6-8. கோகனுத³ஸுத்தாதி³வண்ணனா

96-98. ச²ட்டே² க²ந்தா⁴பி தி³ட்டி²ட்டா²னம் ஆரம்மணட்டே²ன ‘‘ரூபம் அத்ததோ ஸமனுபஸ்ஸதீ’’திஆதி³வசனதோ. அவிஜ்ஜாபி தி³ட்டி²ட்டா²னம் உபனிஸ்ஸயாதி³பா⁴வேன பவத்தனதோ. யதா²ஹ ‘‘அஸ்ஸுதவா, பி⁴க்க²வே, புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³’’திஆதி³ (த⁴. ஸ. 1007). ப²ஸ்ஸோபி தி³ட்டி²ட்டா²னம். யதா² சாஹ ‘‘தத³பி ப²ஸ்ஸபச்சயா (தீ³. நி. 1.118-130) பு²ஸ்ஸ பு²ஸ்ஸ படிஸம்வேதி³யந்தீ’’தி (தீ³. நி. 1.144) ச. ஸஞ்ஞாபி தி³ட்டி²ட்டா²னம். வுத்தஞ்ஹேதம் ‘‘ஸஞ்ஞானிதா³னா ஹி பபஞ்சஸங்கா² (ஸு. நி. 880; மஹானி. 109), பத²விதோ ஸஞ்ஞத்வா’’தி (ம. நி. 1.2) ச ஆதி³. விதக்கோபி தி³ட்டி²ட்டா²னம். வுத்தம்பி சேதம் ‘‘தக்கஞ்ச தி³ட்டீ²ஸு பகப்பயித்வா, ஸச்சம் முஸாதி த்³வயத⁴ம்மமாஹூ’’தி (ஸு. நி. 892; மஹானி. 121), ‘‘தக்கீ ஹோதி வீமம்ஸீ’’தி (தீ³. நி. 1.34) ச ஆதி³. அயோனிஸோமனஸிகாரோபி தி³ட்டி²ட்டா²னம். தேனாஹ ப⁴க³வா – ‘‘தஸ்ஸேவம் அயோனிஸோ மனஸிகரோதோ ச²ன்னம் தி³ட்டீ²னம் அஞ்ஞதரா தி³ட்டி² உப்பஜ்ஜதி, அத்தி² மே அத்தாதி தஸ்ஸ ஸச்சதோ தே²ததோ தி³ட்டி² உப்பஜ்ஜதீ’’திஆதி³ (ம. நி. 1.19).

யா தி³ட்டீ²தி இதா³னி வுச்சமானானம் அட்டா²ரஸன்னம் பதா³னம் ஸாதா⁴ரணம் மூலபத³ம். தி³ட்டி²யேவ தி³ட்டி²க³தம் கூ³த²க³தம் விய, தி³ட்டீ²ஸு வா க³தம் இத³ம் த³ஸ்ஸனம் த்³வாஸட்டி²தி³ட்டீ²ஸு அந்தோக³த⁴த்தாதிபி தி³ட்டி²க³தம், தி³ட்டி²யா வா க³தம் தி³ட்டி²க³தம். இத³ஞ்ஹி ‘‘அத்தி² மே அத்தா’’திஆதி³ தி³ட்டி²யா க³மனமத்தமேவ, நத்தே²த்த² அத்தா வா நிச்சோ வா கோசீதி வுத்தம் ஹோதி. ஸா சாயம் தி³ட்டி² து³ன்னிக்³க³மனட்டே²ன க³ஹனம். து³ரதிக்கமட்டே²ன ஸப்படிப⁴யட்டே²ன ச கந்தாரோ து³ப்³பி⁴க்க²கந்தாரவாளகந்தாராத³யோ விய. ஸம்மாதி³ட்டி²யா வினிவிஜ்ஜ²னட்டே²ன, விலோமனட்டே²ன வா விஸூகம். கதா³சி ஸஸ்ஸதஸ்ஸ, கதா³சி உச்சே²த³ஸ்ஸ வா க³ஹணதோ விரூபம் ப²ந்தி³தந்தி விப்ப²ந்தி³தம். ப³ந்த⁴னட்டே²ன ஸம்யோஜனம். தி³ட்டி²யேவ அந்தோ துத³னட்டே²ன து³ன்னீஹரணீயட்டே²ன ச ஸல்லந்தி தி³ட்டி²ஸல்லம். தி³ட்டி²யேவ பீளாகரணட்டே²ன ஸம்பா³தோ⁴தி தி³ட்டி²ஸம்பா³தோ⁴. தி³ட்டி²யேவ மோக்கா²வரணட்டே²ன பலிபோ³தோ⁴தி தி³ட்டி²பலிபோ³தோ⁴. தி³ட்டி²யேவ து³ம்மோசனீயட்டே²ன ப³ந்த⁴னந்தி தி³ட்டி²ப³ந்த⁴னம். தி³ட்டி²யேவ து³ருத்தரணட்டே²ன பபாதோதி தி³ட்டி²பபாதோ. தி³ட்டி²யேவ தா²மக³தட்டே²ன அனுஸயோதி தி³ட்டா²னுஸயோ. தி³ட்டி²யேவ அத்தானம் ஸந்தாபேதீதி தி³ட்டி²ஸந்தாபோ. தி³ட்டி²யேவ அத்தானம் அனுத³ஹதீதி தி³ட்டி²பரிளாஹோ. தி³ட்டி²யேவ கிலேஸகாயம் க³ந்தே²தீதி தி³ட்டி²க³ந்தோ². தி³ட்டி²யேவ பு⁴ஸம் ஆதி³யதீதி தி³ட்டு²பாதா³னம். தி³ட்டி²யேவ ‘‘ஸச்ச’’ந்திஆதி³வஸேன அபி⁴னிவிஸதீதி தி³ட்டா²பி⁴னிவேஸோ. தி³ட்டி²யேவ ‘‘இத³ம் பர’’ந்தி ஆமஸதி, பரதோ வா ஆமஸதீதி தி³ட்டி²பராமாஸோ, ஸமுட்டா²தி ஏதேனாதி ஸமுட்டா²னம், காரணம். ஸமுட்டா²னஸ்ஸ பா⁴வோ ஸமுட்டா²னட்டோ², தேன ஸமுட்டா²னட்டே²ன, காரணபா⁴வேனாதி அத்தோ². ஸத்தமட்ட²மேஸு நத்தி² வத்தப்³ப³ம்.

கோகனுத³ஸுத்தாதி³வண்ணனா நிட்டி²தா.