(16) 2. ஏகத⁴ம்மபாளி-து³தியவக்³க³வண்ணனா

298. மிச்சா² பஸ்ஸதி தாய, ஸயம் வா மிச்சா² பஸ்ஸதி, மிச்சா²த³ஸ்ஸனமேவ வா தந்தி மிச்சா²தி³ட்டி², யம் கிஞ்சி விபரீதத³ஸ்ஸனம். தேனாஹ – ‘‘த்³வாஸட்டி²விதா⁴யா’’திஆதி³. மிச்சா²தி³ட்டி² ஏதஸ்ஸாதி மிச்சா²தி³ட்டி²கோ. தஸ்ஸ மிச்சா²தி³ட்டி²கஸ்ஸ.

299. ஸம்மா பஸ்ஸதி தாய, ஸயம் வா ஸம்மா பஸ்ஸதி, ஸம்மாத³ஸ்ஸனமத்தமேவ வா தந்தி ஸம்மாதி³ட்டி². பஞ்சவிதா⁴யாதி கம்மஸ்ஸகதாஜா²னவிபஸ்ஸனாமக்³க³ப²லவஸேன பஞ்சவிதா⁴ய. தத்த² ஜா²னசித்துப்பாத³பரியாபன்னம் ஞாணம் ஜா²னஸம்மாதி³ட்டி², விபஸ்ஸனாஞாணம் விபஸ்ஸனாஸம்மாதி³ட்டி².

302. பஞ்சஸு க²ந்தே⁴ஸு ‘‘நிச்ச’’ந்திஆதி³னா பவத்தோ அனுபாயமனஸிகாரோ.

303. ‘‘அனிச்ச’’ந்திஆதி³னா பவத்தோ உபாயமனஸிகாரோ. யாவ நியாமோக்கமனாதி யாவ மிச்ச²த்தனியாமோக்கமனா. மிச்ச²த்தனியாமோக்கமனனயோ பன ஸாமஞ்ஞப²லஸுத்தவண்ணனாயம் தட்டீகாய ச வுத்தனயேனேவ வேதி³தப்³போ³.

304. அயம் திவிதா⁴ ஸக்³கா³வரணா சேவ ஹோதீதி கம்மபத²ப்பத்தியா மஹாஸாவஜ்ஜபா⁴வதோ வுத்தம். ஸக்³கா³வரணாய ஹோந்தியா மக்³க³விப³ந்த⁴கபா⁴வே வத்தப்³ப³மேவ நத்தீ²தி வுத்தம் – ‘‘மக்³கா³வரணா சா’’தி. ‘‘ஸஸ்ஸதோ லோகோ’’திஆதி³கா த³ஸவத்து²கா அந்தக்³கா³ஹிகா மிச்சா²தி³ட்டி². மக்³கா³வரணாவ ஹோதி விபரீதத³ஸ்ஸனபா⁴வதோ, ந ஸக்³கா³வரணா அகம்மபத²பத்திதோதி அதி⁴ப்பாயோ. இத³ம் பன விதா⁴னம் படிக்கி²பித்வாதி விபரீதத³ஸ்ஸனஞ்ச ந மக்³கா³வரணஞ்சாதி விருத்³த⁴மேதம் உத்³த⁴ம்மபா⁴வதோ. ததா² ஹி ஸதி அப்பஹீனாய ஏவ ஸக்காயதி³ட்டி²யா மக்³கா³தி⁴க³மேன ப⁴விதப்³ப³ந்தி அதி⁴ப்பாயேன யதா²வுத்தவிதா⁴னம் படிக்கி²பித்வா. ‘‘ந ஸக்³கா³வரணா’’தி ஸக்³கூ³பபத்தியா அவிப³ந்த⁴கத்தம் வத³ந்தேஹி தி³ட்டி²யா ஸக்³கா³வஹதாபி நாம அனுஞ்ஞாதா ஹோதீதி தம் வாத³ம் படிக்கி²பந்தேன ‘‘தி³ட்டி² நாம ஸக்³க³ம் உபனேதும் ஸமத்தா² நாம நத்தீ²’’தி வுத்தம். கஸ்மா? ஏகந்தக³ருதரஸாவஜ்ஜபா⁴வதோ. தேனாஹ – ‘‘ஏகந்தம் நிரயஸ்மிம்யேவ நிமுஜ்ஜாபேதீ’’திஆதி³.

305. வட்டம் வித்³த⁴ம்ஸேதீதி மக்³க³ஸம்மாதி³ட்டி² கிலேஸவட்டம் கம்மவட்டஞ்ச வித்³த⁴ம்ஸேதி. விபாகவட்டம் கா நு வித்³த⁴ம்ஸேதி நாம. ஏவம் பன அத்தனோ காரணேன வித்³த⁴ஸ்தப⁴வம் ப²லஸம்மாதி³ட்டி² படிபா³ஹதீதி வுத்தம் அவஸரதா³னதோ. இச்சேதம் குஸலந்தி அரஹத்தம் பாபேதும் ஸசே ஸக்கோதி, ஏவமேதம் விபஸ்ஸனாய படிஸந்தி⁴அனாகட்³ட⁴னம் குஸலம் அனவஜ்ஜம். ஸத்த ப⁴வே தே³தீதி ஸோதாபத்திமக்³க³ஸ்ஸ பச்சயபூ⁴தா விபஸ்ஸனாஸம்மாதி³ட்டி² தஸ்ஸ புக்³க³லஸ்ஸ ஸத்த ப⁴வே தே³தி. ஏவமயந்தி பஞ்சவித⁴ம்பி ஸம்மாதி³ட்டி²ம் ஸந்தா⁴ய வுத்தம். தேனாஹ – ‘‘லோகியலோகுத்தரா ஸம்மாதி³ட்டி² கதி²தா’’தி. இமஸ்மிம் பனத்தே²தி ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமீ’’திஆதி³னா வுத்தே க³திமக்³க³ஸங்கா²தே அத்தே². ‘‘ஸுக³திம் ஸக்³க³ம் லோகம் உபபஜ்ஜந்தீ’’தி வுத்தத்தா ‘‘லோகிகா ப⁴வனிப்பா²தி³காவ வேதி³தப்³பா³’’தி வுத்தம்.

306. யதா²தி³ட்டீ²தி அத்த²ப்³யாபனிச்சா²யம் யதா²-ஸத்³தோ³, தேன உத்தரபத³த்த²ப்பதா⁴னோ ஸமாஸோதி ஆஹ – ‘‘யா யா தி³ட்டீ²’’தி. தஸ்ஸா தஸ்ஸா அனுரூபந்தி தம்தம்தி³ட்டி²அனுரூபந்தி அத்தோ². ஸமத்தந்தி அனவஸேஸம். தேனாஹ – ‘‘பரிபுண்ண’’ந்தி. ஸமாதி³ன்னந்தி ஆதி³மஜ்ஜ²பரியோஸானேஸு ஸமம் ஏகஸதி³ஸம் கத்வா ஆதி³ன்னம் க³ஹிதம் அனிஸ்ஸட்ட²ம். ததே³தந்தி யதே³தம் ‘‘யஞ்சேவ காயகம்ம’’ந்திஆதி³னா வுத்தம், ததே³தம் காயகம்மம். யதா²தி³ட்டி²யம் டி²தகாயகம்மந்தி யா பன தி³ட்டி² ‘‘நத்தி² ததோனிதா³னம் பாப’’ந்திஆதி³னா பவத்தா, தஸ்ஸம் தி³ட்டி²யம் டி²தகஸ்ஸ டி²தமத்தஸ்ஸ அனிஸ்ஸட்ட²ஸ்ஸ தம்தி³ட்டி²கஸ்ஸ காயகம்மம். தி³ட்டி²ஸஹஜாதம் காயகம்மந்தி தஸ்ஸ யதா²தி³ட்டி²கஸ்ஸ பரேஸம் ஹத்த²முத்³தா³தி³னா விஞ்ஞாபனகாலே தாய தி³ட்டி²யா ஸஹஜாதம் காயகம்மம். ந சேத்த² வசீகம்மாஸங்கா உப்பாதே³தப்³பா³ பாணகா⁴தாதீ³னம்யேவ அதி⁴ப்பேதத்தா. தி³ட்டா²னுலோமிகம் காயகம்மந்தி யதா² பரேஸம் பாகடம் ஹோதி, ஏவம் தி³ட்டி²யா அனுலோமிகம் கத்வா பவத்திதம் காயகம்மம். தேனாஹ – ‘‘ஸமாதி³ன்னம் க³ஹிதம் பராமட்ட²’’ந்தி. தத்தா²திஆதி³ ஸுவிஞ்ஞேய்யமேவ. ஏஸேவ நயோதி இமினா யதா²வுத்தாய தி³ட்டி²யா டி²தவசீகம்மம், தி³ட்டி²ஸஹஜாதம் வசீகம்மம், தி³ட்டா²னுலோமிகம் வசீகம்மந்தி திவித⁴ம் ஹோதீதி ஏவமாதி³ அதிதி³ஸதி. மிச்சா²தி³ட்டி²கஸ்ஸாதி கம்மபத²ப்பத்தாய மிச்சா²தி³ட்டி²யா மிச்சா²தி³ட்டி²கஸ்ஸ. ‘‘யாய காயசி மிச்சா²தி³ட்டி²யா மிச்சா²தி³ட்டி²கஸ்ஸ ஸதோ’’தி அபரே.

தி³ட்டி²ஸஹஜாதாதி யதா²வுத்தாய தி³ட்டி²யா ஸஹஜாதா சேதனா. ஏஸ நயோ ஸேஸபதே³ஸுபி. பத்த²னாதி ‘‘இத³ம் நாம கரேய்ய’’ந்தி தண்ஹாபத்த²னா. சேதனாபத்த²னானம் வஸேனாதி யதா²வுத்ததி³ட்டி²க³தனிஸ்ஸிதசேதஸிகனிகாமனானம் வஸேன. சித்தட்ட²பனாதி சித்தஸ்ஸ பணித³ஹனா. ப²ஸ்ஸாத³யோதி சேதனாதி³ட்டி²தண்ஹாதி³வினிமுத்தா ப²ஸ்ஸாதி³த⁴ம்மா. யஸ்மா தி³ட்டி² பாபிகா, தஸ்மா தஸ்ஸ புக்³க³லஸ்ஸ ஸப்³பே³ தே த⁴ம்மா அனிட்டா²ய…பே… ஸம்வத்தந்தீதி யோஜனா. புரிமஸ்ஸேவாதி தித்தகபத³ஸ்ஸேவ. தித்தகம் கடுகந்தி ச உப⁴யம் இத⁴ அனிட்ட²பரியாயம் த³ட்ட²ப்³ப³ம் ‘‘பச்சா² தே கடுகம் ப⁴விஸ்ஸதீ’’திஆதீ³ஸு விய.

அம்போ³யந்தி அம்போ³ அயம். தமேவ பூஜந்தி தமேவ புப்³பே³ லத்³த⁴பரிஸிஞ்சனதா³னாதி³பூஜம். நிவேஸரேதி பவிஸிம்ஸு. அஸாதஸன்னிவாஸேனாதி அமது⁴ரனிம்ப³மூலஸம்ஸக்³கே³ன.

தம் பன படிக்கி²பித்வா…பே… வுத்தந்தி ஸப்³பா³பி மிச்சா²தி³ட்டி² ஏகந்தஸாவஜ்ஜத்தா அனிட்டா²ய து³க்கா²ய ஸம்வத்ததீதி அதி⁴ப்பாயேன வுத்தம். அனந்தரஸுத்தேதி த³ஸமஸுத்தே. யோஜேத்வா வேதி³தப்³பா³னீதி நவமஸுத்தே விய யோஜேத்வா வேதி³தப்³பா³னி. சித்தட்ட²பனாவ பத்த²னாதி ஏத்த² பணிதி⁴ சாதி வத்தப்³ப³ம்.

து³தியவக்³க³வண்ணனா நிட்டி²தா.