4. புக்³க³லபஞ்ஞத்திமாதிகா

ஏககமாதிகத்த²வண்ணனா

இதா³னி புக்³க³லபஞ்ஞத்திமாதிகாஸம்வண்ணனானயோ ஹோதி. தத்த² அனுத்தானத்த²தோ தாவ ச² பஞ்ஞத்தியோதி ஏத்த² ‘‘ஆசிக்க²தி தே³ஸேதி பஞ்ஞபேதி பட்ட²பேதீ’’தி (ஸம். நி. 2.20) ஆக³தட்டா²னே ஸந்த³ஸ்ஸனா பகாஸனா பஞ்ஞத்தி நாம. ‘‘ஸுபஞ்ஞத்தம் மஞ்சபீட²’’ந்தி (பாரா. 269) ஆக³தட்டா²னே ட²பனா நிக்கி²பனா பஞ்ஞத்தி நாம, இத⁴ உப⁴யம்பி வட்டதி. ச² பஞ்ஞத்தியோதி ஹி ச² பஞ்ஞாபனா ச² ஸந்த³ஸ்ஸனா பகாஸனாதிபி, ச² ட²பனா நிக்கி²பனாதிபி வுத்தம் ஹோதி. நாமபஞ்ஞத்தியேவ ஹி தே தே விஜ்ஜமானாவிஜ்ஜமானே த⁴ம்மே ஸந்த³ஸ்ஸேதீதிபி. தேன தேன கோட்டா²ஸேன ட²பேதீதிபி. க²ந்த⁴பஞ்ஞத்தீதிஆதி³ பன ஸங்கே²பதோ தாஸம் பஞ்ஞத்தீனம் ஸரூபத³ஸ்ஸனம். தத்த² க²ந்தா⁴னம் ‘‘க²ந்தா⁴’’தி பஞ்ஞாபனா ஸந்த³ஸ்ஸனா பகாஸனா ச ட²பனா நிக்கி²பனா ச க²ந்த⁴பஞ்ஞத்தி நாம…பே… புக்³க³லானம் ‘‘புக்³க³லா’’தி பஞ்ஞாபனா ஸந்த³ஸ்ஸனா பகாஸனா ச ட²பனா நிக்கி²பனா ச புக்³க³லபஞ்ஞத்தி நாம. இமா ஏவ ச² பஞ்ஞத்தியோ விஜ்ஜந்தி. அஞ்ஞாஸம்பி ஸம்முதிபரமத்த²கதா²னம் பஞ்ஞத்தீனம் அனந்தத்தா, உபலக்க²ணவஸேன பன பதா⁴னபா⁴வதோ ச ஏதாவ வுத்தா. பாளிமுத்தகனயேன பன ஸப்³ப³ஸங்கா³ஹிகா விஜ்ஜமானபஞ்ஞத்திஆத³யோ ச² நாமபஞ்ஞத்தியோ அட்ட²கதா²ஸு (பு. ப. அட்ட². மாதிகாவண்ணனா 1) ஆக³தா, தா ச ஹேட்டா² வுத்தாதி இத⁴ ந வுத்தா. தாஸு இத⁴ புக்³க³லபஞ்ஞத்திபதே³ன அவிஜ்ஜமானபஞ்ஞத்தி, ஸேஸேஹி விஜ்ஜமானபஞ்ஞத்தி சாதி த்³வே ஏவ லப்³ப⁴ந்தி.

அட்ட²கதா²முத்தகேன பன ஆசரியனயேன அபராபி ச² பஞ்ஞத்தியோ – உபாதா³பஞ்ஞத்தி உபனிதா⁴பஞ்ஞத்தி ஸமோதா⁴னபஞ்ஞத்தி உபனிக்கி²த்தபஞ்ஞத்தி தஜ்ஜாபஞ்ஞத்தி ஸந்ததிபஞ்ஞத்தீதி, யா ‘‘அத்த²பஞ்ஞத்தீ’’தி வுச்சதி. தத்த² யா க²ந்த⁴பஞ்சகம் உபாதா³ய நிஸ்ஸாய ஸம்மதா ஸத்தாதி³கா, அங்கா³னி உபாதா³ய ரதா²தி³கா, சந்தா³தி³பரிவத்தாத³யோ உபாதா³ய காலதி³ஸாதி³கா, தம்தம்பூ⁴தனிமித்தம், பா⁴வனாவிஸேஸஞ்ச உபாதா³ய கஸிணாதி³உக்³க³ஹபடிபா⁴க³னிமித்தாதி³காதி அயம் ஏவரூபா ஸபா⁴வத⁴ம்மேஹி ஏகத்தேன வா ஸச்சி²கட்ட²பரமத்தே²ன அனுபலப்³ப⁴ஸபா⁴வா உபாதா³பஞ்ஞத்தி நாம. பஞ்ஞாபேதப்³ப³ட்டே²ன சேஸா பஞ்ஞத்தி வுத்தா, ந பன பஞ்ஞாபனட்டே²ன. யா தஸ்ஸ தஸ்ஸத்த²ஸ்ஸ பஞ்ஞாபனா, ஸா அவிஜ்ஜமானபஞ்ஞத்தியேவ.

யா பன அஞ்ஞம் பட²மாதி³ம் உபனிதா⁴ய அபேக்கி²த்வா து³தியம் ரஸ்ஸம் தீ³க⁴ம் தூ³ரம் ஸந்திகந்திஆதி³கா தத³ஞ்ஞாபேக்கூ²பனிதா⁴, ச²த்தபாணீதிஆதி³கா ஹத்த²க³தூபனிதா⁴, குண்ட³லீதிஆதி³கா ஸம்பயுத்தூபனிதா⁴, த⁴ஞ்ஞஸகடந்தி ஆதி³கா ஸமாரோபிதூபனிதா⁴, இந்த³ஸாலகு³ஹாதிஆதி³கா அவிதூ³ரக³தூபனிதா⁴, ஸுவண்ணவண்ணோதிஆதி³கா படிபா⁴கூ³பனிதா⁴, ப்³ராஹ்மணகா³மோதிஆதி³கா தப்³ப³ஹுலூபனிதா⁴, மணிகடகந்திஆதி³கா தப்³பி³ஸிட்டூ²பனிதா⁴தி ஏவமாதி³ அனேகப்பகாரா பஞ்ஞாபனா, அயம் உபனிதா⁴பஞ்ஞத்தி நாம.

த⁴ஞ்ஞராஸீதிஆதி³கா பன ஸமோதா⁴னபஞ்ஞத்தி நாம. புரிமஸ்ஸ புரிமஸ்ஸ உபனிக்கி²பித்வா த்³வே தீணீதிஆதி³கா உபனிக்கி²த்தபஞ்ஞத்தி நாம. தம்தம்ஸபா⁴வனிஸ்ஸிதா பத²வீஆதி³கா தஜ்ஜாபஞ்ஞத்தி நாம. ஆஸீதிகோதிஆதி³கா பன ஸந்ததிபஞ்ஞத்தி நாம.

அட்ட²கதா²முத்தகேனேவ ஆசரியனயேன அபராபி த⁴ம்மகதி²காதி³கா கிச்சபஞ்ஞத்தி, கிஸதூ²லாதி³கா ஸண்டா²னபஞ்ஞத்தி, இத்தி²புரிஸாதி³கா லிங்க³பஞ்ஞத்தி, காமாவசராதி³கா, கோஸலகாதி³கா ச பூ⁴மிபஞ்ஞத்தி, திஸ்ஸோ நாகோ³திஆதி³கா பச்சத்தபஞ்ஞத்தி, நிரோதா⁴தி³கா அஸங்க²தபஞ்ஞத்தி சாதி ச² பஞ்ஞத்தியோ.

ஏதாஸு பன த்³வாத³ஸஸு தஜ்ஜாபஞ்ஞத்தி, ஏகச்சா பூ⁴மிபஞ்ஞத்தி, அஸங்க²தபஞ்ஞத்தி ச விஜ்ஜமானபஞ்ஞத்திஸங்கா²தா நாமபஞ்ஞத்தி, தத³ஞ்ஞா பரமத்தா²வஸேஸா, பன அத்த²பஞ்ஞத்தீதி தீ³பிதா அவிஜ்ஜமானாதி³பஞ்ஞத்தியோ சாதி. அயம் தாவேத்த² அனுத்தானத்த²தோ ஸம்வண்ணனா.

அத்த²னிச்ச²யோ பனேத்தா²பி பாளினயேனேவ ஸத்³தி⁴ம் ஹோதி, ந வினா பாளிம் தஸ்ஸ வத்துமஸக்குணேய்யத்தா. பாளியஞ்ச யஸ்மா ஆதி³தோ பஞ்ச பஞ்ஞத்தியோ, தத³த்த²பூ⁴தா க²ந்தா⁴த³யோ ச ஹேட்டா² விப⁴ங்க³ப்பகரணே நிப்பதே³ஸதோ கதி²தாதி தா இத⁴ ‘‘கித்தாவதா க²ந்தா⁴னம் க²ந்த⁴பஞ்ஞத்தி, யாவதா பஞ்சக்க²ந்தா⁴ ரூபக்க²ந்தோ⁴’’திஆதி³னா ஸங்கே²பேனேவ நித்³தி³ட்டா², தா சேத்தா²பி வுத்தத்தா². புக்³க³லபஞ்ஞத்தி பன ஹேட்டா² ந வுத்தாதி ‘‘கித்தாவதா புக்³க³லானம் புக்³க³லபஞ்ஞத்தி? ஸமயவிமுத்தோ, அஸமயவிமுத்தோ’’திஆதி³னா ஏககாதி³பே⁴தே³ன யாவ த³ஸகா த³ஸதா⁴ மாதிகம் ட²பேத்வா வித்தா²ரேனேவ விப⁴த்தா, ஸா ச ஞாதப்³ப³பபே⁴த³தோ அவுச்சமானா து³ப்³பி³ஞ்ஞேய்யா, தஸ்மா புக்³க³லபஞ்ஞத்தியா ஏவ சேத்த² பாளினயானுஸாரேன ஸங்கே²பதோ அத்த²னிச்ச²யோ ஹோதி, ஸோ சேத்த² மாதிகாயம் வுத்தே ஸப்³ப³புக்³க³லே அனுத்³த⁴ரித்வா ஞாதப்³பா³னம் து³ப்³பி³ஞ்ஞேய்யானம் புக்³க³லானம் ஏககாதி³பே⁴த³தோவ மாதிகம் உத்³த⁴ரித்வா விப⁴ஜனவஸேன ஸங்கே²பதோவ ஹோதி. கத²ம்? ‘‘ஸமயவிமுத்தோ அஸமயவிமுத்தோ, குப்பத⁴ம்மோ அகுப்பத⁴ம்மோ, சேதனாப⁴ப்³போ³ அனுரக்க²ணாப⁴ப்³போ³, ப⁴யூபரதோ அப⁴யூபரதோ, ப⁴ப்³பா³க³மனோ அப⁴ப்³பா³க³மனோ, நியதோ அனியதோ, படிபன்னகோ ப²லே டி²தோ, ஸமஸீஸீ டி²தகப்பீ, ஸோதாபன்னோ ஸத்தக்க²த்துபரமோ கோலம்கோலோ ஏகபீ³ஜீ, ஸகதா³கா³மீ, அனாகா³மீ அந்தராபரினிப்³பா³யீ உபஹச்சபரினிப்³பா³யீ அஸங்கா²ரபரினிப்³பா³யீ ஸஸங்கா²ரபரினிப்³பா³யீ உத்³த⁴ம்ஸோதோ அகனிட்ட²கா³மீ, அரஹா’’தி ஏககமாதிகா.

தத்த² யோ அப்பனம் நிப்³ப³த்தேதும் யுத்தபத்தகாலே ரூபாரூபஸமாபத்திஸங்கா²தேஹி அட்ட²ஹி விமோக்கே²ஹி பச்சனீகத⁴ம்மதோ விமுச்சித்வா தீஸு மக்³கே³ஸு யேன கேனசி யதா²ஸகம் ஆஸவே கே²பேத்வா வுட்டி²தோ, அயம் ஸமயவிமுத்தோ நாம. ‘‘ஏகச்சே ஆஸவா பரிக்கீ²ணா’’திஆதி³வசனதோ (பு. ப. 1) ஹி அட்ட²ஸமாபத்திலாபீ⁴ புது²ஜ்ஜனோ வா கீ²ணாஸவோ வா இத⁴ ந க³ஹிதோ, ஸமாபத்திலாபி⁴னோ பன ப²லட்ட²ஸேகா²வ க³ஹிதாதி வேதி³தப்³பா³. ஸுக்க²விபஸ்ஸககீ²ணாஸவோ, ஸப்³பே³பி ச அரியா மக்³க³விமோக்க²ம் ஸந்தா⁴ய அஸமயவிமுத்தா நாம. பா³ஹிரானஞ்ஹி அட்ட²ன்னம் ஸமாபத்தீனம் ஸமாபஜ்ஜந்தஸ்ஸ பவிவேகட்டா²னலாபா⁴தி³ஸமயோபி அத்தி², வத்தகரணகாலாதி³அஸமயோபி அத்தி². மக்³க³விமோக்கே²ன விமுச்சனஸ்ஸ பன தாதி³ஸோ ஸமயோ வா அஸமயோ வா நத்தி², யஸ்ஸ ஸத்³தா⁴ ப³லவதீ, விபஸ்ஸனா ச ஆரத்³தா⁴, தஸ்ஸ க³ச்ச²ந்தஸ்ஸ வா பு⁴ஞ்ஜந்தஸ்ஸ வா மக்³க³ப²லபடிவேதோ⁴ நாம ந ஹோதீதி நத்தி², தஸ்மா ஸப்³பே³ அரியா அரியவிமோக்கே² அஸமயவிமுத்தாதி வேதி³தப்³பா³. புரிமபதே³பி லோகியஸமாபத்திஞ்ஞேவ ஸந்தா⁴ய ஸேகா² ஸமயவிமுத்தா நாம ஜாதா.

அவஸிபா⁴வா அட்ட²ஸமாபத்திலாபீ⁴ பன புது²ஜ்ஜனோ, ஸோதாபன்னஸகதா³கா³மினோ த்³வே ஸேகா² அட்ட²ஸமாபத்திம் ஸந்தா⁴ய குப்பத⁴ம்மோ நாம. பரிஹானத⁴ம்மோதிபி து³விதா⁴ ஏவ. அனாகா³மிஆத³யோ ஸுப்பஹீனஸமாதி⁴பாரிபந்தி²கத்தா வஸிபா⁴வா ஸமாபத்திலாபீ⁴ புது²ஜ்ஜனோ, அரியா ச லோகுத்தரத⁴ம்மேபி ஸந்தா⁴ய அகுப்பத⁴ம்மோ நாம. அபரிஹானத⁴ம்மோதி தே ஏவ. சேதனாப⁴ப்³போ³தி சேதனாஸங்கா²தேன ஜா²னஸமாபத்திவளஞ்ஜனேன அபரிஹானிம் ஆபஜ்ஜிதும் ப⁴ப்³போ³. யோ ஹி ரூபாரூபஜ்ஜா²னேஸு ஆசிண்ணவஸிதாய சேதனாஸங்கா²தாய ஜா²னஸமாபத்தியா நிரந்தரம் வளஞ்ஜமானோ தேஹி ந பரிஹாயதி, அவளஞ்ஜமானோ ச பரிஹாயதி, அயம் வளஞ்ஜமானோ சேதனாப⁴ப்³போ³ நாம. அனுரக்க²ணாப⁴ப்³போ³தி ஜா²னஸ்ஸ உபகாரானுபகாரத⁴ம்மே ஜானித்வா அனுரக்க²ணாய அவளஞ்ஜமானோபி அபரிஹானிம் ஆபஜ்ஜிதும் ப⁴ப்³போ³, ஏஸோ ச புரிமதோ ப³லவதரோ, ஆசிண்ணவஸினோ பஞ்ஞாஸம்பதா³ய உபகாரானுபகாரத⁴ம்மே ஜானித்வா தத³னுரூபம் படிபஜ்ஜனதோதி வேதி³தப்³போ³.

ப⁴யூபரதோதி ப⁴யேன பாபதோ உபரதோ விரதோ ஸேகோ², கல்யாணபுது²ஜ்ஜனோ ச. தேஸு பச்சி²மோ து³க்³க³திவட்டகிலேஸஉபவாத³ஸங்கா²தேஹி சதூஹி ப⁴யேஹி பாபதோ ஓரமதி, ஸேகோ² து³க்³க³திவஜ்ஜேஹி, அபாயேஹி முத்தத்தா. கீ²ணாஸவோ பன அப⁴யூபரதோ நாம ஸமுச்சி²ன்னப⁴யத்தா, உபவாத³தோ பன ஓரமிதப்³போ³.

அப⁴ப்³பா³க³மனோதி ஸம்மத்தனியாமாக³மனஸ்ஸ அப⁴ப்³போ³, யே ஆனந்தரியஸங்கா²தேன கம்மாவரணேன, நியதமிச்சா²தி³ட்டி²ஸங்கா²தேன கிலேஸாவரணேன, அஹேதுகது³ஹேதுகபடிஸந்தி⁴ஸங்கா²தேன விபாகாவரணேன ச ஸமன்னாக³தா, பு³த்³தா⁴தீ³ஸு ச ஸத்³தா⁴ரஹிதா, மக்³க³பா⁴வனாய ச உத்தரகுருகாத³யோ விய அச்ச²ந்தி³கா, புப்³பூ³பனிஸ்ஸயரஹிதா ச, ஸப்³பே³தே அப⁴ப்³பா³க³மனா நாம. விபரீதா ப⁴ப்³பா³க³மனா நாம. பஞ்சானந்தரியனியதமிச்சா²தி³ட்டி²கா நிரயக³மனே, அட்ட² அரியபுக்³க³லா அனுபாதா³பரினிப்³பா³னாதீ³ஸு நியதா நாம. அவஸேஸபுக்³க³லா அனிப³த்³த⁴க³திகதாய அனியதா நாம, உத்தரகுருகா பன ஸுக³தினியதாபி மிச்ச²த்தஸம்மத்தனியாமஸ்ஸேவ இதா⁴தி⁴ப்பேதத்தா ‘‘நியதா’’தி ந வுத்தா. மக்³க³ஸமங்கீ³ புக்³க³லோ மக்³க³க்க²ணே ப²லத்தா²ய படிபன்னகோ நாம, ப²லஸமங்கீ³ ப²லானுப்பத்தியம்பி ப²லே டி²தோ நாம.

யஸ்ஸ பன அபுப்³பா³சரிமம் ஆஸவபரியாதா³னஞ்ச ஹோதி ஜீவிதபரியாதா³னஞ்ச, அயம் ஸமஸீஸீ நாம. ஸோ ச திவிதோ⁴ ஹோதி இரியாபத²ஸமஸீஸீ ரோக³ஸமஸீஸீ ஜீவிதஸமஸீஸீதி. தத்த² யோ சதூஸு இரியாபதே²ஸு ஏகஸ்மிம் விபஸ்ஸனம் பட்ட²பேத்வா அரஹத்தம் பத்வா தஸ்மிஞ்ஞேவ இரியாபதே² பரினிப்³பா³தி, அயம் இரியாபத²ஸமஸீஸீ நாம. யோ பன ஏகம் ரோக³ம் பத்வா அந்தோரோகே³ ஏவ விபஸ்ஸனம் பட்ட²பேத்வா அரஹத்தம் பத்வா தேனேவ ரோகே³ன பரினிப்³பா³தி, அயம் ரோக³ஸமஸீஸீ நாம. யஸ்ஸ பன கிலேஸஸீஸஸங்கா²தா அவிஜ்ஜா, அரஹத்தமக்³கே³ன பவத்தஸீஸஸங்கா²தம் ஜீவிதிந்த்³ரியஞ்ச சுதிசித்தேன ஸமம் பரியாதா³னம் க³ச்ச²தி, அயம் ஜீவிதஸமஸீஸீ நாம. கத²மித³ம் ஸமம் ஹோதீதி? வாரஸமதாய. யஸ்மிம் ஹி வாரே மக்³கே³ன கிலேஸே கே²பிதே பச்சவேக்க²ணஞாணானி பவத்தந்தி, தஸ்ஸானந்தரமேவ பரினிப்³பா³யதோ இமாய வாரஸமதாய இத³ம் உப⁴யஸீஸபரியாதா³னம்பி ஸமம் ஹோதி நாம, அயமேவ ஜீவிதஸமஸீஸீ இதா⁴தி⁴ப்பேதோ.

டி²தகப்பீதி டி²தோ கப்போ டி²தகப்போ, ஸ்வாஸ்ஸ அத்தீ²தி டி²தகப்பீ, கப்பம்ஹி வினஸ்ஸமானம்ஹி கப்பம் ட²பேதும் ஸமத்தோ²தி அத்தோ².

ஸசே ஹி யேஸம் மக்³க³ஸமங்கி³க்க²ணே கப்பவினாஸோ ப⁴வேய்ய, நேவ தாவ கப்போ வினஸ்ஸேய்ய, யாவாயம் யதா²ஸகம் ப²லம் ந ஸச்சி²கரோதீதி தே வினஸ்ஸமானம்பி கப்பம் ட²பேந்தீதி டி²தகப்பினோ நாம ஜாதாதி. கிஞ்சாபி கப்பவினாஸனகாலே ஸாஸனம் நத்தி², க³தகோடிகே ஹி காலே கப்பவினாஸோ ஹோதி, ஏவம் ஸந்தேபி மக்³கா³னந்தரப²லஸ்ஸ அனந்தராயம் தீ³பேதும் இத³ம் அபூ⁴தம்பி காரணம் ஆஹடம்.

ஸோதாபன்னோதி நிப்³பா³னஸமுத்³த³னின்னதாய ஸோதஸங்கா²தஸ்ஸ மக்³க³ஸ்ஸ பட²மஸமங்கீ³ வுச்சதி, இத⁴ பன ப²லட்டோ² அதி⁴ப்பேதோ. தஸ்ஸேவ ச பபே⁴த³த³ஸ்ஸனத்த²ம் ‘‘ஸத்தக்க²த்துபரமோ’’திஆதி³ வுத்தம். ஸத்தவாரா பரமா அஸ்ஸ ப⁴வூபபத்தீதி ஸத்தக்க²த்துபரமோ, ததோ பரம் அட்ட²மம் ப⁴வம் நாதி³யதீதி அத்தோ². ஸோதாபன்னோ ஹி யோ ஸத்தக்க²த்தும் தே³வேஸு, மனுஸ்ஸேஸு ச படிஸந்தி⁴ம் க³ஹேத்வா ஸத்தமே ப⁴வே து³க்க²ஸ்ஸந்தம் கரோதி, அயம் ஸத்தக்க²த்துபரமோ நாம. குலதோ குலம் ப⁴வதோ ப⁴வம் க³ச்ச²தீதி கோலம்கோலோ. ஸோ ஹி தே³வமனுஸ்ஸவஸேன த்³வே க³தியோ ப⁴வே ஸம்ஸரித்வா து³க்க²ஸ்ஸந்தம் கரோதி, அயம் கோலம்கோலோ நாம. கம்மபடிஸந்தி⁴யா ஏகம் கம்மம் கிலேஸபீ³ஜம் அஸ்ஸாதி ஏகபீ³ஜீ. ஸோ ஹி ஏகஸ்மிஞ்ஞேவ ப⁴வே கீ²ணாஸவோ ஹோதி. கிம் பனஸ்ஸ பே⁴த³ஸ்ஸ நியாமகந்தி? விபஸ்ஸனாபி⁴ஞ்ஞாபே⁴தா³. ஸோதாபன்னேஸு ஹி யோ விபஸ்ஸனாய பமத்தோ, ஸோ ஸத்தக்க²த்துபரமோ ஹோதி. யோ கிஞ்சி அப்பமத்தோ, ஸோ கோலம்கோலோ. யோ பன விபஸ்ஸனாய அதிவிய அப்பமத்தோ, ஸோ ஏகபீ³ஜீ ஹோதி. யே பன அபி⁴விய பமத்தா வட்டஜ்ஜா²ஸயா அனாத²பிண்டி³கவிஸாகா²ஸக்காத³யோ, தே புனப்புனம் வட்டஸ்மிம்யேவ விசரந்தா ஆதி³தோ பட்டா²ய ச² தே³வலோகே ஓஸாபேத்வா ப்³ரஹ்மலோகேஸுபி யதா²க்கமம் நிப்³ப³த்தித்வா அகனிட்டே² ட²த்வா பரினிப்³ப³ந்தி, ந தே இத⁴ க³ஹிதா. தே ஹி மனுஸ்ஸக³திம் புனப்புனம் ஆதி³யந்தி. யே பன மனுஸ்ஸக³தியம்பி ப⁴வம் ஆதி³யந்தி, தேஸம் வஸேன ஸத்தக்க²த்துபரமோ கோலம்கோலோ மானுஸிகப⁴வனிப்³ப³த்தகோ ஏவ ஏகபீ³ஜீ க³ஹிதோ. தே பன ஸத்³தா⁴து⁴ரேன ஆக³தா தயோ, பஞ்ஞாது⁴ரேன ஆக³தா தயோதி ஸோதாபன்னோ ச²ப்³பி³தோ⁴ ஹோதீதி வேதி³தப்³போ³.

படிஸந்தி⁴வஸேன பன ஸகிம் இமம் மனுஸ்ஸக³திம் ஆக³ச்ச²தீதி ஸகதா³கா³மீ, து³தியமக்³க³ப²லஸமங்கீ³. இமினா பஞ்சஸு ஸகதா³கா³மீஸு சத்தாரோ வஜ்ஜேத்வா ஏகோவ க³ஹிதோ. ஏகச்சோ ஹி ஸகதா³கா³மிப²லே ட²த்வா புன து³தியப⁴வே இதே⁴வ பரினிப்³பா³தி, ஏகச்சோ இத⁴ பத்வா தே³வலோகே பரினிப்³பா³தி, ஏகச்சோ தே³வலோகே பத்வா து³தியப⁴வே தத்தே²வ பரினிப்³பா³தி, ஏகச்சோ தே³வலோகே பத்வா இதூ⁴பபஜ்ஜித்வா பரினிப்³பா³தி, இமே சத்தாரோபி இத⁴ ந க³ஹிதா. யோ பன இத⁴ பத்வா தே³வலோகே நிப்³ப³த்தித்வா புன இதூ⁴பபஜ்ஜித்வா பரினிப்³பா³தி, அயமேகோவ இத⁴ க³ஹிதோ. இமஸ்ஸ ச த்³வே படிஸந்தி⁴யோ, ஏகபீ³ஜிஸ்ஸ பன ஏகாவாதி இத³ம் தேஸம் நானாகரணந்தி வேதி³தப்³ப³ம்.

படிஸந்தி⁴வஸேன காமப⁴வம் நாக³ச்ச²தீதி அனாகா³மீ, ததியமக்³க³ப²லஸமங்கீ³. தஸ்ஸேவ பன பபே⁴த³த³ஸ்ஸனத்த²ம் ‘‘அந்தராபரினிப்³பா³யீ’’திஆதி³ வுத்தம். தத்த² அந்தராபரினிப்³பா³யீதி ஆயுவேமஜ்ஜ²ஸ்ஸ அந்தரா ஏவ அரஹத்தமக்³க³ம் உப்பாதே³த்வா கிலேஸபரினிப்³பா³னேன பரினிப்³பா³யனஸீலோ ஏகோ அனாகா³மீ. ஸோ ச உப்பன்னஸமனந்தரம் பரினிப்³பா³யீ, ஆயுவேமஜ்ஜ²ம் அப்பத்வா பரினிப்³பா³யீ, ஆயுவேமஜ்ஜ²ம் பத்வா பரினிப்³பா³யீதி திவிதோ⁴ ஹோதி. உபஹச்சபரினிப்³பா³யீதி ஆயுவேமஜ்ஜ²ம் உபஹச்ச அதிக்கமித்வா, மரணஸமயம் வா உபஹச்ச உபக³ந்த்வா பரினிப்³பா³யீ, ஆயுவேமஜ்ஜ²ம் அதிக்கமித்வா யாவ மரணஸமயா பரினிப்³பா³யீதி அத்தோ². அஸங்கா²ரபரினிப்³பா³யீதி அஸங்கா²ரேன அப்பது³க்கே²ன அதி⁴மத்தப்பயோக³ம் அகத்வா பரினிப்³பா³யனஸீலோ. ஸஸங்கா²ரபரினிப்³பா³யீதி ஸஸங்கா²ரேன து³க்கே²ன கஸிரேன அதி⁴மத்தப்பயோகே³ன பரினிப்³பா³யனஸீலோ. உத்³த⁴ம்ஸோதோதி உத்³த⁴ம்வாஹிபா⁴வேன உத்³த⁴மஸ்ஸ தண்ஹாஸோதம் வட்டஸோதஞ்ச, உத்³த⁴ம் வா க³ந்த்வா படிலபி⁴தப்³ப³தோ உத்³த⁴ம் மக்³க³ஸோதமஸ்ஸாதிபி உத்³த⁴ம்ஸோதோ. அகனிட்ட²ம் க³ச்ச²தீதி அகனிட்ட²கா³மீ. இமேஸம் பன அனாகா³மீனம் பபே⁴த³த³ஸ்ஸனத்த²ம்பேத்த² உத்³த⁴ம்ஸோதோ அகனிட்ட²கா³மீதிஆதி³ சதுக்கம் வேதி³தப்³ப³ம்.

தத்த² யோ அவிஹதோ பட்டா²ய சதூஸு யதா²க்கமம் உப்பஜ்ஜித்வா யாவதாயுகம் ட²த்வா சுதோ அகனிட்டே² உப்பஜ்ஜித்வா பரினிப்³பா³தி, அயம் உத்³த⁴ம்ஸோதோ அகனிட்ட²கா³மீ நாம. யோ பன அகனிட்ட²ம் அப்பத்வா அந்தரா பரினிப்³பா³தி, அயம் உத்³த⁴ம்ஸோதோ ந அகனிட்ட²கா³மீ நாம. யோ மனுஸ்ஸலோகோ அகனிட்ட²மேவ க³ந்த்வா பரினிப்³பா³தி, அயம் ந உத்³த⁴ம்ஸோதோ அகனிட்ட²கா³மீ நாம. யோ பன ஹேட்டா² சதூஸு ஸுத்³தா⁴வாஸேஸு அஞ்ஞதரஸ்மிம் உப்பஜ்ஜித்வா தத்தே²வ பரினிப்³பா³தி, அயம் ந உத்³த⁴ம்ஸோதோ ந அகனிட்ட²கா³மீ நாம. ஏவமேதே அனாகா³மினோ அட்ட²சத்தாலீஸவிதா⁴ ஹோந்தி. கத²ம்? அவிஹேஸு தாவ தயோ அந்தராபரினிப்³பா³யினோ, ஏகோ உபஹச்சபரினிப்³பா³யீ, ஏகோ உத்³த⁴ம்ஸோதோதி பஞ்ச, தே அஸங்கா²ரபரினிப்³பா³யிஸஸங்கா²ரபரினிப்³பா³யிவஸேன த³ஸ ஹோந்தி, ஏவம் அதப்பஸுத³ஸ்ஸஸுத³ஸ்ஸீஸூதி சத்தாலீஸம், அகனிட்டே² பன உத்³த⁴ம்ஸோதோ நத்தி², தஸ்மா தத்த² தம் ஸஸங்கா²ராஸங்கா²ரவஸேன து³வித⁴ம் உத்³த⁴ம்ஸோதம் வஜ்ஜேத்வா அட்ட² சாதி அட்ட²சத்தாலீஸ ஹோந்தி.

அரஹாதி கிலேஸாரீனம் ஹதத்தாதி³னா கீ²ணாஸவோ அரஹா நாம. ஸோ ஸுஞ்ஞதாதி³விமோக்க²த்தயவஸேன திவிதோ⁴ ஹுத்வா புன பச்சேகம் படிபதா³சதுக்கவஸேன த்³வாத³ஸவிதா⁴ ஹோந்தி. யதா² ச அரஹா த்³வாத³ஸவிதோ⁴, ஏவம் த்³வாத³ஸேவ ஸகதா³கா³மினோ, சதுவீஸதி ஸோதாபன்னா அட்ட²சத்தாலீஸ அனாகா³மினோவ பச்சேகந்தி வேதி³தப்³ப³ம். இமே ச ஸப்³பே³ அரியா இமஸ்மிம் ஸாஸனே ஏவ உப்பஜ்ஜந்தி, நோ ப³ஹித்³தா⁴தி. ஏககனயோ.

து³காதி³மாதிகத்த²வண்ணனா

து³காதீ³ஸு ‘‘த்³வே புக்³க³லா – கோத⁴னோ ச உபனாஹீ ச மக்கீ² ச பளாஸீ சா’’திஆதி³னா து³கஞ்ச, ‘‘தயோ புக்³க³லா – நிராஸோ ஆஸம்ஸோ விக³தாஸோ’’திஆதி³னா திகஞ்ச, ‘‘சத்தாரோ புக்³க³லா – அஸப்புரிஸோ, அஸப்புரிஸேனஅஸப்புரிஸதரோ, ஸப்புரிஸோ, ஸப்புரிஸேனஸப்புரிஸதரோ’’திஆதி³னா சதுக்கஞ்ச, ‘‘பஞ்ச புக்³க³லா – அத்தே²கச்சோ புக்³க³லோ ஆரப⁴தி ச விப்படிஸாரீ ச ஹோதி, தஞ்ச சேதோவிமுத்திம் பஞ்ஞாவிமுத்திம் யதா²பூ⁴தம் நப்பஜானாதி. யத்த²ஸ்ஸ தே உப்பன்னா பாபகா அகுஸலா த⁴ம்மா அபரிஸேஸா நிருஜ்ஜ²ந்தி, அத்தே²கச்சோ புக்³க³லோ ஆரப⁴தி ந விப்படிஸாரீ ச ஹோதி…பே… அபரிஸேஸா நிருஜ்ஜ²ந்தி, அத்தே²கச்சோ புக்³க³லோ நாரப⁴தி விப்படிஸாரீ ச ஹோதி…பே… அபரிஸேஸா நிருஜ்ஜ²ந்தி. அத்தே²கச்சோ புக்³க³லோ நாரப⁴தி ந விப்படிஸாரீ ஹோதி…பே… அபரிஸேஸா நிருஜ்ஜ²ந்தீ’’திஆதி³னா பஞ்சகஞ்ச வித்தா²ரதோ மாதிகம் நிக்கி²பித்வா ஸப்³பே³பி தே புக்³க³லா நித்³தி³ட்டா², இத⁴ பன தே க³ந்த²வித்தா²ரப⁴யேன ஸப்³பே³ ந உத்³தி³ட்டா², பாளியா ஏவ ஞாதப்³பா³தி.

தத்த² திகே நிராஸோதி அரஹத்தாஸாய விரஹிதோ து³ஸ்ஸீலோ. தஸ்ஸ ஹி அத்தனோ அப⁴ப்³ப³தாய ப⁴ப்³ப³ஸஹாயகஸ்ஸ ஸீலவதோ அரஹத்தப்பத்திம் ஸுத்வா, சண்டா³லபுத்தஸ்ஸ விய கஸ்ஸசி ராஜபுத்தஸ்ஸ ரஜ்ஜாபி⁴ஸேகம் ஸுத்வா அபி⁴ஸேகப்பத்தியம், ‘‘குதா³ஸ்ஸு நாமாஹம்பி அரஹத்தம் பாபுணேய்ய’’ந்தி அரஹத்தப்பத்தியம் பத்த²னாபி ந உப்பஜ்ஜதி. ஆஸம்ஸோதி அரஹத்தம் ஆஸீஸமானோ பத்த²யமானோ ஸீலவா. தஸ்ஸ ஹி அரஹத்தபத்த²னாய ஸீலஸம்பத்தியா டி²தத்தா கஸ்ஸசி அரஹத்தப்பத்திம் ஸுத்வா, உப⁴தோஸுஜாதஸ்ஸ ராஜகுமாரஸ்ஸ விய தாதி³ஸஸ்ஸ கஸ்ஸசி ரஜ்ஜாபி⁴ஸேகம் ஸுத்வா அபி⁴ஸேகப்பத்தியம், அரஹத்தப்பத்தியம் பத்த²னா உப்பஜ்ஜதி. விக³தாஸோதி அரஹா. ஸோ ஹி பத்தஅரஹத்ததாய தத்த² விக³தாஸோ ஹோதி பத்தாபி⁴ஸேகோ விய க²த்தியோ அபி⁴ஸேகப்பத்தியந்தி வேதி³தப்³ப³ம்.

சதுக்கே பன பாணாதிபாதாதி³அகுஸலகம்மபத²ஸமன்னாக³தோ அஸப்புரிஸோ நாம. யோ பன ஸயம்பி பாணாதிபாதாதீ³னி கத்வா பரஞ்ச தத்த² ஸமாத³பேதி, அயம் அஸப்புரிஸேனஅஸப்புரிஸதரோ, அஸப்புரிஸதோபி அஸப்புரிஸதரோதி அத்தோ². வுத்தபடிபக்க²குஸலவஸேன ஸப்புரிஸோ, ஸப்புரிஸேனஸப்புரிஸதரோ ச வேதி³தப்³போ³.

பஞ்சகே ஆரப⁴தி ச விப்படிஸாரீ ச ஹோதீதி ஏத்த² ஆரம்ப⁴-ஸத்³தோ³ ஆபத்திவீதிக்கமே வத்ததி, தஸ்மா ஆபத்திவீதிக்கமவஸேன ஆரப⁴தி சேவ தப்பச்சயா ச விப்படிஸாரீ ஹோதீதி அத்தோ². சேதோவிமுத்திந்தி ப²லஸம்பயுத்தஸமாதி⁴ம். பஞ்ஞாவிமுத்திந்தி ப²லஸம்பயுத்தஞாணம். யதா²பூ⁴தம் நப்பஜானாதீதி அனதி⁴க³தத்தா யதா²ஸபா⁴வதோ நப்பஜானாதி. யத்த²ஸ்ஸாதி யஸ்மிம் அரஹத்தப²லஸங்கா²தே ஜா²னே அதி⁴க³தே அஸ்ஸ புக்³க³லஸ்ஸ ஸப்³பே³ பாபகா அகுஸலா த⁴ம்மா நிரவஸேஸா நிருஜ்ஜ²ந்தி, தே நப்பஜானாதீதி ஸம்ப³ந்தோ⁴. கிஞ்சாபி தே மக்³க³க்க²ணே ஏவ நிருஜ்ஜ²ந்தி நாம, ப²லக்க²ணே பன நிருத்³தா⁴ நாம ஹோந்தி, இத⁴ பன மக்³க³கிச்சவஸேன ‘‘ப²லக்க²ணே நிருஜ்ஜ²ந்தீ’’தி வுத்தாதி வேதி³தப்³பா³.

ஆரப⁴தி ந விப்படிஸாரீ ச ஹோதீதி ஆபத்திம் ஆபஜ்ஜதி, தம் பன தே³ஸேதும் ஸபா⁴க³புக்³க³லம் பரியேஸதி, வுட்டா²பேதி வா, தஸ்மா ந விப்படிஸாரீ ஹோதி. நாரப⁴தி விப்படிஸாரீ ச ஹோதீதி ஆபத்திம் நாபஜ்ஜதி, வினயபஞ்ஞத்தியம் பன அகோவித³த்தா அனாபத்தியா ஆபத்திஸஞ்ஞிதாய வுட்டி²தாயபி தம் ஆபத்தியா விப்படிஸாரம் வினோதே³தும் அஸக்குணேய்யதாய விப்படிஸாரீ ஹோதி. நாரப⁴தி ந விப்படிஸாரீ ஹோதீதி நாரப⁴தி நேவ ஆபத்திம் ஆபஜ்ஜதி, ந விப்படிஸாரீ ஹோதி. அரஹத்தஞ்ச ந பாபுணாதி. கதரோ பனேஸ புக்³க³லோதி? ஸீலவா ஓஸ்ஸட்ட²வீரியோ புக்³க³லோ. ஸோ ஹி ‘‘கிம் மே இமஸ்மிம் பு³த்³த⁴காலே பரினிப்³பா³னேன, அனாக³தே மேத்தேய்யஸம்மாஸம்பு³த்³த⁴காலே பரினிப்³பா³யிஸ்ஸாமீ’’தி விஸுத்³த⁴ஸீலோபி படிபத்திம் ந பூரேதி. இமே சத்தாரோபி புக்³க³லா ததா² ததா² ஓவதி³த்வா ஆஸவக்க²யே பதிட்டா²பேதப்³பா³. ஏவம் ஹி தேபி ய்வாயம் பஞ்சமோ புக்³க³லோ நாரப⁴தி ந விப்படிஸாரீ ஆரத்³த⁴வீரியோ அரஹத்தம் பாபுணாதி, தேன ஸமஸமாவ ப⁴விஸ்ஸந்தீதி.

ச²க்காதீ³ஸு –

‘‘ச² புக்³க³லா – அத்தே²கச்சோ புக்³க³லோ புப்³பே³ அனனுஸ்ஸுதேஸு த⁴ம்மேஸு ஸாமம் ஸச்சானி அபி⁴ஸம்பு³ஜ்ஜ²தி, தத்த² ச ஸப்³ப³ஞ்ஞுதம் பாபுணாதி ப³லேஸு ச வஸீபா⁴வம். அத்தே²கச்சோ புக்³க³லோ…பே… அபி⁴ஸம்பு³ஜ்ஜ²தி, ந ச தத்த² ஸப்³ப³ஞ்ஞுதம் பாபுணாதி, ந ச ப³லேஸு வஸிபா⁴வம். அத்தே²கச்சோ புக்³க³லோ…பே… அனபி⁴ஸம்பு³ஜ்ஜ²தி, தி³ட்டே²வ த⁴ம்மே து³க்க²ஸ்ஸந்தகரோ ஹோதி, ஸாவகபாரமிஞ்ச பாபுணாதி. அத்தே²கச்சோ புக்³க³லோ…பே… து³க்க²ஸ்ஸந்தகரோ ஹோதி, ந ச ஸாவகபாரமிம் பாபுணாதி. அத்தே²கச்சோ புக்³க³லோ…பே… அனபி⁴ஸம்பு³ஜ்ஜ²தி, ந ச தி³ட்டே²வ த⁴ம்மே து³க்க²ஸ்ஸந்தகரோ ஹோதி, அனாகா³மீ ஹோதி அனாக³ந்தா இத்த²த்தம். அத்தே²கச்சோ புக்³க³லோ…பே… அனபி⁴ஸம்பு³ஜ்ஜ²தி, ந ச தி³ட்டே²வ த⁴ம்மே து³க்க²ஸ்ஸந்தகரோ ஹோதி, ஆகா³மீ ஹோதி ஆக³ந்தா இத்த²த்த’’ந்தி –

ச²க்கம், ‘‘ஸத்த புக்³க³லா – ஸத்த உத³கூபமா புக்³க³லா ஸகிம் நிமுக்³கோ³ நிமுக்³கோ³வ ஹோதி, உம்முஜ்ஜித்வா நிமுஜ்ஜதி, உம்முஜ்ஜித்வா டி²தோ ஹோதி, உம்முஜ்ஜித்வா விபஸ்ஸதி விலோகேதி, உம்முஜ்ஜித்வா பதரதி, உம்முஜ்ஜித்வா படிகா³த⁴ப்பத்தோ ஹோதி, உம்முஜ்ஜித்வா திண்ணோ ஹோதி பாரங்க³தோ, த²லே திட்ட²தி ப்³ராஹ்மணோ’’திஆதி³னா ஸத்தகம், ‘‘அட்ட² புக்³க³லா – சத்தாரோ மக்³க³ஸமங்கி³னோ, சத்தாரோ ப²லஸமங்கி³னோ புக்³க³லா’’தி அட்ட²கம், ‘‘நவ புக்³க³லா – ஸம்மாஸம்பு³த்³தோ⁴ பச்சேகஸம்பு³த்³தோ⁴ உப⁴தோபா⁴க³விமுத்தோ பஞ்ஞாவிமுத்தோ காயஸக்கீ² தி³ட்டி²ப்பத்தோ ஸத்³தா⁴விமுத்தோ த⁴ம்மானுஸாரீ ஸத்³தா⁴னுஸாரீ’’தி நவகம், ‘‘த³ஸ புக்³க³லா – பஞ்சன்னம் இத⁴ நிட்டா², பஞ்சன்னம் இத⁴ விஹாய நிட்டா²’’தி த³ஸகஞ்ச மாதிகம் நிக்கி²பித்வா பாளியம் நித்³தே³ஸோ கதோ. தத்த² ச²க்கே பட²மேன பதே³ன ஸம்மாஸம்பு³த்³தோ⁴ த³ட்ட²ப்³போ³. ஸோ ஹி அனாசரியகோ அத்தனா உப்பாதி³தேன ஸப்³ப³ஞ்ஞுதஞ்ஞாணபத³ட்டா²னேன அரஹத்தமக்³க³ஞாணேன ஸப்³பா³காரதோ ஸச்சானி அபி⁴ஸம்பு³ஜ்ஜி²த்வா ஸப்³ப³ஞ்ஞுதம் பாபுணி, த³ஸஞாணப³லேஸு ச வஸிபா⁴வந்தி. து³தியேன பன பச்சேகஸம்பு³த்³தோ⁴ த³ட்ட²ப்³போ³. ததியேன அக்³க³ஸாவகோ, சதுத்தே²ன அவஸேஸா அரஹந்தோ, பஞ்சமேன அனாகா³மீ, ச²ட்டே²ன ஸோதாபன்னஸகதா³கா³மினோ த³ட்ட²ப்³பா³. தே ஹி ‘‘ஆக³ந்தா இத்த²த்த’’ந்தி வுத்தாதி.

ஸத்தகே பட²மேன பதே³ன ஸாஸனே அனிவிட்ட²ஸத்³தோ⁴ நியதமிச்சா²தி³ட்டி²த⁴ம்மேஹி ஏகந்தகாளகேஹி ஸமன்னாக³தோ க³ஹிதோ. ஸோ ஹி ஸமுத்³தே³ உத³கபீ⁴ருகபுரிஸோ விய ஸம்ஸாரே அபாயே நிமுக்³கோ³ நிமுக்³கோ³வ ஹோதி, ந புன ப⁴வதோ வுட்டா²தி, அனந்தம்பி காலம் ப⁴வே ஏவ விசரதி ஸாஸனஸமாயோகா³பா⁴வா. து³தியேன பதே³ன ஸாஸனே படிலத்³த⁴ஸத்³தோ⁴பி தே³வத³த்தாத³யோ விய ஸத்³தா⁴தி³பரிஹானியம் டி²தோ து³ஸ்ஸீலோ க³ஹிதோ. ஸோ ஹி ஸமுத்³தே³ கேனசி காரணேன உம்முஜ்ஜித்வா புன நிமுக்³கோ³ விய ஸாஸனஸத்³தா⁴ய உம்முஜ்ஜித்வாபி அபாயே நிமுஜ்ஜதி ஏவ, அயம் பன சிரகாலாதிக்கமேன பு³த்³தா⁴தீ³ஹி, அத்தனா ஏவ வா பச்சேகபோ³தி⁴ஞாணேன ப⁴வதோ உத்³த⁴ரணீயோ ஹோதி ஸாஸனே ஸகிம் உப்பன்னாயபி ஸத்³தா⁴ய மோக்க²பா⁴வேன நியமேன நிப்³பா³னாவஹத்தா. அயமேவ ஹிஸ்ஸ புரிமபுக்³க³லதோ விஸேஸோ, இதரதா² தஸ்ஸ விஸும் க³ஹணே பயோஜனமேவ ந ஸியாதி க³ஹேதப்³ப³ம். ததியேன ஸாஸனே உப்பன்னஸத்³தோ⁴ டி²திபா⁴கி³யேஹி ஸீலாதி³கு³ணேஹி ஸமன்னாக³தோ க³ஹிதோ. ஸோ ஹி உம்முஜ்ஜித்வா தீரம் அதி³ஸ்வாவ ஸமுத்³த³மஜ்ஜே² நாவாதி³ஆக³மனம் ஓலோகேந்தோ புன அனிமுஜ்ஜித்வா உண்ணதப்பதே³ஸே டி²தோ விய ஸாஸனஸத்³தா⁴ய உம்முஜ்ஜித்வா நிப்³பா³னம் அதி³ஸ்வாவ பு³த்³தா⁴தி³ம் ஓலோகயமானோ ஸக்³கே³, ஸீலாதி³ம்ஹி டி²தோ ஹோதி. சதுத்தே²ன பன ஸோதாபன்னோ க³ஹிதோ. ஸோ ஹி உம்முஜ்ஜித்வா டி²தோ தீரம் தி³ஸ்வா உத்தரணூபாயம் விலோகயமானோ விய லோகுத்தரஸத்³தா⁴ய உம்முஜ்ஜித்வா நிப்³பா³னதீரம் தி³ஸ்வா உத்தரணோபாயம் விலோகேதி. பஞ்சமேன ஸகதா³கா³மீ க³ஹிதோ. ஸோ ஹி ஸமுத்³தே³ தீரம் தி³ஸ்வா தத³பி⁴முக²ம் பதரமானோ விய பட²மமக்³கே³ன நிப்³பா³னதீரம் தி³ஸ்வா தத³பி⁴முக²ம் து³தியமக்³கே³ன பதரதி நாம. ச²ட்டே²ன அனாகா³மீ க³ஹிதோ. ஸோ ஹி பதரித்வா தீரம் உபக்³க³ம்ம கடிப்பமாணே உத³கே டி²தோ விய அரஹத்தஸமீபே ஸதிகவாடபதித்தே² அனாவத்தித⁴ம்மதாய ததியமக்³கே³ன திட்ட²தி. ஸத்தமேன பன அரஹா க³ஹிதோ, ஸோ ஹி தரித்வா பாரம் பத்வா டி²தபுரிஸோ விய சத்தாரோ ஓகே⁴ தரித்வா நிப்³பா³னத்த²லே டி²தோ கீ²ணாஸவப்³ராஹ்மணோ நாம ஹோதீதி.

நவகே உப⁴தோபா⁴க³விமுத்தோதி ரூபாரூபஸமாபத்தியா விக்க²ம்ப⁴னவிமோக்கே²ன, அரியமக்³கே³ன ஸமுச்சே²த³விமோக்கே²ன கிலேஸதோ விமுத்தோ, அரூபஸமாபத்தியா வா ரூபகாயதோ, மக்³கே³ன ச நாமகாயதோதி இமேஹி உப⁴தோபா⁴கே³ஹி விமுத்தோதிபி உப⁴தோபா⁴க³விமுத்தோ, ஸோ சதுன்னம் அரூபஸமாபத்தீனம் ஏகேகதோ வுட்டா²ய ஸங்கா²ரே ஸம்மஸித்வா அரஹத்தப்பத்தானம் சதுன்னம், நிரோதா⁴ வுட்டா²ய அரஹத்தப்பத்தஅனாகா³மினோ ச வஸேன பஞ்சவிதோ⁴, தேஸு பச்சி²மோவ நிப்பரியாயதோ உப⁴தோபா⁴க³விமுத்தோ நாம, ஸேஸா பரியாயேன. ஏத்த² ச ரூபாவசரசதுத்த²ஜ்ஜா²னம் கிலேஸகாயதோ விமுத்தம்பி ரூபகாயதோ அவிமுத்தம், அரூபாவசரம் பன தத³ப⁴யதோபி விமுத்தம், தஸ்மா ததே³வ பாத³கம் கத்வா அரஹத்தப்பத்தோவ உப⁴தோபா⁴க³விமுத்தோ ஹோதி, ந ரூபாவசரந்தி வேதி³தப்³ப³ம். பஞ்ஞாவிமுத்தோதி அரஹத்தமக்³க³பஞ்ஞாய ஆஸவேஹி விமுத்தோ. ஸோ ஹி ஸுக்க²விபஸ்ஸகோ, சதூஹி ரூபாவசரஜ்ஜா²னேஹி வுட்டா²ய அரஹத்தப்பத்தா சத்தாரோ சாதி பஞ்சவிதோ⁴. அரூபாவசரஜ்ஜா²னேஸு ஹி ஏகஸ்மிம்பி ஸதி உப⁴தோபா⁴க³விமுத்தோவ நாம ஹோதி.

காயஸக்கீ²தி ரூபாரூபஜ்ஜா²னலாபீ⁴ அரியோ. ஸோ ஹி ஸோதாபத்திமக்³க³ட்ட²வஜ்ஜிதானம் ச²ன்னம் ஸேகா²னம் வஸேன ச²ப்³பி³தோ⁴. தேனேவ ஹிஸ்ஸ ‘‘ஏகச்சே ஆஸவா பரிக்கீ²ணா’’தி நித்³தே³ஸே வுத்தம். ஸோதாபத்திமக்³க³ட்ட²ஸ்ஸ ச ந கேசிபி ஆஸவா பரிக்கீ²ணாதி வத்தப்³பா³, பரிக்கீ²யிஸ்ஸந்தீதி பன வத்தப்³பா³, அரஹதோ பன ஸப்³பே³பி ஆஸவா பரிக்கீ²ணா, ந ஏகச்சேதி. ஸோ ஹி பு²ட்ட²ந்தம் ஸச்சி²கரோதீதி காயஸக்கீ², பு²ட்டா²னம் படிலத்³தா⁴னம் ஜா²னானம் அனந்தரம் நாமகாயேன நிரோத⁴ம் ஸச்சி²கரோதீதிபி காயஸக்கீ², காயேனாதி சேத்த² ‘‘நாமகாயேன சேவ பரமத்த²ஸச்சம் ஸச்சி²கரோதி, பஞ்ஞாய ச அதிவிஜ்ஜ² பஸ்ஸதீ’’தி வசனதோ அரஹத்தப²லம் ட²பேத்வா ஸேஸமக்³க³ப²லானமேதம் அதி⁴வசனம், தேன காயேன பட²மஜ்ஜா²னானந்தரம் நிப்³பா³னஸ்ஸ ஸச்சி²கரணதோபி காயஸக்கீ²தி கேசி. தி³ட்டி²ப்பத்தோதி ஸுக்க²விபஸ்ஸகோ, ரூபஜ்ஜா²னலாபீ⁴ ச யதா²வுத்தோ ச²ப்³பி³தோ⁴ ஸேகோ² ச, அயம் தி³ட்ட²ந்தப்பத்தோதி தி³ட்டி²ப்பத்தோ. த³ஸ்ஸனம் தி³ட்டி², பட²மமக்³கோ³, தஸ்ஸ அனந்தரம் நிரோத⁴ப்பத்தோதி அத்தோ². தி³ட்ட²ப்பத்தோதிபி பாடோ², தஸ்ஸ பட²மமக்³கே³ன தி³ட்ட²ம் நிப்³பா³னம் புன பத்தோதி அத்தோ².

ஸத்³தா⁴விமுத்தோதி ஸுக்க²விபஸ்ஸகோ, ரூபஜ்ஜா²னலாபீ⁴ ச யதா²வுத்தோ ச²ப்³பி³தோ⁴ ஸேகோ² ச. அயம் ஹி ஸத்³த³ஹந்தோ விமுத்தோதி ஸத்³தா⁴விமுத்தோ. கத²ம் பனேதஸ்ஸ தி³ட்டி²ப்பத்ததோ நானத்தந்தி? ஆக³மனீயபடிபதா³ய. தி³ட்டி²ப்பத்தோ ஹி பஞ்ஞாஸம்பதா³ய புப்³ப³பா⁴கே³ விபஸ்ஸனாய கிலேஸே அப்பது³க்கே²ன விக்க²ம்பே⁴ந்தோ ஆக³தோ, ஸத்³தா⁴விமுத்தோ பன ஸத்³தா⁴ப³ஹுலதாய கிலேஸே து³க்கே²ன விக்க²ம்பே⁴ந்தோ ஆக³தோ. ஏதமேவ ஹி பே⁴த³ம் ஸந்தா⁴ய நித்³தே³ஸே ‘‘ஏகச்சே ஆஸவா பரிக்கீ²ணா ஹோந்தி, நோ ச கோ² யதா²தி³ட்டி²ப்பத்தஸ்ஸா’’தி வுத்தம்.

த⁴ம்மானுஸாரீதி யஸ்ஸ ஸோதாபத்திமக்³க³க்க²ணே பஞ்ஞிந்த்³ரியம் அதி⁴மத்தம் ஹோதி, அயம் பஞ்ஞாஸங்கா²தேன த⁴ம்மேன ஸரதி அனுஸ்ஸரதீதி த⁴ம்மானுஸாரீ, ஸோதாபத்திமக்³க³ட்ட²ஸ்ஸேதம் நாமம். ப²லே பன பத்தே தி³ட்டி²ப்பத்தோ நாம ஹோதி. ஸத்³தா⁴னுஸாரீதி யஸ்ஸ ஸோதாபத்திமக்³க³க்க²ணே ஸத்³தி⁴ந்த்³ரியம் அதி⁴மத்தம் ஹோதி, அயம் ஸத்³தா⁴ய ஸரதி அனுஸ்ஸரதீதி ஸத்³தா⁴னுஸாரீ, ஸோதாபத்திமக்³க³ட்ட²ஸ்ஸேதம் நாமம். ப²லே பன பத்தே ஸத்³தா⁴விமுத்தோ நாம ஹோதி.

லோகுத்தரத⁴ம்மம் ஹி நிப்³ப³த்தேந்தானம் த்³வே து⁴ரானி நாம, த்³வே அபி⁴னிவேஸா நாம, த்³வே ஸீஸானி நாம. தத்த² ஸத்³தா⁴து⁴ரம் பஞ்ஞாது⁴ரந்தி த்³வே து⁴ரானி நாம. ஏகோ பன ஸமதா²பி⁴னிவேஸோ, ஏகோ விபஸ்ஸனாபி⁴னிவேஸோதி த்³வே அபி⁴னிவேஸா. ஏகோ ச அரஹத்தம் மத்த²கம் பாபுணந்தோ உப⁴தோபா⁴க³விமுத்தோ ஹோதி, ஏகோ பஞ்ஞாவிமுத்தோதி இமானி த்³வே ஸீஸானி நாம. யே ஹி கேசி லோகுத்தரம் த⁴ம்மம் நிப்³ப³த்தேந்தி, ஸப்³பே³ தே த்³வே இமே த⁴ம்மே து⁴ரம் கத்வா இமேஸு த்³வீஸு டா²னேஸு அபி⁴னிவிஸித்வா இமேஹி த்³வீஹி டா²னேஹி விமுச்சந்தி. தேஸு யோ பி⁴க்கு² அட்ட²ஸமாபத்திலாபீ⁴ பஞ்ஞம் து⁴ரம் கத்வா ஸமத²வஸேன அபி⁴னிவிட்டோ² அஞ்ஞதரம் அரூபஸமாபத்திம் பத³ட்டா²னம் கத்வா விபஸ்ஸனம் பட்ட²பேத்வா அரஹத்தம் பாபுணாதி, அயம் ஸோதாபத்திமக்³க³க்க²ணே த⁴ம்மானுஸாரீ நாம. பரதோ பன ச²ஸு டா²னேஸு காயஸக்கீ² நாம. அரஹத்தப²லம் பத்தே உப⁴தோபா⁴க³விமுத்தோ நாம.

அபரோ பஞ்ஞமேவ து⁴ரம் கத்வா விபஸ்ஸனாவஸேன அபி⁴னிவிட்டோ² ஸுத்³த⁴ஸங்கா²ரே வா ரூபாவசரஜ்ஜா²னேஸு வா அஞ்ஞதரம் ஸம்மஸித்வா அரஹத்தம் பாபுணாதி, அயம்பி ஸோதாபத்திமக்³க³க்க²ணே த⁴ம்மானுஸாரீ நாம. பரதோ பன ச²ஸு டா²னேஸு தி³ட்டி²ப்பத்தோ நாம, அரஹத்தம் பத்தே பஞ்ஞாவிமுத்தோ நாம.

அபரோ பன அட்ட²ஸமாபத்திலாபீ⁴ ஸத்³த⁴ம் து⁴ரம் கத்வா ஸமாதி⁴வஸேன அபி⁴னிவிட்டோ² அஞ்ஞதரம் அரூபஸமாபத்திம் பத³ட்டா²னம் கத்வா விபஸ்ஸனம் பட்ட²பேத்வா அரஹத்தம் பாபுணாதி, அயம் ஸோதாபத்திமக்³க³க்க²ணே ஸத்³தா⁴னுஸாரீ நாம, பரதோ ச²ஸு டா²னேஸு காயஸக்கீ²யேவ நாம. அரஹத்தம் பத்தே உப⁴தோபா⁴க³விமுத்தோயேவ நாம. அபரோ ஸத்³த⁴மேவ து⁴ரம் கத்வா விபஸ்ஸனாவஸேன அபி⁴னிவிட்டோ² ஸுத்³த⁴ஸங்கா²ரே வா ரூபாவசரஜ்ஜா²னேஸு வா அஞ்ஞதரம் ஸம்மஸித்வா அரஹத்தம் பாபுணாதி, அயம்பி ஸோதாபத்திமக்³க³க்க²ணே ஸத்³தா⁴னுஸாரீ நாம, பரதோ ச²ஸு டா²னேஸு ஸத்³தா⁴விமுத்தோ நாம. அரஹத்தப்பத்தே பஞ்ஞாவிமுத்தோ நாம. இமே ஸத்த புக்³க³லா ஸம்மாஸம்பு³த்³த⁴பச்சேகஸம்பு³த்³தே⁴ஹி ஸத்³தி⁴ம் நவ லோகே அக்³க³த³க்கி²ணேய்யா நாமாதி.

த³ஸகே பஞ்சன்னம் இத⁴ நிட்டா²தி ஸத்தக்க²த்துபரமோ, கோலம்கோலோ, ஏகபீ³ஜீ, ஸகதா³கா³மீ காமாவசரபடிஸந்தி⁴கோ, அரஹா சாதி இமேஸம் பஞ்சன்னம் இத⁴ காமாவசரபூ⁴மியஞ்ஞேவ அனுபாதி³ஸேஸனிப்³பா³னஸங்கா²தா நிட்டா²தி அத்தோ². காமாவசரத்தபா⁴வே ஏவ ஹி ஏதே பரினிப்³பா³யந்தி, நாஞ்ஞஸ்மிம். பஞ்சன்னம் இத⁴ விஹாய நிட்டா²தி அந்தராபரினிப்³பா³யீ உபஹச்சபரினிப்³பா³யீ அஸங்கா²ரபரினிப்³பா³யீ ஸஸங்கா²ரபரினிப்³பா³யீ உத்³த⁴ம்ஸோதோ அகனிட்ட²கா³மீ சாதி இமேஸம் பஞ்சன்னம் இத⁴ காமாவசரே அத்தபா⁴வம் விஹாய விஜஹித்வா ப்³ரஹ்மத்தபா⁴வே டி²தானஞ்ஞேவ நிட்டா²தி அத்தோ². ஸேஸமேத்த² உத்தானத்த²மேவாதி. அயமேத்த² ஸங்கே²பதோ பாளினயேன ஸத்³தி⁴ம் அத்த²னிச்ச²யோ, வித்தா²ரோ பன புக்³க³லபஞ்ஞத்திபாளிஅட்ட²கதா²ஸு (பு. ப. மாதிகா 1 ஆத³யோ; பு. ப. அட்ட². மாதிகாவண்ணனா 1) க³ஹேதப்³போ³தி.

மோஹவிச்சே²த³னியா அபி⁴த⁴ம்மமாதிகத்த²வண்ணனாய

புக்³க³லபஞ்ஞத்திமாதிகத்த²வண்ணனா நிட்டி²தா.