்ப²த்தி கதி²தா ராகா³தீ³னம் பஹீனபா⁴வதீ³பனதோ. பச்சவேக்க²ணப²லம் கதி²தந்தி பச்சவேக்க²ணமுகே²ன அரியப²லம் கதி²தம். அதி⁴க³தே ஹி அக்³க³ப²லே ஸப்³ப³ஸோ ராகா³தீ³னம் அனுப்பாத³த⁴ம்மதம் பஜானாதி, தஞ்ச பஜானனம் பச்சவேக்க²ணஞாணந்தி.

து³தியஅரியாவாஸஸுத்தவண்ணனா நிட்டி²தா.

நாத²வக்³க³வண்ணனா நிட்டி²தா.