7. பட²மசி²க்³க³ளயுக³ஸுத்தம்

1117. ‘‘ஸேய்யதா²பி, பி⁴க்க²வே, புரிஸோ மஹாஸமுத்³தே³ ஏகச்சி²க்³க³ளம் யுக³ம் பக்கி²பேய்ய. தத்ராபிஸ்ஸ காணோ கச்ச²போ. ஸோ வஸ்ஸஸதஸ்ஸ வஸ்ஸஸதஸ்ஸ அச்சயேன ஸகிம் ஸகிம் உம்முஜ்ஜேய்ய. தம் கிம் மஞ்ஞத², பி⁴க்க²வே, அபி நு கோ² காணோ கச்ச²போ வஸ்ஸஸதஸ்ஸ வஸ்ஸஸதஸ்ஸ அச்சயேன ஸகிம் ஸகிம் உம்முஜ்ஜந்தோ அமுஸ்மிம் ஏகச்சி²க்³க³ளே யுகே³ கீ³வம் பவேஸேய்யா’’தி? ‘‘யதி³ நூன, ப⁴ந்தே, கதா³சி கரஹசி தீ³க⁴ஸ்ஸ அத்³து⁴னோ அச்சயேனா’’தி.

‘‘கி²ப்பதரம் கோ² ஸோ, பி⁴க்க²வே, காணோ கச்ச²போ வஸ்ஸஸதஸ்ஸ வஸ்ஸஸதஸ்ஸ அச்சயேன ஸகிம் ஸகிம் உம்முஜ்ஜந்தோ அமுஸ்மிம் ஏகச்சி²க்³க³ளே யுகே³ கீ³வம் பவேஸேய்ய, ந த்வேவாஹம், பி⁴க்க²வே, ஸகிம் வினிபாதக³தேன பா³லேன [வினீதக³தேன ப³ஹுலேன (க.)] மனுஸ்ஸத்தம் வதா³மி’’.

தம் கிஸ்ஸ ஹேது? ந ஹேத்த², பி⁴க்க²வே, அத்தி² த⁴ம்மசரியா, ஸமசரியா, குஸலகிரியா, புஞ்ஞகிரியா. அஞ்ஞமஞ்ஞகா²தி³கா ஏத்த², பி⁴க்க²வே, வத்ததி து³ப்³ப³லகா²தி³கா. தம் கிஸ்ஸ ஹேது? அதி³ட்ட²த்தா, பி⁴க்க²வே, சதுன்னம் அரியஸச்சானம். கதமேஸம் சதுன்னம்? து³க்க²ஸ்ஸ அரியஸச்சஸ்ஸ…பே… து³க்க²னிரோத⁴கா³மினியா படிபதா³ய அரியஸச்சஸ்ஸ.

‘‘தஸ்மாதிஹ, பி⁴க்க²வே, ‘இத³ம் து³க்க²’ந்தி யோகோ³ கரணீயோ…பே… ‘அயம் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. ஸத்தமம்.