2. க²தி³ரபத்தஸுத்தம்

1102. ‘‘யோ, பி⁴க்க²வே, ஏவம் வதே³ய்ய – ‘அஹம் து³க்க²ம் அரியஸச்சம் யதா²பூ⁴தம் அனபி⁴ஸமேச்ச, து³க்க²ஸமுத³யம் அரியஸச்சம் யதா²பூ⁴தம் அனபி⁴ஸமேச்ச, து³க்க²னிரோத⁴ம் அரியஸச்சம் யதா²பூ⁴தம் அனபி⁴ஸமேச்ச, து³க்க²னிரோத⁴கா³மினிம் படிபத³ம் அரியஸச்சம் யதா²பூ⁴தம் அனபி⁴ஸமேச்ச ஸம்மா து³க்க²ஸ்ஸந்தம் கரிஸ்ஸாமீ’தி – நேதம் டா²னம் விஜ்ஜதி.

‘‘ஸேய்யதா²பி, பி⁴க்க²வே, யோ ஏவம் வதே³ய்ய – ‘அஹம் க²தி³ரபத்தானம் வா ஸரலபத்தானம் [பலாஸபத்தானம் (ஸீ. ஸ்யா. கம். பீ.)] வா ஆமலகபத்தானம் வா புடம் கரித்வா உத³கம் வா தாலபத்தம் வா ஆஹரிஸ்ஸாமீ’தி – நேதம் டா²னம் விஜ்ஜதி; ஏவமேவ கோ², பி⁴க்க²வே, யோ ஏவம் வதே³ய்ய – ‘அஹம் து³க்க²ம் அரியஸச்சம் யதா²பூ⁴தம் அனபி⁴ஸமேச்ச…பே… து³க்க²னிரோத⁴கா³மினிம் படிபத³ம் அரியஸச்சம் யதா²பூ⁴தம் அனபி⁴ஸமேச்ச ஸம்மா து³க்க²ஸ்ஸந்தம் கரிஸ்ஸாமீ’தி – நேதம் டா²னம் விஜ்ஜதி.

‘‘யோ ச கோ², பி⁴க்க²வே, ஏவம் வதே³ய்ய – ‘அஹம் து³க்க²ம் அரியஸச்சம் யதா²பூ⁴தம் அபி⁴ஸமேச்ச, து³க்க²ஸமுத³யம் அரியஸச்சம் யதா²பூ⁴தம் அபி⁴ஸமேச்ச, து³க்க²னிரோத⁴ம் அரியஸச்சம் யதா²பூ⁴தம் அபி⁴ஸமேச்ச, து³க்க²னிரோத⁴கா³மினிம் படிபத³ம் அரியஸச்சம் யதா²பூ⁴தம் அபி⁴ஸமேச்ச ஸம்மா து³க்க²ஸ்ஸந்தம் கரிஸ்ஸாமீ’தி – டா²னமேதம் விஜ்ஜதி.

‘‘ஸேய்யதா²பி, பி⁴க்க²வே, யோ ஏவம் வதே³ய்ய – ‘அஹம் பது³மபத்தானம் வா பலாஸபத்தானம் வா மாலுவபத்தானம் வா புடம் கரித்வா உத³கம் வா தாலபத்தம் வா ஆஹரிஸ்ஸாமீ’தி – டா²னமேதம் விஜ்ஜதி; ஏவமேவ கோ², பி⁴க்க²வே, யோ ஏவம் வதே³ய்ய – ‘அஹம் து³க்க²ம் அரியஸச்சம் யதா²பூ⁴தம் அபி⁴ஸமேச்ச …பே… து³க்க²னிரோத⁴கா³மினிம் படிபத³ம் அரியஸச்சம் யதா²பூ⁴தம் அபி⁴ஸமேச்ச ஸம்மா து³க்க²ஸ்ஸந்தம் கரிஸ்ஸாமீ’தி – டா²னமேதம் விஜ்ஜதி.

‘‘தஸ்மாதிஹ, பி⁴க்க²வே, ‘இத³ம் து³க்க²’ந்தி யோகோ³ கரணீயோ…பே… ‘அயம் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. து³தியம்.