16. ஏகத⁴ம்மபாளி

(16) 3. ஏகத⁴ம்மபாளி-ததியவக்³க³வண்ணனா

308. ததியஸ்ஸ பட²மே அயாதா²வதி³ட்டி²கோதி அனிச்சாதி³பா⁴வேஸு த⁴ம்மேஸு நிச்சாதிஆதி³னா உப்பன்னதி³ட்டி²கோ. தேனாஹ – ‘‘தாயேவ மிச்சா²தி³ட்டி²யா விபரீதத³ஸ்ஸனோ’’தி ஸத்³த⁴ம்மாதி ஏத்த² ஸந்தோ பஸத்தோ² ஸுந்த³ரோ த⁴ம்மோ, யோ மனுஸ்ஸத⁴ம்மோதிபி வுச்சதி. ததோ ஹி மிச்சா²தி³ட்டி²கோ பரம் வுட்டா²பேய்ய, ந அரியத⁴ம்மதோ. தேனாஹ – ‘‘த³ஸகுஸலகம்மபத²த⁴ம்மதோ’’தி. ஏவரூபாதி இமினா பாதி²கபுத்தாதி³கே ஸங்க³ண்ஹாதி.

309. ஸப்³ப³ஞ்ஞுபோ³தி⁴ஸத்தோதி ஸப்³ப³ஞ்ஞுபா⁴கீ³ போ³தி⁴ஸத்தோ. ஆதி³-ஸத்³தே³ன பூரிதபாரமிகா பச்சேகபோ³தி⁴ஸத்தா ஏகச்சஸாவகபோ³தி⁴ஸத்தா ச ஸங்க³ய்ஹந்தி.

310. பரமாதி மஹாஸாவஜ்ஜபா⁴வேன பரமா, உக்கம்ஸக³தாதி அத்தோ². தேஸந்தி ஆனந்தரியகம்மானம். பரிச்சே²தோ³தி விபாகவஸேன பரியோஸானம். வட்டஸ்ஸ மூலம், ததோ தம்ஸமங்கீ³புக்³க³லோ வட்டஸ்ஸ கா²ணூதி வுச்சதி. தேனாஹ – ‘‘தாயா’’திஆதி³. தஞ்சே கா³ஹம் ந விஸ்ஸஜ்ஜேதி, தஸ்ஸ புனபி தப்³பா⁴வாவஹத்தா வுத்தம் – ‘‘ப⁴வதோ வுட்டா²னம் நத்தீ²’’தி, ந பன ஸப்³ப³ஸோ வுட்டா²னஸ்ஸ அபா⁴வதோ. யாதி³ஸே ஹி பச்சயே படிச்ச அயம் தம் த³ஸ்ஸனம் ஓக்கந்தோ புன கதா³சி தப்படிபக்கே² பச்சயே படிச்ச ததோ ஸீஸுக்கி²பனமஸ்ஸ ந ஹோதீதி ந வத்தப்³ப³ம். அகுஸலஞ்ஹி நாமேதம் அப³லம் து³ப்³ப³லம், ந குஸலம் விய மஹாப³லம். அஞ்ஞதா² ஸம்மத்தனியாமோ விய மிச்ச²த்தனியாமோபி அச்சந்திகோ ஸியா, ந ச மிச்ச²த்தனியாமோ அச்சந்திகோ. தேனேவ பபஞ்சஸூத³னியம் (ம. நி. அட்ட². 2.100) –

‘‘கிம் பனேஸ ஏகஸ்மிம்யேவ அத்தபா⁴வே நியதோ ஹோதி, உதா³ஹு அஞ்ஞஸ்மிம்பீதி? ஏகஸ்மிம்யேவ நியதோ, ஆஸேவனவஸேன ப⁴வந்தரேபி தம் தி³ட்டி²ம் ரோசேதி ஏவா’’தி –

வுத்தம். ததோயேவ ச ஸுமங்க³லவிலாஸினியம்பி (தீ³. நி. அட்ட². 1.170-172) வுத்தம் –

‘‘யே வா பன தேஸம் லத்³தி⁴ம் க³ஹேத்வா ரத்திட்டா²னே தி³வாட்டா²னே நிஸின்னா ஸஜ்ஜா²யந்தி வீமம்ஸந்தி, தேஸம் ‘கரோதோ ந கரீயதி பாபம், நத்தி² ஹேது, நத்தி² பச்சயோ, மதோ உச்சி²ஜ்ஜதீ’தி தஸ்மிம் ஆரம்மணே மிச்சா²ஸதி ஸந்திட்ட²தி, சித்தம் ஏகக்³க³ம் ஹோதி, ஜவனானி ஜவந்தி. பட²மஜவனே ஸதேகிச்சா² ஹோந்தி, ததா² து³தியாதீ³ஸு. ஸத்தமே பு³த்³தா⁴னம்பி அதேகிச்சா² அனிவத்தினோ அரிட்ட²கண்டகஸதி³ஸா, தத்த² கோசி ஏகம் த³ஸ்ஸனம் ஓக்கமதி, கோசி த்³வே, கோசி தீணிபி, ஏகஸ்மிம் ஓக்கந்தேபி த்³வீஸு தீஸு ஓக்கந்தேஸுபி நியதமிச்சா²தி³ட்டி²கோவ ஹோதி. பத்தோ ஸக்³க³மக்³கா³வரணஞ்சேவ மோக்க²மக்³கா³வரணஞ்ச, அப⁴ப்³போ³ தஸ்ஸத்தபா⁴வஸ்ஸ அனந்தரம் ஸக்³க³ம்பி க³ந்தும், பகே³வ மோக்க²ம், வட்டகா²ணு நாமேஸ ஸத்தோ பத²விகோ³பகோ, யேபு⁴ய்யேன ஏவரூபஸ்ஸ ப⁴வதோ வுட்டா²னம் நத்தீ²’’தி.

பிட்டி²சக்கவாளேதி ஜா²யமானசக்கவாளஸ்ஸ பரதோ ஏகஸ்மிம் ஓகாஸே. யம் ஜா²யமானானம் அஜ்ஜா²யமானானஞ்ச சக்கவாளானமந்தரம், யத்த² லோகந்தரிகனிரயஸமஞ்ஞா, தாதி³ஸே ஏகஸ்மிம் ஓகாஸே. பச்சதியேவாதி சக்கவாளே ஜா²யமானே அஜ்ஜா²யமானேபி அத்தனோ கம்மப³லேன பச்சதியேவ.

311. சதுத்தே² ‘‘மா க²லீ’’தி வசனம் உபாதா³ய ஏவம்லத்³த⁴னாமோதி தம் கிர ஸகத்³த³மாய பூ⁴மியா தேலக⁴டம் க³ஹேத்வா க³ச்ச²ந்தம், ‘‘தாத, மா க²லீ’’தி ஸாமிகோ ஆஹ. ஸோ பமாதே³ன க²லித்வா பதித்வா ஸாமிகஸ்ஸ ப⁴யேன பலாயிதும் ஆரத்³தோ⁴. ஸாமிகோ உபதா⁴வித்வா ஸாடககண்ணே அக்³க³ஹேஸி. ஸோ ஸாடகம் ச²ட்³டே³த்வா அசேலகோ ஹுத்வா பலாதோ பண்ணேன வா திணேன வா படிச்சா²தே³தும்பி அஜானந்தோ ஜாதரூபேனேவ ஏகம் கா³மம் பாவிஸி. மனுஸ்ஸா தம் தி³ஸ்வா ‘‘அயம் ஸமணோ அரஹா அப்பிச்சோ², நத்தி² இமினா ஸதி³ஸோ’’தி பூவப⁴த்தாதீ³னி க³ஹேத்வா உபஸங்கமித்வா ‘‘மய்ஹம் ஸாடகம் அனிவத்த²பா⁴வேன இத³ம் உப்பன்ன’’ந்தி ததோ பட்டா²ய ஸாடகம் லபி⁴த்வாபி ந நிவாஸேஸி, ததே³வ ச பப்³ப³ஜ்ஜம் அக்³க³ஹேஸி. தஸ்ஸ ஸந்திகே அஞ்ஞேபி அஞ்ஞேபீதி பஞ்சஸதா மனுஸ்ஸா பப்³ப³ஜிம்ஸு. தம் ஸந்தா⁴யேதம் வுத்தம் – ‘‘மா க²லீதி வசனம் உபாதா³ய ஏவம்லத்³த⁴னாமோ தித்த²கரோ’’தி.

ஸமாக³தட்டா²னேதி த்³வின்னம் நதீ³னம் உத³கப்பவாஹஸ்ஸ ஸன்னிபாதட்டா²னே. த்³வின்னம் உத³கானந்தி த்³வின்னம் உத³கப்பவாஹானம். யதா²வுத்தட்டா²னே மச்ச²க்³க³ஹணத்த²ம் கி²பிதப்³ப³தோ கி²ப்பம், குமினம், ததே³வ இத⁴ கி²ப்பந்தி வுத்தம். தேனாஹ – ‘‘குமின’’ந்தி. உச்சூ²ஹீதி உத³கஉச்சூ²ஹி. துச்ச²புரிஸோ அரியத⁴ம்மாபா⁴வதோ. ஜா²னமத்தம்பி ஹி தஸ்ஸ நத்தே²வ, குதோ அரியமக்³கோ³. மனுஸ்ஸகி²ப்பம் மஞ்ஞேதி மனுஸ்ஸா பதித்வா ப்³யஸனப்பத்திஅத்த²ம் ஓட்டிதம் குமினம் விய. தேனாஹ – ‘‘மஹாஜனஸ்ஸா’’திஆதி³.

312. பஞ்சமாதீ³ஸு பா³ஹிரகஸாஸனந்தி அவிஸேஸேன வுத்தம் – தஸ்ஸ ஸப்³ப³ஸ்ஸபி அனிய்யானிகத்தா ஸத்து²படிஞ்ஞஸ்ஸபி அஸப்³ப³ஞ்ஞுபா⁴வதோ. தேனாஹ – ‘‘தத்த² ஹீ’’திஆதி³. க³ணோதி ஸாவகக³ணோ. ததா²பா⁴வாயாதி ஆசரியேன வுத்தாகாரதாய ஸமங்கி³பா⁴வத்த²ம். ஜங்க⁴ஸதந்தி ப³ஹூ அனேகே ஸத்தே. ஸமகமேவ அகுஸலம் பாபுணாதீதி தேஸம் ஸப்³பே³ஸம் ஏகஜ்ஜ²ம் ஸமாத³பனேபி தேஸம் அகுஸலேன ஸமகமேவ அகுஸலம் பாபுணாதி ஏகஜ்ஜ²ம் ப³ஹூனம் ஸமாத³பனேபி ததா² உஸ்ஸஹனஸ்ஸ ப³லவபா⁴வதோ. விஸும் விஸும் ஸமாத³பனே வத்தப்³ப³மேவ நத்தி². யதா² ஹி த⁴ம்மசரியாயம் ஸமகமேவாதி வத்தப்³பா³ கல்யாணமித்ததா, ஏவம் அத⁴ம்மசரியாயம் அகல்யாணமித்ததாதி.

313. ஸுட்டு² அக்கா²தேதி ஏகந்ததோ நிய்யானிகபா⁴வேன அக்கா²தே. ஸத்தா² ச ஸப்³ப³ஞ்ஞூ ஹோதீதி அஸப்³ப³ஞ்ஞுனோ நிய்யானிகபா⁴வேன கதே²தும் அஸக்குணேய்யத்தா. த⁴ம்மோ ச ஸ்வாக்கா²தோ ஸம்மாஸம்பு³த்³த⁴ப்பவேதி³தத்தா. க³ணோ ச ஸுப்படிபன்னோ ஸத்தா²ரா ஸுவினீதத்தா. ஸமாத³பகோ ஹீதிஆதி³ ஸுப்படிபத்தியா நித³ஸ்ஸனம் த³ட்ட²ப்³ப³ம்.

314. பமாணம் ஜானிதப்³ப³ந்தி ‘‘அயம் ஏத்தகேன யாபேதி, இமஸ்ஸ ஏத்தகம் தா³தும் யுத்த’’ந்தி ஏவம் பமாணம் ஜானிதப்³ப³ம். அதிரேகே…பே… நிப்³பா³னஸம்பத்தி வா நத்தி² து³ரக்கா²தத்தா த⁴ம்மஸ்ஸ. தஸ்ஸாதி படிக்³கா³ஹகஸ்ஸ. அப்பிச்ச²படிபதா³ நாம நத்தி² து³ரக்கா²தே த⁴ம்மவினயேதி அதி⁴ப்பாயோ.

315. தா³யகஸ்ஸ வஸோ நாம உளாருளாரதாபே⁴தோ³ அஜ்ஜா²ஸயோ. தே³ய்யத⁴ம்மஸ்ஸ பன தோ²கப³ஹுதாவ தே³ய்யத⁴ம்மஸ்ஸ வஸோ நாம. அத்தனோ தா²மோதி யாபனப்பமாணம். யதி³ ஹீதிஆதி³ ‘‘கத²’’ந்திஆதி³னா ஸங்கே²பதோ வுத்தஸ்ஸ அத்த²ஸ்ஸ விவரணம். அனுப்பன்னஸ்ஸாதி அனுப்பன்னோ அஸ்ஸ புக்³க³லஸ்ஸ. சக்கு²பூ⁴தோ ஹோதீதி மஹாஜனஸ்ஸ சக்கு² விய ஹோதி. ஸாஸனம் சிரட்டி²திதம் கரோதீதி அனுப்பன்னலாபு⁴ப்பாத³னேன மஹாஜனஸ்ஸ பஸாது³ப்பாத³னேன ச சிரட்டி²திகம் கரோதி.

குடும்ப³ரியவிஹாரேதி குடும்ப³ரியகா³மஸன்னிஸ்ஸிதவிஹாரே. பு⁴ஞ்ஜனத்தா²யாதி தஸ்மிம்யேவ கே³ஹே நிஸீதி³த்வா பு⁴ஞ்ஜனத்தா²ய. க³ஹேத்வா க³மனத்தா²யாதி கே³ஹதோ ப³ஹி க³ஹேத்வா க³மனத்தா²ய. து⁴ரப⁴த்தானீதி நிச்சப⁴த்தானி. சூளுபட்டா²கந்தி வேய்யாவச்சகரம். வீமம்ஸித்வாதி யதா² உத்³தி³ஸ்ஸ கதம் ந ஹோதி, ஏவம் வீமம்ஸித்வா. மஹாஜனோ அப்பிச்சோ² ப⁴விதும் மஞ்ஞதீதி மஹாஜனோ ஸயம் அப்பிச்சோ² ப⁴விதும் மஞ்ஞதி தி³ட்டா²னுக³திம் ஆபஜ்ஜனேன. மஹாஜனஸ்ஸாதி ப³ஹுஜனஸ்ஸ. அவத்த²ரித்வாதி வித்தா²ரிகம் கத்வா.

316. பஞ்சாதபதப்பனம் சதூஸு பஸ்ஸேஸு அக்³கி³ஸந்தாபஸ்ஸ உபரி ஸூரியஸந்தாபஸ்ஸ ச தப்பனம், தஞ்ச கோ² கி³ம்ஹகாலே. சி²ன்னப்பபாதபப்³ப³தஸிக²ரதோ பதனம் மருப்பபாதபதனம். புப்³ப³ண்ஹாதீ³ஸு ஆதி³ச்சாபி⁴முகா²வட்டனம் ஆதி³ச்சானுபரிவத்தனம்.

317. அயம்பீதி ஸ்வாக்கா²தே த⁴ம்மவினயே குஸீதோபி. ஸாமஞ்ஞந்தி தபசரணம். து³ப்பராமட்ட²ந்தி மிச்சா²சரிதம் ஸம்கிலிட்ட²ம். நிரயாயுபகட்³ட⁴தீதி நிரயது³க்கா²ய நம் கட்³ட⁴தி.

318. வுத்தப்பகாரேதி பஞ்சாதபதப்பனாதி³கே வுத்தப்பகாரே.

319. ஏவந்தி வுத்தப்பகாராய சித்தப்பஸாத³வ்ஹயஸுப்படிபத்தியா. தேன ஸமணத⁴ம்மகரணஸுக²ஞ்ச ஸங்க³ண்ஹாதி.

320. நவகனிபாதேதி இமஸ்மிம்யேவ அங்கு³த்தரனிகாயே வக்க²மானம் நவகனிபாதம் ஸந்தா⁴யாஹ. நவ புக்³க³லாதி ஸத்தக்க²த்துபரமகோலம்கோலாத³யோ நவ புக்³க³லா. ஸப்³ப³த்தா²தி இமஸ்மிம் ஸுத்தே வுத்தாவஸிட்டே²ஸு ஸப்³பே³ஸு ஸுத்தேஸு.

ததியவக்³க³வண்ணனா நிட்டி²தா.