1. ஏஸனாஸுத்தம்

161. ஸாவத்தி²னிதா³னம். ‘‘திஸ்ஸோ இமா, பி⁴க்க²வே, ஏஸனா. கதமா திஸ்ஸோ? காமேஸனா, ப⁴வேஸனா, ப்³ரஹ்மசரியேஸனா – இமா கோ², பி⁴க்க²வே, திஸ்ஸோ ஏஸனா. இமாஸம் கோ², பி⁴க்க²வே, திஸ்ஸன்னம் ஏஸனானம் அபி⁴ஞ்ஞாய அரியோ அட்ட²ங்கி³கோ மக்³கோ³ பா⁴வேதப்³போ³. கதமோ அரியோ அட்ட²ங்கி³கோ மக்³கோ³? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம்…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். இமாஸம் கோ², பி⁴க்க²வே, திஸ்ஸன்னம் ஏஸனானம் அபி⁴ஞ்ஞாய அயம் அரியோ அட்ட²ங்கி³கோ மக்³கோ³ பா⁴வேதப்³போ³’’தி.

‘‘திஸ்ஸோ இமா கோ², பி⁴க்க²வே, ஏஸனா. கதமா திஸ்ஸோ? காமேஸனா, ப⁴வேஸனா, ப்³ரஹ்மசரியேஸனா – இமா கோ², பி⁴க்க²வே, திஸ்ஸோ ஏஸனா. இமாஸம் கோ², பி⁴க்க²வே, திஸ்ஸன்னம் ஏஸனானம் அபி⁴ஞ்ஞாய அரியோ அட்ட²ங்கி³கோ மக்³கோ³ பா⁴வேதப்³போ³. கதமோ அரியோ அட்ட²ங்கி³கோ மக்³கோ³? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி…பே… ஸம்மாஸமாதி⁴ம் பா⁴வேதி ராக³வினயபரியோஸானம் தோ³ஸவினயபரியோஸானம் மோஹவினயபரியோஸானம். இமாஸம் கோ², பி⁴க்க²வே, திஸ்ஸன்னம் ஏஸனானம் அபி⁴ஞ்ஞாய அயம் அரியோ அட்ட²ங்கி³கோ மக்³கோ³ பா⁴வேதப்³போ³’’தி.

‘‘திஸ்ஸோ இமா கோ², பி⁴க்க²வே, ஏஸனா. கதமா திஸ்ஸோ? காமேஸனா, ப⁴வேஸனா, ப்³ரஹ்மசரியேஸனா – இமா கோ², பி⁴க்க²வே, திஸ்ஸோ ஏஸனா. இமாஸம் கோ², பி⁴க்க²வே, திஸ்ஸன்னம் ஏஸனானம் அபி⁴ஞ்ஞாய அரியோ அட்ட²ங்கி³கோ மக்³கோ³ பா⁴வேதப்³போ³. கதமோ அரியோ அட்ட²ங்கி³கோ மக்³கோ³? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி…பே… ஸம்மாஸமாதி⁴ம் பா⁴வேதி அமதோக³த⁴ம் அமதபராயனம் அமதபரியோஸானம். இமாஸம் கோ², பி⁴க்க²வே, திஸ்ஸன்னம் ஏஸனானம் அபி⁴ஞ்ஞாய அயம் அரியோ அட்ட²ங்கி³கோ மக்³கோ³ பா⁴வேதப்³போ³’’தி.

‘‘திஸ்ஸோ இமா கோ², பி⁴க்க²வே, ஏஸனா. கதமா திஸ்ஸோ? காமேஸனா, ப⁴வேஸனா, ப்³ரஹ்மசரியேஸனா – இமா கோ², பி⁴க்க²வே, திஸ்ஸோ ஏஸனா. இமாஸம் கோ², பி⁴க்க²வே, திஸ்ஸன்னம் ஏஸனானம் அபி⁴ஞ்ஞாய அரியோ அட்ட²ங்கி³கோ மக்³கோ³ பா⁴வேதப்³போ³. கதமோ அரியோ அட்ட²ங்கி³கோ மக்³கோ³? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி…பே… ஸம்மாஸமாதி⁴ம் பா⁴வேதி நிப்³பா³னனின்னம் நிப்³பா³னபோணம் நிப்³பா³னபப்³பா⁴ரம். இமாஸம் கோ², பி⁴க்க²வே, திஸ்ஸன்னம் ஏஸனானம் அபி⁴ஞ்ஞாய அயம் அரியோ அட்ட²ங்கி³கோ மக்³கோ³ பா⁴வேதப்³போ³’’தி.

‘‘திஸ்ஸோ இமா, பி⁴க்க²வே, ஏஸனா. கதமா திஸ்ஸோ? காமேஸனா, ப⁴வேஸனா, ப்³ரஹ்மசரியேஸனா – இமா கோ², பி⁴க்க²வே, திஸ்ஸோ ஏஸனா. இமாஸம் கோ², பி⁴க்க²வே, திஸ்ஸன்னம் ஏஸனானம் பரிஞ்ஞாய…பே… அயம் அரியோ அட்ட²ங்கி³கோ மக்³கோ³ பா⁴வேதப்³போ³’’தி. (யத³பி அபி⁴ஞ்ஞா, தத³பி பரிஞ்ஞாய வித்தா²ரேதப்³ப³ம்.)

‘‘திஸ்ஸோ இமா, பி⁴க்க²வே, ஏஸனா. கதமா திஸ்ஸோ? காமேஸனா, ப⁴வேஸனா, ப்³ரஹ்மசரியேஸனா – இமா கோ², பி⁴க்க²வே, திஸ்ஸோ ஏஸனா. இமாஸம் கோ², பி⁴க்க²வே, திஸ்ஸன்னம் ஏஸனானம் பரிக்க²யாய…பே… அயம் அரியோ அட்ட²ங்கி³கோ மக்³கோ³ பா⁴வேதப்³போ³’’தி. (யத³பி அபி⁴ஞ்ஞா, தத³பி பரிக்க²யாய வித்தா²ரேதப்³ப³ம்.)

‘‘திஸ்ஸோ இமா, பி⁴க்க²வே, ஏஸனா. கதமா திஸ்ஸோ? காமேஸனா, ப⁴வேஸனா, ப்³ரஹ்மசரியேஸனா – இமா கோ², பி⁴க்க²வே, திஸ்ஸோ ஏஸனா. இமாஸம் கோ², பி⁴க்க²வே, திஸ்ஸன்னம் ஏஸனானம் பஹானாய அரியோ அட்ட²ங்கி³கோ மக்³கோ³ பா⁴வேதப்³போ³. கதமோ அரியோ அட்ட²ங்கி³கோ மக்³கோ³? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… இமாஸம் கோ², பி⁴க்க²வே, திஸ்ஸன்னம் ஏஸனானம் பஹானாய அயம் அரியோ அட்ட²ங்கி³கோ மக்³கோ³ பா⁴வேதப்³போ³’’தி. (யத³பி அபி⁴ஞ்ஞா, தத³பி பஹானாய வித்தா²ரேதப்³ப³ம்.) பட²மம்.