3. ச²ந்த³ஸமாதி⁴ஸுத்தம்

825. ‘‘ச²ந்த³ம் சே, பி⁴க்க²வே, பி⁴க்கு² நிஸ்ஸாய லப⁴தி ஸமாதி⁴ம், லப⁴தி சித்தஸ்ஸ ஏகக்³க³தம் – அயம் வுச்சதி ச²ந்த³ஸமாதி⁴. ஸோ அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. உப்பன்னானம் பாபகானம் அகுஸலானம் த⁴ம்மானம் பஹானாய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. அனுப்பன்னானம் குஸலானம் த⁴ம்மானம் உப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. இமே வுச்சந்தி ‘பதா⁴னஸங்கா²ரா’தி. இதி அயஞ்ச ச²ந்தோ³, அயஞ்ச ச²ந்த³ஸமாதி⁴, இமே ச பதா⁴னஸங்கா²ரா – அயம் வுச்சதி, பி⁴க்க²வே, ‘ச²ந்த³ஸமாதி⁴ப்பதா⁴னஸங்கா²ரஸமன்னாக³தோ இத்³தி⁴பாதோ³’’’.

‘‘வீரியம் சே, பி⁴க்க²வே, பி⁴க்கு² நிஸ்ஸாய லப⁴தி ஸமாதி⁴ம், லப⁴தி சித்தஸ்ஸ ஏகக்³க³தம் – அயம் வுச்சதி ‘வீரியஸமாதி⁴’. ஸோ அனுப்பன்னானம்…பே… உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. இமே வுச்சந்தி ‘பதா⁴னஸங்கா²ரா’தி. இதி இத³ஞ்ச வீரியம், அயஞ்ச வீரியஸமாதி⁴, இமே ச பதா⁴னஸங்கா²ரா – அயம் வுச்சதி, பி⁴க்க²வே, ‘வீரியஸமாதி⁴ப்பதா⁴னஸங்கா²ரஸமன்னாக³தோ இத்³தி⁴பாதோ³’’’.

‘‘சித்தம் சே, பி⁴க்க²வே, பி⁴க்கு² நிஸ்ஸாய லப⁴தி ஸமாதி⁴ம், லப⁴தி சித்தஸ்ஸ ஏகக்³க³தம் – அயம் வுச்சதி ‘சித்தஸமாதி⁴’. ஸோ அனுப்பன்னானம் பாபகானம்…பே… உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. இமே வுச்சந்தி ‘பதா⁴னஸங்கா²ரா’தி. இதி இத³ஞ்ச சித்தம், அயஞ்ச சித்தஸமாதி⁴, இமே ச பதா⁴னஸங்கா²ரா – அயம் வுச்சதி, பி⁴க்க²வே, ‘சித்தஸமாதி⁴ப்பதா⁴னஸங்கா²ரஸமன்னாக³தோ இத்³தி⁴பாதோ³’’’.

‘‘வீமம்ஸம் சே, பி⁴க்க²வே, பி⁴க்கு² நிஸ்ஸாய லப⁴தி ஸமாதி⁴ம், லப⁴தி சித்தஸ்ஸ ஏகக்³க³தம் – அயம் வுச்சதி ‘வீமம்ஸாஸமாதி⁴’. ஸோ அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி…பே… உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. இமே வுச்சந்தி ‘பதா⁴னஸங்கா²ரா’தி. இதி அயஞ்ச வீமம்ஸா, அயஞ்ச வீமம்ஸாஸமாதி⁴, இமே ச பதா⁴னஸங்கா²ரா – அயம் வுச்சதி, பி⁴க்க²வே, ‘வீமம்ஸாஸமாதி⁴ப்பதா⁴னஸங்கா²ரஸமன்னாக³தோ இத்³தி⁴பாதோ³’’’தி. ததியம்.