1. ஸீஸபாவனஸுத்தம்

1101. ஏகம் ஸமயம் ப⁴க³வா கோஸம்பி³யம் விஹரதி ஸீஸபாவனே [ஸிம்ஸபாவனே (ஸீ. பீ.)]. அத² கோ² ப⁴க³வா பரித்தானி ஸீஸபாபண்ணானி பாணினா க³ஹேத்வா பி⁴க்கூ² ஆமந்தேஸி – ‘‘தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம் – யானி வா மயா பரித்தானி ஸீஸபாபண்ணானி பாணினா க³ஹிதானி யதி³த³ம் உபரி ஸீஸபாவனே’’தி? ‘‘அப்பமத்தகானி, ப⁴ந்தே, ப⁴க³வதா பரித்தானி ஸீஸபாபண்ணானி பாணினா க³ஹிதானி; அத² கோ² ஏதானேவ ப³ஹுதரானி யதி³த³ம் உபரி ஸீஸபாவனே’’தி. ‘‘ஏவமேவ கோ², பி⁴க்க²வே, ஏததே³வ ப³ஹுதரம் யம் வோ மயா அபி⁴ஞ்ஞாய அனக்கா²தம். கஸ்மா சேதம், பி⁴க்க²வே, மயா அனக்கா²தம்? ந ஹேதம், பி⁴க்க²வே, அத்த²ஸம்ஹிதம் நாதி³ப்³ரஹ்மசரியகம் ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸம்வத்ததி; தஸ்மா தம் மயா அனக்கா²தம்’’.

‘‘கிஞ்ச, பி⁴க்க²வே, மயா அக்கா²தம்? ‘இத³ம் து³க்க²’ந்தி, பி⁴க்க²வே, மயா அக்கா²தம், ‘அயம் து³க்க²ஸமுத³யோ’தி மயா அக்கா²தம், ‘அயம் து³க்க²னிரோதோ⁴’தி மயா அக்கா²தம், ‘அயம் து³க்க²னிரோத⁴கா³மினீ படிபதா³’தி மயா அக்கா²தம்’’.

‘‘கஸ்மா சேதம், பி⁴க்க²வே, மயா அக்கா²தம்? ஏதஞ்ஹி, பி⁴க்க²வே, அத்த²ஸம்ஹிதம் ஏதம் ஆதி³ப்³ரஹ்மசரியகம் ஏதம் நிப்³பி³தா³ய விராகா³ய நிரோதா⁴ய உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி; தஸ்மா தம் மயா அக்கா²தம்.

‘‘தஸ்மாதிஹ, பி⁴க்க²வே, ‘இத³ம் து³க்க²’ந்தி யோகோ³ கரணீயோ…பே… ‘அயம் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. பட²மம்.