6. ப³லகரணீயவக்³கோ³

1. ப³லஸுத்தம்

149. ஸாவத்தி²னிதா³னம். ‘‘ஸேய்யதா²பி, பி⁴க்க²வே, யே கேசி ப³லகரணீயா கம்மந்தா கரீயந்தி, ஸப்³பே³ தே பத²விம் நிஸ்ஸாய பத²வியம் பதிட்டா²ய ஏவமேதே ப³லகரணீயா கம்மந்தா கரீயந்தி; ஏவமேவ கோ², பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதி. கத²ஞ்ச, பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஏவம் கோ², பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதீ’’தி.

(பரக³ங்கா³பேய்யாலீவண்ணியதோ பரிபுண்ணஸுத்தந்தி வித்தா²ரமக்³கீ³).

‘‘ஸேய்யதா²பி, பி⁴க்க²வே, யே கேசி ப³லகரணீயா கம்மந்தா கரீயந்தி, ஸப்³பே³ தே பத²விம் நிஸ்ஸாய பத²வியம் பதிட்டா²ய ஏவமேதே ப³லகரணீயா கம்மந்தா கரீயந்தி; ஏவமேவ கோ², பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதி. கத²ஞ்ச, பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி ராக³வினயபரியோஸானம் தோ³ஸவினயபரியோஸானம் மோஹவினயபரியோஸானம்…பே… ஸம்மாஸமாதி⁴ம் பா⁴வேதி ராக³வினயபரியோஸானம் தோ³ஸவினயபரியோஸானம் மோஹவினயபரியோஸானம். ஏவம் கோ², பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதீ’’தி.

‘‘ஸேய்யதா²பி, பி⁴க்க²வே, யே கேசி ப³லகரணீயா கம்மந்தா கரீயந்தி, ஸப்³பே³ தே பத²விம் நிஸ்ஸாய பத²வியம் பதிட்டா²ய ஏவமேதே ப³லகரணீயா கம்மந்தா கரீயந்தி; ஏவமேவ கோ², பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதி. கத²ஞ்ச, பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி அமதோக³த⁴ம் அமதபராயனம் அமதபரியோஸானம்…பே… ஸம்மாஸமாதி⁴ம் பா⁴வேதி அமதோக³த⁴ம் அமதபராயனம் அமதபரியோஸானம். ஏவம் கோ², பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதீ’’தி.

‘‘ஸேய்யதா²பி, பி⁴க்க²வே, யே கேசி ப³லகரணீயா கம்மந்தா கரீயந்தி, ஸப்³பே³ தே பத²விம் நிஸ்ஸாய பத²வியம் பதிட்டா²ய ஏவமேதே ப³லகரணீயா கம்மந்தா கரீயந்தி; ஏவமேவ கோ², பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதி. கத²ஞ்ச, பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி நிப்³பா³னனின்னம் நிப்³பா³னபோணம் நிப்³பா³னபப்³பா⁴ரம்…பே… ஸம்மாஸமாதி⁴ம் பா⁴வேதி நிப்³பா³னனின்னம் நிப்³பா³னபோணம் நிப்³பா³னபப்³பா⁴ரம். ஏவம் கோ², பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதீ’’தி. பட²மம்.

2. பீ³ஜஸுத்தம்

150. ‘‘ஸேய்யதா²பி, பி⁴க்க²வே, யே கேசிமே பீ³ஜகா³மபூ⁴தகா³மா வுட்³டி⁴ம் விரூள்ஹிம் வேபுல்லம் ஆபஜ்ஜந்தி, ஸப்³பே³ தே பத²விம் நிஸ்ஸாய பத²வியம் பதிட்டா²ய ஏவமேதே பீ³ஜகா³மபூ⁴தகா³மா வுட்³டி⁴ம் விரூள்ஹிம் வேபுல்லம் ஆபஜ்ஜந்தி; ஏவமேவ கோ², பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ வுட்³டி⁴ம் விரூள்ஹிம் வேபுல்லம் பாபுணாதி த⁴ம்மேஸு. கத²ஞ்ச, பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ வுட்³டி⁴ம் விரூள்ஹிம் வேபுல்லம் பாபுணாதி த⁴ம்மேஸு? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம்…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஏவம் கோ², பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ வுட்³டி⁴ம் விரூள்ஹிம் வேபுல்லம் பாபுணாதி த⁴ம்மேஸூ’’தி. து³தியம்.

3. நாக³ஸுத்தம்

151. ‘‘ஸேய்யதா²பி, பி⁴க்க²வே, ஹிமவந்தம் பப்³ப³தராஜம் நிஸ்ஸாய நாகா³ காயம் வட்³டே⁴ந்தி, ப³லம் கா³ஹேந்தி; தே தத்த² காயம் வட்³டே⁴த்வா ப³லம் கா³ஹேத்வா குஸோப்³பே⁴ ஓதரந்தி, குஸோப்³பே⁴ [குஸ்ஸுப்³பே⁴ (ஸீ. ஸ்யா.), குஸுப்³பே⁴ (பீ. க.)] ஓதரித்வா மஹாஸோப்³பே⁴ ஓதரந்தி, மஹாஸோப்³பே⁴ ஓதரித்வா குன்னதி³யோ ஓதரந்தி, குன்னதி³யோ ஓதரித்வா மஹானதி³யோ ஓதரந்தி, மஹானதி³யோ ஓதரித்வா மஹாஸமுத்³த³ம் [மஹாஸமுத்³த³ஸாக³ரம் (ஸப்³ப³த்த²) ஸம். நி. 2.23] ஓதரந்தி, தே தத்த² மஹந்தத்தம் வேபுல்லத்தம் ஆபஜ்ஜந்தி காயேன; ஏவமேவ கோ², பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ மஹந்தத்தம் வேபுல்லத்தம் பாபுணாதி த⁴ம்மேஸு. கத²ஞ்ச, பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ மஹந்தத்தம் வேபுல்லத்தம் பாபுணாதி த⁴ம்மேஸு? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஏவம் கோ², பி⁴க்க²வே, பி⁴க்கு² ஸீலம் நிஸ்ஸாய ஸீலே பதிட்டா²ய அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ மஹந்தத்தம் வேபுல்லத்தம் பாபுணாதி த⁴ம்மேஸூ’’தி. ததியம்.

4. ருக்க²ஸுத்தம்

152. ‘‘ஸேய்யதா²பி, பி⁴க்க²வே, ருக்கோ² பாசீனனின்னோ பாசீனபோணோ பாசீனபப்³பா⁴ரோ. ஸோ மூலச்சி²ன்னோ [மூலச்சி²ந்தே³ கதே (ஸ்யா.)] கதமேன பபதேய்யா’’தி? ‘‘யேன, ப⁴ந்தே, நின்னோ யேன போணோ யேன பப்³பா⁴ரோ’’தி. ‘‘ஏவமேவ கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ. கத²ஞ்ச, பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஏவம் கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ’’தி. சதுத்த²ம்.

5. கும்ப⁴ஸுத்தம்

153. ‘‘ஸேய்யதா²பி, பி⁴க்க²வே, கும்போ⁴ நிக்குஜ்ஜோ வமதேவ உத³கம், நோ பச்சாவமதி; ஏவமேவ கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ வமதேவ பாபகே அகுஸலே த⁴ம்மே, நோ பச்சாவமதி. கத²ஞ்ச, பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ வமதேவ பாபகே அகுஸலே த⁴ம்மே, நோ பச்சாவமதி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஏவம் கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ வமதேவ பாபகே அகுஸலே த⁴ம்மே, நோ பச்சாவமதீ’’தி. பஞ்சமம்.

6. ஸூகஸுத்தம்

154. ‘‘ஸேய்யதா²பி, பி⁴க்க²வே, ஸாலிஸூகம் வா யவஸூகம் வா ஸம்மாபணிஹிதம் ஹத்தே²ன வா பாதே³ன வா அக்கந்தம் ஹத்த²ம் வா பாத³ம் வா பி⁴ந்தி³ஸ்ஸதி லோஹிதம் வா உப்பாதே³ஸ்ஸதீதி – டா²னமேதம் விஜ்ஜதி. தம் கிஸ்ஸ ஹேது? ஸம்மாபணிஹிதத்தா, பி⁴க்க²வே, ஸூகஸ்ஸ. ஏவமேவ கோ², பி⁴க்க²வே, பி⁴க்கு² ஸம்மாபணிஹிதாய தி³ட்டி²யா ஸம்மாபணிஹிதாய மக்³க³பா⁴வனாய அவிஜ்ஜம் பி⁴ந்தி³ஸ்ஸதி, விஜ்ஜம் உப்பாதே³ஸ்ஸதி, நிப்³பா³னம் ஸச்சி²கரிஸ்ஸதீதி – டா²னமேதம் விஜ்ஜதி. தம் கிஸ்ஸ ஹேது? ஸம்மாபணிஹிதத்தா, பி⁴க்க²வே, தி³ட்டி²யா. கத²ஞ்ச, பி⁴க்க²வே, பி⁴க்கு² ஸம்மாபணிஹிதாய தி³ட்டி²யா ஸம்மாபணிஹிதாய மக்³க³பா⁴வனாய அவிஜ்ஜம் பி⁴ந்த³தி, விஜ்ஜம் உப்பாதே³தி, நிப்³பா³னம் ஸச்சி²கரோதி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம்…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஏவம் கோ², பி⁴க்க²வே, பி⁴க்கு² ஸம்மாபணிஹிதாய தி³ட்டி²யா ஸம்மாபணிஹிதாய மக்³க³பா⁴வனாய அவிஜ்ஜம் பி⁴ந்த³தி, விஜ்ஜம் உப்பாதே³தி, நிப்³பா³னம் ஸச்சி²கரோதீ’’தி. ச²ட்ட²ம்.

7. ஆகாஸஸுத்தம்

155. ‘‘ஸேய்யதா²பி, பி⁴க்க²வே, ஆகாஸே விவிதா⁴ வாதா வாயந்தி – புரத்தி²மாபி வாதா வாயந்தி, பச்சி²மாபி வாதா வாயந்தி, உத்தராபி வாதா வாயந்தி, த³க்கி²ணாபி வாதா வாயந்தி, ஸரஜாபி வாதா வாயந்தி, அரஜாபி வாதா வாயந்தி, ஸீதாபி வாதா வாயந்தி, உண்ஹாபி வாதா வாயந்தி, பரித்தாபி வாதா வாயந்தி, அதி⁴மத்தாபி வாதா வாயந்தி; ஏவமேவ கோ², பி⁴க்க²வே, பி⁴க்கு²னோ அரியம் அட்ட²ங்கி³கம் மக்³க³ம் பா⁴வயதோ அரியம் அட்ட²ங்கி³கம் மக்³க³ம் ப³ஹுலீகரோதோ சத்தாரோபி ஸதிபட்டா²னா பா⁴வனாபாரிபூரிம் க³ச்ச²ந்தி, சத்தாரோபி ஸம்மப்பதா⁴னா பா⁴வனாபாரிபூரிம் க³ச்ச²ந்தி, சத்தாரோபி இத்³தி⁴பாதா³ பா⁴வனாபாரிபூரிம் க³ச்ச²ந்தி, பஞ்சபி இந்த்³ரியானி பா⁴வனாபாரிபூரிம் க³ச்ச²ந்தி, பஞ்சபி ப³லானி பா⁴வனாபரிபூரிம் க³ச்ச²ந்தி, ஸத்தபி போ³ஜ்ஜ²ங்கா³ பா⁴வனாபாரிபூரிம் க³ச்ச²ந்தி. கத²ஞ்ச, பி⁴க்க²வே, பி⁴க்கு²னோ அரியம் அட்ட²ங்கி³கம் மக்³க³ம் பா⁴வயதோ அரியம் அட்ட²ங்கி³கம் மக்³க³ம் ப³ஹுலீகரோதோ சத்தாரோபி ஸதிபட்டா²னா பா⁴வனாபாரிபூரிம் க³ச்ச²ந்தி, சத்தாரோபி ஸம்மப்பதா⁴னா பா⁴வனாபாரிபூரிம் க³ச்ச²ந்தி, சத்தாரோபி இத்³தி⁴பாதா³ பா⁴வனாபாரிபூரிம் க³ச்ச²ந்தி, பஞ்சபி இந்த்³ரியானி பா⁴வனாபாரிபூரிம் க³ச்ச²ந்தி, பஞ்சபி ப³லானி பா⁴வனாபாரிபூரிம் க³ச்ச²ந்தி, ஸத்தபி போ³ஜ்ஜ²ங்கா³ பா⁴வனாபாரிபூரிம் க³ச்ச²ந்தி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஏவம் கோ², பி⁴க்க²வே, பி⁴க்கு²னோ அரியம் அட்ட²ங்கி³கம் மக்³க³ம் பா⁴வயதோ அரியம் அட்ட²ங்கி³கம் மக்³க³ம் ப³ஹுலீகரோதோ சத்தாரோபி ஸதிபட்டா²னா பா⁴வனாபாரிபூரிம் க³ச்ச²ந்தி, சத்தாரோபி ஸம்மப்பதா⁴னா பா⁴வனாபாரிபூரிம் க³ச்ச²ந்தி, சத்தாரோபி இத்³தி⁴பாதா³ பா⁴வனாபாரிபூரிம் க³ச்ச²ந்தி, பஞ்சபி இந்த்³ரியானி பா⁴வனாபாரிபூரிம் க³ச்ச²ந்தி, பஞ்சபி ப³லானி பா⁴வனாபாரிபூரிம் க³ச்ச²ந்தி, ஸத்தபி போ³ஜ்ஜ²ங்கா³ பா⁴வனாபாரிபூரிம் க³ச்ச²ந்தீ’’தி. ஸத்தமம்.

8. பட²மமேக⁴ஸுத்தம்

156. ‘‘ஸேய்யதா²பி, பி⁴க்க²வே, கி³ம்ஹானம் பச்சி²மே மாஸே ஊஹதம் ரஜோஜல்லம், தமேனம் மஹாஅகாலமேகோ⁴ டா²னஸோ அந்தரதா⁴பேதி வூபஸமேதி; ஏவமேவ கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ உப்பன்னுப்பன்னே பாபகே அகுஸலே த⁴ம்மே டா²னஸோ அந்தரதா⁴பேதி வூபஸமேதி. கத²ஞ்ச, பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ உப்பன்னுப்பன்னே பாபகே அகுஸலே த⁴ம்மே டா²னஸோ அந்தரதா⁴பேதி வூபஸமேதி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஏவம் கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ உப்பன்னுப்பன்னே பாபகே அகுஸலே த⁴ம்மே டா²னஸோ அந்தரதா⁴பேதி வூபஸமேதீ’’தி. அட்ட²மம்.

9. து³தியமேக⁴ஸுத்தம்

157. ‘‘ஸேய்யதா²பி, பி⁴க்க²வே, உப்பன்னம் மஹாமேக⁴ம், தமேனம் மஹாவாதோ அந்தராயேவ அந்தரதா⁴பேதி வூபஸமேதி; ஏவமேவ கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ உப்பன்னுப்பன்னே பாபகே அகுஸலே த⁴ம்மே அந்தராயேவ அந்தரதா⁴பேதி வூபஸமேதி. கத²ஞ்ச, பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ உப்பன்னுப்பன்னே பாபகே அகுஸலே த⁴ம்மே அந்தராயேவ அந்தரதா⁴பேதி வூபஸமேதி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஏவம் கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ உப்பன்னுப்பன்னே பாபகே அகுஸலே த⁴ம்மே அந்தராயேவ அந்தரதா⁴பேதி வூபஸமேதீ’’தி. நவமம்.

10. நாவாஸுத்தம்

158. ‘‘ஸேய்யதா²பி, பி⁴க்க²வே, ஸாமுத்³தி³காய நாவாய வேத்தப³ந்த⁴னப³ந்தா⁴ய ச² மாஸானி உத³கே பரியாதா³ய [பரியாதாய (க.), பரியாஹதாய (?)] ஹேமந்திகேன த²லம் உக்கி²த்தாய வாதாதபபரேதானி ப³ந்த⁴னானி தானி பாவுஸ்ஸகேன மேகே⁴ன அபி⁴ப்பவுட்டா²னி அப்பகஸிரேனேவ படிப்பஸ்ஸம்ப⁴ந்தி, பூதிகானி ப⁴வந்தி; ஏவமேவ கோ², பி⁴க்க²வே, பி⁴க்கு²னோ அரியம் அட்ட²ங்கி³கம் மக்³க³ம் பா⁴வயதோ அரியம் அட்ட²ங்கி³கம் மக்³க³ம் ப³ஹுலீகரோதோ அப்பகஸிரேனேவ ஸம்யோஜனானி படிப்பஸ்ஸம்ப⁴ந்தி, பூதிகானி ப⁴வந்தி. கத²ஞ்ச, பி⁴க்க²வே, பி⁴க்கு²னோ அரியம் அட்ட²ங்கி³கம் மக்³க³ம் பா⁴வயதோ அரியம் அட்ட²ங்கி³கம் மக்³க³ம் ப³ஹுலீகரோதோ அப்பகஸிரேனேவ ஸம்யோஜனானி படிப்பஸ்ஸம்ப⁴ந்தி, பூதிகானி ப⁴வந்தி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஏவம் கோ², பி⁴க்க²வே, பி⁴க்கு²னோ அரியம் அட்ட²ங்கி³கம் மக்³க³ம் பா⁴வயதோ அரியம் அட்ட²ங்கி³கம் மக்³க³ம் ப³ஹுலீகரோதோ அப்பகஸிரேனேவ ஸம்யோஜனானி படிப்பஸ்ஸம்ப⁴ந்தி, பூதிகானி ப⁴வந்தீ’’தி. த³ஸமம்.

11. ஆக³ந்துகஸுத்தம்

159. ‘‘ஸேய்யதா²பி, பி⁴க்க²வே, ஆக³ந்துகாகா³ரம். தத்த² புரத்தி²மாயபி தி³ஸாய ஆக³ந்த்வா வாஸம் கப்பேந்தி, பச்சி²மாயபி தி³ஸாய ஆக³ந்த்வா வாஸம் கப்பேந்தி, உத்தராயபி தி³ஸாய ஆக³ந்த்வா வாஸம் கப்பேந்தி, த³க்கி²ணாயபி தி³ஸாய ஆக³ந்த்வா வாஸம் கப்பேந்தி, க²த்தியாபி ஆக³ந்த்வா வாஸம் கப்பேந்தி, ப்³ராஹ்மணாபி ஆக³ந்த்வா வாஸம் கப்பேந்தி, வேஸ்ஸாபி ஆக³ந்த்வா வாஸம் கப்பேந்தி, ஸுத்³தா³பி ஆக³ந்த்வா வாஸம் கப்பேந்தி; ஏவமேவ கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ யே த⁴ம்மா அபி⁴ஞ்ஞா பரிஞ்ஞேய்யா, தே த⁴ம்மே அபி⁴ஞ்ஞா பரிஜானாதி, யே த⁴ம்மா அபி⁴ஞ்ஞா பஹாதப்³பா³, தே த⁴ம்மே அபி⁴ஞ்ஞா பஜஹதி, யே த⁴ம்மா அபி⁴ஞ்ஞா ஸச்சி²காதப்³பா³, தே த⁴ம்மே அபி⁴ஞ்ஞா ஸச்சி²கரோதி, யே த⁴ம்மா அபி⁴ஞ்ஞா பா⁴வேதப்³பா³, தே த⁴ம்மே அபி⁴ஞ்ஞா பா⁴வேதி.

‘‘கதமே ச, பி⁴க்க²வே, த⁴ம்மா அபி⁴ஞ்ஞா பரிஞ்ஞேய்யா? பஞ்சுபாதா³னக்க²ந்தா⁴திஸ்ஸ வசனீயம். கதமே பஞ்ச? ஸேய்யதி²த³ம் – ரூபுபாதா³னக்க²ந்தோ⁴…பே… விஞ்ஞாணுபாதா³னக்க²ந்தோ⁴. இமே, பி⁴க்க²வே, த⁴ம்மா அபி⁴ஞ்ஞா பரிஞ்ஞேய்யா. கதமே ச, பி⁴க்க²வே, த⁴ம்மா அபி⁴ஞ்ஞா பஹாதப்³பா³? அவிஜ்ஜா ச ப⁴வதண்ஹா ச – இமே, பி⁴க்க²வே, த⁴ம்மா அபி⁴ஞ்ஞா பஹாதப்³பா³. கதமே ச, பி⁴க்க²வே, த⁴ம்மா அபி⁴ஞ்ஞா ஸச்சி²காதப்³பா³? விஜ்ஜா ச விமுத்தி ச – இமே, பி⁴க்க²வே, த⁴ம்மா அபி⁴ஞ்ஞா ஸச்சி²காதப்³பா³. கதமே ச, பி⁴க்க²வே, த⁴ம்மா அபி⁴ஞ்ஞா பா⁴வேதப்³பா³? ஸமதோ² ச விபஸ்ஸனா ச – இமே, பி⁴க்க²வே, த⁴ம்மா அபி⁴ஞ்ஞா பா⁴வேதப்³பா³. கத²ஞ்ச, பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ, யே த⁴ம்மா அபி⁴ஞ்ஞா பரிஞ்ஞேய்யா தே த⁴ம்மே அபி⁴ஞ்ஞா பரிஜானாதி…பே… யே த⁴ம்மா அபி⁴ஞ்ஞா பா⁴வேதப்³பா³, தே த⁴ம்மே அபி⁴ஞ்ஞா பா⁴வேதி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஏவம் கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ யே த⁴ம்மா அபி⁴ஞ்ஞா பரிஞ்ஞேய்யா, தே த⁴ம்மே அபி⁴ஞ்ஞா பரிஜானாதி, யே த⁴ம்மா அபி⁴ஞ்ஞா பஹாதப்³பா³, தே த⁴ம்மே அபி⁴ஞ்ஞா பஜஹதி, யே த⁴ம்மா அபி⁴ஞ்ஞா ஸச்சி²காதப்³பா³, தே த⁴ம்மே அபி⁴ஞ்ஞா ஸச்சி²கரோதி, யே த⁴ம்மா அபி⁴ஞ்ஞா பா⁴வேதப்³பா³, தே த⁴ம்மே அபி⁴ஞ்ஞா பா⁴வேதீ’’தி. ஏகாத³ஸமம்.

12. நதீ³ஸுத்தம்

160. ‘‘ஸேய்யதா²பி, பி⁴க்க²வே, க³ங்கா³ நதீ³ பாசீனனின்னா பாசீனபோணா பாசீனபப்³பா⁴ரா. அத² மஹாஜனகாயோ ஆக³ச்சே²ய்ய குத்³தா³ல-பிடகம் ஆதா³ய – ‘மயம் இமம் க³ங்க³ம் நதி³ம் பச்சா²னின்னம் கரிஸ்ஸாம பச்சா²போணம் பச்சா²பப்³பா⁴ர’ந்தி. தம் கிம் மஞ்ஞத², பி⁴க்க²வே, அபி நு ஸோ மஹாஜனகாயோ க³ங்க³ம் நதி³ம் பச்சா²னின்னம் கரேய்ய பச்சா²போணம் பச்சா²பப்³பா⁴ர’’ந்தி? ‘‘நோ ஹேதம், ப⁴ந்தே’’. ‘‘தம் கிஸ்ஸ ஹேது’’? ‘‘க³ங்கா³, ப⁴ந்தே, நதீ³ பாசீனனின்னா பாசீனபோணா பாசீனபப்³பா⁴ரா. ஸா ந ஸுகரா பச்சா²னின்னம் காதும் பச்சா²போணம் பச்சா²பப்³பா⁴ரம். யாவதே³வ பன ஸோ மஹாஜனகாயோ கிலமத²ஸ்ஸ விகா⁴தஸ்ஸ பா⁴கீ³ அஸ்ஸா’’தி. ‘‘ஏவமேவ கோ², பி⁴க்க²வே, பி⁴க்கு²ம் அரியம் அட்ட²ங்கி³கம் மக்³க³ம் பா⁴வேந்தம் அரியம் அட்ட²ங்கி³கம் மக்³க³ம் ப³ஹுலீகரோந்தம் ராஜானோ வா ராஜமஹாமத்தா வா மித்தா வா அமச்சா வா ஞாதீ வா ஞாதிஸாலோஹிதா வா போ⁴கே³ஹி அபி⁴ஹட்டு²ம் பவாரேய்யும் – ‘ஏஹம்போ⁴ புரிஸ, கிம் தே இமே காஸாவா அனுத³ஹந்தி, கிம் முண்டோ³ கபாலமனுஸம்சரஸி! ஏஹி, ஹீனாயாவத்தித்வா போ⁴கே³ ச பு⁴ஞ்ஜஸ்ஸு, புஞ்ஞானி ச கரோஹீ’தி. ஸோ வத, பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ ஸிக்க²ம் பச்சக்கா²ய ஹீனாயாவத்திஸ்ஸதீதி – நேதம் டா²னம் விஜ்ஜதி. தம் கிஸ்ஸ ஹேது? யஞ்ஹி தம், பி⁴க்க²வே, சித்தம் தீ³க⁴ரத்தம் விவேகனின்னம் விவேகபோணம் விவேகபப்³பா⁴ரம் தம் வத ஹீனாயாவத்திஸ்ஸதீதி – நேதம் டா²னம் விஜ்ஜதி. கத²ஞ்ச, பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம்…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஏவம் கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேதி, அரியம் அட்ட²ங்கி³கம் மக்³க³ம் ப³ஹுலீகரோதீ’’தி. (யத³பி ப³லகரணீயம், தத³பி வித்தா²ரேதப்³ப³ம்.) த்³வாத³ஸமம்.

ப³லகரணீயவக்³கோ³ ச²ட்டோ².

தஸ்ஸுத்³தா³னம் –

ப³லம் பீ³ஜஞ்ச நாகோ³ ச, ருக்கோ² கும்பே⁴ன ஸூகியா;

ஆகாஸேன ச த்³வே மேகா⁴, நாவா ஆக³ந்துகா நதீ³தி.