4. ஜம்பு³கா²த³கஸம்யுத்தம்

1. நிப்³பா³னபஞ்ஹாஸுத்தம்

314. ஏகம் ஸமயம் ஆயஸ்மா ஸாரிபுத்தோ மக³தே⁴ஸு விஹரதி நாலககா³மகே. அத² கோ² ஜம்பு³கா²த³கோ பரிப்³பா³ஜகோ யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மதா ஸாரிபுத்தேன ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஜம்பு³கா²த³கோ பரிப்³பா³ஜகோ ஆயஸ்மந்தம் ஸாரிபுத்தம் ஏதத³வோச –

‘‘‘நிப்³பா³னம், நிப்³பா³ன’ந்தி, ஆவுஸோ ஸாரிபுத்த, வுச்சதி. கதமம் நு கோ², ஆவுஸோ, நிப்³பா³ன’’ந்தி? ‘‘யோ கோ², ஆவுஸோ, ராக³க்க²யோ தோ³ஸக்க²யோ மோஹக்க²யோ – இத³ம் வுச்சதி நிப்³பா³ன’’ந்தி. ‘‘அத்தி² பனாவுஸோ, மக்³கோ³ அத்தி² படிபதா³ ஏதஸ்ஸ நிப்³பா³னஸ்ஸ ஸச்சி²கிரியாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³ ஏதஸ்ஸ நிப்³பா³னஸ்ஸ ஸச்சி²கிரியாயா’’தி. ‘‘கதமோ பனாவுஸோ, மக்³கோ³ கதமா படிபதா³ ஏதஸ்ஸ நிப்³பா³னஸ்ஸ ஸச்சி²கிரியாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³ ஏதஸ்ஸ நிப்³பா³னஸ்ஸ ஸச்சி²கிரியாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³ ஏதஸ்ஸ நிப்³பா³னஸ்ஸ ஸச்சி²கிரியாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³ ஏதஸ்ஸ நிப்³பா³னஸ்ஸ ஸச்சி²கிரியாய. அலஞ்ச பனாவுஸோ ஸாரிபுத்த, அப்பமாதா³யா’’தி. பட²மம்.

2. அரஹத்தபஞ்ஹாஸுத்தம்

315. ‘‘‘அரஹத்தம், அரஹத்த’ந்தி, ஆவுஸோ ஸாரிபுத்த, வுச்சதி. கதமம் நு கோ², ஆவுஸோ, அரஹத்த’’ந்தி? ‘‘யோ கோ², ஆவுஸோ, ராக³க்க²யோ தோ³ஸக்க²யோ மோஹக்க²யோ – இத³ம் வுச்சதி அரஹத்த’’ந்தி. ‘‘அத்தி² பனாவுஸோ, மக்³கோ³ அத்தி² படிபதா³ ஏதஸ்ஸ அரஹத்தஸ்ஸ ஸச்சி²கிரியாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³ ஏதஸ்ஸ அரஹத்தஸ்ஸ ஸச்சி²கிரியாயா’’தி. ‘‘கதமோ பனாவுஸோ, மக்³கோ³ கதமா படிபதா³ ஏதஸ்ஸ அரஹத்தஸ்ஸ ஸச்சி²கிரியாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³ ஏதஸ்ஸ அரஹத்தஸ்ஸ ஸச்சி²கிரியாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ² ஆவுஸோ, மக்³கோ³, அயம் படிபதா³ ஏதஸ்ஸ அரஹத்தஸ்ஸ ஸச்சி²கிரியாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³ ஏதஸ்ஸ அரஹத்தஸ்ஸ ஸச்சி²கிரியாய. அலஞ்ச பனாவுஸோ ஸாரிபுத்த, அப்பமாதா³யா’’தி. து³தியம்.

3. த⁴ம்மவாதீ³பஞ்ஹாஸுத்தம்

316. ‘‘கே நு கோ², ஆவுஸோ ஸாரிபுத்த, லோகே த⁴ம்மவாதி³னோ, கே லோகே ஸுப்படிபன்னா, கே லோகே ஸுக³தா’’தி? ‘‘யே கோ², ஆவுஸோ, ராக³ப்பஹானாய த⁴ம்மம் தே³ஸேந்தி, தோ³ஸப்பஹானாய த⁴ம்மம் தே³ஸேந்தி, மோஹப்பஹானாய த⁴ம்மம் தே³ஸேந்தி, தே லோகே த⁴ம்மவாதி³னோ. யே கோ², ஆவுஸோ, ராக³ஸ்ஸ பஹானாய படிபன்னா, தோ³ஸஸ்ஸ பஹானாய படிபன்னா, மோஹஸ்ஸ பஹானாய படிபன்னா, தே லோகே ஸுப்படிபன்னா. யேஸம் கோ², ஆவுஸோ, ராகோ³ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிம் அனுப்பாத³த⁴ம்மோ, தோ³ஸோ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிம் அனுப்பாத³த⁴ம்மோ, மோஹோ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிம் அனுப்பாத³த⁴ம்மோ, தே லோகே ஸுக³தா’’தி.

‘‘அத்தி² பனாவுஸோ, மக்³கோ³ அத்தி² படிபதா³ ஏதஸ்ஸ ராக³ஸ்ஸ தோ³ஸஸ்ஸ மோஹஸ்ஸ பஹானாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³ ஏதஸ்ஸ ராக³ஸ்ஸ தோ³ஸஸ்ஸ மோஹஸ்ஸ பஹானாயா’’தி. ‘‘கதமோ, பனாவுஸோ, மக்³கோ³ கதமா படிபதா³ ஏதஸ்ஸ ராக³ஸ்ஸ தோ³ஸஸ்ஸ மோஹஸ்ஸ பஹானாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³ ஏதஸ்ஸ ராக³ஸ்ஸ தோ³ஸஸ்ஸ மோஹஸ்ஸ பஹானாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³ ஏதஸ்ஸ ராக³ஸ்ஸ தோ³ஸஸ்ஸ மோஹஸ்ஸ பஹானாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதஸ்ஸ ராக³ஸ்ஸ தோ³ஸஸ்ஸ மோஹஸ்ஸ பஹானாய. அலஞ்ச பனாவுஸோ ஸாரிபுத்த, அப்பமாதா³யா’’தி. ததியம்.

4. கிமத்தி²யஸுத்தம்

317. ‘‘கிமத்தி²யம், ஆவுஸோ ஸாரிபுத்த, ஸமணே கோ³தமே ப்³ரஹ்மசரியம் வுஸ்ஸதீ’’தி? ‘‘து³க்க²ஸ்ஸ கோ², ஆவுஸோ, பரிஞ்ஞத்த²ம் ப⁴க³வதி ப்³ரஹ்மசரியம் வுஸ்ஸதீ’’தி. ‘‘அத்தி² பனாவுஸோ, மக்³கோ³ அத்தி² படிபதா³ ஏதஸ்ஸ து³க்க²ஸ்ஸ பரிஞ்ஞாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதஸ்ஸ து³க்க²ஸ்ஸ பரிஞ்ஞாயா’’தி? ‘‘கதமோ பனாவுஸோ, மக்³கோ³ கதமா படிபதா³, ஏதஸ்ஸ து³க்க²ஸ்ஸ பரிஞ்ஞாயா’’தி?

‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³, ஏதஸ்ஸ து³க்க²ஸ்ஸ பரிஞ்ஞாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³ ஏதஸ்ஸ து³க்க²ஸ்ஸ பரிஞ்ஞாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதஸ்ஸ து³க்க²ஸ்ஸ பரிஞ்ஞாய. அலஞ்ச பனாவுஸோ ஸாரிபுத்த, அப்பமாதா³யா’’தி. சதுத்த²ம்.

5. அஸ்ஸாஸப்பத்தஸுத்தம்

318. ‘‘‘அஸ்ஸாஸப்பத்தோ, அஸ்ஸாஸப்பத்தோ’தி, ஆவுஸோ ஸாரிபுத்த, வுச்சதி. கித்தாவதா நு கோ², ஆவுஸோ, அஸ்ஸாஸப்பத்தோ ஹோதீ’’தி? ‘‘யதோ கோ², ஆவுஸோ, பி⁴க்கு² ச²ன்னம் ப²ஸ்ஸாயதனானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானாதி, ஏத்தாவதா கோ², ஆவுஸோ, அஸ்ஸாஸப்பத்தோ ஹோதீ’’தி. ‘‘அத்தி² பனாவுஸோ, மக்³கோ³ அத்தி² படிபதா³, ஏதஸ்ஸ அஸ்ஸாஸஸ்ஸ ஸச்சி²கிரியாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதஸ்ஸ அஸ்ஸாஸஸ்ஸ ஸச்சி²கிரியாயா’’தி. ‘‘கதமோ பனாவுஸோ, மக்³கோ³ கதமா படிபதா³, ஏதஸ்ஸ அஸ்ஸாஸஸ்ஸ ஸச்சி²கிரியாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³ ஏதஸ்ஸ அஸ்ஸாஸஸ்ஸ ஸச்சி²கிரியாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³, ஏதஸ்ஸ அஸ்ஸாஸஸ்ஸ ஸச்சி²கிரியாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதஸ்ஸ அஸ்ஸாஸஸ்ஸ ஸச்சி²கிரியாய. அலஞ்ச பனாவுஸோ ஸாரிபுத்த, அப்பமாதா³யா’’தி. பஞ்சமம்.

6. பரமஸ்ஸாஸப்பத்தஸுத்தம்

319. ‘‘‘பரமஸ்ஸாஸப்பத்தோ, பரமஸ்ஸாஸப்பத்தோ’தி, ஆவுஸோ ஸாரிபுத்த, வுச்சதி. கித்தாவதா நு கோ², ஆவுஸோ, பரமஸ்ஸாஸப்பத்தோ ஹோதீ’’தி? ‘‘யதோ கோ², ஆவுஸோ, பி⁴க்கு² ச²ன்னம் ப²ஸ்ஸாயதனானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் விதி³த்வா அனுபாதா³விமுத்தோ ஹோதி, ஏத்தாவதா கோ², ஆவுஸோ, பரமஸ்ஸாஸப்பத்தோ ஹோதீ’’தி. ‘‘அத்தி² பனாவுஸோ, மக்³கோ³ அத்தி² படிபதா³, ஏதஸ்ஸ பரமஸ்ஸாஸஸ்ஸ ஸச்சி²கிரியாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதஸ்ஸ பரமஸ்ஸாஸஸ்ஸ ஸச்சி²கிரியாயா’’தி. ‘‘கதமோ பன, ஆவுஸோ, மக்³கோ³ கதமா படிபதா³, ஏதஸ்ஸ பரமஸ்ஸாஸஸ்ஸ ஸச்சி²கிரியாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³ ஏதஸ்ஸ பரமஸ்ஸாஸஸ்ஸ ஸச்சி²கிரியாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³, ஏதஸ்ஸ பரமஸ்ஸாஸஸ்ஸ ஸச்சி²கிரியாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதஸ்ஸ பரமஸ்ஸாஸஸ்ஸ ஸச்சி²கிரியாய. அலஞ்ச பனாவுஸோ ஸாரிபுத்த, அப்பமாதா³யா’’தி. ச²ட்ட²ம்.

7. வேத³னாபஞ்ஹாஸுத்தம்

320. ‘‘‘வேத³னா, வேத³னா’தி, ஆவுஸோ ஸாரிபுத்த, வுச்சதி. கதமா நு கோ², ஆவுஸோ, வேத³னா’’தி? ‘‘திஸ்ஸோ இமாவுஸோ, வேத³னா. கதமா திஸ்ஸோ? ஸுகா² வேத³னா, து³க்கா² வேத³னா, அது³க்க²மஸுகா² வேத³னா – இமா கோ², ஆவுஸோ, திஸ்ஸோ வேத³னா’’தி. ‘‘அத்தி² பனாவுஸோ, மக்³கோ³ அத்தி² படிபதா³, ஏதாஸம் திஸ்ஸன்னம் வேத³னானம் பரிஞ்ஞாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதாஸம் திஸ்ஸன்னம் வேத³னானம் பரிஞ்ஞாயா’’தி. ‘‘கதமோ பனாவுஸோ, மக்³கோ³ கதமா படிபதா³, ஏதாஸம் திஸ்ஸன்னம் வேத³னானம் பரிஞ்ஞாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³, ஏதாஸம் திஸ்ஸன்னம் வேத³னானம் பரிஞ்ஞாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³, ஏதாஸம் திஸ்ஸன்னம் வேத³னானம் பரிஞ்ஞாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதாஸம் திஸ்ஸன்னம் வேத³னானம் பரிஞ்ஞாய. அலஞ்ச பனாவுஸோ ஸாரிபுத்த, அப்பமாதா³யா’’தி. ஸத்தமம்.

8. ஆஸவபஞ்ஹாஸுத்தம்

321. ‘‘‘ஆஸவோ, ஆஸவோ’தி, ஆவுஸோ ஸாரிபுத்த, வுச்சதி. கதமோ நு கோ², ஆவுஸோ, ஆஸவோ’’தி? ‘‘தயோ மே, ஆவுஸோ, ஆஸவா. காமாஸவோ, ப⁴வாஸவோ, அவிஜ்ஜாஸவோ – இமே கோ², ஆவுஸோ, தயோ ஆஸவா’’தி. ‘‘அத்தி² பனாவுஸோ, மக்³கோ³ அத்தி² படிபதா³ ஏதேஸம் ஆஸவானம் பஹானாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³ ஏதேஸம் ஆஸவானம் பஹானாயா’’தி. ‘‘கதமோ பனாவுஸோ, மக்³கோ³ கதமா படிபதா³ ஏதேஸம் ஆஸவானம் பஹானாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³ ஏதேஸம் ஆஸவானம் பஹானாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³, ஏதேஸம் ஆஸவானம் பஹானாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதேஸம் ஆஸவானம் பஹானாய. அலஞ்ச பனாவுஸோ ஸாரிபுத்த, அப்பமாதா³யா’’தி. அட்ட²மம்.

9. அவிஜ்ஜாபஞ்ஹாஸுத்தம்

322. ‘‘‘அவிஜ்ஜா, அவிஜ்ஜா’தி, ஆவுஸோ ஸாரிபுத்த, வுச்சதி. கதமா நு கோ², ஆவுஸோ, அவிஜ்ஜா’’தி? ‘‘யம் கோ², ஆவுஸோ, து³க்கே² அஞ்ஞாணம், து³க்க²ஸமுத³யே அஞ்ஞாணம், து³க்க²னிரோதே⁴ அஞ்ஞாணம், து³க்க²னிரோத⁴கா³மினியா படிபதா³ய அஞ்ஞாணம் – அயம் வுச்சதாவுஸோ, அவிஜ்ஜா’’தி. ‘‘அத்தி² பனாவுஸோ, மக்³கோ³ அத்தி² படிபதா³, ஏதிஸ்ஸா அவிஜ்ஜாய பஹானாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதிஸ்ஸா அவிஜ்ஜாய பஹானாயா’’தி. ‘‘கதமோ பனாவுஸோ, மக்³கோ³ கதமா படிபதா³, ஏதிஸ்ஸா அவிஜ்ஜாய பஹானாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³, ஏதிஸ்ஸா அவிஜ்ஜாய பஹானாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³, ஏதிஸ்ஸா அவிஜ்ஜாய பஹானாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதிஸ்ஸா அவிஜ்ஜாய பஹானாய. அலஞ்ச பனாவுஸோ ஸாரிபுத்த, அப்பமாதா³யா’’தி. நவமம்.

10. தண்ஹாபஞ்ஹாஸுத்தம்

323. ‘‘‘தண்ஹா, தண்ஹா’தி, ஆவுஸோ ஸாரிபுத்த, வுச்சதி. கதமா நு கோ², ஆவுஸோ, தண்ஹா’’தி? ‘‘திஸ்ஸோ இமா, ஆவுஸோ, தண்ஹா. காமதண்ஹா, ப⁴வதண்ஹா, விப⁴வதண்ஹா – இமா கோ², ஆவுஸோ, திஸ்ஸோ தண்ஹா’’தி. ‘‘அத்தி² பனாவுஸோ, மக்³கோ³ அத்தி² படிபதா³, ஏதாஸம் தண்ஹானம் பஹானாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதாஸம் தண்ஹானம் பஹானாயா’’தி. ‘‘கதமோ பனாவுஸோ, மக்³கோ³ கதமா படிபதா³, ஏதாஸம் தண்ஹானம் பஹானாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³, ஏதாஸம் தண்ஹானம் பஹானாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³, ஏதாஸம் தண்ஹானம் பஹானாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதாஸம் தண்ஹானம் பஹானாய. அலஞ்ச பனாவுஸோ ஸாரிபுத்த, அப்பமாதா³யா’’தி. த³ஸமம்.

11. ஓக⁴பஞ்ஹாஸுத்தம்

324. ‘‘‘ஓகோ⁴, ஓகோ⁴’தி, ஆவுஸோ ஸாரிபுத்த, வுச்சதி. கதமோ நு கோ², ஆவுஸோ, ஓகோ⁴’’தி? ‘‘சத்தாரோமே, ஆவுஸோ, ஓகா⁴. காமோகோ⁴, ப⁴வோகோ⁴, தி³ட்டோ²கோ⁴, அவிஜ்ஜோகோ⁴ – இமே கோ², ஆவுஸோ, சத்தாரோ ஓகா⁴’’தி. ‘‘அத்தி² பனாவுஸோ, மக்³கோ³ அத்தி² படிபதா³, ஏதேஸம் ஓகா⁴னம் பஹானாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதேஸம் ஓகா⁴னம் பஹானாயா’’தி. ‘‘கதமோ பனாவுஸோ, மக்³கோ³ கதமா படிபதா³, ஏதேஸம் ஓகா⁴னம் பஹானாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³, ஏதேஸம் ஓகா⁴னம் பஹானாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³, ஏதேஸம் ஓகா⁴னம் பஹானாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதேஸம் ஓகா⁴னம் பஹானாய. அலஞ்ச பனாவுஸோ ஸாரிபுத்த, அப்பமாதா³யா’’தி. ஏகாத³ஸமம்.

12. உபாதா³னபஞ்ஹாஸுத்தம்

325. ‘‘‘உபாதா³னம், உபாதா³ன’ந்தி, ஆவுஸோ ஸாரிபுத்த, வுச்சதி. கதமம் நு கோ², ஆவுஸோ, உபாதா³ன’’ந்தி? ‘‘சத்தாரிமானி, ஆவுஸோ, உபாதா³னானி. காமுபாதா³னம், தி³ட்டு²பாதா³னம் ஸீலப்³ப³துபாதா³னம், அத்தவாது³பாதா³னம் – இமானி கோ², ஆவுஸோ, சத்தாரி உபாதா³னானீ’’தி. ‘‘அத்தி² பனாவுஸோ, மக்³கோ³ அத்தி² படிபதா³, ஏதேஸம் உபாதா³னானம் பஹானாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதேஸம் உபாதா³னானம் பஹானாயா’’தி. ‘‘கதமோ பனாவுஸோ, மக்³கோ³ கதமா படிபதா³, ஏதேஸம் உபாதா³னானம் பஹானாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³, ஏதேஸம் உபாதா³னானம் பஹானாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³, ஏதேஸம் உபாதா³னானம் பஹானாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதேஸம் உபாதா³னானம் பஹானாய. அலஞ்ச பனாவுஸோ ஸாரிபுத்த, அப்பமாதா³யா’’தி. த்³வாத³ஸமம்.

13. ப⁴வபஞ்ஹாஸுத்தம்

326. ‘‘‘ப⁴வோ, ப⁴வோ’தி, ஆவுஸோ ஸாரிபுத்த, வுச்சதி. கதமோ நு கோ², ஆவுஸோ, ப⁴வோ’’தி? ‘‘தயோ மே, ஆவுஸோ, ப⁴வா. காமப⁴வோ, ரூபப⁴வோ, அரூபப⁴வோ – இமே கோ², ஆவுஸோ, தயோ ப⁴வா’’தி. ‘‘அத்தி² பனாவுஸோ, மக்³கோ³ அத்தி² படிபதா³, ஏதேஸம் ப⁴வானம் பரிஞ்ஞாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதேஸம் ப⁴வானம் பரிஞ்ஞாயா’’தி. ‘‘கதமோ, பனாவுஸோ, மக்³கோ³ கதமா படிபதா³, ஏதேஸம் ப⁴வானம் பரிஞ்ஞாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³, ஏதேஸம் ப⁴வானம் பரிஞ்ஞாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³, ஏதேஸம் ப⁴வானம் பரிஞ்ஞாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதேஸம் ப⁴வானம் பரிஞ்ஞாய. அலஞ்ச பனாவுஸோ ஸாரிபுத்த, அப்பமாதா³யா’’தி. தேரஸமம்.

14. து³க்க²பஞ்ஹாஸுத்தம்

327. ‘‘‘து³க்க²ம், து³க்க²’ந்தி, ஆவுஸோ ஸாரிபுத்த, வுச்சதி. கதமம் நு கோ², ஆவுஸோ, து³க்க²’’ந்தி? ‘‘திஸ்ஸோ இமா, ஆவுஸோ, து³க்க²தா. து³க்க²து³க்க²தா, ஸங்கா²ரது³க்க²தா, விபரிணாமது³க்க²தா – இமா கோ², ஆவுஸோ, திஸ்ஸோ து³க்க²தா’’தி. ‘‘அத்தி² பனாவுஸோ மக்³கோ³ அத்தி² படிபதா³, ஏதாஸம் து³க்க²தானம் பரிஞ்ஞாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதாஸம் து³க்க²தானம் பரிஞ்ஞாயா’’தி. ‘‘கதமோ பனாவுஸோ, மக்³கோ³ கதமா படிபதா³, ஏதாஸம் து³க்க²தானம் பரிஞ்ஞாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³, ஏதாஸம் து³க்க²தானம் பரிஞ்ஞாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³, ஏதாஸம் து³க்க²தானம் பரிஞ்ஞாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதாஸம் து³க்க²தானம் பரிஞ்ஞாய. அலஞ்ச பனாவுஸோ ஸாரிபுத்த, அப்பமாதா³யா’’தி. சுத்³த³ஸமம்.

15. ஸக்காயபஞ்ஹாஸுத்தம்

328. ‘‘‘ஸக்காயோ, ஸக்காயோ’தி, ஆவுஸோ ஸாரிபுத்த, வுச்சதி. கதமோ நு கோ², ஆவுஸோ, ஸக்காயோ’’தி? ‘‘பஞ்சிமே, ஆவுஸோ, உபாதா³னக்க²ந்தா⁴ ஸக்காயோ வுத்தோ ப⁴க³வதா, ஸேய்யதி²த³ம் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴. இமே கோ², ஆவுஸோ, பஞ்சுபாதா³னக்க²ந்தா⁴ ஸக்காயோ வுத்தோ ப⁴க³வதா’’தி. ‘‘அத்தி² பனாவுஸோ, மக்³கோ³ அத்தி² படிபதா³, ஏதஸ்ஸ ஸக்காயஸ்ஸ பரிஞ்ஞாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதஸ்ஸ ஸக்காயஸ்ஸ பரிஞ்ஞாயா’’தி. ‘‘கதமோ பனாவுஸோ, மக்³கோ³ கதமா படிபதா³, ஏதஸ்ஸ ஸக்காயஸ்ஸ பரிஞ்ஞாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³, ஏதஸ்ஸ ஸக்காயஸ்ஸ பரிஞ்ஞாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³, ஏதஸ்ஸ ஸக்காயஸ்ஸ பரிஞ்ஞாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதஸ்ஸ ஸக்காயஸ்ஸ பரிஞ்ஞாய. அலஞ்ச பனாவுஸோ ஸாரிபுத்த, அப்பமாதா³யா’’தி. பன்னரஸமம்.

16. து³க்கரபஞ்ஹாஸுத்தம்

329. ‘‘கிம் நு கோ², ஆவுஸோ ஸாரிபுத்த, இமஸ்மிம் த⁴ம்மவினயே து³க்கர’’ந்தி? ‘‘பப்³ப³ஜ்ஜா கோ², ஆவுஸோ, இமஸ்மிம் த⁴ம்மவினயே து³க்கரா’’தி. ‘‘பப்³ப³ஜிதேன பனாவுஸோ, கிம் து³க்கர’’ந்தி? ‘‘பப்³ப³ஜிதேன கோ², ஆவுஸோ, அபி⁴ரதி து³க்கரா’’தி. ‘‘அபி⁴ரதேன பனாவுஸோ, கிம் து³க்கர’’ந்தி? ‘‘அபி⁴ரதேன கோ², ஆவுஸோ, த⁴ம்மானுத⁴ம்மப்படிபத்தி து³க்கரா’’தி. ‘‘கீவசிரம் பனாவுஸோ, த⁴ம்மானுத⁴ம்மப்படிபன்னோ பி⁴க்கு² அரஹம் அஸ்ஸா’’தி? ‘‘நசிரம், ஆவுஸோ’’தி. ஸோளஸமம்.

ஜம்பு³கா²த³கஸம்யுத்தம் ஸமத்தம்.