8. பச்சயபரிச்சே²த³வண்ணனா

1. இதா³னி யதா²வுத்தனாமரூபத⁴ம்மானம் படிச்சஸமுப்பாத³பட்டா²னனயவஸேன பச்சயே த³ஸ்ஸேதும் ‘‘யேஸ’’ந்த்யாதி³ ஆரத்³த⁴ம். யேஸம் பச்சயேஹி ஸங்க²தத்தா ஸங்க²தானம் பச்சயுப்பன்னத⁴ம்மானம் யே பச்சயத⁴ம்மா யதா² யேனாகாரேன பச்சயா டி²தியா, உப்பத்தியா ச உபகாரகா, தம் விபா⁴க³ம் தேஸம் பச்சயுப்பன்னானம், தேஸம் பச்சயானம், தஸ்ஸ ச பச்சயாகாரஸ்ஸ பபே⁴த³ம் இஹ இமஸ்மிம் ஸமுச்சயஸங்க³ஹானந்தரே டா²னே யதா²ரஹம் தம்தம்பச்சயுப்பன்னத⁴ம்மே ஸதி தம்தம்பச்சயானம் தம்தம்பச்சயபா⁴வாகாரானுரூபம் இதா³னி பவக்கா²மீதி யோஜனா.

2. தத்த² பச்சயஸாமக்³கி³ம் படிச்ச ஸமம் க³ந்த்வா ப²லானம் உப்பாதோ³ ஏதஸ்மாதி படிச்சஸமுப்பாதோ³, பச்சயாகாரோ. நானப்பகாரானி டா²னானி பச்சயா ஏத்தா²த்யாதி³னா பட்டா²னம், அனந்தனயஸமந்தபட்டா²னமஹாபகரணம், தத்த² தே³ஸிதனயோ பட்டா²னனயோ.

3. தத்தா²தி தேஸு த்³வீஸு நயேஸு. தஸ்ஸ பச்சயத⁴ம்மஸ்ஸ பா⁴வேன ப⁴வனஸீலஸ்ஸ பா⁴வோ தப்³பா⁴வபா⁴வீபா⁴வோ, ஸோயேவ ஆகாரமத்தம், தேன உபலக்கி²தோ தப்³பா⁴வபா⁴வீபா⁴வாகாரமத்தோபலக்கி²தோ. ஏதேனேவ தத³பா⁴வாபா⁴வாகாரமத்தோபலக்கி²ததாபி அத்த²தோ த³ஸ்ஸிதா ஹோதி. அன்வயப்³யதிரேகவஸேன ஹி பச்சயலக்க²ணம் த³ஸ்ஸேதப்³ப³ம். தேனாஹ ப⁴க³வா – ‘‘இமஸ்மிம் ஸதி இத³ம் ஹோதி, இமஸ்ஸுப்பாதா³ இத³முப்பஜ்ஜதி. இமஸ்மிம் அஸதி இத³ம் ந ஹோதி, இமஸ்ஸ நிரோதா⁴ இத³ம் நிருஜ்ஜ²தீ’’தி (ம. நி. 1.404, 406; ஸம். நி. 2.21; உதா³. 1, 2). படிச்ச ப²லம் ஏதி ஏதஸ்மாதி பச்சயோ. திட்ட²தி ப²லம் ஏத்த² ததா³யத்தவுத்திதாயாதி டி²தி, ஆஹச்ச விஸேஸேத்வா பவத்தா பச்சயஸங்கா²தா டி²தி ஆஹச்சபச்சயட்டி²தி. படிச்சஸமுப்பாத³னயோ ஹி தப்³பா⁴வபா⁴வீபா⁴வாகாரமத்தம் உபாதா³ய பவத்தத்தா ஹேதாதி³பச்சயனியமவிஸேஸம் அனபேக்கி²த்வா அவிஸேஸதோவ பவத்ததி, அயம் பன ஹேதாதி³தம்தம்பச்சயானம் தஸ்ஸ தஸ்ஸ த⁴ம்மந்தரஸ்ஸ தம்தம்பச்சயபா⁴வஸாமத்தி²யாகாரவிஸேஸம் உபாதா³ய விஸேஸேத்வா பவத்தோதி ஆஹச்சபச்சயட்டி²திமாரப்³ப⁴ பவுச்சதீதி. கேசி பன ‘‘ஆஹச்ச கண்ட²தாலுஆதீ³ஸு பஹரித்வா வுத்தா டி²தி ஆஹச்சபச்சயட்டி²தீ’’தி வண்ணேந்தி. தம் பன ஸவனமத்தேனேவ தேஸம் அவஹஸிதப்³ப³வசனதம் பகாஸேதி. ந ஹி படிச்சஸமுப்பாத³னயோ, அஞ்ஞோ வா கோசி நயோ கண்ட²தாலுஆதீ³ஸு அனாஹச்ச தே³ஸேதும் ஸக்காதி. வோமிஸ்ஸேத்வாதி பட்டா²னனயம்பி படிச்சஸமுப்பாதே³யேவ பக்கி²பித்வா தப்³பா⁴வபா⁴வீபா⁴வேன ஹேதாதி³பச்சயவஸேன ச மிஸ்ஸேத்வா ஆசரியா ஸங்க³ஹகாராத³யோ பபஞ்சேந்தி வித்தா²ரேந்தி, மயம் பன விஸும் விஸும்யேவ த³ஸ்ஸயிஸ்ஸாமாத்யதி⁴ப்பாயோ.

படிச்சஸமுப்பாத³னயவண்ணனா

4. ந விஜானாதீதி அவிஜ்ஜா, அவிந்தி³யம் வா காயது³ச்சரிதாதி³ம் விந்த³தி படிலப⁴தி, விந்தி³யம் வா காயஸுசரிதாதி³ம் ந விந்த³தி, வேதி³தப்³ப³ம் வா சதுஸச்சாதி³கம் ந விதி³தம் கரோதி, அவிஜ்ஜமானே வா ஜவாபேதி, விஜ்ஜமானே வா ந ஜவாபேதீதி அவிஜ்ஜா, சதூஸு அரியஸச்சேஸு புப்³ப³ந்தாதீ³ஸு சதூஸு அஞ்ஞாணஸ்ஸேதம் நாமம். அவிஜ்ஜா ஏவ பச்சயோ அவிஜ்ஜாபச்சயோ. ததோ அவிஜ்ஜாபச்சயா ஸங்க²தமபி⁴ஸங்க²ரோந்தீதி ஸங்கா²ரா, குஸலாகுஸலகம்மானி. தே திவிதா⁴ புஞ்ஞாபி⁴ஸங்கா²ரோ அபுஞ்ஞாபி⁴ஸங்கா²ரோ ஆனேஞ்ஜாபி⁴ஸங்கா²ரோதி. தத்த²காமரூபாவசரா தேரஸ குஸலசேதனா புஞ்ஞாபி⁴ஸங்கா²ரோ, த்³வாத³ஸ அகுஸலசேதனா அபுஞ்ஞாபி⁴ஸங்கா²ரோ, சதஸ்ஸோ ஆருப்பசேதனா ஆனேஞ்ஜாபி⁴ஸங்கா²ரோதி ஏவமேதா ஏகூனதிம்ஸ சேதனா ஸங்கா²ரா நாம. படிஸந்தி⁴வஸேன ஏகூனவீஸதிவித⁴ம், பவத்திவஸேன த்³வத்திம்ஸவித⁴ம் விபாகசித்தம் விஞ்ஞாணம் நாம. நாமஞ்ச ரூபஞ்ச நாமரூபம். தத்த² நாமம் இத⁴ வேத³னாதி³க்க²ந்த⁴த்தயம், ரூபம் பன பூ⁴துபாதா³யபே⁴த³தோ து³வித⁴ம் கம்மஸமுட்டா²னரூபம், தது³ப⁴யம்பி இத⁴ படிஸந்தி⁴விஞ்ஞாணஸஹக³தந்தி த³ட்ட²ப்³ப³ம். நாமரூபபச்சயாதி ஏத்த² நாமஞ்ச ரூபஞ்ச நாமரூபஞ்ச நாமரூபந்தி ஸரூபேகஸேஸோ வேதி³தப்³போ³. சக்கா²தீ³னி ச² அஜ்ஜ²த்திகாயதனானி, கேஸஞ்சி மதேன ரூபாதீ³னி ச² பா³ஹிராயதனானிபி வா ஆயதனம் நாம. ச² ஆயதனானி ச ச²ட்டா²யதனஞ்ச ஸளாயதனம். சக்கு²ஸம்ப²ஸ்ஸாதி³வஸேன ச²த்³வாரிகோ ப²ஸ்ஸோ ப²ஸ்ஸோ நாம. ஸுக²து³க்கு²பேக்கா²வஸேன திவிதா⁴ வேத³னா.

காமதண்ஹா ப⁴வதண்ஹா விப⁴வதண்ஹாதி திவிதா⁴ தண்ஹா. ச²ளாரம்மணாதி³வஸேன பன அட்ட²ஸதப்பபே⁴தா³ ஹோந்தி காமுபாதா³னாதி³வஸேன சத்தாரி உபாதா³னானி. ஏத்த² ச து³ப்³ப³லா தண்ஹா தண்ஹா நாம, ப³லவதீ உபாதா³னம். அஸம்பத்தவிஸயபத்த²னா வா தண்ஹா தமஸி சோரானம் ஹத்த²ப்பஸாரணம் விய, ஸம்பத்தவிஸயக்³க³ஹணம் உபாதா³னம் சோரானம் ஹத்த²ப்பத்தஸ்ஸ க³ஹணம் விய. அப்பிச்ச²தாபடிபக்கா² தண்ஹா, ஸந்தோஸப்படிபக்க²ம் உபாதா³னம். பரியேஸனது³க்க²மூலம் தண்ஹா, ஆரக்க²து³க்க²மூலம் உபாதா³னந்தி அயமேதேஸம் விஸேஸோ. கம்மப⁴வோ உபபத்திப⁴வோதி து³விதோ⁴ ப⁴வோ. தத்த² பட²மோ ப⁴வதி ஏதஸ்மா ப²லந்தி ப⁴வோ, ஸோ காமாவசரகுஸலாகுஸலாதி³வஸேன ஏகூனதிம்ஸவிதோ⁴. து³தியோ பன ப⁴வதீதி ப⁴வோ, ஸோ காமப⁴வாதி³வஸேன நவவிதோ⁴. உபாதா³னபச்சயா ப⁴வோதி சேத்த² உபபத்திப⁴வோபி அதி⁴ப்பேதோ. ப⁴வபச்சயா ஜாதீதி கம்மப⁴வோவ. ஸோ ஹி ஜாதியா பச்சயோ ஹோதி, ந இதரோ. ஸோ ஹி பட²மாபி⁴னிப்³ப³த்தக்க²ந்த⁴ஸபா⁴வோ ஜாதியேவ, ந ச ததே³வ தஸ்ஸ காரணம் யுத்தம். தேஸம் தேஸம் ஸத்தானம் தம்தம்க³திஆதீ³ஸு அத்தபா⁴வபடிலாபோ⁴ ஜாதி. ததா²னிப்³ப³த்தஸ்ஸ ச அத்தபா⁴வஸ்ஸ புராணபா⁴வோ ஜரா. ஏதஸ்ஸேவ ஏகப⁴வபரிச்சி²ன்னஸ்ஸ பரியோஸானம் மரணம். ஞாதிப்³யஸனாதீ³ஹி பு²ட்ட²ஸ்ஸ சித்தஸந்தாபோ ஸோகோ. தஸ்ஸேவ வசீபலாபோ பரிதே³வோ. காயிகது³க்க²வேத³னா து³க்க²ம். மானஸிகது³க்க²வேத³னா தோ³மனஸ்ஸம். ஞாதிப்³யஸனாதீ³ஹி பு²ட்ட²ஸ்ஸ அதி⁴மத்தசேதோது³க்க²ப்பபா⁴விதோ பு⁴ஸோ ஆயாஸோ உபாயாஸோ.

ஏத்த² ச ஸதிபி வத்தா²ரம்மணாதி³கே பச்சயந்தரே அவிஜ்ஜாதி³ஏகேகபச்சயக்³க³ஹணம் பதா⁴னபா⁴வதோ, பாகடபா⁴வதோ சாதி த³ட்ட²ப்³ப³ம். ஏத்த² ச அவிஜ்ஜானுஸயிதேயேவ ஸந்தானே ஸங்கா²ரானம் விபாகத⁴ம்மபா⁴வேன பவத்தனதோ அவிஜ்ஜாபச்சயாஸங்கா²ராஸம்ப⁴வந்தி, விஞ்ஞாணஞ்ச ஸங்கா²ரஜனிதம் ஹுத்வா ப⁴வந்தரே பதிட்டா²தி. ந ஹி ஜனகாபா⁴வே தஸ்ஸுப்பத்தி ஸியா, தஸ்மா ஸங்கா²ரபச்சயா விஞ்ஞாணம். நாமரூபஞ்ச புப்³ப³ங்க³மாதி⁴ட்டா²னபூ⁴தவிஞ்ஞாணுபத்த²த்³த⁴ம் படிஸந்தி⁴பவத்தீஸு பதிட்ட²ஹதீதி விஞ்ஞாணபச்சயானாமரூபம், ஸளாயதனஞ்ச நாமரூபனிஸ்ஸயமேவ ச²ப்³பி³த⁴ப²ஸ்ஸஸ்ஸ த்³வாரபா⁴வேன யதா²ரஹம் பவத்ததி, நோ அஞ்ஞதா²தி நாமரூபபச்சயா ஸளாயதனம். ப²ஸ்ஸோ ச ஸளாயதனஸம்ப⁴வேயேவ ஆரம்மணம் பு²ஸதி. ந ஹி த்³வாராபா⁴வே தஸ்ஸுப்பத்தி ஸியாதி ஸளாயதனபச்சயா ப²ஸ்ஸோ. இட்டா²னிட்ட²மஜ்ஜ²த்தஞ்ச ஆரம்மணம் பு²ஸந்தோயேவ வேத³னம் வேத³யதி, நோ அஞ்ஞதா²தி ப²ஸ்ஸபச்சயா வேத³னா. வேத³னீயேஸு ச த⁴ம்மேஸு அஸ்ஸாதா³னுபஸ்ஸினோ வேத³னாஹேதுகா தண்ஹா ஸமுட்டா²தீதி வேத³னாபச்சயா தண்ஹா. தண்ஹாஸினேஹபிபாஸிதாயேவ ச உபாதா³னியேஸு த⁴ம்மேஸு உபாதா³ய த³ள்ஹபா⁴வாய ஸம்வத்தந்தி. தண்ஹாய ஹி ரூபாதீ³னி அஸ்ஸாதே³த்வா அஸ்ஸாதே³த்வா காமேஸு பாதப்³யதம் ஆபஜ்ஜந்தீதி தண்ஹா காமுபாதா³னஸ்ஸ பச்சயோ. ததா² ரூபாதி³பே⁴தே³க³தி⁴தோ ‘‘நத்தி² தி³ன்ன’’ந்த்யாதி³னா மிச்சா²த³ஸ்ஸனம் ஸம்ஸாரதோ முச்சிதுகாமோ அஸுத்³தி⁴மக்³கே³ ஸுத்³தி⁴மக்³க³பராமாஸம் க²ந்தே⁴ஸு அத்தத்தனியகா³ஹபூ⁴தம் அத்தவாத³த³ஸ்ஸனத்³வயஞ்ச க³ண்ஹாதி, தஸ்மா தி³ட்டு²பாதா³தீ³னம்பி பச்சயோதி தண்ஹாபச்சயா உபாதா³னம். யதா²ரஹம் ஸம்பயோகா³னுஸயவஸேன உபாதா³னபதிட்டி²தாயேவ ஸத்தா கம்மாயூஹனாய ஸம்வத்தந்தீதி உபாதா³னம் ப⁴வஸ்ஸ பச்சயோ. உபபத்திப⁴வஸங்கா²தா ச ஜாதி கம்மப⁴வஹேதுகாயேவ. பீ³ஜதோ அங்குரோ விய தத்த² தத்த² ஸமுபலப்³ப⁴தீதி ப⁴வோ ஜாதியா பச்சயோ நாம. ஸதி ச ஜாதியா ஏவ ஜராமரணஸம்ப⁴வோ. ந ஹி அஜாதானம் ஜராமரணஸம்ப⁴வோ ஹோதீதி ஜாதி ஜராமரணானம் பச்சயோதி ஏவமேதேஸம் தப்³பா⁴வபா⁴வீபா⁴வோ த³ட்ட²ப்³போ³.

ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீதி யதா²வுத்தேன பச்சயபரம்பரவிதி⁴னா, ந பன இஸ்ஸரனிம்மானாதீ³ஹி ஏதஸ்ஸ வட்டஸங்கா²தஸ்ஸ கேவலஸ்ஸ ஸுகா²தீ³ஹி அஸம்மிஸ்ஸஸ்ஸ, ஸகலஸ்ஸ வா து³க்க²க்க²ந்த⁴ஸ்ஸ து³க்க²ராஸிஸ்ஸ ந ஸுக²ஸுபா⁴தீ³னம் ஸமுத³யோ நிப்³ப³த்தி ஹோதி. ஏத்த² இமஸ்மிம் பச்சயஸங்க³ஹாதி⁴காரே.

5. அததி ஸததம் க³ச்ச²தி பவத்ததீதி அத்³தா⁴, காலோ.

6. அவிஜ்ஜாஸங்கா²ரா அதீதோ அத்³தா⁴ அதீதப⁴வபரியாபன்னஹேதூனமேவேத்த² அதி⁴ப்பேதத்தா, அத்³தா⁴க்³க³ஹணேன ச அவிஜ்ஜாதீ³னம் த⁴ம்மானமேவ க³ஹணம் தப்³பி³னிமுத்தஸ்ஸ கஸ்ஸசி காலஸ்ஸ அனுபலப்³ப⁴னதோ. நிருத்³தா⁴னுப்பாதா³ ஏவ ஹி த⁴ம்மா அதீதானாக³தகாலவஸேன உப்பாதா³தி³க்க²ணத்தயபரியாபன்னா ச பச்சுப்பன்னகாலவஸேன வோஹரீயந்தி. ஜாதிஜராமரணம் அனாக³தோ அத்³தா⁴ பச்சுப்பன்னஹேதுதோ அனாக³தே நிப்³ப³த்தனதோ. மஜ்ஜே² பச்சுப்பன்னோ அத்³தா⁴ அதீதஹேதுதோ இத⁴ நிப்³ப³த்தனகப²லஸபா⁴வத்தா, அனாக³தப²லஸ்ஸ இத⁴ ஹேதுஸபா⁴வத்தா ச மஜ்ஜே² விஞ்ஞாணாதீ³னி அட்ட²ங்கா³னி பச்சுப்பன்னோ அத்³தா⁴.

8. நனு ஸோகபரிதே³வாத³யோபி அங்க³பா⁴வேன வத்தப்³பா³தி ஆஹ ‘‘ஸோகாதி³வசன’’ந்த்யாதி³. ஸோகாதி³வசனம் ஜாதியா நிஸ்ஸந்த³ஸ்ஸ அமுக்²யப²லமத்தஸ்ஸ நித³ஸ்ஸனம், ந பன விஸும் அங்க³த³ஸ்ஸனந்த்யத்தோ².

9. தண்ஹுபாதா³னப⁴வாபி க³ஹிதா ஹோந்தீதி கிலேஸபா⁴வஸாமஞ்ஞதோ அவிஜ்ஜாக்³க³ஹணேன தண்ஹுபாதா³னானி, கம்மப⁴வஸாமஞ்ஞதோ ஸங்கா²ரக்³க³ஹணேன கம்மப⁴வோ க³ஹிதோ. ததா² தண்ஹுபாதா³னப⁴வக்³க³ஹணேன ச அவிஜ்ஜாஸங்கா²ரா க³ஹிதாதி ஸம்ப³ந்தோ⁴. ஏத்தா²பி வுத்தனயேன தேஸம் க³ஹணேன தேஸம் ஸங்க³ஹோ த³ட்ட²ப்³போ³, விஞ்ஞாணனாமரூபஸளாயதனப²ஸ்ஸவேத³னானம் ஜாதிஜராப⁴ங்கா³வ ஜாதிஜராமரணந்தி ச வுத்தாதி ஆஹ ‘‘ஜாதிஜராமரணக்³க³ஹணேனா’’த்யாதி³.

10. அதீதே ஹேதவோ பஞ்சாதி ஸரூபதோ வுத்தானம் த்³வின்னம் அவிஜ்ஜாஸங்கா²ரானம், ஸங்க³ஹவஸேன க³ஹிதானம் திண்ணம் தண்ஹுபாதா³னப⁴வானஞ்ச வஸேன பச்சுப்பன்னப²லஸ்ஸ பச்சயா அதீதப⁴வே நிப்³ப³த்தா ஹேதவோ பஞ்ச, இதா³னி ப²லபஞ்சகந்தி அதீதஹேதுபச்சயா இத⁴ பச்சுப்பன்னே நிப்³ப³த்தம் விஞ்ஞாணாதி³ப²லபஞ்சகம். இதா³னி ஹேதவோ பஞ்சாதி ஸரூபதோ வுத்தானம் தண்ஹாதீ³னம் திண்ணம், ஸங்க³ஹதோ லத்³தா⁴னம் அவிஜ்ஜாஸங்கா²ரானம் த்³வின்னஞ்ச வஸேன ஆயதிம் ப²லஸ்ஸ பச்சயா இதா³னி ஹேதவோ பஞ்ச. ஆயதிம் ப²லபஞ்சகந்தி ஜாதிஜராமரணக்³க³ஹணேன வுத்தம் பச்சுப்பன்னஹேதுபச்சயா அனாக³தே நிப்³ப³த்தனகவிஞ்ஞாணாதி³ப²லபஞ்சகந்தி ஏவம் வீஸதி அதீதாதீ³ஸு தத்த² தத்த² ஆகிரியந்தீதி ஆகாரா.

அதீதஹேதூனம், இதா³னி ப²லபஞ்சகஸ்ஸ ச அந்தரா ஏகோ ஸந்தி⁴, இதா³னி ப²லபஞ்சகஸ்ஸ, இதா³னி ஹேதூனஞ்ச அந்தரா ஏகோ, இதா³னி ஹேதூனம், ஆயதிம் ப²லஸ்ஸ ச அந்தரா ஏகோதி ஏவம் திஸந்தி⁴. வுத்தஞ்ஹேதம் – ‘‘ஸங்கா²ரவிஞ்ஞாணானமந்தரா ஏகோ, வேத³னாதண்ஹானமந்தரா ஏகோ, ப⁴வஜாதீனமந்தரா ஏகோ ஸந்தீ⁴’’தி. ஏத்த² ஹி ஹேதுதோப²லஸ்ஸ அவிச்சே²த³ப்பவத்திபா⁴வதோ ஹேதுப²லஸம்ப³ந்த⁴பூ⁴தோ பட²மோ ஸந்தி⁴, ததா² ததியோ, து³தியோ பன ப²லதோ ஹேதுனோ அவிச்சே²த³ப்பவத்திபா⁴வதோ ப²லஹேதுஸம்ப³ந்த⁴பூ⁴தோ. ப²லபூ⁴தோபி ஹி த⁴ம்மோ அஞ்ஞஸ்ஸ ஹேதுஸபா⁴வஸ்ஸ த⁴ம்மஸ்ஸ பச்சயோதி. ஸங்கி²பீயந்தி ஏத்த² அவிஜ்ஜாத³யோ, விஞ்ஞாணாத³யோ சாதி ஸங்கே²போ, அதீதஹேது, ஏதரஹி விபாகோ, ஏதரஹி ஹேது ஆயதிம் விபாகோதி சத்தாரோ ஸங்கே²பாதி சதுஸங்கே²பா.

11. கம்மப⁴வஸங்கா²தோ ப⁴வேகதே³ஸோதி ஏத்த² ஆயதிம் படிஸந்தி⁴யா பச்சயசேதனா ப⁴வோ நாம, புரிமகம்மப⁴வஸ்மிம் இத⁴ படிஸந்தி⁴யா பச்சயசேதனா ஸங்கா²ராதி வேதி³தப்³பா³. அவஸேஸா சாதி விஞ்ஞாணாதி³பஞ்சகஜாதிஜராமரணவஸேன ஸத்தவிதா⁴ பச்சுப்பன்னப²லவஸேன வுத்தத⁴ம்மா. உபபத்திப⁴வஸங்கா²தோ ப⁴வேகதே³ஸோதி பன அனாக³தபரியாபன்னா வேதி³தப்³பா³. ப⁴வ-ஸத்³தே³ன கம்மப⁴வஸ்ஸபி வுச்சமானத்தா ப⁴வேகதே³ஸ-ஸத்³தோ³ வுத்தோ.

12. புப்³ப³ந்தஸ்ஸ அவிஜ்ஜா மூலம். அபரந்தஸ்ஸ தண்ஹா மூலந்தி ஆஹ அவிஜ்ஜாதண்ஹாவஸேன த்³வே மூலானீ’’தி.

13. தேஸமேவ அவிஜ்ஜாதண்ஹாஸங்கா²தானம் வட்டமூலானம் நிரோதே⁴ன அனுப்பாத³த⁴ம்மதாபத்தியா ஸச்சப்படிவேத⁴தோ ஸித்³தா⁴ய அப்பவத்தியா வட்டம் நிருஜ்ஜ²தி. அபி⁴ண்ஹஸோ அபி⁴க்க²ணம் ஜராமரணஸங்கா²தாய முச்சா²ய பீளிதானம் ஸத்தானம் ஸோகாதி³ஸமப்பிதானம் காமாஸவாதி³ஆஸவானம் ஸமுப்பாத³தோ புன அவிஜ்ஜா ச பவத்ததி. ‘‘ஆஸவஸமுத³யா அவிஜ்ஜாஸமுத³யோ’’தி (ம. நி. 1.103) ஹி வுத்தம். ஏதேன அவிஜ்ஜாயபி பச்சயோ த³ஸ்ஸிதோ ஹோதி, இதரதா² படிச்சஸமுப்பாத³சக்கம் அப³த்³த⁴ம் ஸியாதி. இச்சேவம் வுத்தனயேன ஆப³த்³த⁴ம் அவிச்சி²ன்னம் அனாதி³கம் ஆதி³ரஹிதம் திபூ⁴மகபரியாபன்னத்தா தேபூ⁴மகம் கிலேஸகம்மவிபாகவஸேன திவட்டபூ⁴தம் படிச்சஸமுப்பாதோ³தி பட்ட²பேஸி பஞ்ஞபேஸி மஹாமுனி ஸம்மாஸம்பு³த்³தோ⁴.

படிச்சஸமுப்பாத³னயவண்ணனா நிட்டி²தா.

பட்டா²னனயவண்ணனா

14. ஏவம் படிச்சஸமுப்பாத³னயம் விபா⁴க³தோ த³ஸ்ஸேத்வா இதா³னி பட்டா²னனயம் த³ஸ்ஸேதும் ‘‘ஹேதுபச்சயோ’’த்யாதி³ வுத்தம். தத்த² ஹினோதி பதிட்டா²தி ஏதேனாதி ஹேது. அனேகத்த²த்தா தா⁴துஸத்³தா³னம் ஹி-ஸத்³தோ³ இத⁴ பதிட்ட²த்தோ²தி த³ட்ட²ப்³போ³. ஹினோதி வா ஏதேன கம்மனிதா³னபூ⁴தேன உத்³த⁴ம் ஓஜம் அபி⁴ஹரந்தேன மூலேன விய பாத³போ தப்பச்சயம் ப²லம் க³ச்ச²தி பவத்ததி வுத்³தி⁴ம் விரூள்ஹிம் ஆபஜ்ஜதீதி ஹேது. ஹேது ச ஸோ பச்சயோ சாதி ஹேதுபச்சயோ. ஹேது ஹுத்வா பச்சயோ, ஹேதுபா⁴வேன பச்சயோதி வுத்தம் ஹோதி. மூலட்டே²ன ஹேது, உபகாரட்டே²ன பச்சயோதி ஸங்கே²பதோ மூலட்டே²ன உபகாரகோ த⁴ம்மோ ஹேதுபச்சயோ. ஸோ பன பவத்தே சித்தஸமுட்டா²னானம், படிஸந்தி⁴யம் கம்மஸமுட்டா²னானஞ்ச ரூபானம் உப⁴யத்த² ஸம்பயுத்தானம் நாமத⁴ம்மானஞ்ச ருக்க²ஸ்ஸ மூலானி விய ஸுப்பதிட்டி²தபா⁴வஸாத⁴னஸங்கா²தமூலட்டே²ன உபகாரகா ச² த⁴ம்மாதி த³ட்ட²ப்³ப³ம்.

ஆலம்பீ³யதி து³ப்³ப³லேன விய த³ண்டா³தி³கம் சித்தசேதஸிகேஹி க³ய்ஹதீதி ஆரம்மணம். சித்தசேதஸிகா ஹி யம் யம் த⁴ம்மம் ஆரப்³ப⁴ பவத்தந்தி, தே தே த⁴ம்மா தேஸம் தேஸம் த⁴ம்மானம் ஆரம்மணபச்சயோ நாம. ந ஹி ஸோ த⁴ம்மோ அத்தி², யோ சித்தசேதஸிகானம் ஆரம்மணபச்சயபா⁴வம் ந க³ச்சே²ய்ய. அத்தாதீ⁴னப்பவத்தீனம் பதிபூ⁴தோ பச்சயோ அதி⁴பதிபச்சயோ.

ந விஜ்ஜதி பச்சயுப்பன்னேன ஸஹ அந்தரம் ஏதஸ்ஸ பச்சயஸ்ஸாதி அனந்தரபச்சயோ. ஸண்டா²னாபா⁴வேன ஸுட்டு² அனந்தரபச்சயோ ஸமனந்தரபச்சயோ. அத்தனோ அத்தனோ அனந்தரம் அனுரூபசித்துப்பாத³ஜனனஸமத்தோ² புரிமபுரிமனிருத்³தோ⁴ த⁴ம்மோ ‘‘அனந்தரபச்சயோ’’, ‘‘ஸமனந்தரபச்சயோ’’தி ச வுச்சதி. ப்³யஞ்ஜனமத்தேனேவ ஹி நேஸம் விஸேஸோ. அத்த²தோ பன உப⁴யம்பி ஸமனந்தரனிருத்³த⁴ஸ்ஸேவாதி⁴வசனம். ந ஹி தேஸம் அத்த²தோ பே⁴தோ³ உபலப்³ப⁴தி. யம் பன கேசி வத³ந்தி ‘‘அத்தா²னந்தரதாய அனந்தரபச்சயோ, காலானந்தரதாய ஸமனந்தரபச்சயோ’’தி, தம் ‘‘நிரோதா⁴ வுட்ட²ஹந்தஸ்ஸ நேவஸஞ்ஞானாஸஞ்ஞாயதனம் ப²லஸமாபத்தியா ஸமனந்தரபச்சயேன பச்சயோ’’த்யாதீ³ஹி (பட்டா². 1.1.417) விருஜ்ஜ²தி. நேவஸஞ்ஞானாஸஞ்ஞாயதனம் ஹி ஸத்தாஹாதி³காலம் நிருத்³த⁴ம் ப²லஸமாபத்தியா ஸமனந்தரபச்சயோ, தஸ்மா அபி⁴னிவேஸம் அகத்வா ப்³யஞ்ஜனமத்ததோவேத்த² நானாகரணம் பச்சேதப்³ப³ம், ந அத்த²தோ. புப்³ப³த⁴ம்மனிரோத⁴ஸ்ஸ ஹி பச்சா²ஜாதத⁴ம்முப்பாத³னஸ்ஸ ச அந்தராபா⁴வேன உப்பாத³னஸமத்த²தாய நிரோதோ⁴ அனந்தரபச்சயதா, ‘‘இத³மிதோ உத்³த⁴ம், இத³ம் ஹேட்டா², இத³ம் ஸமந்ததோ’’தி அத்தனா ஏகத்தம் உபனேத்வா விய ஸுட்டு² அனந்தரபா⁴வேன உப்பாதே³தும் ஸமத்த²ம் ஹுத்வா நிரோதோ⁴ ஸமனந்தரபச்சயதாதி ஏவம் ப்³யஞ்ஜனமத்ததோவ பே⁴தோ³. நிரோத⁴பச்சயஸ்ஸபி ஹி நேவஸஞ்ஞானாஸஞ்ஞாயதனஸ்ஸ அஸஞ்ஞுப்பத்தியா புரிமஸ்ஸ ச சுதிசித்தஸ்ஸ காலந்தரேபி உப்பஜ்ஜந்தானம் ப²லபடிஸந்தீ⁴னம் அந்தரா ஸமானஜாதியேன அரூபத⁴ம்மேன ப்³யவதா⁴னாபா⁴வதோ பி⁴ன்னஜாதிகானஞ்ச ரூபத⁴ம்மானம் ப்³யவதா⁴னகரணே அஸமத்த²தாய நிரந்தருப்பாத³னே ஏகத்தம் உபனேத்வா விய உப்பாத³னே ச ஸமத்த²தா அத்தீ²தி தேஸம்பி அனந்தரஸமனந்தரபச்சயதா லப்³ப⁴தி, தஸ்மா த⁴ம்மதோ அவிஸேஸேபி ததா² ததா² பு³ஜ்ஜ²னகானம் வேனேய்யானம் வஸேன உபஸக்³க³த்த²விஸேஸமத்ததோவ பே⁴தோ³ பச்சேதப்³போ³தி.

அத்தனோ அனுப்பத்தியா ஸஹுப்பன்னானம்பி அனுப்பத்திதோ பகாஸஸ்ஸ பதீ³போ விய ஸஹுப்பன்னானம் ஸஹுப்பாத³பா⁴வேன பச்சயோ ஸஹஜாதபச்சயோ, அரூபினோ சதுக்க²ந்தா⁴, சத்தாரோ மஹாபூ⁴தா, படிஸந்தி⁴க்க²ணே வத்து²விபாகா ச த⁴ம்மா.

அஞ்ஞமஞ்ஞம் உபத்த²ம்ப⁴யமானம் தித³ண்ட³ம் விய அத்தனோ உபகாரகத⁴ம்மானம் உபத்த²ம்ப⁴கபா⁴வேன பச்சயோ அஞ்ஞமஞ்ஞபச்சயோ. அஞ்ஞமஞ்ஞதாவஸேனேவ ச உபகாரகதா அஞ்ஞமஞ்ஞபச்சயதா, ந ஸஹஜாதமத்தேனாதி அயமேதேஸம் த்³வின்னம் விஸேஸோ. ததா² ஹி ஸஹஜாதபச்சயபா⁴வீயேவ கோசி அஞ்ஞமஞ்ஞபச்சயோ ந ஹோதி சித்தஜரூபானம் ஸஹஜாதபச்சயபா⁴வினோ நாமஸ்ஸ உபாதா³ரூபானம் ஸஹஜாதபச்சயபா⁴வீனம் மஹாபூ⁴தானஞ்ச அஞ்ஞமஞ்ஞபச்சயபா⁴வஸ்ஸ அனுத்³த⁴டத்தா. யதி³ ஹி ஸஹஜாதபா⁴வேனேவ அத்தனோ உபகாரகானம் உபகாரகதா அஞ்ஞமஞ்ஞபச்சயதா ஸியா, ததா³ ஸஹஜாதஅஞ்ஞமஞ்ஞபச்சயேஹி ஸமானேஹி ப⁴விதப்³ப³ந்தி.

சித்தகம்மஸ்ஸ படோ விய ஸஹஜாதனாமரூபானம் நிஸ்ஸயபூ⁴தா சதுக்க²ந்தா⁴, தருபப்³ப³தாதீ³னம் பத²வீ விய ஆதா⁴ரணதோயேவ ஸஹஜாதரூபஸத்தவிஞ்ஞாணதா⁴தூனம் யதா²க்கமம் நிஸ்ஸயா பூ⁴தரூபம், வத்து² சாதி இமே நிஸ்ஸயபச்சயோ நாம நிஸ்ஸீயதி நிஸ்ஸிதகேஹீதி கத்வா, ப³லவபா⁴வேன நிஸ்ஸயோ பச்சயோ உபனிஸ்ஸயபச்சயோ உப-ஸத்³த³ஸ்ஸ அதிஸயஜோதகத்தா, தஸ்ஸ பன பே⁴த³ம் வக்க²தி.

ச² வத்தூ²னி, ச² ஆரம்மணானி சாதி இமே பச்சயுப்பன்னதோ பட²மம் உப்பஜ்ஜித்வா பவத்தமானபா⁴வேன உபகாரகோ புரேஜாதபச்சயோ. பச்சா²ஜாதபச்சயே அஸதி ஸந்தானட்டி²திஹேதுபா⁴வம் ஆக³ச்ச²ந்தஸ்ஸ காயஸ்ஸ உபத்த²ம்ப⁴னபா⁴வேன உபகாரகா பச்சா²ஜாதா சித்தசேதஸிகா த⁴ம்மா பச்சா²ஜாதபச்சயோ. ஸோ கி³ஜ்ஜ²போதகஸரீரானம் ஆஹாராஸா சேதனா விய த³ட்ட²ப்³போ³.

புரிமபுரிமபரிசிதக³ந்தோ² விய உத்தரஉத்தரக³ந்த²ஸ்ஸ குஸலாதி³பா⁴வேன அத்தஸதி³ஸஸ்ஸ பகு³ணப³லவபா⁴வவிஸிட்ட²அத்தஸமானஜாதியதாகா³ஹணம் ஆஸேவனம், தேன பச்சயா ஸஜாதியத⁴ம்மானம் ஸஜாதியத⁴ம்மாவ ஆஸேவனபச்சயோ. பி⁴ன்னஜாதிகா ஹி பி⁴ன்னஜாதிகேஹி ஆஸேவனபகு³ணேன பகு³ணப³லவபா⁴வவிஸிட்ட²ம் குஸலாதி³பா⁴வஸங்கா²தம் அத்தனோ க³திம் கா³ஹாபேதும் ந ஸக்கோந்தி, ந ச ஸயம் ததோ க³ண்ஹந்தி, தே பன அனந்தராதீதானி லோகியகுஸலாகுஸலானி சேவ அனாவஜ்ஜனகிரியஜவனானி சாதி த³ட்ட²ப்³ப³ம். சித்தப்பயோக³ஸங்கா²தகிரியாபா⁴வேன ஸஹஜாதானம் நானாக்க²ணிகானம் விபாகானம், கடத்தாரூபானஞ்ச உபகாரிகா சேதனா கம்மபச்சயோ.

அத்தனோ நிருஸ்ஸாஹஸந்தபா⁴வேன ஸஹஜாதனாமரூபானம் நிருஸ்ஸாஹஸந்தபா⁴வாய உபகாரகா விபாகசித்தசேதஸிகா விபாகபச்சயோ. தே ஹி பயோகே³ன அஸாதே⁴தப்³ப³தாய கம்மஸ்ஸ கடத்தா நிப்ப²ஜ்ஜமானமத்ததோ நிருஸ்ஸாஹஸந்தபா⁴வா ஹோந்தி, ந கிலேஸவூபஸமஸந்தபா⁴வா. ததா² ஸந்தபா⁴வதோயேவ ஹி ப⁴வங்கா³த³யோ து³ப்³பி³ஞ்ஞேய்யா. அபி⁴னிபாதஸம்படிச்ச²னஸந்தீரணமத்தா பன விபாகா து³ப்³பி³ஞ்ஞேய்யாவ. ஜவனப்பவத்தியாவ நேஸம் ரூபாதி³க்³க³ஹிததா விஞ்ஞாயதி.

ரூபாரூபானம் உபத்த²ம்ப⁴கத்தேன உபகாரகா சத்தாரோ ஆஹாரா ஆஹாரபச்சயோ. ஸதிபி ஹி ஜனகபா⁴வே உபத்த²ம்ப⁴கத்தமேவ ஆஹாரஸ்ஸ பதா⁴னகிச்சம். ஜனயந்தோபி ஆஹாரோ அவிச்சே²த³வஸேன உபத்த²ம்பே⁴ந்தோ வ ஜனேதீதி உபத்த²ம்ப⁴கபா⁴வோ வ ஆஹாரபா⁴வோ. தேஸு தேஸு கிச்சேஸு பச்சயுப்பன்னத⁴ம்மேஹி அத்தானம் அனுவத்தாபனஸங்கா²தாதி⁴பதியட்டே²ன பச்சயோ இந்த்³ரியபச்சயோ.

ஆரம்மணூபனிஜ்ஜா²னலக்க²ணூபனிஜ்ஜா²னவஸேன உபக³ந்த்வா ஆரம்மணனிஜ்ஜா²னகா விதக்காத³யோ ஜா²னபச்சயோ. ஸுக³திதோ புஞ்ஞதோ, து³க்³க³ஹிதோ பாபதோ வா நிய்யானட்டே²ன உபகாரகா ஸம்மாதி³ட்டா²த³யோ மக்³க³பச்சயோ.

பரமத்த²தோ பி⁴ன்னாபி ஏகீபா⁴வக³தா விய ஏகுப்பாதா³தி³பா⁴வஸங்கா²தஸம்பயோக³லக்க²ணேன உபகாரகா நாமத⁴ம்மா வ ஸம்பயுத்தபச்சயோ. அஞ்ஞமஞ்ஞஸம்ப³ந்த⁴தாய யுத்தாபி ஸமானா விப்பயுத்தபா⁴வேன விஸம்ஸட்ட²தாய நானத்துபக³மனேன உபகாரகா வத்து²சித்தசேதஸிகா விப்பயுத்தபச்சயோ.

பச்சுப்பன்னஸபா⁴வஸங்கா²தேன அத்தி²பா⁴வேன தாதி³ஸஸ்ஸேவ த⁴ம்மஸ்ஸ உபத்த²ம்ப⁴கத்தேன உபகாரகா ‘‘ஸஹஜாதம் புரேஜாத’’ந்த்யாதி³னா வக்க²மானத⁴ம்மா அத்தி²பச்சயோ. ஸதிபி ஹி ஜனகத்தே டி²தியம்யேவ ஸாதிஸயோ அத்தி²பச்சயானம் ப்³யாபாரோதி உபத்த²ம்ப⁴கதாவ தேஸம் க³ஹிதா. ஏகஸ்மிம் ப²ஸ்ஸாதி³ஸமுதா³யே பவத்தமானே து³தியஸ்ஸ அபா⁴வதோ அத்தனோ டி²தியா ஓகாஸம் அலப⁴ந்தானம் அனந்தரமுப்பஜ்ஜமானகசித்தசேதஸிகானம் ஓகாஸதா³னவஸேன உபகாரகா அனந்தரனிருத்³தா⁴ சித்தசேதஸிகா நத்தி²பச்சயோ.

அத்தனோ ஸபா⁴வாவிக³மனேன அப்பவத்தமானானம் விக³தபா⁴வேன உபகாரகாயேவ த⁴ம்மா விக³தபச்சயோ. நிரோதா⁴னுபக³மனவஸேன உபகாரகா அத்தி²பச்சயா வ அவிக³தபச்சயோ. ஸஸபா⁴வதாமத்தேன உபகாரகதா அத்தி²பச்சயதா, நிரோதா⁴னுபக³மனவஸேன உபகாரகதா அவிக³தபச்சயதாதி பச்சயதாவிஸேஸோ நேஸம் த⁴ம்மாவிஸேஸேபி த³ட்ட²ப்³போ³. த⁴ம்மானஞ்ஹி ஸமத்த²தாவிஸேஸம் ஸப்³பா³காரேன ஞத்வா ப⁴க³வதா சதுவீஸதிபச்சயா தே³ஸிதாதி ப⁴க³வதி ஸத்³தா⁴ய ‘‘ஏவம் விஸேஸா ஏதே த⁴ம்மா’’தி ஸுதமயஞாணம் உப்பாதே³த்வா சிந்தாபா⁴வனாமயஞாணேஹி தத³பி⁴ஸமயாய யோகோ³ கரணீயோ. அவிஸேஸேபி ஹி த⁴ம்மஸாமக்³கி³யஸ்ஸ ததா² ததா² வினேதப்³ப³புக்³க³லானம் வஸேன ஹேட்டா² வுத்தோபி பச்சயோ புன பகாரந்தேன வுச்சதி அஹேதுகது³கம் வத்வாபி ஹேதுவிப்பயுத்தது³கம் வியாதி த³ட்ட²ப்³ப³ம்.

15. நாமம் சதுக்க²ந்த⁴ஸங்கா²தம் நாமம் தாதி³ஸஸ்ஸேவ நாமஸ்ஸ ச²தா⁴ ச²ஹாகாரேஹி பச்சயோ ஹோதி, ததே³வ நாமரூபீனம் ஸமுதி³தானம் பஞ்சதா⁴ பச்சயோ ஹோதி, ரூபஸ்ஸ புன பூ⁴துபாதா³யபே⁴த³ஸ்ஸ ஏகதா⁴ பச்சயோ ஹோதி, ரூபஞ்ச நாமஸ்ஸ ஏகதா⁴ பச்சயோ, பஞ்ஞத்தினாமரூபானி நாமஸ்ஸ த்³விதா⁴ த்³விப்பகாரா பச்சயா ஹோந்தி, த்³வயம் பன நாமரூபத்³வயம் ஸமுதி³தம் த்³வயஸ்ஸ தாதி³ஸஸ்ஸேவ நாமரூபத்³வயஸ்ஸ நவதா⁴ பச்சயோ சேதி ஏவம் பச்சயா ச²ப்³பி³தா⁴ டி²தா.

16. விபாகப்³யாகதம் கம்மவஸேன விபாகபா⁴வப்பத்தம் கம்மவேக³க்கி²த்தபதிதம் விய ஹுத்வா பவத்தமானம் அத்தனோ ஸபா⁴வம் கா³ஹேத்வா பரிபா⁴வேத்வா நேவ அஞ்ஞம் பவத்தேதி, ந ச புரிமவிபாகானுபா⁴வம் க³ஹேத்வா உப்பஜ்ஜதி. ‘‘ந மக்³க³பச்சயா ஆஸேவனே ஏக’’ந்தி (பட்டா². 1.1.221) வசனதோ ச அஹேதுககிரியேஸு ஹஸிதுப்பாத³ஸ்ஸேவ ஆஸேவனதாஉத்³த⁴ரணேன ஆவஜ்ஜனத்³வயம் ஆஸேவனபச்சயோ ந ஹோதி, தஸ்மா ஜவனானேவ ஆஸேவனபச்சயபா⁴வம் க³ச்ச²ந்தீதி ஆஹ ‘‘புரிமானி ஜவனானீ’’த்யாதி³. அவிஸேஸவசனேபேத்த² லோகியகுஸலாகுஸலாப்³யாகதஜவனானேவ த³ட்ட²ப்³பா³னி லோகுத்தரஜவனானம் ஆஸேவனபா⁴வஸ்ஸ அனுத்³த⁴டத்தா.

ஏவஞ்ச கத்வா வுத்தம் பட்டா²னட்ட²கதா²யம் (பட்டா². அட்ட². 1.12) ‘‘லோகுத்தரோ பன ஆஸேவனபச்சயோ நாம நத்தீ²’’தி. தத்த² ஹி குஸலம் பி⁴ன்னஜாதிகஸ்ஸ புரேசரத்தா ந தேன ஆஸேவனகு³ணம் க³ண்ஹாபேதி, ப²லசித்தானி ச ஜவனவஸேன உப்பஜ்ஜமானானிபி விபாகாப்³யாகதே வுத்தனயேன ஆஸேவனம் ந க³ண்ஹந்தி, ந ச அஞ்ஞம் கா³ஹாபேந்தி. யம்பி ‘‘ஆஸேவனவினிமுத்தம் ஜவனம் நத்தீ²’’தி ஆசரியத⁴ம்மபாலத்தே²ரேன வுத்தம், தம்பி யேபு⁴ய்யவஸேன வுத்தந்தி விஞ்ஞாயதி. இதரதா² ஆசரியஸ்ஸ அஸமபேக்கி²தாபி⁴தா⁴யகத்தப்பஸங்கோ³ ஸியா. மக்³கோ³ பன கோ³த்ரபு⁴தோ ஆஸேவனம் ந க³ண்ஹாதீதி நத்தி² பூ⁴மிஆதி³வஸேன நானாஜாதிதாய அனதி⁴ப்பேதத்தா. ததா² ஹி வுத்தம் பட்டா²னே ‘‘கோ³த்ரபு⁴ மக்³க³ஸ்ஸ ஆஸேவனபச்சயேன பச்சயோ, வோதா³னம் மக்³க³ஸ்ஸ ஆஸேவனபச்சயேன பச்சயோ’’தி (பட்டா². 1.1.426). ஏகுப்பாதா³தி³சதுப்³பி³த⁴ஸம்பயோக³லக்க²ணாபா⁴வதோ ஸஹுப்பன்னானம்பி ரூபத⁴ம்மானம் ஸம்பயுத்தபச்சயதா நத்தீ²தி வுத்தம் ‘‘சித்தசேதஸிகா த⁴ம்மா அஞ்ஞமஞ்ஞ’’ந்தி.

17. ஹேதுஜா²னங்க³மக்³க³ங்கா³னி ஸஹஜாதானம் நாம ரூபானந்தி தயோபேதே படிஸந்தி⁴யம் கம்மஸமுட்டா²னானம், பவத்தியம் சித்தஸமுட்டா²னானஞ்ச ரூபானம், உப⁴யத்த² ஸஹஜாதானம் நாமானஞ்ச ஹேதாதி³பச்சயேன பச்சயா ஹோந்தி. ‘‘ஸஹஜாதரூபந்தி ஹி ஸப்³ப³த்த² படிஸந்தி⁴யம் கம்மஸமுட்டா²னானம், பவத்தியம் சித்தஸமுட்டா²னான’’ந்தி வக்க²தி. ஸஹஜாதா சேதனாதி அந்தமஸோ சக்கு²விஞ்ஞாணாதீ³ஹிபி ஸஹஜாதசேதனா. ஸஹஜாதானம் நாம ரூபானந்தி ஸப்³பா³பி சேதனா நாமானம், படிஸந்தி⁴ஸஹக³தா சேதனா கம்மஸமுட்டா²னரூபானம், பவத்தியம் ரூபஸமுட்டா²பகசித்தஸஹக³தா சேதனா சித்தஸமுட்டா²னரூபானஞ்ச. நானாக்க²ணிகா சேதனாதி விபாகக்க²ணதோ நானாக்க²ணே அதீதப⁴வாதீ³ஸு நிப்³ப³த்தா குஸலாகுஸலசேதனா. நாமரூபானந்தி உப⁴யத்தா²பி நாமரூபானம். விபாகக்க²ந்தா⁴தி படிஸந்தி⁴விஞ்ஞாணாதி³கா விபாகா அரூபக்க²ந்தா⁴. கம்மஸமுட்டா²னம்பி ஹி ரூபம் விபாகவோஹாரம் ந லப⁴தி அரூபத⁴ம்மபா⁴வேன, ஸாரம்மணபா⁴வேன ச கம்மஸதி³ஸேஸு அரூபத⁴ம்மேஸ்வேவ விபாக-ஸத்³த³ஸ்ஸ நிருள்ஹத்தா.

18. புரேஜாதஸ்ஸ இமஸ்ஸ காயஸ்ஸாதி பச்சயத⁴ம்மதோ புரே உப்பன்னஸ்ஸ இமஸ்ஸ ரூபகாயஸ்ஸ. கத²ம் பன பச்சயுப்பன்னஸ்ஸ புரே நிப்³ப³த்தியம் பச்சா²ஜாதஸ்ஸ பச்சயதாதி? நனு வுத்தம் ‘‘பச்சா²ஜாதபச்சயே அஸதி ஸந்தானட்டி²திஹேதுகபா⁴வம் ஆக³ச்ச²ந்தஸ்ஸா’’தி, தஸ்மா ஸந்தானப்பவத்தஸ்ஸ ஹேதுபா⁴வுபத்த²ம்ப⁴னே இமஸ்ஸ ப்³யாபாரோதி ந கோசி விரோதோ⁴.

19. படிஸந்தி⁴யம் சக்கா²தி³வத்தூ²னம் அஸம்ப⁴வதோ, ஸதி ச ஸம்ப⁴வே தம்தம்விஞ்ஞாணானம் பச்சயபா⁴வானுபக³மனதோ, ஹத³யவத்து²னோ ச படிஸந்தி⁴விஞ்ஞாணேன ஸஹுப்பன்னஸ்ஸ புரேஜாதகதாபா⁴வதோ வுத்தம் ‘‘ச²வத்தூ²னி பவத்திய’’ந்தி. ‘‘பஞ்சாரம்மணானி பஞ்சவிஞ்ஞாணவீதி²யா’’தி ச இத³ம் ஆரம்மணபுரேஜாதனித்³தே³ஸே ஆக³தம் ஸந்தா⁴ய வுத்தம். பஞ்ஹாவாரே பன ‘‘ஸேக்கா² வா புது²ஜ்ஜனா வா சக்கு²ம் அனிச்சதோ து³க்க²தோ அனத்ததோ விபஸ்ஸந்தீ’’த்யாதி³னா (பட்டா². 1.1.424) அவிஸேஸேன பச்சுப்பன்னசக்கா²தீ³னம்பி க³ஹிதத்தா த⁴ம்மாரம்மணம்பி ஆரம்மணபுரேஜாதம் மனோவிஞ்ஞாணவீதி²யா லப்³ப⁴தி. அத்த²தோ ஹேதம் ஸித்³த⁴ம், யம் பச்சுப்பன்னத⁴ம்மாரம்மணம் க³ஹேத்வா மனோத்³வாரிகவீதி² பவத்ததி, தம் தஸ்ஸ ஆரம்மணபுரேஜாதம் ஹோதீதி.

22. பகதியா ஏவ பச்சயந்தரரஹிதேன அத்தனோ ஸபா⁴வேனேவ உபனிஸ்ஸயோ பகதூபனிஸ்ஸயோ. ஆரம்மணானந்தரேஹி அஸம்மிஸ்ஸோ புத²கே³வ கோசி உபனிஸ்ஸயோதி வுத்தம் ஹோதி. அத² வா பகதோ உபனிஸ்ஸயோ பகதூபனிஸ்ஸயோ. பகதோதி சேத்த² ப-காரோ உபஸக்³கோ³, ஸோ அத்தனோ ப²லஸ்ஸ உப்பாத³னஸமத்த²பா⁴வேன ஸந்தானே நிப்பா²தி³தபா⁴வம், ஆஸேவிதபா⁴வஞ்ச தீ³பேதி, தஸ்மா அத்தனோ ஸந்தானே நிப்ப²ன்னோ ராகா³தி³, ஸத்³தா⁴தி³, உபஸேவிதோ வா உதுபோ⁴ஜனாதி³ பகதூபனிஸ்ஸயோ. ததா² சேவ நித்³தி³ஸதி.

23. க³ருகதந்தி க³ரும் கத்வா பச்சவேக்கி²தம். ததா² ஹி ‘‘தா³னம் த³த்வா ஸீலம் ஸமாதி³யித்வா உபோஸத²கம்மம் கத்வா தம் க³ரும் கத்வா பச்சவேக்க²தீ’’த்யாதி³னா (பட்டா². 1.1.413) தா³னஸீலஉபோஸத²கம்மபுப்³பே³கதஸுசிண்ணஜா²னகோ³த்ரபு⁴வோதா³னமக்³கா³தீ³னி க³ரும் கத்வா பச்சவேக்க²ணவஸேன அஸ்ஸ நித்³தே³ஸோ பவத்தோ.

24. ‘‘புரிமா புரிமா குஸலா க²ந்தா⁴ பச்சி²மானம் பச்சி²மானம் குஸலானம் க²ந்தா⁴னம் உபனிஸ்ஸயபச்சயேன பச்சயோ’’த்யாதி³னா (பட்டா². 1.1.423) நயேன அனந்தரபச்சயேன ஸத்³தி⁴ம் நானத்தம் அகத்வா அனந்தரூபனிஸ்ஸயஸ்ஸ ஆக³தத்தா வுத்தம் ‘‘அனந்தரனிருத்³தா⁴’’த்யாதி³. ஏவம் ஸந்தேபி அத்தனோ அனந்தரம் அனுரூபசித்துப்பாத³வஸேன அனந்தரபச்சயோ, ப³லவகாரணவஸேன அனந்தரூபனிஸ்ஸயபச்சயோதி அயமேதேஸம் விஸேஸோ.

25. யதா²ரஹம் அஜ்ஜ²த்தஞ்ச ப³ஹித்³தா⁴ ச ராகா³த³யோ…பே… ஸேனாஸனஞ்சாதி யோஜனா. ராகா³த³யோ ஹி அஜ்ஜ²த்தம் நிப்பா²தி³தா, புக்³க³லாத³யோ ப³ஹித்³தா⁴ ஸேவிதா. ததா² ஹி வுத்தம் ஆசரியேன –

‘‘ராக³ஸத்³தா⁴த³யோ த⁴ம்மா, அஜ்ஜ²த்தமனுவாஸிதா;

ஸத்தஸங்கா²ரத⁴ம்மா ச, ப³ஹித்³தோ⁴பனிஸேவிதா’’தி. (நாம. பரி. 827);

அத² வா அஜ்ஜ²த்தஞ்ச ப³ஹித்³தா⁴ ச குஸலாதி³த⁴ம்மானந்தி யதா²டி²தவஸேனேவ யோஜனா அத்தனோ ஹி ராகா³த³யோ ச அத்தனோ குஸலாதி³த⁴ம்மானம் கல்யாணமித்தஸ்ஸ ஸத்³தா⁴தி³கே நிஸ்ஸாய குஸலம் கரோந்தானம் பரேஸஞ்ச நிஸ்ஸயா ஹோந்தி.

தத்த² காமராகா³த³யோ நிஸ்ஸாய காமப⁴வாதீ³ஸு நிப்³ப³த்தனத்த²ம், ராகா³தி³வூபஸமத்த²ஞ்ச தா³னஸீலஉபோஸத²ஜ்ஜா²னாபி⁴ஞ்ஞாவிபஸ்ஸனாமக்³க³பா⁴வனா, ராகா³தி³ஹேதுகா ச உபரூபரிராகா³த³யோ ஹோந்தீதி யதா²ரஹம் த³ட்ட²ப்³ப³ம். யம் யஞ்ஹி நிஸ்ஸாய யஸ்ஸ யஸ்ஸ ஸம்ப⁴வோ, தம் தம் தஸ்ஸ தஸ்ஸ பகதூபனிஸ்ஸயோ ஹோதி. பச்சயமஹாபதே³ஸோ ஹேஸ, யதி³த³ம் ‘‘உபனிஸ்ஸயபச்சயோ’’தி வுத்தம். ததா² சாஹ ‘‘ப³ஹுதா⁴ ஹோதி பகதூபனிஸ்ஸயோ’’தி. ஸத்³தா⁴த³யோதி ஸீலஸுதசாக³பஞ்ஞா. அத்தனோ ஸத்³தா⁴தி³கஞ்ஹி உபனிஸ்ஸாய அத்தனோ தா³னஸீலாத³யோ, ததா² கல்யாணமித்தானம் ஸத்³தா⁴த³யோ உபனிஸ்ஸாய பரேஸஞ்ச தா³னஸீலாத³யோ ஹோந்தீதி பாகடமேதம். ஸுக²ம் து³க்க²ந்தி காயிகம் ஸுக²ம் து³க்க²ம். புக்³க³லோதி கல்யாணமித்தாதி³புக்³க³லோ. போ⁴ஜனந்தி ஸப்பாயாதி³போ⁴ஜனம், உதுபி தாதி³ஸோவ.

27. ‘‘அதி⁴பதி…பே… பச்சயா ஹோந்தீ’’தி ஸங்கே²பேன வுத்தமத்த²ம் வித்தா²ரேதும் ‘‘தத்த² க³ருகதமாரம்மண’’ந்த்யாதி³ வுத்தம். க³ருகதமாரம்மணந்தி பச்சவேக்க²ணஅஸ்ஸாதா³தி³னா க³ருகதம் ஆரம்மணம். தஞ்ஹி ஜா²னமக்³க³ப²லவிபஸ்ஸனானிப்³பா³னாதி³பே⁴த³ம் பச்சவேக்க²ணஅஸ்ஸாதா³தி³மக்³க³ப²லாதி³த⁴ம்மே அத்தாதீ⁴னே கரோதீதி ஆரம்மணாதி⁴பதி நாம. க³ருகாதப்³ப³தாமத்தேன ஆரம்மணாதி⁴பதி. க³ருகதோபி ப³லவகாரணட்டே²ன ஆரம்மணூபனிஸ்ஸயோதி அயமேதேஸம் விஸேஸோ. ஸஹஜாதா…பே… நாமரூபானந்தி ச²ந்த³சித்தவீரியவீமம்ஸானம், வஸேன சதுப்³பி³தோ⁴பி ஸஹஜாதாதி⁴பதி யதா²ரஹம் ஸஹஜாதனாமரூபானம் பவத்தியம்யேவ ஸஹஜாதாதி⁴பதிவஸேன பச்சயோ.

28. ரூபத⁴ம்மஸ்ஸ அரூபத⁴ம்மம் பதி ஸஹஜாதபச்சயதா படிஸந்தி⁴யம் வத்து²வஸேன வுத்தாதி ஆஹ ‘‘வத்து²விபாகா அஞ்ஞமஞ்ஞ’’ந்தி –

30. யஸ்மா பன அஞ்ஞமஞ்ஞுபத்த²ம்ப⁴னவஸேனேவ அஞ்ஞமஞ்ஞபச்சயதா, ந ஸஹஜாதமத்ததோதி பவத்தியம் ரூபம் நாமானம் அஞ்ஞமஞ்ஞபச்சயோ ந ஹோதி, தஸ்மா வுத்தம் ‘‘சித்தசேதஸிகா த⁴ம்மா அஞ்ஞமஞ்ஞ’’ந்தி. ததா² உபாதா³ரூபானி ச பூ⁴தரூபானம் அஞ்ஞமஞ்ஞபச்சயா ந ஹோந்தீதி வுத்தம் ‘‘மஹாபூ⁴தா அஞ்ஞமஞ்ஞ’’ந்தி.

31. நனு ச ‘‘அரூபினோ ஆஹாரா ஸஹஜாதானம் நாமரூபான’’ந்தி வுத்தம், ஏவஞ்ச ஸதி அஸஞ்ஞீனம் ஸஹஜாதாஹாரஸ்ஸ அஸம்ப⁴வதோ ‘‘ஸப்³பே³ ஸத்தா ஆஹாரட்டி²திகா’’தி கத²மித³ம் நீயதீதி? வுச்சதே – மனோஸஞ்சேதனாஹாரவஸப்பவத்தஸ்ஸ கம்மஸ்ஸ, தம்ஸஹக³தானம்பி வா ஸேஸாஹாரானம் கம்மூபனிஸ்ஸயபச்சயேஹி பச்சயத்தபரியாயம் க³ஹேத்வா ஸப்³ப³ஸத்தானம் ஆஹாரட்டி²திகதா வுத்தா, ந ஆஹாரபச்சயபா⁴வதோதி.

32. ‘‘பஞ்ச பஸாதா³’’த்யாதீ³ஸு நனு இத்தி²ந்த்³ரியபுரிஸிந்த்³ரியா ந க³ஹிதாதி? ஸச்சம் ந க³ஹிதா. யதி³பி தேஸம் லிங்கா³தீ³ஹி அனுவத்தனீயதா அத்தி², ஸா பன ந பச்சயபா⁴வதோ. யதா² ஹி ஜீவிதாஹாரா யேஸம் பச்சயா ஹோந்தி, தேஸம் அனுபாலகா உபத்த²ம்ப⁴கா அத்தி², அவிக³தபச்சயபூ⁴தா ச ஹோந்தி, ந ஏவம் இத்தி²புரிஸபா⁴வா லிங்கா³தீ³னம் கேனசி உபகாரேன உபகாரா ஹோந்தி. கேவலம் பன யதா²ஸகேஹேவ கம்மாதி³பச்சயேஹி பவத்தமானம் லிங்கா³தீ³னம் யதா² இத்தா²தி³க்³க³ஹணஸ்ஸ பச்சயபா⁴வோ ஹோதி, ததோ அஞ்ஞேனாகாரேன தம்-ஸஹிதஸந்தானே அப்பவத்திதோ லிங்கா³தீ³ஹி அனுவத்தனீயதா, இந்த்³ரியதா ச நேஸம் வுச்சதி, தஸ்மா ந தேஸம் இந்த்³ரியபச்சயபா⁴வோ வுத்தோ.

33. யேஸம் நாமானம் சக்கா²தீ³னம் அப்³ப⁴ந்தரதோ நிக்க²மந்தானம் விய பவத்தானம், யேஸஞ்ச ரூபானம் நாமஸன்னிஸ்ஸயேனேவ உப்பஜ்ஜமானானம் ஸம்பயோகா³ஸங்கா ஹோதி, தேஸமேவ விப்பயுத்தபச்சயதா. ரூபானம் பன ரூபேஹி ஸாஸங்கா நத்தி². வத்து²ஸன்னிஸ்ஸயேனேவ ஜாயந்தானம் விஸயபா⁴வமத்தம் ஆரம்மணந்தி தேனாபி தேஸம் ஸம்பயோகா³ஸங்கா நத்தீ²தி யேஸம் ஸம்பயோகா³ஸங்கா அத்தி², தேஸமேவ விப்பயுத்தபச்சயதாபி வுத்தாதி ஆஹ ‘‘ஓக்கந்திக்க²ணே வத்தூ²’’த்யாதி³.

34. ஸப்³ப³தா² ஸப்³பா³காரேன யதா²ரஹம் நாமவஸேன வுத்தம் திவித⁴ம் ஸஹஜாதம், து³வித⁴ம் புரேஜாதம், ஏகவித⁴ம் பச்சா²ஜாதஞ்ச பச்சயஜாதம், ஆஹாரேஸு கப³ளீகாரோ ஆஹாரோ, ரூபஜீவிதிந்த்³ரியந்தி அயம் பஞ்சவிதோ⁴பி அத்தி²பச்சயோ, அவிக³தபச்சயோ ச ஹோதி. பச்சுப்பன்னஸபா⁴வேன அத்தி²பா⁴வேன தாதி³ஸஸ்ஸேவ த⁴ம்மஸ்ஸ உபத்த²ம்ப⁴கத்தா அத்தி²பா⁴வாபா⁴வேன அனுபகாரகானமேவ அத்தி²பா⁴வேன உபகாரகதா அத்தி²பச்சயபா⁴வோதி நத்தி² நிப்³பா³னஸ்ஸ ஸப்³ப³தா³ பா⁴வினோ அத்தி²பச்சயதா, அவிக³தபச்சயதா ச. உப்பாதா³தி³யுத்தானம் வா நத்தி²பா⁴வோபகாரகதாவிருத்³தோ⁴, விக³தபா⁴வோபகாரகதாவிருத்³தோ⁴ ச உபகாரகபா⁴வோ அத்தி²பச்சயதாதி³காதி ந தஸ்ஸ தப்பச்சயத்தப்பஸங்கோ³. ரூபஜீவிதிந்த்³ரியஞ்சேத்த² ஓஜா விய டி²திக்க²ணேவ உபகாரகத்தா ஸஹஜாதபச்சயேஸு ந க³ய்ஹதீதி விஸும் வுத்தம்.

35. இதா³னி ஸப்³பே³பி பச்சயா ஸங்கே²பதோபி சதுதா⁴யேவாதி த³ஸ்ஸேதும் ‘‘ஆரம்மணூ…பே… க³ச்ச²ந்தீ’’தி வுத்தம். ந ஹி ஸோ கோசி பச்சயோ அத்தி², யோ சித்தசேதஸிகானம் ஆரம்மணபா⁴வம் ந க³ச்சே²ய்ய, ஸகஸகபச்சயுப்பன்னஸ்ஸ ச உபனிஸ்ஸயபா⁴வம் ந க³ச்ச²தி, கம்மஹேதுகத்தா ச லோகப்பவத்தியா ப²லஹேதூபசாரவஸேன ஸப்³பே³பி கம்மஸபா⁴வம் நாதிவத்தந்தி, தே ச பரமத்த²தோ லோகஸம்முதிவஸேன ச விஜ்ஜமானாயேவாதி ஸப்³பே³பி சதூஸு ஸமோதா⁴னம் க³ச்ச²ந்தி.

36. இதா³னி யம் வுத்தம் தத்த² தத்த² ‘‘ஸஹஜாதரூப’’ந்தி, தம் ஸப்³ப³ம் ந அவிஸேஸதோ த³ட்ட²ப்³ப³ந்தி த³ஸ்ஸேதும் ‘‘ஸஹஜாதரூப’’ந்த்யாதி³ வுத்தம். படிஸந்தி⁴யஞ்ஹி சித்தஸமுட்டா²னரூபாபா⁴வதோ பவத்தியம் கம்மஸமுட்டா²னானஞ்ச சித்தசேதஸிகேஹி ஸஹுப்பத்தினியமாபா⁴வதோ ஸஹஜாதரூபந்தி ஸப்³ப³த்தா²பி பவத்தே சித்தஸமுட்டா²னானம் ரூபானம், படிஸந்தி⁴யம் கடத்தாரூபஸங்கா²தகம்மஜரூபானஞ்ச வஸேன து³வித⁴ம் ஹோதி. கம்மஸ்ஸ கதத்தா நிப்³ப³த்தமானானி ரூபானி கடத்தாரூபானி.

37. இதி ஏவம் வுத்தனயேன ஸம்ப⁴வா யதா²ஸம்ப⁴வம் தேகாலிகா அனந்தரஸமனந்தரஆஸேவனனத்தி²விக³தவஸேன பஞ்சன்னம் அதீதகாலிகானம், கம்மபச்சயஸ்ஸ அதீதவத்தமானவஸேன த்³விகாலிகஸ்ஸ, ஆரம்மணஅதி⁴பதிஉபனிஸ்ஸயபச்சயானம் திகாலிகானம், இதரேஸம் பன்னரஸன்னம் பச்சுப்பன்னகாலிகானஞ்ச வஸேன காலத்தயவந்தோ, நிப்³பா³னபஞ்ஞத்திவஸேன காலவிமுத்தா ச, சக்கா²தி³ராகா³தி³ஸத்³தா⁴தி³வஸேன அஜ்ஜ²த்திகா ச, புக்³க³லஉதுபோ⁴ஜனாதி³வஸேன ததோ ப³ஹித்³தா⁴ ச, பச்சயுப்பன்னபா⁴வேன ஸங்க²தா ச, கதா² தப்படிபக்க²பா⁴வேன அஸங்க²தா ச த⁴ம்மா பஞ்ஞத்தினாமரூபானம் வஸேன ஸங்கே²பதோ திவிதா⁴ டி²தா ஸப்³ப³தா² பட்டா²னே அனந்தனயஸமந்தபட்டா²னே பகரணே சதுவீஸதிஸங்கா²தா பச்சயா நாமாதி யோஜனா.

38. தத்தா²தி தேஸு பஞ்ஞத்தினாமரூபேஸு.

பட்டா²னனயவண்ணனா நிட்டி²தா.

பஞ்ஞத்திபே⁴த³வண்ணனா

39. வசனீயவாசகபே⁴தா³ து³விதா⁴ பஞ்ஞத்தீதி வுத்தம் ‘‘பஞ்ஞாபியத்தா’’த்யாதி³. பஞ்ஞாபியத்தாதி தேன தேன பகாரேன ஞாபேதப்³ப³த்தா, இமினா ரூபாதி³த⁴ம்மானம் ஸமூஹஸந்தானாதி³அவத்தா²விஸேஸாதி³பே⁴தா³ ஸம்முதிஸச்சபூ⁴தா உபாதா³பஞ்ஞத்திஸங்கா²தா அத்த²பஞ்ஞத்தி வுத்தா. ஸா ஹி நாமபஞ்ஞத்தியா பஞ்ஞாபீயதி. பஞ்ஞாபனதோதி பகாரேஹி அத்த²பஞ்ஞத்தியா ஞாபனதோ. இமினா ஹி பஞ்ஞாபேதீதி ‘‘பஞ்ஞத்தீ’’தி லத்³த⁴னாமானம் அத்தா²னம் அபி⁴தா⁴னஸங்கா²தா நாமபஞ்ஞத்தி வுத்தா.

40. பூ⁴தபரிணாமாகாரமுபாதா³யாதி பத²வாதி³கானம் மஹாபூ⁴தானம் பப³ந்த⁴வஸேன பவத்தமானானம் பத்த²டஸங்க³ஹதாதி³ஆகாரேன பரிணாமாகாரம் பரிணதபா⁴வஸங்கா²தம் ஆகாரம் உபாதா³ய நிஸ்ஸயம் கத்வா. ததா² ததா²தி பூ⁴மாதி³வஸேன. பூ⁴மிபப்³ப³தாதி³காதி பூ⁴மிபப்³ப³தருக்கா²தி³கா ஸந்தானபஞ்ஞத்தி. ஸம்பா⁴ரஸன்னிவேஸாகாரந்தி தா³ருமத்திகாதந்தாதீ³னம் ஸம்பா⁴ரானம் உபகரணானம் ஸன்னிவேஸாகாரம் ரசனாதி³விஸிட்ட²தம்தம்ஸண்டா²னாதி³ஆகாரம். ரத²ஸகடாதி³காதி ரத²ஸகடகா³மக⁴டபடாதி³கா ஸமூஹபஞ்ஞத்தி. சந்தா³வட்டனாதி³கந்தி சந்தி³மஸூரியனக்க²த்தானம் ஸினேரும் பத³க்கி²ணவஸேன உத³யாதி³ஆவட்டனாகாரம். தி³ஸாகாலாதி³காதி புரத்தி²மதி³ஸாதி³கா தி³ஸாபஞ்ஞத்தி, புப்³ப³ண்ஹாதி³கா காலபஞ்ஞத்தி, மாஸோதுவேஸாக²மாஸாதி³கா தம்தம்னாமவிஸிட்டா² மாஸாதி³பஞ்ஞத்தி ச. அஸம்பு²ட்டா²காரந்தி தம்தம்ரூபகலாபேஹி அஸம்பு²ட்ட²ம் ஸுஸிராதி³ஆகாரம். கூபகு³ஹாதி³கா தி கூபகு³ஹசி²த்³தா³தி³கா ஆகாஸபஞ்ஞத்தி. தம்தம்பூ⁴தனிமித்தந்தி பத²வீகஸிணாதி³தம்தம்பூ⁴தனிமித்தம். பா⁴வனாவிஸேஸந்தி பரிகம்மாதி³பே⁴த³ம் பா⁴வனாய பப³ந்த⁴விஸேஸம். கஸிணனிமித்தாதி³காதி கஸிணாஸுப⁴னிமித்தாதி³பே⁴தா³ யோகீ³னம் உபட்டி²தா உக்³க³ஹபடிபா⁴கா³தி³பே⁴தா³ நிமித்தபஞ்ஞத்தி. ஏவமாதி³ப்பபே⁴தா³தி கஸிணுக்³கா⁴டிமாகாஸனிரோத⁴கஸிணாதி³பே⁴தா³ ச. அத்த²ச்சா²யாகாரேனாதி பரமத்த²த⁴ம்மஸ்ஸ சா²யாகாரேன படிபா⁴கா³காரேன.

41. நாமனாமகம்மாதி³னாமேனாதி நாமம் நாமகம்மம் நாமதே⁴ய்யம் நிருத்தி ப்³யஞ்ஜனம் அபி⁴லாபோதி இமேஹி ச²ஹி நாமேஹி. தத்த² அத்தே²ஸு நமதீதி நாமம். தம் அன்வத்த²ருள்ஹீவஸேன து³வித⁴ம், ஸாமஞ்ஞகு³ணகிரியாயதி³ச்சா²வஸேன சதுப்³பி³த⁴ம். நாமமேவ நாமகம்மம். ததா² நாமதே⁴ய்யம். அக்க²ரத்³வாரேன அத்த²ம் நீஹரித்வா உத்தி கத²னம் நிருத்தி, அத்த²ம் ப்³யஞ்ஜயதீதி ப்³யஞ்ஜனம். அபி⁴லபதீதி அபி⁴லாபோ, ஸத்³த³க³தஅக்க²ரஸன்னிவேஸக்கமோ. ஸா பனாயம் நாமபஞ்ஞத்தி விஜ்ஜமானஅவிஜ்ஜமானதது³ப⁴யஸம்யோக³வஸேன ச²ப்³பி³தா⁴ ஹோதீதி த³ஸ்ஸேதும் ‘‘விஜ்ஜமானபஞ்ஞத்தீ’’த்யாதி³ வுத்தம், ஏதாய பஞ்ஞாபேந்தீதி ‘‘ரூபவேத³னா’’த்யாதி³னா பகாஸேந்தி.

42. உபி⁴ன்னந்தி விஜ்ஜமானாவிஜ்ஜமானானம் த்³வின்னம். பஞ்சாபி⁴ஞ்ஞா, ஆஸவக்க²யஞாணந்தி ச² அபி⁴ஞ்ஞா அஸ்ஸாதி ச²ளபி⁴ஞ்ஞோ. ஏத்த² ச அபி⁴ஞ்ஞானம் விஜ்ஜமானத்தா, தப்படிலாபி⁴னோ புக்³க³லஸ்ஸ அவிஜ்ஜமானத்தா ச அயம் விஜ்ஜமானேன அவிஜ்ஜமானபஞ்ஞத்தி நாம. ததா² இத்தி²யா அவிஜ்ஜமானத்தா, ஸத்³த³ஸ்ஸ ச விஜ்ஜமானத்தா இத்தி²ஸத்³தோ³தி அவிஜ்ஜமானேன விஜ்ஜமானபஞ்ஞத்தி. பஸாத³சக்கு²னோ, தன்னிஸ்ஸிதவிஞ்ஞாணஸ்ஸ ச விஜ்ஜமானத்தா சக்கு²விஞ்ஞாணந்தி விஜ்ஜமானேன விஜ்ஜமானபஞ்ஞத்தி. ரஞ்ஞோ ச புத்தஸ்ஸ ச ஸம்முதிஸச்சபூ⁴தத்தா ராஜபுத்தோதி அவிஜ்ஜமானேன அவிஜ்ஜமானபஞ்ஞத்தி.

43. வசீகோ⁴ஸானுஸாரேனாதி பூ⁴மிபப்³ப³தரூபவேத³னாதி³வசீமயஸத்³த³ஸ்ஸ அனுஸாரேன அனுக³மனேன அனுஸ்ஸரணேன ஆரம்மணகரணேன பவத்தாய ஸோதவிஞ்ஞாணவீதி²யா பவத்திதோ அனந்தரம் உப்பன்னஸ்ஸ மனோத்³வாரஸ்ஸ நாமசிந்தனாகாரப்பவத்தஸ்ஸ மனோத்³வாரிகவிஞ்ஞாணஸந்தானஸ்ஸ ‘‘இத³மீதி³ஸஸ்ஸ அத்த²ஸ்ஸ நாம’’ந்தி புப்³பே³யேவ க³ஹிதஸங்கேதோபனிஸ்ஸயஸ்ஸ கோ³சரா ஆரம்மணபூ⁴தா ததோ நாமக்³க³ஹணதோ பரம் யஸ்ஸா ஸம்முதிபரமத்த²விஸயாய நாமபஞ்ஞத்தியா அனுஸாரேன அனுக³மனேன அத்தா² ஸம்முதிபரமத்த²பே⁴தா³ விஞ்ஞாயந்தி, ஸாயம் பூ⁴மிபப்³ப³தரூபவேத³னாதி³கா பஞ்ஞாபேதப்³ப³த்த²பஞ்ஞாபிகா லோகஸங்கேதேன நிம்மிதா லோகவோஹாரேன ஸித்³தா⁴, மனோத்³வாரக்³க³ஹிதா அக்க²ராவலிபூ⁴தா பஞ்ஞத்தி விஞ்ஞேய்யா பஞ்ஞாபனதோ பஞ்ஞத்திஸங்கா²தா நாமபஞ்ஞத்தீதி விஞ்ஞேய்யா.

ஏத்த² ச ஸோதவிஞ்ஞாணவீதி²யா அனந்தரபா⁴வினிம் மனோத்³வாரிகவீதி²ம்பி ஸோதவிஞ்ஞாணவீதி²க்³க³ஹணேனேவ ஸங்க³ஹேத்வா ‘‘ஸோதவிஞ்ஞாணவீதி²யா’’தி வுத்தம். க⁴டாதி³ஸத்³த³ஞ்ஹி ஸுணந்தஸ்ஸ ஏகமேகம் ஸத்³த³ம் ஆரப்³ப⁴ பச்சுப்பன்னாதீதாரம்மணவஸேன த்³வே த்³வே ஜவனவாரா, பு³த்³தி⁴யா க³ஹிதனாமபண்ணத்திபூ⁴தம் அக்க²ராவலிமாரப்³ப⁴ ஏகோதி ஏவம் ஸோதவிஞ்ஞாணவீதி²யா அனந்தராய அதீதஸத்³தா³ரம்மணாய ஜவனவீதி²யா அனந்தரம் நாமபஞ்ஞத்தியா க³ஹணம், ததோ பரம் அத்தா²வபோ³தோ⁴தி ஆசரியா.

பஞ்ஞத்திபே⁴த³வண்ணனா நிட்டி²தா.

இதி அபி⁴த⁴ம்மத்த²விபா⁴வினியா நாம அபி⁴த⁴ம்மத்த²ஸங்க³ஹவண்ணனாய

பச்சயபரிச்சே²த³வண்ணனா நிட்டி²தா.