3. மாதுகா³மஸம்யுத்தம்

1. பட²மபேய்யாலவக்³கோ³

1. மாதுகா³மஸுத்தம்

280. ‘‘பஞ்சஹி, பி⁴க்க²வே, அங்கே³ஹி ஸமன்னாக³தோ மாதுகா³மோ ஏகந்தஅமனாபோ ஹோதி புரிஸஸ்ஸ. கதமேஹி பஞ்சஹி? ந ச ரூபவா ஹோதி, ந ச போ⁴க³வா ஹோதி, ந ச ஸீலவா ஹோதி, அலஸோ ச ஹோதி, பஜஞ்சஸ்ஸ ந லப⁴தி – இமேஹி கோ², பி⁴க்க²வே, பஞ்சஹி அங்கே³ஹி ஸமன்னாக³தோ மாதுகா³மோ ஏகந்தஅமனாபோ ஹோதி புரிஸஸ்ஸ. பஞ்சஹி, பி⁴க்க²வே, அங்கே³ஹி ஸமன்னாக³தோ மாதுகா³மோ ஏகந்தமனாபோ ஹோதி புரிஸஸ்ஸ. கதமேஹி பஞ்சஹி? ரூபவா ச ஹோதி, போ⁴க³வா ச ஹோதி, ஸீலவா ச ஹோதி, த³க்கோ² ச ஹோதி அனலஸோ, பஜஞ்சஸ்ஸ லப⁴தி – இமேஹி கோ², பி⁴க்க²வே, பஞ்சஹி அங்கே³ஹி ஸமன்னாக³தோ மாதுகா³மோ ஏகந்தமனாபோ ஹோதி புரிஸஸ்ஸா’’தி. பட²மம்.

2. புரிஸஸுத்தம்

281. ‘‘பஞ்சஹி, பி⁴க்க²வே, அங்கே³ஹி ஸமன்னாக³தோ புரிஸோ ஏகந்தஅமனாபோ ஹோதி மாதுகா³மஸ்ஸ. கதமேஹி பஞ்சஹி? ந ச ரூபவா ஹோதி, ந ச போ⁴க³வா ஹோதி, ந ச ஸீலவா ஹோதி, அலஸோ ச ஹோதி, பஜஞ்சஸ்ஸ ந லப⁴தி – இமேஹி கோ², பி⁴க்க²வே, பஞ்சஹி அங்கே³ஹி ஸமன்னாக³தோ புரிஸோ ஏகந்தஅமனாபோ ஹோதி மாதுகா³மஸ்ஸ. பஞ்சஹி, பி⁴க்க²வே, அங்கே³ஹி ஸமன்னாக³தோ புரிஸோ ஏகந்தமனாபோ ஹோதி மாதுகா³மஸ்ஸ. கதமேஹி பஞ்சஹி? ரூபவா ச ஹோதி, போ⁴க³வா ச ஹோதி, ஸீலவா ச ஹோதி, த³க்கோ² ச ஹோதி அனலஸோ, பஜஞ்சஸ்ஸ லப⁴தி – இமேஹி கோ², பி⁴க்க²வே, பஞ்சஹி அங்கே³ஹி ஸமன்னாக³தோ புரிஸோ ஏகந்தமனாபோ ஹோதி மாதுகா³மஸ்ஸா’’தி. து³தியம்.

3. ஆவேணிகது³க்க²ஸுத்தம்

282. ‘‘பஞ்சிமானி, பி⁴க்க²வே, மாதுகா³மஸ்ஸ ஆவேணிகானி து³க்கா²னி, யானி மாதுகா³மோ பச்சனுபோ⁴தி, அஞ்ஞத்ரேவ புரிஸேஹி. கதமானி பஞ்ச? இத⁴, பி⁴க்க²வே, மாதுகா³மோ த³ஹரோவ ஸமானோ பதிகுலம் க³ச்ச²தி, ஞாதகேஹி வினா ஹோதி. இத³ம், பி⁴க்க²வே, மாதுகா³மஸ்ஸ பட²மம் ஆவேணிகம் து³க்க²ம், யம் மாதுகா³மோ பச்சனுபோ⁴தி, அஞ்ஞத்ரேவ புரிஸேஹி. புன சபரம், பி⁴க்க²வே, மாதுகா³மோ உதுனீ ஹோதி. இத³ம், பி⁴க்க²வே, மாதுகா³மஸ்ஸ து³தியம் ஆவேணிகம் து³க்க²ம், யம் மாதுகா³மோ பச்சனுபோ⁴தி, அஞ்ஞத்ரேவ புரிஸேஹி. புன சபரம், பி⁴க்க²வே, மாதுகா³மோ க³ப்³பி⁴னீ ஹோதி. இத³ம், பி⁴க்க²வே, மாதுகா³மஸ்ஸ ததியம் ஆவேணிகம் து³க்க²ம், யம் மாதுகா³மோ பச்சனுபோ⁴தி, அஞ்ஞத்ரேவ புரிஸேஹி. புன சபரம், பி⁴க்க²வே, மாதுகா³மோ விஜாயதி. இத³ம், பி⁴க்க²வே, மாதுகா³மஸ்ஸ சதுத்த²ம் ஆவேணிகம் து³க்க²ம், யம் மாதுகா³மோ பச்சனுபோ⁴தி, அஞ்ஞத்ரேவ புரிஸேஹி. புன சபரம், பி⁴க்க²வே, மாதுகா³மோ புரிஸஸ்ஸ பாரிசரியம் உபேதி. இத³ம் கோ², பி⁴க்க²வே, மாதுகா³மஸ்ஸ பஞ்சமம் ஆவேணிகம் து³க்க²ம், யம் மாதுகா³மோ பச்சனுபோ⁴தி, அஞ்ஞத்ரேவ புரிஸேஹி. இமானி கோ², பி⁴க்க²வே, பஞ்ச மாதுகா³மஸ்ஸ ஆவேணிகானி து³க்கா²னி, யானி மாதுகா³மோ பச்சனுபோ⁴தி, அஞ்ஞத்ரேவ புரிஸேஹீ’’தி. ததியம்.

4. தீஹித⁴ம்மேஹிஸுத்தம்

283. ‘‘தீஹி, பி⁴க்க²வே, த⁴ம்மேஹி ஸமன்னாக³தோ மாதுகா³மோ யேபு⁴ய்யேன காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. கதமேஹி தீஹி? இத⁴, பி⁴க்க²வே, மாதுகா³மோ புப்³ப³ண்ஹஸமயம் மச்சே²ரமலபரியுட்டி²தேன சேதஸா அகா³ரம் அஜ்ஜா²வஸதி. மஜ்ஜ²ன்ஹிகஸமயம் இஸ்ஸாபரியுட்டி²தேன சேதஸா அகா³ரம் அஜ்ஜா²வஸதி. ஸாயன்ஹஸமயம் காமராக³பரியுட்டி²தேன சேதஸா அகா³ரம் அஜ்ஜா²வஸதி. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ மாதுகா³மோ யேபு⁴ய்யேன காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதீ’’தி. சதுத்த²ம்.

5. கோத⁴னஸுத்தம்

284. அத² கோ² ஆயஸ்மா அனுருத்³தோ⁴ யேன ப⁴க³வா தேனுபஸங்கமி; உபஸங்கமித்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா அனுருத்³தோ⁴ ப⁴க³வந்தம் ஏதத³வோச – ‘‘இதா⁴ஹம், ப⁴ந்தே, மாதுகா³மம் பஸ்ஸாமி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தம். கதீஹி நு கோ², ப⁴ந்தே, த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதீ’’தி?

‘‘பஞ்சஹி கோ², அனுருத்³த⁴, த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. கதமேஹி பஞ்சஹி? அஸ்ஸத்³தோ⁴ ச ஹோதி, அஹிரிகோ ச ஹோதி, அனோத்தப்பீ ச ஹோதி, கோத⁴னோ ச ஹோதி, து³ப்பஞ்ஞோ ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதீ’’தி. பஞ்சமம்.

6. உபனாஹீஸுத்தம்

285. ‘‘பஞ்சஹி, அனுருத்³த⁴, த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. கதமேஹி பஞ்சஹி? அஸ்ஸத்³தோ⁴ ச ஹோதி, அஹிரிகோ ச ஹோதி, அனோத்தப்பீ ச ஹோதி, உபனாஹீ ச ஹோதி, து³ப்பஞ்ஞோ ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதீ’’தி. ச²ட்ட²ம்.

7. இஸ்ஸுகீஸுத்தம்

286. ‘‘பஞ்சஹி, அனுருத்³த⁴, த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. கதமேஹி பஞ்சஹி? அஸ்ஸத்³தோ⁴ ச ஹோதி, அஹிரிகோ ச ஹோதி, அனோத்தப்பீ ச ஹோதி, இஸ்ஸுகீ ச ஹோதி, து³ப்பஞ்ஞோ ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதீ’’தி. ஸத்தமம்.

8. மச்ச²ரீஸுத்தம்

287. ‘‘பஞ்சஹி, அனுருத்³த⁴, த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. கதமேஹி பஞ்சஹி? அஸ்ஸத்³தோ⁴ ச ஹோதி, அஹிரிகோ ச ஹோதி, அனோத்தப்பீ ச ஹோதி, மச்ச²ரீ ச ஹோதி, து³ப்பஞ்ஞோ ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ…பே… அபாயம் து³க்³க³திம் வினிபாதம் நிரயம் உபபஜ்ஜதீ’’தி. அட்ட²மம்.

9. அதிசாரீஸுத்தம்

288. ‘‘பஞ்சஹி, அனுருத்³த⁴, த⁴ம்மேஹி ஸமன்னாக³தோ மாதுகா³மோ…பே… அபாயம் து³க்³க³திம் வினிபாதம் நிரயம் உபபஜ்ஜதி. கதமேஹி பஞ்சஹி? அஸ்ஸத்³தோ⁴ ச ஹோதி, அஹிரிகோ ச ஹோதி, அனோத்தப்பீ ச ஹோதி, அதிசாரீ ச ஹோதி, து³ப்பஞ்ஞோ ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ…பே… உபபஜ்ஜதீ’’தி. நவமம்.

10. து³ஸ்ஸீலஸுத்தம்

289. ‘‘பஞ்சஹி, அனுருத்³த⁴, த⁴ம்மேஹி ஸமன்னாக³தோ மாதுகா³மோ…பே… நிரயம் உபபஜ்ஜதி. கதமேஹி பஞ்சஹி? அஸ்ஸத்³தோ⁴ ச ஹோதி, அஹிரிகோ ச ஹோதி, அனோத்தப்பீ ச ஹோதி, து³ஸ்ஸீலோ ச ஹோதி, து³ப்பஞ்ஞோ ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ…பே… நிரயம் உபபஜ்ஜதீ’’தி. த³ஸமம்.

11. அப்பஸ்ஸுதஸுத்தம்

290. ‘‘பஞ்சஹி, அனுருத்³த⁴, த⁴ம்மேஹி ஸமன்னாக³தோ மாதுகா³மோ…பே… நிரயம் உபபஜ்ஜதி. கதமேஹி பஞ்சஹி? அஸ்ஸத்³தோ⁴ ச ஹோதி, அஹிரிகோ ச ஹோதி, அனோத்தப்பீ ச ஹோதி, அப்பஸ்ஸுதோ ச ஹோதி, து³ப்பஞ்ஞோ ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ…பே… நிரயம் உபபஜ்ஜதீ’’தி. ஏகாத³ஸமம்.

12. குஸீதஸுத்தம்

291. ‘‘பஞ்சஹி, அனுருத்³த⁴, த⁴ம்மேஹி ஸமன்னாக³தோ மாதுகா³மோ…பே… நிரயம் உபபஜ்ஜதி. கதமேஹி பஞ்சஹி? அஸ்ஸத்³தோ⁴ ச ஹோதி, அஹிரிகோ ச ஹோதி, அனோத்தப்பீ ச ஹோதி, குஸீதோ ச ஹோதி, து³ப்பஞ்ஞோ ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ…பே… அபாயம் து³க்³க³திம் வினிபாதம் நிரயம் உபபஜ்ஜதீ’’தி. த்³வாத³ஸமம்.

13. முட்ட²ஸ்ஸதிஸுத்தம்

292. ‘‘பஞ்சஹி, அனுருத்³த⁴, த⁴ம்மேஹி ஸமன்னாக³தோ மாதுகா³மோ…பே… நிரயம் உபபஜ்ஜதி. கதமேஹி பஞ்சஹி? அஸ்ஸத்³தோ⁴ ச ஹோதி, அஹிரிகோ ச ஹோதி, அனோத்தப்பீ ச ஹோதி, முட்ட²ஸ்ஸதி ச ஹோதி, து³ப்பஞ்ஞோ ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ…பே… நிரயம் உபபஜ்ஜதீ’’தி. தேரஸமம்.

14. பஞ்சவேரஸுத்தம்

293. ‘‘பஞ்சஹி, அனுருத்³த⁴, த⁴ம்மேஹி ஸமன்னாக³தோ மாதுகா³மோ…பே… நிரயம் உபபஜ்ஜதி. கதமேஹி பஞ்சஹி? பாணாதிபாதீ ச ஹோதி, அதி³ன்னாதா³யீ ச ஹோதி, காமேஸுமிச்சா²சாரீ ச ஹோதி, முஸாவாதீ³ ச ஹோதி, ஸுராமேரயமஜ்ஜப்பமாத³ட்டா²யீ ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதீ’’தி. சுத்³த³ஸமம்.

பட²மபேய்யாலவக்³கோ³.

தஸ்ஸுத்³தா³னம் –

மாதுகா³மோ புரிஸோ ச, ஆவேணிகா தித⁴ம்மோ ச [த்³வே மனாபாமனாபாச, ஆவேணிகா தீஹி அனுருத்³தோ⁴ (ஸப்³ப³த்த²)];

கோத⁴னோ உபனாஹீ ச, இஸ்ஸுகீ மச்ச²ரேன ச;

அதிசாரீ ச து³ஸ்ஸீலோ, அப்பஸ்ஸுதோ ச குஸீதோ;

முட்ட²ஸ்ஸதி பஞ்சவேரம், கண்ஹபக்கே² பகாஸிதோ.

2. து³தியபேய்யாலவக்³கோ³

1. அக்கோத⁴னஸுத்தம்

294. அத² கோ² ஆயஸ்மா அனுருத்³தோ⁴ யேன ப⁴க³வா தேனுபஸங்கமி; உபஸங்கமித்வா…பே… ஏகமந்தம் நிஸின்னோ கோ² ஆயஸ்மா அனுருத்³தோ⁴ ப⁴க³வந்தம் ஏதத³வோச – ‘‘இதா⁴ஹம், ப⁴ந்தே, மாதுகா³மம் பஸ்ஸாமி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தம். கதீஹி நு கோ², ப⁴ந்தே, த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதீ’’தி?

‘‘பஞ்சஹி கோ², அனுருத்³த⁴, த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. கதமேஹி பஞ்சஹி? ஸத்³தோ⁴ ச ஹோதி, ஹிரிமா ச ஹோதி, ஓத்தப்பீ ச ஹோதி, அக்கோத⁴னோ ச ஹோதி, பஞ்ஞவா ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதீ’’தி. பட²மம்.

2. அனுபனாஹீஸுத்தம்

295. ‘‘பஞ்சஹி, அனுருத்³த⁴, த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. கதமேஹி பஞ்சஹி? ஸத்³தோ⁴ ச ஹோதி, ஹிரிமா ச ஹோதி, ஓத்தப்பீ ச ஹோதி, அனுபனாஹீ ச ஹோதி, பஞ்ஞவா ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதீ’’தி. து³தியம்.

3. அனிஸ்ஸுகீஸுத்தம்

296. ‘‘பஞ்சஹி, அனுருத்³த⁴, த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. கதமேஹி பஞ்சஹி? ஸத்³தோ⁴ ச ஹோதி, ஹிரிமா ச ஹோதி, ஓத்தப்பீ ச ஹோதி, அனிஸ்ஸுகீ ச ஹோதி, பஞ்ஞவா ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதீ’’தி. ததியம்.

4. அமச்ச²ரீஸுத்தம்

297. அமச்ச²ரீ ச ஹோதி, பஞ்ஞவா ச ஹோதி…பே…. சதுத்த²ம்.

5. அனதிசாரீஸுத்தம்

298. அனதிசாரீ ச ஹோதி, பஞ்ஞவா ச ஹோதி…பே…. பஞ்சமம்.

6. ஸுஸீலஸுத்தம்

299. ஸீலவா ச ஹோதி, பஞ்ஞவா ச ஹோதி…பே…. ச²ட்ட²ம்.

7. ப³ஹுஸ்ஸுதஸுத்தம்

300. ப³ஹுஸ்ஸுதோ ச ஹோதி, பஞ்ஞவா ச ஹோதி…பே…. ஸத்தமம்.

8. ஆரத்³த⁴வீரியஸுத்தம்

301. ஆரத்³த⁴வீரியோ ச ஹோதி, பஞ்ஞவா ச ஹோதி…பே…. அட்ட²மம்.

9. உபட்டி²தஸ்ஸதிஸுத்தம்

302. ‘‘உபட்டி²தஸ்ஸதி ச ஹோதி, பஞ்ஞவா ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதீ’’தி. நவமம்.

இமே அட்ட² ஸுத்தந்தஸங்கே²பா.

10. பஞ்சஸீலஸுத்தம்

303. ‘‘பஞ்சஹி, அனுருத்³த⁴, த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. கதமேஹி பஞ்சஹி? பாணாதிபாதா படிவிரதோ ச ஹோதி, அதி³ன்னாதா³னா படிவிரதோ ச ஹோதி, காமேஸுமிச்சா²சாரா படிவிரதோ ச ஹோதி, முஸாவாதா³ படிவிரதோ ச ஹோதி, ஸுராமேரயமஜ்ஜப்பமாத³ட்டா²னா படிவிரதோ ச ஹோதி – இமேஹி கோ², அனுருத்³த⁴, பஞ்சஹி த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதீ’’தி. த³ஸமம்.

து³தியபேய்யாலவக்³கோ³.

தஸ்ஸுத்³தா³னம் –

து³தியே ச [அனுருத்³தோ⁴ (ஸப்³ப³த்த²)] அக்கோத⁴னோ, அனுபனாஹீ அனிஸ்ஸுகீ;

அமச்ச²ரீ அனதிசாரீ, ஸீலவா ச ப³ஹுஸ்ஸுதோ;

வீரியம் ஸதி ஸீலஞ்ச, ஸுக்கபக்கே² பகாஸிதோ.

3. ப³லவக்³கோ³

1. விஸாரத³ஸுத்தம்

304. ‘‘பஞ்சிமானி, பி⁴க்க²வே, மாதுகா³மஸ்ஸ ப³லானி. கதமானி பஞ்ச? ரூபப³லம், போ⁴க³ப³லம், ஞாதிப³லம், புத்தப³லம், ஸீலப³லம் – இமானி கோ², பி⁴க்க²வே, பஞ்ச மாதுகா³மஸ்ஸ ப³லானி. இமேஹி கோ², பி⁴க்க²வே, பஞ்சஹி ப³லேஹி ஸமன்னாக³தோ மாதுகா³மோ விஸாரதோ³ அகா³ரம் அஜ்ஜா²வஸதீ’’தி. பட²மம்.

2. பஸய்ஹஸுத்தம்

305. ‘‘பஞ்சிமானி, பி⁴க்க²வே, மாதுகா³மஸ்ஸ ப³லானி. கதமானி பஞ்ச? ரூபப³லம், போ⁴க³ப³லம், ஞாதிப³லம், புத்தப³லம், ஸீலப³லம் – இமானி கோ², பி⁴க்க²வே, பஞ்ச மாதுகா³மஸ்ஸ ப³லானி. இமேஹி கோ², பி⁴க்க²வே, பஞ்சஹி ப³லேஹி ஸமன்னாக³தோ மாதுகா³மோ ஸாமிகம் பஸய்ஹ அகா³ரம் அஜ்ஜா²வஸதீ’’தி. து³தியம்.

3. அபி⁴பு⁴ய்யஸுத்தம்

306. ‘‘பஞ்சிமானி, பி⁴க்க²வே, மாதுகா³மஸ்ஸ ப³லானி. கதமானி பஞ்ச? ரூபப³லம், போ⁴க³ப³லம், ஞாதிப³லம், புத்தப³லம், ஸீலப³லம் – இமானி கோ², பி⁴க்க²வே, பஞ்ச மாதுகா³மஸ்ஸ ப³லானி. இமேஹி கோ², பி⁴க்க²வே, பஞ்சஹி ப³லேஹி ஸமன்னாக³தோ மாதுகா³மோ ஸாமிகம் அபி⁴பு⁴ய்ய வத்ததீ’’தி. ததியம்.

4. ஏகஸுத்தம்

307. ‘‘ஏகேன ச கோ², பி⁴க்க²வே, ப³லேன ஸமன்னாக³தோ புரிஸோ மாதுகா³மம் அபி⁴பு⁴ய்ய வத்ததி. கதமேன ஏகேன ப³லேன? இஸ்ஸரியப³லேன அபி⁴பூ⁴தம் மாதுகா³மம் நேவ ரூபப³லம் தாயதி, ந போ⁴க³ப³லம் தாயதி, ந ஞாதிப³லம் தாயதி, ந புத்தப³லம் தாயதி, ந ஸீலப³லம் தாயதீ’’தி. சதுத்த²ம்.

5. அங்க³ஸுத்தம்

308. ‘‘பஞ்சிமானி, பி⁴க்க²வே, மாதுகா³மஸ்ஸ ப³லானி. கதமானி பஞ்ச? ரூபப³லம், போ⁴க³ப³லம், ஞாதிப³லம், புத்தப³லம், ஸீலப³லம். ரூபப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, ந ச போ⁴க³ப³லேன – ஏவம் ஸோ தேனங்கே³ன அபரிபூரோ ஹோதி. யதோ ச கோ², பி⁴க்க²வே, மாதுகா³மோ ரூபப³லேன ச ஸமன்னாக³தோ ஹோதி, போ⁴க³ப³லேன ச – ஏவம் ஸோ தேனங்கே³ன பரிபூரோ ஹோதி. ரூபப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, போ⁴க³ப³லேன ச, ந ச ஞாதிப³லேன – ஏவம் ஸோ தேனங்கே³ன அபரிபூரோ ஹோதி. யதோ ச கோ², பி⁴க்க²வே, மாதுகா³மோ ரூபப³லேன ச ஸமன்னாக³தோ ஹோதி, போ⁴க³ப³லேன ச, ஞாதிப³லேன ச – ஏவம் ஸோ தேனங்கே³ன பரிபூரோ ஹோதி. ரூபப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, போ⁴க³ப³லேன ச, ஞாதிப³லேன ச, ந ச புத்தப³லேன – ஏவம் ஸோ தேனங்கே³ன அபரிபூரோ ஹோதி. யதோ ச கோ², பி⁴க்க²வே, மாதுகா³மோ ரூபப³லேன ச ஸமன்னாக³தோ ஹோதி, போ⁴க³ப³லேன ச, ஞாதிப³லேன ச, புத்தப³லேன ச – ஏவம் ஸோ தேனங்கே³ன பரிபூரோ ஹோதி. ரூபப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, போ⁴க³ப³லேன ச, ஞாதிப³லேன ச, புத்தப³லேன ச, ந ச ஸீலப³லேன – ஏவம் ஸோ தேனங்கே³ன அபரிபூரோ ஹோதி. யதோ ச கோ², பி⁴க்க²வே, மாதுகா³மோ ரூபப³லேன ச ஸமன்னாக³தோ ஹோதி, போ⁴க³ப³லேன ச, ஞாதிப³லேன ச, புத்தப³லேன ச, ஸீலப³லேன ச – ஏவம் ஸோ தேனங்கே³ன பரிபூரோ ஹோதி. இமானி கோ², பி⁴க்க²வே, பஞ்ச மாதுகா³மஸ்ஸ ப³லானீ’’தி. பஞ்சமம்.

6. நாஸேந்திஸுத்தம்

309. ‘‘பஞ்சிமானி, பி⁴க்க²வே, மாதுகா³மஸ்ஸ ப³லானி. கதமானி பஞ்ச? ரூபப³லம், போ⁴க³ப³லம், ஞாதிப³லம், புத்தப³லம், ஸீலப³லம். ரூபப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, ந ச ஸீலப³லேன, நாஸேந்தேவ நம், குலே ந வாஸேந்தி. ரூபப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, போ⁴க³ப³லேன ச, ந ச ஸீலப³லேன, நாஸேந்தேவ நம், குலே ந வாஸேந்தி. ரூபப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, போ⁴க³ப³லேன ச, ஞாதிப³லேன ச, ந ச ஸீலப³லேன, நாஸேந்தேவ நம், குலே ந வாஸேந்தி. ரூபப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, போ⁴க³ப³லேன ச, ஞாதிப³லேன ச, புத்தப³லேன ச, ந ச ஸீலப³லேன, நாஸேந்தேவ நம், குலே ந வாஸேந்தி. ஸீலப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, ந ச ரூபப³லேன, வாஸேந்தேவ நம், குலே ந நாஸேந்தி. ஸீலப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, ந ச போ⁴க³ப³லேன, வாஸேந்தேவ நம், குலே ந நாஸேந்தி. ஸீலப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, ந ச ஞாதிப³லேன, வாஸேந்தேவ நம், குலே ந நாஸேந்தி. ஸீலப³லேன ச, பி⁴க்க²வே, மாதுகா³மோ ஸமன்னாக³தோ ஹோதி, ந ச புத்தப³லேன, வாஸேந்தேவ நம், குலே ந நாஸேந்தி. இமானி கோ², பி⁴க்க²வே, பஞ்ச மாதுகா³மஸ்ஸ ப³லானீ’’தி. ச²ட்ட²ம்.

7. ஹேதுஸுத்தம்

310. ‘‘பஞ்சிமானி, பி⁴க்க²வே, மாதுகா³மஸ்ஸ ப³லானி. கதமானி பஞ்ச? ரூபப³லம், போ⁴க³ப³லம், ஞாதிப³லம், புத்தப³லம், ஸீலப³லம். ந, பி⁴க்க²வே, மாதுகா³மோ ரூபப³லஹேது வா போ⁴க³ப³லஹேது வா ஞாதிப³லஹேது வா புத்தப³லஹேது வா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. ஸீலப³லஹேது கோ², பி⁴க்க²வே, மாதுகா³மோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. இமானி கோ², பி⁴க்க²வே, பஞ்ச மாதுகா³மஸ்ஸ ப³லானீ’’தி. ஸத்தமம்.

8. டா²னஸுத்தம்

311. ‘‘பஞ்சிமானி, பி⁴க்க²வே, டா²னானி து³ல்லபா⁴னி அகதபுஞ்ஞேன மாதுகா³மேன. கதமானி பஞ்ச? பதிரூபே குலே ஜாயேய்யந்தி – இத³ம், பி⁴க்க²வே, பட²மம் டா²னம் து³ல்லப⁴ம் அகதபுஞ்ஞேன மாதுகா³மேன. பதிரூபே குலே ஜாயித்வா பதிரூபம் குலம் க³ச்சே²ய்யந்தி – இத³ம், பி⁴க்க²வே, து³தியம் டா²னம் து³ல்லப⁴ம் அகதபுஞ்ஞேன மாதுகா³மேன. பதிரூபே குலே ஜாயித்வா, பதிரூபம் குலம் க³ந்த்வா, அஸபத்தி அகா³ரம் அஜ்ஜா²வஸேய்யந்தி – இத³ம், பி⁴க்க²வே, ததியம் டா²னம் து³ல்லப⁴ம் அகதபுஞ்ஞேன மாதுகா³மேன. பதிரூபே குலே ஜாயித்வா, பதிரூபம் குலம் க³ந்த்வா, அஸபத்தி அகா³ரம் அஜ்ஜா²வஸந்தீ புத்தவதீ அஸ்ஸந்தி – இத³ம், பி⁴க்க²வே, சதுத்த²ம் டா²னம் து³ல்லப⁴ம் அகதபுஞ்ஞேன மாதுகா³மேன. பதிரூபே குலே ஜாயித்வா, பதிரூபம் குலம் க³ந்த்வா, அஸபத்தி அகா³ரம் அஜ்ஜா²வஸந்தீ புத்தவதீ ஸமானா ஸாமிகம் அபி⁴பு⁴ய்ய வத்தேய்யந்தி – இத³ம், பி⁴க்க²வே, பஞ்சமம் டா²னம் து³ல்லப⁴ம் அகதபுஞ்ஞேன மாதுகா³மேன. இமானி கோ², பி⁴க்க²வே, பஞ்ச டா²னானி து³ல்லபா⁴னி அகதபுஞ்ஞேன மாதுகா³மேனாதி.

‘‘பஞ்சிமானி, பி⁴க்க²வே, டா²னானி ஸுலபா⁴னி கதபுஞ்ஞேன மாதுகா³மேன. கதமானி பஞ்ச? பதிரூபே குலே ஜாயேய்யந்தி – இத³ம், பி⁴க்க²வே, பட²மம் டா²னம் ஸுலப⁴ம் கதபுஞ்ஞேன மாதுகா³மேன. பதிரூபே குலே ஜாயித்வா பதிரூபம் குலம் க³ச்சே²ய்யந்தி – இத³ம், பி⁴க்க²வே, து³தியம் டா²னம் ஸுலப⁴ம் கதபுஞ்ஞேன மாதுகா³மேன. பதிரூபே குலே ஜாயித்வா பதிரூபம் குலம் க³ந்த்வா அஸபத்தி அகா³ரம் அஜ்ஜா²வஸேய்யந்தி – இத³ம், பி⁴க்க²வே, ததியம் டா²னம் ஸுலப⁴ம் கதபுஞ்ஞேன மாதுகா³மேன. பதிரூபே குலே ஜாயித்வா பதிரூபம் குலம் க³ந்த்வா அஸபத்தி அகா³ரம் அஜ்ஜா²வஸந்தீ புத்தவதீ அஸ்ஸந்தி – இத³ம், பி⁴க்க²வே, சதுத்த²ம் டா²னம் ஸுலப⁴ம் கதபுஞ்ஞேன மாதுகா³மேன. பதிரூபே குலே ஜாயித்வா பதிரூபம் குலம் க³ந்த்வா அஸபத்தி அகா³ரம் அஜ்ஜா²வஸந்தீ புத்தவதீ ஸமானா ஸாமிகம் அபி⁴பு⁴ய்ய வத்தேய்யந்தி – இத³ம், பி⁴க்க²வே, பஞ்சமம் டா²னம் ஸுலப⁴ம் கதபுஞ்ஞேன மாதுகா³மேன. இமானி கோ², பி⁴க்க²வே, பஞ்ச டா²னானி ஸுலபா⁴னி கதபுஞ்ஞேன மாதுகா³மேனா’’தி. அட்ட²மம்.

9. பஞ்சஸீலவிஸாரத³ஸுத்தம்

312. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ மாதுகா³மோ விஸாரதோ³ அகா³ரம் அஜ்ஜா²வஸதி. கதமேஹி பஞ்சஹி? பாணாதிபாதா படிவிரதோ ச ஹோதி, அதி³ன்னாதா³னா படிவிரதோ ச ஹோதி, காமேஸுமிச்சா²சாரா படிவிரதோ ச ஹோதி, முஸாவாதா³ படிவிரதோ ச ஹோதி, ஸுராமேரயமஜ்ஜப்பமாத³ட்டா²னா படிவிரதோ ச ஹோதி – இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ மாதுகா³மோ விஸாரதோ³ அகா³ரம் அஜ்ஜா²வஸதீ’’தி. நவமம்.

10. வட்³டீ⁴ஸுத்தம்

313. ‘‘பஞ்சஹி, பி⁴க்க²வே, வட்³டீ⁴ஹி வட்³ட⁴மானா அரியஸாவிகா அரியாய வட்³டி⁴யா வட்³ட⁴தி ஸாராதா³யினீ ச ஹோதி வராதா³யினீ ச காயஸ்ஸ. கதமேஹி பஞ்சஹி? ஸத்³தா⁴ய வட்³ட⁴தி, ஸீலேன வட்³ட⁴தி, ஸுதேன வட்³ட⁴தி, சாகே³ன வட்³ட⁴தி, பஞ்ஞாய வட்³ட⁴தி – இமேஹி கோ², பி⁴க்க²வே, பஞ்சஹி வட்³டீ⁴ஹி வட்³ட⁴மானா அரியஸாவிகா அரியாய வட்³டி⁴யா வட்³ட⁴தி, ஸாராதா³யினீ ச ஹோதி, வராதா³யினீ ச காயஸ்ஸா’’தி.

‘‘ஸத்³தா⁴ய ஸீலேன ச யாத⁴ வட்³ட⁴தி,

பஞ்ஞாய சாகே³ன ஸுதேன சூப⁴யம்;

ஸா தாதி³ஸீ ஸீலவதீ உபாஸிகா,

ஆதீ³யதி ஸாரமிதே⁴வ அத்தனோ’’தி. த³ஸமம்;

ப³லவக்³கோ³ ததியோ.

தஸ்ஸுத்³தா³னம் –

விஸாரதா³ பஸய்ஹ அபி⁴பு⁴ய்ய, ஏகம் அங்கே³ன பஞ்சமம்;

நாஸேந்தி ஹேது டா²னஞ்ச, விஸாரதோ³ வட்³டி⁴னா த³ஸாதி.

மாதுகா³மஸம்யுத்தம் ஸமத்தம்.