3. அட்ட²ஸதபரியாயவக்³கோ³

1. ஸீவகஸுத்தம்

269. ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² மோளியஸீவகோ பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² மோளியஸீவகோ பரிப்³பா³ஜகோ ப⁴க³வந்தம் ஏதத³வோச – ‘‘ஸந்தி, போ⁴ கோ³தம, ஏகே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘யம் கிஞ்சாயம் புரிஸபுக்³க³லோ படிஸம்வேதே³தி ஸுக²ம் வா து³க்க²ம் வா அது³க்க²மஸுக²ம் வா ஸப்³ப³ம் தம் புப்³பே³கதஹேதூ’தி. இத⁴ [இத⁴ பன (ஸ்யா. கம். பீ. க.)] ப⁴வம் கோ³தமோ கிமாஹா’’தி?

‘‘பித்தஸமுட்டா²னானிபி கோ², ஸீவக, இதே⁴கச்சானி வேத³யிதானி உப்பஜ்ஜந்தி. ஸாமம்பி கோ² ஏதம், ஸீவக, வேதி³தப்³ப³ம் [ஏவம் வேதி³தப்³ப³ம் (ஸ்யா. கம். க.)] யதா² பித்தஸமுட்டா²னானிபி இதே⁴கச்சானி வேத³யிதானி உப்பஜ்ஜந்தி; லோகஸ்ஸபி கோ² ஏதம், ஸீவக, ஸச்சஸம்மதம் யதா² பித்தஸமுட்டா²னானிபி இதே⁴கச்சானி வேத³யிதானி உப்பஜ்ஜந்தி. தத்ர, ஸீவக, யே தே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘யம் கிஞ்சாயம் புரிஸபுக்³க³லோ படிஸம்வேதே³தி ஸுக²ம் வா து³க்க²ம் வா அது³க்க²மஸுக²ம் வா ஸப்³ப³ம் தம் புப்³பே³கதஹேதூ’தி. யஞ்ச ஸாமம் ஞாதம் தஞ்ச அதிதா⁴வந்தி, யஞ்ச லோகே ஸச்சஸம்மதம் தஞ்ச அதிதா⁴வந்தி. தஸ்மா தேஸம் ஸமணப்³ராஹ்மணானம் மிச்சா²தி வதா³மி.

‘‘ஸேம்ஹஸமுட்டா²னானிபி கோ², ஸீவக…பே… வாதஸமுட்டா²னானிபி கோ², ஸீவக…பே… ஸன்னிபாதிகானிபி கோ², ஸீவக…பே… உதுபரிணாமஜானிபி கோ², ஸீவக…பே… விஸமபரிஹாரஜானிபி கோ², ஸீவக…பே… ஓபக்கமிகானிபி கோ², ஸீவக…பே… கம்மவிபாகஜானிபி கோ², ஸீவக, இதே⁴கச்சானி வேத³யிதானி உப்பஜ்ஜந்தி. ஸாமம்பி கோ² ஏதம், ஸீவக, வேதி³தப்³ப³ம். யதா² கம்மவிபாகஜானிபி இதே⁴கச்சானி வேத³யிதானி உப்பஜ்ஜந்தி; லோகஸ்ஸபி கோ² ஏதம், ஸீவக, ஸச்சஸம்மதம். யதா² கம்மவிபாகஜானிபி இதே⁴கச்சானி வேத³யிதானி உப்பஜ்ஜந்தி; தத்ர, ஸீவக, யே தே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘யம் கிஞ்சாயம் புரிஸபுக்³க³லோ படிஸம்வேதே³தி ஸுக²ம் வா து³க்க²ம் வா அது³க்க²மஸுக²ம் வா ஸப்³ப³ம் தம் புப்³பே³கதஹேதூ’தி. யஞ்ச ஸாமம் ஞாதம் தஞ்ச அதிதா⁴வந்தி யஞ்ச லோகே ஸச்சஸம்மதம் தஞ்ச அதிதா⁴வந்தி. தஸ்மா தேஸம் ஸமணப்³ராஹ்மணானம் மிச்சா²தி வதா³மீதி. ஏவம் வுத்தே, மோளியஸீவகோ பரிப்³பா³ஜகோ ப⁴க³வந்தம் ஏதத³வோச – ‘அபி⁴க்கந்தம், போ⁴ கோ³தம, அபி⁴க்கந்தம், போ⁴ கோ³தம …பே… உபாஸகம் மம் ப⁴வம் கோ³தமோ தா⁴ரேது அஜ்ஜதக்³கே³ பாணுபேதம் ஸரணம் க³த’’’ந்தி.

‘‘பித்தம் ஸேம்ஹஞ்ச வாதோ ச, ஸன்னிபாதா உதூனி ச;

விஸமம் ஓபக்கமிகம், கம்மவிபாகேன அட்ட²மீ’’தி. பட²மம்;

2. அட்ட²ஸதஸுத்தம்

270. ‘‘அட்ட²ஸதபரியாயம் வோ, பி⁴க்க²வே, த⁴ம்மபரியாயம் தே³ஸேஸ்ஸாமி. தம் ஸுணாத². கதமோ ச, பி⁴க்க²வே, அட்ட²ஸதபரியாயோ, த⁴ம்மபரியாயோ? த்³வேபி மயா, பி⁴க்க²வே, வேத³னா வுத்தா பரியாயேன; திஸ்ஸோபி மயா வேத³னா வுத்தா பரியாயேன; பஞ்சபி மயா வேத³னா வுத்தா பரியாயேன; ச²பி மயா வேத³னா வுத்தா பரியாயேன; அட்டா²ரஸாபி மயா வேத³னா வுத்தா பரியாயேன; ச²த்திம்ஸாபி மயா வேத³னா வுத்தா பரியாயேன; அட்ட²ஸதம்பி மயா வேத³னா வுத்தா பரியாயேன. ‘‘கதமா ச, பி⁴க்க²வே, த்³வே வேத³னா? காயிகா ச சேதஸிகா ச – இமா வுச்சந்தி, பி⁴க்க²வே, த்³வே வேத³னா. கதமா ச, பி⁴க்க²வே, திஸ்ஸோ வேத³னா? ஸுகா² வேத³னா, து³க்கா² வேத³னா, அது³க்க²மஸுகா² வேத³னா – இமா வுச்சந்தி, பி⁴க்க²வே, திஸ்ஸோ வேத³னா. கதமா ச, பி⁴க்க²வே, பஞ்ச வேத³னா? ஸுகி²ந்த்³ரியம், து³க்கி²ந்த்³ரியம், ஸோமனஸ்ஸிந்த்³ரியம், தோ³மனஸ்ஸிந்த்³ரியம், உபேக்கி²ந்த்³ரியம் – இமா வுச்சந்தி, பி⁴க்க²வே, பஞ்ச வேத³னா. கதமா ச, பி⁴க்க²வே, ச² வேத³னா? சக்கு²ஸம்ப²ஸ்ஸஜா வேத³னா…பே… மனோஸம்ப²ஸ்ஸஜா வேத³னா – இமா வுச்சந்தி, பி⁴க்க²வே, ச² வேத³னா. கதமா ச, பி⁴க்க²வே, அட்டா²ரஸ வேத³னா? ச² ஸோமனஸ்ஸூபவிசாரா, ச² தோ³மனஸ்ஸூபவிசாரா, ச² உபேக்கூ²பவிசாரா – இமா வுச்சந்தி, பி⁴க்க²வே, அட்டா²ரஸ வேத³னா. கதமா ச, பி⁴க்க²வே, ச²த்திம்ஸ வேத³னா? ச² கே³ஹஸிதானி [கே³ஹஸ்ஸிதானி (அட்ட².)] ஸோமனஸ்ஸானி, ச² நேக்க²ம்மஸிதானி [நேக்க²ம்மஸ்ஸிதானி (அட்ட².)] ஸோமனஸ்ஸானி, ச² கே³ஹஸிதானி தோ³மனஸ்ஸானி, ச² நேக்க²ம்மஸிதானி தோ³மனஸ்ஸானி, ச² கே³ஹஸிதா உபேக்கா², ச² நேக்க²ம்மஸிதா உபேக்கா² – இமா வுச்சந்தி, பி⁴க்க²வே, ச²த்திம்ஸ வேத³னா. கதமஞ்ச, பி⁴க்க²வே, அட்ட²ஸதம் வேத³னா? அதீதா ச²த்திம்ஸ வேத³னா, அனாக³தா ச²த்திம்ஸ வேத³னா, பச்சுப்பன்னா ச²த்திம்ஸ வேத³னா – இமா வுச்சந்தி, பி⁴க்க²வே, அட்ட²ஸதம் வேத³னா. அயம், பி⁴க்க²வே, அட்ட²ஸதபரியாயோ த⁴ம்மபரியாயோ’’தி. து³தியம்.

3. அஞ்ஞதரபி⁴க்கு²ஸுத்தம்

271. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘கதமா நு கோ², ப⁴ந்தே, வேத³னா, கதமோ வேத³னாஸமுத³யோ, கதமா வேத³னாஸமுத³யகா³மினீ படிபதா³? கதமோ வேத³னானிரோதோ⁴, கதமா வேத³னானிரோத⁴கா³மினீ படிபதா³? கோ வேத³னாய அஸ்ஸாதோ³, கோ ஆதீ³னவோ, கிம் நிஸ்ஸரண’’ந்தி?

‘‘திஸ்ஸோ இமா, பி⁴க்கு², வேத³னா – ஸுகா² வேத³னா, து³க்கா² வேத³னா, அது³க்க²மஸுகா² வேத³னா. இமா வுச்சந்தி, பி⁴க்கு², வேத³னா. ப²ஸ்ஸஸமுத³யா வேத³னாஸமுத³யோ. தண்ஹா வேத³னாஸமுத³யகா³மினீ படிபதா³. ப²ஸ்ஸனிரோதா⁴ வேத³னானிரோதோ⁴. அயமேவ அரியோ அட்ட²ங்கி³கோ மக்³கோ³ வேத³னானிரோத⁴கா³மினீ படிபதா³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. யம் வேத³னம் படிச்ச உப்பஜ்ஜதி ஸுக²ம் ஸோமனஸ்ஸம், அயம் வேத³னாய அஸ்ஸாதோ³; யா வேத³னா அனிச்சா து³க்கா² விபரிணாமத⁴ம்மா, அயம் வேத³னாய ஆதீ³னவோ; யோ வேத³னாய ச²ந்த³ராக³வினயோ ச²ந்த³ராக³ப்பஹானம், இத³ம் வேத³னாய நிஸ்ஸரண’’ந்தி. ததியம்.

4. புப்³ப³ஸுத்தம்

272. ‘‘புப்³பே³வ மே, பி⁴க்க²வே, ஸம்போ³தா⁴ அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸேவ ஸதோ ஏதத³ஹோஸி – ‘கதமா நு கோ² வேத³னா, கதமோ வேத³னாஸமுத³யோ, கதமா வேத³னாஸமுத³யகா³மினீ படிபதா³, கதமோ வேத³னானிரோதோ⁴, கதமா வேத³னானிரோத⁴கா³மினீ படிபதா³? கோ வேத³னாய அஸ்ஸாதோ³, கோ ஆதீ³னவோ, கிம் நிஸ்ஸரண’ந்தி? தஸ்ஸ மய்ஹம், பி⁴க்க²வே, ஏதத³ஹோஸி – ‘திஸ்ஸோ இமா வேத³னா – ஸுகா² வேத³னா, து³க்கா² வேத³னா, அது³க்க²மஸுகா² வேத³னா. இமா வுச்சந்தி வேத³னா. ப²ஸ்ஸஸமுத³யா வேத³னாஸமுத³யோ. தண்ஹா வேத³னாஸமுத³யகா³மினீ படிபதா³…பே… யோ வேத³னாய ச²ந்த³ராக³வினயோ ச²ந்த³ராக³ப்பஹானம். இத³ம் வேத³னாய நிஸ்ஸரண’’’ந்தி. சதுத்த²ம்.

5. ஞாணஸுத்தம்

273. ‘‘‘இமா வேத³னா’தி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³, ஞாணம் உத³பாதி³, பஞ்ஞா உத³பாதி³, விஜ்ஜா உத³பாதி³, ஆலோகோ உத³பாதி³. ‘அயம் வேத³னாஸமுத³யோ’தி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³…பே… ஆலோகோ உத³பாதி³. ‘அயம் வேத³னாஸமுத³யகா³மினீ படிபதா³’தி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³…பே… ‘அயம் வேத³னானிரோதோ⁴’தி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³ …பே… ‘அயம் வேத³னானிரோத⁴கா³மினீ படிபதா³’தி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³…பே… ‘அயம் வேத³னாய அஸ்ஸாதோ³’தி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு…பே… ‘அயம் வேத³னாய ஆதீ³னவோ’தி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு…பே… ‘இத³ம் கோ² நிஸ்ஸரண’ந்தி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³, ஞாணம் உத³பாதி³, பஞ்ஞா உத³பாதி³, விஜ்ஜா உத³பாதி³, ஆலோகோ உத³பாதீ³’’தி. பஞ்சமம்.

6. ஸம்ப³ஹுலபி⁴க்கு²ஸுத்தம்

274. அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிம்ஸு; உபஸங்கமித்வா…பே… ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் – ‘‘கதமா நு கோ², ப⁴ந்தே, வேத³னா, கதமோ வேத³னாஸமுத³யோ, கதமா வேத³னாஸமுத³யகா³மினீ படிபதா³? கதமோ வேத³னானிரோதோ⁴, கதமா வேத³னானிரோத⁴கா³மினீ படிபதா³? கோ வேத³னாய அஸ்ஸாதோ³, கோ ஆதீ³னவோ, கிம் நிஸ்ஸரண’’ந்தி? ‘‘திஸ்ஸோ இமா, பி⁴க்க²வே, வேத³னா – ஸுகா² வேத³னா, து³க்கா² வேத³னா, அது³க்க²மஸுகா² வேத³னா. இமா வுச்சந்தி, பி⁴க்க²வே, வேத³னா. ப²ஸ்ஸஸமுத³யா வேத³னாஸமுத³யோ. தண்ஹா வேத³னாஸமுத³யகா³மினீ படிபதா³. ப²ஸ்ஸனிரோதா⁴…பே… யோ வேத³னாய ச²ந்த³ராக³வினயோ ச²ந்த³ராக³ப்பஹானம். இத³ம் வேத³னாய நிஸ்ஸரண’’ந்தி. ச²ட்ட²ம்.

7. பட²மஸமணப்³ராஹ்மணஸுத்தம்

275. ‘‘திஸ்ஸோ இமா, பி⁴க்க²வே, வேத³னா. கதமா திஸ்ஸோ? ஸுகா² வேத³னா, து³க்கா² வேத³னா, அது³க்க²மஸுகா² வேத³னா. யே ஹி கேசி, பி⁴க்க²வே, ஸமணா வா ப்³ராஹ்மணா வா இமாஸம் திஸ்ஸன்னம் வேத³னானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானந்தி. ந மே தே, பி⁴க்க²வே, ஸமணா வா ப்³ராஹ்மணா வா ஸமணேஸு வா ஸமணஸம்மதா ப்³ராஹ்மணேஸு வா ப்³ராஹ்மணஸம்மதா, ந ச பன தே ஆயஸ்மந்தோ ஸாமஞ்ஞத்த²ம் வா ப்³ரஹ்மஞ்ஞத்த²ம் வா தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி. யே ச கோ² கேசி, பி⁴க்க²வே, ஸமணா வா ப்³ராஹ்மணா வா இமாஸம் திஸ்ஸன்னம் வேத³னானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவம் ச நிஸ்ஸரணஞ்ச யதா²பூ⁴தம் பஜானந்தி. தே கோ² மே, பி⁴க்க²வே, ஸமணா வா ப்³ராஹ்மணா வா ஸமணேஸு சேவ ஸமணஸம்மதா ப்³ராஹ்மணேஸு ச ப்³ராஹ்மணஸம்மதா. தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச, தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. ஸத்தமம்.

8. து³தியஸமணப்³ராஹ்மணஸுத்தம்

276. ‘‘திஸ்ஸோ இமா, பி⁴க்க²வே, வேத³னா. கதமா திஸ்ஸோ? ஸுகா² வேத³னா, து³க்கா² வேத³னா, அது³க்க²மஸுகா² வேத³னா. யே ஹி கேசி, பி⁴க்க²வே, ஸமணா வா ப்³ராஹ்மணா வா இமாஸம் திஸ்ஸன்னம் வேத³னானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானந்தி…பே… பஜானந்தி…பே… ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. அட்ட²மம்.

9. ததியஸமணப்³ராஹ்மணஸுத்தம்

277. ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா வேத³னம் நப்பஜானந்தி, வேத³னாஸமுத³யம் நப்பஜானந்தி, வேத³னானிரோத⁴ம் நப்பஜானந்தி, வேத³னானிரோத⁴கா³மினிம் படிபத³ம் நப்பஜானந்தி…பே… பஜானந்தி…பே… ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. நவமம்.

10. ஸுத்³தி⁴கஸுத்தம்

278. ‘‘திஸ்ஸோ இமா, பி⁴க்க²வே, வேத³னா. கதமா திஸ்ஸோ? ஸுகா² வேத³னா, து³க்கா² வேத³னா, அது³க்க²மஸுகா² வேத³னா – இமா கோ², பி⁴க்க²வே, திஸ்ஸோ வேத³னா’’தி. த³ஸமம்.

11. நிராமிஸஸுத்தம்

279. ‘‘அத்தி², பி⁴க்க²வே, ஸாமிஸா பீதி, அத்தி² நிராமிஸா பீதி, அத்தி² நிராமிஸா நிராமிஸதரா பீதி; அத்தி² ஸாமிஸம் ஸுக²ம், அத்தி² நிராமிஸம் ஸுக²ம், அத்தி² நிராமிஸா நிராமிஸதரம் ஸுக²ம்; அத்தி² ஸாமிஸா உபேக்கா², அத்தி² நிராமிஸா உபேக்கா², அத்தி² நிராமிஸா நிராமிஸதரா உபேக்கா²; அத்தி² ஸாமிஸோ விமோக்கோ², அத்தி² நிராமிஸோ விமோக்கோ², அத்தி² நிராமிஸா நிராமிஸதரோ விமோக்கோ². கதமா ச, பி⁴க்க²வே, ஸாமிஸா பீதி? பஞ்சிமே, பி⁴க்க²வே, காமகு³ணா. கதமே பஞ்ச? சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா…பே… காயவிஞ்ஞேய்யா போ²ட்ட²ப்³பா³ இட்டா² கந்தா மனாபா பியரூபா காமூபஸம்ஹிதா ரஜனீயா. இமே கோ², பி⁴க்க²வே, பஞ்ச காமகு³ணா. யா கோ², பி⁴க்க²வே, இமே பஞ்ச காமகு³ணே படிச்ச உப்பஜ்ஜதி பீதி, அயம் வுச்சதி, பி⁴க்க²வே, ஸாமிஸா பீதி.

‘‘கதமா ச, பி⁴க்க²வே, நிராமிஸா பீதி? இத⁴, பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி. அயம் வுச்சதி, பி⁴க்க²வே, நிராமிஸா பீதி.

‘‘கதமா ச, பி⁴க்க²வே, நிராமிஸா நிராமிஸதரா பீதி? யா கோ², பி⁴க்க²வே, கீ²ணாஸவஸ்ஸ பி⁴க்கு²னோ ராகா³ சித்தம் விமுத்தம் பச்சவேக்க²தோ, தோ³ஸா சித்தம் விமுத்தம் பச்சவேக்க²தோ, மோஹா சித்தம் விமுத்தம் பச்சவேக்க²தோ உப்பஜ்ஜதி பீதி, அயம் வுச்சதி, பி⁴க்க²வே, நிராமிஸா நிராமிஸதரா பீதி.

‘‘கதமஞ்ச, பி⁴க்க²வே, ஸாமிஸம் ஸுக²ம்? பஞ்சிமே, பி⁴க்க²வே, காமகு³ணா. கதமே பஞ்ச? சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா…பே… காயவிஞ்ஞேய்யா போ²ட்ட²ப்³பா³ இட்டா² கந்தா மனாபா பியரூபா காமூபஸம்ஹிதா ரஜனீயா. இமே கோ², பி⁴க்க²வே, பஞ்ச காமகு³ணா. யம் கோ², பி⁴க்க²வே, இமே பஞ்ச காமகு³ணே படிச்ச உப்பஜ்ஜதி ஸுக²ம் ஸோமனஸ்ஸம், இத³ம் வுச்சதி, பி⁴க்க²வே, ஸாமிஸம் ஸுக²ம்.

‘‘கதமஞ்ச, பி⁴க்க²வே, நிராமிஸம் ஸுக²ம்? இத⁴, பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி. பீதியா ச விராகா³ உபேக்க²கோ ச விஹரதி ஸதோ ச ஸம்பஜானோ ஸுக²ஞ்ச காயேன படிஸம்வேதே³தி, யம் தம் அரியா ஆசிக்க²ந்தி – ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹரதி. இத³ம் வுச்சதி, பி⁴க்க²வே, நிராமிஸம் ஸுக²ம்.

‘‘கதமஞ்ச, பி⁴க்க²வே, நிராமிஸா நிராமிஸதரம் ஸுக²ம்? யம் கோ², பி⁴க்க²வே, கீ²ணாஸவஸ்ஸ பி⁴க்கு²னோ ராகா³ சித்தம் விமுத்தம் பச்சவேக்க²தோ, தோ³ஸா சித்தம் விமுத்தம் பச்சவேக்க²தோ, மோஹா சித்தம் விமுத்தம் பச்சவேக்க²தோ உப்பஜ்ஜதி ஸுக²ம் ஸோமனஸ்ஸம், இத³ம் வுச்சதி, பி⁴க்க²வே, நிராமிஸா நிராமிஸதரம் ஸுக²ம்.

‘‘கதமா ச, பி⁴க்க²வே, ஸாமிஸா உபேக்கா²? பஞ்சிமே, பி⁴க்க²வே, காமகு³ணா. கதமே பஞ்ச? சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா…பே… காயவிஞ்ஞேய்யா போ²ட்ட²ப்³பா³ இட்டா² கந்தா மனாபா பியரூபா காமூபஸம்ஹிதா ரஜனீயா. இமே கோ², பி⁴க்க²வே, பஞ்ச காமகு³ணா. யா கோ², பி⁴க்க²வே, இமே பஞ்ச காமகு³ணே படிச்ச உப்பஜ்ஜதி உபேக்கா², அயம் வுச்சதி, பி⁴க்க²வே, ஸாமிஸா உபேக்கா².

‘‘கதமா ச, பி⁴க்க²வே, நிராமிஸா உபேக்கா²? இத⁴, பி⁴க்க²வே, பி⁴க்கு² ஸுக²ஸ்ஸ ச பஹானா, து³க்க²ஸ்ஸ ச பஹானா, புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா, அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி. அயம் வுச்சதி, பி⁴க்க²வே, நிராமிஸா உபேக்கா².

‘‘கதமா ச, பி⁴க்க²வே, நிராமிஸா நிராமிஸதரா உபேக்கா²? யா கோ², பி⁴க்க²வே, கீ²ணாஸவஸ்ஸ பி⁴க்கு²னோ ராகா³ சித்தம் விமுத்தம் பச்சவேக்க²தோ, தோ³ஸா சித்தம் விமுத்தம் பச்சவேக்க²தோ, மோஹா சித்தம் விமுத்தம் பச்சவேக்க²தோ உப்பஜ்ஜதி உபேக்கா², அயம் வுச்சதி, பி⁴க்க²வே, நிராமிஸா நிராமிஸதரா உபேக்கா².

‘‘கதமோ ச, பி⁴க்க²வே, ஸாமிஸோ விமோக்கோ²? ரூபப்படிஸம்யுத்தோ விமோக்கோ² ஸாமிஸோ விமோக்கோ².

‘‘கதமோ ச, பி⁴க்க²வே, நிராமிஸோ விமோக்கோ²? அரூபப்படிஸம்யுத்தோ விமோக்கோ² நிராமிஸோ விமோக்கோ².

‘‘கதமோ ச, பி⁴க்க²வே, நிராமிஸா நிராமிஸதரோ விமோக்கோ²? யோ கோ², பி⁴க்க²வே, கீ²ணாஸவஸ்ஸ பி⁴க்கு²னோ ராகா³ சித்தம் விமுத்தம் பச்சவேக்க²தோ, தோ³ஸா சித்தம் விமுத்தம் பச்சவேக்க²தோ, மோஹா சித்தம் விமுத்தம் பச்சவேக்க²தோ உப்பஜ்ஜதி விமோக்கோ², அயம் வுச்சதி, பி⁴க்க²வே, நிராமிஸா நிராமிஸதரோ விமோக்கோ²’’தி. ஏகாத³ஸமம்.

அட்ட²ஸதபரியாயவக்³கோ³ ததியோ.

தஸ்ஸுத்³தா³னம் –

ஸீவகஅட்ட²ஸதம் பி⁴க்கு², புப்³பே³ ஞாணஞ்ச பி⁴க்கு²னா;

ஸமணப்³ராஹ்மணா தீணி, ஸுத்³தி⁴கஞ்ச நிராமிஸந்தி.

வேத³னாஸம்யுத்தம் ஸமத்தம்.