3. மஹாவக்³கோ³

1. ஸீஹனாத³ஸுத்தவண்ணனா

21. ததியஸ்ஸ பட²மே விஸமட்டா²னேஸூதி பபாதாதீ³ஸு விஸமட்டா²னேஸு. ‘‘அஞ்ஞேஹி அஸாதா⁴ரணானீ’’தி கஸ்மா வுத்தம், நனு சேதானி ஸாவகானம்பி ஏகச்சானம் உப்பஜ்ஜந்தீதி? காமம் உப்பஜ்ஜந்தி, யாதி³ஸானி பன பு³த்³தா⁴னம் டா²னாட்டா²னஞாணாதீ³னி, ந தாதி³ஸானி தத³ஞ்ஞேஸம் கதா³சிபி உப்பஜ்ஜந்தீதி அஞ்ஞேஹி அஸாதா⁴ரணானீதி. தேனாஹ ‘‘ததா²க³தஸ்ஸேவ ப³லானீ’’தி. இமமேவ ஹி யதா²வுத்தலேஸம் அபேக்கி²த்வா தத³பா⁴வதோ ஆஸயானுஸயஞாணாதீ³ஸு ஏவ அஸாதா⁴ரணஸமஞ்ஞா நிருள்ஹா. காமம் ஞாணப³லானம் ஞாணஸம்பா⁴ரோ விஸேஸபச்சயோ, புஞ்ஞஸம்பா⁴ரோபி பன நேஸம் பச்சயோ ஏவ. ஞாணஸம்பா⁴ரஸ்ஸபி வா புஞ்ஞஸம்பா⁴ரபா⁴வதோ ‘‘புஞ்ஞுஸ்ஸயஸம்பத்தியா ஆக³தானீ’’தி வுத்தம்.

பகதிஹத்தி²குலந்தி (ஸம். நி. டீ. 2.2.22) கி³ரிசரனதி³சரவனசராதி³ப்பபே⁴தா³ கோ³சரியகாலாவகனாமா ஸப்³பா³பி ப³லேன பாகதிகா ஹத்தி²ஜாதி. த³ஸன்னம் புரிஸானந்தி தா²மமஜ்ஜி²மானம் த³ஸன்னம் புரிஸானம். ஏகஸ்ஸ ததா²க³தஸ்ஸ காயப³லந்தி ஆனேத்வா ஸம்ப³ந்தோ⁴. ஏகஸ்ஸாதி ச ததா² ஹேட்டா² கதா²யம் ஆக³தத்தா தே³ஸனாஸோதேன வுத்தம். நாராயனஸங்கா⁴தப³லந்தி ஏத்த² நாரா வுச்சந்தி ரஸ்மியோ. தா ப³ஹூ நானாவிதா⁴ இதோ உப்பஜ்ஜந்தீதி நாராயனம், வஜிரம், தஸ்மா நாராயனஸங்கா⁴தப³லந்தி வஜிரஸங்கா⁴தப³லந்தி அத்தோ². ஞாணப³லம் பன பாளியம் ஆக³தமேவ, ந காயப³லம் விய அட்ட²கதா²ருள்ஹமேவாதி அதி⁴ப்பாயோ.

ஸம்யுத்தகே (ஸம். நி. 2.33) ஆக³தானி தேஸத்ததி ஞாணானி, ஸத்தஸத்ததி ஞாணானீதி வுத்தம், தத்த² (விப⁴. மூலடீ. 760) பன நிதா³னவக்³கே³ ஸத்தஸத்ததி ஆக³தானி சதுசத்தாரீஸஞ்ச. தேஸத்ததி பன படிஸம்பி⁴தா³மக்³கே³ (படி. ம. 1.1) ஸுதமயாதீ³னி ஆக³தானி தி³ஸ்ஸந்தி, ந ஸம்யுத்தகே. அஞ்ஞானிபீதி ஏதேன ஞாணவத்து²விப⁴ங்கே³ (விப⁴. 751 ஆத³யோ) ஏககாதி³வஸேன வுத்தானி, அஞ்ஞத்த² ச ‘‘புப்³ப³ந்தே ஞாண’’ந்திஆதி³னா (த⁴. ஸ. 1063) ப்³ரஹ்மஜாலாதீ³ஸு ச ‘‘தயித³ம் ததா²க³தோ பஜானாதி ‘இமானி தி³ட்டி²ட்டா²னானி ஏவம் க³ஹிதானீ’தி’’ஆதி³னா (தீ³. நி. 1.36) வுத்தானி அனேகானி ஞாணப்பபே⁴தா³னி ஸங்க³ண்ஹாதி. யாதா²வப்படிவேத⁴தோ ஸயஞ்ச அகம்பியம் புக்³க³லஞ்ச தம்ஸமங்கி³னம் நேய்யேஸு அதி⁴ப³லம் கரோதீதி ஆஹ ‘‘அகம்பியட்டே²ன உபத்த²ம்ப⁴னட்டே²ன சா’’தி.

உஸப⁴ஸ்ஸ இத³ந்தி ஆஸப⁴ம், ஸேட்ட²ட்டா²னம். ஸப்³ப³ஞ்ஞுதாபடிஜானனவஸேன அபி⁴முக²ம் க³ச்ச²ந்தி, அட்ட² வா பரிஸா உபஸங்கமந்தீதி ஆஸபா⁴, புப்³ப³பு³த்³தா⁴. இத³ம் பனாதி பு³த்³தா⁴னம் டா²னம் ஸப்³ப³ஞ்ஞுதமேவ வத³தி. திட்ட²மானோவாதி அவத³ந்தோபி திட்ட²மானோவ படிஜானாதி நாமாதி அத்தோ². உபக³ச்ச²தீதி அனுஜானாதி.

அட்ட²ஸு பரிஸாஸூதி ‘‘அபி⁴ஜானாமி கோ² பனாஹம், ஸாரிபுத்த, அனேகஸதம் க²த்தியபரிஸம்…பே… தத்ர வத மம் ப⁴யம் வா ஸாரஜ்ஜம் வா ஓக்கமிஸ்ஸதீதி நிமித்தமேதம், ஸாரிபுத்த, ந ஸமனுபஸ்ஸாமீ’’தி (ம. நி. 1.151) வுத்தாஸு அட்ட²ஸு பரிஸாஸு. அபீ⁴தனாத³ம் நத³தீதி பரதோ த³ஸ்ஸிதஞாணயோகே³ன த³ஸப³லோஹந்தி அபீ⁴தனாத³ம் நத³தி.

படிவேத⁴னிட்ட²த்தா அரஹத்தமக்³க³ஞாணம் படிவேதோ⁴தி ‘‘ப²லக்க²ணே உப்பன்னம் நாமா’’தி வுத்தம். தேன படிலத்³த⁴ஸ்ஸபி தே³ஸனாஞாணஸ்ஸ கிச்சனிப்ப²த்தி பரஸ்ஸ அவபு³ஜ்ஜ²னமத்தேன ஹோதீதி ‘‘அஞ்ஞாஸிகோண்ட³ஞ்ஞஸ்ஸ ஸோதாபத்திப²லக்க²ணே பவத்தம் நாமா’’தி வுத்தம். ததோ பரம் பன யாவ பரினிப்³பா³னா தே³ஸனாஞாணபவத்தி தஸ்ஸேவ பவத்திதஸ்ஸ த⁴ம்மசக்கஸ்ஸ டா²னந்தி வேதி³தப்³ப³ம் பவத்திதசக்கஸ்ஸ சக்கவத்தினோ சக்கரதனஸ்ஸ டா²னம் விய.

திட்ட²தீதி வுத்தம், கிம் பூ⁴மியம் புரிஸோ விய, நோதி ஆஹ ‘‘ததா³யத்தவுத்திதாயா’’தி. டா²னந்தி சேத்த² அத்தலாபோ⁴ த⁴ரமானதா ச, ந க³தினிவத்தீதி ஆஹ ‘‘உப்பஜ்ஜதி சேவ பவத்ததி சா’’தி. யத்த² பனேதம் த³ஸப³லஞாணம் வித்தா²ரிதம், தம் த³ஸ்ஸேந்தோ ‘‘அபி⁴த⁴ம்மே பனா’’திஆதி³மாஹ. ஸேஸேஸுபி ஏஸேவ நயோ.

ஸமாதி³யந்தீதி ஸமாதா³னானி, தானி பன ஸமாதி³யித்வா கதானி ஹோந்தீதி ஆஹ ‘‘ஸமாதி³யித்வா கதான’’ந்தி. கம்மமேவ வா கம்மஸமாதா³னந்தி ஏதேன ஸமாதா³னஸத்³த³ஸ்ஸ அபுப்³ப³த்தா²பா⁴வம் த³ஸ்ஸேதி முத்தக³தஸத்³தே³ க³தஸத்³த³ஸ்ஸ விய. க³தீதி நிரயாதி³க³தியோ. உபதீ⁴தி அத்தபா⁴வோ. காலோதி கம்மஸ்ஸ விபச்சனாரஹகாலோ. பயோகோ³தி விபாகுப்பத்தியா பச்சயபூ⁴தா கிரியா.

அக³திகா³மினிந்தி நிப்³பா³னகா³மினிம். வுத்தஞ்ஹி ‘‘நிப்³பா³னஞ்சாஹம், ஸாரிபுத்த, பஜானாமி நிப்³பா³னகா³மினிஞ்ச படிபத³’’ந்தி (ம. நி. 1.153). ப³ஹூஸுபி மனுஸ்ஸேஸு ஏகமேவ பாணம் கா⁴தேந்தேஸு காமம் ஸப்³பே³ஸம்பி சேதனா தஸ்ஸேவேகஸ்ஸ ஜீவிதிந்த்³ரியாரம்மணா, தம் பன கம்மம் தேஸம் நானாகாரம். தேஸு (விப⁴. அட்ட². 811) ஹி ஏகோ ஆத³ரேன ச²ந்த³ஜாதோ கரோதி, ஏகோ ‘‘ஏஹி த்வம்பி கரோஹீ’’தி பரேஹி நிப்பீளிதோ கரோதி, ஏகோ ஸமானச்ச²ந்தோ³ விய ஹுத்வா அப்படிபா³ஹமானோ விசரதி. தேஸு ஏகோ தேனேவ கம்மேன நிரயே நிப்³ப³த்ததி, ஏகோ திரச்சா²னயோனியம், ஏகோ பேத்திவிஸயே. தம் ததா²க³தோ ஆயூஹனக்க²ணேயேவ ‘‘இமினா நீஹாரேன ஆயூஹிதத்தா ஏஸ நிரயே நிப்³ப³த்திஸ்ஸதி, ஏஸ திரச்சா²னயோனியம், ஏஸ பேத்திவிஸயே’’தி ஜானாதி. நிரயே நிப்³ப³த்தமானம்பி ‘‘ஏஸ மஹானிரயே நிப்³ப³த்திஸ்ஸதி, ஏஸ உஸ்ஸத³னிரயே’’தி ஜானாதி. திரச்சா²னயோனியம் நிப்³ப³த்தமானம்பி ‘‘ஏஸ அபாத³கோ ப⁴விஸ்ஸதி, ஏஸ த்³விபாத³கோ, ஏஸ சதுப்பதோ³, ஏஸ ப³ஹுப்பதோ³’’தி ஜானாதி. பேத்திவிஸயே நிப்³ப³த்தமானம்பி ‘‘ஏஸ நிஜ்ஜா²மதண்ஹிகோ ப⁴விஸ்ஸதி, ஏஸ கு²ப்பிபாஸிகோ, ஏஸ பரத³த்தூபஜீவீ’’தி ஜானாதி. தேஸு ச கம்மேஸு ‘‘இத³ம் கம்மம் படிஸந்தி⁴ம் ஆகட்³டி⁴ஸ்ஸதி, இத³ம் அஞ்ஞேன தி³ன்னாய படிஸந்தி⁴யா உபதி⁴வேபக்கம் ப⁴விஸ்ஸதீ’’தி ஜானாதி.

ததா² ஸகலகா³மவாஸிகேஸு ஏகதோ பிண்ட³பாதம் த³த³மானேஸு காமம் ஸப்³பே³ஸம்பி சேதனா பிண்ட³பாதாரம்மணாவ, தம் பன கம்மம் தேஸம் நானாகாரம். தேஸு ஹி ஏகோ ஆத³ரேன கரோதீதி ஸப்³ப³ம் புரிமஸதி³ஸம், தஸ்மா தேஸு கேசி தே³வலோகே நிப்³ப³த்தந்தி, கேசி மனுஸ்ஸலோகே. தம் ததா²க³தோ ஆயூஹனக்க²ணேயேவ ஜானாதி. ‘‘இமினா நீஹாரேன ஆயூஹிதத்தா ஏஸ மனுஸ்ஸலோகே நிப்³ப³த்திஸ்ஸதி, ஏஸ தே³வலோகே. தத்தா²பி ஏஸ க²த்தியகுலே, ஏஸ ப்³ராஹ்மணகுலே, ஏஸ வேஸ்ஸகுலே, ஏஸ ஸுத்³த³குலே, ஏஸ பரனிம்மிதவஸவத்தீஸு, ஏஸ நிம்மானரதீஸு, ஏஸ துஸிதேஸு, ஏஸ யாமேஸு, ஏஸ தாவதிம்ஸேஸு, ஏஸ சாதுமஹாராஜிகேஸு, ஏஸ பு⁴ம்மதே³வேஸூ’’திஆதி³னா தத்த² தத்த² ஹீனபணீதஸுவண்ணது³ப்³ப³ண்ணஅப்பபரிவாரமஹாபரிவாரதாதி³பே⁴த³ம் தம் தம் விஸேஸம் ஆயூஹனக்க²ணேயேவ ஜானாதி.

ததா² விபஸ்ஸனம் பட்ட²பேந்தேஸுயேவ ‘‘இமினா நீஹாரேன ஏஸ கிஞ்சி ஸல்லக்கே²தும் ந ஸக்கி²ஸ்ஸதி, ஏஸ மஹாபூ⁴தமத்தமேவ வவத்த²பேஸ்ஸதி, ஏஸ ரூபபரிக்³க³ஹேயேவ ட²ஸ்ஸதி, ஏஸ அரூபபரிக்³க³ஹேயேவ, ஏஸ நாமரூபபரிக்³க³ஹேயேவ, ஏஸ பச்சயபரிக்³க³ஹேயேவ, ஏஸ லக்க²ணாரம்மணிகவிபஸ்ஸனாயமேவ, ஏஸ பட²மப²லேயேவ, ஏஸ து³தியப²லேயேவ, ஏஸ ததியப²லேயேவ, ஏஸ அரஹத்தம் பாபுணிஸ்ஸதீ’’தி ஜானாதி. கஸிணபரிகம்மம் கரோந்தேஸுபி ‘‘இமஸ்ஸ பரிகம்மமத்தமேவ ப⁴விஸ்ஸதி, ஏஸ நிமித்தம் உப்பாதே³ஸ்ஸதி, ஏஸ அப்பனம் ஏவ பாபுணிஸ்ஸதி, ஏஸ ஜா²னம் பாத³கம் கத்வா விபஸ்ஸனம் பட்ட²பேத்வா அரஹத்தம் க³ண்ஹிஸ்ஸதீ’’தி ஜானாதி. தேனாஹ ‘‘இமஸ்ஸ சேதனா’’திஆதி³.

காமனதோ காமேதப்³ப³தோ காமப்படிஸம்யுத்ததோ ச தா⁴து காமதா⁴து. ஆதி³-ஸத்³தே³ன ப்³யாபாத³தா⁴துரூபதா⁴துஆதீ³னம் ஸங்க³ஹோ. விலக்க²ணதாயாதி விஸதி³ஸஸபா⁴வதாய. க²ந்தா⁴யதனதா⁴துலோகந்தி அனேகதா⁴தும் நானாதா⁴தும் க²ந்த⁴லோகம் ஆயதனலோகம் தா⁴துலோகம் யதா²பூ⁴தம் பஜானாதீதி யோஜனா. ‘‘அயம் ரூபக்க²ந்தோ⁴ நாம…பே… அயம் விஞ்ஞாணக்க²ந்தோ⁴ நாம. தேஸுபி ஏகவிதே⁴ன ரூபக்க²ந்தோ⁴, ஏகாத³ஸவிதே⁴ன ரூபக்க²ந்தோ⁴. ஏகவிதே⁴ன வேத³னாக்க²ந்தோ⁴, ப³ஹுவிதே⁴ன வேத³னாக்க²ந்தோ⁴. ஏகவிதே⁴ன ஸஞ்ஞாக்க²ந்தோ⁴…பே… ஸங்கா²ரக்க²ந்தோ⁴…பே… விஞ்ஞாணக்க²ந்தோ⁴, ப³ஹுவிதே⁴ன விஞ்ஞாணக்க²ந்தோ⁴’’தி ஏவம் தாவ க²ந்த⁴லோகஸ்ஸ, ‘‘இத³ம் சக்கா²யதனம் நாம…பே… இத³ம் த⁴ம்மாயதனம் நாம. தத்த² த³ஸாயதனா காமாவசரா, த்³வே சாதுபூ⁴மகா’’திஆதி³னா ஆயதனலோகஸ்ஸ, ‘‘அயம் சக்கு²தா⁴து நாம…பே… அயம் மனோவிஞ்ஞாணதா⁴து நாம. தத்த² ஸோளஸ தா⁴துயோ காமாவசரா, த்³வே சாதுபூ⁴மகா’’திஆதி³னா தா⁴துலோகஸ்ஸ அனேகஸபா⁴வம் நானாஸபா⁴வஞ்ச பஜானாதி. ந கேவலம் உபாதி³ன்னஸங்கா²ரலோகஸ்ஸேவ, அத² கோ² அனுபாதி³ன்னகஸங்கா²ரலோகஸ்ஸபி ‘‘இமாய நாம தா⁴துயா உஸ்ஸன்னத்தா இமஸ்ஸ ருக்க²ஸ்ஸ க²ந்தோ⁴ ஸேதோ, இமஸ்ஸ காளோ, இமஸ்ஸ மட்டோ², இமஸ்ஸ ஸகண்டகோ, இமஸ்ஸ ப³ஹலத்தசோ, இமஸ்ஸ தனுத்தசோ, இமஸ்ஸ பத்தம் வண்ணஸண்டா²னாதி³வஸேன ஏவரூபம், இமஸ்ஸ புப்ப²ம் நீலம் பீதம் லோஹிதம் ஓதா³தம் ஸுக³ந்த⁴ம் து³க்³க³ந்த⁴ம், இமஸ்ஸ ப²லம் கு²த்³த³கம் மஹந்தம் தீ³க⁴ம் வட்டம் ஸுஸண்டா²னம் து³ஸ்ஸண்டா²னம் மட்ட²ம் ப²ருஸம் ஸுக³ந்த⁴ம் து³க்³க³ந்த⁴ம் மது⁴ரம் தித்தகம் கடுகம் அம்பி³லம் கஸாவம், இமஸ்ஸ கண்டகோ திகி²ணோ குண்டோ² உஜுகோ குடிலோ தம்போ³ காளோ ஓதா³தோ ஹோதீ’’திஆதி³னா பஜானாதி. ஸப்³ப³ஞ்ஞுபு³த்³தா⁴னம் ஏவ ஹி ஏதம் ப³லம், ந அஞ்ஞேஸம்.

நானாதி⁴முத்திகதந்தி நானஜ்ஜா²ஸயதம். அதி⁴முத்தி நாம அஜ்ஜா²ஸயதா⁴து அஜ்ஜா²ஸயஸபா⁴வோ. ஸோ பன ஹீனபணீததாஸாமஞ்ஞேன பாளியம் த்³விதா⁴வ வுத்தோபி ஹீனபணீதாதி³பே⁴தே³ன அனேகவிதோ⁴தி ஆஹ ‘‘ஹீனாதீ³ஹி அதி⁴முத்தீஹி நானாதி⁴முத்திகபா⁴வ’’ந்தி. தத்த² யே யே ஸத்தா யம்யம்அதி⁴முத்திகா, தே தே தம்தத³தி⁴முத்திகே ஏவ ஸேவந்தி ப⁴ஜந்தி பயிருபாஸந்தி தா⁴துஸபா⁴க³தோ. யதா² கூ³தா²தீ³னம் தா⁴தூனம் ஸபா⁴வோ ஏஸோ, யம் கூ³தா²தீ³ஹி ஏவ ஸம்ஸந்த³ந்தி ஸமேந்தி, ஏவம் ஹீனஜ்ஜா²ஸயா து³ஸ்ஸீலாதீ³ஹேவ ஸம்ஸந்த³ந்தி ஸமேந்தி, ஸம்பன்னஸீலாத³யோ ச ஸம்பன்னஸீலாதீ³ஹேவ. தம் நேஸம் நானாதி⁴முத்திகதம் ப⁴க³வா யதா²பூ⁴தம் பஜானாதீதி.

வுத்³தி⁴ம் ஹானிஞ்சாதி பச்சயவிஸேஸேன ஸாமத்தி²யதோ அதி⁴கதம் அனதி⁴கதஞ்ச. இந்த்³ரியபரோபரியத்தஞாணனித்³தே³ஸே (விப⁴. 814; படி. ம. 113) ‘‘ஆஸயம் ஜானாதி, அனுஸயம் ஜானாதீ’’தி ஆஸயாதி³ஜானனம் கஸ்மா நித்³தி³ட்ட²ந்தி? ஆஸயஜானனாதி³னா யேஹி இந்த்³ரியேஹி பரோபரேஹி ஸத்தா கல்யாணபாபாஸயாதி³கா ஹோந்தி, தேஸம் ஜானனஸ்ஸ விபா⁴வனதோ. ஏவஞ்ச கத்வா இந்த்³ரியபரோபரியத்தஆஸயானுஸயஞாணானம் விஸும் அஸாதா⁴ரணதா, இந்த்³ரியபரோபரியத்தனானாதி⁴முத்திகதாஞாணானம் விஸும் ப³லவதா ச ஸித்³தா⁴ ஹோதி. தத்த² ஆஸயந்தி யத்த² ஸத்தா நிவஸந்தி, தம் தேஸம் நிவாஸட்டா²னம், தி³ட்டி²க³தம் வா யதா²பூ⁴தஞாணம் வா ஆஸயோ, அனுஸயோ அப்பஹீனபா⁴வேன தா²மக³தோ கிலேஸோ. தம் பன ப⁴க³வா ஸத்தானம் ஆஸயம் ஜானந்தோ தேஸம் தேஸம் தி³ட்டி²க³தானம் விபஸ்ஸனாமக்³க³ஞாணானஞ்ச அப்பவத்திக்க²ணேபி ஜானாதி. வுத்தஞ்ஹேதம் –

‘‘காமம் ஸேவந்தம்யேவ ப⁴க³வா ஜானாதி – ‘அயம் புக்³க³லோ காமக³ருகோ காமாஸயோ காமாதி⁴முத்தோ’தி. காமம் ஸேவந்தம்யேவ ஜானாதி – ‘அயம் புக்³க³லோ நேக்க²ம்மக³ருகோ நேக்க²ம்மாஸயோ நேக்க²ம்மாதி⁴முத்தோ’தி. நேக்க²ம்மம் ஸேவந்தம்யேவ ஜானாதி. ப்³யாபாத³ம், அப்³யாபாத³ம், தி²னமித்³த⁴ம், ஆலோகஸஞ்ஞம் ஸேவந்தம்யேவ ஜானாதி – ‘அயம் புக்³க³லோ தி²னமித்³த⁴க³ருகோ தி²னமித்³தா⁴ஸயோ தி²னமித்³தா⁴தி⁴முத்தோ’’’தி (படி. ம. 1.113).

பட²மாதீ³னம் சதுன்னம் ஜா²னானந்தி ரூபாவசரானம் பட²மாதீ³னம் பச்சனீகஜ்ஜா²பனட்டே²ன ஆரம்மணூபனிஜ்ஜா²பனட்டே²ன ச ஜா²னானம். சதுக்கனயேன ஹேதம் வுத்தம். அட்ட²ன்னம் விமோக்கா²னந்தி ஏத்த² படிபாடியா ஸத்த அப்பிதப்பிதக்க²ணே பச்சனீகத⁴ம்மேஹி விமுச்சனதோ ஆரம்மணே ச அதி⁴முச்சனதோ விமோக்கா² நாம. அட்ட²மோ பன ஸப்³ப³ஸோ ஸஞ்ஞாவேத³யிதேஹி விமுத்தத்தா அபக³மவிமோக்கோ² நாம. சதுக்கனயபஞ்சகனயேஸு பட²மஜ்ஜா²னஸமாதி⁴ ஸவிதக்கஸவிசாரோ நாம. பஞ்சகனயே து³தியஜ்ஜா²னஸமாதி⁴ அவிதக்கவிசாரமத்தோ. நயத்³வயேபி உபரி தீஸு ஜா²னேஸு ஸமாதி⁴ அவிதக்கஅவிசாரோ. ஸமாபத்தீஸு படிபாடியா அட்ட²ன்னம் ஸமாதீ⁴திபி நாமம், ஸமாபத்தீதிபி சித்தேகக்³க³தாஸப்³பா⁴வதோ, நிரோத⁴ஸமாபத்தியா தத³பா⁴வதோ ந ஸமாதீ⁴தி நாமம். ஹானபா⁴கி³யத⁴ம்மந்தி அப்பகு³ணேஹி பட²மஜ்ஜா²னாதீ³ஹி வுட்டி²தஸ்ஸ ஸஞ்ஞாமனஸிகாரானம் காமாதி³அனுபக்க²ந்த³னம். விஸேஸபா⁴கி³யத⁴ம்மந்தி பகு³ணேஹி பட²மஜ்ஜா²னாதீ³ஹி வுட்டி²தஸ்ஸ ஸஞ்ஞாமனஸிகாரானம் து³தியஜ்ஜா²னாதி³பக்க²ந்த³னம். இதி ஸஞ்ஞாமனஸிகாரானம் காமாதி³து³தியஜ்ஜா²னாதி³பக்க²ந்த³னானி ஹானபா⁴கி³யவிஸேஸபா⁴கி³யா த⁴ம்மாதி த³ஸ்ஸிதானி. தேஹி பன ஜா²னானம் தம்ஸபா⁴வதா ச த⁴ம்மஸத்³தே³ன வுத்தா. தஸ்மாதி வுத்தமேவத்த²ம் ஹேதுபா⁴வேன பச்சாமஸதி. வோதா³னந்தி பகு³ணதாஸங்கா²தம் வோதா³னம். தஞ்ஹி பட²மஜ்ஜா²னாதீ³ஹி வுட்ட²ஹித்வா து³தியஜ்ஜா²னாதி³அதி⁴க³மஸ்ஸ பச்சயத்தா ‘‘வுட்டா²ன’’ந்தி வுத்தம். கேசி பன ‘‘நிரோத⁴தோ ப²லஸமாபத்தியா வுட்டா²னந்தி பாளி நத்தீ²’’தி வத³ந்தி. தே ‘‘நிரோதா⁴ வுட்ட²ஹந்தஸ்ஸ நேவஸஞ்ஞானாஸஞ்ஞாயதனம் ப²லஸமாபத்தியா அனந்தரபச்சயேன பச்சயோ’’தி இமாய பாளியா (பட்டா². 1.1.417) படிஸேதே⁴தப்³பா³. யோ ஸமாபத்திலாபீ⁴ ஸமானோ ஏவ ‘‘ந லாபீ⁴ம்ஹீ’’தி, கம்மட்டா²னம் ஸமானம் ஏவ ‘‘ந கம்மட்டா²ன’’ந்தி ஸஞ்ஞீ ஹோதி, ஸோ ஸம்பத்திம்யேவ ஸமானம் ‘‘விபத்தீ’’தி பச்சேதீதி வேதி³தப்³போ³.

ந ததா² த³ட்ட²ப்³ப³ந்தி யதா² பரவாதி³னா வுத்தம், ததா² ந த³ட்ட²ப்³ப³ம். ஸகஸககிச்சமேவ ஜானாதீதி டா²னாட்டா²னஜானனாதி³ஸகஸகமேவ கிச்சம் காதும் ஜானாதி, யதா²ஸகமேவ விஸயம் படிவிஜ்ஜ²தீதி அத்தோ². தம்பீதி தேஹி த³ஸப³லஞாணேஹி ஜானிதப்³ப³ம்பி. கம்மவிபாகந்தரமேவாதி கம்மந்தரஸ்ஸ விபாகந்தரமேவ ஜானாதி. சேதனாசேதனாஸம்பயுத்தத⁴ம்மே நிரயாதி³னிப்³பா³னகா³மினிப்படிபதா³பூ⁴தே கம்மந்தி க³ஹேத்வா ஆஹ ‘‘கம்மபரிச்சே²த³மேவா’’தி. தா⁴துனானத்தஞ்ச தா⁴துனானத்தகாரணஞ்ச தா⁴துனானத்தகாரணந்தி ஏகதே³ஸஸரூபேகஸேஸோ த³ட்ட²ப்³போ³. தஞ்ஹி ஞாணம் தது³ப⁴யம்பி ஜானாதி. ‘‘இமாய நாம தா⁴துயா உஸ்ஸன்னத்தா’’திஆதி³னா (விப⁴. அட்ட². 812) ததா² சேவ ஸம்வண்ணிதம். ஸச்சபரிச்சே²த³மேவாதி பரிஞ்ஞாபி⁴ஸமயாதி³வஸேன ஸச்சானம் பரிச்சி²ன்னமேவ. அப்பேதும் ந ஸக்கோதி அட்ட²மனவமப³லானி விய தம்ஸதி³ஸம், இத்³தி⁴வித⁴ஞாணமிவ விகுப்³பி³தும். ஏதேனஸ்ஸ ப³லஸதி³ஸதஞ்ச நிவாரேதி. ஜா²னாதி³ஞாணம் விய வா அப்பேதும் விகுப்³பி³துஞ்ச. யதி³பி ஹி ஜா²னாதி³பச்சவேக்க²ணஞாணம் ஸத்தமப³லந்தி தஸ்ஸ ஸவிதக்கஸவிசாரதா வுத்தா, ததா²பி ஜா²னாதீ³ஹி வினா பச்சவேக்க²ணா நத்தீ²தி ஜா²னாதி³ஸஹக³தம் ஞாணம் தத³ந்தோக³த⁴ம் கத்வா ஏவம் வுத்தந்தி வேதி³தப்³ப³ம். அத² வா ஸப்³ப³ஞ்ஞுதஞ்ஞாணம் ஜா²னாதி³கிச்சம் விய ந ஸப்³ப³ம் ப³லகிச்சம் காதும் ஸக்கோதீதி த³ஸ்ஸேதும் ‘‘ஜா²னம் ஹுத்வா அப்பேதும், இத்³தி⁴ ஹுத்வா விகுப்³பி³துஞ்ச ந ஸக்கோதீ’’தி வுத்தம், ந பன கஸ்ஸசி ப³லஸ்ஸ ஜா²னஇத்³தி⁴பா⁴வதோதி த³ட்ட²ப்³ப³ம்.

ஏவம் கிச்சவிஸேஸவஸேனபி த³ஸப³லஞாணஸப்³ப³ஞ்ஞுதஞ்ஞாணவிஸேஸம் த³ஸ்ஸேத்வா இதா³னி விதக்கத்திகபூ⁴மந்தரவஸேனபி தம் த³ஸ்ஸேதும் ‘‘அபிசா’’திஆதி³ வுத்தம். படிபாடியாதிஆதி³தோ பட்டா²ய படிபாடியா.

அனுபத³வண்ணனம் ஞத்வா வேதி³தப்³பா³னீதி ஸம்ப³ந்தோ⁴. கிலேஸாவரணம் நியதமிச்சா²தி³ட்டி². கிலேஸாவரணஸ்ஸ அபா⁴வோ ஆஸவக்க²யஞாணாதி⁴க³மஸ்ஸ டா²னம், தப்³பா⁴வோ அட்டா²னம். அனதி⁴க³மஸ்ஸ பன தது³ப⁴யம்பி யதா²க்கமம் அட்டா²னம் டா²னஞ்சாதி தத்த² காரணம் த³ஸ்ஸேந்தோ ‘‘லோகிய…பே… த³ஸ்ஸனதோ சா’’தி ஆஹ. தத்த² லோகியஸம்மாதி³ட்டி²யா டி²தி ஆஸவக்க²யாதி⁴க³மஸ்ஸ டா²னம் கிலேஸாவரணாபா⁴வஸ்ஸ காரணத்தா. ஸா ஹி தஸ்மிம் ஸதி ந ஹோதி, அஸதி ச ஹோதி. ஏதேன தஸ்ஸா அட்டி²தியா தஸ்ஸ அட்டா²னதா வுத்தா ஏவ. நேஸம் வேனேய்யஸத்தானம். தா⁴துவேமத்தத³ஸ்ஸனதோதி காமதா⁴துஆதீ³னம் பவத்திபே⁴த³த³ஸ்ஸனதோ, யத³க்³கே³ன தா⁴துவேமத்தம் ஜானாதி, தத³க்³கே³ன சரியாதி³விஸேஸம்பி ஜானாதி. தா⁴துவேமத்தத³ஸ்ஸனதோதி வா த⁴ம்மதா⁴துவேமத்தத³ஸ்ஸனதோ. ஸப்³பா³பி ஹி சரியா த⁴ம்மதா⁴துபரியாபன்னா ஏவாதி. பயோக³ம் அனாதி³யித்வாபி ஸந்ததிமஹாமத்தாதீ³னம் விய. தி³ப்³ப³சக்கா²னுபா⁴வதோ பத்தப்³பே³னாதி ஏத்த² தி³ப்³ப³சக்கு²னா பரஸ்ஸ ஹத³யவத்து²ஸன்னிஸ்ஸயலோஹிதவண்ணத³ஸ்ஸனமுகே²ன ததா³ பவத்தமானசித்தஜானனத்த²ம் பரிகம்மகரணம் நாம ஸாவகானம், தஞ்ச கோ² ஆதி³கம்மிகானம், யதோ தி³ப்³ப³சக்கு²ஆனுபா⁴வதோ சேதோபரியஞாணஸ்ஸ பத்தப்³ப³தா ஸியா. பு³த்³தா⁴னம் பன யதி³பி ஆஸவக்க²யஞாணாதி⁴க³மதோ பகே³வ தி³ப்³ப³சக்கு²ஞாணாதி⁴க³மோ, ததா²பி ததா²பரிகம்மகரணம் நத்தி² விஜ்ஜாத்தயஸித்³தி⁴யா ஸிஜ்ஜ²னதோ. ஸேஸாபி⁴ஞ்ஞாத்தயே சேதோபரியஞாணம் தி³ப்³ப³சக்கு²ஞாணாதி⁴க³மேன பத்தந்தி ச வத்தப்³ப³தம் லப⁴தீதி ததா² வுத்தந்தி த³ட்ட²ப்³ப³ம்.

ஸீஹனாத³ஸுத்தவண்ணனா நிட்டி²தா.

2-4. அதி⁴வுத்திபத³ஸுத்தாதி³வண்ணனா

22-24. து³தியே அதி⁴வசனபதா³னந்தி பஞ்ஞத்திபதா³னம். தா³ஸாதீ³ஸு ஸிரிவட்³ட⁴காதி³ஸத்³தா³ விய வசனமத்தமேவ அதி⁴காரம் கத்வா பவத்தியா அதி⁴வசனம் பஞ்ஞத்தி. அத² வா அதி⁴ஸத்³தோ³ உபரிபா⁴கே³. வுச்சதீதி வசனம், உபரி வசனம் அதி⁴வசனம், உபாதா³பூ⁴தரூபாதீ³னம் உபரி பஞ்ஞபியமானா உபாதா³பஞ்ஞத்தீதி அத்தோ², தஸ்மா பஞ்ஞத்திதீ³பகபதா³னீதி அத்தோ² த³ட்ட²ப்³போ³. தஸ்ஸ பதா³னி பத³ட்டா²னானி அதி⁴வசனபதா³னி. தேனாஹ ‘‘தேஸம் யே’’திஆதி³. தேஸந்தி அதி⁴வசனானம். யேதி க²ந்தா⁴த³யோ. அதி⁴வுத்திதாய அதி⁴வுத்தியோதி தி³ட்டி²யோ வுச்சந்தி. அதி⁴கஞ்ஹி ஸபா⁴வத⁴ம்மேஸு ஸஸ்ஸதாதி³ம், பகதிஆதி³ம், த்³ரப்³யாதி³ம், ஜீவாதி³ம், காயாதி³ஞ்ச, அபூ⁴தம் அத்த²ம் அஜ்ஜா²ரோபேத்வா தி³ட்டி²யோ பவத்தந்தீதி. தேனாஹ ‘‘அத² வா’’திஆதி³. ததியசதுத்தா²னி ஸுவிஞ்ஞேய்யானி.

அதி⁴வுத்திபத³ஸுத்தாதி³வண்ணனா நிட்டி²தா.

5. கஸிணஸுத்தவண்ணனா

25. பஞ்சமே ஸகலட்டே²னாதி நிஸ்ஸேஸட்டே²ன. அனவஸேஸப²ரணவஸேன சேத்த² ஸகலட்டோ² வேதி³தப்³போ³, அஸுப⁴னிமித்தாதீ³ஸு விய ஏகதே³ஸே அட்ட²த்வா அனவஸேஸதோ க³ஹேதப்³ப³ட்டே²னாதி அத்தோ². ததா³ரம்மணானம் த⁴ம்மானந்தி தம் கஸிணம் ஆரப்³ப⁴ பவத்தனகத⁴ம்மானம். கே²த்தட்டே²னாதி உப்பத்திட்டா²னட்டே²ன. அதி⁴ட்டா²னட்டே²னாதி பவத்திட்டா²னபா⁴வேன. யதா² கே²த்தம் ஸஸ்ஸானம் உப்பத்திட்டா²னம் வட்³ட⁴னட்டா²னஞ்ச, ஏவமேவ தம் த ஜா²னம் ஸம்பயுத்தத⁴ம்மானந்தி. யோகி³னோ வா ஸுக²விஸேஸானம் காரணபா⁴வேன. பரிச்சி²ந்தி³த்வாதி இத³ம் ‘‘உத்³த⁴ம் அதோ⁴ திரிய’’ந்தி ஏத்தா²பி யோஜேதப்³ப³ம். பரிச்சி²ந்தி³த்வா ஏவ ஹி ஸப்³ப³த்த² கஸிணம் வட்³டே⁴தப்³ப³ம். தேன தேன வா காரணேனாதி தேன தேன உபரிஆதீ³ஸு கஸிணவட்³ட⁴னகாரணேன. யதா² கிந்தி ஆஹ ‘‘ஆலோகமிவ ரூபத³ஸ்ஸனகாமோ’’தி. யதா² தி³ப்³ப³சக்கு²னா உத்³த⁴ம் சே ரூபம் த³ட்டு²காமோ, உத்³த⁴ம் ஆலோகம் பஸாரேதி. அதோ⁴ சே, அதோ⁴. ஸமந்ததோ சே ரூபம் த³ட்டு²காமோ, ஸமந்ததோ ஆலோகம் பஸாரேதி, ஏவம் ஸப்³ப³கஸிணந்தி அத்தோ². ஏகஸ்ஸாதி பத²வீகஸிணாதீ³ஸு ஏகேகஸ்ஸ. அஞ்ஞபா⁴வானுபக³மனத்த²ந்தி அஞ்ஞகஸிணபா⁴வானுபக³மனதீ³பனத்த²ம், அஞ்ஞஸ்ஸ வா கஸிணபா⁴வானுபக³மனதீ³பனத்த²ம். ந ஹி அஞ்ஞேன பஸாரிதகஸிணம் ததோ அஞ்ஞேன பஸாரிதகஸிணபா⁴வம் உபக³ச்ச²தி, ஏவம்பி நேஸம் அஞ்ஞகஸிணஸம்பே⁴தா³பா⁴வோ வேதி³தப்³போ³. ந அஞ்ஞம் பத²வீஆதி³. ந ஹி உத³கேன டி²தட்டா²னே ஸஸம்பா⁴ரபத²வீ அத்தி². அஞ்ஞகஸிணஸம்பே⁴தோ³தி ஆபோகஸிணாதி³னா ஸங்கரோ. ஸப்³ப³த்தா²தி ஸப்³பே³ஸு ஸேஸகஸிணேஸு.

ஏகதே³ஸே அட்ட²த்வா அனவஸேஸப²ரணம் பமாணஸ்ஸ அக்³க³ஹணதோ அப்பமாணம். தேனேவ ஹி நேஸம் கஸிணஸமஞ்ஞா. ததா² சாஹ ‘‘தஞ்ஹீ’’திஆதி³. தத்த² சேதஸா ப²ரந்தோதி பா⁴வனாசித்தேன ஆரம்மணம் கரோந்தோ. பா⁴வனாசித்தஞ்ஹி கஸிணம் பரித்தம் வா விபுலம் வா ஸகலமேவ மனஸி கரோதி, ந ஏகதே³ஸம். கஸிணுக்³கா⁴டிமாகாஸே பவத்தவிஞ்ஞாணம் ப²ரணஅப்பமாணவஸேன விஞ்ஞாணகஸிணந்தி வுத்தம். ததா² ஹி தம் விஞ்ஞாணந்தி வுச்சதி. கஸிணவஸேனாதி உக்³கா⁴டிதகஸிணவஸேன கஸிணுக்³கா⁴டிமாகாஸே உத்³த⁴ம்அதோ⁴திரியதா வேதி³தப்³பா³. யத்தகஞ்ஹி டா²னம் கஸிணம் பஸாரிதம், தத்தகம் ஆகாஸபா⁴வனாவஸேன ஆகாஸம் ஹோதீதி. ஏவம் யத்தகம் டா²னம் ஆகாஸம் ஹுத்வா உபட்டி²தம், தத்தகம் ஸகலமேவ ப²ரித்வா விஞ்ஞாணஸ்ஸ பவத்தனதோ ஆக³மனவஸேன விஞ்ஞாணகஸிணேபி உத்³த⁴ம்அதோ⁴திரியதா வுத்தாதி ஆஹ ‘‘கஸிணுக்³கா⁴டிமாகாஸவஸேன தத்த² பவத்தவிஞ்ஞாணே உத்³த⁴ம்அதோ⁴திரியதா வேதி³தப்³பா³’’தி.

கஸிணஸுத்தவண்ணனா நிட்டி²தா.

6. காளீஸுத்தவண்ணனா

26. ச²ட்டே² அத்த²ஸ்ஸ பத்திந்தி ஏகந்ததோ ஹிதானுப்பத்திம். ஹத³யஸ்ஸ ஸந்திந்தி பரமசித்தூபஸமம். கிலேஸஸேனந்தி காமகு³ணஸங்கா²தம் பட²மம் கிலேஸஸேனம். ஸா ஹி கிலேஸஸேனா அச்ச²ராஸங்கா⁴தஸபா⁴வாபி படிபத்த²யமானா பியாயிதப்³ப³இச்சி²தப்³ப³ரூபஸபா⁴வதோ பியரூபஸாதரூபா நாம அத்தனோ கிச்சவஸேன. அஹம் ஏகோவ ஜா²யந்தோதி அஹம் க³ணஸங்க³ணிகாய கிலேஸஸங்க³ணிகாய ச அபா⁴வதோ ஏகோ அஸஹாயோ லக்க²ணூபனிஜ்ஜா²னேன ஜா²யந்தோ. அனுபு³ஜ்ஜி²ந்தி அனுக்கமேன மக்³க³படிபாடியா பு³ஜ்ஜி²ம் படிவிஜ்ஜி²ம். இத³ம் வுத்தம் ஹோதி – பியரூபம் ஸாதரூபம் ஸேனம் ஜினித்வா அஹம் ஏகோவ ஜா²யந்தோ ‘‘அத்த²ஸ்ஸ பத்திம் ஹத³யஸ்ஸ ஸந்தி’’ந்தி ஸங்க²ம் க³தம் அரஹத்தஸுக²ம் படிவிஜ்ஜி²ம், தஸ்மா ஜனேன மித்தஸந்த²வம் ந கரோமி, தேனேவ ச மே காரணேன கேனசி ஸத்³தி⁴ம் ஸக்கீ² ந ஸம்பஜ்ஜதீதி. அத்தா²பி⁴னிப்³ப³த்தேஸுந்தி இதிஸத்³த³லோபேனாயம் நித்³தே³ஸோதி ஆஹ ‘‘அத்தோ²தி க³ஹேத்வா’’தி.

காளீஸுத்தவண்ணனா நிட்டி²தா.

7. பட²மமஹாபஞ்ஹஸுத்தவண்ணனா

27. ஸத்தமே வுச்சேதா²தி வுச்சேய்ய. து³தியபதே³பீதி ‘‘அனுஸாஸனியா வா அனுஸாஸனி’’ந்தி ஏவம் து³தியவாக்யேபி. தே கிர பி⁴க்கூ². ந சேவ ஸம்பாயிஸ்ஸந்தீதி ந சேவ ஸம்மதே³வ பகாரேஹி க³ஹேஸ்ஸந்தி ஞாபேஸ்ஸந்தி. தேனாஹ ‘‘ஸம்பாதே³த்வா கதே²தும் ந ஸக்கி²ஸ்ஸந்தீ’’தி. யஸ்மா அவிஸயே பஞ்ஹம் புச்சி²தா ஹோந்தி, தஸ்மா விகா⁴தம் ஆபஜ்ஜிஸ்ஸந்தீதி யோஜனா. அஞ்ஞதா² ஆராத⁴னம் நாம நத்தீ²தி இமினா ஸபச்சயனாமரூபானம் யாதா²வதோ அவபோ³தோ⁴ ஏவ இதோ பா³ஹிரகானம் நத்தி², குதோ பவேத³னாதி த³ஸ்ஸேதி. ஆராத⁴னந்தி யாதா²வபவேத³னேன சித்தஸ்ஸ பரிதோஸனம்.

ஏகோ பஞ்ஹோதி ஏகோ பஞ்ஹமக்³கோ³, ஏகம் பஞ்ஹக³வேஸனந்தி அத்தோ². ஏகோ உத்³தே³ஸோதி ஏகம் உத்³தி³ஸனம் அத்த²ஸ்ஸ ஸம்கி²த்தவசனம். வேய்யாகரணந்தி நித்³தி³ஸனம் அத்த²ஸ்ஸ விவரித்வா கத²னம். ஹேதுனாதி ‘‘அந்தவந்ததோ அனச்சந்திகதோ தாவகாலிகதோ நிச்சப்படிக்கே²பதோ’’தி ஏவமாதி³னா நயேன யதா² இமே ஸங்கா²ரா ஏதரஹி, ஏவம் அதீதே அனாக³தே ச அனிச்சா ஸங்க²தா படிச்சஸமுப்பன்னா க²யத⁴ம்மா வயத⁴ம்மா விராக³த⁴ம்மாதி அதீதானாக³தேஸு நயேன.

ஸப்³பே³ ஸத்தாதி அனவஸேஸா ஸத்தா. தே பன ப⁴வபே⁴த³தோ ஸங்கே²பேனேவ பி⁴ந்தி³த்வா த³ஸ்ஸேந்தோ ‘‘காமப⁴வாதீ³ஸூ’’திஆதி³மாஹ. ப்³யதி⁴கரணானம்பி பா³ஹிரத்த²ஸமாஸோ ஹோதி யதா² ‘‘உரஸிலோமோ’’தி ஆஹ ‘‘ஆஹாரதோ டி²தி ஏதேஸந்தி ஆஹாரட்டி²திகா’’தி. திட்ட²தி ஏதேனாதி வா டி²தி, ஆஹாரோ டி²தி ஏதேஸந்தி ஆஹாரட்டி²திகாதி ஏவம் வா ஏத்த² ஸமாஸவிக்³க³ஹோ த³ட்ட²ப்³போ³. ஆஹாரட்டி²திகாதி பச்சயட்டி²திகா, பச்சயாயத்தவுத்திகாதி அத்தோ². பச்சயத்தோ² ஹேத்த² ஆஹாரஸத்³தோ³ ‘‘அயமாஹாரோ அனுப்பன்னஸ்ஸ வா காமச்ச²ந்த³ஸ்ஸ உப்பாதா³யா’’திஆதீ³ஸு (ஸம். நி. 4.232) விய. ஏவஞ்ஹி ‘‘ஸப்³பே³ ஸத்தா’’தி இமினா அஸஞ்ஞஸத்தா பரிக்³க³ஹிதா ஹோந்தி. ஸா பனாயம் ஆஹாரட்டி²திகதா நிப்பரியாயதோ ஸங்கா²ரத⁴ம்மோ. தேனாஹு அட்ட²கதா²சரியா ‘‘ஆஹாரட்டி²திகாதி ஆக³தட்டா²னே ஸங்கா²ரலோகோ வேதி³தப்³போ³’’தி (பாரா. அட்ட². 1.1 வேரஞ்ஜகண்ட³வண்ணனா; விஸுத்³தி⁴. 1.136). யதி³ ஏவம் ‘‘ஸப்³பே³ ஸத்தா’’தி இத³ம் கத²ந்தி? புக்³க³லாதி⁴ட்டா²னதே³ஸனாதி நாயம் தோ³ஸோ. தேனேவாஹ – ‘‘ஏகத⁴ம்மே, பி⁴க்க²வே, பி⁴க்கு² ஸம்மா நிப்³பி³ந்த³மானோ ஸம்மா விரஜ்ஜமானோ ஸம்மா விமுச்சமானோ ஸம்மா பரியந்தத³ஸ்ஸாவீ ஸம்மத³த்த²ம் அபி⁴ஸமேச்ச தி³ட்டே²வ த⁴ம்மே து³க்க²ஸ்ஸந்தகரோ ஹோதி. கதமஸ்மிம் ஏகத⁴ம்மே? ஸப்³பே³ ஸத்தா ஆஹாரட்டி²திகா’’தி. ய்வாயம் புக்³க³லாதி⁴ட்டா²னாய கதா²ய ஸப்³பே³ஸம் ஸங்கா²ரானம் பச்சயாயத்தவுத்திதாய ஆஹாரபரியாயேன ஸாமஞ்ஞதோ பச்சயத⁴ம்மோ வுத்தோ, அயம் ஆஹாரோ நாம ஏகோ த⁴ம்மோ.

சோத³கோ வுத்தம்பி அத்த²ம் யாதா²வதோ அப்படிவிஜ்ஜ²மானோ நேய்யத்த²ம் ஸுத்தபத³ம் நீதத்த²தோ த³ஹந்தோ ‘‘ஸப்³பே³ ஸத்தா’’தி வசனமத்தே ட²த்வா ‘‘நனு சா’’திஆதி³னா சோதே³தி. ஆசரியோ அவிபரீதம் தத்த² யதா²தி⁴ப்பேதமத்த²ம் பவேதே³ந்தோ ‘‘ந விருஜ்ஜ²தீ’’தி வத்வா ‘‘தேஸஞ்ஹி ஜா²னம் ஆஹாரோ ஹோதீ’’தி ஆஹ. ஜா²னந்தி ஏகவோகாரப⁴வாவஹம் ஸஞ்ஞாய விரஜ்ஜனவஸேன பவத்தரூபாவசரசதுத்த²ஜ்ஜா²னம். பாளியம் பன ‘‘அனாஹாரா’’தி வசனம் அஸஞ்ஞப⁴வே சதுன்னம் ஆஹாரானம் அபா⁴வம் ஸந்தா⁴ய வுத்தம், ந பச்சயாஹாரஸ்ஸ அபா⁴வதோ. ஏவம் ஸந்தேபீதி இத³ம் ஸாஸனே யேஸு த⁴ம்மேஸு விஸேஸதோ ஆஹாரஸத்³தோ³ நிருள்ஹோ, ‘‘ஆஹாரட்டி²திகா’’தி ஏத்த² யதி³ தேயேவ க³ய்ஹந்தி, அப்³யாபிததோ³ஸமாபன்னோ. அத² ஸப்³போ³பி பச்சயத⁴ம்மோ ஆஹாரோதி அதி⁴ப்பேதோ, இமாய ஆஹாரபாளியா விரோதோ⁴ ஆபன்னோதி த³ஸ்ஸேதும் ஆரத்³த⁴ம். ‘‘ந விருஜ்ஜ²தீ’’தி யேனாதி⁴ப்பாயேன வுத்தம், தம் விவரந்தோ ‘‘ஏதஸ்மிஞ்ஹி ஸுத்தே’’திஆதி³மாஹ. கப³ளீகாராஹாராதீ³னம் ஓஜட்ட²மகரூபாஹரணாதி³ நிப்பரியாயேன ஆஹாரபா⁴வோ. யதா² ஹி கப³ளீகாராஹாரோ ஓஜட்ட²மகரூபாஹரணேன ரூபகாயம் உபத்த²ம்பே⁴ந்தி, ஏவம் ப²ஸ்ஸாத³யோ வேத³னாதி³ஆஹரணேன நாமகாயம் உபத்த²ம்பே⁴தி, தஸ்மா ஸதிபி ஜனகபா⁴வே உபத்த²ம்ப⁴கபா⁴வோ ஓஜாதீ³ஸு ஸாதிஸயோ லப்³ப⁴மானோ முக்²யோ ஆஹாரட்டோ²தி தே ஏவ நிப்பரியாயேன ஆஹாரலக்க²ணா த⁴ம்மா வுத்தா.

இதா⁴தி இமஸ்மிம் ஸுத்தே பரியாயேன பச்சயோ ஆஹாரோதி வுத்தோ, ஸப்³போ³ பச்சயத⁴ம்மோ அத்தனோ ப²லம் ஆஹரதீதி இமம் பரியாயம் லப⁴தீதி. தேனாஹ ‘‘ஸப்³ப³த⁴ம்மானஞ்ஹீ’’திஆதி³. தத்த² ஸப்³ப³த⁴ம்மானந்தி ஸப்³பே³ஸம் ஸங்க²தத⁴ம்மானம். இதா³னி யதா²வுத்தமத்த²ம் ஸுத்தேன ஸமத்தே²தும் ‘‘தேனேவாஹா’’திஆதி³ வுத்தம். அயந்தி பச்சயாஹாரோ. நிப்பரியாயாஹாரோபி க³ஹிதோவ ஹோதீதி யாவதா ஸோபி பச்சயபா⁴வேனேவ ஜனகோ உபத்த²ம்ப⁴கோ ச ஹுத்வா தம் தம் ப²லம் ஆஹரதீதி வத்தப்³ப³தம் லப⁴தீதி.

தத்தா²தி பரியாயாஹாரோ, நிப்பரியாயாஹாரோதி த்³வீஸு ஆஹாரேஸு அஸஞ்ஞப⁴வே யதி³பி நிப்பரியாயாஹாரோ ந லப்³ப⁴தி, பரியாயாஹாரோ பன லப்³ப⁴தேவ. இதா³னி தமேவத்த²ம் வித்தா²ரதோ த³ஸ்ஸேதும் ‘‘அனுப்பன்னே ஹி பு³த்³தே⁴’’திஆதி³ வுத்தம். உப்பன்னே பு³த்³தே⁴ தித்த²கரமதனிஸ்ஸிதானம் ஜா²னபா⁴வனாய அஸிஜ்ஜ²னதோ ‘‘அனுப்பன்னே பு³த்³தே⁴’’தி வுத்தம். ஸாஸனிகா தாதி³ஸம் ஜா²னம் ந நிப்³ப³த்தேந்தீதி ‘‘தித்தா²யதனே பப்³ப³ஜிதா’’தி வுத்தம். தித்தி²யா ஹி உபபத்திவிஸேஸே விமுத்திஸஞ்ஞினோ ஸஞ்ஞாவிராகா³விராகே³ஸு ஆதீ³னவானிஸம்ஸத³ஸ்ஸினோவ ஹுத்வா அஸஞ்ஞஸமாபத்திம் நிப்³ப³த்தேத்வா அக்க²ணபூ⁴மியம் உப்பஜ்ஜந்தி, ந ஸாஸனிகா. வாயோகஸிணே பரிக்கம்மம் கத்வாதி வாயோகஸிணே பட²மாதீ³னி தீணி ஜா²னானி நிப்³ப³த்தேத்வா ததியஜ்ஜா²னே சிண்ணவஸீ ஹுத்வா ததோ வுட்டா²ய சதுத்த²ஜ்ஜா²னாதி⁴க³மாய பரிகம்மம் கத்வா. தேனேவாஹ ‘‘சதுத்த²ஜ்ஜா²னம் நிப்³ப³த்தேத்வா’’தி.

கஸ்மா (தீ³. நி. டீ. 1.68-73; தீ³. நி. அபி⁴. டீ. 1.68-73) பனேத்த² வாயோகஸிணேயேவ பரிகம்மம் வுத்தந்தி? வுச்சதே, யதே²வ ஹி ரூபபடிபா⁴க³பூ⁴தேஸு கஸிணவிஸேஸேஸு ரூபவிபா⁴வனேன ரூபவிராக³பா⁴வனாஸங்கா²தோ அரூபஸமாபத்திவிஸேஸோ ஸச்சி²கரீயதி, ஏவம் அபரிப்³யத்தவிக்³க³ஹதாய அரூபபடிபா⁴க³பூ⁴தே கஸிணவிஸேஸே அரூபவிபா⁴வனேன அரூபவிராக³பா⁴வனா ஸங்கா²தோ ரூபஸமாபத்திவிஸேஸோ அதி⁴க³மீயதீதி. ஏத்த² ச ‘‘ஸஞ்ஞா ரோகோ³, ஸஞ்ஞா க³ண்டோ³’’திஆதி³னா (ம. நி. 3.24), ‘‘தி⁴ சித்தம், தி⁴ வதேதம் சித்த’’ந்திஆதி³னா ச நயேன அரூபப்பவத்தியா ஆதீ³னவத³ஸ்ஸனேன தத³பா⁴வே ச ஸந்தபணீதபா⁴வஸன்னிட்டா²னேன ரூபஸமாபத்தியா அபி⁴ஸங்க²ரணம் அரூபவிராக³பா⁴வனா. ரூபவிராக³பா⁴வனா பன ஸத்³தி⁴ம் உபசாரேன அரூபஸமாபத்தியோ, தத்தா²பி விஸேஸேன பட²மாருப்பஜ்ஜா²னம். யதி³ ஏவம் ‘‘பரிச்சி²ன்னாகாஸகஸிணேபீ’’தி வத்தப்³ப³ம், தஸ்ஸாபி அரூபபடிபா⁴க³தா லப்³ப⁴தீதி? இச்சி²தமேவேதம், கேஸஞ்சி அவசனம் பனேத்த² புப்³பா³சரியேஹி அக்³க³ஹிதபா⁴வேன. யதா² ஹி ரூபவிராக³பா⁴வனா விரஜ்ஜனீயத⁴ம்மாபா⁴வமத்தேன பரினிப்ப²ன்னா, விரஜ்ஜனீயத⁴ம்மபரிபா⁴ஸபூ⁴தே ச விஸயவிஸேஸே பாதுப⁴வதி, ஏவம் அரூபவிராக³பா⁴வனாபீதி வுச்சமானே ந கோசி விரோதோ⁴. தித்தி²யேஹேவ பன தஸ்ஸா ஸமாபத்தியா படிபஜ்ஜிதப்³ப³தாய தேஸஞ்ச விஸயபதே² ஸூபனிப³ந்த⁴னஸ்ஸேவ தஸ்ஸ ஜா²னஸ்ஸ படிபத்திதோ தி³ட்டி²வந்தேஹி புப்³பா³சரியேஹி சதுத்தே²யேவ பூ⁴தகஸிணே அரூபவிராக³பா⁴வனாபரிகம்மம் வுத்தந்தி த³ட்ட²ப்³ப³ம். கிஞ்ச வண்ணகஸிணேஸு விய புரிமபூ⁴தகஸிணத்தயேபி வண்ணப்படிச்சா²யாவ பண்ணத்தி ஆரம்மணம் ஜா²னஸ்ஸ லோகவோஹாரானுரோதே⁴னேவ பவத்திதோ. ஏவஞ்ச கத்வா விஸுத்³தி⁴மக்³கே³ (விஸுத்³தி⁴. 1.57) பத²வீகஸிணஸ்ஸ ஆதா³ஸசந்த³மண்ட³லூபமவசனஞ்ச ஸமத்தி²தம் ஹோதி, சதுத்த²ம் பன பூ⁴தகஸிணம் பூ⁴தப்படிச்சா²யமேவ ஜா²னஸ்ஸ கோ³சரபா⁴வம் க³ச்ச²தீதி தஸ்ஸேவம் அரூபபடிபா⁴க³தா யுத்தாதி வாயோகஸிணேயேவ பரிகம்மம் வுத்தந்தி வேதி³தப்³ப³ம்.

தீ⁴தி ஜிகு³ச்ச²னத்தே² நிபாதோ, தஸ்மா தி⁴ சித்தந்தி சித்தம் ஜிகு³ச்சா²மி. தி⁴ வதேதம் சித்தந்தி ஏதம் மம சித்தம் ஜிகு³ச்சி²தம் வத ஹோது. வதாதி ஸம்பா⁴வனே. தேன ஜிகு³ச்ச²னம் ஸம்பா⁴வேந்தோ வத³தி. நாமாதி ச ஸம்பா⁴வனே ஏவ. தேன சித்தஸ்ஸ அபா⁴வம் ஸம்பா⁴வேதி. சித்தஸ்ஸ பா⁴வாபா⁴வேஸு ஆதீ³னவானிஸம்ஸே த³ஸ்ஸேதும் ‘‘சித்தஞ்ஹீ’’திஆதி³ வுத்தம். க²ந்திம் ருசிம் உப்பாதே³த்வாதி சித்தஸ்ஸ அபா⁴வோ ஏவ ஸாது⁴ ஸுட்டூ²தி இமம் தி³ட்டி²னிஜ்ஜா²னக்க²ந்திம் தத்த² ச அபி⁴ருசிம் உப்பாதே³த்வா. ததா² பா⁴விதஸ்ஸ ஜா²னஸ்ஸ டி²திபா⁴கி³யபா⁴வப்பத்தியா அபரிஹீனஜ்ஜா²னா. தித்தா²யதனே பப்³ப³ஜிதஸ்ஸேவ ததா² ஜா²னபா⁴வனா ஹோதீதி ஆஹ ‘‘மனுஸ்ஸலோகே’’தி. பணிஹிதோ அஹோஸீதி மரணஸ்ஸ ஆஸன்னகாலே ட²பிதோ அஹோஸி. யதி³ டா²னாதி³னா ஆகாரேன நிப்³ப³த்தேய்ய கம்மப³லேன, யாவ பே⁴தா³ தேனேவாகாரேன திட்டே²ய்யாதி ஆஹ ‘‘தேன இரியாபதே²னா’’திஆதி³. ஏவரூபானம்பீதி ஏவம் அசேதனானம்பி. பி-ஸத்³தே³ன பகே³வ ஸசேதனானந்தி த³ஸ்ஸேதி. கத²ம் பன அசேதனானம் நேஸம் பச்சயாஹாரஸ்ஸ உபகப்பனந்தி சோத³னம் ஸந்தா⁴ய தத்த² நித³ஸ்ஸனம் த³ஸ்ஸேந்தோ ‘‘யதா²’’திஆதி³மாஹ. தேன ந கேவலமாக³மோயேவ, அயமேத்த² யுத்தீதி த³ஸ்ஸேதி. தாவ திட்ட²ந்தீதி உக்கம்ஸதோ பஞ்ச மஹாகப்பஸதானி திட்ட²ந்தி.

யே உட்டா²னவீரியேன தி³வஸம் வீதினாமேத்வா தஸ்ஸ நிஸ்ஸந்த³ப²லமத்தம் கிஞ்சிதே³வ லபி⁴த்வா ஜீவிகம் கப்பேந்தி, தே உட்டா²னப²லூபஜீவினோ. யே பன அத்தனோ புஞ்ஞப²லமேவ உபஜீவந்தி, தே புஞ்ஞப²லூபஜீவினோ. நேரயிகானம் பன நேவ உட்டா²னவீரியவஸேன ஜீவிககப்பனம், புஞ்ஞப²லஸ்ஸ பன லேஸோபி நத்தீ²தி வுத்தம் ‘‘யே பன நேரயிகா…பே… ஜீவீதி வுத்தா’’தி. படிஸந்தி⁴விஞ்ஞாணஸ்ஸ ஆஹரணேன மனோஸஞ்சேதனா ஆஹாரோதி வுத்தா, ந யஸ்ஸ கஸ்ஸசி ப²லஸ்ஸாதி அதி⁴ப்பாயேன ‘‘கிம் பஞ்ச ஆஹாரா அத்தீ²’’தி சோதே³தி. ஆசரியோ நிப்பரியாயாஹாரே அதி⁴ப்பேதே ‘‘ஸியா தவ சோத³னா அவஸரா, ஸா பன ஏத்த² அனவஸரா’’தி ச த³ஸ்ஸேந்தோ ‘‘பஞ்ச, ந பஞ்சாதி இத³ம் ந வத்தப்³ப³’’ந்தி வத்வா பரியாயாஹாரஸ்ஸேவ பனேத்த² அதி⁴ப்பேதபா⁴வம் த³ஸ்ஸேந்தோ ‘‘நனு பச்சயோ ஆஹாரோ’தி வுத்தமேத’’ந்தி ஆஹ. தஸ்மாதி யஸ்ஸ கஸ்ஸசி பச்சயஸ்ஸ ஆஹாரோதி இச்சி²தத்தா. இதா³னி வுத்தமேவத்த²ம் பாளியா ஸமத்தே²ந்தோ ‘‘யம் ஸந்தா⁴யா’’திஆதி³மாஹ.

முக்²யாஹாரவஸேனபி நேரயிகானம் ஆஹாரட்டி²திகதம் த³ஸ்ஸேதும் ‘‘கப³ளீகாராஹாரம்…பே… ஸாதே⁴தீ’’தி வுத்தம். யதி³ ஏவம் நேரயிகா ஸுக²ப்படிஸம்வேதி³னோபி ஹோந்தீதி? நோதி த³ஸ்ஸேதும் ‘‘கே²ளோ ஹீ’’திஆதி³ வுத்தம். தயோதி தயோ அரூபாஹாரா கப³ளீகாராஹாரஸ்ஸ அபா⁴வதோ. அவஸேஸானந்தி அஸஞ்ஞஸத்தேஹி அவஸேஸானம் காமப⁴வாதீ³ஸு நிப்³ப³த்தஸத்தானம். பச்சயாஹாரோ ஹி ஸப்³பே³ஸம் ஸாதா⁴ரணோதி.

பட²மமஹாபஞ்ஹஸுத்தவண்ணனா நிட்டி²தா.

8-9. து³தியமஹாபஞ்ஹஸுத்தாதி³வண்ணனா

28-29. அட்ட²மே ஏவம்னாமகேதி கஜங்க³லாதி ஏவம் இத்தி²லிங்க³வஸேன லத்³த⁴னாமகே மஜ்ஜி²மப்பதே³ஸஸ்ஸ மரியாத³பூ⁴தே நக³ரே. ‘‘நிக³மே’’திபி வத³ந்தி, ‘‘நிசுலவனே’’திபி வத³ந்தி. நிசுலம் நாம ஏகா ருக்க²ஜாதி, ‘‘நீபருக்கோ²’’திபி வத³ந்தி. தேன ஸஞ்ச²ன்னோ மஹாவனஸண்டோ³, தத்த² விஹரதீதி அத்தோ². ஹேதுனா நயேனாதி ச ஹேட்டா² வுத்தமேவ. நனு ச ‘‘ஏஸோ சேவ தஸ்ஸ அத்தோ²’’தி கஸ்மா வுத்தம். ப⁴க³வதா ஹி சத்தாரோதிஆதி³பஞ்ஹப்³யாகரணா சத்தாரோ ஆஹாரா, பஞ்சுபாதா³னக்க²ந்தா⁴, ச² அஜ்ஜ²த்திகானி ஆயதனானி, ஸத்த விஞ்ஞாணட்டி²தியோ, அட்ட² லோகத⁴ம்மா த³ஸ்ஸிதா. பி⁴க்கு²னியா பன சத்தாரோ ஸதிபட்டா²னா, பஞ்சிந்த்³ரியானி, ச² நிஸ்ஸாரணீயா தா⁴துயோ, ஸத்த போ³ஜ்ஜ²ங்கா³, அரியோ அட்ட²ங்கி³கோ மக்³கோ³தி த³ஸ்ஸிதத⁴ம்மா அஞ்ஞோயேவத்தோ² பி⁴க்கு²னியா த³ஸ்ஸிதோதி சோத³னம் ஸந்தா⁴யாஹ ‘‘கிஞ்சாபீ’’திஆதி³. நவமே நத்தி² வத்தப்³ப³ம்.

து³தியமஹாபஞ்ஹஸுத்தாதி³வண்ணனா நிட்டி²தா.

10. து³தியகோஸலஸுத்தவண்ணனா

30. த³ஸமே உக்³க³ந்த்வா யுஜ்ஜ²தி ஏதாயாதி உய்யோதி⁴கா, ஸத்த²ப்பஹாரேஹி யுஜ்ஜி²தஸ்ஸேதம் அதி⁴வசனம். உக்³க³ந்த்வா யுஜ்ஜ²னம் வா உய்யோதி⁴கோ, ஸத்த²ப்பஹாரோ. தேனாஹ ‘‘யுத்³த⁴தோ நிவத்தோ’’தி. உபஸ்ஸுதிவஸேன யுஜ்ஜி²தப்³பா³காரம் ஞத்வாதி ஜேதவனே கிர த³த்தத்தே²ரோ த⁴னுக்³க³ஹதிஸ்ஸத்தே²ரோதி த்³வே மஹல்லகத்தே²ரா விஹாரபச்சந்தே பண்ணஸாலாய வஸந்தி. தேஸு த⁴னுக்³க³ஹதிஸ்ஸத்தே²ரோ பச்சி²மயாமே பபு³ஜ்ஜி²த்வா உட்டா²ய நிஸின்னோ த³த்தத்தே²ரம் ஆமந்தேத்வா ‘‘அயம் தே மஹோத³ரோ கோஸலோ பு⁴த்தப⁴த்தமேவ பூதிம் கரோதி, யுத்³த⁴விசாரணம் பன கிஞ்சி ந ஜானாதி, பராஜிதோத்வேவ வதா³பேதீ’’தி வத்வா தேன ‘‘கிம் பன காதும் வட்டதீ’’தி வுத்தே – ‘‘ப⁴ந்தே, யுத்³தோ⁴ நாம பது³மப்³யூஹோ சக்கப்³யூஹோ ஸகடப்³யூஹோதி தயோ ப்³யூஹா ஹோந்தி, அஜாதஸத்தும் க³ண்ஹிதுகாமேன அஸுகஸ்மிம் நாம பப்³ப³தகுச்சி²ஸ்மிம் த்³வீஸு பப்³ப³தபி⁴த்தீஸு மனுஸ்ஸே ட²பேத்வா புரதோ து³ப்³ப³லம் த³ஸ்ஸேத்வா பப்³ப³தந்தரம் பவிட்ட²பா⁴வம் ஜானித்வா பவிட்ட²மக்³க³ம் ருந்தி⁴த்வா புரதோ ச பச்ச²தோ ச உபோ⁴ஸு பப்³ப³தபி⁴த்தீஸு வக்³கி³த்வா நதி³த்வா ஜாலபக்கி²த்தமச்ச²ம் விய கத்வா ஸக்கா க³ஹேது’’ந்தி. தஸ்மிம் க²ணே ‘‘பி⁴க்கூ²னம் கதா²ஸல்லாபம் ஸுணாதா²’’தி ரஞ்ஞோ பேஸிதசரபுரிஸா தம் ஸுத்வா ரஞ்ஞோ ஆரோசேஸும். தம் ஸுத்வா ராஜா ஸங்கா³மபே⁴ரிம் பஹராபேத்வா க³ந்த்வா ஸகடப்³யூஹம் கத்வா அஜாதஸத்தும் ஜீவக்³கா³ஹம் க³ண்ஹி. தேன வுத்தம் ‘‘உபஸ்ஸுதிவஸே…பே... அஜாதஸத்தும் க³ண்ஹீ’’தி.

தோ³ணபாகந்தி தோ³ணதண்டு³லானம் பக்கப⁴த்தம். தோ³ணந்தி சதுனாளிகானமேதமதி⁴வசனம். மனுஜஸ்ஸாதி ஸத்தஸ்ஸ. தனுகஸ்ஸாதி தனுகா அப்பிகா அஸ்ஸ புக்³க³லஸ்ஸ, பு⁴த்தபச்சயா விஸபா⁴க³வேத³னா ந ஹோந்தி. ஸணிகந்தி மந்த³ம் முது³கம், அபரிஸ்ஸயமேவாதி அத்தோ². ஜீரதீதி பரிபு⁴த்தாஹாரோ பச்சதி. ஆயு பாலயந்தி நிரோகோ³ அவேத³னோ ஜீவிதம் ரக்க²ந்தோ. அத² வா ஸணிகம் ஜீரதீதி ஸோ போ⁴ஜனே மத்தஞ்ஞூ புக்³க³லோ பரிமிதாஹாரதாய ஸணிகம் சிரேன ஜீரதி ஜரம் பாபுணாதி ஜீவிதம் பாலயந்தோ.

இமம் ஓவாத³ம் அதா³ஸீதி ஏகஸ்மிம் கிர (த⁴. ப. அட்ட². 2.203 பஸேனதி³கோஸலவத்து²) ஸமயே ராஜா தண்டு³லதோ³ணஸ்ஸ ஓத³னம் தது³பியேன ஸூபப்³யஞ்ஜனேன பு⁴ஞ்ஜதி. ஸோ ஏகதி³வஸம் பு⁴த்தபாதராஸோ ப⁴த்தஸம்மத³ம் அவினோதே³த்வா ஸத்து² ஸந்திகம் க³ந்த்வா கிலந்தரூபோ இதோ சிதோ ச ஸம்பரிவத்ததி, நித்³தா³ய அபி⁴பு⁴ய்யமானோபி லஹுகம் நிபஜ்ஜிதும் அஸக்கோந்தோ ஏகமந்தம் நிஸீதி³. அத² நம் ஸத்தா² ஆஹ ‘‘கிம், மஹாராஜ, அவிஸ்ஸமித்வாவ ஆக³தோஸீ’’தி. ஆம, ப⁴ந்தே, பு⁴த்தகாலதோ பட்டா²ய மே மஹாது³க்க²ம் ஹோதீதி. அத² நம் ஸத்தா², ‘‘மஹாராஜ, அதிப³ஹுபோ⁴ஜீனம் ஏதம் து³க்க²ம் ஹோதீ’’தி வத்வா –

‘‘மித்³தீ⁴ யதா³ ஹோதி மஹக்³க⁴ஸோ ச,

நித்³தா³யிதா ஸம்பரிவத்தஸாயீ;

மஹாவராஹோவ நிவாபபுட்டோ²,

புனப்புனம் க³ப்³ப⁴முபேதி மந்தோ³’’தி. (த⁴. ப. 325; நேத்தி. 26, 90) –

இமாய கா³தா²ய ஓவதி³த்வா, ‘‘மஹாராஜ, போ⁴ஜனம் நாம மத்தாய பு⁴ஞ்ஜிதும் வட்டதி, மத்தபோ⁴ஜினோ ஹி ஸுக²ம் ஹோதீ’’தி உத்தரிபி புன ஓவத³ந்தோ ‘‘மனுஜஸ்ஸ ஸதா³ ஸதீமதோ’’தி (ஸம். நி. 1.124) இமம் கா³த²மாஹ.

ராஜா பன கா³த²ம் உக்³க³ண்ஹிதும் நாஸக்கி², ஸமீபே டி²தம் பன பா⁴கி³னேய்யம் ஸுத³ஸ்ஸனம் நாம மாணவம் ‘‘இமம் கா³த²ம் உக்³க³ண்ஹ தாதா’’தி ஆஹ. ஸோ தம் கா³த²ம் உக்³க³ண்ஹித்வா ‘‘கிம் கரோமி, ப⁴ந்தே’’தி ஸத்தா²ரம் புச்சி². அத² நம் ஸத்தா² ஆஹ, ‘‘மாணவ, இமம் கா³த²ம் நடோ விய பத்தபத்தட்டா²னே மா அவச, ரஞ்ஞோ பாதராஸம் பு⁴ஞ்ஜனட்டா²னே ட²த்வா பட²மபிண்டா³தீ³ஸுபி அவத்வா அவஸானே பிண்டே³ க³ஹிதே வதே³ய்யாஸி, ராஜா ஸுத்வா ப⁴த்தபிண்ட³ம் ச²ட்³டே³ஸ்ஸதி. அத² ரஞ்ஞோ ஹத்தே²ஸு தோ⁴தேஸு பாதிம் அபனேத்வா ஸித்தா²னி க³ணேத்வா தது³பியம் ப்³யஞ்ஜனம் ஞத்வா புனதி³வஸே தாவதகே தண்டு³லே ஹாரேய்யாஸி. பாதராஸே ச வத்வா ஸாயமாஸே மா வதே³ய்யாஸீ’’தி. ஸோ ‘‘ஸாதூ⁴’’தி படிஸ்ஸுணித்வா தம் தி³வஸம் ரஞ்ஞோ பாதராஸம் பு⁴த்வா க³தத்தா ஸாயமாஸே ப⁴க³வதோ அனுஸிட்டி²னியாமேன கா³த²ம் அபா⁴ஸி. ராஜா த³ஸப³லஸ்ஸ வசனம் ஸரித்வா ப⁴த்தபிண்ட³ம் பாதியம்யேவ ச²ட்³டே³ஸி. ரஞ்ஞோ ஹத்தே²ஸு தோ⁴தேஸு பாதிம் அபனேத்வா ஸித்தா²னி க³ணேத்வா புனதி³வஸே தத்தகே தண்டு³லே ஹரிம்ஸு, ஸோபி மாணவோ தி³வஸே தி³வஸே ததா²க³தஸ்ஸ ஸந்திகம் க³ச்ச²தி. த³ஸப³லஸ்ஸ விஸ்ஸாஸிகோ அஹோஸி. அத² நம் ஏகதி³வஸம் புச்சி² ‘‘ராஜா கித்தகம் பு⁴ஞ்ஜதீ’’தி? ஸோ ‘‘நாளிகோத³ன’’ந்தி ஆஹ. வட்டிஸ்ஸதி ஏத்தாவதா புரிஸபா⁴கோ³ ஏஸ, இதோ பட்டா²ய கா³த²ம் மா வதீ³தி. ராஜா ததே²வ ஸண்டா²ஸி. தேன வுத்தம் ‘‘நாளிகோத³னபரமதாய ஸண்டா²ஸீ’’தி. ரத்தஞ்ஞுதாய வட்³டி⁴தம் ஸீலம் அஸ்ஸ அத்தீ²தி வட்³டி⁴தஸீலோ. அபோது²ஜ்ஜனிகேஹி ஸீலேஹீதி சதுபாரிஸுத்³தி⁴ஸீலேஹி ஸீலம் அரியம் ஸுத்³த⁴ம். தேன வுத்தம் ‘‘அரியஸீலோ’’தி. ததே³கம் அனவஜ்ஜட்டே²ன குஸலம். தேன வுத்தம் ‘‘குஸலஸீலோ’’தி.

து³தியகோஸலஸுத்தவண்ணனா நிட்டி²தா.

மஹாவக்³க³வண்ணனா நிட்டி²தா.