5. பணிஹிதஅச்ச²வக்³க³வண்ணனா

41. பஞ்சமஸ்ஸ பட²மே உபமாவ ஓபம்மம், ஸோ ஏவ அத்தோ², தஸ்மிம் ஓபம்மத்தே² போ³தே⁴தப்³பே³ நிபாதோ. ஸேய்யதா²பீதி யதா²தி அத்தோ². ஏத்த² ச தத்ர ப⁴க³வா கத்த²சி அத்தே²ன உபமம் பரிவாரேத்வா த³ஸ்ஸேதி வத்த²ஸுத்தே விய, பாரிச்ச²த்தகோபம (அ. நி. 7.69) அக்³கி³க்க²ந்தோ⁴பமாதி³ (அ. நி. 7.72) ஸுத்தேஸு விய ச. கத்த²சி உபமாய அத்த²ம் பரிவாரேத்வா த³ஸ்ஸேதி லோணம்பி³லஸுத்தே (அ. நி. 3.101) விய, ஸுவண்ணகாரஸத்தஸூரியோபமாதி³ஸுத்தேஸு (அ. நி. 7.66) விய ச. இமஸ்மிம் பன ஸாலிஸூகோபமே உபமாய அத்த²ம் பரிவாரேத்வா த³ஸ்ஸேந்தோ ‘‘ஸேய்யதா²பி, பி⁴க்க²வே’’திஆதி³மாஹாதி போத்த²கேஸு லிக²ந்தி, தம் மஜ்ஜி²மட்ட²கதா²ய வத்த²ஸுத்தவண்ணனாய (ம. நி. அட்ட². 1.70) ந ஸமேதி. தத்த² ஹி இத³ம் வுத்தம் –

ஸேய்யதா²பி, பி⁴க்க²வே, வத்த²ந்தி உபமாவசனமேவேதம். உபமம் கரோந்தோ ச ப⁴க³வா கத்த²சி பட²மம்யேவ உபமம் த³ஸ்ஸேத்வா பச்சா² அத்த²ம் த³ஸ்ஸேதி, கத்த²சி பட²மம் அத்த²ம் த³ஸ்ஸேத்வா பச்சா² உபமம், கத்த²சி உபமாய அத்த²ம் பரிவாரேத்வா த³ஸ்ஸேதி, கத்த²சி அத்தே²ன உபமம். ததா² ஹேஸ ‘‘ஸேய்யதா²பிஸ்ஸு, பி⁴க்க²வே, த்³வே அகா³ரா ஸத்³வாரா, தத்த² சக்கு²மா புரிஸோ மஜ்ஜே² டி²தோ பஸ்ஸேய்யா’’தி ஸகலம்பி தே³வதூ³தஸுத்தம் (ம. நி. 3.261 ஆத³யோ) உபமம் பட²மம் த³ஸ்ஸேத்வா பச்சா² அத்த²ம் த³ஸ்ஸேந்தோ ஆஹ. ‘‘திரோகுட்டம் திரோபாகாரம் திரோபப்³ப³தம் அஸஜ்ஜமானோ க³ச்ச²தி, ஸேய்யதா²பி, ஆகாஸே’’திஆதி³னா பன நயேன ஸகலம்பி இத்³தி⁴வித⁴ம் அத்த²ம் பட²மம் த³ஸ்ஸேத்வா பச்சா² உபமம் த³ஸ்ஸேந்தோ ஆஹ. ‘‘ஸேய்யதா²பி, ப்³ராஹ்மணபுரிஸோ ஸாரத்தி²கோ ஸாரக³வேஸீ’’திஆதி³னா (ம. நி. 1.314) நயேன ஸகலம்பி சூளஸாரோபமஸுத்தம் உபமாய அத்த²ம் பரிவாரேத்வா த³ஸ்ஸேந்தோ ஆஹ. ‘‘இத⁴ பன, பி⁴க்க²வே, ஏகச்சே குலபுத்தா த⁴ம்மம் பரியாபுணந்தி ஸுத்தம்…பே… ஸேய்யதா²பி, பி⁴க்க²வே, புரிஸோ அலக³த்³த³த்தி²கோ’’திஆதி³னா நயேன ஸகலம்பி அலக³த்³த³ஸுத்தம் (ம. நி. 1.238) மஹாஸாரோபமஸுத்தந்தி ஏவமாதீ³னி ஸுத்தானி அத்தே²ன உபமம் பரிவாரேத்வா த³ஸ்ஸேந்தோ ஆஹ. ஸ்வாயம் இத⁴ பட²மம் உபமம் த³ஸ்ஸேத்வா பச்சா² அத்த²ம் த³ஸ்ஸேதீதி.

ஏத்த² ஹி சூளஸாரோபமாதீ³ஸு (ம. நி. 1.312) பட²மம் உபமம் வத்வா தத³னந்தரம் உபமேய்யத்த²ம் வத்வா புன உபமம் வத³ந்தோ உபமாய அத்த²ம் பரிவாரேத்வா த³ஸ்ஸேதீதி வுத்தோ. அலக³த்³தூ³பமஸுத்தாதீ³ஸு பன அத்த²ம் பட²மம் வத்வா தத³னந்தரம் உபமம் வத்வா புன அத்த²ம் வத³ந்தோ அத்தே²ன உபமம் பரிவாரேத்வா த³ஸ்ஸேதீதி வுத்தோ. தேனேவேத்த² லீனத்த²ப்பகாஸினியம் வுத்தம் – ‘‘உபமேய்யத்த²ம் பட²மம் வத்வா தத³னந்தரம் அத்த²ம் வத்வா புன உபமம் வத³ந்தோ உபமாய அத்த²ம் பரிவாரேத்வா த³ஸ்ஸேதீ’’தி வுத்தோ. அத்தே²ன உபமம் பரிவாரேத்வாதி ஏத்தா²பி ஏஸேவ நயோதி. இத⁴ பன கத்த²சி அத்தே²ன உபமம் பரிவாரேத்வா த³ஸ்ஸேதி. ‘‘வத்த²ஸுத்தே விய பாரிச்ச²த்தகோபமஅக்³கி³க்க²ந்தோ⁴பமாதி³ஸுத்தேஸு விய சா’’தி வுத்தம். தத்த² வத்த²ஸுத்தே தாவ ‘‘ஸேய்யதா²பி, பி⁴க்க²வே, வத்த²ம் ஸம்கிலிட்ட²ம் மலக்³க³ஹிதம், தமேனம் ரஜகோ யஸ்மிம் யஸ்மிம் ரங்க³ஜாதே உபஸம்ஹரேய்ய. யதி³ நீலகாய, யதி³ பீதகாய, யதி³ லோஹிதகாய, யதி³ மஞ்ஜிட்ட²காய, து³ரத்தவண்ணமேவஸ்ஸ அபரிஸுத்³த⁴வண்ணமேவஸ்ஸ. தம் கிஸ்ஸ ஹேது? அபரிஸுத்³த⁴த்தா, பி⁴க்க²வே, வத்த²ஸ்ஸ. ஏவமேவ கோ², பி⁴க்க²வே, சித்தே ஸம்கிலிட்டே² து³க்³க³தி பாடிகங்கா²’’திஆதி³னா (ம. நி. 1.70) பட²மம் உபமம் த³ஸ்ஸேத்வா பச்சா² உபமேய்யத்தோ² வுத்தோ, ந பன பட²மம் அத்த²ம் வத்வா தத³னந்தரம் உபமம் த³ஸ்ஸேத்வா புன அத்தோ² வுத்தோ. யேன கத்த²சி அத்தே²ன உபமம் பரிவாரேத்வா த³ஸ்ஸேதி. வத்த²ஸுத்தே வியாதி வதே³ய்ய.

ததா² பாரிச்ச²த்தகோபமேபி ‘‘யஸ்மிம், பி⁴க்க²வே, ஸமயே தே³வானம் தாவதிம்ஸானம் பாரிச்ச²த்தகோ கோவிளாரோ பண்டு³பலாஸோ ஹோதி, அத்தமனா, பி⁴க்க²வே, தே³வா தாவதிம்ஸா, தஸ்மிம் ஸமயே ஹோந்தி பண்டு³பலாஸோ தா³னி பாரிச்ச²த்தகோ கோவிளாரோ, ந சிரஸ்ஸேவ தா³னி பன்னபலாஸோ ப⁴விஸ்ஸதி…பே… ஏவமேவ கோ², பி⁴க்க²வே, யஸ்மிம் ஸமயே அரியஸாவகோ அகா³ரஸ்மா அனகா³ரியம் பப்³ப³ஜ்ஜாய சேதேதி. பண்டு³பலாஸோ, பி⁴க்க²வே, அரியஸாவகோ தஸ்மிம் ஸமயே ஹோதீ’’திஆதி³னா (அ. நி. 7.69) பட²மம் உபமம் த³ஸ்ஸேத்வா பச்சா² அத்தோ² வுத்தோ. அக்³கி³க்க²ந்தோ⁴பமே ‘‘பஸ்ஸத² நோ தும்ஹே, பி⁴க்க²வே, அமும் மஹந்தம் அக்³கி³க்க²ந்த⁴ம் ஆதி³த்தம் ஸம்பஜ்ஜலிதம் ஸஜோதிபூ⁴தந்தி. ஏவம், ப⁴ந்தேதி. தம் கிம் மஞ்ஞத², பி⁴க்க²வே, கதமம் நு கோ² வரம் யம் அமும் மஹந்தம் அக்³கி³க்க²ந்த⁴ம் ஆதி³த்தம் ஸம்பஜ்ஜலிதம் ஸஜோதிபூ⁴தம் ஆலிங்கே³த்வா உபனிஸீதே³ய்ய வா உபனிபஜ்ஜேய்ய வா, யம் க²த்தியகஞ்ஞம் வா ப்³ராஹ்மணகஞ்ஞம் வா க³ஹபதிகஞ்ஞம் வா முது³தலுனஹத்த²பாத³ம் ஆலிங்கே³த்வா உபனிஸீதே³ய்ய வா உபனிபஜ்ஜேய்ய வா’’திஆதி³னா (அ. நி. 7.72) பட²மம் உபமம்யேவ த³ஸ்ஸேத்வா பச்சா² அத்தோ² வுத்தோ, ந பன பட²மம் அத்த²ம் வத்வா தத³னந்தரம் உபமம் த³ஸ்ஸேத்வா புன அத்தோ² வுத்தோ, தஸ்மா ‘‘கத்த²சி அத்தே²ன உபமம் பரிவாரேத்வா த³ஸ்ஸேதி வத்த²ஸுத்தே விய பாரிச்ச²த்தகோபமஅக்³கி³க்க²ந்தோ⁴பமாதி³ஸுத்தேஸு விய சா’’தி ந வத்தப்³ப³ம்.

கேசி பனேத்த² ஏவம் வண்ணயந்தி ‘‘அத்த²ம் பட²மம் வத்வா பச்சா² ச உபமம் த³ஸ்ஸேந்தோ அத்தே²ன உபமம் பரிவாரேத்வா த³ஸ்ஸேதி நாம, உபமம் பன பட²மம் வத்வா பச்சா² அத்த²ம் த³ஸ்ஸேந்தோ உபமாய அத்த²ம் பரிவாரேத்வா த³ஸ்ஸேதி நாம, தது³ப⁴யஸ்ஸபி ஆக³தட்டா²னம் நித³ஸ்ஸேந்தோ ‘வத்த²ஸுத்தே வியா’திஆதி³மாஹா’’தி. தம்பி ‘‘கத்த²சி அத்தே²ன உபமம் பரிவாரேத்வா த³ஸ்ஸேதி வத்த²ஸுத்தே விய பாரிச்ச²த்தகோபமஅக்³கி³க்க²ந்தோ⁴பமாதி³ஸுத்தேஸு விய சா’’தி வத்தப்³ப³ம், ஏவஞ்ச வுச்சமானே ‘‘கத்த²சி உபமாய அத்த²ம் பரிவாரேத்வா த³ஸ்ஸேதி லோணம்பி³லஸுத்தே வியா’’தி விஸும் ந வத்தப்³ப³ம் ‘‘அக்³கி³க்க²ந்தோ⁴பமாதி³ஸுத்தே வியா’’தி ஏத்த² ஆதி³ஸத்³தே³னேவ ஸங்க³ஹிதத்தா. லோணம்பி³லஸுத்தேபி ஹி –

‘‘ஸேய்யதா²பி, பி⁴க்க²வே, பண்டி³தோ ப்³யத்தோ குஸலோ ஸூதோ³ ராஜானம் வா ராஜமஹாமத்தம் வா நானச்சயேஹி ஸூபேஹி பச்சுபட்டி²தோ அஸ்ஸ அம்பி³லக்³கே³ஹிபி தித்தகக்³கே³ஹிபி கடுகக்³கே³ஹிபி மது⁴ரக்³கே³ஹிபி கா²ரிகேஹிபி அகா²ரிகேஹிபி லோணிகேஹிபி அலோணிகேஹிபி.

‘‘ஸ கோ² ஸோ, பி⁴க்க²வே, பண்டி³தோ ப்³யத்தோ குஸலோ ஸூதோ³ ஸகஸ்ஸ ப⁴த்தஸ்ஸ நிமித்தம் உக்³க³ண்ஹாதி ‘இத³ம் வா மே அஜ்ஜ ப⁴த்தஸூபேய்யம் ருச்சதி, இமஸ்ஸ வா அபி⁴ஹரதி, இமஸ்ஸ வா ப³ஹும் க³ண்ஹாதி, இமஸ்ஸ வா வண்ணம் பா⁴ஸதி. அம்பி³லக்³க³ம் வா மே அஜ்ஜ ப⁴த்தஸூபேய்யம் ருச்சதி, அம்பி³லக்³க³ஸ்ஸ வா அபி⁴ஹரதி, அம்பி³லக்³க³ஸ்ஸ வா ப³ஹும் க³ண்ஹாதி, அம்பி³லக்³க³ஸ்ஸ வா வண்ணம் பா⁴ஸதி…பே… அலோணிகஸ்ஸ வா வண்ணம் பா⁴ஸதீ’தி. ஸ கோ² ஸோ, பி⁴க்க²வே, பண்டி³தோ ப்³யத்தோ குஸலோ ஸூதோ³ லாபீ⁴ சேவ ஹோதி அச்சா²த³னஸ்ஸ, லாபீ⁴ வேதனஸ்ஸ, லாபீ⁴ அபி⁴ஹாரானம். தம் கிஸ்ஸ ஹேது? ததா² ஹி ஸோ, பி⁴க்க²வே, பண்டி³தோ ப்³யத்தோ குஸலோ ஸூதோ³ ஸகஸ்ஸ ப⁴த்தனிமித்தம் உக்³க³ண்ஹாதி. ஏவமேவ கோ², பி⁴க்க²வே, இதே⁴கச்சோ பண்டி³தோ ப்³யத்தோ குஸலோ பி⁴க்கு² காயே காயானுபஸ்ஸீ விஹரதி…பே… வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம். தஸ்ஸ த⁴ம்மேஸு த⁴ம்மானுபஸ்ஸினோ விஹரதோ சித்தம் ஸமாதி⁴யதி, உபக்கிலேஸா பஹீயந்தி, ஸோ தம் நிமித்தம் உக்³க³ண்ஹாதி.

‘‘ஸ கோ², பி⁴க்க²வே, பண்டி³தோ ப்³யத்தோ குஸலோ பி⁴க்கு² லாபீ⁴ சேவ ஹோதி தி³ட்டே²வ த⁴ம்மே ஸுக²விஹாரானம், லாபீ⁴ ஹோதி ஸதிஸம்பஜஞ்ஞஸ்ஸ. தம் கிஸ்ஸ ஹேது? ததா² ஹி ஸோ, பி⁴க்க²வே, பண்டி³தோ ப்³யத்தோ குஸலோ பி⁴க்கு² ஸகஸ்ஸ சித்தஸ்ஸ நிமித்தம் உக்³க³ண்ஹாதீ’’தி (ஸம். நி. 5.374) –

ஏவம் பட²மம் உபமம் த³ஸ்ஸேத்வா பச்சா² அத்தோ² வுத்தோ. ‘‘ஸுவண்ணகாரஸூரியோபமாதி³ஸுத்தேஸு விய சா’’தி இத³ஞ்ச உதா³ஹரணமத்தேன ஸங்க³ஹம் க³ச்ச²தி ஸுவண்ணகாரஸுத்தாதீ³ஸு பட²மம் உபமாய அத³ஸ்ஸிதத்தா. ஏதேஸு ஹி ஸுவண்ணகாரோபமஸுத்தே (அ. நி. 3.103) தாவ –

‘‘அதி⁴சித்தமனுயுத்தேன, பி⁴க்க²வே, பி⁴க்கு²னா தீணி நிமித்தானி காலேன காலம் மனஸி காதப்³பா³னி, காலேன காலம் ஸமாதி⁴னிமித்தம் மனஸி காதப்³ப³ம், காலேன காலம் பக்³க³ஹனிமித்தம் மனஸி காதப்³ப³ம், காலேன காலம் உபேக்கா²னிமித்தம் மனஸி காதப்³ப³ம். ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் ஸமாதி⁴னிமித்தம்யேவ மனஸி கரேய்ய, டா²னம் தம் சித்தம் கோஸஜ்ஜாய ஸம்வத்தேய்ய. ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் பக்³க³ஹனிமித்தம்யேவ மனஸி கரேய்ய, டா²னம் தம் சித்தம் உத்³த⁴ச்சாய ஸம்வத்தேய்ய. ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் உபேக்கா²னிமித்தம்யேவ மனஸி கரேய்ய, டா²னம் தம் சித்தம் ந ஸம்மா ஸமாதி⁴யேய்ய ஆஸவானம் க²யாய. யதோ ச கோ², பி⁴க்க²வே, அதி⁴சித்தமனுயுத்தோ பி⁴க்கு² காலேன காலம் ஸமாதி⁴னிமித்தம்…பே… பக்³க³ஹனிமித்தம்…பே… உபேக்கா²னிமித்தம் மனஸி கரோதி, தம் ஹோதி சித்தம் முது³ஞ்ச கம்மனியஞ்ச பப⁴ஸ்ஸரஞ்ச, ந ச பப⁴ங்கு³, ஸம்மா ஸமாதி⁴யதி ஆஸவானம் க²யாய.

‘‘ஸேய்யதா²பி, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா உக்கம் ப³ந்தே⁴ய்ய, உக்கம் ப³ந்தி⁴த்வா உக்காமுக²ம் ஆலிம்பேய்ய, உக்காமுக²ம் ஆலிம்பித்வா ஸண்டா³ஸேன ஜாதரூபம் க³ஹேத்வா உக்காமுகே² பக்கி²பேய்ய, உக்காமுகே² பக்கி²பித்வா காலேன காலம் அபி⁴த⁴மதி, காலேன காலம் உத³கேன பரிப்போ²ஸேதி, காலேன காலம் அஜ்ஜு²பேக்க²தி. ஸசே, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் ஏகந்தம் அபி⁴த⁴மேய்ய, டா²னம் தம் ஜாதரூபம் த³ஹேய்ய. ஸசே, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் ஏகந்தம் உத³கேன பரிப்போ²ஸேய்ய, டா²னம் தம் ஜாதரூபம் நிப்³பா³பேய்ய. ஸசே, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் ஏகந்தம் அஜ்ஜு²பேக்கே²ய்ய, டா²னம் தம் ஜாதரூபம் ந ஸம்மா பரிபாகம் க³ச்சே²ய்ய. யதோ ச கோ², பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் காலேன காலம் அபி⁴த⁴மதி, காலேன காலம் உத³கேன பரிப்போ²ஸேதி, காலேன காலம் அஜ்ஜு²பேக்க²தி, தம் ஹோதி ஜாதரூபம் முது³ஞ்ச கம்மனியஞ்ச பப⁴ஸ்ஸரஞ்ச, ந ச பப⁴ங்கு³, ஸம்மா உபேதி கம்மாய. யஸ்ஸா யஸ்ஸா ச பிளந்த⁴னவிகதியா ஆகங்க²தி, யதி³ பட்டிகாய யதி³ குண்ட³லாய யதி³ கீ³வேய்யகேன யதி³ ஸுவண்ணமாலாய, தஞ்சஸ்ஸ அத்த²ம் அனுபோ⁴தி.

‘‘ஏவமேவ கோ², பி⁴க்க²வே, அதி⁴சித்தமனுயுத்தேன பி⁴க்கு²…பே… ஸம்மா ஸமாதி⁴யதி ஆஸவானம் க²யாய. யஸ்ஸ யஸ்ஸ ச அபி⁴ஞ்ஞாஸச்சி²கரணீயஸ்ஸ த⁴ம்மஸ்ஸ சித்தம் அபி⁴னின்னாமேதி அபி⁴ஞ்ஞாஸச்சி²கிரியாய, தத்ர தத்ரேவ ஸக்கி²ப⁴ப்³ப³தம் பாபுணாதி ஸதி ஸதிஆயதனே’’தி (அ. நி. 3.103) –

ஏவம் பட²மம் அத்த²ம் த³ஸ்ஸேத்வா தத³தந்தரம் உபமம் வத்வா புனபி அத்தோ² ஏவம் பட²மம் அத்த²ம் த³ஸ்ஸேத்வா தத³னந்தரம் உபமம் வத்வா புனபி அத்தோ² வுத்தோ.

ஸத்தஸூரியோபமே ச –

‘‘அனிச்சா, பி⁴க்க²வே, ஸங்கா²ரா, அது⁴வா, பி⁴க்க²வே, ஸங்கா²ரா, அனஸ்ஸாஸிகா, பி⁴க்க²வே, ஸங்கா²ரா, யாவஞ்சித³ம், பி⁴க்க²வே, அலமேவ ஸப்³ப³ஸங்கா²ரேஸு நிப்³பி³ந்தி³தும் அலம் விரஜ்ஜிதும் அலம் விமுச்சிதும். ஸினேரு, பி⁴க்க²வே, பப்³ப³தராஜா சதுராஸீதியோஜனஸஹஸ்ஸானி ஆயாமேன, சதுராஸீதியோஜனஸஹஸ்ஸானி வித்தா²ரேன, சதுராஸீதியோஜனஸஹஸ்ஸானி மஹாஸமுத்³தே³ அஜ்ஜோ²கா³ள்ஹோ, சதுராஸீதியோஜனஸஹஸ்ஸானி மஹாஸமுத்³தா³ அச்சுக்³க³தோ. ஹோதி ஸோ கோ², பி⁴க்க²வே, ஸமயோ, யம் கதா³சி கரஹசி தீ³க⁴ஸ்ஸ அத்³து⁴னோ அச்சயேன ப³ஹூனி வஸ்ஸானி ப³ஹூனி வஸ்ஸஸதானி ப³ஹூனி வஸ்ஸஸஹஸ்ஸானி ப³ஹூனி வஸ்ஸஸதஸஹஸ்ஸானி தே³வோ ந வஸ்ஸதி, தே³வே கோ² பன, பி⁴க்க²வே, அவஸ்ஸந்தே யே கேசிமே பீ³ஜகா³மபூ⁴தகா³மா ஓஸதி⁴திணவனப்பதயோ, தே உஸ்ஸுஸ்ஸந்தி விஸுஸ்ஸந்தி ந ப⁴வந்தி. ஏவம் அனிச்சா, பி⁴க்க²வே, ஸங்கா²ரா, ஏவம் அது⁴வா, பி⁴க்க²வே, ஸங்கா²ரா’’திஆதி³னா (அ. நி. 7.66) –

பட²மம் அத்த²ம் த³ஸ்ஸேத்வா தத³னந்தரம் உபமம் வத்வா புனபி அத்தோ² வுத்தோ. அத² வா ‘‘ஸூரியஸ்ஸ, பி⁴க்க²வே, உத³யதோ ஏதம் புப்³ப³ங்க³மம் ஏதம் புப்³ப³னிமித்தம், யதி³த³ம் அருணுக்³க³ம். ஏவமேவ கோ², பி⁴க்க²வே, பி⁴க்கு²னோ அரியஸ்ஸ அட்ட²ங்கி³கஸ்ஸ மக்³க³ஸ்ஸ உப்பாதா³ய ஏதம் புப்³ப³ங்க³மம் ஏதம் புப்³ப³னிமித்தம், யதி³த³ம் கல்யாணமித்ததா’’தி யதே³தம் ஸம்யுத்தனிகாயே (ஸம். நி. 5.49) ஆக³தம், தம் இத⁴ ஸூரியோபமஸுத்தந்தி அதி⁴ப்பேதம் ஸியா. தம்பி ‘‘கத்த²சி உபமாய அத்த²ம் பரிவாரேத்வா த³ஸ்ஸேதீ’’தி இமினா ந ஸமேதி பட²மம் உபமம் வத்வா தத³னந்தரம் அத்த²ம் த³ஸ்ஸேத்வா புன உபமாய அவுத்தத்தா. பட²மமேவ ஹி தத்த² உபமா த³ஸ்ஸிதா, ‘‘இமஸ்மிம் பன ஸாலிஸூகோபமே உபமாய அத்த²ம் பரிவாரேத்வா த³ஸ்ஸேந்தோ ஸேய்யதா²பி, பி⁴க்க²வேதி ஆதி³மாஹா’’தி. இத³ம்பி வசனமஸங்க³ஹிதம் வத்த²ஸுத்தஸ்ஸ இமஸ்ஸ ச விஸேஸாபா⁴வதோ. உப⁴யத்தா²பி ஹி பட²மம் உபமம் த³ஸ்ஸேத்வா பச்சா² அத்தோ² வுத்தோ, தஸ்மா ஏவமேத்த² பாடே²ன ப⁴விதப்³ப³ம் ‘‘தத்ர ப⁴க³வா கத்த²சி பட²மம்யேவ உபமம் த³ஸ்ஸேத்வா பச்சா² அத்த²ம் த³ஸ்ஸேதி வத்த²ஸுத்தே விய பாரிச்ச²த்தகோபம- (அ. நி. 7.69) அக்³கி³க்க²ந்தோ⁴பமாதி³ஸுத்தேஸு (அ. நி. 7.72) விய ச, கத்த²சி அத்தே²ன உபமம் பரிவாரேத்வா த³ஸ்ஸேதி ஸுவண்ணகாரஸத்தஸூரியோபமாதி³ஸுத்தேஸு (அ. நி. 7.66) விய, இமஸ்மிம் பன ஸாலிஸூகோபமே பட²மம் உபமம் த³ஸ்ஸேத்வா பச்சா² அத்த²ம் த³ஸ்ஸேந்தோ ஸேய்யதா²பி, பி⁴க்க²வேதி ஆதி³மாஹா’’தி. அஞ்ஞதா² மஜ்ஜி²மட்ட²கதா²ய விருஜ்ஜ²தி. இதா⁴பி ச புப்³பே³னாபரம் ந ஸமேதி. மஜ்ஜி²மட்ட²கதா²ய வுத்தனயேனேவ வா இதா⁴பி பாடோ² க³ஹேதப்³போ³.

கணஸதி³ஸோ ஸாலிப²லஸ்ஸ துண்டே³ உப்பஜ்ஜனகவாலோ ஸாலிஸூகம், ததா² யவஸூகம். ஸூகஸ்ஸ தனுகபா⁴வதோ பே⁴த³வதோ பே⁴தோ³ நாதிமஹா ஹோதீதி ஆஹ – ‘‘பி⁴ந்தி³ஸ்ஸதி, ச²விம் சி²ந்தி³ஸ்ஸதீதி அத்தோ²’’தி. யதா² மிச்சா²ட²பிதஸாலிஸூகாதி³ அக்கந்தம்பி ஹத்தா²தி³ம் ந பி⁴ந்த³தி பி⁴ந்தி³தும் அயோக்³க³பா⁴வேன டி²தத்தா, ஏவம் ஆசயகா³மிசித்தம் அவிஜ்ஜம் ந பி⁴ந்த³தி பி⁴ந்தி³தும் அயோக்³க³பா⁴வேன உப்பன்னத்தாதி இமமத்த²ம் த³ஸ்ஸேதி ‘‘மிச்சா²ட²பிதேனா’’திஆதி³னா. அட்ட²ஸு டா²னேஸூதி ‘‘து³க்கே² அஞ்ஞாண’’ந்திஆதி³னா வுத்தேஸு து³க்கா²தீ³ஸு சதூஸு ஸச்சேஸு புப்³ப³ந்தாதீ³ஸு சதூஸு சாதி அட்ட²ஸு டா²னேஸு. க⁴னப³ஹலந்தி சிரகாலபரிபா⁴வனாய அதிவிய ப³ஹலம். மஹாவிஸயதாய மஹாபடிபக்க²தாய ப³ஹுபரிவாரதாய ப³ஹுது³க்க²தாய ச மஹதீ அவிஜ்ஜாதி மஹாஅவிஜ்ஜா. தம் மஹாஅவிஜ்ஜம். மஹாஸத்³தோ³ ஹி ப³ஹுபா⁴வத்தோ²பி ஹோதி ‘‘மஹாஜனோ’’திஆதீ³ஸு விய. தண்ஹாவானதோ நிக்க²ந்தபா⁴வேனாதி தத்த² தண்ஹாய அபா⁴வமேவ வத³தி.

42. து³தியே பாதே³னேவ அவமத்³தி³தே அக்கந்தந்தி வுச்சமானே ஹத்தே²ன அவமத்³தி³தம் அக்கந்தம் விய அக்கந்தந்தி ருள்ஹீ ஹேஸாதி ஆஹ – ‘‘அக்கந்தந்தேவ வுத்த’’ந்தி. அரியவோஹாரோதி அரியதே³ஸவாஸீனம் வோஹாரோ. மஹந்தம் அக்³க³ஹேத்வா அப்பமத்தகஸ்ஸேவ க³ஹணே பயோஜனம் த³ஸ்ஸேதும் – ‘‘கஸ்மா பனா’’திஆதி³ ஆரத்³த⁴ம். தேன ‘‘விவட்டூபனிஸ்ஸயகுஸலம் நாம யோனிஸோ உப்பாதி³தம் அப்பக’’ந்தி ந சிந்தேதப்³ப³ம், அனுக்கமேன லத்³த⁴பச்சயம் ஹுத்வா வட்³ட⁴மானம் கு²த்³த³கனதீ³ விய பக்க²ந்த³மஹோகா⁴ ஸமுத்³த³ம், அனுக்கமேன நிப்³பா³னமஹாஸமுத்³த³மேவ புரிஸம் பாபேதீதி தீ³பேதி. பச்சேகபோ³தி⁴ம் பு³த்³த⁴பூ⁴மிந்தி ச பச்சத்தே உபயோக³வசனம். வட்டவிவட்டம் கதி²தந்தி யதா²க்கமேன வுத்தம்.

43. ததியே தோ³ஸேன பது³ட்ட²சித்தந்தி ஸம்பயுத்தத⁴ம்மானம், யஸ்மிம் ஸந்தானே உப்பஜ்ஜதி, தஸ்ஸ ச தூ³ஸனேன விஸஸம்ஸட்ட²பூதிமுத்தஸதி³ஸேன தோ³ஸேன பதூ³ஸிதசித்தம். அத்தனோ சித்தேனாதி அத்தனோ சேதோபரியஞாணேன ஸப்³ப³ஞ்ஞுதஞ்ஞாணேன வா ஸஹிதேன சித்தேன. பரிச்சி²ந்தி³த்வாதி ஞாணேன பரிச்சி²ந்தி³த்வா. இட்டா²காரேன ஏதீதி அயோ, ஸுக²ம். ஸப்³ப³ஸோ அபேதோ அயோ ஏதஸ்ஸ, ஏதஸ்மாதி வா அபாயோ, காயிகஸ்ஸ சேதஸிகஸ்ஸ ச து³க்க²ஸ்ஸ க³தி பவத்திட்டா²னந்தி து³க்³க³தி, காரணாவஸேன விவித⁴ம் விகாரேன ச நிபாதியந்தி ஏத்தா²தி வினிபாதோ, அப்பகோபி நத்தி² அயோ ஸுக²ம் ஏத்தா²தி நிரயோதி ஏவமேத்த² அத்தோ² வேதி³தப்³போ³.

44. சதுத்தே² ஸத்³தா⁴பஸாதே³ன பஸன்னந்தி ஸத்³தா⁴ஸங்கா²தேன பஸாதே³ன பஸன்னம், ந இந்த்³ரியானம் அவிப்பஸன்னதாய. ஸுக²ஸ்ஸ க³திந்தி ஸுக²ஸ்ஸ பவத்திட்டா²னம். ஸுக²மேவேத்த² க³ச்ச²ந்தி, ந து³க்க²ந்தி வா ஸுக³தி. மனாபியரூபாதி³தாய ஸஹ அக்³கே³ஹீதி ஸக்³க³ம், லோகம்.

45. பஞ்சமே பரிளாஹவூபஸமகரோ ரஹதோ³ ஏத்தா²தி ரஹதோ³, உத³கபுண்ணோ ரஹதோ³ உத³கரஹதோ³. உத³கம் த³ஹதி தா⁴ரேதீதி உத³கத³ஹோ. ஆவிலோதி கலலப³ஹுலதாய ஆகுலோ. தேனாஹ – ‘‘அவிப்பஸன்னோ’’தி. லுளிதோதி வாதேன ஆலோளிதோ. தேனாஹ – ‘‘அபரிஸண்டி²தோ’’தி. வாதாபி⁴கா⁴தேன வீசிதரங்க³மலஸமாகுலதாய ஹி பரிதோ ந ஸண்டி²தோ வா அபரிஸண்டி²தோ. வாதாபி⁴கா⁴தேன உத³கஸ்ஸ ச அப்பபா⁴வேன கலலீபூ⁴தோ கத்³த³மபா⁴வப்பத்தோதி ஆஹ – ‘‘கத்³த³மீபூ⁴தோ’’தி. ஸிப்பியோ முத்தஸிப்பிஆத³யோ. ஸம்பு³கா ஸங்க²ஸலாகவிஸேஸா. சரந்தம்பி திட்ட²ந்தம்பீதி யதா²லாப⁴வசனமேதம் த³ட்ட²ப்³ப³ம். தமேவ ஹி யதா²லாப⁴வசனதம் த³ஸ்ஸேதும் – ‘‘ஏத்தா²’’திஆதி³ ஆரத்³த⁴ம்.

பரியோனத்³தே⁴னாதி படிச்சா²தி³தேன. தயித³ம் காரணேன ஆவிலபா⁴வஸ்ஸ த³ஸ்ஸனம். தி³ட்ட²த⁴ம்மே இமஸ்மிம் அத்தபா⁴வே ப⁴வோ தி³ட்ட²த⁴ம்மிகோ, ஸோ பன லோகியோபி ஹோதி லோகுத்தரோபீதி ஆஹ – ‘‘லோகியலோகுத்தரமிஸ்ஸகோ’’தி. பேச்ச ஸம்பரேதப்³ப³தோ ஸம்பராயோ, பரலோகோ. தேனாஹ – ‘‘ஸோ ஹி பரத்த² அத்தோ²தி பரத்தோ²’’தி. இதி த்³விதா⁴பி ஸகஸந்ததிபரியாபன்னோ ஏவ க³ஹிதோதி இதரம்பி ஸங்க³ஹேத்வா த³ஸ்ஸேதும் – ‘‘அபிசா’’திஆதி³மாஹ. அயந்தி குஸலகம்மபத²ஸங்கா²தோ த³ஸவிதோ⁴ த⁴ம்மோ. ஸத்த²ந்தரகப்பாவஸானேதி இத³ம் தஸ்ஸ ஆஸன்னபா⁴வம் ஸந்தா⁴ய வுத்தம். யஸ்ஸ கஸ்ஸசி அந்தரகப்பஸ்ஸாவஸானேதி வேதி³தப்³ப³ம். அரியானம் யுத்தந்தி அரியானம் அரியபா⁴வாய யுத்தம், ததோ ஏவ அரியபா⁴வம் காதும் ஸமத்த²ம். ஞாணமேவ ஞேய்யஸ்ஸ பச்சக்க²கரணட்டே²ன த³ஸ்ஸனந்தி ஆஹ – ‘‘ஞாணமேவ ஹீ’’திஆதி³. கிம் பன தந்தி ஆஹ – ‘‘தி³ப்³ப³சக்கூ²’’திஆதி³.

46. ச²ட்டே² அச்சோ²தி தனுகோ. தனுபா⁴வமேவ ஹி ஸந்தா⁴ய ‘‘அப³ஹலோ’’தி வுத்தம். யஸ்மா பஸன்னோ நாம அச்சோ² ந ப³ஹலோ, தஸ்மா ‘‘பஸன்னோதிபி வட்டதீ’’தி வுத்தம். விப்பஸன்னோதி விஸேஸேன பஸன்னோ. ஸோ பன ஸம்மா பஸன்னோ நாம ஹோதீதி ஆஹ – ‘‘ஸுட்டு² பஸன்னோ’’தி. அனாவிலோதி அகலுஸோ. தேனாஹ – ‘‘பரிஸுத்³தோ⁴’’திஆதி³. ஸங்க²ந்தி கு²த்³த³கஸேவாலம், யம் ‘‘திலபீ³ஜக’’ந்தி வுச்சதி. ஸேவாலந்தி கண்ணிகஸேவாலம். பணகந்தி உத³கமலம். சித்தஸ்ஸ ஆவிலபா⁴வோ நீவரணஹேதுகோதி ஆஹ – ‘‘அனாவிலேனாதி பஞ்சனீவரணவிமுத்தேனா’’தி.

47. ஸத்தமே ருக்க²ஜாதானீதி ஏத்த² ஜாதஸத்³தே³ன பத³வட்³ட⁴னமேவ கதம் யதா² ‘‘கோஸஜாத’’ந்தி ஆஹ – ‘‘ருக்கா²னமேவேதம் அதி⁴வசன’’ந்தி. கோசி ஹி ருக்கோ² வண்ணேன அக்³கோ³ ஹோதி யதா² தம் ரத்தசந்த³னாதி³. கோசி க³ந்தே⁴ன யதா² தம் கோ³ஸீதசந்த³னம். கோசி ரஸேன க²தி³ராதி³. கோசி த²த்³த⁴தாய சம்பகாதி³. மக்³க³ப²லாவஹதாய விபஸ்ஸனாவஸேன பா⁴விதம்பி க³ஹிதம். ‘‘தத்த² தத்தே²வ ஸக்கி²ப⁴ப்³ப³தம் பாபுணாதீ’’தி (அ. நி. 3.103) வசனதோ ‘‘அபி⁴ஞ்ஞாபாத³கசதுத்த²ஜ்ஜா²னசித்தமேவ, ஆவுஸோ’’தி பு²ஸ்ஸமித்தத்தே²ரோ வத³தி.

48. அட்ட²மே சித்தஸ்ஸ பரிவத்தனம் உப்பாத³னிரோதா⁴ ஏவாதி ஆஹ – ‘‘ஏவம் லஹும் உப்பஜ்ஜித்வா லஹும் நிருஜ்ஜ²னக’’ந்தி. அதி⁴மத்தபமாணத்தே²தி அதிக்கந்தபமாணத்தே², பமாணாதீததாயந்தி அத்தோ². தேனாஹ – ‘‘அதிவிய ந ஸுகரா’’தி. சக்கு²விஞ்ஞாணம்பி அதி⁴ப்பேதமேவாதி ஸப்³ப³ஸ்ஸபி சித்தஸ்ஸ ஸமானக²ணத்தா வுத்தம். சித்தஸ்ஸ அதிவிய லஹுபரிவத்திபா⁴வம் தே²ரவாதே³ன தீ³பேதும் – ‘‘இமஸ்மிம் பனத்தே²’’திஆதி³ வுத்தம். சித்தஸங்கா²ராதி ஸஸம்பயுத்தம் சித்தம் வத³தி. வாஹஸதானம் கோ², மஹாராஜ, வீஹீனந்தி போத்த²கேஸு லிக²ந்தி, ‘‘வாஹஸதம் கோ², மஹாராஜ, வீஹீன’’ந்தி பன பாடே²ன ப⁴விதப்³ப³ம். மிலிந்த³பஞ்ஹேபி (மி. ப. 4.1.2) ஹி கத்த²சி அயமேவ பாடோ² தி³ஸ்ஸதி. ‘‘வாஹஸதான’’ந்தி வா பச்சத்தே ஸாமிவசனம் ப்³யத்தயேன வுத்தந்தி த³ட்ட²ப்³ப³ம். அட்³ட⁴சூளந்தி தோ²கேன ஊனம் உபட்³ட⁴ம். கஸ்ஸ பன உபட்³ட⁴ந்தி? அதி⁴காரதோ வாஹஸ்ஸாதி விஞ்ஞாயதி. ‘‘அட்³ட⁴சுத்³த³ஸ’’ந்தி கேசி. ‘‘அட்³ட⁴சதுத்த²’’ந்தி அபரே. ஸாதி⁴கம் தி³யட்³ட⁴ஸதம் வாஹாதி த³ள்ஹம் கத்வா வத³ந்தி, வீமம்ஸிதப்³ப³ம். சதுனாளிகோ தும்போ³. புச்சா²ய அபா⁴வேனாதி ‘‘ஸக்கா பன, ப⁴ந்தே, உபமம் காது’’ந்தி ஏவம் பவத்தாய புச்சா²ய அபா⁴வேன ந கதா உபமா. த⁴ம்மதே³ஸனாபரியோஸானேதி ஸன்னிபதிதபரிஸாய யதா²ரத்³த⁴த⁴ம்மதே³ஸனாய பரியோஸானே.

49. நவமே பப⁴ஸ்ஸரந்தி பரியோதா³தம் ஸபா⁴வபரிஸுத்³த⁴ட்டே²ன. தேனாஹ – ‘‘பண்ட³ரம் பரிஸுத்³த⁴’’ந்தி. பப⁴ஸ்ஸரதாத³யோ நாம வண்ணதா⁴துயம் லப்³ப⁴னகவிஸேஸாதி ஆஹ – ‘‘கிம் பன சித்தஸ்ஸ வண்ணோ நாம அத்தீ²’’தி? இதரோ அரூபதாய ‘‘நத்தீ²’’தி படிக்கி²பித்வா பரியாயகதா² அயம் தாதி³ஸஸ்ஸ சித்தஸ்ஸ பரிஸுத்³த⁴பா⁴வனாதீ³பனாயாதி த³ஸ்ஸேந்தோ ‘‘நீலாதீ³ன’’ந்திஆதி³மாஹ. ததா² ஹி ‘‘ஸோ ஏவம் ஸமாஹிதே சித்தே பரிஸுத்³தே⁴ பரியோதா³தே’’தி (தீ³. நி. 1.243-244; ம. நி. 1.384-386, 431-433; பாரா. 12-13) வுத்தம். தேனேவாஹ – ‘‘இத³ம்பி நிருபக்கிலேஸதாய பரிஸுத்³த⁴ந்தி பப⁴ஸ்ஸர’’ந்தி. கிம் பன ப⁴வங்க³சித்தம் நிருபக்கிலேஸந்தி? ஆம ஸபா⁴வதோ நிருபக்கிலேஸம், ஆக³ந்துகஉபக்கிலேஸவஸேன பன ஸியா உபக்கிலிட்ட²ம். தேனாஹ – ‘‘தஞ்ச கோ²’’திஆதி³. தத்த² அத்தனோ தேஸஞ்ச பி⁴க்கூ²னம் பச்சக்க²பா⁴வதோ புப்³பே³ ‘‘இத³’’ந்தி வத்வா இதா³னி பச்சாமஸனவஸேன ‘‘த’’ந்தி ஆஹ. ச-ஸத்³தோ³ அத்தூ²பனயனே. கோ²-ஸத்³தோ³ வசனாலங்காரே, அவதா⁴ரணே வா. வக்க²மானஸ்ஸ அத்த²ஸ்ஸ நிச்சி²தபா⁴வதோ ப⁴வங்க³சித்தேன ஸஹாவட்டா²னாபா⁴வதோ உபக்கிலேஸானம் ஆக³ந்துகதாதி ஆஹ – ‘‘அஸஹஜாதேஹீ’’திஆதி³. ராகா³த³யோ உபேச்ச சித்தஸந்தானம் கிலிஸ்ஸந்தி விபா³தே⁴ந்தி உபதாபேந்தி சாதி ஆஹ – ‘‘உபக்கிலேஸேஹீதி ராகா³தீ³ஹீ’’தி. ப⁴வங்க³சித்தஸ்ஸ நிப்பரியாயதோ உபக்கிலேஸேஹி உபக்கிலிட்ட²தா நாம நத்தி² அஸம்ஸட்ட²பா⁴வதோ, ஏகஸந்ததிபரியாபன்னதாய பன ஸியா உபக்கிலிட்ட²தாபரியாயோதி ஆஹ – ‘‘உபக்கிலிட்ட²ம் நாமாதி வுச்சதீ’’தி. இதா³னி தமத்த²ம் உபமாய விபா⁴வேதும் ‘‘யதா² ஹீ’’திஆதி³மாஹ. தேன பி⁴ன்னஸந்தானக³தாயபி நாம இரியாய லோகே கா³ரய்ஹதா தி³ஸ்ஸதி, பகே³வ ஏகஸந்தானக³தாய இரியாயாதி இமம் விஸேஸம் த³ஸ்ஸேதி. தேனாஹ – ‘‘ஜவனக்க²ணே…பே… உபக்கிலிட்ட²ம் நாம ஹோதீ’’தி.

50. த³ஸமே ப⁴வங்க³சித்தமேவ சித்தந்தி ‘‘பப⁴ஸ்ஸரமித³ம், பி⁴க்க²வே, சித்த’’ந்தி வுத்தம் ப⁴வங்க³சித்தமேவ. யத³க்³கே³ன ப⁴வங்க³சித்தம் தாதி³ஸபச்சயஸமவாயே உபக்கிலிட்ட²ம் நாம வுச்சதி, தத³க்³கே³ன தப்³பி³து⁴ரபச்சயஸமவாயே உபக்கிலேஸதோ விமுத்தந்தி வுச்சதி. தேனாஹ – ‘‘உபக்கிலேஸேஹி விப்பமுத்தம் நாம ஹோதீ’’தி. ஸேஸமேத்த² நவமஸுத்தே வுத்தனயானுஸாரேன வேதி³தப்³ப³ம்.

பணிஹிதஅச்ச²வக்³க³வண்ணனா நிட்டி²தா.