1. ஸகா³தா²வக்³கோ³

1. ஸமாதி⁴ஸுத்தம்

249. ‘‘திஸ்ஸோ இமா, பி⁴க்க²வே, வேத³னா. கதமா திஸ்ஸோ? ஸுகா² வேத³னா, து³க்கா² வேத³னா, அது³க்க²மஸுகா² வேத³னா – இமா கோ², பி⁴க்க²வே, திஸ்ஸோ வேத³னாதி.

‘‘ஸமாஹிதோ ஸம்பஜானோ, ஸதோ பு³த்³த⁴ஸ்ஸ ஸாவகோ;

வேத³னா ச பஜானாதி, வேத³னானஞ்ச ஸம்ப⁴வம்.

‘‘யத்த² சேதா நிருஜ்ஜ²ந்தி, மக்³க³ஞ்ச க²யகா³மினம்;

வேத³னானம் க²யா பி⁴க்கு², நிச்சா²தோ பரினிப்³பு³தோ’’தி. பட²மம்;

2. ஸுக²ஸுத்தம்

250. ‘‘திஸ்ஸோ இமா, பி⁴க்க²வே, வேத³னா. கதமா திஸ்ஸோ? ஸுகா² வேத³னா, து³க்கா² வேத³னா, அது³க்க²மஸுகா² வேத³னா – இமா கோ², பி⁴க்க²வே, திஸ்ஸோ வேத³னாதி.

‘‘ஸுக²ம் வா யதி³ வா து³க்க²ம், அது³க்க²மஸுக²ம் ஸஹ;

அஜ்ஜ²த்தஞ்ச ப³ஹித்³தா⁴ ச, யம் கிஞ்சி அத்தி² வேதி³தம்.

‘‘ஏதம் து³க்க²ந்தி ஞத்வான, மோஸத⁴ம்மம் பலோகினம்;

பு²ஸ்ஸ பு²ஸ்ஸ வயம் பஸ்ஸம், ஏவம் தத்த² விரஜ்ஜதீ’’தி. து³தியம்;

3. பஹானஸுத்தம்

251. ‘‘திஸ்ஸோ இமா, பி⁴க்க²வே, வேத³னா. கதமா திஸ்ஸோ? ஸுகா² வேத³னா, து³க்கா² வேத³னா, அது³க்க²மஸுகா² வேத³னா. ஸுகா²ய, பி⁴க்க²வே, வேத³னாய ராகா³னுஸயோ பஹாதப்³போ³, து³க்கா²ய வேத³னாய படிகா⁴னுஸயோ பஹாதப்³போ³, அது³க்க²மஸுகா²ய வேத³னாய அவிஜ்ஜானுஸயோ பஹாதப்³போ³. யதோ கோ², பி⁴க்க²வே, பி⁴க்கு²னோ ஸுகா²ய வேத³னாய ராகா³னுஸயோ பஹீனோ ஹோதி, து³க்கா²ய வேத³னாய படிகா⁴னுஸயோ பஹீனோ ஹோதி, அது³க்க²மஸுகா²ய வேத³னாய அவிஜ்ஜானுஸயோ பஹீனோ ஹோதி, அயம் வுச்சதி, பி⁴க்க²வே, ‘பி⁴க்கு² நிரனுஸயோ ஸம்மத்³த³ஸோ அச்சே²ச்சி² [அச்சே²ஜ்ஜி (ப³ஹூஸு)] தண்ஹம், விவத்தயி [வாவத்தயி (ஸீ.)] ஸம்யோஜனம், ஸம்மா மானாபி⁴ஸமயா அந்தமகாஸி து³க்க²ஸ்ஸா’’’தி.

‘‘ஸுக²ம் வேத³யமானஸ்ஸ [வேதி³யமானஸ்ஸ (ஸீ. பீ.)], வேத³னம் அப்பஜானதோ;

ஸோ ராகா³னுஸயோ ஹோதி, அனிஸ்ஸரணத³ஸ்ஸினோ.

‘‘து³க்க²ம் வேத³யமானஸ்ஸ, வேத³னம் அப்பஜானதோ;

படிகா⁴னுஸயோ ஹோதி, அனிஸ்ஸரணத³ஸ்ஸினோ.

‘‘அது³க்க²மஸுக²ம் ஸந்தம், பூ⁴ரிபஞ்ஞேன தே³ஸிதம்;

தஞ்சாபி அபி⁴னந்த³தி, நேவ து³க்கா² பமுச்சதி.

‘‘யதோ ச பி⁴க்கு² ஆதாபீ, ஸம்பஜஞ்ஞம் ந ரிஞ்சதி;

ததோ ஸோ வேத³னா ஸப்³பா³, பரிஜானாதி பண்டி³தோ.

‘‘ஸோ வேத³னா பரிஞ்ஞாய, தி³ட்டே² த⁴ம்மே அனாஸவோ;

காயஸ்ஸ பே⁴தா³ த⁴ம்மட்டோ², ஸங்க்²யம் நோபேதி வேத³கூ³’’தி. ததியம்;

4. பாதாலஸுத்தம்

252. ‘‘அஸ்ஸுதவா, பி⁴க்க²வே, புது²ஜ்ஜனோ யம் வாசம் பா⁴ஸதி – ‘அத்தி² மஹாஸமுத்³தே³ பாதாலோ’தி. தம் கோ² பனேதம், பி⁴க்க²வே, அஸ்ஸுதவா புது²ஜ்ஜனோ அஸந்தம் அவிஜ்ஜமானம் ஏவம் வாசம் பா⁴ஸதி – ‘அத்தி² மஹாஸமுத்³தே³ பாதாலோ’தி. ஸாரீரிகானம் கோ² ஏதம், பி⁴க்க²வே, து³க்கா²னம் வேத³னானம் அதி⁴வசனம் யதி³த³ம் ‘பாதாலோ’தி. அஸ்ஸுதவா, பி⁴க்க²வே, புது²ஜ்ஜனோ ஸாரீரிகாய து³க்கா²ய வேத³னாய பு²ட்டோ² ஸமானோ ஸோசதி கிலமதி பரிதே³வதி உரத்தாளிம் கந்த³தி ஸம்மோஹம் ஆபஜ்ஜதி. அயம் வுச்சதி, பி⁴க்க²வே, ‘அஸ்ஸுதவா புது²ஜ்ஜனோ பாதாலே ந பச்சுட்டா²ஸி, கா³த⁴ஞ்ச நாஜ்ஜ²கா³’. ஸுதவா ச கோ², பி⁴க்க²வே, அரியஸாவகோ ஸாரீரிகாய து³க்கா²ய வேத³னாய பு²ட்டோ² ஸமானோ நேவ ஸோசதி, ந கிலமதி, ந பரிதே³வதி, ந உரத்தாளிம் கந்த³தி, ந ஸம்மோஹம் ஆபஜ்ஜதி. அயம் வுச்சதி, பி⁴க்க²வே, ‘ஸுதவா அரியஸாவகோ பாதாலே பச்சுட்டா²ஸி, கா³த⁴ஞ்ச அஜ்ஜ²கா³’’’தி.

‘‘யோ ஏதா நாதி⁴வாஸேதி, உப்பன்னா வேத³னா து³கா²;

ஸாரீரிகா பாணஹரா, யாஹி பு²ட்டோ² பவேத⁴தி.

‘‘அக்கந்த³தி பரோத³தி, து³ப்³ப³லோ அப்பதா²மகோ;

ந ஸோ பாதாலே பச்சுட்டா²ஸி, அதோ² கா³த⁴ம்பி நாஜ்ஜ²கா³.

‘‘யோ சேதா அதி⁴வாஸேதி, உப்பன்னா வேத³னா து³கா²;

ஸாரீரிகா பாணஹரா, யாஹி பு²ட்டோ² ந வேத⁴தி;

ஸ வே பாதாலே பச்சுட்டா²ஸி, அதோ² கா³த⁴ம்பி அஜ்ஜ²கா³’’தி. சதுத்த²ம்;

5. த³ட்ட²ப்³ப³ஸுத்தம்

253. ‘‘திஸ்ஸோ இமா, பி⁴க்க²வே, வேத³னா. கதமா திஸ்ஸோ? ஸுகா² வேத³னா, து³க்கா² வேத³னா, அது³க்க²மஸுகா² வேத³னா. ஸுகா², பி⁴க்க²வே, வேத³னா து³க்க²தோ த³ட்ட²ப்³பா³, து³க்கா² வேத³னா ஸல்லதோ த³ட்ட²ப்³பா³, அது³க்க²மஸுகா² வேத³னா அனிச்சதோ த³ட்ட²ப்³பா³. யதோ கோ², பி⁴க்க²வே, பி⁴க்கு²னோ ஸுகா² வேத³னா து³க்க²தோ தி³ட்டா² ஹோதி, து³க்கா² வேத³னா ஸல்லதோ தி³ட்டா² ஹோதி, அது³க்க²மஸுகா² வேத³னா அனிச்சதோ தி³ட்டா² ஹோதி – அயம் வுச்சதி, பி⁴க்க²வே, ‘பி⁴க்கு² ஸம்மத்³த³ஸோ அச்சே²ச்சி² தண்ஹம், விவத்தயி ஸம்யோஜனம், ஸம்மா மானாபி⁴ஸமயா அந்தமகாஸி து³க்க²ஸ்ஸா’’’தி.

‘‘யோ ஸுக²ம் து³க்க²தோ அத்³த³, து³க்க²மத்³த³க்கி² ஸல்லதோ;

அது³க்க²மஸுக²ம் ஸந்தம், அத்³த³க்கி² நம் அனிச்சதோ.

‘‘ஸ வே ஸம்மத்³த³ஸோ பி⁴க்கு², பரிஜானாதி வேத³னா;

ஸோ வேத³னா பரிஞ்ஞாய, தி³ட்டே² த⁴ம்மே அனாஸவோ;

காயஸ்ஸ பே⁴தா³ த⁴ம்மட்டோ², ஸங்க்²யம் நோபேதி வேத³கூ³’’தி. பஞ்சமம்;

6. ஸல்லஸுத்தம்

254. ‘‘அஸ்ஸுதவா, பி⁴க்க²வே, புது²ஜ்ஜனோ ஸுக²ம்பி வேத³னம் வேத³யதி [வேதி³யதி (ஸீ. பீ.)], து³க்க²ம்பி வேத³னம் வேத³யதி, அது³க்க²மஸுக²ம்பி வேத³னம் வேத³யதி. ஸுதவா, பி⁴க்க²வே, அரியஸாவகோ ஸுக²ம்பி வேத³னம் வேத³யதி, து³க்க²ம்பி வேத³னம் வேத³யதி, அது³க்க²மஸுக²ம்பி வேத³னம் வேத³யதி. தத்ர, பி⁴க்க²வே, கோ விஸேஸோ கோ அதி⁴ப்பயாஸோ [அதி⁴ப்பாயோ (ஸீ. க.), அதி⁴ப்பாயஸோ (ஸ்யா. கம்.), அதி⁴ப்பாயோஸோ (பீ.)] கிம் நானாகரணம் ஸுதவதோ அரியஸாவகஸ்ஸ அஸ்ஸுதவதா புது²ஜ்ஜனேனா’’தி? ப⁴க³வம்மூலகா நோ, ப⁴ந்தே, த⁴ம்மா…பே… அஸ்ஸுதவா. பி⁴க்க²வே, புது²ஜ்ஜனோ து³க்கா²ய வேத³னாய பு²ட்டோ² ஸமானோ ஸோசதி கிலமதி பரிதே³வதி உரத்தாளிம் கந்த³தி ஸம்மோஹம் ஆபஜ்ஜதி. ஸோ த்³வே வேத³னா வேத³யதி – காயிகஞ்ச, சேதஸிகஞ்ச. ஸேய்யதா²பி, பி⁴க்க²வே, புரிஸம் ஸல்லேன விஜ்ஜே²ய்ய [ஸல்லேன அனுவிஜ்ஜே²ய்யும் (ஸீ. ஸ்யா. கம். பீ.)]. தமேனம் து³தியேன ஸல்லேன அனுவேத⁴ம் விஜ்ஜே²ய்ய [ஸல்லேன அனுவிஜ்ஜே²ய்யும் (ஸீ.), ஸல்லேன அனுவேத⁴ம் விஜ்ஜே²ய்யும் (ஸ்யா. கம்.), ஸல்லேன விஜ்ஜே²ய்யும் (பீ.)]. ஏவஞ்ஹி ஸோ, பி⁴க்க²வே, புரிஸோ த்³விஸல்லேன வேத³னம் வேத³யதி. ஏவமேவ கோ², பி⁴க்க²வே, அஸ்ஸுதவா புது²ஜ்ஜனோ து³க்கா²ய வேத³னாய பு²ட்டோ² ஸமானோ ஸோசதி கிலமதி பரிதே³வதி உரத்தாளிம் கந்த³தி ஸம்மோஹம் ஆபஜ்ஜதி. ஸோ த்³வே வேத³னா வேத³யதி – காயிகஞ்ச, சேதஸிகஞ்ச. தஸ்ஸாயேவ கோ² பன து³க்கா²ய வேத³னாய பு²ட்டோ² ஸமானோ படிக⁴வா ஹோதி. தமேனம் து³க்கா²ய வேத³னாய படிக⁴வந்தம், யோ து³க்கா²ய வேத³னாய படிகா⁴னுஸயோ, ஸோ அனுஸேதி. ஸோ து³க்கா²ய வேத³னாய பு²ட்டோ² ஸமானோ காமஸுக²ம் அபி⁴னந்த³தி. தம் கிஸ்ஸ ஹேது? ந ஹி ஸோ, பி⁴க்க²வே, பஜானாதி அஸ்ஸுதவா புது²ஜ்ஜனோ அஞ்ஞத்ர காமஸுகா² து³க்கா²ய வேத³னாய நிஸ்ஸரணம், தஸ்ஸ காமஸுக²ஞ்ச அபி⁴னந்த³தோ, யோ ஸுகா²ய வேத³னாய ராகா³னுஸயோ, ஸோ அனுஸேதி. ஸோ தாஸம் வேத³னானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாதி. தஸ்ஸ தாஸம் வேத³னானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் அப்பஜானதோ, யோ அது³க்க²மஸுகா²ய வேத³னாய அவிஜ்ஜானுஸயோ, ஸோ அனுஸேதி. ஸோ ஸுக²ஞ்சே வேத³னம் வேத³யதி, ஸஞ்ஞுத்தோ நம் வேத³யதி. து³க்க²ஞ்சே வேத³னம் வேத³யதி, ஸஞ்ஞுத்தோ நம் வேத³யதி. அது³க்க²மஸுக²ஞ்சே வேத³னம் வேத³யதி, ஸஞ்ஞுத்தோ நம் வேத³யதி. அயம் வுச்சதி, பி⁴க்க²வே, ‘அஸ்ஸுதவா புது²ஜ்ஜனோ ஸஞ்ஞுத்தோ ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, ஸஞ்ஞுத்தோ து³க்க²ஸ்மா’தி வதா³மி.

‘‘ஸுதவா ச கோ², பி⁴க்க²வே, அரியஸாவகோ து³க்கா²ய வேத³னாய பு²ட்டோ² ஸமானோ ந ஸோசதி, ந கிலமதி, ந பரிதே³வதி, ந உரத்தாளிம் கந்த³தி, ந ஸம்மோஹம் ஆபஜ்ஜதி. ஸோ ஏகம் வேத³னம் வேத³யதி – காயிகம், ந சேதஸிகம்.

‘‘ஸேய்யதா²பி, பி⁴க்க²வே, புரிஸம் ஸல்லேன விஜ்ஜே²ய்ய. தமேனம் து³தியேன ஸல்லேன அனுவேத⁴ம் ந விஜ்ஜே²ய்ய. ஏவஞ்ஹி ஸோ, பி⁴க்க²வே, புரிஸோ ஏகஸல்லேன வேத³னம் வேத³யதி. ஏவமேவ கோ², பி⁴க்க²வே, ஸுதவா அரியஸாவகோ து³க்கா²ய வேத³னாய பு²ட்டோ² ஸமானோ ந ஸோசதி, ந கிலமதி, ந பரிதே³வதி, ந உரத்தாளிம் கந்த³தி, ந ஸம்மோஹம் ஆபஜ்ஜதி. ஸோ ஏகம் வேத³னம் வேத³யதி – காயிகம், ந சேதஸிகம். தஸ்ஸாயேவ கோ² பன து³க்கா²ய வேத³னாய பு²ட்டோ² ஸமானோ படிக⁴வா ந ஹோதி. தமேனம் து³க்கா²ய வேத³னாய அப்படிக⁴வந்தம், யோ து³க்கா²ய வேத³னாய படிகா⁴னுஸயோ, ஸோ நானுஸேதி. ஸோ து³க்கா²ய வேத³னாய பு²ட்டோ² ஸமானோ காமஸுக²ம் நாபி⁴னந்த³தி. தம் கிஸ்ஸ ஹேது? பஜானாதி ஹி ஸோ, பி⁴க்க²வே, ஸுதவா அரியஸாவகோ அஞ்ஞத்ர காமஸுகா² து³க்கா²ய வேத³னாய நிஸ்ஸரணம். தஸ்ஸ காமஸுக²ம் நாபி⁴னந்த³தோ யோ ஸுகா²ய வேத³னாய ராகா³னுஸயோ, ஸோ நானுஸேதி. ஸோ தாஸம் வேத³னானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவம் ச நிஸ்ஸரணஞ்ச யதா²பூ⁴தம் பஜானாதி. தஸ்ஸ தாஸம் வேத³னானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானதோ, யோ அது³க்க²மஸுகா²ய வேத³னாய அவிஜ்ஜானுஸயோ, ஸோ நானுஸேதி. ஸோ ஸுக²ஞ்சே வேத³னம் வேத³யதி, விஸஞ்ஞுத்தோ நம் வேத³யதி. து³க்க²ஞ்சே வேத³னம் வேத³யதி, விஸஞ்ஞுத்தோ நம் வேத³யதி. அது³க்க²மஸுக²ஞ்சே வேத³னம் வேத³யதி, விஸஞ்ஞுத்தோ நம் வேத³யதி. அயம் வுச்சதி, பி⁴க்க²வே, ‘ஸுதவா அரியஸாவகோ விஸஞ்ஞுத்தோ ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, விஸஞ்ஞுத்தோ து³க்க²ஸ்மா’தி வதா³மி. அயம் கோ², பி⁴க்க²வே, விஸேஸோ, அயம் அதி⁴ப்பயாஸோ, இத³ம் நானாகரணம் ஸுதவதோ அரியஸாவகஸ்ஸ அஸ்ஸுதவதா புது²ஜ்ஜனேனா’’தி.

‘‘ந வேத³னம் வேத³யதி ஸபஞ்ஞோ,

ஸுக²ம்பி து³க்க²ம்பி ப³ஹுஸ்ஸுதோபி;

அயஞ்ச தீ⁴ரஸ்ஸ புது²ஜ்ஜனேன,

மஹா [அயம் (ஸ்யா. கம். க.)] விஸேஸோ குஸலஸ்ஸ ஹோதி.

‘‘ஸங்கா²தத⁴ம்மஸ்ஸ ப³ஹுஸ்ஸுதஸ்ஸ,

விபஸ்ஸதோ [ஸம்பஸ்ஸதோ (ஸீ. பீ.)] லோகமிமம் பரஞ்ச;

இட்ட²ஸ்ஸ த⁴ம்மா ந மதே²ந்தி சித்தம்,

அனிட்ட²தோ நோ படிகா⁴தமேதி.

‘‘தஸ்ஸானுரோதா⁴ அத²வா விரோதா⁴,

விதூ⁴பிதா அத்த²க³தா ந ஸந்தி;

பத³ஞ்ச ஞத்வா விரஜம் அஸோகம்,

ஸம்மா பஜானாதி ப⁴வஸ்ஸ பாரகூ³’’தி. ச²ட்ட²ம்;

7. பட²மகே³லஞ்ஞஸுத்தம்

255. ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ யேன கி³லானஸாலா தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி –

‘‘ஸதோ, பி⁴க்க²வே, பி⁴க்கு² ஸம்பஜானோ காலம் ஆக³மேய்ய. அயம் வோ அம்ஹாகம் அனுஸாஸனீ.

‘‘கத²ஞ்ச, பி⁴க்க²வே, பி⁴க்கு² ஸதோ ஹோதி? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்; வேத³னாஸு வேத³னானுபஸ்ஸீ விஹரதி…பே… சித்தே சித்தானுபஸ்ஸீ விஹரதி…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். ஏவம் கோ², பி⁴க்க²வே, பி⁴க்கு² ஸதோ ஹோதி.

‘‘கத²ஞ்ச, பி⁴க்க²வே, பி⁴க்கு² ஸம்பஜானோ ஹோதி? இத⁴, பி⁴க்க²வே, பி⁴க்கு² அபி⁴க்கந்தே படிக்கந்தே ஸம்பஜானகாரீ ஹோதி, ஆலோகிதே விலோகிதே ஸம்பஜானகாரீ ஹோதி, ஸமிஞ்ஜிதே பஸாரிதே ஸம்பஜானகாரீ ஹோதி, ஸங்கா⁴டிபத்தசீவரதா⁴ரணே ஸம்பஜானகாரீ ஹோதி, அஸிதே பீதே கா²யிதே ஸாயிதே ஸம்பஜானகாரீ ஹோதி, உச்சாரபஸ்ஸாவகம்மே ஸம்பஜானகாரீ ஹோதி, க³தே டி²தே நிஸின்னே ஸுத்தே ஜாக³ரிதே பா⁴ஸிதே துண்ஹீபா⁴வே ஸம்பஜானகாரீ ஹோதி. ஏவம் கோ², பி⁴க்க²வே, பி⁴க்கு² ஸம்பஜானகாரீ ஹோதி. ஸதோ, பி⁴க்க²வே, பி⁴க்கு² ஸம்பஜானோ காலம் ஆக³மேய்ய. அயம் வோ அம்ஹாகம் அனுஸாஸனீ.

‘‘தஸ்ஸ சே, பி⁴க்க²வே, பி⁴க்கு²னோ ஏவம் ஸதஸ்ஸ ஸம்பஜானஸ்ஸ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி ஸுகா² வேத³னா, ஸோ ஏவம் பஜானாதி – ‘உப்பன்னா கோ² ம்யாயம் ஸுகா² வேத³னா. ஸா ச கோ² படிச்ச, நோ அப்படிச்ச. கிம் படிச்ச? இமமேவ காயம் படிச்ச. அயம் கோ² பன காயோ அனிச்சோ ஸங்க²தோ படிச்சஸமுப்பன்னோ. அனிச்சம் கோ² பன ஸங்க²தம் படிச்சஸமுப்பன்னம் காயம் படிச்ச உப்பன்னா ஸுகா² வேத³னா குதோ நிச்சா ப⁴விஸ்ஸதீ’தி! ஸோ காயே ச ஸுகா²ய ச வேத³னாய அனிச்சானுபஸ்ஸீ விஹரதி, வயானுபஸ்ஸீ விஹரதி, விராகா³னுபஸ்ஸீ விஹரதி, நிரோதா⁴னுபஸ்ஸீ விஹரதி, படினிஸ்ஸக்³கா³னுபஸ்ஸீ விஹரதி. தஸ்ஸ காயே ச ஸுகா²ய ச வேத³னாய அனிச்சானுபஸ்ஸினோ விஹரதோ, வயானுபஸ்ஸினோ விஹரதோ, விராகா³னுபஸ்ஸினோ விஹரதோ, நிரோதா⁴னுபஸ்ஸினோ விஹரதோ, படினிஸ்ஸக்³கா³னுபஸ்ஸினோ விஹரதோ, யோ காயே ச ஸுகா²ய ச வேத³னாய ராகா³னுஸயோ, ஸோ பஹீயதி.

‘‘தஸ்ஸ சே, பி⁴க்க²வே, பி⁴க்கு²னோ ஏவம் ஸதஸ்ஸ ஸம்பஜானஸ்ஸ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி து³க்கா² வேத³னா. ஸோ ஏவம் பஜானாதி – ‘உப்பன்னா கோ² ம்யாயம் து³க்கா² வேத³னா. ஸா ச கோ² படிச்ச, நோ அப்படிச்ச. கிம் படிச்ச? இமமேவ காயம் படிச்ச. அயம் கோ² பன காயோ அனிச்சோ ஸங்க²தோ படிச்சஸமுப்பன்னோ. அனிச்சம் கோ² பன ஸங்க²தம் படிச்சஸமுப்பன்னம் காயம் படிச்ச உப்பன்னா து³க்கா² வேத³னா குதோ நிச்சா ப⁴விஸ்ஸதீ’தி! ஸோ காயே ச து³க்கா²ய வேத³னாய அனிச்சானுபஸ்ஸீ விஹரதி, வயானுபஸ்ஸீ விஹரதி, விராகா³னுபஸ்ஸீ விஹரதி, நிரோதா⁴னுபஸ்ஸீ விஹரதி, படினிஸ்ஸக்³கா³னுபஸ்ஸீ விஹரதி. தஸ்ஸ காயே ச து³க்கா²ய ச வேத³னாய அனிச்சானுபஸ்ஸினோ விஹரதோ…பே… படினிஸ்ஸக்³கா³னுபஸ்ஸினோ விஹரதோ, யோ காயே ச து³க்கா²ய ச வேத³னாய படிகா⁴னுஸயோ, ஸோ பஹீயதி.

‘‘தஸ்ஸ சே, பி⁴க்க²வே, பி⁴க்கு²னோ ஏவம் ஸதஸ்ஸ ஸம்பஜானஸ்ஸ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி அது³க்க²மஸுகா² வேத³னா, ஸோ ஏவம் பஜானாதி – ‘உப்பன்னா கோ² ம்யாயம் அது³க்க²மஸுகா² வேத³னா. ஸா ச கோ² படிச்ச, நோ அப்படிச்ச. கிம் படிச்ச? இமமேவ காயம் படிச்ச. அயம் கோ² பன காயோ அனிச்சோ ஸங்க²தோ படிச்சஸமுப்பன்னோ. அனிச்சம் கோ² பன ஸங்க²தம் படிச்சஸமுப்பன்னம் காயம் படிச்ச உப்பன்னா அது³க்க²மஸுகா² வேத³னா குதோ நிச்சா ப⁴விஸ்ஸதீ’தி! ஸோ காயே ச அது³க்க²மஸுகா²ய ச வேத³னாய அனிச்சானுபஸ்ஸீ விஹரதி, வயானுபஸ்ஸீ விஹரதி, விராகா³னுபஸ்ஸீ விஹரதி, நிரோதா⁴னுபஸ்ஸீ விஹரதி, படினிஸ்ஸக்³கா³னுபஸ்ஸீ விஹரதி. தஸ்ஸ காயே ச அது³க்க²மஸுகா²ய ச வேத³னாய அனிச்சானுபஸ்ஸினோ விஹரதோ…பே… படினிஸ்ஸக்³கா³னுபஸ்ஸினோ விஹரதோ, யோ காயே ச அது³க்க²மஸுகா²ய ச வேத³னாய அவிஜ்ஜானுஸயோ, ஸோ பஹீயதி.

‘‘ஸோ ஸுக²ஞ்சே வேத³னம் வேத³யதி, ஸா அனிச்சாதி பஜானாதி, அனஜ்ஜோ²ஸிதாதி பஜானாதி, அனபி⁴னந்தி³தாதி பஜானாதி; து³க்க²ஞ்சே வேத³னம் வேத³யதி, ஸா அனிச்சாதி பஜானாதி, அனஜ்ஜோ²ஸிதாதி பஜானாதி, அனபி⁴னந்தி³தாதி பஜானாதி; அது³க்க²மஸுக²ஞ்சே வேத³னம் வேத³யதி, ஸா அனிச்சாதி பஜானாதி, அனஜ்ஜோ²ஸிதாதி பஜானாதி, அனபி⁴னந்தி³தாதி பஜானாதி. ஸோ ஸுக²ஞ்சே வேத³னம் வேத³யதி, விஸஞ்ஞுத்தோ நம் வேத³யதி; து³க்க²ஞ்சே வேத³னம் வேத³யதி, விஸஞ்ஞுத்தோ நம் வேத³யதி; அது³க்க²மஸுக²ஞ்சே வேத³னம் வேத³யதி, விஸஞ்ஞுத்தோ நம் வேத³யதி. ஸோ காயபரியந்திகம் வேத³னம் வேத³யமானோ ‘காயபரியந்திகம் வேத³னம் வேத³யாமீ’தி பஜானாதி, ஜீவிதபரியந்திகம் வேத³னம் வேத³யமானோ ‘ஜீவிதபரியந்திகம் வேத³னம் வேத³யாமீ’தி பஜானாதி. ‘காயஸ்ஸ பே⁴தா³ உத்³த⁴ம் ஜீவிதபரியாதா³னா இதே⁴வ ஸப்³ப³வேத³யிதானி அனபி⁴னந்தி³தானி ஸீதீப⁴விஸ்ஸந்தீ’தி [ஸீதிப⁴விஸ்ஸந்தீதி (ஸீ. பீ. க.)] பஜானாதி.

‘‘ஸேய்யதா²பி, பி⁴க்க²வே, தேலஞ்ச படிச்ச வட்டிஞ்ச படிச்ச தேலப்பதீ³போ ஜா²யேய்ய, தஸ்ஸேவ தேலஸ்ஸ ச வட்டியா ச பரியாதா³னா அனாஹாரோ நிப்³பா³யேய்ய; ஏவமேவ கோ², பி⁴க்க²வே, பி⁴க்கு² காயபரியந்திகம் வேத³னம் வேத³யமானோ ‘காயபரியந்திகம் வேத³னம் வேத³யாமீ’தி பஜானாதி. ஜீவிதபரியந்திகம் வேத³னம் வேத³யமானோ ‘ஜீவிதபரியந்திகம் வேத³னம் வேத³யாமீ’தி பஜானாதி. ‘காயஸ்ஸ பே⁴தா³ உத்³த⁴ம் ஜீவிதபரியாதா³னா இதே⁴வ ஸப்³ப³வேத³யிதானி அனபி⁴னந்தி³தானி ஸீதீப⁴விஸ்ஸந்தீ’தி பஜானாதீ’’தி. ஸத்தமம்.

8. து³தியகே³லஞ்ஞஸுத்தம்

256. ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ யேன கி³லானஸாலா தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி –

‘‘ஸதோ, பி⁴க்க²வே, பி⁴க்கு² ஸம்பஜானோ காலம் ஆக³மேய்ய. அயம் வோ அம்ஹாகம் அனுஸாஸனீ.

‘‘கத²ஞ்ச, பி⁴க்க²வே, பி⁴க்கு² ஸதோ ஹோதி? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்; வேத³னாஸு வேத³னானுபஸ்ஸீ விஹரதி… சித்தே சித்தானுபஸ்ஸீ விஹரதி… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். ஏவம் கோ², பி⁴க்க²வே, பி⁴க்கு² ஸதோ ஹோதி.

‘‘கத²ஞ்ச, பி⁴க்க²வே, பி⁴க்கு² ஸம்பஜானோ ஹோதி? இத⁴, பி⁴க்க²வே, பி⁴க்கு² அபி⁴க்கந்தே படிக்கந்தே ஸம்பஜானகாரீ ஹோதி…பே… பா⁴ஸிதே துண்ஹீபா⁴வே ஸம்பஜானகாரீ ஹோதி. ஏவம் கோ², பி⁴க்க²வே, பி⁴க்கு² ஸம்பஜானோ ஹோதி. ஸதோ, பி⁴க்க²வே, பி⁴க்கு² ஸம்பஜானோ காலம் ஆக³மேய்ய. அயம் வோ அம்ஹாகம் அனுஸாஸனீ.

‘‘தஸ்ஸ சே, பி⁴க்க²வே, பி⁴க்கு²னோ ஏவம் ஸதஸ்ஸ ஸம்பஜானஸ்ஸ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி ஸுகா² வேத³னா. ஸோ ஏவம் பஜானாதி – ‘உப்பன்னா கோ² ம்யாயம் ஸுகா² வேத³னா; ஸா ச கோ² படிச்ச, நோ அப்படிச்ச. கிம் படிச்ச? இமமேவ ப²ஸ்ஸம் படிச்ச. அயம் கோ² பன ப²ஸ்ஸோ அனிச்சோ ஸங்க²தோ படிச்சஸமுப்பன்னோ. அனிச்சம் கோ² பன ஸங்க²தம் படிச்சஸமுப்பன்னம் ப²ஸ்ஸம் படிச்ச உப்பன்னா ஸுகா² வேத³னா குதோ நிச்சா ப⁴விஸ்ஸதீ’தி! ஸோ ப²ஸ்ஸே ச ஸுகா²ய ச வேத³னாய அனிச்சானுபஸ்ஸீ விஹரதி, வயானுபஸ்ஸீ விஹரதி, விராகா³னுபஸ்ஸீ விஹரதி, நிரோதா⁴னுபஸ்ஸீ விஹரதி, படினிஸ்ஸக்³கா³னுபஸ்ஸீ விஹரதி. தஸ்ஸ ப²ஸ்ஸே ச ஸுகா²ய ச வேத³னாய அனிச்சானுபஸ்ஸினோ விஹரதோ, வயானுபஸ்ஸினோ விஹரதோ, விராகா³னுபஸ்ஸினோ விஹரதோ, நிரோதா⁴னுபஸ்ஸினோ விஹரதோ, படினிஸ்ஸக்³கா³னுபஸ்ஸினோ விஹரதோ யோ ப²ஸ்ஸே ச ஸுகா²ய ச வேத³னாய ராகா³னுஸயோ, ஸோ பஹீயதி.

‘‘தஸ்ஸ சே, பி⁴க்க²வே, பி⁴க்கு²னோ ஏவம் ஸதஸ்ஸ…பே… விஹரதோ உப்பஜ்ஜதி து³க்கா² வேத³னா…பே… உப்பஜ்ஜதி அது³க்க²மஸுகா² வேத³னா. ஸோ ஏவம் பஜானாதி – ‘உப்பன்னா கோ² ம்யாயம் அது³க்க²மஸுகா² வேத³னா; ஸா ச கோ² படிச்ச, நோ அப்படிச்ச. கிம் படிச்ச? இமமேவ ப²ஸ்ஸம் படிச்ச…பே… காயஸ்ஸ பே⁴தா³ உத்³த⁴ம் ஜீவிதபரியாதா³னா இதே⁴வ ஸப்³ப³வேத³யிதானி அனபி⁴னந்தி³தானி ஸீதீப⁴விஸ்ஸந்தீ’தி பஜானாதி’’.

‘‘ஸேய்யதா²பி, பி⁴க்க²வே, தேலஞ்ச படிச்ச வட்டிஞ்ச படிச்ச தேலப்பதீ³போ ஜா²யேய்ய, தஸ்ஸேவ தேலஸ்ஸ ச வட்டியா ச பரியாதா³னா அனாஹாரோ நிப்³பா³யேய்ய; ஏவமேவ கோ², பி⁴க்க²வே, பி⁴க்கு² காயபரியந்திகம் வேத³னம் வேத³யமானோ ‘காயபரியந்திகம் வேத³னம் வேத³யாமீ’தி பஜானாதி. ஜீவிதபரியந்திகம் வேத³னம் வேத³யமானோ ‘ஜீவிதபரியந்திகம் வேத³னம் வேத³யாமீ’தி பஜானாதி. ‘காயஸ்ஸ பே⁴தா³ உத்³த⁴ம் ஜீவிதபரியாதா³னா இதே⁴வ ஸப்³ப³வேத³யிதானி அனபி⁴னந்தி³தானி ஸீதீப⁴விஸ்ஸந்தீ’தி பஜானாதீ’’தி. அட்ட²மம்.

9. அனிச்சஸுத்தம்

257. ‘‘திஸ்ஸோ இமா, பி⁴க்க²வே, வேத³னா அனிச்சா ஸங்க²தா படிச்சஸமுப்பன்னா க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மா. கதமா திஸ்ஸோ? ஸுகா² வேத³னா, து³க்கா² வேத³னா, அது³க்க²மஸுகா² வேத³னா – இமா கோ², பி⁴க்க²வே, திஸ்ஸோ வேத³னா அனிச்சா ஸங்க²தா படிச்சஸமுப்பன்னா க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மா’’தி. நவமம்.

10. ப²ஸ்ஸமூலகஸுத்தம்

258. ‘‘திஸ்ஸோ இமா, பி⁴க்க²வே, வேத³னா ப²ஸ்ஸஜா ப²ஸ்ஸமூலகா ப²ஸ்ஸனிதா³னா ப²ஸ்ஸபச்சயா. கதமா திஸ்ஸோ? ஸுகா² வேத³னா, து³க்கா² வேத³னா, அது³க்க²மஸுகா² வேத³னா. ஸுக²வேத³னியம், பி⁴க்க²வே, ப²ஸ்ஸம் படிச்ச உப்பஜ்ஜதி ஸுகா² வேத³னா. தஸ்ஸேவ ஸுக²வேத³னியஸ்ஸ ப²ஸ்ஸஸ்ஸ நிரோதா⁴, யம் தஜ்ஜம் வேத³யிதம் ஸுக²வேத³னியம் ப²ஸ்ஸம் படிச்ச உப்பன்னா ஸுகா² வேத³னா, ஸா நிருஜ்ஜ²தி, ஸா வூபஸம்மதி. து³க்க²வேத³னியம், பி⁴க்க²வே, ப²ஸ்ஸம் படிச்ச உப்பஜ்ஜதி து³க்கா² வேத³னா. தஸ்ஸேவ து³க்க²வேத³னியஸ்ஸ ப²ஸ்ஸஸ்ஸ நிரோதா⁴, யம் தஜ்ஜம் வேத³யிதம் து³க்க²வேத³னியம் ப²ஸ்ஸம் படிச்ச உப்பன்னா து³க்கா² வேத³னா, ஸா நிருஜ்ஜ²தி, ஸா வூபஸம்மதி. அது³க்க²மஸுக²வேத³னியம், பி⁴க்க²வே, ப²ஸ்ஸம் படிச்ச உப்பஜ்ஜதி அது³க்க²மஸுகா² வேத³னா. தஸ்ஸேவ அது³க்க²மஸுக²வேத³னியஸ்ஸ ப²ஸ்ஸஸ்ஸ நிரோதா⁴, யம் தஜ்ஜம் வேத³யிதம் அது³க்க²மஸுக²வேத³னியம் ப²ஸ்ஸம் படிச்ச உப்பன்னா அது³க்க²மஸுகா² வேத³னா, ஸா நிருஜ்ஜ²தி, ஸா வூபஸம்மதி. ஸேய்யதா²பி, பி⁴க்க²வே, த்³வின்னம் கட்டா²னம் ஸங்க⁴ட்டனஸமோதா⁴னா [ஸங்க²த்தா தஸ்ஸ ஸமோதா⁴னா (ஸ்யா. கம்.) ஸங்க⁴த்தா தஸ்ஸ ஸமோதா⁴னா (க.) ஸம். நி. 2.62 பஸ்ஸிதப்³ப³ம்] உஸ்மா ஜாயதி, தேஜோ அபி⁴னிப்³ப³த்ததி. தேஸம்யேவ கட்டா²னம் நானாபா⁴வா வினிக்கே²பா, யா தஜ்ஜா உஸ்மா, ஸா நிருஜ்ஜ²தி, ஸா வூபஸம்மதி. ஏவமேவ கோ², பி⁴க்க²வே, இமா திஸ்ஸோ வேத³னா ப²ஸ்ஸஜா ப²ஸ்ஸமூலகா ப²ஸ்ஸனிதா³னா ப²ஸ்ஸபச்சயா. தஜ்ஜம் ப²ஸ்ஸம் படிச்ச தஜ்ஜா வேத³னா உப்பஜ்ஜந்தி. தஜ்ஜஸ்ஸ ப²ஸ்ஸஸ்ஸ நிரோதா⁴ தஜ்ஜா வேத³னா நிருஜ்ஜ²ந்தீ’’தி. த³ஸமம்.

ஸகா³தா²வக்³கோ³ பட²மோ.

தஸ்ஸுத்³தா³னம் –

ஸமாதி⁴ ஸுக²ம் பஹானேன, பாதாலம் த³ட்ட²ப்³பே³ன ச;

ஸல்லேன சேவ கே³லஞ்ஞா, அனிச்ச ப²ஸ்ஸமூலகாதி.