1. அஞ்ஞத்ரஸுத்தம்

1131. அத² கோ² ப⁴க³வா பரித்தம் நக²ஸிகா²யம் பம்ஸும் ஆரோபேத்வா பி⁴க்கூ² ஆமந்தேஸி – ‘‘தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம் – யோ வாயம் மயா பரித்தோ நக²ஸிகா²யம் பம்ஸு ஆரோபிதோ, அயம் வா மஹாபத²வீ’’தி? ‘‘ஏததே³வ, ப⁴ந்தே, ப³ஹுதரம், யதி³த³ம் – மஹாபத²வீ; அப்பமத்தகாயம் ப⁴க³வதா பரித்தோ நக²ஸிகா²யம் பம்ஸு ஆரோபிதோ. ஸங்க²ம்பி ந உபேதி, உபனித⁴ம்பி ந உபேதி, கலபா⁴க³ம்பி ந உபேதி மஹாபத²விம் உபனிதா⁴ய ப⁴க³வதா பரித்தோ நக²ஸிகா²யம் பம்ஸு ஆரோபிதோ’’தி.

‘‘ஏவமேவ கோ², பி⁴க்க²வே, அப்பமத்தகா தே ஸத்தா யே மனுஸ்ஸேஸு பச்சாஜாயந்தி; அத² கோ² ஏதேவ ப³ஹுதரா ஸத்தா யே அஞ்ஞத்ர மனுஸ்ஸேஹி [மனுஸ்ஸேஸு (பீ. க.)] பச்சாஜாயந்தி. தம் கிஸ்ஸ ஹேது? அதி³ட்ட²த்தா, பி⁴க்க²வே, சதுன்னம் அரியஸச்சானம். கதமேஸம் சதுன்னம்? து³க்க²ஸ்ஸ அரியஸச்சஸ்ஸ…பே… து³க்க²னிரோத⁴கா³மினியா படிபதா³ய அரியஸச்சஸ்ஸ’’.

‘‘தஸ்மாதிஹ, பி⁴க்க²வே, ‘இத³ம் து³க்க²’ந்தி யோகோ³ கரணீயோ…பே… ‘அயம் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. பட²மம்.