3. மஹாபரிளாஹஸுத்தம்

1113. ‘‘அத்தி², பி⁴க்க²வே, மஹாபரிளாஹோ நாம நிரயோ. தத்த² யம் கிஞ்சி சக்கு²னா ரூபம் பஸ்ஸதி, அனிட்ட²ரூபஞ்ஞேவ பஸ்ஸதி நோ இட்ட²ரூபம்; அகந்தரூபஞ்ஞேவ பஸ்ஸதி நோ கந்தரூபம்; அமனாபரூபஞ்ஞேவ பஸ்ஸதி நோ மனாபரூபம். யம் கிஞ்சி ஸோதேன ஸத்³த³ம் ஸுணாதி…பே… யம் கிஞ்சி காயேன போ²ட்ட²ப்³ப³ம் பு²ஸதி…பே… யம் கிஞ்சி மனஸா த⁴ம்மம் விஜானாதி, அனிட்ட²ரூபஞ்ஞேவ விஜானாதி நோ இட்ட²ரூபம்; அகந்தரூபஞ்ஞேவ விஜானாதி நோ கந்தரூபம்; அமனாபரூபஞ்ஞேவ விஜானாதி நோ மனாபரூப’’ந்தி.

ஏவம் வுத்தே அஞ்ஞதரோ பி⁴க்கு² ப⁴க³வந்தம் ஏதத³வோச – ‘‘மஹா வத ஸோ, ப⁴ந்தே, பரிளாஹோ, ஸுமஹா வத ஸோ, ப⁴ந்தே, பரிளாஹோ! அத்தி² நு கோ², ப⁴ந்தே, ஏதம்ஹா பரிளாஹா அஞ்ஞோ பரிளாஹோ மஹந்ததரோ சேவ ப⁴யானகதரோ சா’’தி? ‘‘அத்தி² கோ², பி⁴க்கு², ஏதம்ஹா பரிளாஹா அஞ்ஞோ பரிளாஹோ மஹந்ததரோ ச ப⁴யானகதரோ சா’’தி.

‘‘கதமோ பன, ப⁴ந்தே, ஏதம்ஹா பரிளாஹா அஞ்ஞோ பரிளாஹோ மஹந்ததரோ ச ப⁴யானகதரோ சா’’தி? ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா ‘இத³ம் து³க்க²’ந்தி யதா²பூ⁴தம் நப்பஜானந்தி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் நப்பஜானந்தி, தே ஜாதிஸம்வத்தனிகேஸு ஸங்கா²ரேஸு அபி⁴ரமந்தி…பே… அபி⁴ரதா…பே… அபி⁴ஸங்க²ரோந்தி…பே… அபி⁴ஸங்க²ரித்வா ஜாதிபரிளாஹேனபி பரிட³ய்ஹந்தி, ஜராபரிளாஹேனபி பரிட³ய்ஹந்தி, மரணபரிளாஹேனபி பரிட³ய்ஹந்தி, ஸோகபரிதே³வது³க்க²தோ³மனஸ்ஸுபாயாஸபரிளாஹேனபி பரிட³ய்ஹந்தி. தே ந பரிமுச்சந்தி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி. ‘ந பரிமுச்சந்தி து³க்க²ஸ்மா’தி வதா³மி’’.

‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா ‘இத³ம் து³க்க²’ந்தி யதா²பூ⁴தம் பஜானந்தி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானந்தி. தே ஜாதிஸம்வத்தனிகேஸு ஸங்கா²ரேஸு நாபி⁴ரமந்தி…பே… அனபி⁴ரதா…பே… நாபி⁴ஸங்க²ரோந்தி…பே… அனபி⁴ஸங்க²ரித்வா ஜாதிபரிளாஹேனபி ந பரிட³ய்ஹந்தி, ஜராபரிளாஹேனபி ந பரிட³ய்ஹந்தி, மரணபரிளாஹேனபி ந பரிட³ய்ஹந்தி, ஸோகபரிதே³வது³க்க²தோ³மனஸ்ஸுபாயாஸபரிளாஹேனபி ந பரிட³ய்ஹந்தி. தே பரிமுச்சந்தி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி. ‘பரிமுச்சந்தி து³க்க²ஸ்மா’தி வதா³மி’’.

‘‘தஸ்மாதிஹ, பி⁴க்க²வே, ‘இத³ம் து³க்க²’ந்தி யோகோ³ கரணீயோ…பே… ‘அயம் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. ததியம்.