5. உத்தியஸுத்தவண்ணனா

95. பஞ்சமே பச்சந்தே ப⁴வம் பச்சந்திமம். பாகாரஸ்ஸ தி²ரபா⁴வம் உத்³த⁴முத்³த⁴ம் பாபேதீதி உத்³தா⁴பம், பாகாரமூலம். ஆதி³-ஸத்³தே³ன பாகாரத்³வாரப³ந்த⁴பரிகா²தீ³னம் ஸங்க³ஹோ வேதி³தப்³போ³. பண்டி³ததோ³வாரிகட்டா²னியம் கத்வா ப⁴க³வா அத்தானம் த³ஸ்ஸேஸீதி த³ஸ்ஸேந்தோ ‘‘ஏகத்³வாரந்தி கஸ்மா ஆஹா’’தி சோத³னம் ஸமுட்டா²பேஸி. யஸ்ஸா பஞ்ஞாய வஸேன புரிஸோ பண்டி³தோதி வுச்சதி, தம் பண்டி³ச்சந்தி ஆஹ ‘‘பண்டி³ச்சேன ஸமன்னாக³தோ’’தி. தம்தம்இதிகத்தப்³ப³தாஸு சே²கபா⁴வோ ப்³யத்தபா⁴வோ வேய்யத்தியம். மேத⁴தி ஸம்மோஹம் ஹிம்ஸதி வித⁴மதீதி மேதா⁴, ஸா ஏதஸ்ஸ அத்தீ²தி மேதா⁴வீ. டா²னே டா²னே உப்பத்தி ஏதிஸ்ஸா அத்தீ²தி டா²னுப்பத்திகா, டா²னஸோ உப்பஜ்ஜனபஞ்ஞா. அனுபரியாயந்தி ஏதேனாதி அனுபரியாயோ, ஸோ ஏவ பதோ²தி அனுபரியாயபதோ², பரிதோ பாகாரஸ்ஸ அனுஸம்யாயனமக்³கோ³. பாகாரபா⁴கா³ ஸந்தா⁴தப்³பா³ ஏத்தா²தி பாகாரஸந்தி⁴, பாகாரஸ்ஸ பு²ல்லிதப்பதே³ஸோ. ஸோ பன ஹேட்டி²மந்தேன த்³வின்னம்பி இட்ட²கானம் விக³மேன ஏவம் வுச்சதீதி ஆஹ ‘‘த்³வின்னம் இட்ட²கானம் அபக³தட்டா²ன’’ந்தி. சி²ன்னட்டா²னந்தி சி²ன்னபி⁴ன்னப்பதே³ஸோ, சி²த்³த³ட்டா²னம் வா. தஞ்ஹி விவரந்தி வுச்சதி.

உத்தியஸுத்தவண்ணனா நிட்டி²தா.