14. ஏதத³க்³க³வக்³கோ³

(14) 7. ஸத்தமஏதத³க்³க³வக்³க³வண்ணனா

ஸுஜாதாவத்து²

258. உபாஸிகாபாளிஸம்வண்ணனாய பட²மம் ஸுவிஞ்ஞேய்யமேவ.

விஸாகா²வத்து²

259. து³தியே மஹாலதாபஸாத⁴னஸ்ஸாதி மஹாலதாபிளந்த⁴னஸ்ஸ. தஸ்மிஞ்ச பிளந்த⁴னே சதஸ்ஸோ வஜிரனாளியோ உபயோக³ம் அக³மம்ஸு. முத்தானம் ஏகாத³ஸ நாளியோ, பவாளஸ்ஸ த்³வாவீஸதி நாளியோ, பது³மராக³மணீனம் தேத்திம்ஸ நாளியோ. இதி ஏதேஹி ச அஞ்ஞேஹி ச இந்த³னீலாதீ³ஹி நீலபீதலோஹிதோதா³தமஞ்ஜிட்ட²ஸாமகப³ரவண்ணவஸேன ஸத்தவண்ணேஹி வரரதனேஹி நிட்டா²னம் அக³மாஸி, தம் ஸீஸே படிமுக்கம் யாவ பாத³பிட்டி²யா ப⁴ஸ்ஸதி, பஞ்சன்னம் ஹத்தீ²னம் ப³லம் தா⁴ரயமானாவ நம் இத்தீ² தா⁴ரேதும் ஸக்கோதி. அந்தோஅக்³கி³ ப³ஹி ந நீஹரிதப்³போ³திஆதீ³னம் அத்தோ² உபரி ஆவி ப⁴விஸ்ஸதி. ஸேஸமேத்த² ஸுவிஞ்ஞேய்யமேவ.

கு²ஜ்ஜுத்தரா-ஸாமாவதீவத்து²

260-261. ததியசதுத்தே²ஸு பாயாஸஸ்ஸாதி ப³ஹலதரஸ்ஸ பாயாஸஸ்ஸ. தம் பாயாஸம் பு⁴ஞ்ஜந்தேஸூதி தம் ப³ஹலதரம் க³ருஸினித்³த⁴ம் பாயாஸம் பு⁴ஞ்ஜந்தேஸு. ஜீராபேதும் அஸக்கோந்தோதி அந்தராமக்³கே³ அப்பாஹாரதாய மந்த³க³ஹணிகத்தா ஜீராபேதும் அஸக்கோந்தோ. வாளமிக³ட்டா²னேதி வாளமிகே³ஹி அதி⁴ட்டி²தட்டா²னே. அனுவிஜ்ஜந்தோதி விசாரேந்தோ. ஸாலாதி நளகாரஸாலா. முதா⁴ ந கரிஸ்ஸதீதி மூல்யம் வினா ந கரிஸ்ஸதி. ஆலிம்பேஸீதி அக்³கி³ம் அதா³ஸி, அக்³கி³ம் ஜாலேஸீதி அத்தோ². பேக்கா²தி ஆக³மேஹி. உபதி⁴ஸம்பதா³தி ஸரீரஸம்பத்தி. வடருக்க²ம் பத்வாதி நிக்³ரோத⁴ருக்க²ம் பத்வா. ஸுவண்ணகடகேதி ஸுவண்ணவலயே. அப்³பு⁴ம் மேதி மே அவட்³டீ⁴தி அத்தோ². அந்தோ அஸோதே⁴த்வாதி பண்ணஸாலாய அந்தோ கஸ்ஸசி அத்தி²பா⁴வம் வா நத்தி²பா⁴வம் வா அனுபதா⁴ரேத்வா. ஸேஸம் ஸுவிஞ்ஞேய்யமேவ.

உத்தரானந்த³மாதாவத்து²

262. பஞ்சமே உபனிஸ்ஸயம் தி³ஸ்வாதி இமினா யதா² விஸேஸாதி⁴க³மஸ்ஸ ஸதிபி பச்சுப்பன்னபச்சயஸமவாயே அவஸ்ஸம் உபனிஸ்ஸயஸம்பதா³ இச்சி²தப்³பா³, ஏவம் தி³ட்ட²த⁴ம்மவேத³னீயபா⁴வேன விபச்சனகஸ்ஸ கம்மஸ்ஸபி பச்சுப்பன்னஸமவாயோ விய உபனிஸ்ஸயஸம்பதா³பி ஸவிஸேஸா இச்சி²தப்³பா³தி த³ஸ்ஸேதி. ததா² ஹி உக்கம்ஸக³தஸப்புரிஸூபனிஸ்ஸயயோனிஸோமனஸிகாரேஸு லப்³ப⁴மானேஸுபி உபனிஸ்ஸயரஹிதஸ்ஸ விஸேஸாதி⁴க³மோ ந ஸம்பஜ்ஜதேவாதி. கப்பியம் கத்வாதி யதா² கப்பியம் ஹோதி, ததா² கத்வா. பத்தே பதிட்ட²பேய்யாதி ஆஹாரம் தா³னமுகே² விஸ்ஸஜ்ஜேய்ய. தீஹி சேதனாஹீதி புப்³ப³பா⁴க³முஞ்சஅனுமோத³னாசேதனாஹி. வுத்தஞ்ஹேதம் –

‘‘புப்³பே³வ தா³னா ஸுமனோ, த³த³ம் சித்தம் பஸாத³யே;

த³த்வா அத்தமனோ ஹோதி, ஏஸா புஞ்ஞஸ்ஸ ஸம்பதா³’’தி. (அ. நி. 6.37; பே. வ. 305);

தவ மனம் ஸந்தா⁴ரேஹீதி ‘‘அஜ்ஜ ப⁴த்தம் சிராயித’’ந்தி கோத⁴தோ தவ சித்தம் ஸந்தா⁴ரேஹி, மா குஜ்ஜீ²தி அத்தோ². ஓலோகிதோலோகிதட்டா²னம்…பே… ஸம்பரிகிண்ணம் விய அஹோஸீதி தேன கஸிதட்டா²னம் ஸப்³ப³ம் ஸுவண்ணபா⁴வாபத்தியா மஹாகோஸாதகிபுப்பே²ஹி ஸஞ்ச²ன்னம் விய அஹோஸி. தாதி³ஸேதி தயா ஸதி³ஸே. ந கோபேமீதி ந வினாஸேமி, ஜாதியா ந ஹீளேமி. பூஜம் கரோதீதி ஸம்மாஸம்பு³த்³த⁴ஸ்ஸ பூஜம் கரோதி. அந்தரவத்து²ந்தி கே³ஹங்க³ணம். போ⁴தி ஸம்போ³த⁴னே நிபாதோ. ஜேதி அவஞ்ஞாலபனம். ஸயம் அரியஸாவிகாபா⁴வதோ ஸத்து²வஸேன ‘‘ஸபிதிகா தீ⁴தா’’தி வத்வா ஸத்து² ஸம்முகா² த⁴ம்மஸ்ஸவனேன தஸ்ஸா விஸேஸாதி⁴க³மம் பச்சாஸீஸந்தீ ‘‘த³ஸப³லே க²மந்தேயேவ க²மிஸ்ஸாமீ’’தி ஆஹ. கத³ரியந்தி த²த்³த⁴மச்ச²ரிம்.

ஸுப்பவாஸாவத்து²

263. ச²ட்டே² பணீததா³யிகானந்தி பணீதரஸவத்தூ²னம் தா³யிகானம். ஆயுனோ டி²திஹேதும் போ⁴ஜனம் தே³ந்தீ ஆயும் தே³தி நாம. ஏஸ நயோ வண்ணம் தே³தீதிஆதீ³ஸு. தேனாஹ – ‘‘பஞ்ச டா²னானீ’’தி. கம்மஸரிக்க²கஞ்சேதம் ப²லந்தி த³ஸ்ஸேந்தோ ‘‘ஆயும் கோ² பன த³த்வா’’திஆதி³மாஹ. தத்த² த³த்வாதி தா³னஹேது. பா⁴கி³னீதி பா⁴க³வதீ லத்³து⁴ம் ப⁴ப்³பா³.

ஸுப்பியாவத்து²

264. ஸத்தமே ஊருமம்ஸம் சி²ந்தி³த்வா தா³ஸியா அதா³ஸீதி ஆக³தப²லா விஞ்ஞாதஸாஸனா அரியஸாவிகா அத்தனோ ஸரீரது³க்க²ம் அசிந்தேத்வா தஸ்ஸ பி⁴க்கு²னோ ரோக³வூபஸமமேவ பச்சாஸீஸந்தீ அத்தனோ ஊருமம்ஸம் சி²ந்தி³த்வா தா³ஸியா அதா³ஸி. ஸத்தா²பி தஸ்ஸா ததா²பவத்தம் அஜ்ஜா²ஸயஸம்பத்திம் தி³ஸ்வா ‘‘மம ஸம்முகீ²பா⁴வூபக³மனேனேவஸ்ஸா வணோ ருஹித்வா ஸஞ்ச²வி ஜாயதி, பா²ஸுபா⁴வோ ஹோதீ’’தி ச தி³ஸ்வா ‘‘பக்கோஸத² ந’’ந்தி ஆஹ. ஸா சிந்தேஸீதி ‘‘ஸப்³ப³லோகஸ்ஸ ஹிதானுகம்பகோ ஸத்தா² ந மம் து³க்கா²பேதும் பக்கோஸதி, அத்தே²த்த² காரண’’ந்தி சிந்தேஸி. அத்தனா கதகாரணம் ஸப்³ப³ம் கதே²ஸீதி பு³த்³தா⁴னுபா⁴வவிபா⁴வனத்த²ம் கதே²ஸி, ந அத்தனோ த³ள்ஹஜ்ஜா²ஸயதாய விபா⁴வனத்த²ம். கி³லானுபட்டா²கீனம் அக்³க³ட்டா²னே ட²பேஸீதி அக³ணிதத்தது³க்கா² கி³லானானம் பி⁴க்கூ²னம் கே³லஞ்ஞவூபஸமனே யுத்தப்பயுத்தாதி கி³லானுபட்டா²கீனம் அக்³க³ட்டா²னே ட²பேஸீதி.

காதியானீவத்து²

265. அட்ட²மே அவேச்சப்பஸன்னானந்தி ரதனத்தயகு³ணே யாதா²வதோ ஞத்வா பஸன்னானம், ஸோ பனஸ்ஸ பஸாதோ³ மக்³கே³னாக³தத்தா கேனசி அகம்பனீயோ. அதி⁴க³தேனாதி மக்³கா³தி⁴க³மேனேவ அதி⁴க³தேன. ‘‘அவிக³தேனா’’தி வா பாடோ², தஸ்ஸத்தோ² ‘‘கதா³சி அவிக³ச்ச²ந்தேனா’’தி. ஸோ அப்பத⁴ம்ஸியோ ச ஹோதி, தஸ்மா வுத்தம் – ‘‘அதி⁴க³தேன அசலப்பஸாதே³னா’’தி. தத்த² காயஸக்கி²ம் கத்வாதி பமுக²ம் கத்வா, வசனத்த²தோ பன நாமகாயேன தே³ஸனாய ஸம்படிச்ச²னவஸேன ஸக்கி²பூ⁴தம் கத்வாதி அத்தோ². உம்மக்³க³ம் க²னித்வாதி க⁴ரஸந்தி⁴ச்சே²த³னேன அந்தோபவிஸனமக்³க³ம் க²னித்வா. து³ல்லப⁴ஸ்ஸவனந்தி து³ல்லப⁴ஸத்³த⁴ம்மஸ்ஸவனம். மஹாபத²வீ பவிஸிதப்³பா³ ப⁴வேய்யாதி அவீசிப்பவேஸனம் வத³தி.

நகுலமாதாவத்து²

266. நவமே விஸ்ஸாஸகத²னேனேவ நகுலமாதா நகுலபிதா ச ஸத்து²விஸ்ஸாஸிகா நாம ஜாதாதி வுத்தம் – ‘‘விஸ்ஸாஸிகானந்தி விஸ்ஸாஸகத²ம் கதே²ந்தீனம் உபாஸிகான’’ந்தி. க³ஹபதானீதி கே³ஹஸாமினீ. வுத்தமேவாதி உபாஸகபாளியம் நகுலபிதுகதா²யம் வுத்தனயமேவ.

காளீகுரரக⁴ரிகாவத்து²

267. த³ஸமே அனுஸ்ஸவேனேவாதி பச்சக்க²தோ ரூபத³ஸ்ஸனேன ஸத்து² ஸம்முகா² த⁴ம்மஸ்ஸவனேன ச வினா கேவலம் அனுஸ்ஸவனேனேவ பரஸ்ஸ வசனம் அனுக³தஸ்ஸவனேனேவ உப்பன்னேன பஸாதே³ன. அனுஸ்ஸவிகப்பஸாத³ந்தி அனுஸ்ஸவதோ ஆக³தப்பஸாத³ம்.

(ஸத்தமஏதத³க்³க³வக்³க³வண்ணனா நிட்டி²தா.)

உபாஸிகாபாளிஸம்வண்ணனா ஸமத்தா.

நிட்டி²தா ச மனோரத²பூரணியா

அங்கு³த்தரனிகாய-அட்ட²கதா²ய

ஏதத³க்³க³வக்³க³வண்ணனாய அனுத்தானத்த²தீ³பனா.