6. அரிட்ட²ஸுத்தம்

982. ஸாவத்தி²னிதா³னம். தத்ர கோ² ப⁴க³வா…பே… ஏதத³வோச – ‘‘பா⁴வேத² நோ தும்ஹே பி⁴க்க²வே, ஆனாபானஸ்ஸதி’’ந்தி? ஏவம் வுத்தே ஆயஸ்மா அரிட்டோ² ப⁴க³வந்தம் ஏதத³வோச – ‘‘அஹம் கோ², ப⁴ந்தே, பா⁴வேமி ஆனாபானஸ்ஸதி’’ந்தி. ‘‘யதா² கத²ம் பன த்வம், அரிட்ட², பா⁴வேஸி ஆனாபானஸ்ஸதி’’ந்தி? ‘‘அதீதேஸு மே, ப⁴ந்தே, காமேஸு காமச்ச²ந்தோ³ பஹீனோ, அனாக³தேஸு மே காமேஸு காமச்ச²ந்தோ³ விக³தோ, அஜ்ஜ²த்தப³ஹித்³தா⁴ [அஜ்ஜ²த்தம் ப³ஹித்³தா⁴ (ஸ்யா. கம். பீ. க.)] ச மே த⁴ம்மேஸு படிக⁴ஸஞ்ஞா ஸுப்படிவினீதா. ஸோ [ஸோஹம் (?)] ஸதோவ அஸ்ஸஸிஸ்ஸாமி, ஸதோவ பஸ்ஸஸிஸ்ஸாமி. ஏவம் க்²வாஹம், ப⁴ந்தே, பா⁴வேமி ஆனாபானஸ்ஸதி’’ந்தி.

‘‘‘அத்தே²ஸா, அரிட்ட², ஆனாபானஸ்ஸதி, நேஸா நத்தீ²’தி வதா³மி. அபி ச, அரிட்ட², யதா² ஆனாபானஸ்ஸதி வித்தா²ரேன பரிபுண்ணா ஹோதி தம் ஸுணாஹி, ஸாது⁴கம் மனஸி கரோஹி; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² ஆயஸ்மா அரிட்டோ² ப⁴க³வதோ பச்சஸ்ஸோஸி. ப⁴க³வா ஏதத³வோச –

‘‘கத²ஞ்ச, அரிட்ட², ஆனாபானஸ்ஸதி வித்தா²ரேன பரிபுண்ணா ஹோதி? இத⁴, அரிட்ட², பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. ஸோ ஸதோவ அஸ்ஸஸதி, ஸதோவ பஸ்ஸஸதி. தீ³க⁴ம் வா அஸ்ஸஸந்தோ ‘தீ³க⁴ம் அஸ்ஸஸாமீ’தி பஜானாதி…பே… ‘படினிஸ்ஸக்³கா³னுபஸ்ஸீ அஸ்ஸஸிஸ்ஸாமீ’தி ஸிக்க²தி, ‘படினிஸ்ஸக்³கா³னுபஸ்ஸீ பஸ்ஸஸிஸ்ஸாமீ’தி ஸிக்க²தி. ஏவம் கோ², அரிட்ட², ஆனாபானஸ்ஸதி வித்தா²ரேன பரிபுண்ணா ஹோதீ’’தி. ச²ட்ட²ம்.