8-10. சந்தி³மாதி³ஸுத்தததியகம்

146. ‘‘ஸேய்யதா²பி, பி⁴க்க²வே, யா காசி தாரகரூபானம் பபா⁴, ஸப்³பா³ தா சந்தி³மப்பபா⁴ய [சந்தி³மாபபா⁴ய (ஸ்யா. க.)] கலம் நாக்³க⁴ந்தி ஸோளஸிம், சந்த³ப்பபா⁴ தாஸம் அக்³க³மக்கா²யதி; ஏவமேவ கோ², பி⁴க்க²வே…பே… அட்ட²மம்.

147. ‘‘ஸேய்யதா²பி, பி⁴க்க²வே, ஸரத³ஸமயே வித்³தே⁴ விக³தவலாஹகே தே³வே ஆதி³ச்சோ நப⁴ம் அப்³பு⁴ஸ்ஸக்கமானோ ஸப்³ப³ம் ஆகாஸக³தம் தமக³தம் அபி⁴விஹச்ச பா⁴ஸதே ச தபதே ச விரோசதி ச; ஏவமேவ கோ², பி⁴க்க²வே…பே… நவமம்.

148. ‘‘ஸேய்யதா²பி, பி⁴க்க²வே, யானி கானிசி தந்தாவுதானம் வத்தா²னம், காஸிகவத்த²ம் தேஸம் அக்³க³மக்கா²யதி; ஏவமேவ கோ², பி⁴க்க²வே, யே கேசி குஸலா த⁴ம்மா, ஸப்³பே³ தே அப்பமாத³மூலகா அப்பமாத³ஸமோஸரணா; அப்பமாதோ³ தேஸம் த⁴ம்மானம் அக்³க³மக்கா²யதி. அப்பமத்தஸ்ஸேதம், பி⁴க்க²வே, பி⁴க்கு²னோ பாடிகங்க²ம் – அரியம் அட்ட²ங்கி³கம் மக்³க³ம் பா⁴வேஸ்ஸதி அரியம் அட்ட²ங்கி³கம் மக்³க³ம் ப³ஹுலீகரிஸ்ஸதி. கத²ஞ்ச, பி⁴க்க²வே, பி⁴க்கு² அப்பமத்தோ அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஏவம் கோ², பி⁴க்க²வே, பி⁴க்கு² அப்பமத்தோ அரியம் அட்ட²ங்கி³கம் மக்³க³ம் பா⁴வேதி அரியம் அட்ட²ங்கி³கம் மக்³க³ம் ப³ஹுலீகரோதீ’’தி. த³ஸமம்.

(யத³பி ததா²க³தம், தத³பி வித்தா²ரேதப்³ப³ம்).

அப்பமாத³பேய்யாலவக்³கோ³ பஞ்சமோ.

தஸ்ஸுத்³தா³னம் –

ததா²க³தம் பத³ம் கூடம், மூலம் ஸாரோ ச வஸ்ஸிகம்;

ராஜா சந்தி³மஸூரியா ச, வத்தே²ன த³ஸமம் பத³ம்.