4. வீதி²பரிச்சே²தோ³

1. சித்துப்பாதா³னமிச்சேவம், கத்வாஸங்க³ஹமுத்தரம்.

பூ⁴மிபுக்³க³லபே⁴தே³ன, புப்³பா³பரனியாமிதம்.

பவத்திஸங்க³ஹம் நாம, படிஸந்தி⁴பவத்தியம்;

பவக்கா²மி ஸமாஸேன, யதா²ஸம்ப⁴வதோ கத²ம்.

2. . வீதி²முத்தானம் பன கம்மகம்மனிமித்தக³தினிமித்தவஸேன திவிதா⁴ ஹோதி விஸயப்பவத்தி.

4. தத்த² வத்து²த்³வாராரம்மணானி புப்³பே³ வுத்தனயானேவ.

விஞ்ஞாணச²க்கம்

5. சக்கு²விஞ்ஞாணம் ஸோதவிஞ்ஞாணம் கா⁴னவிஞ்ஞாணம் ஜிவ்ஹாவிஞ்ஞாணம் காயவிஞ்ஞாணம் மனோவிஞ்ஞாணஞ்சேதி ச² விஞ்ஞாணானி.

வீதி²ச²க்கம்

6. ச² வீதி²யோ பன சக்கு²த்³வாரவீதி² ஸோதத்³வாரவீதி² கா⁴னத்³வாரவீதி² ஜிவ்ஹாத்³வாரவீதி² காயத்³வாரவீதி² மனோத்³வாரவீதி² சேதி த்³வாரவஸேன வா, சக்கு²விஞ்ஞாணவீதி² ஸோதவிஞ்ஞாணவீதி² கா⁴னவிஞ்ஞாணவீதி² ஜிவ்ஹாவிஞ்ஞாணவீதி² காயவிஞ்ஞாணவீதி² மனோவிஞ்ஞாணவீதி² சேதி விஞ்ஞாணவஸேன வா த்³வாரப்பவத்தா சித்தப்பவத்தியோ யோஜேதப்³பா³.

வீதி²பே⁴தோ³

7. அதிமஹந்தம் மஹந்தம் பரித்தம் அதிபரித்தஞ்சேதி பஞ்சத்³வாரே மனோத்³வாரே பன விபூ⁴தமவிபூ⁴தஞ்சேதி ச²தா⁴ விஸயப்பவத்தி வேதி³தப்³பா³.

பஞ்சத்³வாரவீதி²

8. கத²ம்? உப்பாத³டி²திப⁴ங்க³வஸேன க²ணத்தயம் ஏகசித்தக்க²ணம் நாம.

9. தானி பன ஸத்தரஸ சித்தக்க²ணானி ரூபத⁴ம்மானமாயூ.

10. ஏகசித்தக்க²ணாதீதானி வா ப³ஹுசித்தக்க²ணாதீதானி வா டி²திப்பத்தானேவ பஞ்சாரம்மணானி பஞ்சத்³வாரே ஆபாத²மாக³ச்ச²ந்தி. தஸ்மா யதி³ ஏகசித்தக்க²ணாதீதகம் ரூபாரம்மணம் சக்கு²ஸ்ஸ ஆபாத²மாக³ச்ச²தி, ததோ த்³விக்க²த்தும் ப⁴வங்கே³ சலிதே ப⁴வங்க³ஸோதம் வோச்சி²ந்தி³த்வா தமேவ ரூபாரம்மணம் ஆவஜ்ஜந்தம் பஞ்சத்³வாராவஜ்ஜனசித்தம் உப்பஜ்ஜித்வா நிருஜ்ஜ²தி, ததோ தஸ்ஸானந்தரம் தமேவ ரூபம் பஸ்ஸந்தம் சக்கு²விஞ்ஞாணம், ஸம்படிச்ச²ந்தம் ஸம்படிச்ச²னசித்தம், ஸந்தீரயமானம் ஸந்தீரணசித்தம், வவத்த²பேந்தம் வோட்ட²ப்³ப³னசித்தஞ்சேதி யதா²க்கமம் உப்பஜ்ஜித்வா நிருஜ்ஜ²ந்தி, ததோ பரம் ஏகூனதிம்ஸ காமாவசரஜவனேஸு யம்கிஞ்சி லத்³த⁴பச்சயம் யேபு⁴ய்யேன ஸத்தக்க²த்தும் ஜவதி, ஜவனானுப³ந்தா⁴னி ச த்³வே ததா³ரம்மணபாகானி யதா²ரஹம் பவத்தந்தி, ததோ பரம் ப⁴வங்க³பாதோ.

11. ஏத்தாவதா சுத்³த³ஸ வீதி²சித்துப்பாதா³, த்³வே ப⁴வங்க³சலனானி, புப்³பே³வாதீதகமேகசித்தக்க²ணந்தி கத்வா ஸத்தரஸ சித்தக்க²ணானி பரிபூரேந்தி, ததோ பரம் நிருஜ்ஜ²தி, ஆரம்மணமேதம் அதிமஹந்தம் நாம கோ³சரம்.

12. யாவ ததா³ரம்மணுப்பாதா³ பன அப்பஹோந்தாதீதகமாபாத²மாக³தம் ஆரம்மணம் மஹந்தம் நாம, தத்த² ஜவனாவஸானே ப⁴வங்க³பாதோவ ஹோதி, நத்தி² ததா³ரம்மணுப்பாதோ³.

13. யாவ ஜவனுப்பாதா³பி அப்பஹோந்தாதீதகமாபாத²மாக³தம் ஆரம்மணம் பரித்தம் நாம, தத்த² ஜவனம்பி அனுப்பஜ்ஜித்வா த்³வத்திக்க²த்தும் வோட்ட²ப்³ப³னமேவ பவத்ததி, ததோ பரம் ப⁴வங்க³பாதோவ ஹோதி.

14. யாவ வோட்ட²ப்³ப³னுப்பாதா³ ச பன அப்பஹோந்தாதீதகமாபாத²மாக³தம் நிரோதா⁴ஸன்னமாரம்மணம் அதிபரித்தம் நாம, தத்த² ப⁴வங்க³சலனமேவ ஹோதி, நத்தி² வீதி²சித்துப்பாதோ³.

15. இச்சேவம் சக்கு²த்³வாரே, ததா² ஸோதத்³வாராதீ³ஸு சேதி ஸப்³ப³தா²பி பஞ்சத்³வாரே ததா³ரம்மணஜவனவோட்ட²ப்³ப³னமோக⁴வாரஸங்கா²தானம் சதுன்னம் வாரானம் யதா²க்கமம் ஆரம்மணபூ⁴தா விஸயப்பவத்தி சதுதா⁴ வேதி³தப்³பா³.

16. வீதி²சித்தானி ஸத்தேவ, சித்துப்பாதா³ சதுத்³த³ஸ.

சதுபஞ்ஞாஸ வித்தா²ரா, பஞ்சத்³வாரே யதா²ரஹம்.

அயமேத்த² பஞ்சத்³வாரே வீதி²சித்தப்பவத்தினயோ.

மனோத்³வாரவீதி² பரித்தஜவனவாரோ

17. மனோத்³வாரே பன யதி³ விபூ⁴தமாரம்மணம் ஆபாத²மாக³ச்ச²தி, ததோ பரம் ப⁴வங்க³சலனமனோத்³வாராவஜ்ஜனஜவனாவஸானே ததா³ரம்மணபாகானி பவத்தந்தி, ததோ பரம் ப⁴வங்க³பாதோ.

18. அவிபூ⁴தே பனாரம்மணே ஜவனாவஸானே ப⁴வங்க³பாதோவ ஹோதி, நத்தி² ததா³ரம்மணுப்பாதோ³தி.

19. வீதி²சித்தானி தீணேவ, சித்துப்பாதா³ த³ஸேரிதா.

வித்தா²ரேன பனேத்தே²க-சத்தாலீஸ விபா⁴வயே;

அயமேத்த² பரித்தஜவனவாரோ.

அப்பனாஜவனவாரோ

20. அப்பனாஜவனவாரே பன விபூ⁴தாவிபூ⁴தபே⁴தோ³ நத்தி², ததா² ததா³ரம்மணுப்பாதோ³ ச.

21. தத்த² ஹி ஞாணஸம்பயுத்தகாமாவசரஜவனானமட்ட²ன்னம் அஞ்ஞதரஸ்மிம் பரிகம்மோபசாரானுலோமகோ³த்ரபு⁴னாமேன சதுக்க²த்தும் திக்க²த்துமேவ வா யதா²க்கமம் உப்பஜ்ஜித்வா நிருத்³தா⁴னந்தரமேவ யதா²ரஹம் சதுத்த²ம், பஞ்சமம் வா ச²ப்³பீ³ஸதிமஹக்³க³தலோகுத்தரஜவனேஸு யதா²பி⁴னீஹாரவஸேன யம் கிஞ்சி ஜவனம் அப்பனாவீதி²மோதரதி, ததோ பரம் அப்பனாவஸானே ப⁴வங்க³பாதோவ ஹோதி.

22. தத்த² ஸோமனஸ்ஸஸஹக³தஜவனானந்தரம் அப்பனாபி ஸோமனஸ்ஸஸஹக³தாவ பாடிகங்கி²தப்³பா³, உபேக்கா²ஸஹக³தஜவனானந்தரம் உபேக்கா²ஸஹக³தாவ, தத்தா²பி குஸலஜவனானந்தரம் குஸலஜவனஞ்சேவ ஹேட்டி²மஞ்ச ப²லத்தயமப்பேதி, கிரியஜவனானந்தரம் கிரியஜவனம் அரஹத்தப²லஞ்சாதி.

23. த்³வத்திம்ஸ ஸுக²புஞ்ஞம்ஹா, த்³வாத³ஸோபேக்க²கா பரம்,

ஸுகி²தக்ரியதோ அட்ட², ச² ஸம்போ⁴ந்தி உபேக்க²கா.

24. புது²ஜ்ஜனான ஸேக்கா²னம், காமபுஞ்ஞதிஹேதுதோ.

திஹேதுகாமக்ரியதோ, வீதராகா³னமப்பனா.

அயமேத்த² மனோத்³வாரே வீதி²சித்தப்பவத்தினயோ.

ததா³ரம்மணனியமோ

25. ஸப்³ப³த்தா²பி பனேத்த² அனிட்டே² ஆரம்மணே அகுஸலவிபாகானேவ பஞ்சவிஞ்ஞாணஸம்படிச்ச²னஸந்தீரணததா³ரம்மணானி.

26. இட்டே² குஸலவிபாகானி.

27. அதிஇட்டே² பன ஸோமனஸ்ஸஸஹக³தானேவ ஸந்தீரணததா³ரம்மணானி, தத்தா²பி ஸோமனஸ்ஸஸஹக³தகிரியஜவனாவஸானே ஸோமனஸ்ஸஸஹக³தானேவ ததா³ரம்மணானி ப⁴வந்தி, உபேக்கா²ஸஹக³தகிரியஜவனாவஸானே ச உபேக்கா²ஸஹக³தானேவ ஹோந்தி.

28. தோ³மனஸ்ஸஸஹக³தஜவனாவஸானே ச பன ததா³ரம்மணானிசேவ ப⁴வங்கா³னி ச உபேக்கா²ஸஹக³தானேவ ப⁴வந்தி, தஸ்மா யதி³ ஸோமனஸ்ஸபடிஸந்தி⁴கஸ்ஸ தோ³மனஸ்ஸஸஹக³தஜவனாவஸானே ததா³ரம்மணஸம்ப⁴வோ நத்தி², ததா³ யம் கிஞ்சி பரிசிதபுப்³ப³ம் பரித்தாரம்மணமாரப்³ப⁴ உபேக்கா²ஸஹக³தஸந்தீரணம் உப்பஜ்ஜதி, தமனந்தரித்வா ப⁴வங்க³பாதோவ ஹோதீதி வத³ந்தி ஆசரியா.

29. ததா² காமாவசரஜவனாவஸானே காமாவசரஸத்தானம் காமாவசரத⁴ம்மேஸ்வேவ ஆரம்மணபூ⁴தேஸு ததா³ரம்மணம் இச்ச²ந்தீதி.

30. காமே ஜவனஸத்தாலம்ப³ணானம் நியமே ஸதி.

விபூ⁴தேதிமஹந்தே ச, ததா³ரம்மணமீரிதம்.

அயமேத்த² ததா³ரம்மணனியமோ.

ஜவனனியமோ

31. ஜவனேஸு ச பரித்தஜவனவீதி²யம் காமாவசரஜவனானி ஸத்தக்க²த்தும் ச²க்க²த்துமேவ வா ஜவந்தி.

32. மந்த³ப்பவத்தியம் பன மரணகாலாதீ³ஸு பஞ்சவாரமேவ.

33. ப⁴க³வதோ பன யமகபாடிஹாரியகாலாதீ³ஸு லஹுகப்பவத்தியம் சத்தாரிபஞ்ச வா பச்சவேக்க²ணசித்தானி ப⁴வந்தீதிபி வத³ந்தி.

34. ஆதி³கம்மிகஸ்ஸ பன பட²மகப்பனாயம் மஹக்³க³தஜவனானிஅபி⁴ஞ்ஞாஜவனானி ச ஸப்³ப³தா³பி ஏகவாரமேவ ஜவந்தி, ததோ பரம் ப⁴வங்க³பாதோ.

35. சத்தாரோ பன மக்³கு³ப்பாதா³ ஏகசித்தக்க²ணிகா, ததோ பரம் த்³வே தீணி ப²லசித்தானி யதா²ரஹம் உப்பஜ்ஜந்தி, ததோ பரம் ப⁴வங்க³பாதோ.

36. நிரோத⁴ஸமாபத்திகாலே த்³விக்க²த்தும் சதுத்தா²ருப்பஜவனம் ஜவதி, ததோ பரம் நிரோத⁴ம் பு²ஸதி.

37. வுட்டா²னகாலே ச அனாகா³மிப²லம் வா அரஹத்தப²லம் வா யதா²ரஹமேகவாரம் உப்பஜ்ஜித்வா நிருத்³தே⁴ ப⁴வங்க³பாதோவ ஹோதி.

38. ஸப்³ப³த்தா²பி ஸமாபத்திவீதி²யம் ப⁴வங்க³ஸோதோ விய வீதி²னியமோ நத்தீ²தி கத்வா ப³ஹூனிபி லப்³ப⁴ந்தீதி.

39. ஸத்தக்க²த்தும் பரித்தானி, மக்³கா³பி⁴ஞ்ஞா ஸகிம் மதா.

அவஸேஸானி லப்³ப⁴ந்தி, ஜவனானி ப³ஹூனிபி.

அயமேத்த² ஜவனனியமோ.

புக்³க³லபே⁴தோ³

40. து³ஹேதுகானமஹேதுகானஞ்ச பனேத்த² கிரியஜவனானி சேவ அப்பனாஜவனானி ச லப்³ப⁴ந்தி.

41. ததா² ஞாணஸம்பயுத்தவிபாகானி ச ஸுக³தியம்.

42. து³க்³க³தியம் பன ஞாணவிப்பயுத்தானி ச மஹாவிபாகானி ந லப்³ப⁴ந்தி.

43. திஹேதுகேஸு ச கீ²ணாஸவானம் குஸலாகுஸலஜவனானி ந லப்³ப⁴ந்தி.

44. ததா² ஸேக்க²புது²ஜ்ஜனானம் கிரியஜவனானி.

45. தி³ட்டி²க³தஸம்பயுத்தவிசிகிச்சா²ஜவனானி ச ஸேக்கா²னம்.

46. அனாகா³மிபுக்³க³லானம் பன படிக⁴ஜவனானி ச ந லப்³ப⁴ந்தி.

47. லோகுத்தரஜவனானி ச யதா²ரஹம் அரியானமேவ ஸமுப்பஜ்ஜந்தீதி.

48. அஸேக்கா²னம் சதுசத்தாலீஸ ஸேக்கா²னமுத்³தி³ஸே.

ச²ப்பஞ்ஞாஸாவஸேஸானம், சதுபஞ்ஞாஸ ஸம்ப⁴வா.

அயமேத்த² புக்³க³லபே⁴தோ³.

பூ⁴மிவிபா⁴கோ³

49. காமாவசரபூ⁴மியம் பனேதானி ஸப்³பா³னிபி வீதி²சித்தானி யதா²ரஹமுபலப்³ப⁴ந்தி.

50. ரூபாவசரபூ⁴மியம் படிக⁴ஜவனததா³ரம்மணவஜ்ஜிதானி.

51. அரூபாவசரபூ⁴மியம் பட²மமக்³க³ரூபாவசரஹஸனஹேட்டி²மாருப்பவஜ்ஜிதானி ச லப்³ப⁴ந்தி.

52. ஸப்³ப³த்தா²பி ச தம்தம்பஸாத³ரஹிதானம் தம்தம்த்³வாரிகவீதி²சித்தானி ந லப்³ப⁴ந்தேவ.

53. அஸஞ்ஞஸத்தானம் பன ஸப்³ப³தா²பி சித்தப்பவத்தி நத்தே²வாதி.

54. அஸீதி வீதி²சித்தானி, காமே ரூபே யதா²ரஹம்.

சதுஸட்டி² ததா²ரூபே, த்³வேசத்தாலீஸ லப்³ப⁴ரே.

அயமேத்த² பூ⁴மிவிபா⁴கோ³.

55. இச்சேவம் ச²த்³வாரிகசித்தப்பவத்தி யதா²ஸம்ப⁴வம் ப⁴வங்க³ந்தரிதா யாவதாயுகமப்³போ³ச்சி²ன்னா பவத்ததி.

இதி அபி⁴த⁴ம்மத்த²ஸங்க³ஹே வீதி²ஸங்க³ஹவிபா⁴கோ³ நாம

சதுத்தோ² பரிச்சே²தோ³.