5. வீதி²முத்தபரிச்சே²தோ³

1. வீதி²சித்தவஸேனேவம், பவத்தியமுதீ³ரிதோ.

பவத்திஸங்க³ஹோ நாம, ஸந்தி⁴யம் தா³னி வுச்சதி.

2. சதஸ்ஸோ பூ⁴மியோ, சதுப்³பி³தா⁴ படிஸந்தி⁴, சத்தாரி கம்மானி, சதுதா⁴ மரணுப்பத்தி சேதி வீதி²முத்தஸங்க³ஹே சத்தாரி சதுக்கானி வேதி³தப்³பா³னி.

பூ⁴மிசதுக்கம்

3. தத்த² அபாயபூ⁴மி காமஸுக³திபூ⁴மி ரூபாவசரபூ⁴மி அரூபாவசரபூ⁴மி சேதி சதஸ்ஸோ பூ⁴மியோ நாம.

4. தாஸு நிரயோ திரச்சா²னயோனி பேத்திவிஸயோ அஸுரகாயோ சேதி அபாயபூ⁴மி சதுப்³பி³தா⁴ ஹோதி.

5. மனுஸ்ஸா சாதுமஹாராஜிகா தாவதிம்ஸா யாமா துஸிதா நிம்மானரதி பரனிம்மிதவஸவத்தீ சேதி காமஸுக³திபூ⁴மி ஸத்தவிதா⁴ ஹோதி.

6. ஸா பனாயமேகாத³ஸவிதா⁴பி காமாவசரபூ⁴மிச்சேவ ஸங்க²ம் க³ச்ச²தி.

7. ப்³ரஹ்மபாரிஸஜ்ஜா ப்³ரஹ்மபுரோஹிதா மஹாப்³ரஹ்மா சேதி பட²மஜ்ஜா²னபூ⁴மி.

8. பரித்தாபா⁴ அப்பமாணாபா⁴ ஆப⁴ஸ்ஸரா சேதி து³தியஜ்ஜா²னபூ⁴மி.

9. பரித்தஸுபா⁴ அப்பமாணஸுபா⁴ ஸுப⁴கிண்ஹா சேதி ததியஜ்ஜா²னபூ⁴மி.

10. வேஹப்ப²லா அஸஞ்ஞஸத்தா ஸுத்³தா⁴வாஸா சேதி சதுத்த²ஜ்ஜா²னபூ⁴மீதி ரூபாவசரபூ⁴மி ஸோளஸவிதா⁴ ஹோதி.

11. அவிஹா அதப்பா ஸுத³ஸ்ஸா ஸுத³ஸ்ஸீ அகனிட்டா² சேதி ஸுத்³தா⁴வாஸபூ⁴மி பஞ்சவிதா⁴ ஹோதி.

12. ஆகாஸானஞ்சாயதனபூ⁴மி விஞ்ஞாணஞ்சாயதனபூ⁴மி ஆகிஞ்சஞ்ஞாயதனபூ⁴மி நேவஸஞ்ஞானாஸஞ்ஞாயதனபூ⁴மி சேதி அரூபபூ⁴மி சதுப்³பி³தா⁴ ஹோதி.

13. புது²ஜ்ஜனா ந லப்³ப⁴ந்தி, ஸுத்³தா⁴வாஸேஸு ஸப்³ப³தா².

ஸோதாபன்னா ச ஸகதா³கா³மினோ சாபி புக்³க³லா.

14. அரியா நோபலப்³ப⁴ந்தி, அஸஞ்ஞாபாயபூ⁴மிஸு.

ஸேஸட்டா²னேஸு லப்³ப⁴ந்தி, அரியானரியாபி ச.

இத³மேத்த² பூ⁴மிசதுக்கம்.

படிஸந்தி⁴சதுக்கம்

15. அபாயபடிஸந்தி⁴ காமஸுக³திபடிஸந்தி⁴ ரூபாவசரபடிஸந்தி⁴ அரூபாவசரபடிஸந்தி⁴ சேதி சதுப்³பி³தா⁴ படிஸந்தி⁴ நாம.

16. தத்த² அகுஸலவிபாகோபேக்கா²ஸஹக³தஸந்தீரணம் அபாயபூ⁴மியம் ஓக்கந்திக்க²ணே படிஸந்தி⁴ ஹுத்வா ததோ பரம் ப⁴வங்க³ம் பரியோஸானே சவனம் ஹுத்வா வோச்சி²ஜ்ஜதி, அயமேகாபாயபடிஸந்தி⁴ நாம.

17. குஸலவிபாகோபேக்கா²ஸஹக³தஸந்தீரணம் பன காமஸுக³தியம் மனுஸ்ஸானஞ்சேவ ஜச்சந்தா⁴தீ³னம் பு⁴ம்மஸ்ஸிதானஞ்ச வினிபாதிகாஸுரானம் படிஸந்தி⁴ப⁴வங்க³சுதிவஸேன பவத்ததி.

18. மஹாவிபாகானி பன அட்ட² ஸப்³ப³த்தா²பி காமஸுக³தியம் படிஸந்தி⁴ப⁴வங்க³சுதிவஸேன பவத்தந்தி.

19. இமா நவ காமஸுக³திபடிஸந்தி⁴யோ நாம.

20. ஸா பனாயம் த³ஸவிதா⁴பி காமாவசரபடிஸந்தி⁴ச்சேவ ஸங்க²ம் க³ச்ச²தி.

21. தேஸு சதுன்னம் அபாயானம் மனுஸ்ஸானம் வினிபாதிகாஸுரானஞ்ச ஆயுப்பமாணக³ணனாய நியமோ நத்தி².

22. சாதுமஹாராஜிகானம் பன தே³வானம் தி³ப்³பா³னி பஞ்சவஸ்ஸஸதானி ஆயுப்பமாணம், மனுஸ்ஸக³ணனாய நவுதிவஸ்ஸஸதஸஹஸ்ஸப்பமாணம் ஹோதி, ததோ சதுக்³கு³ணம் தாவதிம்ஸானம், ததோ சதுக்³கு³ணம் யாமானம், ததோ சதுக்³கு³ணம் துஸிதானம், ததோ சதுக்³கு³ணம் நிம்மானரதீனம், ததோ சதுக்³கு³ணம் பரனிம்மிதவஸவத்தீனம்.

23. நவஸதஞ்சேகவீஸ-வஸ்ஸானம் கோடியோ ததா².

வஸ்ஸஸதஸஹஸ்ஸானி, ஸட்டி² ச வஸவத்திஸு.

24. பட²மஜ்ஜா²னவிபாகம் பட²மஜ்ஜா²னபூ⁴மியம் படிஸந்தி⁴ப⁴வங்க³சுதிவஸேன பவத்ததி.

25. ததா² து³தியஜ்ஜா²னவிபாகம் ததியஜ்ஜா²னவிபாகஞ்ச து³தியஜ்ஜா²னபூ⁴மியம்.

26. சதுத்த²ஜ்ஜா²னவிபாகம் ததியஜ்ஜா²னபூ⁴மியம்.

27. பஞ்சமஜ்ஜா²னவிபாகம் சதுத்த²ஜ்ஜா²னபூ⁴மியம்.

28. அஸஞ்ஞஸத்தானம் பன ரூபமேவ படிஸந்தி⁴ ஹோதி. ததா² ததோ பரம் பவத்தியம் சவனகாலே ச ரூபமேவ பவத்தித்வா நிருஜ்ஜ²தி, இமா ச² ரூபாவசரபடிஸந்தி⁴யோ நாம.

29. தேஸு ப்³ரஹ்மபாரிஸஜ்ஜானம் தே³வானம் கப்பஸ்ஸ ததியோ பா⁴கோ³ ஆயுப்பமாணம்.

30. ப்³ரஹ்மபுரோஹிதானம் உபட்³ட⁴கப்போ.

31. மஹாப்³ரஹ்மானம் ஏகோ கப்போ.

32. பரித்தாபா⁴னம் த்³வே கப்பானி.

33. அப்பமாணாபா⁴னம் சத்தாரிகப்பானி.

34. ஆப⁴ஸ்ஸரானம் அட்ட² கப்பானி.

35. பரித்தஸுபா⁴னம் ஸோளஸ கப்பானி.

36. அப்பமாணஸுபா⁴னம் த்³வத்திம்ஸ கப்பானி.

37. ஸுப⁴கிண்ஹானம் சதுஸட்டி² கப்பானி.

38. வேஹப்ப²லானம் அஸஞ்ஞஸத்தானஞ்ச பஞ்சகப்பஸதானி.

39. அவிஹானம் கப்பஸஹஸ்ஸானி.

40. அதப்பானம் த்³வே கப்பஸஹஸ்ஸானி.

41. ஸுத³ஸ்ஸானம் சத்தாரி கப்பஸஹஸ்ஸானி.

42. ஸுத³ஸ்ஸீனம் அட்ட² கப்பஸஹஸ்ஸானி.

43. அகனிட்டா²னம் ஸோளஸ கப்பஸஹஸ்ஸானி.

44. பட²மாருப்பாதி³விபாகானி பட²மாருப்பாதி³பூ⁴மீஸு யதா²க்கமம் படிஸந்தி⁴ப⁴வங்க³சுதிவஸேன பவத்தந்தி. இமா சதஸ்ஸோ அரூபபடிஸந்தி⁴யோ நாம.

45. தேஸு பன ஆகாஸானஞ்சாயதனூபகா³னம் தே³வானம் வீஸதிகப்பஸஹஸ்ஸானி ஆயுப்பமாணம்.

46. விஞ்ஞாணஞ்சாயதனூபகா³னம் தே³வானம் சத்தாலீஸகப்பஸஹஸ்ஸானி.

47. ஆகிஞ்சஞ்ஞாயதனூபகா³னம் தே³வானம் ஸட்டி²கப்பஸஹஸ்ஸானி.

48. நேவஸஞ்ஞானாஸஞ்ஞாயதனூபகா³னம் தே³வானம் சதுராஸீதிகப்பஸஹஸ்ஸானி.

49. படிஸந்தி⁴ ப⁴வங்க³ஞ்ச, ததா² சவனமானஸம்.

ஏகமேவ ததே²வேகவிஸயஞ்சேகஜாதியம்.

இத³மேத்த² படிஸந்தி⁴சதுக்கம்.

கம்மசதுக்கம்

50. ஜனகம் உபத்த²ம்ப⁴கம் உபபீளகம் உபகா⁴தகஞ்சேதி கிச்சவஸேன.

51. க³ருகம் ஆஸன்னம் ஆசிண்ணம் கடத்தாகம்மஞ்சேதி பாகதா³னபரியாயேன.

52. தி³ட்ட²த⁴ம்மவேத³னீயம் உபபஜ்ஜவேத³னீயம் அபராபரியவேத³னீயம் அஹோஸிகம்மஞ்சேதி பாககாலவஸேன சத்தாரி கம்மானி நாம.

53. ததா² அகுஸலம் காமாவசரகுஸலம் ரூபாவசரகுஸலம் அரூபாவசரகுஸலஞ்சேதி பாகடா²னவஸேன.

54. தத்த² அகுஸலம் காயகம்மம் வசீகம்மம் மனோகம்மஞ்சேதி கம்மத்³வாரவஸேன திவித⁴ம் ஹோதி.

55. கத²ம்? பாணாதிபாதோ அதி³ன்னாதா³னம் காமேஸுமிச்சா²சாரோ சேதி காயவிஞ்ஞத்திஸங்கா²தே காயத்³வாரே பா³ஹுல்லவுத்திதோ காயகம்மம் நாம.

56. முஸாவாதோ³ பிஸுணவாசா ப²ருஸவாசா ஸம்ப²ப்பலாபோ சேதி வசீவிஞ்ஞத்திஸங்கா²தே வசீத்³வாரே பா³ஹுல்லவுத்திதோ வசீகம்மம் நாம.

57. அபி⁴ஜ்ஜா² ப்³யாபாதோ³ மிச்சா²தி³ட்டி² சேதி அஞ்ஞத்ராபி விஞ்ஞத்தியா மனஸ்மிம்யேவ பா³ஹுல்லவுத்திதோ மனோகம்மம் நாம.

58. தேஸு பாணாதிபாதோ ப²ருஸவாசா ப்³யாபாதோ³ ச தோ³ஸமூலேன ஜாயந்தி.

59. காமேஸுமிச்சா²சாரோ அபி⁴ஜ்ஜா² மிச்சா²தி³ட்டி² ச லோப⁴மூலேன.

60. ஸேஸானி சத்தாரிபி த்³வீஹி மூலேஹி ஸம்ப⁴வந்தி.

61. சித்துப்பாத³வஸேன பனேதம் அகுஸலம் ஸப்³ப³தா²பி த்³வாத³ஸவித⁴ம் ஹோதி.

62. காமாவசரகுஸலம்பி காயத்³வாரே பவத்தம் காயகம்மம், வசீத்³வாரே பவத்தம் வசீகம்மம், மனோத்³வாரே பவத்தம் மனோகம்மஞ்சேதி கம்மத்³வாரவஸேன திவித⁴ம் ஹோதி.

63. ததா² தா³னஸீலபா⁴வனாவஸேன.

64. சித்துப்பாத³வஸேன பனேதம் அட்ட²வித⁴ம் ஹோதி.

65. தா³னஸீலபா⁴வனாபசாயனவேய்யாவச்சபத்திதா³னபத்தானுமோத³னத⁴ம்மஸ்ஸவனத⁴ம்மதே³ஸனா தி³ட்டி²ஜுகம்மவஸேன த³ஸவித⁴ம் ஹோதி.

66. தம் பனேதம் வீஸதிவித⁴ம்பி காமாவசரகம்மமிச்சேவ ஸங்க²ம் க³ச்ச²தி.

67. ரூபாவசரகுஸலம் பன மனோகம்மமேவ, தஞ்ச பா⁴வனாமயம் அப்பனாப்பத்தம், ஜா²னங்க³பே⁴தே³ன பஞ்சவித⁴ம் ஹோதி.

68. ததா² அரூபாவசரகுஸலஞ்ச மனோகம்மம், தம்பி பா⁴வனாமயம் அப்பனாப்பத்தம். ஆரம்மணபே⁴தே³ன சதுப்³பி³த⁴ம் ஹோதி.

69. ஏத்தா²குஸலகம்மமுத்³த⁴ச்சரஹிதம் அபாயபூ⁴மியம் படிஸந்தி⁴ம் ஜனேதி, பவத்தியம் பன ஸப்³ப³ம்பி த்³வாத³ஸவித⁴ம் ஸத்தாகுஸலபாகானி ஸப்³ப³த்தா²பி காமலோகே ரூபலோகே ச யதா²ரஹம் விபச்சதி.

70. காமாவசரகுஸலம்பி காமஸுக³தியமேவ படிஸந்தி⁴ம் ஜனேதி, ததா² பவத்தியஞ்ச மஹாவிபாகானி, அஹேதுகவிபாகானி பன அட்ட²பி ஸப்³ப³த்தா²பி காமலோகே ரூபலோகே ச யதா²ரஹம் விபச்சதி.

71. தத்தா²பி திஹேதுகமுக்கட்ட²ம் குஸலம் திஹேதுகம் படிஸந்தி⁴ம் த³த்வா பவத்தே ஸோளஸ விபாகானி விபச்சதி.

72. திஹேதுகமோமகம் த்³விஹேதுகமுக்கட்ட²ஞ்ச குஸலம் த்³விஹேதுகம் படிஸந்தி⁴ம் த³த்வா பவத்தே திஹேதுகரஹிதானி த்³வாத³ஸ விபாகானி விபச்சதி.

73. த்³விஹேதுகமோமகம் பன குஸலம் அஹேதுகமேவ படிஸந்தி⁴ம் தே³தி, பவத்தே ச அஹேதுகவிபாகானேவ விபச்சதி.

74. அஸங்கா²ரம் ஸஸங்கா²ர-விபாகானி ந பச்சதி.

ஸஸங்கா²ரமஸங்கா²ர-விபாகானீதி கேசன.

தேஸம் த்³வாத³ஸ பாகானி, த³ஸாட்ட² ச யதா²க்கமம்;

யதா²வுத்தானுஸாரேன யதா²ஸம்ப⁴வமுத்³தி³ஸே.

75. ரூபாவசரகுஸலம் பன பட²மஜ்ஜா²னம் பரித்தம் பா⁴வேத்வா ப்³ரஹ்மபாரிஸஜ்ஜேஸு உப்பஜ்ஜதி.

76. ததே³வ மஜ்ஜி²மம் பா⁴வேத்வா ப்³ரஹ்மபுரோஹிதேஸு.

77. பணீதம் பா⁴வேத்வா மஹாப்³ரஹ்மேஸு.

78. ததா² து³தியஜ்ஜா²னம் ததியஜ்ஜா²னஞ்ச பரித்தம் பா⁴வேத்வா பரித்தாபே⁴ஸு.

79. மஜ்ஜி²மம் பா⁴வேத்வா அப்பமாணாபே⁴ஸு.

80. பணீதம் பா⁴வேத்வா ஆப⁴ஸ்ஸரேஸு.

81. சதுத்த²ஜ்ஜா²னம் பரித்தம் பா⁴வேத்வா பரித்தஸுபே⁴ஸு.

82. மஜ்ஜி²மம் பா⁴வேத்வா அப்பமாணஸுபே⁴ஸு.

83. பணீதம் பா⁴வேத்வா ஸுப⁴கிண்ஹேஸு.

84. பஞ்சமஜ்ஜா²னம் பா⁴வேத்வா வேஹப்ப²லேஸு.

85. ததே³வ ஸஞ்ஞாவிராக³ம் பா⁴வேத்வா அஸஞ்ஞஸத்தேஸு.

86. அனாகா³மினோ பன ஸுத்³தா⁴வாஸேஸு உப்பஜ்ஜந்தி.

87. அரூபாவசரகுஸலஞ்ச யதா²க்கமம் பா⁴வேத்வா ஆருப்பேஸு உப்பஜ்ஜந்தீதி.

88. இத்த²ம் மஹக்³க³தம் புஞ்ஞம், யதா²பூ⁴மிவவத்தி²தம்.

ஜனேதி ஸதி³ஸம் பாகம், படிஸந்தி⁴பவத்தியம்.

இத³மேத்த² கம்மசதுக்கம்.

சுதிபடிஸந்தி⁴க்கமோ

89. ஆயுக்க²யேன கம்மக்க²யேன உப⁴யக்க²யேன உபச்சே²த³ககம்முனா சேதி சதுதா⁴ மரணுப்பத்தி நாம.

90. ததா² ச மரந்தானம் பன மரணகாலே யதா²ரஹம் அபி⁴முகீ²பூ⁴தம் ப⁴வந்தரே படிஸந்தி⁴ஜனகம் கம்மம் வா, தம்கம்மகரணகாலே ரூபாதி³கமுபலத்³த⁴புப்³ப³முபகரணபூ⁴தஞ்ச கம்மனிமித்தம் வா, அனந்தரமுப்பஜ்ஜமானப⁴வே உபலபி⁴தப்³ப³முபபோ⁴க³பூ⁴தஞ்ச க³தினிமித்தம் வா கம்மப³லேன ச²ன்னம் த்³வாரானம் அஞ்ஞதரஸ்மிம் பச்சுபட்டா²தி, ததோ பரம் தமேவ ததோ²பட்டி²தம் ஆரம்மணம் ஆரப்³ப⁴ விபச்சமானககம்மானுரூபம் பரிஸுத்³த⁴ம் உபக்கிலிட்ட²ம் வா உபலபி⁴தப்³ப³ப⁴வானுரூபம் தத்தோ²ணதம்வ சித்தஸந்தானம் அபி⁴ண்ஹம் பவத்ததி பா³ஹுல்லேன, தமேவ வா பன ஜனகபூ⁴தம் கம்மம் அபி⁴னவகரணவஸேன த்³வாரப்பத்தம் ஹோதி.

91. பச்சாஸன்னமரணஸ்ஸ தஸ்ஸ வீதி²சித்தாவஸானே ப⁴வங்க³க்க²யே வா சவனவஸேன பச்சுப்பன்னப⁴வபரியோஸானபூ⁴தம் சுதிசித்தம் உப்பஜ்ஜித்வா நிருஜ்ஜ²தி, தஸ்மிம் நிருத்³தா⁴வஸானே தஸ்ஸானந்தரமேவ ததா²க³ஹிதம் ஆரம்மணம் ஆரப்³ப⁴ ஸவத்து²கம் அவத்து²கமேவ வா யதா²ரஹம் அவிஜ்ஜானுஸயபரிக்கி²த்தேன தண்ஹானுஸயமூலகேன ஸங்கா²ரேன ஜனியமானம் ஸம்பயுத்தேஹி பரிக்³க³ய்ஹமானம் ஸஹஜாதானமதி⁴ட்டா²னபா⁴வேன புப்³ப³ங்க³மபூ⁴தம் ப⁴வந்தரபடிஸந்தா⁴னவஸேன படிஸந்தி⁴ஸங்கா²தம் மானஸம் உப்பஜ்ஜமானமேவ பதிட்டா²தி ப⁴வந்தரே.

92. மரணாஸன்னவீதி²யம் பனேத்த² மந்த³ப்பவத்தானி பஞ்சேவ ஜவனானி பாடிகங்கி²தப்³பா³னி, தஸ்மா யதி³ பச்சுப்பன்னாரம்மணேஸு ஆபாத²க³தேஸு த⁴ரந்தேஸ்வேவ மரணம் ஹோதி, ததா³ படிஸந்தி⁴ப⁴வங்கா³னம்பி பச்சுப்பன்னாரம்மணதா லப்³ப⁴தீதி கத்வா காமாவசரபடிஸந்தி⁴யா ச²த்³வாரக்³க³ஹிதம் கம்மனிமித்தம் க³தினிமித்தஞ்ச பச்சுப்பன்னமதீதாரம்மணம் உபலப்³ப⁴தி, கம்மம் பன அதீதமேவ, தஞ்ச மனோத்³வாரக்³க³ஹிதம், தானி பன ஸப்³பா³னிபி பரித்தத⁴ம்மபூ⁴தானேவாரம்மணானி.

93. ரூபாவசரபடிஸந்தி⁴யா பன பஞ்ஞத்திபூ⁴தம் கம்மனிமித்தமேவாரம்மணம் ஹோதி.

94. ததா² அரூபபடிஸந்தி⁴யா ச மஹக்³க³தபூ⁴தம் பஞ்ஞத்திபூ⁴தஞ்ச கம்மனிமித்தமேவ யதா²ரஹமாரம்மணம் ஹோதி.

95. அஸஞ்ஞஸத்தானம் பன ஜீவிதனவகமேவ படிஸந்தி⁴பா⁴வேன பதிட்டா²தி, தஸ்மா தே ரூபபடிஸந்தி⁴கா நாம.

96. அரூபா அரூபபடிஸந்தி⁴கா.

97. ஸேஸா ரூபாரூபபடிஸந்தி⁴கா.

98. ஆருப்பசுதியா ஹோந்தி, ஹேட்டி²மாருப்பவஜ்ஜிதா.

பரமாருப்பஸந்தீ⁴ ச, ததா² காமதிஹேதுகா.

ரூபாவசரசுதியா, அஹேதுரஹிதா ஸியும்;

ஸப்³பா³ காமதிஹேதும்ஹா, காமேஸ்வேவ பனேதரா.

அயமேத்த² சுதிபடிஸந்தி⁴க்கமோ.

99. இச்சேவம் க³ஹிதபடிஸந்தி⁴கானம் பன படிஸந்தி⁴னிரோதா⁴னந்தரதோ பபு⁴தி தமேவாரம்மணமாரப்³ப⁴ ததே³வ சித்தம் யாவ சுதிசித்துப்பாதா³ அஸதி வீதி²சித்துப்பாதே³ ப⁴வஸ்ஸ அங்க³பா⁴வேன ப⁴வங்க³ஸந்ததிஸங்கா²தம் மானஸம் அப்³போ³ச்சி²ன்னம் நதீ³ஸோதோ விய பவத்ததி.

100. பரியோஸானே ச சவனவஸேன சுதிசித்தம் ஹுத்வா நிருஜ்ஜ²தி.

101. ததோ பரஞ்ச படிஸந்தா⁴த³யோ ரத²சக்கமிவ யதா²க்கமம் ஏவ பரிவத்தந்தா பவத்தந்தி.

102. படிஸந்தி⁴ப⁴வங்க³வீதி²யோ, சுதிசேஹ ததா² ப⁴வந்தரே.

புன ஸந்தி⁴ ப⁴வங்க³மிச்சயம், பரிவத்ததி சித்தஸந்ததி.

படிஸங்கா²யபனேதமத்³து⁴வம், அதி⁴க³ந்த்வா பத³மச்சுதம் பு³தா⁴;

ஸுஸமுச்சி²ன்னஸினேஹப³ந்த⁴னா, ஸமமேஸ்ஸந்தி சிராய ஸுப்³ப³தா.

இதி அபி⁴த⁴ம்மத்த²ஸங்க³ஹே வீதி²முத்தஸங்க³ஹவிபா⁴கோ³ நாம

பஞ்சமோ பரிச்சே²தோ³.