3. பகிண்ணகபரிச்சே²தோ³

1. ஸம்பயுத்தா யதா²யோக³ம், தேபஞ்ஞாஸ ஸபா⁴வதோ.

சித்தசேதஸிகா த⁴ம்மா, தேஸம் தா³னி யதா²ரஹம்.

2. வேத³னாஹேதுதோ கிச்சத்³வாராலம்ப³ணவத்து²தோ.

சித்துப்பாத³வஸேனேவ, ஸங்க³ஹோ நாம நீயதே.

வேத³னாஸங்க³ஹோ

3. தத்த² வேத³னாஸங்க³ஹே தாவ திவிதா⁴ வேத³னா ஸுக²ம் து³க்க²ம் அது³க்க²மஸுகா² சேதி, ஸுக²ம் து³க்க²ம் ஸோமனஸ்ஸம் தோ³மனஸ்ஸம் உபேக்கா²தி ச பே⁴தே³ன பன பஞ்சதா⁴ ஹோதி.

4. தத்த² ஸுக²ஸஹக³தம் குஸலவிபாகம் காயவிஞ்ஞாணமேகமேவ, ததா² து³க்க²ஸஹக³தம் அகுஸலவிபாகம்.

5. ஸோமனஸ்ஸஸஹக³தசித்தானி பன லோப⁴மூலானி சத்தாரி, த்³வாத³ஸ காமாவசரஸோப⁴னானி, ஸுக²ஸந்தீரணஹஸனானி ச த்³வேதி அட்டா²ரஸ காமாவசரஸோமனஸ்ஸஸஹக³தசித்தானி சேவ பட²மது³தியததியசதுத்த²ஜ்ஜா²னஸங்கா²தானி சதுசத்தாலீஸ மஹக்³க³தலோகுத்தரசித்தானி சேதி த்³வாஸட்டி²விதா⁴னி ப⁴வந்தி.

6. தோ³மனஸ்ஸஸஹக³தசித்தானி பன த்³வே படிக⁴ஸம்பயுத்தசித்தானேவ.

7. ஸேஸானி ஸப்³பா³னிபி பஞ்சபஞ்ஞாஸ உபேக்கா²ஸஹக³தசித்தானேவாதி.

8. ஸுக²ம் து³க்க²முபேக்கா²தி, திவிதா⁴ தத்த² வேத³னா.

ஸோமனஸ்ஸம் தோ³மனஸ்ஸமிதிபே⁴தே³ன பஞ்சதா⁴.

9. ஸுக²மேகத்த² து³க்க²ஞ்ச, தோ³மனஸ்ஸம் த்³வயே டி²தம்.

த்³வாஸட்டீ²ஸு ஸோமனஸ்ஸம், பஞ்சபஞ்ஞாஸகேதரா.

ஹேதுஸங்க³ஹோ

10. ஹேதுஸங்க³ஹே ஹேதூ நாம லோபோ⁴ தோ³ஸோ மோஹோ அலோபோ⁴ அதோ³ஸோ அமோஹோ சாதி ச²ப்³பி³தா⁴ ப⁴வந்தி.

11. தத்த² பஞ்சத்³வாராவஜ்ஜனத்³விபஞ்சவிஞ்ஞாணஸம்படிச்ச²னஸந்தீரணவோட்ட²ப்³ப³னஹஸனவஸேன அஹேதுகசித்தானி நாம.

12. ஸேஸானி ஸப்³பா³னிபி ஏகஸத்ததி சித்தானி ஸஹேதுகானேவ.

13. தத்தா²பி த்³வே மோமூஹசித்தானி ஏகஹேதுகானி.

14. ஸேஸானி த³ஸ அகுஸலசித்தானி சேவ ஞாணவிப்பயுத்தானி த்³வாத³ஸ காமாவசரஸோப⁴னானி சேதி த்³வாவீஸதி த்³விஹேதுகசித்தானி.

15. த்³வாத³ஸ ஞாணஸம்பயுத்தகாமாவசரஸோப⁴னானி சேவ பஞ்சதிம்ஸ மஹக்³க³தலோகுத்தரசித்தானி சேதி ஸத்தசத்தாலீஸ திஹேதுகசித்தானீதி.

16. லோபோ⁴ தோ³ஸோ ச மோஹோ ச,

ஹேதூ அகுஸலா தயோ;

அலோபா⁴தோ³ஸாமோஹோ ச,

குஸலாப்³யாகதா ததா².

17. அஹேதுகாட்டா²ரஸேகஹேதுகா த்³வே த்³வாவீஸதி.

த்³விஹேதுகா மதா ஸத்தசத்தாலீஸதிஹேதுகா.

கிச்சஸங்க³ஹோ

18. கிச்சஸங்க³ஹே கிச்சானி நாம படிஸந்தி⁴ப⁴வங்கா³வஜ்ஜனத³ஸ்ஸனஸவனகா⁴யனஸாயனபு²ஸனஸம்படிச்ச²னஸந்தீரணவோட்ட²ப்³ப³னஜவனததா³ரம்மணசுதிவஸேன சுத்³த³ஸவிதா⁴னி ப⁴வந்தி.

19. படிஸந்தி⁴ப⁴வங்கா³வஜ்ஜனபஞ்சவிஞ்ஞாணடா²னாதி³வஸேன பன தேஸம் த³ஸதா⁴ டா²னபே⁴தோ³ வேதி³தப்³போ³.

20. தத்த² த்³வே உபேக்கா²ஸஹக³தஸந்தீரணானி சேவ அட்ட² மஹாவிபாகானி ச நவ ரூபாரூபவிபாகானி சேதி ஏகூனவீஸதி சித்தானி படிஸந்தி⁴ப⁴வங்க³சுதிகிச்சானி நாம.

21. ஆவஜ்ஜனகிச்சானி பன த்³வே.

22. ததா² த³ஸ்ஸனஸவனகா⁴யனஸாயனபு²ஸனஸம்படிச்ச²னகிச்சானி ச.

23. தீணி ஸந்தீரணகிச்சானி.

24. மனோத்³வாராவஜ்ஜனமேவ பஞ்சத்³வாரே வோட்ட²ப்³ப³னகிச்சம் ஸாதே⁴தி.

25. ஆவஜ்ஜனத்³வயவஜ்ஜிதானி குஸலாகுஸலப²லகிரியசித்தானி பஞ்சபஞ்ஞாஸ ஜவனகிச்சானி.

26. அட்ட² மஹாவிபாகானி சேவ ஸந்தீரணத்தயஞ்சேதி ஏகாத³ஸ ததா³ரம்மணகிச்சானி.

27. தேஸு பன த்³வே உபேக்கா²ஸஹக³தஸந்தீரணசித்தானி படிஸந்தி⁴ப⁴வங்க³சுதிததா³ரம்மணஸந்தீரணவஸேன பஞ்சகிச்சானி நாம.

28. மஹாவிபாகானி அட்ட² படிஸந்தி⁴ப⁴வங்க³சுதிததா³ரம்மணவஸேன சதுகிச்சானி நாம.

29. மஹக்³க³தவிபாகானி நவ படிஸந்தி⁴ப⁴வங்க³சுதிவஸேன திகிச்சானி நாம.

30. ஸோமனஸ்ஸஸந்தீரணம் ஸந்தீரணததா³ரம்மணவஸேன து³கிச்சம்.

31. ததா² வோட்ட²ப்³ப³னம் வோட்ட²ப்³ப³னாவஜ்ஜனவஸேன.

32. ஸேஸானி பன ஸப்³பா³னிபி ஜவனமனோதா⁴துத்திகத்³விபஞ்சவிஞ்ஞாணானி யதா²ஸம்ப⁴வமேககிச்சானீதி.

33. படிஸந்தா⁴த³யோ நாம, கிச்சபே⁴தே³ன சுத்³த³ஸ.

த³ஸதா⁴ டா²னபே⁴தே³ன, சித்துப்பாதா³ பகாஸிதா.

34. அட்ட²ஸட்டி² ததா² த்³வே ச, நவாட்ட² த்³வே யதா²க்கமம்.

ஏகத்³விதிசதுபஞ்சகிச்சடா²னானி நித்³தி³ஸே.

த்³வாரஸங்க³ஹோ

35. த்³வாரஸங்க³ஹே த்³வாரானி நாம சக்கு²த்³வாரம் ஸோதத்³வாரம் கா⁴னத்³வாரம் ஜிவ்ஹாத்³வாரம் காயத்³வாரம் மனோத்³வாரஞ்சேதி ச²ப்³பி³தா⁴னி ப⁴வந்தி.

36. தத்த² சக்கு²மேவ சக்கு²த்³வாரம்.

37. ததா² ஸோதாத³யோ ஸோதத்³வாராதீ³னி.

38. மனோத்³வாரம் பன ப⁴வங்க³ந்தி பவுச்சதி.

39. தத்த² பஞ்சத்³வாராவஜ்ஜனசக்கு²விஞ்ஞாணஸம்படிச்ச²னஸந்தீரணவோட்ட²ப்³ப³னகாமாவசரஜவனததா³ரம்மணவஸேன ச²சத்தாலீஸ சித்தானி சக்கு²த்³வாரே யதா²ரஹம் உப்பஜ்ஜந்தி, ததா² பஞ்சத்³வாராவஜ்ஜனஸோதவிஞ்ஞாணாதி³வஸேன ஸோதத்³வாராதீ³ஸுபி ச²சத்தாலீஸேவ ப⁴வந்தீதி ஸப்³ப³தா²பி பஞ்சத்³வாரே சதுபஞ்ஞாஸ சித்தானி காமாவசரானேவ.

40. மனோத்³வாரே பன மனோத்³வாராவஜ்ஜனபஞ்சபஞ்ஞாஸஜவனததா³ரம்மணவஸேன ஸத்தஸட்டி² சித்தானி ப⁴வந்தி.

41. ஏகூனவீஸதி படிஸந்தி⁴ப⁴வங்க³சுதிவஸேன த்³வாரவிமுத்தானி.

42. தேஸு பன பஞ்சவிஞ்ஞாணானி சேவ மஹக்³க³தலோகுத்தரஜவனானி சேதி ச²த்திம்ஸ யதா²ரஹமேகத்³வாரிகசித்தானி நாம.

43. மனோதா⁴துத்திகம் பன பஞ்சத்³வாரிகம்.

44. ஸுக²ஸந்தீரணவோட்ட²ப்³ப³னகாமாவசரஜவனானி ச²த்³வாரிகசித்தானி.

45. உபேக்கா²ஸஹக³தஸந்தீரணமஹாவிபாகானி ச²த்³வாரிகானி சேவ த்³வாரவிமுத்தானி ச.

46. மஹக்³க³தவிபாகானி த்³வாரவிமுத்தானேவாதி.

47. ஏகத்³வாரிகசித்தானி, பஞ்சச²த்³வாரிகானி ச.

ச²த்³வாரிகவிமுத்தானி, விமுத்தானி ச ஸப்³ப³தா².

ச²த்திம்ஸதி ததா² தீணி, ஏகதிம்ஸ யதா²க்கமம்;

த³ஸதா⁴ நவதா⁴ சேதி, பஞ்சதா⁴ பரிதீ³பயே.

ஆலம்ப³ணஸங்க³ஹோ

48. ஆலம்ப³ணஸங்க³ஹே ஆரம்மணானி நாம ரூபாரம்மணம் ஸத்³தா³ரம்மணம் க³ந்தா⁴ரம்மணம் ரஸாரம்மணம் போ²ட்ட²ப்³பா³ரம்மணம் த⁴ம்மாரம்மணஞ்சேதி ச²ப்³பி³தா⁴னி ப⁴வந்தி.

49. தத்த² ரூபமேவ ரூபாரம்மணம், ததா² ஸத்³தா³த³யோ ஸத்³தா³ரம்மணாதீ³னி.

50. த⁴ம்மாரம்மணம் பன பஸாத³ஸுகு²மரூபசித்தசேதஸிகனிப்³பா³னபஞ்ஞத்திவஸேன ச²தா⁴ ஸங்க³ய்ஹதி.

51. தத்த² சக்கு²த்³வாரிகசித்தானம் ஸப்³பே³ஸம்பி ரூபமேவ ஆரம்மணம், தஞ்ச பச்சுப்பன்னம். ததா² ஸோதத்³வாரிகசித்தாதீ³னம்பி ஸத்³தா³தீ³னி, தானி ச பச்சுப்பன்னானியேவ.

52. மனோத்³வாரிகசித்தானம் பன ச²ப்³பி³த⁴ம்பி பச்சுப்பன்னமதீதம் அனாக³தம் காலவிமுத்தஞ்ச யதா²ரஹமாரம்மணம் ஹோதி.

53. த்³வாரவிமுத்தானஞ்ச படிஸந்தி⁴ப⁴வங்க³சுதிஸங்கா²தானம் ச²ப்³பி³த⁴ம்பி யதா²ஸம்ப⁴வம் யேபு⁴ய்யேன ப⁴வந்தரே ச²த்³வாரக்³க³ஹிதம் பச்சுப்பன்னமதீதம் பஞ்ஞத்திபூ⁴தம் வா கம்மகம்மனிமித்தக³தினிமித்தஸம்மதம் ஆரம்மணம் ஹோதி.

54. தேஸு சக்கு²விஞ்ஞாணாதீ³னி யதா²க்கமம் ரூபாதி³ஏகேகாரம்மணானேவ.

55. மனோதா⁴துத்திகம் பன ரூபாதி³பஞ்சாரம்மணம்.

56. ஸேஸானி காமாவசரவிபாகானி ஹஸனசித்தஞ்சேதி ஸப்³ப³தா²பி காமாவசராரம்மணானேவ.

57. அகுஸலானி சேவ ஞாணவிப்பயுத்தகாமாவசரஜவனானி சேதி லோகுத்தரவஜ்ஜிதஸப்³பா³ரம்மணானி.

58. ஞாணஸம்பயுத்தகாமாவசரகுஸலானி சேவ பஞ்சமஜ்ஜா²னஸங்கா²தம் அபி⁴ஞ்ஞாகுஸலஞ்சேதி அரஹத்தமக்³க³ப²லவஜ்ஜிதஸப்³பா³ரம்மணானி.

59. ஞாணஸம்பயுத்தகாமாவசரகிரியானி சேவ கிரியாபி⁴ஞ்ஞாவோட்ட²ப்³ப³னஞ்சேதி ஸப்³ப³தா²பி ஸப்³பா³ரம்மணானி.

60. ஆருப்பேஸு து³தியசதுத்தா²னி மஹக்³க³தாரம்மணானி.

61. ஸேஸானி மஹக்³க³தசித்தானி ஸப்³பா³னிபி பஞ்ஞத்தாரம்மணானி.

62. லோகுத்தரசித்தானி நிப்³பா³னாரம்மணானீதி.

63. பஞ்சவீஸ பரித்தம்ஹி, ச² சித்தானி மஹக்³க³தே.

ஏகவீஸதி வோஹாரே, அட்ட² நிப்³பா³னகோ³சரே.

வீஸானுத்தரமுத்தம்ஹி, அக்³க³மக்³க³ப²லுஜ்ஜி²தே;

பஞ்ச ஸப்³ப³த்த² ச²ச்சேதி, ஸத்ததா⁴ தத்த² ஸங்க³ஹோ.

வத்து²ஸங்க³ஹோ

64. வத்து²ஸங்க³ஹே வத்தூ²னி நாம சக்கு²ஸோதகா⁴னஜிவ்ஹாகாயஹத³யவத்து² சேதி ச²ப்³பி³தா⁴னி ப⁴வந்தி.

65. தானி காமலோகே ஸப்³பா³னிபி லப்³ப⁴ந்தி.

66. ரூபலோகே பன கா⁴னாதி³த்தயம் நத்தி².

67. அரூபலோகே பன ஸப்³பா³னிபி ந ஸம்விஜ்ஜந்தி.

68. தத்த² பஞ்சவிஞ்ஞாணதா⁴துயோ யதா²க்கமம் ஏகந்தேன பஞ்ச பஸாத³வத்தூ²னி நிஸ்ஸாயேவ பவத்தந்தி.

69. பஞ்சத்³வாராவஜ்ஜனஸம்படிச்ச²னஸங்கா²தா பன மனோதா⁴து ச ஹத³யம் நிஸ்ஸிதாயேவ பவத்தந்தி.

70. அவஸேஸா பன மனோவிஞ்ஞாணதா⁴துஸங்கா²தா ச ஸந்தீரணமஹாவிபாகபடிக⁴த்³வயபட²மமக்³க³ஹஸனரூபாவசரவஸேன ஹத³யம் நிஸ்ஸாயேவ பவத்தந்தி.

71. அவஸேஸா குஸலாகுஸலகிரியானுத்தரவஸேன பன நிஸ்ஸாய வா அனிஸ்ஸாய வா.

72. ஆருப்பவிபாகவஸேன ஹத³யம் அனிஸ்ஸாயேவாதி.

73. ச²வத்து²ம் நிஸ்ஸிதா காமே, ஸத்த ரூபே சதுப்³பி³தா⁴.

திவத்து²ம் நிஸ்ஸிதாருப்பே, தா⁴த்வேகா நிஸ்ஸிதா மதா.

74. தேசத்தாலீஸ நிஸ்ஸாய, த்³வேசத்தாலீஸ ஜாயரே.

நிஸ்ஸாய ச அனிஸ்ஸாய, பாகாருப்பா அனிஸ்ஸிதா.

இதி அபி⁴த⁴ம்மத்த²ஸங்க³ஹே பகிண்ணகஸங்க³ஹவிபா⁴கோ³ நாம

ததியோ பரிச்சே²தோ³.