5. வாலஸுத்தம்

1115. ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். அத² கோ² ஆயஸ்மா ஆனந்தோ³ புப்³ப³ண்ஹஸமயம் நிவாஸேத்வா பத்தசீவரமாதா³ய வேஸாலிம் பிண்டா³ய பாவிஸி. அத்³த³ஸா கோ² ஆயஸ்மா ஆனந்தோ³ ஸம்ப³ஹுலே லிச்ச²விகுமாரகே ஸந்தா²கா³ரே உபாஸனம் கரோந்தே, தூ³ரதோவ ஸுகு²மேன தாளச்சி²க்³க³ளேன அஸனம் அதிபாதேந்தே, போங்கா²னுபோங்க²ம் [போகா²னுபோக²ம் (ஸ்யா. கம்.)] அவிராதி⁴தம். தி³ஸ்வானஸ்ஸ ஏதத³ஹோஸி – ‘‘ஸிக்கி²தா வதிமே லிச்ச²விகுமாரகா, ஸுஸிக்கி²தா வதிமே லிச்ச²விகுமாரகா; யத்ர ஹி நாம தூ³ரதோவ ஸுகு²மேன தாளச்சி²க்³க³ளேன அஸனம் அதிபாதேஸ்ஸந்தி போங்கா²னுபோங்க²ம் அவிராதி⁴த’’ந்தி.

அத² கோ² ஆயஸ்மா ஆனந்தோ³ வேஸாலிம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘இதா⁴ஹம், ப⁴ந்தே, புப்³ப³ண்ஹஸமயம் நிவாஸேத்வா பத்தசீவரமாதா³ய வேஸாலிம் பிண்டா³ய பாவிஸிம். அத்³த³ஸம் க்²வாஹம், ப⁴ந்தே ஸம்ப³ஹுலே லிச்ச²விகுமாரகே ஸந்தா²கா³ரே உபாஸனம் கரோந்தே தூ³ரதோவ ஸுகு²மேன தாளச்சி²க்³க³ளேன அஸனம் அதிபாதேந்தே போங்கா²னுபோங்க²ம் அவிராதி⁴தம்’. தி³ஸ்வான மே ஏதத³ஹோஸி – ‘‘ஸிக்கி²தா வதிமே லிச்ச²விகுமாரகா, ஸுஸிக்கி²தா வதிமே லிச்ச²விகுமாரகா; யத்ர ஹி நாம தூ³ரதோவ ஸுகு²மேன தாளச்சி²க்³க³ளேன அஸனம் அதிபாதேஸ்ஸந்தி போங்கா²னுபோங்க²ம் அவிராதி⁴த’’ந்தி.

‘‘தம் கிம் மஞ்ஞஸி, ஆனந்த³, கதமம் நு கோ² து³க்கரதரம் வா து³ரபி⁴ஸம்ப⁴வதரம் வா – யோ தூ³ரதோவ ஸுகு²மேன தாளச்சி²க்³க³ளேன அஸனம் அதிபாதேய்ய போங்கா²னுபோங்க²ம் அவிராதி⁴தம், யோ வா ஸத்ததா⁴ பி⁴ன்னஸ்ஸ வாலஸ்ஸ கோடியா கோடிம் படிவிஜ்ஜே²ய்யா’’தி? ‘‘ஏததே³வ, ப⁴ந்தே, து³க்கரதரஞ்சேவ து³ரபி⁴ஸம்ப⁴வதரஞ்ச யோ வா [யோ (ஸீ.)] ஸத்ததா⁴ பி⁴ன்னஸ்ஸ வாலஸ்ஸ கோடியா கோடிம் படிவிஜ்ஜே²ய்யா’’தி. ‘‘அத² கோ² [அத² கோ² தே (ஸ்யா. கம்.)], ஆனந்த³, து³ப்படிவிஜ்ஜ²தரம் படிவிஜ்ஜ²ந்தி, யே ‘இத³ம் து³க்க²’ந்தி யதா²பூ⁴தம் படிவிஜ்ஜ²ந்தி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் படிவிஜ்ஜ²ந்தி’’.

‘‘தஸ்மாதிஹானந்த³, ‘இத³ம் து³க்க²’ந்தி யோகோ³ கரணீயோ…பே… ‘அயம் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. பஞ்சமம்.