நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

அபி⁴த⁴ம்மத்த²ஸங்க³ஹோ

க³ந்தா²ரம்ப⁴கதா²

1. ஸம்மாஸம்பு³த்³த⁴மதுலம், ஸஸத்³த⁴ம்மக³ணுத்தமம்.

அபி⁴வாதி³ய பா⁴ஸிஸ்ஸம், அபி⁴த⁴ம்மத்த²ஸங்க³ஹம்.

சதுபரமத்த²த⁴ம்மோ

2. தத்த² வுத்தாபி⁴த⁴ம்மத்தா², சதுதா⁴ பரமத்த²தோ.

சித்தம் சேதஸிகம் ரூபம், நிப்³பா³னமிதி ஸப்³ப³தா².

1. சித்தபரிச்சே²தோ³

பூ⁴மிபே⁴த³சித்தம்

3. தத்த² சித்தம் தாவ சதுப்³பி³த⁴ம் ஹோதி காமாவசரம் ரூபாவசரம் அரூபாவசரம் லோகுத்தரஞ்சேதி.

அகுஸலசித்தம்

4. தத்த² கதமம் காமாவசரம்? ஸோமனஸ்ஸஸஹக³தம் தி³ட்டி²க³தஸம்பயுத்தம் அஸங்கா²ரிகமேகம், ஸஸங்கா²ரிகமேகம், ஸோமனஸ்ஸஸஹக³தம் தி³ட்டி²க³தவிப்பயுத்தம் அஸங்கா²ரிகமேகம், ஸஸங்கா²ரிகமேகம், உபேக்கா²ஸஹக³தம் தி³ட்டி²க³தஸம்பயுத்தம் அஸங்கா²ரிகமேகம், ஸஸங்கா²ரிகமேகம், உபேக்கா²ஸஹக³தம் தி³ட்டி²க³தவிப்பயுத்தம் அஸங்கா²ரிகமேகம், ஸஸங்கா²ரிகமேகந்தி இமானி அட்ட²பி லோப⁴ஸஹக³தசித்தானி நாம.

5. தோ³மனஸ்ஸஸஹக³தம் படிக⁴ஸம்பயுத்தம் அஸங்கா²ரிகமேகம், ஸஸங்கா²ரிகமேகந்தி இமானி த்³வேபி படிக⁴ஸம்பயுத்தசித்தானி நாம.

6. உபேக்கா²ஸஹக³தம் விசிகிச்சா²ஸம்பயுத்தமேகம், உபேக்கா²ஸஹக³தம் உத்³த⁴ச்சஸம்பயுத்தமேகந்தி இமானி த்³வேபி மோமூஹசித்தானி நாம.

7. இச்சேவம் ஸப்³ப³தா²பி த்³வாத³ஸாகுஸலசித்தானி ஸமத்தானி.

8. அட்ட²தா⁴ லோப⁴மூலானி, தோ³ஸமூலானி ச த்³விதா⁴.

மோஹமூலானி ச த்³வேதி, த்³வாத³ஸாகுஸலா ஸியும்.

அஹேதுகசித்தம்

9. உபேக்கா²ஸஹக³தம் சக்கு²விஞ்ஞாணம், ததா² ஸோதவிஞ்ஞாணம், கா⁴னவிஞ்ஞாணம், ஜிவ்ஹாவிஞ்ஞாணம், து³க்க²ஸஹக³தம் காயவிஞ்ஞாணம், உபேக்கா²ஸஹக³தம் ஸம்படிச்ச²னசித்தம், உபேக்கா²ஸஹக³தம் ஸந்தீரணசித்தஞ்சேதி இமானி ஸத்தபி அகுஸலவிபாகசித்தானி நாம.

10. உபேக்கா²ஸஹக³தம் குஸலவிபாகம் சக்கு²விஞ்ஞாணம், ததா² ஸோதவிஞ்ஞாணம், கா⁴னவிஞ்ஞாணம், ஜிவ்ஹாவிஞ்ஞாணம், ஸுக²ஸஹக³தம் காயவிஞ்ஞாணம், உபேக்கா²ஸஹக³தம் ஸம்படிச்ச²னசித்தம், ஸோமனஸ்ஸஸஹக³தம் ஸந்தீரணசித்தம், உபேக்கா²ஸஹக³தம் ஸந்தீரணசித்தஞ்சேதி இமானி அட்ட²பி குஸலவிபாகாஹேதுகசித்தானி நாம.

11. உபேக்கா²ஸஹக³தம் பஞ்சத்³வாராவஜ்ஜனசித்தம், ததா² மனோத்³வாராவஜ்ஜனசித்தம், ஸோமனஸ்ஸஸஹக³தம் ஹஸிதுப்பாத³சித்தஞ்சேதி இமானி தீணிபி அஹேதுககிரியசித்தானி நாம.

12. இச்சேவ ஸப்³ப³தா²பி அட்டா²ரஸாஹேதுகசித்தானி ஸமத்தானி.

13. ஸத்தாகுஸலபாகானி, புஞ்ஞபாகானி அட்ட²தா⁴.

க்ரியசித்தானி தீணீதி, அட்டா²ரஸ அஹேதுகா.

ஸோப⁴னசித்தம்

14. பாபாஹேதுகமுத்தானி, ஸோப⁴னானீதி வுச்சரே.

ஏகூனஸட்டி² சித்தானி, அதே²கனவுதீபி வா.

காமாவசரஸோப⁴னசித்தம்

15. ஸோமனஸ்ஸஸஹக³தம் ஞாணஸம்பயுத்தம் அஸங்கா²ரிகமேகம், ஸஸங்கா²ரிகமேகம், ஸோமனஸ்ஸஸஹக³தம் ஞாணவிப்பயுத்தம் அஸங்கா²ரிகமேகம், ஸஸங்கா²ரிகமேகம், உபேக்கா²ஸஹக³தம் ஞாணஸம்பயுத்தம் அஸங்கா²ரிகமேகம், ஸஸங்கா²ரிகமேகம். உபேக்கா²ஸஹக³தம் ஞாணவிப்பயுத்தம் அஸங்கா²ரிகமேகம், ஸஸங்கா²ரிகமேகந்தி இமானி அட்ட²பி காமாவசரகுஸலசித்தானி நாம.

16. ஸோமனஸ்ஸஸஹக³தம் ஞாணஸம்பயுத்தம் அஸங்கா²ரிகமேகம், ஸஸங்கா²ரிகமேகம், ஸோமனஸ்ஸஸஹக³தம் ஞாணவிப்பயுத்தம் அஸங்கா²ரிகமேகம், ஸஸங்கா²ரிகமேகம், உபேக்கா²ஸஹக³தம் ஞாணஸம்பயுத்தம் அஸங்கா²ரிகமேகம், ஸஸங்கா²ரிகமேகம், உபேக்கா²ஸஹக³தம் ஞாணவிப்பயுத்தம் அஸங்கா²ரிகமேகம், ஸஸங்கா²ரிகமேகந்தி இமானி அட்ட²பி ஸஹேதுககாமாவசரவிபாகசித்தானி நாம.

17. ஸோமஸ்ஸஸஹக³தம் ஞாணஸம்பயுத்தம் அஸங்கா²ரிகமேகம், ஸஸங்கா²ரிகமேகம், ஸோமனஸ்ஸஸஹக³தம் ஞாணவிப்பயுத்தம் அஸங்கா²ரிகமேகம், ஸஸங்கா²ரிகமேகம், உபேக்கா²ஸஹக³தம் ஞாணஸம்பயுத்தம் அஸங்கா²ரிகமேகம், ஸஸங்கா²ரிகமேகம், உபேக்கா²ஸஹக³தம் ஞாணவிப்பயுத்தம் அஸங்கா²ரிகமேகம், ஸஸங்கா²ரிகமேகந்தி இமானி அட்ட²பி ஸஹேதுககாமாவசரகிரியசித்தானி நாம.

18. இச்சேவம் ஸப்³ப³தா²பி சதுவீஸதி ஸஹேதுககாமாவசரகுஸலவிபாககிரியசித்தானி ஸமத்தானி.

19. வேத³னாஞாணஸங்கா²ரபே⁴தே³ன சதுவீஸதி.

ஸஹேதுகாமாவசரபுஞ்ஞபாகக்ரியா மதா.

20. காமே தேவீஸ பாகானி, புஞ்ஞாபுஞ்ஞானி வீஸதி.

ஏகாத³ஸ க்ரியா சேதி, சதுபஞ்ஞாஸ ஸப்³ப³தா².

ரூபாவசரசித்தம்

21. விதக்கவிசாரபீதிஸுகே²கக்³க³தாஸஹிதம் பட²மஜ்ஜா²னகுஸலசித்தம், விசாரபீதிஸுகே²கக்³க³தாஸஹிதம் து³தியஜ்ஜா²னகுஸலசித்தம், பீதிஸுகே²கக்³க³தாஸஹிதம் ததியஜ்ஜா²னகுஸலசித்தம், ஸுகே²கக்³க³தாஸஹிதம் சதுத்த²ஜ்ஜா²னகுஸலசித்தம், உபேக்கே²கக்³க³தாஸஹிதம் பஞ்சமஜ்ஜா²னகுஸலசித்தஞ்சேதி இமானி பஞ்சபி ரூபாவசரகுஸலசித்தானி நாம.

22. விதக்கவிசாரபீதிஸுகே²கக்³க³தாஸஹிதம் பட²மஜ்ஜா²னவிபாகசித்தம், விசாரபீதிஸுகே²கக்³க³தாஸஹிதம் து³தியஜ்ஜா²னவிபாகசித்தம், பீதிஸுகே²கக்³க³தாஸஹிதம் ததியஜ்ஜா²னவிபாகசித்தம், ஸுகே²கக்³க³தாஸஹிதம் சதுத்த²ஜ்ஜா²னவிபாகசித்தம், உபேக்கே²கக்³க³தாஸஹிதம் பஞ்சமஜ்ஜா²னவிபாகசித்தஞ்சேதி இமானி பஞ்சபி ரூபாவசரவிபாகசித்தானி நாம.

23. விதக்கவிசாரபீதிஸுகே²கக்³க³தாஸஹிதம் பட²மஜ்ஜா²னகிரியசித்தம், விசாரபீதிஸுகே²கக்³க³தாஸஹிதம் து³தியஜ்ஜா²னகிரியசித்தம், பீதிஸுகே²கக்³க³தாஸஹிதம் ததியஜ்ஜா²னகிரியசித்தம், ஸுகே²கக்³க³தாஸஹிதம் சதுத்த²ஜ்ஜா²னகிரியசித்தம், உபேக்கே²கக்³க³தாஸஹிதம் பஞ்சமஜ்ஜா²னகிரியசித்தஞ்சேதி இமானி பஞ்சபி ரூபாவசரகிரியசித்தானி நாம.

24. இச்சேவம் ஸப்³ப³தா²பி பன்னரஸ ரூபாவசரகுஸலவிபாககிரியசித்தானி ஸமத்தானி.

25. பஞ்சதா⁴ ஜா²னபே⁴தே³ன, ரூபாவசரமானஸம்.

புஞ்ஞபாகக்ரியாபே⁴தா³, தம் பஞ்சத³ஸதா⁴ ப⁴வே.

அரூபாவசரசித்தம்

26. ஆகாஸானஞ்சாயதனகுஸலசித்தம், விஞ்ஞாணஞ்சாயதனகுஸலசித்தம், ஆகிஞ்சஞ்ஞாயதனகுஸலசித்தம், நேவஸஞ்ஞானாஸஞ்ஞாயதனகுஸலசித்தஞ்சேதி இமானி சத்தாரிபி அரூபாவசரகுஸலசித்தானி நாம.

27. ஆகாஸானஞ்சாயதனவிபாகசித்தம், விஞ்ஞாணஞ்சாயதனவிபாகசித்தம், ஆகிஞ்சஞ்ஞாயதனவிபாகசித்தம், நேவஸஞ்ஞானாஸஞ்ஞாயதனவிபாகசித்தஞ்சேதி இமானி சத்தாரிபி அரூபாவசரவிபாகசித்தானி நாம.

28. ஆகாஸானஞ்சாயதனகிரியசித்தம், விஞ்ஞாணஞ்சாயதனகிரியசித்தம், ஆகிஞ்சஞ்ஞாயதனகிரியசித்தம், நேவஸஞ்ஞானாஸஞ்ஞாயதனகிரியசித்தஞ்சேதி இமானி சத்தாரிபி அரூபாவசரகிரியசித்தானி நாம.

29. இச்சேவம் ஸப்³ப³தா²பி த்³வாத³ஸ அரூபாவசரகுஸலவிபாககிரியசித்தானி ஸமத்தானி.

30. ஆலம்ப³ணப்பபே⁴தே³ன, சதுதா⁴ருப்பமானஸம்.

புஞ்ஞபாகக்ரியாபே⁴தா³, புன த்³வாத³ஸதா⁴ டி²தம்.

லோகுத்தரசித்தம்

31. ஸோதாபத்திமக்³க³சித்தம், ஸகதா³கா³மிமக்³க³சித்தம், அனாகா³மிமக்³க³சித்தம், அரஹத்தமக்³க³சித்தஞ்சேதி இமானி சத்தாரிபி லோகுத்தரகுஸலசித்தானி நாம.

32. ஸோதாபத்திப²லசித்தம், ஸகதா³கா³மிப²லசித்தம், அனாகா³மிப²லசித்தம், அரஹத்தப²லசித்தஞ்சேதி இமானி சத்தாரிபி லோகுத்தரவிபாகசித்தானி நாம.

33. இச்சேவம் ஸப்³ப³தா²பி அட்ட² லோகுத்தரகுஸலவிபாகசித்தானி ஸமத்தானி.

34. சதுமக்³க³ப்பபே⁴தே³ன, சதுதா⁴ குஸலம் ததா².

பாகம் தஸ்ஸ ப²லத்தாதி, அட்ட²தா⁴னுத்தரம் மதம்.

சித்தக³ணனஸங்க³ஹோ

35. த்³வாத³ஸாகுஸலானேவம், குஸலானேகவீஸதி.

ச²த்திம்ஸேவ விபாகானி, க்ரியசித்தானி வீஸதி.

36. சதுபஞ்ஞாஸதா⁴ காமே, ரூபே பன்னரஸீரயே.

சித்தானி த்³வாத³ஸாருப்பே, அட்ட²தா⁴னுத்தரே ததா².

37. இத்த²மேகூனனவுதிபபே⁴த³ம் பன மானஸம்.

ஏகவீஸஸதம் வாத², விப⁴ஜந்தி விசக்க²ணா.

வித்தா²ரக³ணனா

38. கத²மேகூனனவுதிவித⁴ம் சித்தம் ஏகவீஸஸதம் ஹோதி? விதக்கவிசாரபீதிஸுகே²கக்³க³தாஸஹிதம் பட²மஜ்ஜா²னஸோதாபத்திமக்³க³சித்தம், விசாரபீதிஸுகே²கக்³க³தாஸஹிதம் து³தியஜ்ஜா²னஸோதாபத்திமக்³க³சித்தம், பீதிஸுகே²கக்³க³தாஸஹிதம் ததியஜ்ஜா²னஸோதாபத்திமக்³க³சித்தம், ஸுகே²கக்³க³தாஸஹிதம் சதுத்த²ஜ்ஜா²னஸோதாபத்திமக்³க³சித்தம், உபேக்கே²கக்³க³தாஸஹிதம் பஞ்சமஜ்ஜா²னஸோதாபத்திமக்³க³சித்தஞ்சேதி இமானி பஞ்சபி ஸோதாபத்திமக்³க³சித்தானி நாம.

39. ததா² ஸகதா³கா³மிமக்³க³அனாகா³மிமக்³க³அரஹத்தமக்³க³சித்தஞ்சேதி ஸமவீஸதி மக்³க³சித்தானி.

40. ததா² ப²லசித்தானி சேதி ஸமசத்தாலீஸ லோகுத்தரசித்தானி ப⁴வந்தீதி.

41. ஜா²னங்க³யோக³பே⁴தே³ன, கத்வேகேகந்து பஞ்சதா⁴.

வுச்சதானுத்தரம் சித்தம், சத்தாலீஸவித⁴ந்தி ச.

42. யதா² ச ரூபாவசரம், க³ய்ஹதானுத்தரம் ததா².

பட²மாதி³ஜா²னபே⁴தே³, ஆருப்பஞ்சாபி பஞ்சமே.

ஏகாத³ஸவித⁴ம் தஸ்மா, பட²மாதி³கமீரிதம்;

ஜா²னமேகேகமந்தே து, தேவீஸதிவித⁴ம் ப⁴வே.

43. ஸத்ததிம்ஸவித⁴ம் புஞ்ஞம், த்³விபஞ்ஞாஸவித⁴ம் ததா².

பாகமிச்சாஹு சித்தானி, ஏகவீஸஸதம் பு³தா⁴.

இதி அபி⁴த⁴ம்மத்த²ஸங்க³ஹே சித்தஸங்க³ஹவிபா⁴கோ³ நாம

பட²மோ பரிச்சே²தோ³.

2. சேதஸிகபரிச்சே²தோ³

ஸம்பயோக³லக்க²ணம்

1. ஏகுப்பாத³னிரோதா⁴ ச, ஏகாலம்ப³ணவத்து²கா.

சேதோயுத்தா த்³விபஞ்ஞாஸ, த⁴ம்மா சேதஸிகா மதா.

அஞ்ஞஸமானசேதஸிகம்

2. கத²ம்? ப²ஸ்ஸோ வேத³னா ஸஞ்ஞா சேதனா ஏகக்³க³தா ஜீவிதிந்த்³ரியம் மனஸிகாரோ சேதி ஸத்திமே சேதஸிகா ஸப்³ப³சித்தஸாதா⁴ரணா நாம.

3. விதக்கோ விசாரோ அதி⁴மோக்கோ² வீரியம் பீதி ச²ந்தோ³ சாதி ச² இமே சேதஸிகா பகிண்ணகா நாம.

4. ஏவமேதே தேரஸ சேதஸிகா அஞ்ஞஸமானாதி வேதி³தப்³பா³.

அகுஸலசேதஸிகம்

5. மோஹோ அஹிரிகம் அனோத்தப்பம் உத்³த⁴ச்சம் லோபோ⁴ தி³ட்டி² மானோ தோ³ஸோ இஸ்ஸா மச்ச²ரியம் குக்குச்சம் தி²னம் மித்³த⁴ம் விசிகிச்சா² சேதி சுத்³த³ஸிமே சேதஸிகா அகுஸலா நாம.

ஸோப⁴னசேதஸிகம்

6. ஸத்³தா⁴ ஸதி ஹிரீ ஓத்தப்பம் அலோபோ⁴ அதோ³ஸோ தத்ரமஜ்ஜ²த்ததா காயபஸ்ஸத்³தி⁴ சித்தபஸ்ஸத்³தி⁴ காயலஹுதா சித்தலஹுதா காயமுது³தா சித்தமுது³தா காயகம்மஞ்ஞதா சித்தகம்மஞ்ஞதா காயபாகு³ஞ்ஞதா சித்தபாகு³ஞ்ஞதா காயுஜுகதா சித்துஜுகதா சேதி ஏகூனவீஸதிமே சேதஸிகா ஸோப⁴னஸாதா⁴ரணா நாம.

7. ஸம்மாவாசா ஸம்மாகம்மந்தோ ஸம்மாஆஜீவோ சேதி திஸ்ஸோ விரதியோ நாம.

8. கருணா முதி³தா அப்பமஞ்ஞாயோ நாமாதி ஸப்³ப³தா²பி பஞ்ஞிந்த்³ரியேன ஸத்³தி⁴ம் பஞ்சவீஸதிமே சேதஸிகா ஸோப⁴னாதி வேதி³தப்³பா³.

9. ஏத்தாவதா ச –

தேரஸஞ்ஞஸமானா ச, சுத்³த³ஸாகுஸலா ததா²;

ஸோப⁴னா பஞ்சவீஸாதி, த்³விபஞ்ஞாஸ பவுச்சரே.

ஸம்பயோக³னயோ

10. தேஸம் சித்தாவியுத்தானம், யதா²யோக³மிதோ பரம்.

சித்துப்பாதே³ஸு பச்சேகம், ஸம்பயோகோ³ பவுச்சதி.

11. ஸத்த ஸப்³ப³த்த² யுஜ்ஜந்தி, யதா²யோக³ம் பகிண்ணகா.

சுத்³த³ஸாகுஸலேஸ்வேவ, ஸோப⁴னேஸ்வேவ ஸோப⁴னா.

அஞ்ஞஸமானசேதஸிகஸம்பயோக³னயோ

12. கத²ம்? ஸப்³ப³சித்தஸாதா⁴ரணா தாவ ஸத்திமே சேதஸிகா ஸப்³பே³ஸுபி ஏகூனனவுதிசித்துப்பாதே³ஸு லப்³ப⁴ந்தி.

13. பகிண்ணகேஸு பன விதக்கோ தாவ த்³விபஞ்சவிஞ்ஞாணவஜ்ஜிதகாமாவசரசித்தேஸு சேவ ஏகாத³ஸஸு பட²மஜ்ஜா²னசித்தேஸு சேதி பஞ்சபஞ்ஞாஸசித்தேஸு உப்பஜ்ஜதி.

14. விசாரோ பன தேஸு சேவ ஏகாத³ஸஸு து³தியஜ்ஜா²னசித்தேஸு சாதி ச²ஸட்டி²சித்தேஸு.

15. அதி⁴மோக்கோ² த்³விபஞ்சவிஞ்ஞாணவிசிகிச்சா²ஸஹக³தவஜ்ஜிதசித்தேஸு.

16. வீரியம் பஞ்சத்³வாராவஜ்ஜனத்³விபஞ்சவிஞ்ஞாணஸம்படிச்ச²னஸந்தீரணவஜ்ஜிதசித்தேஸு.

17. பீதி தோ³மனஸ்ஸுபேக்கா²ஸஹக³தகாயவிஞ்ஞாணசதுத்த²ஜ்ஜா²னவஜ்ஜிதசித்தேஸு.

18. ச²ந்தோ³ அஹேதுகமோமூஹவஜ்ஜிதசித்தேஸூதி.

19. தே பன சித்துப்பாதா³ யதா²க்கமம் –

ச²ஸட்டி² பஞ்சபஞ்ஞாஸ, ஏகாத³ஸ ச ஸோளஸ;

ஸத்ததி வீஸதி சேவ, பகிண்ணகவிவஜ்ஜிதா.

பஞ்சபஞ்ஞாஸ ச²ஸட்டி²ட்ட²ஸத்ததி திஸத்ததி;

ஏகபஞ்ஞாஸ சேகூனஸத்ததி ஸபகிண்ணகா.

அகுஸலசேதஸிகஸம்பயோக³னயோ

20. அகுஸலேஸு பன மோஹோ அஹிரிகம் அனோத்தப்பம் உத்³த⁴ச்சஞ்சாதி சத்தாரோமே சேதஸிகா ஸப்³பா³குஸலஸாதா⁴ரணா நாம, ஸப்³பே³ஸுபி த்³வாத³ஸா குஸலேஸு லப்³ப⁴ந்தி.

21. லோபோ⁴ அட்ட²ஸு லோப⁴ஸஹக³தசித்தேஸ்வேவ லப்³ப⁴தி.

22. தி³ட்டி² சதூஸு தி³ட்டி²க³தஸம்பயுத்தேஸு.

23. மானோ சதூஸு தி³ட்டி²க³தவிப்பயுத்தேஸு.

24. தோ³ஸோ இஸ்ஸா மச்ச²ரியம் குக்குச்சஞ்சாதி த்³வீஸு படிக⁴ஸம்பயுத்தசித்தேஸு.

25. தி²னமித்³த⁴ம் பஞ்சஸு ஸஸங்கா²ரிகசித்தேஸு.

26. விசிகிச்சா² விசிகிச்சா²ஸஹக³தசித்தேயேவாதி.

27. ஸப்³பா³புஞ்ஞேஸு சத்தாரோ,

லோப⁴மூலே தயோ க³தா;

தோ³ஸமூலேஸு சத்தாரோ,

ஸஸங்கா²ரே த்³வயம் ததா².

விசிகிச்சா² விசிகிச்சா²-சித்தே சாதி சதுத்³த³ஸ;

த்³வாத³ஸாகுலேஸ்வேவ, ஸம்பயுஜ்ஜந்தி பஞ்சதா⁴.

ஸோப⁴னசேதஸிகஸம்பயோக³னயோ

28. ஸோப⁴னேஸு பன ஸோப⁴னஸாதா⁴ரணா தாவ ஏகூனவீஸதிமே சேதஸிகா ஸப்³பே³ஸுபி ஏகூனஸட்டி²ஸோப⁴னசித்தேஸு ஸம்விஜ்ஜந்தி.

29. விரதியோ பன திஸ்ஸோபி லோகுத்தரசித்தேஸு ஸப்³ப³தா²பி நியதா ஏகதோவ லப்³ப⁴ந்தி, லோகியேஸு பன காமாவசரகுஸலேஸ்வேவ கதா³சி ஸந்தி³ஸ்ஸந்தி விஸும் விஸும்.

30. அப்பமஞ்ஞாயோ பன த்³வாத³ஸஸு பஞ்சமஜ்ஜா²னவஜ்ஜிதமஹக்³க³தசித்தேஸு சேவ காமாவசரகுஸலேஸு ச ஸஹேதுககாமாவசரகிரியசித்தேஸு சாதி அட்ட²வீஸதிசித்தேஸ்வேவ கதா³சி நானா ஹுத்வா ஜாயந்தி, உபேக்கா²ஸஹக³தேஸு பனேத்த² கருணாமுதி³தா ந ஸந்தீதி கேசி வத³ந்தி.

31. பஞ்ஞா பன த்³வாத³ஸஸு ஞாணஸம்பயுத்தகாமாவசரசித்தேஸு சேவ ஸப்³பே³ஸுபி பஞ்சதிம்ஸமஹக்³க³தலோகுத்தரசித்தேஸு சாதி ஸத்தசத்தாலீஸசித்தேஸு ஸம்பயோக³ம் க³ச்ச²தீதி.

32. ஏகூனவீஸதி த⁴ம்மா, ஜாயந்தேகூனஸட்டி²ஸு.

தயோ ஸோளஸசித்தேஸு, அட்ட²வீஸதியம் த்³வயம்.

பஞ்ஞா பகாஸிதா, ஸத்தசத்தாலீஸவிதே⁴ஸுபி;

ஸம்பயுத்தா சதுதே⁴வம், ஸோப⁴னேஸ்வேவ ஸோப⁴னா.

33. இஸ்ஸாமச்சே²ரகுக்குச்ச-விரதிகருணாத³யோ.

நானா கதா³சி மானோ ச, தி²ன மித்³த⁴ம் ததா² ஸஹ.

34. யதா²வுத்தானுஸாரேன, ஸேஸா நியதயோகி³னோ.

ஸங்க³ஹஞ்ச பவக்கா²மி, தேஸம் தா³னி யதா²ரஹம்.

ஸங்க³ஹனயோ

35. ச²த்திம்ஸானுத்தரே த⁴ம்மா, பஞ்சதிம்ஸ மஹக்³க³தே.

அட்ட²திம்ஸாபி லப்³ப⁴ந்தி, காமாவசரஸோப⁴னே.

ஸத்தவீஸதிபுஞ்ஞம்ஹி, த்³வாத³ஸாஹேதுகேதி ச;

யதா²ஸம்ப⁴வயோகே³ன, பஞ்சதா⁴ தத்த² ஸங்க³ஹோ.

லோகுத்தரசித்தஸங்க³ஹனயோ

36. கத²ம்? லோகுத்தரேஸு தாவ அட்ட²ஸு பட²மஜ்ஜா²னிகசித்தேஸு அஞ்ஞஸமானா தேரஸ சேதஸிகா, அப்பமஞ்ஞாவஜ்ஜிதா தேவீஸதி ஸோப⁴னசேதஸிகா சேதி ச²த்திம்ஸ த⁴ம்மா ஸங்க³ஹம் க³ச்ச²ந்தி, ததா² து³தியஜ்ஜா²னிகசித்தேஸு விதக்கவஜ்ஜா, ததியஜ்ஜா²னிகசித்தேஸு விதக்கவிசாரவஜ்ஜா, சதுத்த²ஜ்ஜா²னிகசித்தேஸு விதக்கவிசாரபீதிவஜ்ஜா, பஞ்சமஜ்ஜா²னிகசித்தேஸுபி உபேக்கா²ஸஹக³தா தே ஏவ ஸங்க³ய்ஹந்தீதி ஸப்³ப³தா²பி அட்ட²ஸு லோகுத்தரசித்தேஸு பஞ்சகஜ்ஜா²னவஸேன பஞ்சதா⁴வ ஸங்க³ஹோ ஹோதீதி.

37. ச²த்திம்ஸ பஞ்சதிம்ஸ ச, சதுத்திம்ஸ யதா²க்கமம்.

தேத்திம்ஸத்³வயமிச்சேவம், பஞ்சதா⁴னுத்தரே டி²தா.

மஹக்³க³தசித்தஸங்க³ஹனயோ