10. து³தியபமாதா³தி³வக்³க³வண்ணனா

98-115. த³ஸமே வக்³கே³ அஜ்ஜ²த்தஸந்தானே ப⁴வம் அஜ்ஜ²த்திகம். அஜ்ஜ²த்தஸந்தானதோ ப³ஹித்³தா⁴ ப⁴வம் பா³ஹிரம். வுத்தபடிபக்க²னயேனாதி ‘‘அவினாஸாயா’’தி ஏவமாதி³னா அத்தோ² க³ஹேதப்³போ³. சதுக்கோடிகேதி ‘‘அனுயோகோ³ அகுஸலானம், அனனுயோகோ³ குஸலானம், அனுயோகோ³ குஸலானம், அனனுயோகோ³ அகுஸலான’’ந்தி (அ. நி. 1.96) ஏவம் பரியோஸானஸுத்தே ஆக³தனயம் க³ஹேத்வா ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமீ’’திஆதி³னா (அ. நி. 1.11) ஆக³தஸுத்தானம் ஸமஞ்ஞா ஜாதா.

130. ஸுத்தந்தனயே யதா²சோத³னா ஸம்கிலேஸத⁴ம்மானம் விபரியேஸனம், தம்தம்த⁴ம்மகோட்டா²ஸானஞ்ச ஊனதோ அதி⁴கதோ ச பவேத³னம் அத⁴ம்மம் த⁴ம்மோதி தீ³பனம். தேஸம்யேவ பன அவிபரீததோ அனூனாதி⁴கதோ ச பவேத³னம் த⁴ம்மம் த⁴ம்மோதி தீ³பனம். ஏவம் வினயப்படிபத்தியா அயதா²விதி⁴ப்பவேத³னம் அத⁴ம்மம் த⁴ம்மோதி தீ³பனம். யதா²விதி⁴ப்பவேத³னம் த⁴ம்மம் த⁴ம்மோதி தீ³பனம். ஸுத்தந்தனயேன பஞ்சவிதோ⁴ ஸம்வரவினயோ பஹானவினயோ ச வினயோ, தப்படிபக்கே²ன அவினயோ. வினயனயேன வத்து²ஸம்பதா³தி³னா யதா²விதி⁴ப்படிபத்தி ஏவ வினயோ, தப்³பி³பரியாயேன அவினயோ வேதி³தப்³போ³. திம்ஸ நிஸ்ஸக்³கி³யா பாசித்தியாதி ஏத்த² இதி-ஸத்³தோ³ ஆத்³யத்தோ². தேன த்³வேனவுதி பாசித்தியா, சத்தாரோ பாடிதே³ஸனியா, ஸத்த அதி⁴கரணஸமதா²தி இமேஸம் ஸங்க³ஹோ. ஏகதிம்ஸ நிஸ்ஸக்³கி³யாதி ஏத்த² ‘‘தேனவுதி பாசித்தியா’’திஆதி³னா வத்தப்³ப³ம். ஸேஸமேத்த² ஸுவிஞ்ஞேய்யமேவ.

அதி⁴க³ந்தப்³ப³தோ அதி⁴க³மோ, மக்³க³ப²லானி. நிப்³பா³னம் பன அந்தரதா⁴னாபா⁴வதோ இத⁴ ந க³ய்ஹதி. படிபஜ்ஜனம் படிபத்தி, ஸிக்க²த்தயஸமாயோகோ³. படிபஜ்ஜிதப்³ப³தோ வா படிபத்தி. பரியாபுணிதப்³ப³தோ பரியத்தி, பிடகத்தயம். மக்³க³க்³க³ஹணேன க³ஹிதாபி ததியவிஜ்ஜாச²ட்டா²பி⁴ஞ்ஞா விஜ்ஜாபி⁴ஞ்ஞாஸாமஞ்ஞதோ ‘‘திஸ்ஸோ விஜ்ஜா ச² அபி⁴ஞ்ஞா’’தி புனபி க³ஹிதா. ததோ பரம் ச² அபி⁴ஞ்ஞாதி வஸ்ஸஸஹஸ்ஸதோ பரம் ச² அபி⁴ஞ்ஞா நிப்³ப³த்தேதும் ஸக்கோந்தி, ந படிஸம்பி⁴தா³தி அதி⁴ப்பாயோ. ததோதி அபி⁴ஞ்ஞாகாலதோ பச்சா². தாதி அபி⁴ஞ்ஞாயோ. புப்³ப³பா⁴கே³ ஜா²னஸினேஹாபா⁴வேன கேவலாய விபஸ்ஸனாய ட²த்வா அக்³க³ப²லப்பத்தா ஸுக்க²விபஸ்ஸகா நாம, மக்³க³க்க²ணே பன ‘‘ஜா²னஸினேஹோ நத்தீ²’’தி ந வத்தப்³போ³ ‘‘ஸமத²விபஸ்ஸனம் யுக³னத்³த⁴ம் பா⁴வேதீ’’தி (அ. நி. 4.170) வசனதோ. பச்சி²மகஸ்ஸாதி ஸப்³ப³பச்சி²மஸ்ஸ. கிஞ்சாபி அரியோ அபரிஹானத⁴ம்மோ, ஸோதாபன்னஸ்ஸ பன உத்³த⁴ம் ஜீவிதபரியாதா³னா அதி⁴க³தத⁴ம்மோ உப்பன்னோ நாம நத்தி², பச்சயஸாமக்³கி³யா அஸதி யாவ உபரிவிஸேஸம் நிப்³ப³த்தேதும் ந ஸக்கோந்தி, தாவ அதி⁴க³மஸ்ஸ அஸம்ப⁴வோ ஏவாதி ஆஹ – ‘‘ஸோதாபன்னஸ்ஸ…பே… நாம ஹோதீ’’தி. தஸ்ஸித³ம் மனுஸ்ஸலோகவஸேன வுத்தந்தி த³ட்ட²ப்³ப³ம்.

ந சோதே³ந்தீதி அஞ்ஞமஞ்ஞஸ்மிம் விஜ்ஜமானம் தோ³ஸம் ஜானந்தாபி ந சோதே³ந்தி ந ஸாரேந்தி. அகுக்குச்சகா ஹோந்தீதி குக்குச்சம் ந உப்பாதே³ந்தி. ‘‘அஸக்கச்சகாரினோ ஹோந்தீ’’தி ச பட²ந்தி, ஸாத²லிகதாய ஸிக்கா²ஸு அஸக்கச்சகாரினோ ஹோந்தீதி அத்தோ². பி⁴க்கூ²னம் ஸதேபி ஸஹஸ்ஸேபி த⁴ரமானேதி இத³ம் பா³ஹுல்லவஸேன வுத்தம். அந்திமவத்து²அனஜ்ஜா²பன்னேஸு கதிபயமத்தேஸுபி பி⁴க்கூ²ஸு த⁴ரந்தேஸு, ஏகஸ்மிம் வா த⁴ரந்தே படிபத்தி அனந்தரஹிதா ஏவ நாம ஹோதி. தேனேவாஹ – ‘‘பச்சி²மகஸ்ஸ…பே… அந்தரஹிதா ஹோதீ’’தி.

அந்தேவாஸிகே க³ஹேதுந்தி அந்தேவாஸிகே ஸங்க³ஹேதும். அத்த²வஸேனாதி அட்ட²கதா²வஸேன. மத்த²கதோ பட்டா²யாதி உபரிதோ பட்டா²ய. உபோஸத²க்க²ந்த⁴கமத்தந்தி வினயமாதிகாபாளிமாஹ. ஆளவகபஞ்ஹாதீ³னம் விய தே³வேஸு பரியத்தியா பவத்தி அப்பமாணந்தி ஆஹ – ‘‘மனுஸ்ஸேஸூ’’தி.

ஓட்ட²ட்டி²வண்ணந்தி ஓட்டா²னம் அட்டி²வண்ணம், த³ந்தகஸாவம் ஏகம் வா த்³வே வா வாரே ரஜித்வா த³ந்தவண்ணம் கத்வா தா⁴ரேந்தீதி வுத்தம் ஹோதி. கேஸேஸு வா அல்லீயாபேந்தீதி தேன காஸாவக²ண்டே³ன கேஸே ப³ந்த⁴ந்தா அல்லீயாபேந்தி. பி⁴க்கு²கோ³த்தஸ்ஸ அபி⁴ப⁴வனதோ வினாஸனதோ கோ³த்ரபு⁴னோ. அத² வா கோ³த்தம் வுச்சதி ஸாதா⁴ரணம் நாமம், மத்தஸத்³தோ³ லுத்தனித்³தி³ட்டோ², தஸ்மா ‘‘ஸமணா’’தி கோ³த்தமத்தம் அனுப⁴வந்தி தா⁴ரேந்தீதி கோ³த்ரபு⁴னோ, நாமமத்தஸமணாதி அத்தோ². காஸாவக³தகண்ட²தாய, காஸாவக்³க³ஹணஹேதுஉப்பஜ்ஜனகஸோகதாய வா காஸாவகண்டா². ஸங்க⁴க³தந்தி ஸங்க⁴ம் உத்³தி³ஸ்ஸ தி³ன்னத்தா ஸங்க⁴க³தம். தம் ஸரீரந்தி தம் தா⁴துஸரீரம்.

தேனேவாதி பரியத்திஅந்தரதா⁴னமூலகத்தா ஏவ இதரஅந்தரதா⁴னஸ்ஸ. ஸக்கோ தே³வராஜா சா²தகப⁴யே பரதீரக³மனாய பி⁴க்கூ² உஸ்ஸுக்கமகாஸீதி அதி⁴ப்பாயோ. நேதி உப⁴யேபி பம்ஸுகூலிகத்தே²ரே த⁴ம்மகதி²கத்தே²ரே ச. தே²ராதி தத்த² டி²தா ஸக்கி²பூ⁴தா தே²ரா. த⁴ம்மகதி²கத்தே²ரா ‘‘யாவ திட்ட²ந்தி ஸுத்தந்தா…பே… யோக³க்கே²மா ந த⁴ம்ஸதீ’’தி இத³ம் ஸுத்தம் ஆஹரித்வா ‘‘ஸுத்தந்தே ரக்கி²தே ஸந்தே, படிபத்தி ஹோதி ரக்கி²தா’’தி இமினா வசனேன பம்ஸுகூலிகத்தே²ரே அப்படிபா⁴னே அகம்ஸு. இதா³னி பரியத்தியா அனந்தரதா⁴னமேவ இதரேஸம் அனந்தரதா⁴னஹேதூதி இமமத்த²ம் ப்³யதிரேகதோ அன்வயதோ ச உபமாஹி விபா⁴வேதும் ‘‘யதா² ஹீ’’திஆதி³ வுத்தம். தம் ஸுவிஞ்ஞேய்யமேவ.

து³தியபமாதா³தி³வக்³க³வண்ணனா நிட்டி²தா.

140-150. ஏகாத³ஸமத்³வாத³ஸமவக்³கா³ ஸுவிஞ்ஞேய்யா ஏவ.