4. படிபத்திவக்³கோ³

1. பட²மபடிபத்திஸுத்தம்

31. ஸாவத்தி²னிதா³னம். ‘‘மிச்சா²படிபத்திஞ்ச வோ, பி⁴க்க²வே, தே³ஸேஸ்ஸாமி, ஸம்மாபடிபத்திஞ்ச. தம் ஸுணாத². கதமா ச, பி⁴க்க²வே, மிச்சா²படிபத்தி? ஸேய்யதி²த³ம் – மிச்சா²தி³ட்டி²…பே… மிச்சா²ஸமாதி⁴. அயம் வுச்சதி, பி⁴க்க²வே, மிச்சா²படிபத்தி. கதமா ச, பி⁴க்க²வே, ஸம்மாபடிபத்தி? ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. அயம் வுச்சதி, பி⁴க்க²வே, ஸம்மாபடிபத்தீ’’தி. பட²மம்.

2. து³தியபடிபத்திஸுத்தம்

32. ஸாவத்தி²னிதா³னம். ‘‘மிச்சா²படிபன்னஞ்ச வோ, பி⁴க்க²வே, தே³ஸேஸ்ஸாமி, ஸம்மாபடிபன்னஞ்ச. தம் ஸுணாத². கதமோ ச, பி⁴க்க²வே, மிச்சா²படிபன்னோ? இத⁴, பி⁴க்க²வே, ஏகச்சோ மிச்சா²தி³ட்டி²கோ ஹோதி…பே… மிச்சா²ஸமாதி⁴ – அயம் வுச்சதி, பி⁴க்க²வே, மிச்சா²படிபன்னோ. கதமோ ச, பி⁴க்க²வே, ஸம்மாபடிபன்னோ? இத⁴, பி⁴க்க²வே, ஏகச்சோ ஸம்மாதி³ட்டி²கோ ஹோதி…பே… ஸம்மாஸமாதி⁴ – அயம் வுச்சதி, பி⁴க்க²வே, ஸம்மாபடிபன்னோ’’தி. து³தியம்.

3. விரத்³த⁴ஸுத்தம்

33. ஸாவத்தி²னிதா³னம். ‘‘யேஸம் கேஸஞ்சி, பி⁴க்க²வே, அரியோ அட்ட²ங்கி³கோ மக்³கோ³ விரத்³தோ⁴, விரத்³தோ⁴ தேஸம் அரியோ அட்ட²ங்கி³கோ மக்³கோ³ ஸம்மா து³க்க²க்க²யகா³மீ. யேஸம் கேஸஞ்சி, பி⁴க்க²வே, அரியோ அட்ட²ங்கி³கோ மக்³கோ³ ஆரத்³தோ⁴, ஆரத்³தோ⁴ தேஸம் அரியோ அட்ட²ங்கி³கோ மக்³கோ³ ஸம்மா து³க்க²க்க²யகா³மீ. கதமோ ச, பி⁴க்க²வே, அரியோ அட்ட²ங்கி³கோ மக்³கோ³? ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. யேஸம் கேஸஞ்சி, பி⁴க்க²வே, அயம் அரியோ அட்ட²ங்கி³கோ மக்³கோ³ விரத்³தோ⁴, விரத்³தோ⁴ தேஸம் அரியோ அட்ட²ங்கி³கோ மக்³கோ³ ஸம்மா து³க்க²க்க²யகா³மீ. யேஸம் கேஸஞ்சி, பி⁴க்க²வே, அயம் அரியோ அட்ட²ங்கி³கோ மக்³கோ³ ஆரத்³தோ⁴, ஆரத்³தோ⁴ தேஸம் அரியோ அட்ட²ங்கி³கோ மக்³கோ³ ஸம்மா து³க்க²க்க²யகா³மீ’’தி. ததியம்.

4. பாரங்க³மஸுத்தம்

34. ஸாவத்தி²னிதா³னம். ‘‘அட்டி²மே, பி⁴க்க²வே, த⁴ம்மா பா⁴விதா ப³ஹுலீகதா அபாரா பாரம் க³மனாய ஸம்வத்தந்தி. கதமே அட்ட²? ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. இமே கோ², பி⁴க்க²வே, அட்ட² த⁴ம்மா பா⁴விதா ப³ஹுலீகதா அபாரா பாரம் க³மனாய ஸம்வத்தந்தீ’’தி.

இத³மவோச ப⁴க³வா. இத³ம் வத்வான ஸுக³தோ அதா²பரம் ஏதத³வோச ஸத்தா² –

‘‘அப்பகா தே மனுஸ்ஸேஸு, யே ஜனா பாரகா³மினோ;

அதா²யம் இதரா பஜா, தீரமேவானுதா⁴வதி.

‘‘யே ச கோ² ஸம்மத³க்கா²தே, த⁴ம்மே த⁴ம்மானுவத்தினோ;

தே ஜனா பாரமேஸ்ஸந்தி, மச்சுதே⁴ய்யம் ஸுது³த்தரம்.

‘‘கண்ஹம் த⁴ம்மம் விப்பஹாய, ஸுக்கம் பா⁴வேத² பண்டி³தோ;

ஓகா அனோகமாக³ம்ம, விவேகே யத்த² தூ³ரமம்.

‘‘தத்ராபி⁴ரதிமிச்சே²ய்ய, ஹித்வா காமே அகிஞ்சனோ;

பரியோத³பேய்ய அத்தானம், சித்தக்லேஸேஹி பண்டி³தோ.

‘‘யேஸம் ஸம்போ³தி⁴யங்கே³ஸு, ஸம்மா சித்தம் ஸுபா⁴விதம்;

ஆதா³னபடினிஸ்ஸக்³கே³, அனுபாதா³ய யே ரதா;

கீ²ணாஸவா ஜுதிமந்தோ, தே லோகே பரினிப்³பு³தா’’தி. சதுத்த²ம்;

5. பட²மஸாமஞ்ஞஸுத்தம்

35. ஸாவத்தி²னிதா³னம். ‘‘ஸாமஞ்ஞஞ்ச வோ, பி⁴க்க²வே, தே³ஸேஸ்ஸாமி, ஸாமஞ்ஞப²லானி ச. தம் ஸுணாத². கதமஞ்ச, பி⁴க்க²வே, ஸாமஞ்ஞம்? அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. இத³ம் வுச்சதி, பி⁴க்க²வே, ஸாமஞ்ஞம். கதமானி ச, பி⁴க்க²வே, ஸாமஞ்ஞப²லானி? ஸோதாபத்திப²லம், ஸகதா³கா³மிப²லம், அனாகா³மிப²லம், அரஹத்தப²லம் – இமானி வுச்சந்தி, பி⁴க்க²வே, ஸாமஞ்ஞப²லானீ’’தி. பஞ்சமம்.

6. து³தியஸாமஞ்ஞஸுத்தம்

36. ஸாவத்தி²னிதா³னம். ‘‘ஸாமஞ்ஞஞ்ச வோ, பி⁴க்க²வே, தே³ஸேஸ்ஸாமி, ஸாமஞ்ஞத்த²ஞ்ச. தம் ஸுணாத². கதமஞ்ச கோ², பி⁴க்க²வே, ஸாமஞ்ஞம்? அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. இத³ம் வுச்சதி, பி⁴க்க²வே, ஸாமஞ்ஞம். கதமோ ச, பி⁴க்க²வே, ஸாமஞ்ஞத்தோ²? யோ கோ², பி⁴க்க²வே, ராக³க்க²யோ தோ³ஸக்க²யோ மோஹக்க²யோ – அயம் வுச்சதி, பி⁴க்க²வே, ஸாமஞ்ஞத்தோ²’’தி. ச²ட்ட²ம்.

7. பட²மப்³ரஹ்மஞ்ஞஸுத்தம்

37. ஸாவத்தி²னிதா³னம். ‘‘ப்³ரஹ்மஞ்ஞஞ்ச வோ, பி⁴க்க²வே, தே³ஸேஸ்ஸாமி, ப்³ரஹ்மஞ்ஞப²லானி ச. தம் ஸுணாத². கதமஞ்ச கோ², பி⁴க்க²வே, ப்³ரஹ்மஞ்ஞம்? அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. இத³ம் வுச்சதி, பி⁴க்க²வே, ப்³ரஹ்மஞ்ஞம். கதமானி ச, பி⁴க்க²வே, ப்³ரஹ்மஞ்ஞப²லானி? ஸோதாபத்திப²லம், ஸகதா³கா³மிப²லம், அனாகா³மிப²லம், அரஹத்தப²லம் – இமானி வுச்சந்தி, பி⁴க்க²வே, ப்³ரஹ்மஞ்ஞப²லானீ’’தி. ஸத்தமம்.

8. து³தியப்³ரஹ்மஞ்ஞஸுத்தம்

38. ஸாவத்தி²னிதா³னம். ‘‘ப்³ரஹ்மஞ்ஞஞ்ச வோ, பி⁴க்க²வே, தே³ஸேஸ்ஸாமி, ப்³ரஹ்மஞ்ஞத்த²ஞ்ச. தம் ஸுணாத². கதமஞ்ச, பி⁴க்க²வே, ப்³ரஹ்மஞ்ஞம்? அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. இத³ம் வுச்சதி, பி⁴க்க²வே, ப்³ரஹ்மஞ்ஞம். கதமோ ச, பி⁴க்க²வே, ப்³ரஹ்மஞ்ஞத்தோ²? யோ கோ², பி⁴க்க²வே, ராக³க்க²யோ தோ³ஸக்க²யோ மோஹக்க²யோ – அயம் வுச்சதி, பி⁴க்க²வே, ப்³ரஹ்மஞ்ஞத்தோ²’’தி. அட்ட²மம்.

9. பட²மப்³ரஹ்மசரியஸுத்தம்

39. ஸாவத்தி²னிதா³னம். ‘‘ப்³ரஹ்மசரியஞ்ச வோ, பி⁴க்க²வே, தே³ஸேஸ்ஸாமி, ப்³ரஹ்மசரியப²லானி ச. தம் ஸுணாத². கதமஞ்ச, பி⁴க்க²வே, ப்³ரஹ்மசரியம்? அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. இத³ம் வுச்சதி, பி⁴க்க²வே, ப்³ரஹ்மசரியம். கதமானி ச, பி⁴க்க²வே, ப்³ரஹ்மசரியப²லானி? ஸோதாபத்திப²லம், ஸகதா³கா³மிப²லம், அனாகா³மிப²லம், அரஹத்தப²லம் – இமானி வுச்சந்தி, பி⁴க்க²வே, ப்³ரஹ்மசரியப²லானீ’’தி. நவமம்.

10. து³தியப்³ரஹ்மசரியஸுத்தம்

40. ஸாவத்தி²னிதா³னம். ‘‘ப்³ரஹ்மசரியஞ்ச வோ, பி⁴க்க²வே, தே³ஸேஸ்ஸாமி, ப்³ரஹ்மசரியத்த²ஞ்ச. தம் ஸுணாத². கதமஞ்ச, பி⁴க்க²வே, ப்³ரஹ்மசரியம்? அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. இத³ம் வுச்சதி, பி⁴க்க²வே, ப்³ரஹ்மசரியம். கதமோ ச, பி⁴க்க²வே, ப்³ரஹ்மசரியத்தோ²? யோ கோ², பி⁴க்க²வே, ராக³க்க²யோ தோ³ஸக்க²யோ மோஹக்க²யோ – அயம் வுச்சதி, பி⁴க்க²வே, ப்³ரஹ்மசரியத்தோ²’’தி. த³ஸமம்.

படிபத்திவக்³கோ³ சதுத்தோ².

தஸ்ஸுத்³தா³னம் –

படிபத்தி படிபன்னோ ச, விரத்³த⁴ஞ்ச பாரம்க³மா;

ஸாமஞ்ஞேன ச த்³வே வுத்தா, ப்³ரஹ்மஞ்ஞா அபரே து³வே;

ப்³ரஹ்மசரியேன த்³வே வுத்தா, வக்³கோ³ தேன பவுச்சதீதி.