5. அகுஸலராஸிஸுத்தம்

371. ஸாவத்தி²னிதா³னம். தத்ர கோ² ப⁴க³வா ஏதத³வோச – ‘‘‘அகுஸலராஸீ’தி, பி⁴க்க²வே, வத³மானோ பஞ்ச நீவரணே ஸம்மா வத³மானோ வதே³ய்ய. கேவலோ ஹாயம், பி⁴க்க²வே, அகுஸலராஸி, யதி³த³ம் – பஞ்ச நீவரணா. கதமே பஞ்ச? காமச்ச²ந்த³னீவரணம், ப்³யாபாத³னீவரணம், தி²னமித்³த⁴னீவரணம், உத்³த⁴ச்சகுக்குச்சனீவரணம், விசிகிச்சா²னீவரணம். ‘அகுஸலராஸீ’தி, பி⁴க்க²வே, வத³மானோ இமே பஞ்ச நீவரணே ஸம்மா வத³மானோ வதே³ய்ய. கேவலோ ஹாயம், பி⁴க்க²வே, அகுஸலராஸி, யதி³த³ம் – பஞ்ச நீவரணா.

‘‘‘குஸலராஸீ’தி, பி⁴க்க²வே, வத³மானோ சத்தாரோ ஸதிபட்டா²னே ஸம்மா வத³மானோ வதே³ய்ய. கேவலோ ஹாயம், பி⁴க்க²வே, குஸலராஸி, யதி³த³ம் – சத்தாரோ ஸதிபட்டா²னா. கதமே சத்தாரோ? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்; வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். ‘குஸலராஸீ’தி, பி⁴க்க²வே, வத³மானோ இமே சத்தாரோ ஸதிபட்டா²னே ஸம்மா வத³மானோ வதே³ய்ய. கேவலோ ஹாயம், பி⁴க்க²வே, குஸலராஸி, யதி³த³ம் – சத்தாரோ ஸதிபட்டா²னா’’தி. பஞ்சமம்.