15. அட்டா²னபாளி (பட²மவக்³க³)

(15) 1. அட்டா²னபாளி-பட²மவக்³க³வண்ணனா

268. அட்டா²னபாளிவண்ணனாயம் அவிஜ்ஜமானம் டா²னம் அட்டா²னம், நத்தி² டா²னந்தி வா அட்டா²னம். அனவகாஸோதி ஏத்தா²பி ஏஸேவ நயோ. தத³த்த²னிக³மனமேவ ஹி ‘‘நேதம் டா²னம் விஜ்ஜதீ’’தி வசனந்தி. தேனாஹ – ‘‘உப⁴யேனபீ’’திஆதி³. யந்தி காரணத்தே² பச்சத்தவசனம். ஹேதுஅத்தோ² சேத்த² காரணத்தோ²தி ஆஹ – ‘‘யந்தி யேன காரணேனா’’தி. உக்கட்ட²னித்³தே³ஸேனேத்த² தி³ட்டி²ஸம்பத்தி வேதி³தப்³பா³தி வுத்தம் – ‘‘மக்³க³தி³ட்டி²யா ஸம்பன்னோ’’தி. குதோ பனாயமத்தோ² லப்³ப⁴தீதி? லிங்க³தோ, லிங்க³ம் சேதஸ்ஸ நிச்சதோ உபக³மனப்படிக்கே²போ. சதுபூ⁴மகேஸூதி இத³ம் சதுத்த²பூ⁴மகஸங்கா²ரானம் அரியஸாவகஸ்ஸ விஸயபா⁴வூபக³மனதோ வுத்தம், ந பன தே ஆரப்³ப⁴ நிச்சதோ உபக³மனஸப்³பா⁴வதோ. வக்க²தி ஹி ‘‘தத³பா⁴வே சதுத்த²பூ⁴மகஸங்கா²ரா பனா’’திஆதி³னா. அபி⁴ஸங்க²தஸங்கா²ரஅபி⁴ஸங்க²ரணகஸங்கா²ரானம் ஸப்பதே³ஸத்தா நிப்பதே³ஸஸங்கா²ரக்³க³ஹணத்த²ம் ‘‘ஸங்க²தஸங்கா²ரேஸூ’’தி வுத்தம், லோகுத்தரஸங்கா²ரானம் பன நிவத்தனே காரணம் ஸயமேவ வக்க²தி. ஏதம் காரணம் நத்தீ²தி ததா² உபக³மனே ஸேதுகா⁴தோ நத்தி². தேஜுஸ்ஸத³த்தாதி ஸம்கிலேஸவித⁴மனதேஜஸ்ஸ அதி⁴கபா⁴வதோ. ததா² ஹி தே க³ம்பீ⁴ரபா⁴வேன து³த்³த³ஸா அகுஸலானம் ஆரம்மணம் ந ஹோந்தீதி. இத³ம் பன பகரணவஸேன வுத்தம். அப்பஹீனவிபல்லாஸானஞ்ஹி ஸந்தானேஸு குஸலத⁴ம்மானம்பி தே ஆரம்மணம் ந ஹோந்தி.

269. அஸுகே² ஸுக²ந்தி விபல்லாஸோ ச இத⁴ ஸுக²தோ உபக³மனஸ்ஸ டா²னந்தி த³ஸ்ஸேந்தோ ‘‘ஏகந்த…பே… அத்ததி³ட்டி²வஸேனா’’தி பதா⁴னதி³ட்டி²மாஹ. கூ³த²ந்தி கூ³த²ட்டா²னம், தி³ட்டி²யா நிப்³பா³னஸ்ஸ அவிஸயபா⁴வோ ஹேட்டா² வுத்தோ ஏவாதி கஸிணாதி³பண்ணத்திஸங்க³ஹத்த²ந்தி வுத்தம்.

270. பரிச்சே²தோ³தி பரிச்சி²ந்த³னம் பரிச்சி²ஜ்ஜ தஸ்ஸ க³ஹணம். ஸ்வாயம் யேஸு நிச்சாதி³தோ உபக³மனம் ஸம்ப⁴வதி, தேஸம் வஸேனயேவ காதப்³போ³தி த³ஸ்ஸேந்தோ ‘‘ஸப்³ப³வாரேஸு வா’’திஆதி³மாஹ. ஸப்³ப³வாரேஸூதி ‘‘நிச்சதோ உபக³ச்சே²ய்யா’’திஆதி³னா ஆக³தேஸு ஸப்³பே³ஸு ஸுத்தபதே³ஸு. புது²ஜ்ஜனோ ஹீதி ஹி-ஸத்³தோ³ ஹேதுஅத்தோ². யஸ்மா யம் யம் ஸங்கா²ரம் புது²ஜ்ஜனோ நிச்சாதி³வஸேன க³ண்ஹாதி, தம் தம் அரியஸாவகோ அனிச்சாதி³வஸேன க³ண்ஹந்தோ யாதா²வதோ ஜானந்தோ தம் கா³ஹம் தம் தி³ட்டி²ம் விஸ்ஸஜ்ஜேதி, தஸ்மா யத்த² கா³ஹோ, தத்த² விஸ்ஸஜ்ஜனாதி சதுபூ⁴மகஸங்கா²ரா இத⁴ ஸங்கா²ரக்³க³ஹணேன ந க³ய்ஹந்தீதி அத்தோ².

271. புத்தஸம்ப³ந்தே⁴ன மாதுபிதுஸமஞ்ஞா த³த்தகித்திமாதி³வஸேனபி புத்தவோஹாரோ லோகே தி³ஸ்ஸதி, ஸோ ச கோ² பரியாயேனாதி நிப்பரியாயேன ஸித்³த⁴ம் தம் த³ஸ்ஸேதும் – ‘‘ஜனிகாவ மாதா, ஜனகோவ பிதா’’தி வுத்தம். ததா² ஆனந்தரியகம்மஸ்ஸ அதி⁴ப்பேதத்தா ‘‘மனுஸ்ஸபூ⁴தோவ கீ²ணாஸவோ அரஹாதி அதி⁴ப்பேதோ’’தி வுத்தம். ‘‘அட்டா²னமேத’’ந்திஆதி³னா ‘‘மாதுஆதீ³னம்யேவ ஜீவிதா வோரோபனே அரியஸாவகஸ்ஸ அப⁴ப்³ப³பா⁴வத³ஸ்ஸனதோ தத³ஞ்ஞம் அரியஸாவகோ ஜீவிதா வோரோபேதீதி இத³ம் அத்த²தோ ஆபன்னமேவா’’தி மஞ்ஞமானோ வத³தி – ‘‘கிம் பன அரியஸாவகோ அஞ்ஞம் ஜீவிதா வோரோபேய்யா’’தி? ‘‘அட்டா²னமேதம் அனவகாஸோ, யம் தி³ட்டி²ஸம்பன்னோ புக்³க³லோ ஸஞ்சிச்ச பாணம் ஜீவிதா வோரோபேய்ய, நேதம் டா²னம் விஜ்ஜதீ’’தி வசனதோ ‘‘ஏதம்பி அட்டா²ன’’ந்தி வுத்தம். தேனேவாஹ – ‘‘ஸசே ஹீ’’திஆதி³. ஏவம் ஸந்தே கஸ்மா ‘‘மாதர’’ந்திஆதி³னா விஸேஸேத்வா வுத்தந்தி ஆஹ – ‘‘புது²ஜ்ஜனபா⁴வஸ்ஸ பனா’’திஆதி³. தத்த² ப³லதீ³பனத்த²ந்தி ஸத்³தா⁴தி³ப³லஸமன்னாக³மதீ³பனத்த²ம். அரியமக்³கே³னாக³தஸத்³தா⁴தி⁴ப³லவஸேன ஹி அரியஸாவகோ தாதி³ஸம் ஸாவஜ்ஜம் ந கரோதி.

275. பஞ்சஹி காரணேஹீதி இத³மேத்த² நிப்பா²த³கானி தேஸம் புப்³ப³பா⁴கி³யானி ச காரணானி காரணபா⁴வஸாமஞ்ஞேன ஏகஜ்ஜ²ம் க³ஹேத்வா வுத்தம், ந பன ஸப்³பே³ஸம் ஸமானயோக³க்க²மத்தா. ஆகாரேஹீதி காரணேஹி. அனுஸ்ஸாவனேனாதி அனுரூபம் ஸாவனேன. பே⁴த³ஸ்ஸ அனுரூபம் யதா² பே⁴தோ³ ஹோதி, ஏவம் பி⁴ந்தி³தப்³பா³னம் பி⁴க்கூ²னம் அத்தனோ வசனஸ்ஸ ஸாவனேன விஞ்ஞாபனேன. தேனாஹ – ‘‘நனு தும்ஹே’’திஆதி³. கண்ணமூலே வசீபே⁴த³ம் கத்வாதி ஏதேன பாகடம் கத்வா பே⁴த³கரவத்து²தீ³பனம் வோஹாரோ, தத்த² அத்தனோ நிச்சி²தமத்த²ம் ரஹஸ்ஸவஸேன விஞ்ஞாபனம் அனுஸ்ஸாவனந்தி த³ஸ்ஸேதி.

கம்மமேவ உத்³தே³ஸோ வா பமாணந்தி தேஹி ஸங்க⁴பே⁴த³ஸித்³தி⁴தோ வுத்தம், இதரே பன தேஸம் ஸம்பா⁴ரபூ⁴தா. தேனாஹ – ‘‘வோஹாரா’’திஆதி³. தத்தா²தி வோஹரணே. சுதிஅனந்தரம் ப²லம் அனந்தரம் நாம, தஸ்மிம் அனந்தரே நியுத்தானி, தன்னிப்³ப³த்தனேன அனந்தரகரணஸீலானி, அனந்தரப்பயோஜனானி சாதி ஆனந்தரியானி, தானி ஏவ கம்மானீதி ஆனந்தரியகம்மானி.

கம்மதோதி ‘‘ஏவம் ஆனந்தரியகம்மம் ஹோதி, ஏவம் ஆனந்தரியகம்மஸதி³ஸ’’ந்தி ஏவம் கம்மவிபா⁴க³தோ. த்³வாரதோதி காயத்³வாரதோ. கப்பட்டி²தியதோதி ‘‘இத³ம் கப்பட்டி²தியவிபாகம், இத³ம் ந கப்பட்டி²தியவிபாக’’ந்தி ஏவம் கப்பட்டி²தியவிபா⁴க³தோ. பாகஸாதா⁴ரணாதீ³ஹீதி ‘‘இத³மேத்த² விபச்சதி, இத³ம் ந விபச்சதீ’’தி விபச்சனவிபா⁴க³தோ, க³ஹட்ட²பப்³ப³ஜிதானம் ஸாதா⁴ரணாஸாதா⁴ரணதோ, ஆதி³-ஸத்³தே³ன வேத³னாதி³விபா⁴க³தோ ச.

கம்மதோ தாவ வினிச்ச²யோ வுச்சதீதி ஸம்ப³ந்தோ⁴. யஸ்மா மனுஸ்ஸத்தபா⁴வே டி²தஸ்ஸேவ குஸலத⁴ம்மானம் திக்க²விஸத³பா⁴வாபத்தி, யதா² திண்ணம் போ³தி⁴ஸத்தானம் போ³தி⁴த்தயனிப்³ப³த்தியம், ஏவம் மனுஸ்ஸபா⁴வே டி²தஸ்ஸேவ ஏதி³ஸானம் அகுஸலத⁴ம்மானம்பி திக்க²விஸத³பா⁴வாபத்தீதி ஆஹ – ‘‘மனுஸ்ஸபூ⁴தஸ்ஸேவா’’தி. பாகதிகமனுஸ்ஸானம்பி ச குஸலத⁴ம்மானம் விஸேஸப்பத்தி விமானவத்து²அட்ட²கதா²யம் வுத்தனயேனேவ வேதி³தப்³பா³. யதா²வுத்தோ ச அத்தோ² ஸமானஜாதியஸ்ஸ விகோபனே க³ருதரோ, ந ததா² விஜாதியஸ்ஸாதி வுத்தம் – ‘‘மனுஸ்ஸபூ⁴தம் மாதரம் வா பிதரம் வா’’தி. லிங்க³பரிவத்தே ச ஸோ ஏவ ஏககம்மனிப்³ப³த்தோ ப⁴வங்க³ப்பப³ந்தோ⁴ ஜீவிதிந்த்³ரியபப³ந்தோ⁴ ச, ந அஞ்ஞோதி ஆஹ – ‘‘அபி பரிவத்தலிங்க³’’ந்தி. அரஹத்தம் பத்தேபி ஏஸேவ நயோ. தஸ்ஸ விபாகந்திஆதி³ கம்மஸ்ஸ ஆனந்தரியபா⁴வஸமத்த²னம். சதுக்கோடியஞ்சேத்த² ஸம்ப⁴வதி. தத்த² பட²மா கோடி த³ஸ்ஸிதா, இதராஸு விஸங்கேதபா⁴வம் த³ஸ்ஸேதும் – ‘‘யோ பனா’’திஆதி³ வுத்தம். யதி³பி தத்த² விஸங்கேதோ, கம்மம் பன க³ருதரம் ஆனந்தரியஸதி³ஸம் பா⁴யிதப்³ப³ந்தி ஆஹ – ‘‘பா⁴ரியம்…பே… திட்ட²தீ’’தி. அயம் பஞ்ஹோதி ஞாபனிச்சா²னிப்³ப³த்தா கதா².

அபி⁴ஸந்தி⁴னாதி அதி⁴ப்பாயேன. ஆனந்தரியம் பு²ஸதீதி மரணாதி⁴ப்பாயேனேவ ஆனந்தரியவத்து²னோ விகோபிதத்தா வுத்தம். ஆனந்தரியம் ந பு²ஸதீதி ஆனந்தரியவத்து²அபா⁴வதோ ஆனந்தரியம் ந ஹோதி. ஸப்³ப³த்த² ஹி புரிமம் அபி⁴ஸந்தி⁴சித்தம் அப்பமாணம், வத⁴கசித்தம் பன ததா³ரம்மணம் ஜீவிதிந்த்³ரியஞ்ச ஆனந்தரியபா⁴வே பமாணந்தி த³ட்ட²ப்³ப³ம். ஸங்கா³மசதுக்கம் ஸம்பத்தவஸேன யோஜேதப்³ப³ம். யோ ஹி பரஸேனாய அஞ்ஞஞ்ச யோத⁴ம் பிதரஞ்ச கம்மம் கரோந்தே தி³ஸ்வா யோத⁴ஸ்ஸ உஸும் கி²பதி ‘‘ஏதம் விஜ்ஜி²த்வா மம பிதரம் விஜ்ஜி²ஸ்ஸதீ’’தி, யதா²தி⁴ப்பாயம் க³தே பிதுகா⁴தகோ ஹோதி. ‘‘யோதே⁴ வித்³தே⁴ மம பிதா பலாயிஸ்ஸதீ’’தி கி²பதி, உஸும் அயதா²தி⁴ப்பாயம் க³ந்த்வா பிதரம் மாரேதி, வோஹாரவஸேன பிதுகா⁴தகோதி வுச்சதி, ஆனந்தரியம் பன நத்தீ²தி. சோரசதுக்கம் பன யோ ‘‘சோரம் மாரேஸ்ஸாமீ’’தி சோரவேஸேன க³ச்ச²ந்தம் பிதரம் மாரேதி, ஆனந்தரியம் பு²ஸதீதிஆதி³னா யோஜேதப்³ப³ம். தேனேவாதி தேனேவ பயோகே³ன. அரஹந்தகா⁴தகோ ஹோதியேவாதி அரஹதோ மாரிதத்தா வுத்தம், புது²ஜ்ஜனஸ்ஸேவ தம் தி³ன்னம் ஹோதீதி ஏத்தா²யமதி⁴ப்பாயோ – யதா² வத⁴கசேதனா பச்சுப்பன்னாரம்மணாபி பப³ந்த⁴விச்சே²த³னவஸேன ஜீவிதிந்த்³ரியம் ஆரம்மணம் கத்வா பவத்ததி, ந ஏவம் சாக³சேதனா. ஸா ஹி சஜிதப்³ப³வத்து²ம் ஆரம்மணம் கத்வா சஜனமத்தமேவ ஹோதி, அஞ்ஞஸந்தகபா⁴வகரணஞ்ச தஸ்ஸ சஜனம், தஸ்மா யஸ்ஸ தம் ஸந்தகம் கதம், தஸ்ஸேவ தி³ன்னம் ஹோதீதி.

லோஹிதம் ஸமோஸரதீதி அபி⁴கா⁴தேன பகுப்பமானம் ஸஞ்சிதம் ஹோதி. மஹந்ததரந்தி க³ருதரம். ஸரீரப்படிஜக்³க³னே வியாதி ஸத்து²ரூபகாயப்படிஜக்³க³னே விய.

அஸன்னிபதிதேதி இத³ம் ஸாமக்³கி³யதீ³பனம். பே⁴தோ³ ச ஹோதீதி ஸங்க⁴ஸ்ஸ பே⁴தோ³ ச ஹோதி. வட்டதீதி ஸஞ்ஞாயாதி ‘‘ஈதி³ஸம் கரணம் ஸங்க⁴பே⁴தா³ய ந ஹோதீ’’தி ஸஞ்ஞாய. ததா² நவதோ ஊனபரிஸாயாதி நவதோ ஊனபரிஸாய கரோந்தஸ்ஸ ததா²தி யோஜேதப்³ப³ம். ததா²தி ச இமினா ‘‘ந ஆனந்தரியகம்ம’’ந்தி இமம் ஆகட்³ட⁴தி, ந பன ‘‘பே⁴தோ³வ ஹோதீ’’தி இத³ம். ஹேட்டி²மந்தேன ஹி நவன்னமேவ வஸேன ஸங்க⁴பே⁴தோ³. த⁴ம்மவாதி³னோ அனவஜ்ஜாதி யதா²த⁴ம்மம் அனவட்டா²னதோ. ஸங்க⁴பே⁴த³ஸ்ஸ புப்³ப³பா⁴கோ³ ஸங்க⁴ராஜி.

காயத்³வாரமேவ பூரேந்தி காயகம்மபா⁴வேனேவ லக்கி²தப்³ப³தோ. ஸண்ட²ஹந்தேஹி கப்பே…பே… முச்சதீதி இத³ம் கப்பட்ட²கதா²ய (கதா². 654 ஆத³யோ) ந ஸமேதி. தத்த² ஹி அட்ட²கதா²ய (கதா². அட்ட². 654-657) வுத்தம் – ‘‘ஆபாயிகோதி இத³ம் ஸுத்தம் யம் ஸோ ஏகம் கப்பம் அஸீதிபா⁴கே³ கத்வா ததோ ஏகபா⁴க³மத்தம் காலம் திட்டே²ய்ய, தம் ஆயுகப்பம் ஸந்தா⁴ய வுத்த’’ந்தி. கப்பவினாஸேயேவாதி ச ஆயுகப்பவினாஸே ஏவாதி அத்தே² ஸதி நத்தி² விரோதோ⁴. ஏத்த² ச ஸண்ட²ஹந்தேதி இத³ம்பி ‘‘ஸ்வேவ வினஸ்ஸிஸ்ஸதீ’’தி விய அபூ⁴தபரிகப்பவஸேன வுத்தம். ஏகதி³வஸமேவ நிரயே பச்சதி, ததோ பரம் கப்பாபா⁴வே ஆயுகப்பஸ்ஸபி அபா⁴வதோதி அவிரோத⁴தோ அத்த²யோஜனா த³ட்ட²ப்³பா³. ஸேஸானீதி ஸங்க⁴பே⁴த³தோ அஞ்ஞானி ஆனந்தரியகம்மானி.

யதி³ தானி அஹோஸிகம்மஸங்க²ம் க³ச்ச²ந்தி, ஏவம் ஸதி கத²ம் நேஸம் ஆனந்தரியதா சுதிஅனந்தரம் விபாகதா³னாபா⁴வதோ. அத² ஸதி ப²லதா³னே சுதிஅனந்தரோ ஏவ ஏதேஸம் ப²லகாலோ, ந அஞ்ஞோதி ப²லகாலனியமேன நியததா இச்சி²தா, ந ப²லதா³னனியமேன. ஏவம்பி நியதப²லகாலானம் அஞ்ஞேஸம்பி உபபஜ்ஜவேத³னீயானம் தி³ட்ட²த⁴ம்மவேத³னீயானஞ்ச நியததா ஆபஜ்ஜேய்ய, தஸ்மா விபாகத⁴ம்மத⁴ம்மானம் பச்சயந்தரவிகலதாதீ³ஹி அவிபச்சமானானம்பி அத்தனோ ஸபா⁴வேன விபாகத⁴ம்மதா விய ப³லவதா ஆனந்தரியேன விபாகே தி³ன்னே அவிபச்சமானானம்பி ஆனந்தரியானம் ப²லதா³னே நியதஸபா⁴வா ஆனந்தரியஸபா⁴வா ச பவத்தீதி அத்தனோ ஸபா⁴வேன ப²லதா³னனியமேனேவ நியதா ஆனந்தரியதா ச வேதி³தப்³பா³. அவஸ்ஸஞ்ச ஆனந்தரியஸபா⁴வா ததோ ஏவ நியதஸபா⁴வா ச தேஸம் பவத்தீதி ஸம்படிச்சி²தப்³ப³மேதம், அஞ்ஞஸ்ஸ ப³லவதோ ஆனந்தரியஸ்ஸ அபா⁴வே ஸதி சுதிஅனந்தரம் ஏகந்தேன ப²லதா³னதோ.

நனு ஏவம் அஞ்ஞேஸம்பி உபபஜ்ஜவேத³னீயானம் அஞ்ஞஸ்மிம் விபாகதா³யகே அஸதி சுதிஅனந்தரமேவ ஏகந்தேன ப²லதா³னதோ நியதஸபா⁴வா ஆனந்தரியஸபா⁴வா ச பவத்தி ஆபஜ்ஜதீதி? நாபஜ்ஜதி அஸமானஜாதிகேன சேதோபணிதி⁴வஸேன உபகா⁴தகேன ச நிவத்தேதப்³ப³விபாகத்தா அனந்தரே ஏகந்தப²லதா³யகத்தாபா⁴வா, ந பன ஆனந்தரியானம் பட²மஜ்ஜா²னாதீ³னம் து³தியஜ்ஜா²னாதீ³னி விய அஸமானஜாதிகம் ப²லனிவத்தகம் அத்தி² ஸப்³பா³னந்தரியானம் அவீசிப²லத்தா, ந ச ஹேட்டூ²பபத்திம் இச்ச²தோ ஸீலவதோ சேதோபணிதி⁴ விய உபரூபபத்திஜனககம்மப²லம் ஆனந்தரியப²லம் நிவத்தேதும் ஸமத்தோ² சேதோபணிதி⁴ அத்தி² அனிச்ச²ந்தஸ்ஸேவ அவீசிபாதனதோ, ந ச ஆனந்தரியோபகா⁴தகம் கிஞ்சி கம்மம் அத்தி², தஸ்மா தேஸம்யேவ அனந்தரே ஏகந்தவிபாகஜனகஸபா⁴வா பவத்தீதி. அனேகானி ச ஆனந்தரியானி கதானி ஏகந்தேன விபாகே நியதஸபா⁴வத்தா உபரதாவிபச்சனஸபா⁴வாஸங்கத்தா நிச்சி²தானி ஸபா⁴வதோ நியதானேவ. தேஸு பன ஸமானஸபா⁴வேஸு ஏகேன விபாகே தி³ன்னே இதரானி அத்தனா கத்தப்³ப³கிச்சஸ்ஸ தேனேவ கதத்தா ந து³தியம் ததியம்பி ச படிஸந்தி⁴ம் கரோந்தி, ந ஸமத்த²தாவிகா⁴தத்தாதி நத்தி² தேஸம் ஆனந்தரியகதானிவத்தி, க³ருக³ருதரபா⁴வோ பன தேஸம் லப்³ப⁴தேவாதி ஸங்க⁴பே⁴த³ஸ்ஸ ஸியா க³ருதரபா⁴வோதி ‘‘யேன…பே… விபச்சதீ’’தி ஆஹ. ஏகஸ்ஸ பன அஞ்ஞானி உபத்த²ம்ப⁴கானி ஹோந்தீதி த³ட்ட²ப்³பா³னி. படிஸந்தி⁴வஸேன விபச்சதீதி வசனேன இதரேஸம் பவத்திவிபாகதா³யிதா அனுஞ்ஞாதா விய தி³ஸ்ஸதி. நோ வா ததா² ஸீலவதீதி யதா² பிதா ஸீலவா, ததா² ஸீலவதீ நோ வா ஹோதீதி யோஜனா. ஸசே மாதா ஸீலவதீ, மாதுகா⁴தோ படிஸந்தி⁴வஸேன விபச்சதீதி யோஜனா.

பகதத்தோதி அனுக்கி²த்தோ. ஸமானஸம்வாஸகோதி அபாராஜிகோ. ஸமானஸீமாயந்தி ஏகஸீமாயம்.

276. ஸத்து² கிச்சம் காதும் அஸமத்தோ²தி யம் ஸத்தா²ரா காதப்³ப³கிச்சம் அனுஸாஸனாதி³, நம் காதும் அஸமத்தோ²தி ப⁴க³வந்தம் பச்சக்கா²ய. அஞ்ஞம் தித்த²கரந்தி அஞ்ஞம் ஸத்தா²ரம். வுத்தஞ்ஹேதம் –

‘‘தித்த²ம் ஜானிதப்³ப³ம், தித்த²கரோ ஜானிதப்³போ³, தித்தி²யா ஜானிதப்³பா³, தித்தி²யஸாவகா ஜானிதப்³பா³. தத்த² தித்த²ம் நாம த்³வாஸட்டி² தி³ட்டி²யோ. ஏத்த² ஹி ஸத்தா² தரந்தி உப்லவந்தி உம்முஜ்ஜனிமுஜ்ஜம் கரோந்தி, தஸ்மா தித்த²ந்தி வுச்சந்தி. தாதி³ஸானம் தி³ட்டீ²னம் உப்பாதே³தா தித்த²கரோ நாம பூரணகஸ்ஸபாதி³கோ. தஸ்ஸ லத்³தி⁴ம் க³ஹேத்வா பப்³ப³ஜிதா தித்தி²யா நாம. தே ஹி தித்தே² ஜாதாதி தித்தி²யா. யதா²வுத்தம் வா தி³ட்டி²க³தஸங்கா²தம் தித்த²ம் ஏதேஸம் அத்தீ²தி தித்தி²கா, தித்தி²கா ஏவ தித்தி²யா. தேஸம் பச்சயதா³யகா தித்தி²யஸாவகாதி வேதி³தப்³பா³’’தி (ம. நி. அட்ட². 1.140).

277. அபி⁴ஜாதிஆதீ³ஸு பகம்பனதே³வதூபஸங்கமனாதி³னா ஜாதசக்கவாளேன ஸமானயோக³க்க²மம் த³ஸஸஹஸ்ஸபரிமாணம் சக்கவாளம் ஜாதிகே²த்தம். ஸரஸேனேவ ஆணாபவத்தனட்டா²னம் ஆணாகே²த்தம். விஸயபூ⁴தம் டா²னம் விஸயகே²த்தம். த³ஸஸஹஸ்ஸீ லோகதா⁴தூதி இமாய லோகதா⁴துயா ஸத்³தி⁴ம் இமம் லோகதா⁴தும் பரிவாரேத்வா டி²தா த³ஸஸஹஸ்ஸீ லோகதா⁴து. தத்தகானம்யேவ ஜாதிகே²த்தபா⁴வோ த⁴ம்மதாவஸேன வேதி³தப்³போ³. ‘‘பரிக்³க³ஹவஸேனா’’தி கேசி, ‘‘ஸப்³பே³ஸம்யேவ பு³த்³தா⁴னம் தத்தகம்யேவ ஜாதிகே²த்தம் தன்னிவாஸீனம்யேவ தே³வதானம் த⁴ம்மாபி⁴ஸமயோ’’தி ச வத³ந்தி. மாதுகுச்சி² ஓக்கமனகாலாதீ³னம் ச²ன்னம் ஏவ க³ஹணம் நித³ஸ்ஸனமத்தம் மஹாபி⁴னீஹாராதி³காலேபி தஸ்ஸ பகம்பனஸ்ஸ லப்³ப⁴னதோ. ஆணாகே²த்தம் நாம யம் ஏகஜ்ஜ²ம் ஸம்வட்டதி விவட்டதி ச, ஆணா பவத்ததி ஆணாய தன்னிவாஸிதே³வதானம் ஸிரஸா ஸம்படிச்ச²னேன, தஞ்ச கோ² கேவலம் பு³த்³தா⁴னம் ஆனுபா⁴வேனேவ, ந அதி⁴ப்பாயவஸேன. அதி⁴ப்பாயவஸேன பன ‘‘யாவதா வா பன ஆகங்கே²ய்யா’’தி (அ. நி. 3.81) வசனதோ ததோ பரம்பி ஆணா வத்தேய்யேவ.

ந உப்பஜ்ஜந்தீதி பன அத்தீ²தி ‘‘ந மே ஆசரியோ அத்தி², ஸதி³ஸோ மே ந விஜ்ஜதீ’’திஆதி³ம் (ம. நி. 1.285; மஹாவ. 11; கதா². 405) இமிஸ்ஸா லோகதா⁴துயா ட²த்வா வத³ந்தேன ப⁴க³வதா ‘‘கிம் பனாவுஸோ, ஸாரிபுத்த, அத்தே²தரஹி அஞ்ஞே ஸமணா வா ப்³ராஹ்மணா வா ப⁴க³வதா ஸமஸமா ஸம்போ³தி⁴யந்தி, ஏவம் புட்டோ² அஹம், ப⁴ந்தே, ‘நோ’தி வதே³ய்ய’’ந்தி (தீ³. நி. 3.161) வத்வா தஸ்ஸ காரணம் த³ஸ்ஸேதும் – ‘‘அட்டா²னமேதம் அனவகாஸோ, யம் ஏகிஸ்ஸா லோகதா⁴துயா த்³வே அரஹந்தோ ஸம்மாஸம்பு³த்³தா⁴ அபுப்³ப³ம் அசரிமம் உப்பஜ்ஜேய்யு’’ந்தி இமம் ஸுத்தம் (அ. நி. 1.277; விப⁴. 809; ம. நி. 3.129; மி. ப. 5.1.1) ஆஹரந்தேன த⁴ம்மஸேனாபதினா ச பு³த்³த⁴கே²த்தபூ⁴தம் இமம் லோகதா⁴தும் ட²பேத்வா அஞ்ஞத்த² அனுப்பத்தி வுத்தா ஹோதீதி அதி⁴ப்பாயோ.

ஏகதோதி ஸஹ, ஏகஸ்மிம் காலேதி அத்தோ², ஸோ பன காலோ கத²ம் பரிச்சி²ன்னோதி சரிமப⁴வே படிஸந்தி⁴க்³க³ஹணதோ பட்டா²ய யாவ தா⁴துபரினிப்³பா³னாதி த³ஸ்ஸேந்தோ, ‘‘தத்தா²’’திஆதி³மாஹ. அனச்ச²ரியத்தாதி த்³வீஸுபி உப்பஜ்ஜமானேஸு அச்ச²ரியத்தாபா⁴வதோதி அத்தோ². த்³வீஸுபி உப்பஜ்ஜமானேஸு அனச்ச²ரியதா, கிமங்க³ம் பன ப³ஹூஸூதி த³ஸ்ஸேந்தோ, ‘‘யதி³ சா’’திஆதி³மாஹ. பு³த்³தா⁴ நாம மஜ்ஜே² பி⁴ன்னஸுவண்ணம் விய ஏகஸதி³ஸாதி தேஸம் தே³ஸனாபி ஏகரஸா ஏகதா⁴தி ஆஹ – ‘‘தே³ஸனாய ச விஸேஸாபா⁴வதோ’’தி. ஏதேனபி அனச்ச²ரியத்தமேவ ஸாதே⁴தி. விவாத³பா⁴வதோதி ஏதேன விவாதா³பா⁴வத்த²ம் த்³வே பு³த்³தா⁴ ஏகதோ ந உப்பஜ்ஜந்தீதி த³ஸ்ஸேதி. ஏதம் காரணந்தி ஏதம் அனச்ச²ரியதாதி³காரணம். தத்தா²தி மிலிந்த³பஞ்ஹே.

ஏகம் ஏவ பு³த்³த⁴ம் தா⁴ரேதீதி ஏகபு³த்³த⁴தா⁴ரணீ. ஏதேன ஏவம்ஸபா⁴வா ஏதே பு³த்³த⁴கு³ணா, யேன து³தியபு³த்³த⁴கு³ணே தா⁴ரேதும் அஸமத்தா² அயம் லோகதா⁴தூதி த³ஸ்ஸேதி. பச்சயவிஸேஸனிப்ப²ன்னானஞ்ஹி கு³ணத⁴ம்மானம் பா⁴ரியோ விஸேஸோ மஹாபத²வியாபி து³ஸ்ஸஹோதி ஸக்கா விஞ்ஞாதும். ததா² ஹி அபி⁴ஸம்போ³தி⁴ஸமயே உபக³தஸ்ஸ லோகனாத²ஸ்ஸ கு³ணபா⁴ரம் போ³தி⁴ருக்க²ஸ்ஸ தீஸுபி தி³ஸாஸு மஹாபத²வீ ஸந்தா⁴ரேதும் நாஸக்கி². தஸ்மா ‘‘ந தா⁴ரேய்யா’’தி வத்வா தமேவ அதா⁴ரணம் பரியாயந்தரேஹி பகாஸேந்தோ ‘‘சலேய்யா’’திஆதி³மாஹ. தத்த² சலேய்யாதி பரிப்ப²ந்தே³ய்ய. கம்பேய்யாதி பவேதே⁴ய்ய. நமேய்யாதி ஏகபஸ்ஸேன நமேய்ய. ஓனமேய்யாதி ஓஸீதே³ய்ய. வினமேய்யாதி விவித⁴ம் இதோ சிதோ ச நமேய்ய. விகிரேய்யாதி வாதேன து²ஸமுட்டி² விய விப்பகிரேய்ய. வித⁴மேய்யாதி வினஸ்ஸேய்ய. வித்³த⁴ம்ஸேய்யாதி ஸப்³ப³ஸோ வித்³த⁴ஸ்தா ப⁴வேய்ய. ததா²பூ⁴தா ச ந கத்த²சி திட்டே²ய்யாதி ஆஹ – ‘‘ந டா²னமுபக³ச்சே²ய்யா’’தி.

இதா³னி தத்த² நித³ஸ்ஸனம் த³ஸ்ஸேந்தோ, ‘‘யதா², மஹாராஜா’’திஆதி³மாஹ. தத்த² ஏகே புரிஸேதி ஏகஸ்மிம் புரிஸே. ஸமுபாதி³காதி ஸமம் உத்³த⁴ம் பஜ்ஜதி பவத்ததீதி ஸமுபாதி³கா, உத³கஸ்ஸ உபரி ஸமம் கா³மினீதி அத்தோ². ‘‘ஸமுப்பாதி³கா’’திபி பட²ந்தி, அயமேவத்தோ². வண்ணேனாதி ஸண்டா²னேன. பமாணேனாதி ஆரோஹேன. கிஸதூ²லேனாதி கிஸதூ²லபா⁴வேன, பரிணாஹேனாதி அத்தோ². த்³வின்னம்பீதி த்³வேபி, த்³வின்னம்பி வா ஸரீரபா⁴ரம்.

சா²தே³ந்தந்தி ரோசேந்தம் ருசிம் உப்பாதே³ந்தம். தந்தி³கதோதி தேன போ⁴ஜனேன தந்தி³பூ⁴தோ. அனோனமிதத³ண்ட³ஜாதோதி யாவத³த்த²ம் போ⁴ஜனேன ஓனமிதும் அஸக்குணேய்யதாய அனோனமனத³ண்டோ³ விய ஜாதோ. ஸகிம் பு⁴த்தோ வமேய்யாதி ஏகம்பி ஆலோபம் அஜ்ஜோ²ஹரித்வா வமேய்யாதி அத்தோ².

அதித⁴ம்மபா⁴ரேன பத²வீ சலதீதி த⁴ம்மேன நாம பத²வீ திட்டே²ய்ய. ஸா கிம் தேனேவ சலதி வினஸ்ஸதீதி அதி⁴ப்பாயேன புச்ச²தி. புன தே²ரோ ‘‘ரதனம் நாம லோகே குடும்ப³ம் ஸந்தா⁴ரேந்தம் அபி⁴மதஞ்ச லோகேன அத்தனோ க³ருஸபா⁴வதாய ஸகடப⁴ங்க³ஸ்ஸ காரணம் அதிபா⁴ரபூ⁴தம் தி³ட்ட²ம். ஏவம் த⁴ம்மோ ச ஹிதஸுக²விஸேஸேஹி தம்ஸமங்கீ³னம் தா⁴ரேந்தோ அபி⁴மதோ ச விஞ்ஞூனம் க³ம்பீ⁴ரப்பமேய்யபா⁴வேன க³ருஸபா⁴வத்தா அதிபா⁴ரபூ⁴தோ பத²வீசலனஸ்ஸ காரணம் ஹோதீ’’தி த³ஸ்ஸேந்தோ, ‘‘இத⁴, மஹாராஜ, த்³வே ஸகடா’’திஆதி³மாஹ. ஏதேனேவ ததா²க³தஸ்ஸ மாதுகுச்சி²ஓக்கமனாதி³காலே பத²வீகம்பனகாரணம் ஸம்வண்ணிதந்தி த³ட்ட²ப்³ப³ம். ஏகஸ்ஸாதி ஏகஸ்மா, ஏகஸ்ஸ வா ஸகடஸ்ஸ ரதனம், தஸ்மா ஸகடா க³ஹேத்வாதி அத்தோ².

ஓஸாரிதந்தி உச்சாரிதம், வுத்தந்தி அத்தோ². அக்³கோ³தி ஸப்³ப³ஸத்தேஹி அக்³கோ³. ஜேட்டோ²தி வுத்³த⁴தரோ. ஸேட்டோ²தி பஸத்த²தரோ. விஸிட்டே²ஹி ஸீலாதீ³ஹி கு³ணேஹி ஸமன்னாக³தத்தா விஸிட்டோ². உக்³க³ததமோதி உத்தமோ. பவரோதி தஸ்ஸேவ வேவசனம். நத்தி² ஏதஸ்ஸ ஸமோதி அஸமோ. அஸமா புப்³ப³பு³த்³தா⁴, தேஹி ஸமோதி அஸமஸமோ. நத்தி² ஏதஸ்ஸ படிஸமோ படிபுக்³க³லோதி அப்படிஸமோ. நத்தி² ஏதஸ்ஸ படிபா⁴கோ³தி அப்படிபா⁴கோ³. நத்தி² ஏதஸ்ஸ படிபுக்³க³லோதி அப்படிபுக்³க³லோ.

ஸபா⁴வபகதிகாதி ஸபா⁴வபூ⁴தா அகித்திமா பகதி. காரணமஹந்தத்தாதி காரணானம் மஹந்ததாய, மஹந்தேஹி பு³த்³த⁴கரத⁴ம்மேஹி பாரமிஸங்கா²தேஹி காரணேஹி பு³த்³த⁴கு³ணானம் நிப்³ப³த்திதோதி வுத்தம் ஹோதி. பத²வீஆதீ³னி மஹந்தானி வத்தூ²னி, மஹந்தா சக்கவாளாத³யோ அத்தனோ அத்தனோ விஸயே ஏகேகாவ, ஏவம் ஸம்மாஸம்பு³த்³தோ⁴பி மஹந்தோ அத்தனோ விஸயே ஏகோ ஏவ. கோ ச தஸ்ஸ விஸயோ? பு³த்³த⁴பூ⁴மி, யாவதகம் வா ஞேய்யம். ‘‘ஆகாஸோ விய அனந்தவிஸயோ ப⁴க³வா ஏகோ ஏவ ஹோதீ’’தி வத³ந்தோ பரசக்கவாளேஸுபி து³தியஸ்ஸ பு³த்³த⁴ஸ்ஸ அபா⁴வம் த³ஸ்ஸேதி.

இமினாவ பதே³னாதி ‘‘ஏகிஸ்ஸா லோகதா⁴துயா’’தி இமினா ஏவ பதே³ன. த³ஸ சக்கவாளஸஹஸ்ஸானி க³ஹிதானீதி ஜாதிகே²த்தாபேக்கா²ய க³ஹிதானி. ஏகசக்கவாளேனேவாதி இமினா ஏவ ஏகசக்கவாளேன, ந யேன கேனசி. யதா² ‘‘இமஸ்மிம்யேவ சக்கவாளே உப்பஜ்ஜந்தீ’’தி வுத்தே இமஸ்மிம்பி சக்கவாளே ஜம்பு³தீ³பே ஏவ, தத்தா²பி மஜ்ஜி²மதே³ஸே ஏவாதி பரிச்சி²ந்தி³தும் வட்டதி, ஏவம் ‘‘ஏகிஸ்ஸா லோகதா⁴துயா’’தி ஜாதிகே²த்தே அதி⁴ப்பேதேபி இமினாவ சக்கவாளேன பரிச்சி²ந்தி³தும் வட்டதி.

பட²மவக்³க³வண்ணனா நிட்டி²தா.