5. து³தியப²லஸுத்தம்

981. ‘‘ஆனாபானஸ்ஸதி, பி⁴க்க²வே, பா⁴விதா ப³ஹுலீகதா மஹப்ப²லா ஹோதி மஹானிஸம்ஸா. கத²ம் பா⁴விதா ச, பி⁴க்க²வே, ஆனாபானஸ்ஸதி கத²ம் ப³ஹுலீகதா மஹப்ப²லா ஹோதி மஹானிஸம்ஸா? இத⁴, பி⁴க்க²வே, பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. ஸோ ஸதோவ அஸ்ஸஸதி, ஸதோவ பஸ்ஸஸதி…பே… ‘படினிஸ்ஸக்³கா³னுபஸ்ஸீ அஸ்ஸஸிஸ்ஸாமீ’தி ஸிக்க²தி, ‘படினிஸ்ஸக்³கா³னுபஸ்ஸீ பஸ்ஸஸிஸ்ஸாமீ’தி ஸிக்க²தி. ஏவம் பா⁴விதா கோ², பி⁴க்க²வே, ஆனாபானஸ்ஸதி ஏவம் ப³ஹுலீகதா மஹப்ப²லா ஹோதி மஹானிஸம்ஸா.

‘‘ஏவம் பா⁴விதாய கோ², பி⁴க்க²வே, ஆனாபானஸ்ஸதியா ஏவம் ப³ஹுலீகதாய ஸத்த ப²லா ஸத்தானிஸம்ஸா பாடிகங்கா². கதமே ஸத்த ப²லா ஸத்தானிஸம்ஸா? தி³ட்டே²வ த⁴ம்மே படிகச்ச அஞ்ஞம் ஆராதே⁴தி; நோ சே தி³ட்டே²வ த⁴ம்மே படிகச்ச அஞ்ஞம் ஆராதே⁴தி. அத² மரணகாலே அஞ்ஞம் ஆராதே⁴தி; நோ சே தி³ட்டே²வ த⁴ம்மே படிகச்ச அஞ்ஞம் ஆராதே⁴தி, நோ சே மரணகாலே அஞ்ஞம் ஆராதே⁴தி. அத² பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா அந்தராபரினிப்³பா³யீ ஹோதி… உபஹச்சபரினிப்³பா³யீ ஹோதி… அஸங்கா²ரபரினிப்³பா³யீ ஹோதி… ஸஸங்கா²ரபரினிப்³பா³யீ ஹோதி… உத்³த⁴ம்ஸோதோ ஹோதி அகனிட்ட²கா³மீ – ஏவம் பா⁴விதாய கோ², பி⁴க்க²வே, ஆனாபானஸ்ஸதியா ஏவம் ப³ஹுலீகதாய இமே ஸத்த ப²லா ஸத்தானிஸம்ஸா பாடிகங்கா²’’தி. பஞ்சமம்.