9. தே²ரவக்³கோ³

1. ஆனந்த³ஸுத்தம்

83. ஸாவத்தி²னிதா³னம். தத்ர கோ² ஆயஸ்மா ஆனந்தோ³ பி⁴க்கூ² ஆமந்தேஸி – ‘‘ஆவுஸோ, பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஆனந்த³ஸ்ஸ பச்சஸ்ஸோஸும். ஆயஸ்மா ஆனந்தோ³ ஏதத³வோச –

‘‘புண்ணோ நாம, ஆவுஸோ, ஆயஸ்மா மந்தாணிபுத்தோ [மந்தானிபுத்தோ (க. ஸீ. ஸ்யா. கம். பீ. க.)] அம்ஹாகம் நவகானம் ஸதம் ப³ஹூபகாரோ ஹோதி. ஸோ அம்ஹே இமினா ஓவாதே³ன ஓவத³தி – ‘உபாதா³ய, ஆவுஸோ ஆனந்த³, அஸ்மீதி ஹோதி, நோ அனுபாதா³ய. கிஞ்ச உபாதா³ய அஸ்மீதி ஹோதி, நோ அனுபாதா³ய? ரூபம் உபாதா³ய அஸ்மீதி ஹோதி, நோ அனுபாதா³ய. வேத³னம்… ஸஞ்ஞம்… ஸங்கா²ரே… விஞ்ஞாணம் உபாதா³ய அஸ்மீதி ஹோதி, நோ அனுபாதா³ய’’’.

‘‘ஸேய்யதா²பி, ஆவுஸோ ஆனந்த³, இத்தீ² வா புரிஸோ வா த³ஹரோ யுவா மண்ட³னகஜாதிகோ ஆதா³ஸே வா பரிஸுத்³தே⁴ பரியோதா³தே அச்சே² வா உத³கபத்தே ஸகம் முக²னிமித்தம் பச்சவேக்க²மானோ உபாதா³ய பஸ்ஸேய்ய, நோ அனுபாதா³ய; ஏவமேவ கோ², ஆவுஸோ ஆனந்த³, ரூபம் உபாதா³ய அஸ்மீதி ஹோதி, நோ அனுபாதா³ய. வேத³னம்… ஸஞ்ஞம்… ஸங்கா²ரே… விஞ்ஞாணம் உபாதா³ய அஸ்மீதி ஹோதி, நோ அனுபாதா³ய.

‘‘தம் கிம் மஞ்ஞஸி, ஆவுஸோ ஆனந்த³, ‘ரூபம் நிச்சம் வா அனிச்சம் வா’’’தி? ‘அனிச்சம், ஆவுஸோ’. வேத³னா… ஸஞ்ஞா … ஸங்கா²ரா… விஞ்ஞாணம் நிச்சம் வா அனிச்சம் வா’தி? ‘அனிச்சம், ஆவுஸோ’. தஸ்மாதிஹ…பே… ஏவம் பஸ்ஸம்…பே… நாபரம் இத்த²த்தாயாதி பஜானாதீதி. புண்ணோ நாம ஆவுஸோ ஆயஸ்மா மந்தாணிபுத்தோ அம்ஹாகம் நவகானம் ஸதம் ப³ஹூபகாரோ ஹோதி. ஸோ அம்ஹே இமினா ஓவாதே³ன ஓவத³தி. இத³ஞ்ச பன மே ஆயஸ்மதோ புண்ணஸ்ஸ மந்தாணிபுத்தஸ்ஸ த⁴ம்மதே³ஸனம் ஸுத்வா த⁴ம்மோ அபி⁴ஸமிதோதி. பட²மம்.

2. திஸ்ஸஸுத்தம்

84. ஸாவத்தி²னிதா³னம். தேன கோ² பன ஸமயேன ஆயஸ்மா திஸ்ஸோ ப⁴க³வதோ பிதுச்சா²புத்தோ ஸம்ப³ஹுலானம் பி⁴க்கூ²னம் ஏவமாரோசேதி – ‘‘அபி மே, ஆவுஸோ, மது⁴ரகஜாதோ விய காயோ; தி³ஸாபி மே ந பக்கா²யந்தி; த⁴ம்மாபி மம் ந படிப⁴ந்தி; தி²னமித்³த⁴ஞ்ச [தீ²னமித்³த⁴ஞ்ச (ஸீ. ஸ்யா. கம். பீ.)] மே சித்தம் பரியாதா³ய திட்ட²தி; அனபி⁴ரதோ ச ப்³ரஹ்மசரியம் சராமி; ஹோதி ச மே த⁴ம்மேஸு விசிகிச்சா²’’தி.

அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் – ‘‘ஆயஸ்மா, ப⁴ந்தே, திஸ்ஸோ ப⁴க³வதோ பிதுச்சா²புத்தோ ஸம்ப³ஹுலானம் பி⁴க்கூ²னம் ஏவமாரோசேதி – ‘அபி மே, ஆவுஸோ, மது⁴ரகஜாதோ விய காயோ; தி³ஸாபி மே ந பக்கா²யந்தி; த⁴ம்மாபி மம் ந படிப⁴ந்தி; தி²னமித்³த⁴ஞ்ச மே சித்தம் பரியாதா³ய திட்ட²தி; அனபி⁴ரதோ ச ப்³ரஹ்மசரியம் சராமி; ஹோதி ச மே த⁴ம்மேஸு விசிகிச்சா²’’’தி.

அத² கோ² ப⁴க³வா அஞ்ஞதரம் பி⁴க்கு²ம் ஆமந்தேஸி – ‘‘ஏஹி த்வம், பி⁴க்கு², மம வசனேன திஸ்ஸம் பி⁴க்கு²ம் ஆமந்தேஹீ’’தி. ‘‘ஏவம், ப⁴ந்தே’’தி கோ² ஸோ பி⁴க்கு² ப⁴க³வதோ படிஸ்ஸுத்வா யேனாயஸ்மா திஸ்ஸோ தேனுபஸங்கமி; உபஸங்கமித்வா ஆயஸ்மந்தம் திஸ்ஸம் ஏதத³வோச – ‘‘ஸத்தா² தம், ஆவுஸோ திஸ்ஸ, ஆமந்தேதீ’’தி. ‘‘ஏவமாவுஸோ’’தி கோ² ஆயஸ்மா திஸ்ஸோ தஸ்ஸ பி⁴க்கு²னோ படிஸ்ஸுத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் திஸ்ஸம் ப⁴க³வா ஏதத³வோச – ‘‘ஸச்சம் கிர த்வம், திஸ்ஸ, ஸம்ப³ஹுலானம் பி⁴க்கூ²னம் ஏவமாரோசேஸி – ‘அபி மே, ஆவுஸோ, மது⁴ரகஜாதோ விய காயோ…பே… ஹோதி ச மே த⁴ம்மேஸு விசிகிச்சா²’’’தி? ‘‘ஏவம், ப⁴ந்தே’’. ‘‘தம் கிம் மஞ்ஞஸி, திஸ்ஸ, ரூபே அவிக³தராக³ஸ்ஸ அவிக³தச்ச²ந்த³ஸ்ஸ அவிக³தபேமஸ்ஸ அவிக³தபிபாஸஸ்ஸ அவிக³தபரிளாஹஸ்ஸ அவிக³ததண்ஹஸ்ஸ, தஸ்ஸ ரூபஸ்ஸ விபரிணாமஞ்ஞதா²பா⁴வா உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா’’தி? ‘‘ஏவம், ப⁴ந்தே’’.

‘‘ஸாது⁴ ஸாது⁴, திஸ்ஸ! ஏவஞ்ஹேதம், திஸ்ஸ, ஹோதி. யதா² தம் ரூபே அவிக³தராக³ஸ்ஸ… வேத³னாய… ஸஞ்ஞாய… ஸங்கா²ரேஸு அவிக³தராக³ஸ்ஸ…பே… தேஸம் ஸங்கா²ரானம் விபரிணாமஞ்ஞதா²பா⁴வா உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா’’தி? ‘‘ஏவம், ப⁴ந்தே’’.

‘‘ஸாது⁴ ஸாது⁴, திஸ்ஸ! ஏவஞ்ஹேதம், திஸ்ஸ, ஹோதி. யதா² தம் விஞ்ஞாணே அவிக³தராக³ஸ்ஸ அவிக³தச்ச²ந்த³ஸ்ஸ அவிக³தபேமஸ்ஸ அவிக³தபிபாஸஸ்ஸ அவிக³தபரிளாஹஸ்ஸ அவிக³ததண்ஹஸ்ஸ, தஸ்ஸ விஞ்ஞாணஸ்ஸ விபரிணாமஞ்ஞதா²பா⁴வா உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா’’தி? ‘‘ஏவம், ப⁴ந்தே’’.

‘‘ஸாது⁴ ஸாது⁴, திஸ்ஸ! ஏவஞ்ஹேதம், திஸ்ஸ, ஹோதி. யதா² தம் விஞ்ஞாணே அவிக³தராக³ஸ்ஸ. தம் கிம் மஞ்ஞஸி, திஸ்ஸ, ரூபே விக³தராக³ஸ்ஸ விக³தச்ச²ந்த³ஸ்ஸ விக³தபேமஸ்ஸ விக³தபிபாஸஸ்ஸ விக³தபரிளாஹஸ்ஸ விக³ததண்ஹஸ்ஸ, தஸ்ஸ ரூபஸ்ஸ விபரிணாமஞ்ஞதா²பா⁴வா உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா’’தி? ‘‘நோ ஹேதம், ப⁴ந்தே’’.

‘‘ஸாது⁴ ஸாது⁴, திஸ்ஸ! ஏவஞ்ஹேதம், திஸ்ஸ, ஹோதி. யதா² தம் ரூபே விக³தராக³ஸ்ஸ… வேத³னாய… ஸஞ்ஞாய… ஸங்கா²ரேஸு விக³தராக³ஸ்ஸ… விஞ்ஞாணே விக³தராக³ஸ்ஸ விக³தச்ச²ந்த³ஸ்ஸ விக³தபேமஸ்ஸ விக³தபிபாஸஸ்ஸ விக³தபரிளாஹஸ்ஸ விக³ததண்ஹஸ்ஸ தஸ்ஸ விஞ்ஞாணஸ்ஸ விபரிணாமஞ்ஞதா²பா⁴வா உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா’’தி? ‘‘நோ ஹேதம், ப⁴ந்தே’’.

‘‘ஸாது⁴ ஸாது⁴, திஸ்ஸ! ஏவஞ்ஹேதம், திஸ்ஸ, ஹோதி. யதா² தம் விஞ்ஞாணே விக³தராக³ஸ்ஸ. தம் கிம் மஞ்ஞஸி, திஸ்ஸ, ரூபம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘வேத³னா … ஸஞ்ஞா… ஸங்கா²ரா… விஞ்ஞாணம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. தஸ்மாதிஹ…பே… ஏவம் பஸ்ஸம்…பே… நாபரம் இத்த²த்தாயாதி பஜானாதீ’’தி.

‘‘ஸேய்யதா²பி, திஸ்ஸ, த்³வே புரிஸா – ஏகோ புரிஸோ அமக்³க³குஸலோ, ஏகோ புரிஸோ மக்³க³குஸலோ. தமேனம் ஸோ அமக்³க³குஸலோ புரிஸோ அமும் மக்³க³குஸலம் புரிஸம் மக்³க³ம் புச்சே²ய்ய. ஸோ ஏவம் வதே³ய்ய – ‘ஏஹி, போ⁴ புரிஸ, அயம் மக்³கோ³. தேன முஹுத்தம் க³ச்ச². தேன முஹுத்தம் க³ந்த்வா த³க்கி²ஸ்ஸஸி த்³வேதா⁴பத²ம், தத்த² வாமம் முஞ்சித்வா த³க்கி²ணம் க³ண்ஹாஹி. தேன முஹுத்தம் க³ச்ச². தேன முஹுத்தம் க³ந்த்வா த³க்கி²ஸ்ஸஸி திப்³ப³ம் வனஸண்ட³ம். தேன முஹுத்தம் க³ச்ச². தேன முஹுத்தம் க³ந்த்வா த³க்கி²ஸ்ஸஸி மஹந்தம் நின்னம் பல்லலம். தேன முஹுத்தம் க³ச்ச². தேன முஹுத்தம் க³ந்த்வா த³க்கி²ஸ்ஸஸி ஸோப்³ப⁴ம் பபாதம். தேன முஹுத்தம் க³ச்ச². தேன முஹுத்தம் க³ந்த்வா த³க்கி²ஸ்ஸஸி ஸமம் பூ⁴மிபா⁴க³ம் ரமணீய’’’ந்தி.

‘‘உபமா கோ² ம்யாயம், திஸ்ஸ, கதா அத்த²ஸ்ஸ விஞ்ஞாபனாய. அயம் சேவேத்த² அத்தோ² – ‘புரிஸோ அமக்³க³குஸலோ’தி கோ², திஸ்ஸ, புது²ஜ்ஜனஸ்ஸேதம் அதி⁴வசனம். ‘புரிஸோ மக்³க³குஸலோ’தி கோ², திஸ்ஸ, ததா²க³தஸ்ஸேதம் அதி⁴வசனம் அரஹதோ ஸம்மாஸம்பு³த்³த⁴ஸ்ஸ. ‘த்³வேதா⁴பதோ²’தி கோ², திஸ்ஸ, விசிகிச்சா²யேதம் அதி⁴வசனம். ‘வாமோ மக்³கோ³’தி கோ², திஸ்ஸ, அட்ட²ங்கி³கஸ்ஸேதம் மிச்சா²மக்³க³ஸ்ஸ அதி⁴வசனம், ஸேய்யதி²த³ம் – மிச்சா²தி³ட்டி²யா…பே… மிச்சா²ஸமாதி⁴ஸ்ஸ. ‘த³க்கி²ணோ மக்³கோ³’தி கோ², திஸ்ஸ, அரியஸ்ஸேதம் அட்ட²ங்கி³கஸ்ஸ மக்³க³ஸ்ஸ அதி⁴வசனம், ஸேய்யதி²த³ம் – ஸம்மாதி³ட்டி²யா…பே… ஸம்மாஸமாதி⁴ஸ்ஸ. ‘திப்³போ³ வனஸண்டோ³’தி கோ², திஸ்ஸ, அவிஜ்ஜாயேதம் அதி⁴வசனம். ‘மஹந்தம் நின்னம் பல்லல’ந்தி கோ², திஸ்ஸ, காமானமேதம் அதி⁴வசனம். ‘ஸோப்³போ⁴ பபாதோ’தி கோ², திஸ்ஸ, கோதூ⁴பாயாஸஸ்ஸேதம் அதி⁴வசனம். ‘ஸமோ பூ⁴மிபா⁴கோ³ ரமணீயோ’தி கோ², திஸ்ஸ, நிப்³பா³னஸ்ஸேதம் அதி⁴வசனம். அபி⁴ரம, திஸ்ஸ, அபி⁴ரம, திஸ்ஸ! அஹமோவாதே³ன அஹமனுக்³க³ஹேன அஹமனுஸாஸனியா’’தி [அஹமாமிஸத⁴ம்மானுக்³க³ஹேன மமோவாதே³ன மமானுஸாஸனியாதி (க.)].

இத³மவோச ப⁴க³வா. அத்தமனோ ஆயஸ்மா திஸ்ஸோ ப⁴க³வதோ பா⁴ஸிதம் அபி⁴னந்தீ³தி. து³தியம்.

3. யமகஸுத்தம்

85. ஏகம் ஸமயம் ஆயஸ்மா ஸாரிபுத்தோ ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன யமகஸ்ஸ நாம பி⁴க்கு²னோ ஏவரூபம் பாபகம் தி³ட்டி²க³தம் உப்பன்னம் ஹோதி – ‘‘ததா²ஹம் ப⁴க³வதா த⁴ம்மம் தே³ஸிதம் ஆஜானாமி, யதா² கீ²ணாஸவோ பி⁴க்கு² காயஸ்ஸ பே⁴தா³ உச்சி²ஜ்ஜதி வினஸ்ஸதி, ந ஹோதி பரம் மரணா’’தி.

அஸ்ஸோஸும் கோ² ஸம்ப³ஹுலா பி⁴க்கூ² யமகஸ்ஸ கிர நாம பி⁴க்கு²னோ ஏவரூபம் பாபகம் தி³ட்டி²க³தம் உப்பன்னம் ஹோதி – ‘‘ததா²ஹம் ப⁴க³வதா த⁴ம்மம் தே³ஸிதம் ஆஜானாமி, யதா² கீ²ணாஸவோ பி⁴க்கு² காயஸ்ஸ பே⁴தா³ உச்சி²ஜ்ஜதி வினஸ்ஸதி, ந ஹோதி பரம் மரணா’’தி. அத² கோ² தே பி⁴க்கூ² யேனாயஸ்மா யமகோ தேனுபஸங்கமிம்ஸு; உபஸங்கமித்வா ஆயஸ்மதா யமகேன ஸத்³தி⁴ம் ஸம்மோதி³ம்ஸு. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ஆயஸ்மந்தம் யமகம் ஏதத³வோசும் –

‘‘ஸச்சம் கிர தே, ஆவுஸோ யமக, ஏவரூபம் பாபகம் தி³ட்டி²க³தம் உப்பன்னம் – ‘ததா²ஹம் ப⁴க³வதா த⁴ம்மம் தே³ஸிதம் ஆஜானாமி, யதா² கீ²ணாஸவோ பி⁴க்கு² காயஸ்ஸ பே⁴தா³ உச்சி²ஜ்ஜதி வினஸ்ஸதி, ந ஹோதி பரம் மரணா’’’தி? ‘‘ஏவம் க்²வாஹம், ஆவுஸோ, ப⁴க³வதா த⁴ம்மம் தே³ஸிதம் ஆஜானாமி – ‘கீ²ணாஸவோ பி⁴க்கு² காயஸ்ஸ பே⁴தா³ உச்சி²ஜ்ஜதி வினஸ்ஸதி, ந ஹோதி பரம் மரணா’’’தி.

‘‘மா, ஆவுஸோ யமக, ஏவம் அவச, மா ப⁴க³வந்தம் அப்³பா⁴சிக்கி². ந ஹி ஸாது⁴ ப⁴க³வதோ அப்³பா⁴சிக்க²னம். ந ஹி ப⁴க³வா ஏவம் வதே³ய்ய – ‘கீ²ணாஸவோ பி⁴க்கு² காயஸ்ஸ பே⁴தா³ உச்சி²ஜ்ஜதி வினஸ்ஸதி, ந ஹோதி பரம் மரணா’’’தி. ஏவம்பி கோ² ஆயஸ்மா யமகோ தேஹி பி⁴க்கூ²ஹி வுச்சமானோ ததே²வ தம் பாபகம் தி³ட்டி²க³தம் தா²மஸா பராமாஸா அபி⁴னிவிஸ்ஸ வோஹரதி – ‘‘ததா²ஹம் ப⁴க³வதா த⁴ம்மம் தே³ஸிதம் ஆஜானாமி, யதா² கீ²ணாஸவோ பி⁴க்கு² காயஸ்ஸ பே⁴தா³ உச்சி²ஜ்ஜதி வினஸ்ஸதி, ந ஹோதி பரம் மரணா’’தி.

யதோ கோ² தே பி⁴க்கூ² நாஸக்கி²ம்ஸு ஆயஸ்மந்தம் யமகம் ஏதஸ்மா பாபகா தி³ட்டி²க³தா விவேசேதும், அத² கோ² தே பி⁴க்கூ² உட்டா²யாஸனா யேனாயஸ்மா ஸாரிபுத்தோ தேனுபஸங்கமிம்ஸு; உபஸங்கமித்வா ஆயஸ்மந்தம் ஸாரிபுத்தம் ஏதத³வோசும் – ‘‘யமகஸ்ஸ நாம, ஆவுஸோ ஸாரிபுத்த, பி⁴க்கு²னோ ஏவரூபம் பாபகம் தி³ட்டி²க³தம் உப்பன்னம் – ‘ததா²ஹம் ப⁴க³வதா த⁴ம்மம் தே³ஸிதம் ஆஜானாமி யதா² கீ²ணாஸவோ பி⁴க்கு² காயஸ்ஸ பே⁴தா³ உச்சி²ஜ்ஜதி வினஸ்ஸதி, ந ஹோதி பரம் மரணா’தி. ஸாதா⁴யஸ்மா ஸாரிபுத்தோ யேன யமகோ பி⁴க்கு² தேனுபஸங்கமது அனுகம்பம் உபாதா³யா’’தி. அதி⁴வாஸேஸி கோ² ஆயஸ்மா ஸாரிபுத்தோ துண்ஹீபா⁴வேன. அத² கோ² ஆயஸ்மா ஸாரிபுத்தோ ஸாயன்ஹஸமயம் படிஸல்லானா வுட்டி²தோ யேனாயஸ்மா யமகோ தேனுபஸங்கமி; உபஸங்கமித்வா ஆயஸ்மதா யமகேன ஸத்³தி⁴ம் ஸம்மோதி³…பே… ஏகமந்தம் நிஸின்னோ கோ² ஆயஸ்மா ஸாரிபுத்தோ ஆயஸ்மந்தம் யமகம் ஏதத³வோச –

‘‘ஸச்சம் கிர தே, ஆவுஸோ யமக, ஏவரூபம் பாபகம் தி³ட்டி²க³தம் உப்பன்னம் – ‘ததா²ஹம் ப⁴க³வதா த⁴ம்மம் தே³ஸிதம் ஆஜானாமி, யதா² கீ²ணாஸவோ பி⁴க்கு² காயஸ்ஸ பே⁴தா³ உச்சி²ஜ்ஜதி வினஸ்ஸதி, ந ஹோதி பரம் மரணா’’’தி? ‘‘ஏவம் க்²வாஹம், ஆவுஸோ, ப⁴க³வதா த⁴ம்மம் தே³ஸிதம் ஆஜானாமி, யதா² கீ²ணாஸவோ பி⁴க்கு² காயஸ்ஸ பே⁴தா³ உச்சி²ஜ்ஜதி வினஸ்ஸதி, ந ஹோதி பரம் மரணா’’தி.

‘‘தம் கிம் மஞ்ஞஸி, ஆவுஸோ யமக, ரூபம் நிச்சம் வா அனிச்சம் வா’’தி? ‘‘அனிச்சம், ஆவுஸோ’’. ‘‘வேத³னா நிச்சா… ஸஞ்ஞா… ஸங்கா²ரா… விஞ்ஞாணம் நிச்சம் வா அனிச்சம் வா’’தி? ‘‘அனிச்சம், ஆவுஸோ’’. தஸ்மாதிஹ…பே… ஏவம் பஸ்ஸம்…பே… நாபரம் இத்த²த்தாயாதி பஜானாதீ’’தி.

‘‘தம் கிம் மஞ்ஞஸி, ஆவுஸோ யமக, ரூபம் ததா²க³தோதி ஸமனுபஸ்ஸஸீ’’தி? ‘‘நோ ஹேதம், ஆவுஸோ’’ … ‘‘வேத³னம் ததா²க³தோதி ஸமனுபஸ்ஸஸீ’’தி? ‘‘நோ ஹேதம், ஆவுஸோ’’… ‘‘ஸஞ்ஞம்… ஸங்கா²ரே… விஞ்ஞாணம் ததா²க³தோதி ஸமனுபஸ்ஸஸீ’’தி? ‘‘நோ ஹேதம், ஆவுஸோ’’.

‘‘தம் கிம் மஞ்ஞஸி, ஆவுஸோ யமக, ரூபஸ்மிம் ததா²க³தோதி ஸமனுபஸ்ஸஸீ’’தி? ‘‘நோ ஹேதம், ஆவுஸோ’’. ‘‘அஞ்ஞத்ர ரூபா ததா²க³தோதி ஸமனுபஸ்ஸஸீ’’தி? ‘‘நோ ஹேதம், ஆவுஸோ’’. ‘‘வேத³னாய… அஞ்ஞத்ர வேத³னாய…பே… ஸஞ்ஞாய… அஞ்ஞத்ர ஸஞ்ஞாய… ஸங்கா²ரேஸு… அஞ்ஞத்ர ஸங்கா²ரேஹி… விஞ்ஞாணஸ்மிம் ததா²க³தோதி ஸமனுபஸ்ஸஸீ’’தி? ‘‘நோ ஹேதம், ஆவுஸோ’’. ‘‘அஞ்ஞத்ர விஞ்ஞாணா ததா²க³தோதி ஸமனுபஸ்ஸஸீ’’தி? ‘‘நோ ஹேதம், ஆவுஸோ’’.

‘‘தம் கிம் மஞ்ஞஸி, ஆவுஸோ யமக, ரூபம்… வேத³னம்… ஸஞ்ஞம்… ஸங்கா²ரே… விஞ்ஞாணம் ததா²க³தோதி ஸமனுபஸ்ஸஸீ’’தி? ‘‘நோ ஹேதம், ஆவுஸோ’’.

‘‘தம் கிம் மஞ்ஞஸி, ஆவுஸோ யமக, அயம் ஸோ அரூபீ… அவேத³னோ… அஸஞ்ஞீ… அஸங்கா²ரோ… அவிஞ்ஞாணோ ததா²க³தோதி ஸமனுபஸ்ஸஸீ’’தி? ‘‘நோ ஹேதம், ஆவுஸோ’’. ‘‘ஏத்த² ச தே, ஆவுஸோ யமக, தி³ட்டே²வ த⁴ம்மே ஸச்சதோ தே²ததோ [தத²தோ (ஸ்யா. கம்.)] ததா²க³தே அனுபலப்³பி⁴யமானே [ததா²க³தே அனுபலப்³ப⁴மானே (?)], கல்லம் நு தே தம் வேய்யாகரணம் – ‘ததா²ஹம் ப⁴க³வதா த⁴ம்மம் தே³ஸிதம் ஆஜானாமி, யதா² கீ²ணாஸவோ பி⁴க்கு² காயஸ்ஸ பே⁴தா³ உச்சி²ஜ்ஜதி வினஸ்ஸதி, ந ஹோதி பரம் மரணா’’’தி?

‘‘அஹு கோ² மே தம், ஆவுஸோ ஸாரிபுத்த, புப்³பே³ அவித்³த³ஸுனோ பாபகம் தி³ட்டி²க³தம்; இத³ஞ்ச பனாயஸ்மதோ ஸாரிபுத்தஸ்ஸ த⁴ம்மதே³ஸனம் ஸுத்வா தஞ்சேவ பாபகம் தி³ட்டி²க³தம் பஹீனம், த⁴ம்மோ ச மே அபி⁴ஸமிதோ’’தி.

‘‘ஸசே தம், ஆவுஸோ யமக, ஏவம் புச்சே²ய்யும் – ‘யோ ஸோ, ஆவுஸோ யமக, பி⁴க்கு² அரஹம் கீ²ணாஸவோ ஸோ காயஸ்ஸ பே⁴தா³ பரம் மரணா கிம் ஹோதீ’தி? ஏவம் புட்டோ² த்வம், ஆவுஸோ யமக, கிந்தி ப்³யாகரேய்யாஸீ’’தி? ‘‘ஸசே மம், ஆவுஸோ, ஏவம் புச்சே²ய்யும் – ‘யோ ஸோ, ஆவுஸோ யமக, பி⁴க்கு² அரஹம் கீ²ணாஸவோ ஸோ காயஸ்ஸ பே⁴தா³ பரம் மரணா கிம் ஹோதீ’தி? ஏவம் புட்டோ²ஹம், ஆவுஸோ, ஏவம் ப்³யாகரேய்யம் – ‘ரூபம் கோ², ஆவுஸோ, அனிச்சம். யத³னிச்சம் தம் து³க்க²ம்; யம் து³க்க²ம் தம் நிருத்³த⁴ம் தத³த்த²ங்க³தம். வேத³னா… ஸஞ்ஞா… ஸங்கா²ரா… விஞ்ஞாணம் அனிச்சம். யத³னிச்சம் தம் து³க்க²ம்; யம் து³க்க²ம் தம் நிருத்³த⁴ம் தத³த்த²ங்க³த’ந்தி. ஏவம் புட்டோ²ஹம், ஆவுஸோ, ஏவம் ப்³யாகரேய்ய’’ந்தி.

‘‘ஸாது⁴ ஸாது⁴, ஆவுஸோ யமக! தேன ஹாவுஸோ, யமக, உபமம் தே கரிஸ்ஸாமி ஏதஸ்ஸேவ அத்த²ஸ்ஸ பி⁴ய்யோஸோமத்தாய ஞாணாய. ஸேய்யதா²பி, ஆவுஸோ யமக, க³ஹபதி வா க³ஹபதிபுத்தோ வா அட்³டோ⁴ மஹத்³த⁴னோ மஹாபோ⁴கோ³; ஸோ ச ஆரக்க²ஸம்பன்னோ. தஸ்ஸ கோசிதே³வ புரிஸோ உப்பஜ்ஜேய்ய அனத்த²காமோ அஹிதகாமோ அயோக³க்கே²மகாமோ ஜீவிதா வோரோபேதுகாமோ. தஸ்ஸ ஏவமஸ்ஸ – ‘அயம் கோ² க³ஹபதி வா க³ஹபதிபுத்தோ வா அட்³டோ⁴ மஹத்³த⁴னோ மஹாபோ⁴கோ³; ஸோ ச ஆரக்க²ஸம்பன்னோ; நாயம் [ந ஹாயம் (ஸ்யா. கம்.)] ஸுகரோ பஸய்ஹ ஜீவிதா வோரோபேதும். யம்னூனாஹம் அனுபக²ஜ்ஜ ஜீவிதா வோரோபேய்ய’ந்தி. ஸோ தம் க³ஹபதிம் வா க³ஹபதிபுத்தம் வா உபஸங்கமித்வா ஏவம் வதே³ய்ய – ‘உபட்ட²ஹேய்யம் தம், ப⁴ந்தே’தி. தமேனம் ஸோ க³ஹபதி வா க³ஹபதிபுத்தோ வா உபட்டா²பேய்ய. ஸோ உபட்ட²ஹேய்ய புப்³பு³ட்டா²யீ பச்சா²னிபாதீ கிம்காரபடிஸ்ஸாவீ மனாபசாரீ பியவாதீ³. தஸ்ஸ ஸோ க³ஹபதி வா க³ஹபதிபுத்தோ வா மித்ததோபி நம் ஸத்³த³ஹேய்ய [த³ஹேய்ய (ஸ்யா. கம். பீ. க.)]; ஸுஹஜ்ஜதோபி நம் ஸத்³த³ஹேய்ய; தஸ்மிஞ்ச விஸ்ஸாஸம் ஆபஜ்ஜேய்ய. யதா³ கோ², ஆவுஸோ, தஸ்ஸ புரிஸஸ்ஸ ஏவமஸ்ஸ – ‘ஸம்விஸ்ஸத்தோ² கோ² ம்யாயம் க³ஹபதி வா க³ஹபதிபுத்தோ வா’தி, அத² நம் ரஹோக³தம் விதி³த்வா திண்ஹேன ஸத்தே²ன ஜீவிதா வோரோபேய்ய.

‘‘தம் கிம் மஞ்ஞஸி, ஆவுஸோ யமக, யதா³ ஹி ஸோ புரிஸோ அமும் க³ஹபதிம் வா க³ஹபதிபுத்தம் வா உபஸங்கமித்வா ஏவம் ஆஹ – ‘உபட்ட²ஹேய்யம் தம், ப⁴ந்தே’தி, ததா³பி ஸோ வத⁴கோவ. வத⁴கஞ்ச பன ஸந்தம் ந அஞ்ஞாஸி – ‘வத⁴கோ மே’தி. யதா³பி ஸோ உபட்ட²ஹதி புப்³பு³ட்டா²யீ பச்சா²னிபாதீ கிம்காரபடிஸ்ஸாவீ மனாபசாரீ பியவாதீ³, ததா³பி ஸோ வத⁴கோவ. வத⁴கஞ்ச பன ஸந்தம் ந அஞ்ஞாஸி – ‘வத⁴கோ மே’தி. யதா³பி நம் ரஹோக³தம் விதி³த்வா திண்ஹேன ஸத்தே²ன ஜீவிதா வோரோபேதி, ததா³பி ஸோ வத⁴கோவ. வத⁴கஞ்ச பன ஸந்தம் ந அஞ்ஞாஸி – ‘வத⁴கோ மே’’’தி. ‘‘ஏவமாவுஸோ’’தி. ‘‘ஏவமேவ கோ², ஆவுஸோ, அஸ்ஸுதவா புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபம் அத்ததோ ஸமனுபஸ்ஸதி, ரூபவந்தம் வா அத்தானம்; அத்தனி வா ரூபம், ரூபஸ்மிம் வா அத்தானம். வேத³னம்… ஸஞ்ஞம்… ஸங்கா²ரே… விஞ்ஞாணம் அத்ததோ ஸமனுபஸ்ஸதி, விஞ்ஞாணவந்தம் வா அத்தானம்; அத்தனி வா விஞ்ஞாணம், விஞ்ஞாணஸ்மிம் வா அத்தானம்’’.

‘‘ஸோ அனிச்சம் ரூபம் ‘அனிச்சம் ரூப’ந்தி யதா²பூ⁴தம் நப்பஜானாதி. அனிச்சம் வேத³னம் ‘அனிச்சா வேத³னா’தி யதா²பூ⁴தம் நப்பஜானாதி. அனிச்சம் ஸஞ்ஞம் ‘அனிச்சா ஸஞ்ஞா’தி யதா²பூ⁴தம் நப்பஜானாதி. அனிச்சே ஸங்கா²ரே ‘அனிச்சா ஸங்கா²ரா’தி யதா²பூ⁴தம் நப்பஜானாதி. அனிச்சம் விஞ்ஞாணம் ‘அனிச்சம் விஞ்ஞாண’ந்தி யதா²பூ⁴தம் நப்பஜானாதி.

‘‘து³க்க²ம் ரூபம் ‘து³க்க²ம் ரூப’ந்தி யதா²பூ⁴தம் நப்பஜானாதி. து³க்க²ம் வேத³னம்… து³க்க²ம் ஸஞ்ஞம்… து³க்கே² ஸங்கா²ரே… து³க்க²ம் விஞ்ஞாணம் ‘து³க்க²ம் விஞ்ஞாண’ந்தி யதா²பூ⁴தம் நப்பஜானாதி.

‘‘அனத்தம் ரூபம் ‘அனத்தா ரூப’ந்தி யதா²பூ⁴தம் நப்பஜானாதி. அனத்தம் வேத³னம்… அனத்தம் ஸஞ்ஞம்… அனத்தே ஸங்கா²ரே… அனத்தம் விஞ்ஞாணம் ‘அனத்தம் விஞ்ஞாண’ந்தி யதா²பூ⁴தம் நப்பஜானாதி.

‘‘ஸங்க²தம் ரூபம் ‘ஸங்க²தம் ரூப’ந்தி யதா²பூ⁴தம் நப்பஜானாதி. ஸங்க²தம் வேத³னம்… ஸங்க²தம் ஸஞ்ஞம்… ஸங்க²தே ஸங்கா²ரே… ஸங்க²தம் விஞ்ஞாணம் ‘ஸங்க²தம் விஞ்ஞாண’ந்தி யதா²பூ⁴தம் நப்பஜானாதி.

‘‘வத⁴கம் ரூபம் ‘வத⁴கம் ரூப’ந்தி யதா²பூ⁴தம் நப்பஜானாதி. வத⁴கம் வேத³னம் ‘வத⁴கா வேத³னா’தி… வத⁴கம் ஸஞ்ஞம் ‘வத⁴கா ஸஞ்ஞா’தி… வத⁴கே ஸங்கா²ரே ‘வத⁴கா ஸங்கா²ரா’தி யதா²பூ⁴தம் நப்பஜானாதி. வத⁴கம் விஞ்ஞாணம் ‘வத⁴கம் விஞ்ஞாண’ந்தி யதா²பூ⁴தம் நப்பஜானாதி.

‘‘ஸோ ரூபம் உபேதி உபாதி³யதி அதி⁴ட்டா²தி ‘அத்தா மே’தி. வேத³னம்… ஸஞ்ஞம்… ஸங்கா²ரே… விஞ்ஞாணம் உபேதி உபாதி³யதி அதி⁴ட்டா²தி ‘அத்தா மே’தி. தஸ்ஸிமே பஞ்சுபாதா³னக்க²ந்தா⁴ உபேதா உபாதி³ன்னா தீ³க⁴ரத்தம் அஹிதாய து³க்கா²ய ஸம்வத்தந்தி.

‘‘ஸுதவா ச கோ², ஆவுஸோ, அரியஸாவகோ அரியானம் த³ஸ்ஸாவீ…பே… ஸப்புரிஸத⁴ம்மே ஸுவினீதோ ந ரூபம் அத்ததோ ஸமனுபஸ்ஸதி, ந ரூபவந்தம் அத்தானம்; ந அத்தனி ரூபம், ந ரூபஸ்மிம் அத்தானம். ந வேத³னம்… ந ஸஞ்ஞம்… ந ஸங்கா²ரே… ந விஞ்ஞாணம் அத்ததோ ஸமனுபஸ்ஸதி, ந விஞ்ஞாணவந்தம் அத்தானம்; ந அத்தனி விஞ்ஞாணம், ந விஞ்ஞாணஸ்மிம் அத்தானம்.

‘‘ஸோ அனிச்சம் ரூபம் ‘அனிச்சம் ரூப’ந்தி யதா²பூ⁴தம் பஜானாதி. அனிச்சம் வேத³னம் … அனிச்சம் ஸஞ்ஞம்… அனிச்சே ஸங்கா²ரே … அனிச்சம் விஞ்ஞாணம் ‘அனிச்சம் விஞ்ஞாண’ந்தி யதா²பூ⁴தம் பஜானாதி.

‘‘து³க்க²ம் ரூபம் ‘து³க்க²ம் ரூப’ந்தி யதா²பூ⁴தம் பஜானாதி. து³க்க²ம் வேத³னம்… து³க்க²ம் ஸஞ்ஞம்… து³க்கே² ஸங்கா²ரே… து³க்க²ம் விஞ்ஞாணம் ‘து³க்க²ம் விஞ்ஞாண’ந்தி யதா²பூ⁴தம் பஜானாதி.

‘‘அனத்தம் ரூபம் ‘அனத்தா ரூப’ந்தி யதா²பூ⁴தம் பஜானாதி. அனத்தம் வேத³னம்… அனத்தம் ஸஞ்ஞம்… அனத்தே ஸங்கா²ரே… அனத்தம் விஞ்ஞாணம் ‘அனத்தா விஞ்ஞாண’ந்தி யதா²பூ⁴தம் பஜானாதி.

‘‘ஸங்க²தம் ரூபம் ‘ஸங்க²தம் ரூப’ந்தி யதா²பூ⁴தம் பஜானாதி. ஸங்க²தம் வேத³னம்… ஸங்க²தம் ஸஞ்ஞம்… ஸங்க²தே ஸங்கா²ரே… ஸங்க²தம் விஞ்ஞாணம் ‘ஸங்க²தம் விஞ்ஞாண’ந்தி யதா²பூ⁴தம் பஜானாதி.

‘‘வத⁴கம் ரூபம் ‘வத⁴கம் ரூப’ந்தி யதா²பூ⁴தம் பஜானாதி. வத⁴கம் வேத³னம்… வத⁴கம் ஸஞ்ஞம்… வத⁴கே ஸங்கா²ரே ‘‘வத⁴கா ஸங்கா²ரா’’தி யதா²பூ⁴தம் பஜானாதி. வத⁴கம் விஞ்ஞாணம் ‘வத⁴கம் விஞ்ஞாண’ந்தி யதா²பூ⁴தம் பஜானாதி.

‘‘ஸோ ரூபம் ந உபேதி, ந உபாதி³யதி, நாதி⁴ட்டா²தி – ‘அத்தா மே’தி. வேத³னம்… ஸஞ்ஞம்… ஸங்கா²ரே… விஞ்ஞாணம் ந உபேதி, ந உபாதி³யதி, நாதி⁴ட்டா²தி – ‘அத்தா மே’தி. தஸ்ஸிமே பஞ்சுபாதா³னக்க²ந்தா⁴ அனுபேதா அனுபாதி³ன்னா தீ³க⁴ரத்தம் ஹிதாய ஸுகா²ய ஸம்வத்தந்தீ’’தி. ‘‘ஏவமேதம், ஆவுஸோ ஸாரிபுத்த, ஹோதி யேஸம் ஆயஸ்மந்தானம் தாதி³ஸா ஸப்³ரஹ்மசாரினோ அனுகம்பகா அத்த²காமா ஓவாத³கா அனுஸாஸகா. இத³ஞ்ச பன மே ஆயஸ்மதோ ஸாரிபுத்தஸ்ஸ த⁴ம்மதே³ஸனம் ஸுத்வா அனுபாதா³ய ஆஸவேஹி சித்தம் விமுத்த’’ந்தி. ததியம்.

4. அனுராத⁴ஸுத்தம்

86. ஏவம் மே ஸுதம் – ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். தேன கோ² பன ஸமயேன ஆயஸ்மா அனுராதோ⁴ ப⁴க³வதோ அவிதூ³ரே அரஞ்ஞகுடிகாயம் விஹரதி. அத² கோ² ஸம்ப³ஹுலா அஞ்ஞதித்தி²யா பரிப்³பா³ஜகா யேன ஆயஸ்மா அனுராதோ⁴ தேனுபஸங்கமிம்ஸு; உபஸங்கமித்வா ஆயஸ்மதா அனுராதே⁴ன ஸத்³தி⁴ம் ஸம்மோதி³ம்ஸு. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே அஞ்ஞதித்தி²யா பரிப்³பா³ஜகா ஆயஸ்மந்தம் அனுராத⁴ம் ஏதத³வோசும் – ‘‘யோ ஸோ, ஆவுஸோ அனுராத⁴, ததா²க³தோ உத்தமபுரிஸோ பரமபுரிஸோ பரமபத்திபத்தோ, தம் ததா²க³தோ இமேஸு சதூஸு டா²னேஸு பஞ்ஞாபயமானோ பஞ்ஞாபேதி – ‘ஹோதி ததா²க³தோ பரம் மரணா’தி வா, ‘ந ஹோதி ததா²க³தோ பரம் மரணா’தி வா, ‘ஹோதி ச ந ச ஹோதி ததா²க³தோ பரம் மரணா’தி வா, ‘நேவ ஹோதி ந ந ஹோதி ததா²க³தோ பரம் மரணா’தி வா’’தி?

ஏவம் வுத்தே, ஆயஸ்மா அனுராதோ⁴ தே அஞ்ஞதித்தி²யே பரிப்³பா³ஜகே ஏதத³வோச – ‘‘யோ ஸோ ஆவுஸோ ததா²க³தோ உத்தமபுரிஸோ பரமபுரிஸோ பரமபத்திபத்தோ தம் ததா²க³தோ அஞ்ஞத்ர இமேஹி சதூஹி டா²னேஹி பஞ்ஞாபயமானோ பஞ்ஞாபேதி – ‘ஹோதி ததா²க³தோ பரம் மரணா’தி வா, ‘ந ஹோதி ததா²க³தோ பரம் மரணா’தி வா, ‘ஹோதி ச ந ச ஹோதி ததா²க³தோ பரம் மரணா’தி வா, ‘நேவ ஹோதி ந ந ஹோதி ததா²க³தோ பரம் மரணா’தி வா’’தி. ஏவம் வுத்தே, அஞ்ஞதித்தி²யா பரிப்³பா³ஜகா ஆயஸ்மந்தம் அனுராத⁴ம் ஏதத³வோசும் – ‘‘ஸோ சாயம் பி⁴க்கு² நவோ ப⁴விஸ்ஸதி அசிரபப்³ப³ஜிதோ, தே²ரோ வா பன பா³லோ அப்³யத்தோ’’தி. அத² கோ² அஞ்ஞதித்தி²யா பரிப்³பா³ஜகா ஆயஸ்மந்தம் அனுராத⁴ம் நவவாதே³ன ச பா³லவாதே³ன ச அபஸாதே³த்வா உட்டா²யாஸனா பக்கமிம்ஸு.

அத² கோ² ஆயஸ்மதோ அனுராத⁴ஸ்ஸ அசிரபக்கந்தேஸு தேஸு அஞ்ஞதித்தி²யேஸு பரிப்³பா³ஜகேஸு ஏதத³ஹோஸி – ‘‘ஸசே கோ² மம் தே அஞ்ஞதித்தி²யா பரிப்³பா³ஜகா உத்தரிம் பஞ்ஹம் புச்சே²ய்யும். கத²ம் ப்³யாகரமானோ நு க்²வாஹம் தேஸம் அஞ்ஞதித்தி²யானம் பரிப்³பா³ஜகானம் வுத்தவாதீ³ சேவ ப⁴க³வதோ அஸ்ஸம், ந ச ப⁴க³வந்தம் அபூ⁴தேன அப்³பா⁴சிக்கே²ய்யம், த⁴ம்மஸ்ஸ சானுத⁴ம்மம் ப்³யாகரேய்யம், ந ச கோசி ஸஹத⁴ம்மிகோ வாதா³னுவாதோ³ கா³ரய்ஹம் டா²னம் ஆக³ச்சே²ய்யா’’தி?

அத² கோ² ஆயஸ்மா அனுராதோ⁴ யேன ப⁴க³வா தேனுபஸங்கமி; உபஸங்கமித்வா…பே… ஏகமந்தம் நிஸின்னோ கோ² ஆயஸ்மா அனுராதோ⁴ ப⁴க³வந்தம் ஏதத³வோச – ‘‘இதா⁴ஹம், ப⁴ந்தே, ப⁴க³வதோ அவிதூ³ரே அரஞ்ஞகுடிகாயம் விஹராமி. அத² கோ², ப⁴ந்தே, ஸம்ப³ஹுலா அஞ்ஞதித்தி²யா பரிப்³பா³ஜகா யேனாஹம் தேனுபஸங்கமிம்ஸு …பே… மம் ஏதத³வோசும் – ‘யோ ஸோ, ஆவுஸோ அனுராத⁴, ததா²க³தோ உத்தமபுரிஸோ பரமபுரிஸோ பரமபத்திபத்தோ தம் ததா²க³தோ இமேஸு சதூஸு டா²னேஸு பஞ்ஞாபயமானோ பஞ்ஞாபேதி – ஹோதி ததா²க³தோ பரம் மரணாதி வா, ந ஹோதி… ஹோதி ச ந ச ஹோதி, நேவ ஹோதி ந ந ஹோதி ததா²க³தோ பரம் மரணாதி வா’’’தி?

ஏவம் வுத்தாஹம், ப⁴ந்தே, தே அஞ்ஞதித்தி²யே பரிப்³பா³ஜகே ஏதத³வோசம் – ‘‘யோ ஸோ, ஆவுஸோ, ததா²க³தோ உத்தமபுரிஸோ பரமபுரிஸோ பரமபத்திபத்தோ, தம் ததா²க³தோ அஞ்ஞத்ர இமேஹி சதூஹி டா²னேஹி பஞ்ஞாபயமானோ பஞ்ஞாபேதி – ‘ஹோதி ததா²க³தோ பரம் மரணா’தி வா…பே… ‘நேவ ஹோதி ந ந ஹோதி ததா²க³தோ பரம் மரணா’தி வாதி. ஏவம் வுத்தே, ப⁴ந்தே, தே அஞ்ஞதித்தி²யா பரிப்³பா³ஜகா மம் ஏதத³வோசும் – ‘ஸோ சாயம் பி⁴க்கு² ந வோ ப⁴விஸ்ஸதி அசிரபப்³ப³ஜிதோ தே²ரோ வா பன பா³லோ அப்³யத்தோ’தி. அத² கோ² மம், ப⁴ந்தே, தே அஞ்ஞதித்தி²யா பரிப்³பா³ஜகா நவவாதே³ன பா³லவாதே³ன ச அபஸாதே³த்வா உட்டா²யாஸனா பக்கமிம்ஸு’’.

‘‘தஸ்ஸ மய்ஹம், ப⁴ந்தே, அசிரபக்கந்தேஸு தேஸு அஞ்ஞதித்தி²யேஸு பரிப்³பா³ஜகேஸு ஏதத³ஹோஸி – ‘ஸசே கோ² மம் தே அஞ்ஞதித்தி²யா பரிப்³பா³ஜகா உத்தரிம் பஞ்ஹம் புச்சே²ய்யும். கத²ம் ப்³யாகரமானோ நு க்²வாஹம் தேஸம் அஞ்ஞதித்தி²யானம் பரிப்³பா³ஜகானம் வுத்தவாதீ³ சேவ ப⁴க³வதோ அஸ்ஸம், ந ச ப⁴க³வந்தம் அபூ⁴தேன அப்³பா⁴சிக்கே²ய்யம், த⁴ம்மஸ்ஸ சானுத⁴ம்மம் ப்³யாகரேய்யம், ந ச கோசி ஸஹத⁴ம்மிகோ வாதா³னுவாதோ³ கா³ரய்ஹம் டா²னம் ஆக³ச்சே²ய்யா’’’தி?

‘‘தம் கிம் மஞ்ஞஸி, அனுராத⁴, ரூபம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘யம் பனானிச்சம் து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம் கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதம், ப⁴ந்தே’’. ‘‘வேத³னா… ஸஞ்ஞா… ஸங்கா²ரா… விஞ்ஞாணம் நிச்சம் வா அனிச்சம் வா’’தி? ‘‘அனிச்சம் ப⁴ந்தே’’…பே… தஸ்மாதிஹ…பே… ஏவம் பஸ்ஸம்…பே… நாபரம் இத்த²த்தாயாதி பஜானாதி’’.

‘‘தம் கிம் மஞ்ஞஸி, அனுராத⁴, ரூபம் ததா²க³தோதி ஸமனுபஸ்ஸஸீ’’தி? ‘‘நோ ஹேதம், ப⁴ந்தே’’. ‘‘வேத³னம்… ஸஞ்ஞம்… ஸங்கா²ரே… விஞ்ஞாணம் ததா²க³தோதி ஸமனுபஸ்ஸஸீ’’தி? ‘‘நோ ஹேதம், ப⁴ந்தே’’.

‘‘தம் கிம் மஞ்ஞஸி, அனுராத⁴, ரூபஸ்மிம் ததா²க³தோதி ஸமனுபஸ்ஸஸீ’’தி? ‘‘நோ ஹேதம், ப⁴ந்தே’’. ‘‘அஞ்ஞத்ர ரூபா ததா²க³தோதி ஸமனுபஸ்ஸஸீ’’தி? ‘‘நோ ஹேதம், ப⁴ந்தே’’. ‘‘வேத³னாய…பே… அஞ்ஞத்ர வேத³னாய…பே… ஸஞ்ஞாய… அஞ்ஞத்ர ஸஞ்ஞாய… ஸங்கா²ரேஸு… அஞ்ஞத்ர ஸங்கா²ரேஹி… விஞ்ஞாணஸ்மிம்… அஞ்ஞத்ர விஞ்ஞாணா ததா²க³தோதி ஸமனுபஸ்ஸஸீ’’தி? ‘‘நோ ஹேதம், ப⁴ந்தே’’.

‘‘தம் கிம் மஞ்ஞஸி, அனுராத⁴, ரூபம்… வேத³னா… ஸஞ்ஞா… ஸங்கா²ரா… விஞ்ஞாணம் ததா²க³தோதி ஸமனுபஸ்ஸஸீ’’தி? ‘‘நோ ஹேதம், ப⁴ந்தே’’.

‘‘தம் கிம் மஞ்ஞஸி, அனுராத⁴, அயம் ஸோ அரூபீ அவேத³னோ அஸஞ்ஞீ அஸங்கா²ரோ அவிஞ்ஞாணோ ததா²க³தோதி ஸமனுபஸ்ஸஸீ’’தி? ‘‘நோ ஹேதம், ப⁴ந்தே’’.

‘‘ஏத்த² ச தே, அனுராத⁴, தி³ட்டே²வ த⁴ம்மே ஸச்சதோ தே²ததோ ததா²க³தே அனுபலப்³பி⁴யமானே கல்லம் நு தே தம் வேய்யாகரணம் – ‘யோ ஸோ, ஆவுஸோ, ததா²க³தோ உத்தமபுரிஸோ பரமபுரிஸோ பரமபத்திபத்தோ தம் ததா²க³தோ அஞ்ஞத்ர இமேஹி சதூஹி டா²னேஹி பஞ்ஞாபயமானோ பஞ்ஞாபேதி – ஹோதி ததா²க³தோ பரம் மரணாதி வா… நேவ ஹோதி ந ந ஹோதி ததா²க³தோ பரம் மரணாதி வா’’’தி? ‘‘நோ ஹேதம், ப⁴ந்தே’’.

‘‘ஸாது⁴ ஸாது⁴, அனுராத⁴! புப்³பே³ சாஹம், அனுராத⁴, ஏதரஹி ச து³க்க²ஞ்சேவ பஞ்ஞபேமி, து³க்க²ஸ்ஸ ச நிரோத⁴’’ந்தி. சதுத்த²ம்.

5. வக்கலிஸுத்தம்

87. ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆயஸ்மா வக்கலி கும்ப⁴காரனிவேஸனே விஹரதி ஆபா³தி⁴கோ து³க்கி²தோ பா³ள்ஹகி³லானோ. அத² கோ² ஆயஸ்மா வக்கலி உபட்டா²கே ஆமந்தேஸி – ‘‘ஏத² தும்ஹே, ஆவுஸோ, யேன ப⁴க³வா தேனுபஸங்கமத²; உபஸங்கமித்வா மம வசனேன ப⁴க³வதோ பாதே³ ஸிரஸா வந்த³த² – ‘வக்கலி, ப⁴ந்தே, பி⁴க்கு² ஆபா³தி⁴கோ து³க்கி²தோ பா³ள்ஹகி³லானோ, ஸோ ப⁴க³வதோ பாதே³ ஸிரஸா வந்த³தீ’தி. ஏவஞ்ச வதே³த² – ‘ஸாது⁴ கிர, ப⁴ந்தே, ப⁴க³வா யேன வக்கலி பி⁴க்கு² தேனுபஸங்கமது; அனுகம்பம் உபாதா³யா’’’தி. ‘‘ஏவமாவுஸோ’’தி கோ² தே பி⁴க்கூ² ஆயஸ்மதோ வக்கலிஸ்ஸ படிஸ்ஸுத்வா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் – ‘‘வக்கலி, ப⁴ந்தே, பி⁴க்கு² ஆபா³தி⁴கோ து³க்கி²தோ பா³ள்ஹகி³லானோ, ஸோ ப⁴க³வதோ பாதே³ ஸிரஸா வந்த³தி; ஏவஞ்ச பன வதே³தி – ‘ஸாது⁴ கிர, ப⁴ந்தே, ப⁴க³வா யேன வக்கலி பி⁴க்கு² தேனுபஸங்கமது; அனுகம்பம் உபாதா³யா’’’தி. அதி⁴வாஸேஸி ப⁴க³வா துண்ஹீபா⁴வேன.

அத² கோ² ப⁴க³வா நிவாஸேத்வா பத்தசீவரமாதா³ய யேனாயஸ்மா வக்கலி தேனுபஸங்கமி. அத்³த³ஸா கோ² ஆயஸ்மா வக்கலி ப⁴க³வந்தம் தூ³ரதோவ ஆக³ச்ச²ந்தம். தி³ஸ்வான மஞ்சகே ஸமதோ⁴ஸி [ஸமஞ்சோஸி (ஸீ.), ஸமஞ்சோபி (ஸ்யா. கம்.) ஸம் + தூ⁴ + ஈ = ஸமதோ⁴ஸி]. அத² கோ² ப⁴க³வா ஆயஸ்மந்தம் வக்கலிம் ஏதத³வோச – ‘‘அலம், வக்கலி, மா த்வம் மஞ்சகே ஸமதோ⁴ஸி. ஸந்திமானி ஆஸனானி பஞ்ஞத்தானி; தத்தா²ஹம் நிஸீதி³ஸ்ஸாமீ’’தி. நிஸீதி³ ப⁴க³வா பஞ்ஞத்தே ஆஸனே. நிஸஜ்ஜ கோ² ப⁴க³வா ஆயஸ்மந்தம் வக்கலிம் ஏதத³வோச – ‘‘கச்சி தே, வக்கலி, க²மனீயம், கச்சி யாபனீயம், கச்சி து³க்கா² வேத³னா படிக்கமந்தி, நோ அபி⁴க்கமந்தி; படிக்கமோஸானம் பஞ்ஞாயதி, நோ அபி⁴க்கமோ’’தி? ‘‘ந மே, ப⁴ந்தே, க²மனீயம், ந யாபனீயம்; பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானம் பஞ்ஞாயதி, நோ படிக்கமோ’’தி. ‘‘கச்சி தே, வக்கலி, ந கிஞ்சி குக்குச்சம், ந கோசி விப்படிஸாரோ’’தி? ‘‘தக்³க⁴ மே, ப⁴ந்தே, அனப்பகம் குக்குச்சம், அனப்பகோ விப்படிஸாரோ’’தி. ‘‘கச்சி பன தம், வக்கலி, அத்தா ஸீலதோ ந உபவத³தீ’’தி? ‘‘ந கோ² மம், ப⁴ந்தே, அத்தா ஸீலதோ உபவத³தீ’’தி. ‘‘நோ சே கிர தம், வக்கலி, அத்தா ஸீலதோ உபவத³தி; அத² கிஞ்ச தே குக்குச்சம் கோ ச விப்படிஸாரோ’’தி? ‘‘சிரபடிகாஹம், ப⁴ந்தே, ப⁴க³வந்தம் த³ஸ்ஸனாய உபஸங்கமிதுகாமோ, நத்தி² ச மே காயஸ்மிம் தாவதிகா ப³லமத்தா, யாவதாஹம் [யாஹம் (ஸீ.), யாயாஹம் (பீ.)] ப⁴க³வந்தம் த³ஸ்ஸனாய உபஸங்கமேய்ய’’ந்தி.

‘‘அலம், வக்கலி, கிம் தே இமினா பூதிகாயேன தி³ட்டே²ன? யோ கோ², வக்கலி, த⁴ம்மம் பஸ்ஸதி ஸோ மம் பஸ்ஸதி; யோ மம் பஸ்ஸதி ஸோ த⁴ம்மம் பஸ்ஸதி. த⁴ம்மஞ்ஹி, வக்கலி, பஸ்ஸந்தோ மம் பஸ்ஸதி; மம் பஸ்ஸந்தோ த⁴ம்மம் பஸ்ஸதி.

‘‘தம் கிம் மஞ்ஞஸி, வக்கலி, ரூபம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘யம் பனானிச்சம் து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதம், ப⁴ந்தே’’. ‘‘வேத³னா… ஸஞ்ஞா… ஸங்கா²ரா… விஞ்ஞாணம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’…பே… ஏஸோ மே அத்தாதி? ‘‘நோ ஹேதம், ப⁴ந்தே’’. ‘‘தஸ்மாதிஹ…பே… ஏவம் பஸ்ஸம்…பே… நாபரம் இத்த²த்தாயாதி பஜானாதீ’’தி.

அத² கோ² ப⁴க³வா ஆயஸ்மந்தம் வக்கலிம் இமினா ஓவாதே³ன ஓவதி³த்வா உட்டா²யாஸனா யேன கி³ஜ்ஜ²கூடோ பப்³ப³தோ தேன பக்காமி. அத² கோ² ஆயஸ்மா வக்கலி அசிரபக்கந்தஸ்ஸ ப⁴க³வதோ உபட்டா²கே ஆமந்தேஸி – ‘‘ஏத² மம், ஆவுஸோ, மஞ்சகம் ஆரோபேத்வா யேன இஸிகி³லிபஸ்ஸம் காளஸிலா தேனுபஸங்கமத². கத²ஞ்ஹி நாம மாதி³ஸோ அந்தரக⁴ரே காலம் கத்தப்³ப³ம் மஞ்ஞேய்யா’’தி? ‘‘ஏவமாவுஸோ’’தி கோ² தே பி⁴க்கூ² ஆயஸ்மதோ வக்கலிஸ்ஸ படிஸ்ஸுத்வா ஆயஸ்மந்தம் வக்கலிம் மஞ்சகம் ஆரோபேத்வா யேன இஸிகி³லிபஸ்ஸம் காளஸிலா தேனுபஸங்கமிம்ஸு. அத² கோ² ப⁴க³வா தஞ்ச ரத்திம் தஞ்ச தி³வாவஸேஸம் கி³ஜ்ஜ²கூடே பப்³ப³தே விஹாஸி. அத² கோ² த்³வே தே³வதாயோ அபி⁴க்கந்தாய ரத்தியா அபி⁴க்கந்தவண்ணா கேவலகப்பம் கி³ஜ்ஜ²கூடம் ஓபா⁴ஸேத்வா யேன ப⁴க³வா தேனுபஸங்கமிம்ஸு…பே… ஏகமந்தம் அட்ட²ம்ஸு. ஏகமந்தம் டி²தா கோ² ஏகா தே³வதா ப⁴க³வந்தம் ஏதத³வோச – ‘‘வக்கலி, ப⁴ந்தே, பி⁴க்கு² விமோக்கா²ய சேதேதீ’’தி. அபரா தே³வதா ப⁴க³வந்தம் ஏதத³வோச – ‘‘ஸோ ஹி நூன, ப⁴ந்தே, ஸுவிமுத்தோ விமுச்சிஸ்ஸதீ’’தி. இத³மவோசும் தா தே³வதாயோ. இத³ம் வத்வா ப⁴க³வந்தம் அபி⁴வாதே³த்வா பத³க்கி²ணம் கத்வா தத்தே²வந்தரதா⁴யிம்ஸு.

அத² கோ² ப⁴க³வா தஸ்ஸா ரத்தியா அச்சயேன பி⁴க்கூ² ஆமந்தேஸி – ‘‘ஏத² தும்ஹே, பி⁴க்க²வே, யேன வக்கலி பி⁴க்கு² தேனுபஸங்கமத²; உபஸங்கமித்வா வக்கலிம் பி⁴க்கு²ம் ஏவம் வதே³த² –

‘‘‘ஸுணாவுஸோ த்வம், வக்கலி, ப⁴க³வதோ வசனம் த்³வின்னஞ்ச தே³வதானம். இமம், ஆவுஸோ, ரத்திம் த்³வே தே³வதாயோ அபி⁴க்கந்தாய ரத்தியா அபி⁴க்கந்தவண்ணா கேவலகப்பம் கி³ஜ்ஜ²கூடம் ஓபா⁴ஸேத்வா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் அட்ட²ம்ஸு. ஏகமந்தம் டி²தா கோ², ஆவுஸோ, ஏகா தே³வதா ப⁴க³வந்தம் ஏதத³வோச – வக்கலி, ப⁴ந்தே, பி⁴க்கு² விமோக்கா²ய சேதேதீதி. அபரா தே³வதா ப⁴க³வந்தம் ஏதத³வோச – ஸோ ஹி நூன, ப⁴ந்தே, ஸுவிமுத்தோ விமுச்சிஸ்ஸதீதி. ப⁴க³வா ச தம், ஆவுஸோ வக்கலி, ஏவமாஹ – மா பா⁴யி, வக்கலி; மா பா⁴யி, வக்கலி! அபாபகம் தே மரணம் ப⁴விஸ்ஸதி, அபாபிகா காலகிரியா’’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ படிஸ்ஸுத்வா யேனாயஸ்மா வக்கலி தேனுபஸங்கமிம்ஸு; உபஸங்கமித்வா ஆயஸ்மந்தம் வக்கலிம் ஏதத³வோசும் – ‘‘ஸுணாவுஸோ வக்கலி, ப⁴க³வதோ வசனம் த்³வின்னஞ்ச தே³வதான’’ந்தி.

அத² கோ² ஆயஸ்மா வக்கலி உபட்டா²கே ஆமந்தேஸி – ‘‘ஏத² மம், ஆவுஸோ, மஞ்சகா ஓரோபேத². கத²ஞ்ஹி நாம மாதி³ஸோ உச்சே ஆஸனே நிஸீதி³த்வா தஸ்ஸ ப⁴க³வதோ ஸாஸனம் ஸோதப்³ப³ம் மஞ்ஞேய்யா’’தி! ‘‘ஏவமாவுஸோ’’தி கோ² தே பி⁴க்கூ² ஆயஸ்மதோ வக்கலிஸ்ஸ படிஸ்ஸுத்வா ஆயஸ்மந்தம் வக்கலிம் மஞ்சகா ஓரோபேஸும். ‘‘இமம், ஆவுஸோ, ரத்திம் த்³வே தே³வதாயோ அபி⁴க்கந்தாய ரத்தியா…பே… ஏகமந்தம் அட்ட²ம்ஸு. ஏகமந்தம் டி²தா கோ², ஆவுஸோ, ஏகா தே³வதா ப⁴க³வந்தம் ஏதத³வோச – ‘வக்கலி, ப⁴ந்தே, பி⁴க்கு² விமோக்கா²ய சேதேதீ’தி. அபரா தே³வதா ப⁴க³வந்தம் ஏதத³வோச – ‘ஸோ ஹி நூன, ப⁴ந்தே, ஸுவிமுத்தோ விமுச்சிஸ்ஸதீ’தி. ப⁴க³வா ச தம், ஆவுஸோ வக்கலி, ஏவமாஹ – ‘மா பா⁴யி, வக்கலி; மா பா⁴யி, வக்கலி! அபாபகம் தே மரணம் ப⁴விஸ்ஸதி, அபாபிகா காலகிரியா’’’தி. ‘‘தேன ஹாவுஸோ, மம வசனேன ப⁴க³வதோ பாதே³ ஸிரஸா வந்த³த² – ‘வக்கலி, ப⁴ந்தே, பி⁴க்கு² ஆபா³தி⁴கோ து³க்கி²தோ பா³ள்ஹகி³லானோ. ஸோ ப⁴க³வதோ பாதே³ ஸிரஸா வந்த³தீ’தி. ஏவஞ்ச வதே³த² – ‘ரூபம் அனிச்சம். தாஹம், ப⁴ந்தே, ந கங்கா²மி. யத³னிச்சம் தம் து³க்க²ந்தி ந விசிகிச்சா²மி. யத³னிச்சம் து³க்க²ம் விபரிணாமத⁴ம்மம், நத்தி² மே தத்த² ச²ந்தோ³ வா ராகோ³ வா பேமம் வாதி ந விசிகிச்சா²மி. வேத³னா அனிச்சா. தாஹம், ப⁴ந்தே, ந கங்கா²மி. யத³னிச்சம் தம் து³க்க²ந்தி ந விசிகிச்சா²மி. யத³னிச்சம் து³க்க²ம் விபரிணாமத⁴ம்மம், நத்தி² மே தத்த² ச²ந்தோ³ வா ராகோ³ வா பேமம் வாதி ந விசிகிச்சா²மி. ஸஞ்ஞா… ஸங்கா²ரா அனிச்சா. தாஹம், ப⁴ந்தே, ந கங்கா²மி. யத³னிச்சம் தம் து³க்க²ந்தி ந விசிகிச்சா²மி. யத³னிச்சம் து³க்க²ம் விபரிணாமத⁴ம்மம், நத்தி² மே தத்த² ச²ந்தோ³ வா ராகோ³ வா பேமம் வாதி ந விசிகிச்சா²மி. விஞ்ஞாணம் அனிச்சம். தாஹம், ப⁴ந்தே, ந கங்கா²மி. யத³னிச்சம் தம் து³க்க²ந்தி ந விசிகிச்சா²மி. யத³னிச்சம் து³க்க²ம் விபரிணாமத⁴ம்மம், நத்தி² மே தத்த² ச²ந்தோ³ வா ராகோ³ வா பேமம் வாதி ந விசிகிச்சா²மீ’’’தி. ‘‘ஏவமாவுஸோ’’தி கோ² தே பி⁴க்கூ² ஆயஸ்மதோ வக்கலிஸ்ஸ படிஸ்ஸுத்வா பக்கமிம்ஸு. அத² கோ² ஆயஸ்மா வக்கலி அசிரபக்கந்தேஸு தேஸு பி⁴க்கூ²ஸு ஸத்த²ம் ஆஹரேஸி.

அத² கோ² தே பி⁴க்கூ² யேன ப⁴க³வா தேனுபஸங்கமிம்ஸு; உபஸங்கமித்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் – ‘‘வக்கலி, ப⁴ந்தே, பி⁴க்கு² ஆபா³தி⁴கோ து³க்கி²தோ பா³ள்ஹகி³லானோ; ஸோ ப⁴க³வதோ பாதே³ ஸிரஸா வந்த³தி; ஏவஞ்ச வதே³தி – ‘ரூபம் அனிச்சம். தாஹம், ப⁴ந்தே, ந கங்கா²மி. யத³னிச்சம் தம் து³க்க²ந்தி ந விசிகிச்சா²மி. யத³னிச்சம் து³க்க²ம் விபரிணாமத⁴ம்மம், நத்தி² மே தத்த² ச²ந்தோ³ வா ராகோ³ வா பேமம் வாதி ந விசிகிச்சா²மி. வேத³னா… ஸஞ்ஞா… ஸங்கா²ரா … விஞ்ஞாணம் அனிச்சம். தாஹம், ப⁴ந்தே, ந கங்கா²மி. யத³னிச்சம் தம் து³க்க²ந்தி ந விசிகிச்சா²மி. யத³னிச்சம் து³க்க²ம் விபரிணாமத⁴ம்மம், நத்தி² மே தத்த² ச²ந்தோ³ வா ராகோ³ வா பேமம் வாதி ந விசிகிச்சா²மீ’’’தி.

அத² கோ² ப⁴க³வா பி⁴க்கூ² ஆமந்தேஸி – ‘‘ஆயாம, பி⁴க்க²வே, யேன இஸிகி³லிபஸ்ஸம் காளஸிலா தேனுபஸங்கமிஸ்ஸாம; யத்த² வக்கலினா குலபுத்தேன ஸத்த²மாஹரித’’ந்தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். அத² கோ² ப⁴க³வா ஸம்ப³ஹுலேஹி பி⁴க்கூ²ஹி ஸத்³தி⁴ம் யேன இஸிகி³லிபஸ்ஸம் காளஸிலா தேனுபஸங்கமி. அத்³த³ஸா கோ² ப⁴க³வா ஆயஸ்மந்தம் வக்கலிம் தூ³ரதோவ மஞ்சகே விவத்தக்க²ந்த⁴ம் ஸேமானம்.

தேன கோ² பன ஸமயேன தூ⁴மாயிதத்தம் திமிராயிதத்தம் க³ச்ச²தேவ புரிமம் தி³ஸம், க³ச்ச²தி பச்சி²மம் தி³ஸம், க³ச்ச²தி உத்தரம் தி³ஸம், க³ச்ச²தி த³க்கி²ணம் தி³ஸம், க³ச்ச²தி உத்³த⁴ம் தி³ஸம், க³ச்ச²தி அதோ⁴ தி³ஸம், க³ச்ச²தி அனுதி³ஸம். அத² கோ² ப⁴க³வா பி⁴க்கூ² ஆமந்தேஸி – ‘‘பஸ்ஸத² நோ தும்ஹே, பி⁴க்க²வே, ஏதம் தூ⁴மாயிதத்தம் திமிராயிதத்தம் க³ச்ச²தேவ புரிமம் தி³ஸம்…பே… க³ச்ச²தி அனுதி³ஸ’’ந்தி. ‘‘ஏவம், ப⁴ந்தே’’. ‘‘ஏஸோ கோ², பி⁴க்க²வே, மாரோ பாபிமா வக்கலிஸ்ஸ குலபுத்தஸ்ஸ விஞ்ஞாணம் ஸமன்வேஸதி [ஸமன்னேஸதி (க. ஸீ. பீ.)] – ‘கத்த² வக்கலிஸ்ஸ குலபுத்தஸ்ஸ விஞ்ஞாணம் பதிட்டி²த’ந்தி? அப்பதிட்டி²தேன ச, பி⁴க்க²வே, விஞ்ஞாணேன வக்கலி குலபுத்தோ பரினிப்³பு³தோ’’தி. பஞ்சமம்.

6. அஸ்ஸஜிஸுத்தம்

88. ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆயஸ்மா அஸ்ஸஜி கஸ்ஸபகாராமே விஹரதி ஆபா³தி⁴கோ து³க்கி²தோ பா³ள்ஹகி³லானோ. அத² கோ² ஆயஸ்மா அஸ்ஸஜி உபட்டா²கே ஆமந்தேஸி – ‘‘ஏத² தும்ஹே, ஆவுஸோ, யேன ப⁴க³வா தேனுபஸங்கமத²; உபஸங்கமித்வா மம வசனேன ப⁴க³வதோ பாதே³ ஸிரஸா வந்த³த² – ‘அஸ்ஸஜி, ப⁴ந்தே, பி⁴க்கு² ஆபா³தி⁴கோ து³க்கி²தோ பா³ள்ஹகி³லானோ. ஸோ ப⁴க³வதோ பாதே³ ஸிரஸா வந்த³தீ’தி. ஏவஞ்ச வதே³த² – ‘ஸாது⁴ கிர, ப⁴ந்தே, ப⁴க³வா யேன அஸ்ஸஜி பி⁴க்கு² தேனுபஸங்கமது அனுகம்பம் உபாதா³யா’’’தி. ‘‘ஏவமாவுஸோ’’தி கோ² தே பி⁴க்கூ² ஆயஸ்மதோ அஸ்ஸஜிஸ்ஸ படிஸ்ஸுத்வா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் – ‘‘அஸ்ஸஜி, ப⁴ந்தே, பி⁴க்கு² ஆபா³தி⁴கோ…பே… ஸாது⁴ கிர, ப⁴ந்தே, ப⁴க³வா யேன அஸ்ஸஜி பி⁴க்கு² தேனுபஸங்கமது அனுகம்பம் உபாதா³யா’’தி. அதி⁴வாஸேஸி ப⁴க³வா துண்ஹீபா⁴வேன.

அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ யேனாயஸ்மா அஸ்ஸஜி தேனுபஸங்கமி. அத்³த³ஸா கோ² ஆயஸ்மா அஸ்ஸஜி ப⁴க³வந்தம் தூ³ரதோவ ஆக³ச்ச²ந்தம். தி³ஸ்வான மஞ்சகே ஸமதோ⁴ஸி. அத² கோ² ப⁴க³வா ஆயஸ்மந்தம் அஸ்ஸஜிம் [ஆயஸ்மதோ அஸ்ஸஜிஸ்ஸ (பீ. க.)] ஏதத³வோச – ‘‘அலம், அஸ்ஸஜி, மா த்வம் மஞ்சகே ஸமதோ⁴ஸி. ஸந்திமானி ஆஸனானி பஞ்ஞத்தானி, தத்தா²ஹம் நிஸீதி³ஸ்ஸாமீ’’தி. நிஸீதி³ ப⁴க³வா பஞ்ஞத்தே ஆஸனே. நிஸஜ்ஜ கோ² ப⁴க³வா ஆயஸ்மந்தம் அஸ்ஸஜிம் ஏதத³வோச – ‘‘கச்சி தே, அஸ்ஸஜி, க²மனீயம், கச்சி யாபனீயம்…பே… படிக்கமோஸானம் பஞ்ஞாயதி நோ அபி⁴க்கமோ’’தி?

‘‘ந மே, ப⁴ந்தே, க²மனீயம்…பே… அபி⁴க்கமோஸானம் பஞ்ஞாயதி நோ படிக்கமோ’’தி. ‘‘கச்சி தே, அஸ்ஸஜி, ந கிஞ்சி குக்குச்சம் ந கோசி விப்படிஸாரோ’’தி? ‘‘தக்³க⁴ மே, ப⁴ந்தே, அனப்பகம் குக்குச்சம் அனப்பகோ விப்படிஸாரோ’’தி. ‘‘கச்சி பன தம், அஸ்ஸஜி, அத்தா ஸீலதோ ந உபவத³தீ’’தி? ‘‘ந கோ² மம், ப⁴ந்தே, அத்தா ஸீலதோ உபவத³தீ’’தி. ‘‘நோ சே கிர தம், அஸ்ஸஜி, அத்தா ஸீலதோ உபவத³தி, அத² கிஞ்ச தே குக்குச்சம் கோ ச விப்படிஸாரோ’’தி? ‘‘புப்³பே³ க்²வாஹம், ப⁴ந்தே, கே³லஞ்ஞே பஸ்ஸம்பே⁴த்வா பஸ்ஸம்பே⁴த்வா காயஸங்கா²ரே விஹராமி, ஸோஹம் ஸமாதி⁴ம் நப்படிலபா⁴மி. தஸ்ஸ மய்ஹம், ப⁴ந்தே, தம் ஸமாதி⁴ம் அப்படிலப⁴தோ ஏவம் ஹோதி – ‘நோ சஸ்ஸாஹம் பரிஹாயாமீ’’’தி. ‘‘யே தே, அஸ்ஸஜி, ஸமணப்³ராஹ்மணா ஸமாதி⁴ஸாரகா ஸமாதி⁴ஸாமஞ்ஞா தேஸம் தம் ஸமாதி⁴ம் அப்படிலப⁴தம் ஏவம் ஹோதி – ‘நோ சஸ்ஸு மயம் பரிஹாயாமா’’’தி.

‘‘தம் கிம் மஞ்ஞஸி, அஸ்ஸஜி, ரூபம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’…பே… விஞ்ஞாணம் …பே… தஸ்மாதிஹ…பே… ஏவம் பஸ்ஸம்…பே… நாபரம் இத்த²த்தாயாதி பஜானாதீதி. ஸோ ஸுக²ம் சே வேத³னம் வேத³யதி [வேதி³யதி (ஸீ. பீ.)], ஸா ‘அனிச்சா’தி பஜானாதி. ‘அனஜ்ஜோ²ஸிதா’தி பஜானாதி. ‘அனபி⁴னந்தி³தா’தி பஜானாதி. து³க்க²ம் சே வேத³னம் வேத³யதி, ஸா ‘அனிச்சா’தி பஜானாதி. ‘அனஜ்ஜோ²ஸிதா’தி பஜானாதி. ‘அனபி⁴னந்தி³தா’தி பஜானாதி. அது³க்க²மஸுக²ம் சே வேத³னம் வேத³யதி, ஸா ‘அனிச்சா’தி பஜானாதி…பே… ‘அனபி⁴னந்தி³தா’தி பஜானாதி. ஸோ ஸுக²ம் சே வேத³னம் வேத³யதி, விஸம்யுத்தோ நம் வேத³யதி; து³க்க²ம் சே வேத³னம் வேத³யதி, விஸம்யுத்தோ நம் வேத³யதி; அது³க்க²மஸுக²ம் சே வேத³னம் வேத³யதி, விஸம்யுத்தோ நம் வேத³யதி. ஸோ காயபரியந்திகம் சே வேத³னம் வேத³யமானோ ‘காயபரியந்திகம் வேத³னம் வேத³யாமீ’தி பஜானாதி. ஜீவிதபரியந்திகம் சே வேத³னம் வேத³யமானோ ‘ஜீவிதபரியந்திகம் வேத³னம் வேத³யாமீ’தி பஜானாதி. ‘காயஸ்ஸ பே⁴தா³ உத்³த⁴ம் ஜீவிதபரியாதா³னா இதே⁴வ ஸப்³ப³வேத³யிதானி அனபி⁴னந்தி³தானி ஸீதீப⁴விஸ்ஸந்தீ’தி பஜானாதி.

‘‘ஸேய்யதா²பி, அஸ்ஸஜி, தேலஞ்ச படிச்ச, வட்டிஞ்ச படிச்ச, தேலப்பதீ³போ ஜா²யேய்ய; தஸ்ஸேவ தேலஸ்ஸ ச வட்டியா ச பரியாதா³னா அனாஹாரோ நிப்³பா³யேய்ய. ஏவமேவ கோ², அஸ்ஸஜி, பி⁴க்கு² காயபரியந்திகம் வேத³னம் வேத³யமானோ ‘காயபரியந்திகம் வேத³னம் வேத³யாமீ’தி பஜானாதி. ஜீவிதபரியந்திகம் வேத³னம் வேத³யமானோ ‘ஜீவிதபரியந்திகம் வேத³னம் வேத³யாமீ’தி பஜானாதி. ‘காயஸ்ஸ பே⁴தா³ உத்³த⁴ம் ஜீவிதபரியாதா³னா இதே⁴வ ஸப்³ப³வேத³யிதானி அனபி⁴னந்தி³தானி ஸீதீப⁴விஸ்ஸந்தீ’தி பஜானாதீ’’தி. ச²ட்ட²ம்.

7. கே²மகஸுத்தம்

89. ஏகம் ஸமயம் ஸம்ப³ஹுலா தே²ரா பி⁴க்கூ² கோஸம்பி³யம் விஹரந்தி கோ⁴ஸிதாராமே. தேன கோ² பன ஸமயேன ஆயஸ்மா கே²மகோ ப³த³ரிகாராமே விஹரதி ஆபா³தி⁴கோ து³க்கி²தோ பா³ள்ஹகி³லானோ. அத² கோ² தே²ரா பி⁴க்கூ² ஸாயன்ஹஸமயம் படிஸல்லானா வுட்டி²தா ஆயஸ்மந்தம் தா³ஸகம் ஆமந்தேஸும் – ‘‘ஏஹி த்வம், ஆவுஸோ தா³ஸக, யேன கே²மகோ பி⁴க்கு² தேனுபஸங்கம; உபஸங்கமித்வா கே²மகம் பி⁴க்கு²ம் ஏவம் வதே³ஹி – ‘தே²ரா தம், ஆவுஸோ கே²மக, ஏவமாஹம்ஸு – கச்சி தே, ஆவுஸோ, க²மனீயம், கச்சி யாபனீயம், கச்சி து³க்கா² வேத³னா படிக்கமந்தி நோ அபி⁴க்கமந்தி, படிக்கமோஸானம் பஞ்ஞாயதி நோ அபி⁴க்கமோ’’’தி? ‘‘ஏவமாவுஸோ’’தி கோ² ஆயஸ்மா தா³ஸகோ தே²ரானம் பி⁴க்கூ²னம் படிஸ்ஸுத்வா யேனாயஸ்மா கே²மகோ தேனுபஸங்கமி; உபஸங்கமித்வா ஆயஸ்மந்தம் கே²மகம் ஏதத³வோச – ‘‘தே²ரா தம், ஆவுஸோ கே²மக, ஏவமாஹம்ஸு – ‘கச்சி தே, ஆவுஸோ, க²மனீயம்…பே… நோ அபி⁴க்கமோ’’’தி? ‘‘ந மே, ஆவுஸோ, க²மனீயம் ந யாபனீயம்…பே… அபி⁴க்கமோஸானம் பஞ்ஞாயதி நோ படிக்கமோ’’தி.

அத² கோ² ஆயஸ்மா தா³ஸகோ யேன தே²ரா பி⁴க்கூ² தேனுபஸங்கமி; உபஸங்கமித்வா தே²ரே பி⁴க்கூ² ஏதத³வோச – ‘‘கே²மகோ, ஆவுஸோ, பி⁴க்கு² ஏவமாஹ – ‘ந மே, ஆவுஸோ, க²மனீயம்…பே… அபி⁴க்கமோஸானம் பஞ்ஞாயதி நோ படிக்கமோ’’’தி. ‘‘ஏஹி த்வம், ஆவுஸோ தா³ஸக, யேன கே²மகோ பி⁴க்கு² தேனுபஸங்கம; உபஸங்கமித்வா கே²மகம் பி⁴க்கு²ம் ஏவம் வதே³ஹி – ‘தே²ரா தம், ஆவுஸோ கே²மக, ஏவமாஹம்ஸு – பஞ்சிமே, ஆவுஸோ, உபாதா³னக்க²ந்தா⁴ வுத்தா ப⁴க³வதா, ஸேய்யதி²த³ம் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴. இமேஸு ஆயஸ்மா கே²மகோ பஞ்சஸு உபாதா³னக்க²ந்தே⁴ஸு கிஞ்சி அத்தம் வா அத்தனியம் வா ஸமனுபஸ்ஸதீ’’’தி?

‘‘ஏவமாவுஸோ’’தி கோ² ஆயஸ்மா தா³ஸகோ தே²ரானம் பி⁴க்கூ²னம் படிஸ்ஸுத்வா யேனாயஸ்மா கே²மகோ தேனுபஸங்கமி; உபஸங்கமித்வா…பே… தே²ரா தம், ஆவுஸோ கே²மக, ஏவமாஹம்ஸு – ‘‘பஞ்சிமே, ஆவுஸோ, உபாதா³னக்க²ந்தா⁴ வுத்தா ப⁴க³வதா, ஸேய்யதி²த³ம் – ரூபுபாதா³னக்க²ந்தோ⁴…பே… விஞ்ஞாணுபாதா³னக்க²ந்தோ⁴. இமேஸு ஆயஸ்மா கே²மகோ பஞ்சஸு உபாதா³னக்க²ந்தே⁴ஸு கிஞ்சி அத்தம் வா அத்தனியம் வா ஸமனுபஸ்ஸதீ’’தி? ‘‘பஞ்சிமே, ஆவுஸோ, உபாதா³னக்க²ந்தா⁴ வுத்தா ப⁴க³வதா, ஸேய்யதி²த³ம் – ரூபுபாதா³னக்க²ந்தோ⁴…பே… விஞ்ஞாணுபாதா³னக்க²ந்தோ⁴. இமேஸு க்²வாஹம், ஆவுஸோ, பஞ்சஸு உபாதா³னக்க²ந்தே⁴ஸு ந கிஞ்சி அத்தம் வா அத்தனியம் வா ஸமனுபஸ்ஸாமீ’’தி.

அத² கோ² ஆயஸ்மா தா³ஸகோ யேன தே²ரா பி⁴க்கூ² தேனுபஸங்கமி; உபஸங்கமித்வா தே²ரே பி⁴க்கூ² ஏதத³வோச – ‘‘கே²மகோ, ஆவுஸோ, பி⁴க்கு² ஏவமாஹ – ‘பஞ்சிமே, ஆவுஸோ, உபாதா³னக்க²ந்தா⁴ வுத்தா ப⁴க³வதா, ஸேய்யதி²த³ம் – ரூபுபாதா³னக்க²ந்தோ⁴…பே… விஞ்ஞாணுபாதா³னக்க²ந்தோ⁴. இமேஸு க்²வாஹம், ஆவுஸோ, பஞ்சஸு உபாதா³னக்க²ந்தே⁴ஸு ந கிஞ்சி அத்தம் வா அத்தனியம் வா ஸமனுபஸ்ஸாமீ’’’தி. ‘‘ஏஹி த்வம், ஆவுஸோ தா³ஸக, யேன கே²மகோ பி⁴க்கு² தேனுபஸங்கம; உபஸங்கமித்வா கே²மகம் பி⁴க்கு²ம் ஏவம் வதே³ஹி – ‘தே²ரா தம், ஆவுஸோ கே²மக, ஏவமாஹம்ஸு – பஞ்சிமே, ஆவுஸோ, உபாதா³னக்க²ந்தா⁴ வுத்தா ப⁴க³வதா, ஸேய்யதி²த³ம் – ரூபுபாதா³னக்க²ந்தோ⁴…பே… விஞ்ஞாணுபாதா³னக்க²ந்தோ⁴. நோ சே கிராயஸ்மா கே²மகோ இமேஸு பஞ்சஸு உபாதா³னக்க²ந்தே⁴ஸு கிஞ்சி அத்தம் வா அத்தனியம் வா ஸமனுபஸ்ஸதி. தேனஹாயஸ்மா கே²மகோ அரஹம் கீ²ணாஸவோ’’’தி.

‘‘ஏவமாவுஸோ’’தி கோ² ஆயஸ்மா தா³ஸகோ தே²ரானம் பி⁴க்கூ²னம் படிஸ்ஸுத்வா யேனாயஸ்மா கே²மகோ…பே… தே²ரா தம், ஆவுஸோ கே²மக, ஏவமாஹம்ஸு – ‘‘பஞ்சிமே, ஆவுஸோ, உபாதா³னக்க²ந்தா⁴ வுத்தா ப⁴க³வதா, ஸேய்யதி²த³ம் – ரூபுபாதா³னக்க²ந்தோ⁴…பே… விஞ்ஞாணுபாதா³னக்க²ந்தோ⁴; நோ சே கிராயஸ்மா கே²மகோ இமேஸு பஞ்சஸு உபாதா³னக்க²ந்தே⁴ஸு கிஞ்சி அத்தம் வா அத்தனியம் வா ஸமனுபஸ்ஸதி, தேனஹாயஸ்மா கே²மகோ அரஹம் கீ²ணாஸவோ’’தி. ‘‘பஞ்சிமே, ஆவுஸோ, உபாதா³னக்க²ந்தா⁴ வுத்தா ப⁴க³வதா, ஸேய்யதி²த³ம் – ரூபுபாதா³னக்க²ந்தோ⁴…பே… விஞ்ஞாணுபாதா³னக்க²ந்தோ⁴. இமேஸு க்²வாஹம், ஆவுஸோ, பஞ்சஸு உபாதா³னக்க²ந்தே⁴ஸு ந கிஞ்சி அத்தம் வா அத்தனியம் வா ஸமனுபஸ்ஸாமி, ந சம்ஹி அரஹம் கீ²ணாஸவோ; அபி ச மே, ஆவுஸோ, பஞ்சஸு உபாதா³னக்க²ந்தே⁴ஸு ‘அஸ்மீ’தி அதி⁴க³தம், ‘அயமஹமஸ்மீ’தி ந ச ஸமனுபஸ்ஸாமீ’’தி.

அத² கோ² ஆயஸ்மா தா³ஸகோ யேன தே²ரா பி⁴க்கூ²…பே… தே²ரே பி⁴க்கூ² ஏதத³வோச – ‘‘கே²மகோ, ஆவுஸோ, பி⁴க்கு² ஏவமாஹ – பஞ்சிமே, ஆவுஸோ, உபாதா³னக்க²ந்தா⁴ வுத்தா ப⁴க³வதா, ஸேய்யதி²த³ம் – ரூபுபாதா³னக்க²ந்தோ⁴…பே… விஞ்ஞாணுபாதா³னக்க²ந்தோ⁴. இமேஸு க்²வாஹம், ஆவுஸோ, பஞ்சஸு உபாதா³னக்க²ந்தே⁴ஸு ந கிஞ்சி அத்தம் வா அத்தனியம் வா ஸமனுபஸ்ஸாமி, ந சம்ஹி அரஹம் கீ²ணாஸவோ; அபி ச மே, ஆவுஸோ, பஞ்சஸு உபாதா³னக்க²ந்தே⁴ஸு ‘அஸ்மீ’தி அதி⁴க³தம், ‘அயமஹமஸ்மீ’தி ந ச ஸமனுபஸ்ஸாமீ’’தி.

‘‘ஏஹி த்வம், ஆவுஸோ தா³ஸக, யேன கே²மகோ பி⁴க்கு² தேனுபஸங்கம; உபஸங்கமித்வா கே²மகம் பி⁴க்கு²ம் ஏவம் வதே³ஹி – ‘தே²ரா தம், ஆவுஸோ கே²மக, ஏவமாஹம்ஸு – யமேதம், ஆவுஸோ கே²மக, அஸ்மீதி வதே³ஸி, கிமேதம் அஸ்மீதி வதே³ஸி? ரூபம் அஸ்மீதி வதே³ஸி, அஞ்ஞத்ர ரூபா அஸ்மீதி வதே³ஸி, வேத³னம்… ஸஞ்ஞம்… ஸங்கா²ரே… விஞ்ஞாணம் அஸ்மீதி வதே³ஸி, அஞ்ஞத்ர விஞ்ஞாணா அஸ்மீதி வதே³ஸி. யமேதம், ஆவுஸோ கே²மக, அஸ்மீதி வதே³ஸி. கிமேதம் அஸ்மீதி வதே³ஸீ’’’தி?

‘‘ஏவமாவுஸோ’’தி கோ² ஆயஸ்மா தா³ஸகோ தே²ரானம் பி⁴க்கூ²னம் படிஸ்ஸுத்வா யேனாயஸ்மா கே²மகோ தேனுபஸங்கமி; உபஸங்கமித்வா ஆயஸ்மந்தம் கே²மகம் ஏதத³வோச – தே²ரா தம், ஆவுஸோ கே²மக, ஏவமாஹம்ஸு – ‘‘யமேதம், ஆவுஸோ கே²மக, ‘அஸ்மீ’தி வதே³ஸி, கிமேதம் ‘அஸ்மீ’தி வதே³ஸி? ரூபம் ‘அஸ்மீ’தி வதே³ஸி அஞ்ஞத்ர ரூபா ‘அஸ்மீ’தி வதே³ஸி? வேத³னம்… ஸஞ்ஞம்… ஸங்கா²ரே… விஞ்ஞாணம் ‘அஸ்மீ’தி வதே³ஸி அஞ்ஞத்ர விஞ்ஞாணா ‘அஸ்மீ’தி வதே³ஸி? யமேதம், ஆவுஸோ கே²மக, ‘அஸ்மீ’தி வதே³ஸி, கிமேதம் ‘அஸ்மீ’தி வதே³ஸி’’தி? ‘‘அலம், ஆவுஸோ தா³ஸக, கிம் இமாய ஸந்தா⁴வனிகாய! ஆஹராவுஸோ, த³ண்ட³ம்; அஹமேவ யேன தே²ரா பி⁴க்கூ² தேனுபஸங்கமிஸ்ஸாமீ’’தி.

அத² கோ² ஆயஸ்மா கே²மகோ த³ண்ட³மோலுப்³ப⁴ யேன தே²ரா பி⁴க்கூ² தேனுபஸங்கமி; உபஸங்கமித்வா தே²ரேஹி பி⁴க்கூ²ஹி ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் கே²மகம் தே²ரா பி⁴க்கூ² ஏதத³வோசும் – ‘‘யமேதம், ஆவுஸோ கே²மக, ‘அஸ்மீ’தி வதே³ஸி, கிமேதம் ‘அஸ்மீ’தி வதே³ஸி? ரூபம் ‘அஸ்மீ’தி வதே³ஸி, அஞ்ஞத்ர ரூபா ‘அஸ்மீ’தி வதே³ஸி? வேத³னம்… ஸஞ்ஞம்… ஸங்கா²ரே… விஞ்ஞாணம் ‘அஸ்மீ’தி வதே³ஸி, அஞ்ஞத்ர விஞ்ஞாணா ‘அஸ்மீ’தி வதே³ஸி? யமேதம், ஆவுஸோ கே²மக, ‘அஸ்மீ’தி வதே³ஸி, கிமேதம் ‘அஸ்மீ’தி வதே³ஸீ’’தி? ‘‘ந க்²வாஹம், ஆவுஸோ, ரூபம் ‘அஸ்மீ’தி வதா³மி; நபி அஞ்ஞத்ர ரூபா ‘அஸ்மீ’தி வதா³மி. ந வேத³னம்… ந ஸஞ்ஞம்… ந ஸங்கா²ரே… ந விஞ்ஞாணம் ‘அஸ்மீ’தி வதா³மி; நபி அஞ்ஞத்ர விஞ்ஞாணா ‘அஸ்மீ’தி வதா³மி. அபி ச மே, ஆவுஸோ, பஞ்சஸு உபாதா³னக்க²ந்தே⁴ஸு ‘அஸ்மீ’தி அதி⁴க³தம் ‘அயமஹமஸ்மீ’தி ந ச ஸமனுபஸ்ஸாமி’’.

‘‘ஸேய்யதா²பி, ஆவுஸோ, உப்பலஸ்ஸ வா பது³மஸ்ஸ வா புண்ட³ரீகஸ்ஸ வா க³ந்தோ⁴. யோ நு கோ² ஏவம் வதே³ய்ய – ‘பத்தஸ்ஸ க³ந்தோ⁴’தி வா ‘வண்ணஸ்ஸ [வண்ட³ஸ்ஸ (கத்த²சி)] க³ந்தோ⁴’தி வா ‘கிஞ்ஜக்க²ஸ்ஸ க³ந்தோ⁴’தி வா ஸம்மா நு கோ² ஸோ வத³மானோ வதே³ய்யா’’தி? ‘‘நோ ஹேதம், ஆவுஸோ’’. ‘‘யதா² கத²ம், பனாவுஸோ, ஸம்மா ப்³யாகரமானோ ப்³யாகரேய்யா’’தி? ‘‘‘புப்ப²ஸ்ஸ க³ந்தோ⁴’தி கோ², ஆவுஸோ, ஸம்மா ப்³யாகரமானோ ப்³யாகரேய்யா’’தி. ‘‘ஏவமேவ க்²வாஹம், ஆவுஸோ, ந ரூபம் ‘அஸ்மீ’தி வதா³மி, நபி அஞ்ஞத்ர ரூபா ‘அஸ்மீ’தி வதா³மி. ந வேத³னம்… ந ஸஞ்ஞம்… ந ஸங்கா²ரே… ந விஞ்ஞாணம் ‘அஸ்மீ’தி வதா³மி, நபி அஞ்ஞத்ர விஞ்ஞாணா ‘அஸ்மீ’தி வதா³மி. அபி ச மே, ஆவுஸோ, பஞ்சஸு உபாதா³னக்க²ந்தே⁴ஸு ‘அஸ்மீ’தி அதி⁴க³தம் ‘அயமஹமஸ்மீ’தி ந ச ஸமனுபஸ்ஸாமி’’.

‘‘கிஞ்சாபி, ஆவுஸோ, அரியஸாவகஸ்ஸ பஞ்சோரம்பா⁴கி³யானி ஸம்யோஜனானி பஹீனானி ப⁴வந்தி, அத² க்²வஸ்ஸ ஹோதி – ‘யோ ச பஞ்சஸு உபாதா³னக்க²ந்தே⁴ஸு அனுஸஹக³தோ அஸ்மீதி மானோ, அஸ்மீதி ச²ந்தோ³, அஸ்மீதி அனுஸயோ அஸமூஹதோ. ஸோ அபரேன ஸமயேன பஞ்சஸு உபாதா³னக்க²ந்தே⁴ஸு உத³யப்³ப³யானுபஸ்ஸீ விஹரதி – இதி ரூபம், இதி ரூபஸ்ஸ ஸமுத³யோ, இதி ரூபஸ்ஸ அத்த²ங்க³மோ; இதி வேத³னா… இதி ஸஞ்ஞா… இதி ஸங்கா²ரா… இதி விஞ்ஞாணம், இதி விஞ்ஞாணஸ்ஸ ஸமுத³யோ, இதி விஞ்ஞாணஸ்ஸ அத்த²ங்க³மோ’தி. தஸ்ஸிமேஸு பஞ்சஸு உபாதா³னக்க²ந்தே⁴ஸு உத³யப்³ப³யானுபஸ்ஸினோ விஹரதோ யோபிஸ்ஸ ஹோதி பஞ்சஸு உபாதா³னக்க²ந்தே⁴ஸு அனுஸஹக³தோ ‘அஸ்மீ’தி, மானோ ‘அஸ்மீ’தி, ச²ந்தோ³ ‘அஸ்மீ’தி அனுஸயோ அஸமூஹதோ, ஸோபி ஸமுக்³கா⁴தம் க³ச்ச²தி.

‘‘ஸேய்யதா²பி, ஆவுஸோ, வத்த²ம் ஸம்கிலிட்ட²ம் மலக்³க³ஹிதம். தமேனம் ஸாமிகா ரஜகஸ்ஸ அனுபத³ஜ்ஜும். தமேனம் ரஜகோ ஊஸே வா கா²ரே வா கோ³மயே வா ஸம்மத்³தி³த்வா அச்சே² உத³கே விக்கா²லேதி. கிஞ்சாபி தம் ஹோதி வத்த²ம் பரிஸுத்³த⁴ம் பரியோதா³தம், அத² க்²வஸ்ஸ ஹோதி யேவ அனுஸஹக³தோ ஊஸக³ந்தோ⁴ வா கா²ரக³ந்தோ⁴ வா கோ³மயக³ந்தோ⁴ வா அஸமூஹதோ. தமேனம் ரஜகோ ஸாமிகானம் தே³தி. தமேனம் ஸாமிகா க³ந்த⁴பரிபா⁴விதே கரண்ட³கே நிக்கி²பந்தி. யோபிஸ்ஸ ஹோதி அனுஸஹக³தோ ஊஸக³ந்தோ⁴ வா கா²ரக³ந்தோ⁴ வா கோ³மயக³ந்தோ⁴ வா அஸமூஹதோ, ஸோபி ஸமுக்³கா⁴தம் க³ச்ச²தி. ஏவமேவ கோ², ஆவுஸோ, கிஞ்சாபி அரியஸாவகஸ்ஸ பஞ்சோரம்பா⁴கி³யானி ஸம்யோஜனானி பஹீனானி ப⁴வந்தி, அத² க்²வஸ்ஸ ஹோதி யேவ பஞ்சஸு உபாதா³னக்க²ந்தே⁴ஸு அனுஸஹக³தோ ‘அஸ்மீ’தி, மானோ ‘அஸ்மீ’தி, ச²ந்தோ³ ‘அஸ்மீ’தி அனுஸயோ அஸமூஹதோ. ஸோ அபரேன ஸமயேன பஞ்சஸு உபாதா³னக்க²ந்தே⁴ஸு உத³யப்³ப³யானுபஸ்ஸீ விஹரதி. ‘இதி ரூபம், இதி ரூபஸ்ஸ ஸமுத³யோ, இதி ரூபஸ்ஸ அத்த²ங்க³மோ; இதி வேத³னா… இதி ஸஞ்ஞா… இதி ஸங்கா²ரா… இதி விஞ்ஞாணம், இதி விஞ்ஞாணஸ்ஸ ஸமுத³யோ, இதி விஞ்ஞாணஸ்ஸ அத்த²ங்க³மோ’தி. தஸ்ஸ இமேஸு பஞ்சஸு உபாதா³னக்க²ந்தே⁴ஸு உத³யப்³ப³யானுபஸ்ஸினோ விஹரதோ யோபிஸ்ஸ ஹோதி பஞ்சஸு உபாதா³னக்க²ந்தே⁴ஸு அனுஸஹக³தோ ‘அஸ்மீ’தி, மானோ ‘அஸ்மீ’தி, ச²ந்தோ³ ‘அஸ்மீ’தி அனுஸயோ அஸமூஹதோ, ஸோபி ஸமுக்³கா⁴தம் க³ச்ச²தீ’’தி.

ஏவம் வுத்தே, தே²ரா பி⁴க்கூ² ஆயஸ்மந்தம் கே²மகம் ஏதத³வோசும் – ‘‘ந கோ² [ந கோ² பன (க.)] மயம் ஆயஸ்மந்தம் கே²மகம் விஹேஸாபேகா² புச்சி²ம்ஹ, அபி சாயஸ்மா கே²மகோ பஹோஸி தஸ்ஸ ப⁴க³வதோ ஸாஸனம் வித்தா²ரேன ஆசிக்கி²தும் தே³ஸேதும் பஞ்ஞாபேதும் பட்ட²பேதும் விவரிதும் விப⁴ஜிதும் உத்தானீகாதும். தயித³ம் ஆயஸ்மதா கே²மகேன தஸ்ஸ ப⁴க³வதோ ஸாஸனம் வித்தா²ரேன ஆசிக்கி²தம் தே³ஸிதம் பஞ்ஞாபிதம் பட்ட²பிதம் விவரிதம் விப⁴ஜிதம் உத்தானீகத’’ந்தி.

இத³மவோச ஆயஸ்மா கே²மகோ. அத்தமனா தே²ரா பி⁴க்கூ² ஆயஸ்மதோ கே²மகஸ்ஸ பா⁴ஸிதம் அபி⁴னந்து³ம். இமஸ்மிஞ்ச பன வேய்யாகரணஸ்மிம் ப⁴ஞ்ஞமானே ஸட்டி²மத்தானம் தே²ரானம் பி⁴க்கூ²னம் அனுபாதா³ய ஆஸவேஹி சித்தானி விமுச்சிம்ஸு, ஆயஸ்மதோ கே²மகஸ்ஸ சாதி. ஸத்தமம்.

8. ச²ன்னஸுத்தம்

90. ஏகம் ஸமயம் ஸம்ப³ஹுலா தே²ரா பி⁴க்கூ² பா³ராணஸியம் விஹரந்தி இஸிபதனே மிக³தா³யே. அத² கோ² ஆயஸ்மா ச²ன்னோ ஸாயன்ஹஸமயம் படிஸல்லானா வுட்டி²தோ அவாபுரணம் [அபாபுரணம் (ஸீ. ஸ்யா. கம்.)] ஆதா³ய விஹாரேன விஹாரம் உபஸங்கமித்வா தே²ரே பி⁴க்கூ² ஏதத³வோச – ‘‘ஓவத³ந்து மம் ஆயஸ்மந்தோ தே²ரா, அனுஸாஸந்து மம் ஆயஸ்மந்தோ தே²ரா, கரோந்து மே ஆயஸ்மந்தோ தே²ரா த⁴ம்மிம் கத²ம், யதா²ஹம் த⁴ம்மம் பஸ்ஸேய்ய’’ந்தி.

ஏவம் வுத்தே, தே²ரா பி⁴க்கூ² ஆயஸ்மந்தம் ச²ன்னம் ஏதத³வோசும் – ‘‘ரூபம் கோ², ஆவுஸோ ச²ன்ன, அனிச்சம்; வேத³னா அனிச்சா; ஸஞ்ஞா அனிச்சா; ஸங்கா²ரா அனிச்சா; விஞ்ஞாணம் அனிச்சம். ரூபம் அனத்தா; வேத³னா… ஸஞ்ஞா… ஸங்கா²ரா… விஞ்ஞாணம் அனத்தா. ஸப்³பே³ ஸங்கா²ரா அனிச்சா; ஸப்³பே³ த⁴ம்மா அனத்தா’’தி.

அத² கோ² ஆயஸ்மதோ ச²ன்னஸ்ஸ ஏதத³ஹோஸி – ‘‘மய்ஹம்பி கோ² ஏதம் ஏவம் [மய்ஹம்பி கோ² ஏவம் (ஸ்யா. கம்.)] ஹோதி – ‘ரூபம் அனிச்சம், வேத³னா… ஸஞ்ஞா… ஸங்கா²ரா… விஞ்ஞாணம் அனிச்சம்; ரூபம் அனத்தா, வேத³னா … ஸஞ்ஞா… ஸங்கா²ரா… விஞ்ஞாணம் அனத்தா. ஸப்³பே³ ஸங்கா²ரா அனிச்சா, ஸப்³பே³ த⁴ம்மா அனத்தா’தி. அத² ச பன மே ஸப்³ப³ஸங்கா²ரஸமதே² ஸப்³பூ³பதி⁴படினிஸ்ஸக்³கே³ தண்ஹாக்க²யே விராகே³ நிரோதே⁴ நிப்³பா³னே சித்தம் ந பக்க²ந்த³தி நப்பஸீத³தி ந ஸந்திட்ட²தி நாதி⁴முச்சதி. பரிதஸ்ஸனா உபாதா³னம் உப்பஜ்ஜதி; பச்சுதா³வத்ததி மானஸம் – ‘அத² கோ சரஹி மே அத்தா’தி? ந கோ² பனேவம் த⁴ம்மம் பஸ்ஸதோ ஹோதி. கோ நு கோ² மே ததா² த⁴ம்மம் தே³ஸேய்ய யதா²ஹம் த⁴ம்மம் பஸ்ஸேய்ய’’ந்தி.

அத² கோ² ஆயஸ்மதோ ச²ன்னஸ்ஸ ஏதத³ஹோஸி – ‘‘அயம் கோ² ஆயஸ்மா ஆனந்தோ³ கோஸம்பி³யம் விஹரதி கோ⁴ஸிதாராமே ஸத்து² சேவ ஸம்வண்ணிதோ ஸம்பா⁴விதோ ச விஞ்ஞூனம் ஸப்³ரஹ்மசாரீனம், பஹோதி ச மே ஆயஸ்மா ஆனந்தோ³ ததா² த⁴ம்மம் தே³ஸேதும் யதா²ஹம் த⁴ம்மம் பஸ்ஸேய்யம்; அத்தி² ச மே ஆயஸ்மந்தே ஆனந்தே³ தாவதிகா விஸ்ஸட்டி² [விஸ்ஸத்தி² (?)]. யம்னூனாஹம் யேனாயஸ்மா ஆனந்தோ³ தேனுபஸங்கமேய்ய’’ந்தி. அத² கோ² ஆயஸ்மா ச²ன்னோ ஸேனாஸனம் ஸம்ஸாமேத்வா பத்தசீவரமாதா³ய யேன கோஸம்பீ³ கோ⁴ஸிதாராமோ யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மதா ஆனந்தே³ன ஸத்³தி⁴ம் ஸம்மோதி³…பே… ஏகமந்தம் நிஸின்னோ கோ² ஆயஸ்மா ச²ன்னோ ஆயஸ்மந்தம் ஆனந்த³ம் ஏதத³வோச –

‘‘ஏகமிதா³ஹம், ஆவுஸோ ஆனந்த³, ஸமயம் பா³ராணஸியம் விஹராமி இஸிபதனே மிக³தா³யே. அத² க்²வாஹம், ஆவுஸோ, ஸாயன்ஹஸமயம் படிஸல்லானா வுட்டி²தோ அவாபுரணம் ஆதா³ய விஹாரேன விஹாரம் உபஸங்கமிம்; உபஸங்கமித்வா தே²ரே பி⁴க்கூ² ஏதத³வோசம் – ‘ஓவத³ந்து மம் ஆயஸ்மந்தோ தே²ரா, அனுஸாஸந்து மம் ஆயஸ்மந்தோ தே²ரா, கரோந்து மே ஆயஸ்மந்தோ தே²ரா த⁴ம்மிம் கத²ம் யதா²ஹம் த⁴ம்மம் பஸ்ஸேய்ய’ந்தி. ஏவம் வுத்தே மம், ஆவுஸோ, தே²ரா பி⁴க்கூ² ஏதத³வோசும் – ‘ரூபம் கோ², ஆவுஸோ ச²ன்ன, அனிச்சம்; வேத³னா… ஸஞ்ஞா… ஸங்கா²ரா… விஞ்ஞாணம் அனிச்சம்; ரூபம் அனத்தா…பே… விஞ்ஞாணம் அனத்தா. ஸப்³பே³ ஸங்கா²ரா அனிச்சா, ஸப்³பே³ த⁴ம்மா அனத்தா’’’தி.

‘‘தஸ்ஸ மய்ஹம், ஆவுஸோ, ஏதத³ஹோஸி – ‘மய்ஹம்பி கோ² ஏதம் ஏவம் ஹோதி – ரூபம் அனிச்சம்…பே… விஞ்ஞாணம் அனிச்சம், ரூபம் அனத்தா, வேத³னா… ஸஞ்ஞா… ஸங்கா²ரா… விஞ்ஞாணம் அனத்தா. ஸப்³பே³ ஸங்கா²ரா அனிச்சா, ஸப்³பே³ த⁴ம்மா அனத்தா’தி. அத² ச பன மே ஸப்³ப³ஸங்கா²ரஸமதே² ஸப்³பூ³பதி⁴படினிஸ்ஸக்³கே³ தண்ஹாக்க²யே விராகே³ நிரோதே⁴ நிப்³பா³னே சித்தம் ந பக்க²ந்த³தி நப்பஸீத³தி ந ஸந்திட்ட²தி நாதி⁴முச்சதி. பரிதஸ்ஸனா உபாதா³னம் உப்பஜ்ஜதி; பச்சுதா³வத்ததி மானஸம் – ‘அத² கோ சரஹி மே அத்தா’தி? ந கோ² பனேவம் த⁴ம்மம் பஸ்ஸதோ ஹோதி. கோ நு கோ² மே ததா² த⁴ம்மம் தே³ஸேய்ய யதா²ஹம் த⁴ம்மம் பஸ்ஸேய்யந்தி!

‘‘தஸ்ஸ மய்ஹம், ஆவுஸோ, ஏதத³ஹோஸி – ‘அயம் கோ² ஆயஸ்மா ஆனந்தோ³ கோஸம்பி³யம் விஹரதி கோ⁴ஸிதராமே ஸத்து² சேவ ஸம்வண்ணிதோ ஸம்பா⁴விதோ ச விஞ்ஞூனம் ஸப்³ரஹ்மசாரீனம், பஹோதி ச மே ஆயஸ்மா ஆனந்தோ³ ததா² த⁴ம்மம் தே³ஸேதும் யதா²ஹம் த⁴ம்மம் பஸ்ஸேய்யம். அத்தி² ச மே ஆயஸ்மந்தே ஆனந்தே³ தாவதிகா விஸ்ஸட்டி². யம்னூனாஹம் யேனாயஸ்மா ஆனந்தோ³ தேனுபஸங்கமேய்ய’ந்தி. ஓவத³து மம், ஆயஸ்மா ஆனந்தோ³; அனுஸாஸது மம், ஆயஸ்மா ஆனந்தோ³; கரோது மே, ஆயஸ்மா ஆனந்தோ³ த⁴ம்மிம் கத²ம் யதா²ஹம் த⁴ம்மம் பஸ்ஸேய்ய’’ந்தி.

‘‘ஏத்தகேனபி மயம் ஆயஸ்மதோ ச²ன்னஸ்ஸ அத்தமனா அபி நாம தம் [அத்தமனா அபி⁴ரத்³தா⁴, தம் (ஸீ. ஸ்யா. கம்.)] ஆயஸ்மா ச²ன்னோ ஆவி அகாஸி கீ²லம் சி²ந்தி³ [பபி⁴ந்தி³ (ஸீ. ஸ்யா. கம். பீ.)]. ஓத³ஹாவுஸோ, ச²ன்ன, ஸோதம்; ப⁴ப்³போ³ஸி [ப⁴ப்³போ³ த்வம் (க.)] த⁴ம்மம் விஞ்ஞாது’’ந்தி. அத² கோ² ஆயஸ்மதோ ச²ன்னஸ்ஸ தாவதகேனேவ [தாவதே³வ (ஸீ.)] உளாரம் பீதிபாமோஜ்ஜம் உப்பஜ்ஜி – ‘‘ப⁴ப்³போ³ கிரஸ்மி த⁴ம்மம் விஞ்ஞாது’’ந்தி.

‘‘ஸம்முகா² மேதம், ஆவுஸோ ச²ன்ன, ப⁴க³வதோ ஸுதம், ஸம்முகா² ச படிக்³க³ஹிதம் கச்சானகோ³த்தம் பி⁴க்கு²ம் ஓவத³ந்தஸ்ஸ – த்³வயனிஸ்ஸிதோ க்²வாயம், கச்சான, லோகோ யேபு⁴ய்யேன அத்தி²தஞ்சேவ நத்தி²தஞ்ச. லோகஸமுத³யம் கோ², கச்சான, யதா²பூ⁴தம் ஸம்மப்பஞ்ஞாய பஸ்ஸதோ யா லோகே நத்தி²தா, ஸா ந ஹோதி. லோகனிரோத⁴ம் கோ², கச்சான, யதா²பூ⁴தம் ஸம்மப்பஞ்ஞாய பஸ்ஸதோ யா லோகே அத்தி²தா, ஸா ந ஹோதி. உபயுபாதா³னாபி⁴னிவேஸவினிப³ந்தோ⁴ க்²வாயம், கச்சான, லோகோ யேபு⁴ய்யேன தம் சாயம் உபயுபாதா³னம் சேதஸோ அதி⁴ட்டா²னாபி⁴னிவேஸானுஸயம் ந உபேதி ந உபாதி³யதி நாதி⁴ட்டா²தி ‘அத்தா மே’தி. து³க்க²மேவ உப்பஜ்ஜமானம் உப்பஜ்ஜதி, து³க்க²ம் நிருஜ்ஜ²மானம் நிருஜ்ஜ²தீதி ந கங்க²தி ந விசிகிச்ச²தி. அபரப்பச்சயா ஞாணமேவஸ்ஸ ஏத்த² ஹோதி. ஏத்தாவதா கோ², கச்சான, ஸம்மாதி³ட்டி² ஹோதி. ஸப்³ப³மத்தீ²தி கோ², கச்சான, அயமேகோ அந்தோ. ஸப்³ப³ம் நத்தீ²தி அயம் து³தியோ அந்தோ. ஏதே தே, கச்சான, உபோ⁴ அந்தே அனுபக³ம்ம மஜ்ஜே²ன ததா²க³தோ த⁴ம்மம் தே³ஸேதி – அவிஜ்ஜாபச்சயா ஸங்கா²ரா; ஸங்கா²ரபச்சயா விஞ்ஞாணம்…பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. அவிஜ்ஜாய த்வேவ அஸேஸவிராக³னிரோதா⁴ ஸங்கா²ரனிரோதோ⁴…பே… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி.

‘‘ஏவமேதம், ஆவுஸோ ஆனந்த³, ஹோதி யேஸம் ஆயஸ்மந்தானம் தாதி³ஸா ஸப்³ரஹ்மசாரயோ அனுகம்பகா அத்த²காமா ஓவாத³கா அனுஸாஸகா. இத³ஞ்ச பன மே ஆயஸ்மதோ ஆனந்த³ஸ்ஸ த⁴ம்மதே³ஸனம் ஸுத்வா த⁴ம்மோ அபி⁴ஸமிதோ’’தி. அட்ட²மம்.

9. ராஹுலஸுத்தம்

91. ஸாவத்தி²னிதா³னம். அத² கோ² ஆயஸ்மா ராஹுலோ யேன ப⁴க³வா தேனுபஸங்கமி; உபஸங்கமித்வா…பே… ஏகமந்தம் நிஸின்னோ கோ² ஆயஸ்மா ராஹுலோ ப⁴க³வந்தம் ஏதத³வோச – ‘‘கத²ம் நு கோ², ப⁴ந்தே, ஜானதோ கத²ம் பஸ்ஸதோ இமஸ்மிஞ்ச ஸவிஞ்ஞாணகே காயே ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானானுஸயா ந ஹோந்தீ’’தி?

‘‘யம் கிஞ்சி, ராஹுல, ரூபம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் ரூபம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய பஸ்ஸதி. யா காசி வேத³னா … யா காசி ஸஞ்ஞா… யே கேசி ஸங்கா²ரா… யம் கிஞ்சி விஞ்ஞாணம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா…பே… ஸப்³ப³ம் விஞ்ஞாணம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய பஸ்ஸதி. ஏவம் கோ², ராஹுல, ஜானதோ ஏவம் பஸ்ஸதோ இமஸ்மிஞ்ச ஸவிஞ்ஞாணகே காயே ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானானுஸயா ந ஹோந்தீ’’தி. நவமம்.

10. து³தியராஹுலஸுத்தம்

92. ஸாவத்தி²னிதா³னம். ஏகமந்தம் நிஸின்னோ கோ² ஆயஸ்மா ராஹுலோ ப⁴க³வந்தம் ஏதத³வோச – ‘‘கத²ம் நு கோ², ப⁴ந்தே, ஜானதோ கத²ம் பஸ்ஸதோ இமஸ்மிஞ்ச ஸவிஞ்ஞாணகே காயே ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானாபக³தம் மானஸம் ஹோதி விதா⁴ஸமதிக்கந்தம் ஸந்தம் ஸுவிமுத்த’’ந்தி? ‘‘யம் கிஞ்சி, ராஹுல, ரூபம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா…பே… யம் தூ³ரே ஸந்திகே வா, ஸப்³ப³ம் ரூபம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய தி³ஸ்வா அனுபாதா³ விமுத்தோ ஹோதி. யா காசி வேத³னா… யா காசி ஸஞ்ஞா… யே கேசி ஸங்கா²ரா… யம் கிஞ்சி விஞ்ஞாணம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் விஞ்ஞாணம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய தி³ஸ்வா அனுபாதா³ விமுத்தோ ஹோதி. ஏவம் கோ², ராஹுல, ஜானதோ ஏவம் பஸ்ஸதோ இமஸ்மிஞ்ச ஸவிஞ்ஞாணகே காயே ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானாபக³தம் மானஸம் ஹோதி விதா⁴ ஸமதிக்கந்தம் ஸந்தம் ஸுவிமுத்த’’ந்தி. த³ஸமம்.

தே²ரவக்³கோ³ நவமோ.

தஸ்ஸுத்³தா³னம் –

ஆனந்தோ³ திஸ்ஸோ யமகோ, அனுராதோ⁴ ச வக்கலி;

அஸ்ஸஜி கே²மகோ ச²ன்னோ, ராஹுலா அபரே து³வே.