8. கல்யாணமித்தாதி³வக்³க³வண்ணனா

71. அட்ட²மஸ்ஸ பட²மே பு³த்³தா⁴, ஸாரிபுத்தாத³யோ வா கல்யாணமித்தா. வுத்தபடிபக்க²னயேனாதி ‘‘பாபமித்ததா’’தி பதே³ வுத்தஸ்ஸ படிபக்க²னயேன.

72-73. து³தியே யோகோ³தி ஸமங்கீ³பா⁴வோ. பயோகோ³தி பயுஞ்ஜனம் படிபத்தி. அயோகோ³தி அஸமங்கீ³பா⁴வோ. அப்பயோகோ³தி அப்பயுஞ்ஜனம் அப்படிபத்தி. அனுயோகே³னாதி அனுயோக³ஹேது.

74. சதுத்தே² பு³ஜ்ஜ²னகஸத்தஸ்ஸாதி சதுன்னம் அரியஸச்சானம் படிவிஜ்ஜ²னகபுக்³க³லஸ்ஸ. அங்க³பூ⁴தாதி தஸ்ஸேவ படிவேத⁴ஸ்ஸ காரணபூ⁴தா. ஏத்த² ச சத்தாரி அரியஸச்சானி பு³ஜ்ஜ²தி, அஞ்ஞாணனித்³தா³ய வாபி பு³ஜ்ஜ²தீதி போ³தீ⁴தி லத்³த⁴னாமோ அரியஸாவகோ பு³ஜ்ஜ²னகஸத்தோ, தஸ்ஸ பு³ஜ்ஜ²னகஸத்தஸ்ஸ. போ³தி⁴யாதி தஸ்ஸா த⁴ம்மஸாமக்³கி³ஸங்கா²தாய போ³தி⁴யா. பு³ஜ்ஜ²னட்டே²ன போ³தி⁴யோ, போ³தி⁴யோ ஏவ ஸச்சஸம்படிபோ³த⁴ஸ்ஸ அங்கா³தி வுத்தம். ‘‘பு³ஜ்ஜ²ந்தீதி போ³ஜ்ஜ²ங்கா³’’தி. விபஸ்ஸனாதீ³னம் காரணானம் பு³ஜ்ஜி²தப்³பா³னஞ்ச ஸச்சானம் அனுரூபம் பு³ஜ்ஜ²னதோ அனுபு³ஜ்ஜ²ந்தீதி போ³ஜ்ஜ²ங்கா³, படிமுக²ம் பச்சக்க²பா⁴வேன அபி⁴முக²ம் பு³ஜ்ஜ²னதோ படிபு³ஜ்ஜ²ந்தீதி போ³ஜ்ஜ²ங்கா³, ஸம்மா அவிபரீததோ பு³ஜ்ஜ²னதோ ஸம்பு³ஜ்ஜ²ந்தீதி போ³ஜ்ஜ²ங்கா³தி ஏவம் அத்த²விஸேஸதீ³பகேஹி உபஸக்³கே³ஹி அனுபு³ஜ்ஜ²ந்தீதிஆதி³ வுத்தம். போ³தி⁴ஸத்³தோ³ ஸப்³ப³விஸேஸயுத்தம் பு³ஜ்ஜ²னஸாமஞ்ஞேன ஸங்க³ண்ஹாதி. போ³தா⁴ய ஸம்வத்தந்தீதி இமினா தஸ்ஸா த⁴ம்மஸாமக்³கி³யா பு³ஜ்ஜ²னஸ்ஸ ஏகந்தகாரணதம் த³ஸ்ஸேதி. ஏவம் பனேதம் பத³ம் விப⁴த்தமேவாதி வுத்தப்பகாரேன ஏதம் ‘‘போ³ஜ்ஜ²ங்கா³’’தி (படி. ம. 2.17) பத³ம் நித்³தே³ஸே படிஸம்பி⁴தா³மக்³கே³ விப⁴த்தமேவ.

75. பஞ்சமே யாதா²வஸரஸபூ⁴மீதி யாதா²வதோ ஸகிச்சகரணபூ⁴மி. ஸாதி யாதா²வஸரஸபூ⁴மி. விபஸ்ஸனாதி ப³லவவிபஸ்ஸனா. கேசி ‘‘ப⁴ங்க³ஞாணதோ பட்டா²யா’’தி வத³ந்தி. விபஸ்ஸனாய பாத³கஜ்ஜா²னே ச ஸதிஆத³யோ போ³ஜ்ஜ²ங்க³பக்கி²கா ஏவ பரியாயபோ³தி⁴பக்கி²யபா⁴வதோ. தத்தா²திஆதி³ சதுப்³பி³தா⁴னம் போ³ஜ்ஜ²ங்கா³னம் பூ⁴மிவிபா⁴க³த³ஸ்ஸனம்.

76. ச²ட்டே² தேஸம் அந்தரேதி தேஸம் பி⁴க்கூ²னம் அந்தரே. காமம் ஸங்கீ³திஆருள்ஹவஸேன அப்பகமித³ம் ஸுத்தபத³ம், ப⁴க³வா பனேத்த² ஸன்னிபதிதபரிஸாய அஜ்ஜா²ஸயானுரூபம் வித்தா²ரிகம் கரோதீதி கத்வா இத³ம் வுத்தம் – ‘‘மஹதீ தே³ஸனா ப⁴விஸ்ஸதீ’’தி. கா³மனிக³மாதி³கதா² நத்தீ²தி தஸ்ஸா கதா²ய அதிரச்சா²னகதா²பா⁴வமாஹு. ததா² ஹி ஸா புப்³பே³ ப³ஹுஞாதிகம் அஹோஸி ப³ஹுபக்க²ம், இதா³னி அப்பஞாதிகம் அப்பபக்க²ந்தி அனிச்சதாமுகே²ன நிய்யானிகபக்கி²கா ஜாதா. ஏதாயாதி யதா²வுத்தாய பரிஹானியா. பதிகிட்ட²ந்தி நிஹீனம். மம ஸாஸனேதி இத³ம் கம்மஸ்ஸகதஜ்ஜா²னபஞ்ஞானம்பி விஸேஸனமேவ. தது³ப⁴யம்பி ஹி பா³ஹிரகானம் தப்பஞ்ஞாத்³வயதோ ஸாதிஸயமேவ ஸப்³ப³ஞ்ஞுபு³த்³தா⁴னம் தே³ஸனாய லத்³த⁴விஸேஸதோ விவட்டூபனிஸ்ஸயதோ ச.

77. ஸத்தமே தேஸம் சித்தாசாரம் ஞத்வாதி ததா² கதே²ந்தானம் தேஸம் பி⁴க்கூ²னம் தத்த² உபக³மனேன அத்தனோ தே³ஸனாய பா⁴ஜனபூ⁴தம் சித்தப்பவத்திம் ஞத்வா. கம்மஸ்ஸகதாதீ³தி ஆதி³ஸத்³தே³ன ஜா²னபஞ்ஞாதீ³னம் சதுன்னம்பி பஞ்ஞானம் க³ஹணம்.

78-80. அட்ட²மாதீ³ஸு ஹேட்டா² வுத்தனயேனேவாதி ‘‘யா ஏஸ மம ஸாஸனே’’திஆதி³னா ஹேட்டா² வுத்தனயேனேவ. ஸேஸமேத்த² உத்தானத்த²மேவ.

கல்யாணமித்தாதி³வக்³க³வண்ணனா நிட்டி²தா.

81-82. நவமே வக்³கே³ நத்தி² வத்தப்³ப³ம்.