8. க²ஜ்ஜனீயவக்³கோ³

1. அஸ்ஸாத³ஸுத்தம்

73. ஸாவத்தி²னிதா³னம். ‘‘அஸ்ஸுதவா, பி⁴க்க²வே, புது²ஜ்ஜனோ ரூபஸ்ஸ அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாதி. வேத³னாய… ஸஞ்ஞாய… ஸங்கா²ரானம்… விஞ்ஞாணஸ்ஸ அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாதி. ஸுதவா ச கோ², பி⁴க்க²வே, அரியஸாவகோ ரூபஸ்ஸ அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானாதி. வேத³னா … ஸஞ்ஞாய… ஸங்கா²ரானம்… விஞ்ஞாணஸ்ஸ அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானாதீ’’தி. பட²மம்.

2. ஸமுத³யஸுத்தம்

74. ஸாவத்தி²னிதா³னம். ‘‘அஸ்ஸுதவா, பி⁴க்க²வே, புது²ஜ்ஜனோ ரூபஸ்ஸ ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாதி. வேத³னாய… ஸஞ்ஞாய… ஸங்கா²ரானம்… விஞ்ஞாணஸ்ஸ ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாதி. ஸுதவா ச கோ², பி⁴க்க²வே, அரியஸாவகோ ரூபஸ்ஸ ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானாதி. வேத³னாய… ஸஞ்ஞாய… ஸங்கா²ரானம்… விஞ்ஞாணஸ்ஸ ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானாதீ’’தி. து³தியம்.

3. து³தியஸமுத³யஸுத்தம்

75. ஸாவத்தி²னிதா³னம். ‘‘ஸுதவா, பி⁴க்க²வே, அரியஸாவகோ ரூபஸ்ஸ ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானாதி. வேத³னாய… ஸஞ்ஞாய… ஸங்கா²ரானம்… விஞ்ஞாணஸ்ஸ ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானாதீ’’தி. ததியம்.

4. அரஹந்தஸுத்தம்

76. ஸாவத்தி²னிதா³னம். ‘‘ரூபம், பி⁴க்க²வே, அனிச்சம். யத³னிச்சம் தம் து³க்க²ம்; யம் து³க்க²ம் தத³னத்தா; யத³னத்தா தம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். வேத³னா… ஸஞ்ஞா… ஸங்கா²ரா… விஞ்ஞாணம் அனிச்சம். யத³னிச்சம் தம் து³க்க²ம்; யம் து³க்க²ம் தத³னத்தா; யத³னத்தா தம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம்’’.

‘‘ஏவம் பஸ்ஸம், பி⁴க்க²வே, ஸுதவா அரியஸாவகோ ரூபஸ்மிம்பி நிப்³பி³ந்த³தி, வேத³னாயபி… ஸஞ்ஞாயபி… ஸங்கா²ரேஸுபி… விஞ்ஞாணஸ்மிம்பி நிப்³பி³ந்த³தி. நிப்³பி³ந்த³ம் விரஜ்ஜதி; விராகா³ விமுச்சதி. விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதி. யாவதா, பி⁴க்க²வே, ஸத்தாவாஸா, யாவதா ப⁴வக்³க³ம், ஏதே அக்³கா³, ஏதே ஸேட்டா² லோகஸ்மிம் யதி³த³ம் அரஹந்தோ’’தி.

இத³மவோச ப⁴க³வா. இத³ம் வத்வான ஸுக³தோ அதா²பரம் ஏதத³வோச ஸத்தா² –

‘‘ஸுகி²னோ வத அரஹந்தோ, தண்ஹா தேஸம் ந விஜ்ஜதி;

அஸ்மிமானோ ஸமுச்சி²ன்னோ, மோஹஜாலம் பதா³லிதம்.

‘‘அனேஜம் தே அனுப்பத்தா, சித்தம் தேஸம் அனாவிலம்;

லோகே அனுபலித்தா தே, ப்³ரஹ்மபூ⁴தா அனாஸவா.

‘‘பஞ்சக்க²ந்தே⁴ பரிஞ்ஞாய, ஸத்த ஸத்³த⁴ம்மகோ³சரா;

பஸம்ஸியா ஸப்புரிஸா, புத்தா பு³த்³த⁴ஸ்ஸ ஓரஸா.

‘‘ஸத்தரதனஸம்பன்னா, தீஸு ஸிக்கா²ஸு ஸிக்கி²தா;

அனுவிசரந்தி மஹாவீரா, பஹீனப⁴யபே⁴ரவா.

‘‘த³ஸஹங்கே³ஹி ஸம்பன்னா, மஹானாகா³ ஸமாஹிதா;

ஏதே கோ² ஸேட்டா² லோகஸ்மிம், தண்ஹா தேஸம் ந விஜ்ஜதி.

‘‘அஸேக²ஞாணமுப்பன்னம், அந்திமோயம் [அந்திமஸ்ஸ (க.)] ஸமுஸ்ஸயோ;

யோ ஸாரோ ப்³ரஹ்மசரியஸ்ஸ, தஸ்மிம் அபரபச்சயா.

‘‘விதா⁴ஸு ந விகம்பந்தி, விப்பமுத்தா புனப்³ப⁴வா;

த³ந்தபூ⁴மிமனுப்பத்தா, தே லோகே விஜிதாவினோ.

‘‘உத்³த⁴ம் திரியம் அபாசீனம், நந்தீ³ தேஸம் ந விஜ்ஜதி;

நத³ந்தி தே ஸீஹனாத³ம், பு³த்³தா⁴ லோகே அனுத்தரா’’தி. சதுத்த²ம்;

5. து³தியஅரஹந்தஸுத்தம்

77. ஸாவத்தி²னிதா³னம். ‘‘ரூபம், பி⁴க்க²வே, அனிச்சம். யத³னிச்சம் தம் து³க்க²ம்; யம் து³க்க²ம் தத³னத்தா; யத³னத்தா தம் ‘நேதம் மம, நேஸோஹமஸ்மி, ந மேஸோ அத்தா’தி…பே… ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம்’’.

‘‘ஏவம் பஸ்ஸம், பி⁴க்க²வே, ஸுதவா அரியஸாவகோ ரூபஸ்மிம்பி நிப்³பி³ந்த³தி, வேத³னாயபி… ஸஞ்ஞாயபி… ஸங்கா²ரேஸுபி… விஞ்ஞாணஸ்மிம்பி நிப்³பி³ந்த³தி. நிப்³பி³ந்த³ம் விரஜ்ஜதி; விராகா³ விமுச்சதி. விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதி. யாவதா, பி⁴க்க²வே, ஸத்தாவாஸா, யாவதா ப⁴வக்³க³ம், ஏதே அக்³கா³, ஏதே ஸேட்டா² லோகஸ்மிம் யதி³த³ம் அரஹந்தோ’’தி. பஞ்சமம்.

6. ஸீஹஸுத்தம்

78. ஸாவத்தி²னிதா³னம். ‘‘ஸீஹோ, பி⁴க்க²வே, மிக³ராஜா ஸாயன்ஹஸமயம் ஆஸயா நிக்க²மதி; ஆஸயா நிக்க²மித்வா விஜம்ப⁴தி; விஜம்பி⁴த்வா ஸமந்தா சதுத்³தி³ஸா அனுவிலோகேதி; ஸமந்தா சதுத்³தி³ஸா அனுவிலோகேத்வா திக்க²த்தும் ஸீஹனாத³ம் நத³தி; திக்க²த்தும் ஸீஹனாத³ம் நதி³த்வா கோ³சராய பக்கமதி. யே ஹி கேசி, பி⁴க்க²வே, திரச்சா²னக³தா பாணா ஸீஹஸ்ஸ மிக³ரஞ்ஞோ நத³தோ ஸத்³த³ம் ஸுணந்தி; யேபு⁴ய்யேன ப⁴யம் ஸம்வேக³ம் ஸந்தாஸம் ஆபஜ்ஜந்தி; பி³லம் பி³லாஸயா பவிஸந்தி; த³கம் த³காஸயா பவிஸந்தி; வனம் வனாஸயா பவிஸந்தி; ஆகாஸம் பக்கி²னோ ப⁴ஜந்தி. யேபி தே, பி⁴க்க²வே, ரஞ்ஞோ நாகா³ கா³மனிக³மராஜதா⁴னீஸு, த³ள்ஹேஹி வரத்தேஹி ப³த்³தா⁴, தேபி தானி ப³ந்த⁴னானி ஸஞ்சி²ந்தி³த்வா ஸம்பதா³லேத்வா பீ⁴தா முத்தகரீஸம் சஜமானா [மோசந்தா (பீ. க.)], யேன வா தேன வா பலாயந்தி. ஏவம் மஹித்³தி⁴கோ கோ², பி⁴க்க²வே, ஸீஹோ மிக³ராஜா திரச்சா²னக³தானம் பாணானம், ஏவம் மஹேஸக்கோ², ஏவம் மஹானுபா⁴வோ’’.

‘‘ஏவமேவ கோ², பி⁴க்க²வே, யதா³ ததா²க³தோ லோகே உப்பஜ்ஜதி அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா. ஸோ த⁴ம்மம் தே³ஸேதி – ‘இதி ரூபம், இதி ரூபஸ்ஸ ஸமுத³யோ, இதி ரூபஸ்ஸ அத்த²ங்க³மோ; இதி வேத³னா… இதி ஸஞ்ஞா… இதி ஸங்கா²ரா… இதி விஞ்ஞாணம், இதி விஞ்ஞாணஸ்ஸ ஸமுத³யோ, இதி விஞ்ஞாணஸ்ஸ அத்த²ங்க³மோ’தி. யேபி தே, பி⁴க்க²வே, தே³வா தீ³கா⁴யுகா வண்ணவந்தோ ஸுக²ப³ஹுலா உச்சேஸு விமானேஸு சிரட்டி²திகா தேபி ததா²க³தஸ்ஸ த⁴ம்மதே³ஸனம் ஸுத்வா யேபு⁴ய்யேன ப⁴யம் ஸம்வேக³ம் ஸந்தாஸம் ஆபஜ்ஜந்தி – ‘அனிச்சாவ கிர, போ⁴, மயம் ஸமானா நிச்சம்ஹாதி அமஞ்ஞிம்ஹ. அத்³து⁴வாவ கிர, போ⁴, மயம் ஸமானா து⁴வம்ஹாதி அமஞ்ஞிம்ஹ. அஸஸ்ஸதாவ கிர, போ⁴, மயம் ஸமானா ஸஸ்ஸதம்ஹாதி அமஞ்ஞிம்ஹ. மயம்பி கிர, போ⁴, அனிச்சா அத்³து⁴வா அஸஸ்ஸதா ஸக்காயபரியாபன்னா’தி. ஏவம் மஹித்³தி⁴கோ கோ², பி⁴க்க²வே, ததா²க³தோ ஸதே³வகஸ்ஸ லோகஸ்ஸ, ஏவம் மஹேஸக்கோ², ஏவம் மஹானுபா⁴வோ’’தி. இத³மவோச ப⁴க³வா…பே… ஏதத³வோச ஸத்தா² –

‘‘யதா³ பு³த்³தோ⁴ அபி⁴ஞ்ஞாய, த⁴ம்மசக்கம் பவத்தயி;

ஸதே³வகஸ்ஸ லோகஸ்ஸ, ஸத்தா² அப்படிபுக்³க³லோ.

‘‘ஸக்காயஞ்ச நிரோத⁴ஞ்ச, ஸக்காயஸ்ஸ ச ஸம்ப⁴வம்;

அரியஞ்சட்ட²ங்கி³கம் மக்³க³ம், து³க்கூ²பஸமகா³மினம்.

‘‘யேபி தீ³கா⁴யுகா தே³வா, வண்ணவந்தோ யஸஸ்ஸினோ;

பீ⁴தா ஸந்தாஸமாபாது³ம், ஸீஹஸ்ஸேவிதரே மிகா³.

அவீதிவத்தா ஸக்காயம், அனிச்சா கிர போ⁴ மயம்;

ஸுத்வா அரஹதோ வாக்யம், விப்பமுத்தஸ்ஸ தாதி³னோ’’தி. ச²ட்ட²ம்;

7. க²ஜ்ஜனீயஸுத்தம்

79. ஸாவத்தி²னிதா³னம். ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா அனேகவிஹிதம் புப்³பே³னிவாஸம் அனுஸ்ஸரமானா அனுஸ்ஸரந்தி ஸப்³பே³தே பஞ்சுபாதா³னக்க²ந்தே⁴ அனுஸ்ஸரந்தி ஏதேஸம் வா அஞ்ஞதரம். கதமே பஞ்ச? ‘ஏவம்ரூபோ அஹோஸிம் அதீதமத்³தா⁴ன’ந்தி – இதி வா ஹி, பி⁴க்க²வே, அனுஸ்ஸரமானோ ரூபம்யேவ அனுஸ்ஸரதி. ‘ஏவம்வேத³னோ அஹோஸிம் அதீதமத்³தா⁴ன’ந்தி – இதி வா ஹி, பி⁴க்க²வே, அனுஸ்ஸரமானோ வேத³னம்யேவ அனுஸ்ஸரதி. ‘ஏவம்ஸஞ்ஞோ அஹோஸிம் அதீதமத்³தா⁴ன’ந்தி… ‘ஏவம்ஸங்கா²ரோ அஹோஸிம் அதீதமத்³தா⁴ன’ந்தி… ‘ஏவம்விஞ்ஞாணோ அஹோஸிம் அதீதமத்³தா⁴ன’ந்தி – இதி வா ஹி, பி⁴க்க²வே, அனுஸ்ஸரமானோ விஞ்ஞாணமேவ அனுஸ்ஸரதி’’.

‘‘கிஞ்ச, பி⁴க்க²வே, ரூபம் வதே³த²? ருப்பதீதி கோ², பி⁴க்க²வே, தஸ்மா ‘ரூப’ந்தி வுச்சதி. கேன ருப்பதி? ஸீதேனபி ருப்பதி, உண்ஹேனபி ருப்பதி, ஜிக⁴ச்சா²யபி ருப்பதி, பிபாஸாயபி ருப்பதி, ட³ம்ஸமகஸவாதாதபஸரீஸபஸம்ப²ஸ்ஸேனபி [… ஸிரிம்ஸபஸம்ப²ஸ்ஸேனபி (ஸீ. பீ.)] ருப்பதி. ருப்பதீதி கோ², பி⁴க்க²வே, தஸ்மா ‘ரூப’ந்தி வுச்சதி.

‘‘கிஞ்ச, பி⁴க்க²வே, வேத³னம் வதே³த²? வேத³யதீதி கோ², பி⁴க்க²வே, தஸ்மா ‘வேத³னா’தி வுச்சதி. கிஞ்ச வேத³யதி? ஸுக²ம்பி வேத³யதி, து³க்க²ம்பி வேத³யதி, அது³க்க²மஸுக²ம்பி வேத³யதி. வேத³யதீதி கோ², பி⁴க்க²வே, தஸ்மா ‘வேத³னா’தி வுச்சதி.

‘‘கிஞ்ச, பி⁴க்க²வே, ஸஞ்ஞம் வதே³த²? ஸஞ்ஜானாதீதி கோ², பி⁴க்க²வே, தஸ்மா ‘ஸஞ்ஞா’தி வுச்சதி. கிஞ்ச ஸஞ்ஜானாதி? நீலம்பி ஸஞ்ஜானாதி, பீதகம்பி ஸஞ்ஜானாதி, லோஹிதகம்பி ஸஞ்ஜானாதி, ஓதா³தம்பி ஸஞ்ஜானாதி. ஸஞ்ஜானாதீதி கோ², பி⁴க்க²வே, தஸ்மா ‘ஸஞ்ஞா’தி வுச்சதி.

‘‘கிஞ்ச, பி⁴க்க²வே, ஸங்கா²ரே வதே³த²? ஸங்க²தமபி⁴ஸங்க²ரோந்தீதி கோ², பி⁴க்க²வே, தஸ்மா ‘ஸங்கா²ரா’தி வுச்சதி. கிஞ்ச ஸங்க²தமபி⁴ஸங்க²ரோந்தி? ரூபம் ரூபத்தாய [ரூபத்தா²ய (க.)] ஸங்க²தமபி⁴ஸங்க²ரோந்தி, வேத³னம் வேத³னத்தாய ஸங்க²தமபி⁴ஸங்க²ரோந்தி, ஸஞ்ஞம் ஸஞ்ஞத்தாய ஸங்க²தமபி⁴ஸங்க²ரோந்தி, ஸங்கா²ரே ஸங்கா²ரத்தாய ஸங்க²தமபி⁴ஸங்க²ரோந்தி, விஞ்ஞாணம் விஞ்ஞாணத்தாய ஸங்க²தமபி⁴ஸங்க²ரோந்தி. ஸங்க²தமபி⁴ஸங்க²ரோந்தீதி கோ², பி⁴க்க²வே, தஸ்மா ‘ஸங்கா²ரா’தி வுச்சதி.

‘‘கிஞ்ச, பி⁴க்க²வே, விஞ்ஞாணம் வதே³த²? விஜானாதீதி கோ², பி⁴க்க²வே, தஸ்மா ‘விஞ்ஞாண’ந்தி வுச்சதி. கிஞ்ச விஜானாதி? அம்பி³லம்பி விஜானாதி, தித்தகம்பி விஜானாதி, கடுகம்பி விஜானாதி, மது⁴ரம்பி விஜானாதி, கா²ரிகம்பி விஜானாதி, அகா²ரிகம்பி விஜானாதி, லோணிகம்பி விஜானாதி, அலோணிகம்பி விஜானாதி. விஜானாதீதி கோ², பி⁴க்க²வே, தஸ்மா ‘விஞ்ஞாண’ந்தி வுச்சதி.

‘‘தத்ர, பி⁴க்க²வே, ஸுதவா அரியஸாவகோ இதி படிஸஞ்சிக்க²தி – ‘அஹம் கோ² ஏதரஹி ரூபேன க²ஜ்ஜாமி. அதீதம்பாஹம் அத்³தா⁴னம் ஏவமேவ ரூபேன க²ஜ்ஜிம், ஸேய்யதா²பி ஏதரஹி பச்சுப்பன்னேன ரூபேன க²ஜ்ஜாமி. அஹஞ்சேவ கோ² பன அனாக³தம் ரூபம் அபி⁴னந்தே³ய்யம், அனாக³தம்பாஹம் அத்³தா⁴னம் ஏவமேவ ரூபேன க²ஜ்ஜேய்யம், ஸேய்யதா²பி ஏதரஹி பச்சுப்பன்னேன ரூபேன க²ஜ்ஜாமீ’தி. ஸோ இதி படிஸங்கா²ய அதீதஸ்மிம் ரூபஸ்மிம் அனபேக்கோ² ஹோதி; அனாக³தம் ரூபம் நாபி⁴னந்த³தி; பச்சுப்பன்னஸ்ஸ ரூபஸ்ஸ நிப்³பி³தா³ய விராகா³ய நிரோதா⁴ய படிபன்னோ ஹோதி.

‘‘‘அஹம் கோ² ஏதரஹி வேத³னாய க²ஜ்ஜாமி. அதீதம்பாஹம் அத்³தா⁴னம் ஏவமேவ வேத³னாய க²ஜ்ஜிம், ஸேய்யதா²பி ஏதரஹி பச்சுப்பன்னாய வேத³னாய க²ஜ்ஜாமி. அஹஞ்சேவ கோ² பன அனாக³தம் வேத³னம் அபி⁴னந்தே³ய்யம்; அனாக³தம்பாஹம் அத்³தா⁴னம் ஏவமேவ வேத³னாய க²ஜ்ஜேய்யம், ஸேய்யதா²பி ஏதரஹி பச்சுப்பன்னாய வேத³னாய க²ஜ்ஜாமீ’தி. ஸோ இதி படிஸங்கா²ய அதீதாய வேத³னாய அனபேக்கோ² ஹோதி; அனாக³தம் வேத³னம் நாபி⁴னந்த³தி; பச்சுப்பன்னாய வேத³னாய நிப்³பி³தா³ய விராகா³ய நிரோதா⁴ய படிபன்னோ ஹோதி.

‘‘‘அஹம் கோ² ஏதரஹி ஸஞ்ஞாய க²ஜ்ஜாமி…பே… அஹம் கோ² ஏதரஹி ஸங்கா²ரேஹி க²ஜ்ஜாமி. அதீதம்பாஹம் அத்³தா⁴னம் ஏவமேவ ஸங்கா²ரேஹி க²ஜ்ஜிம், ஸேய்யதா²பி ஏதரஹி பச்சுப்பன்னேஹி ஸங்கா²ரேஹி க²ஜ்ஜாமீதி. அஹஞ்சேவ கோ² பன அனாக³தே ஸங்கா²ரே அபி⁴னந்தே³ய்யம்; அனாக³தம்பாஹம் அத்³தா⁴னம் ஏவமேவ ஸங்கா²ரேஹி க²ஜ்ஜேய்யம், ஸேய்யதா²பி ஏதரஹி பச்சுப்பன்னேஹி ஸங்கா²ரேஹி க²ஜ்ஜாமீ’தி. ஸோ இதி படிஸங்கா²ய அதீதேஸு ஸங்கா²ரேஸு அனபேக்கோ² ஹோதி; அனாக³தே ஸங்கா²ரே நாபி⁴னந்த³தி; பச்சுப்பன்னானம் ஸங்கா²ரானம் நிப்³பி³தா³ய விராகா³ய நிரோதா⁴ய படிபன்னோ ஹோதி.

‘‘‘அஹம் கோ² ஏதரஹி விஞ்ஞாணேன க²ஜ்ஜாமி. அதீதம்பி அத்³தா⁴னம் ஏவமேவ விஞ்ஞாணேன க²ஜ்ஜிம், ஸேய்யதா²பி ஏதரஹி பச்சுப்பன்னேன விஞ்ஞாணேன க²ஜ்ஜாமி. அஹஞ்சேவ கோ² பன அனாக³தம் விஞ்ஞாணம் அபி⁴னந்தே³ய்யம்; அனாக³தம்பாஹம் அத்³தா⁴னம் ஏவமேவ விஞ்ஞாணேன க²ஜ்ஜேய்யம், ஸேய்யதா²பி ஏதரஹி பச்சுப்பன்னேன விஞ்ஞாணேன க²ஜ்ஜாமீ’தி. ஸோ இதி படிஸங்கா²ய அதீதஸ்மிம் விஞ்ஞாணஸ்மிம் அனபேக்கோ² ஹோதி; அனாக³தம் விஞ்ஞாணம் நாபி⁴னந்த³தி; பச்சுப்பன்னஸ்ஸ விஞ்ஞாணஸ்ஸ நிப்³பி³தா³ய விராகா³ய நிரோதா⁴ய படிபன்னோ ஹோதி.

‘‘தம் கிம் மஞ்ஞத², பி⁴க்க²வே, ரூபம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘யம் பனானிச்சம் து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதம், ப⁴ந்தே’’. ‘‘வேத³னா … ஸஞ்ஞா… ஸங்கா²ரா… விஞ்ஞாணம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘யம் பனானிச்சம், து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதம், ப⁴ந்தே’’. ‘‘தஸ்மாதிஹ, பி⁴க்க²வே, யம் கிஞ்சி ரூபம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் ரூபம் – ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம். யா காசி வேத³னா… யா காசி ஸஞ்ஞா… யே கேசி ஸங்கா²ரா… யம் கிஞ்சி விஞ்ஞாணம் அதீதானாக³தபச்சுப்பன்னம்…பே… யம் தூ³ரே ஸந்திகே வா, ஸப்³ப³ம் விஞ்ஞாணம் – ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³ம்’’.

‘‘அயம் வுச்சதி, பி⁴க்க²வே, அரியஸாவகோ அபசினாதி, நோ ஆசினாதி; பஜஹதி [நோ (ஸீ.)], ந உபாதி³யதி; விஸினேதி [நோ (ஸீ.)], ந உஸ்ஸினேதி; விதூ⁴பேதி [நோ (ஸீ.)], ந ஸந்தூ⁴பேதி. கிஞ்ச அபசினாதி, நோ ஆசினாதி? ரூபம் அபசினாதி, நோ ஆசினாதி; வேத³னம் … ஸஞ்ஞம்… ஸங்கா²ரே… விஞ்ஞாணம் அபசினாதி, நோ ஆசினாதி. கிஞ்ச பஜஹதி, ந உபாதி³யதி? ரூபம் பஜஹதி, ந உபாதி³யதி; வேத³னம்… ஸஞ்ஞம்… ஸங்கா²ரே… விஞ்ஞாணம் பஜஹதி, ந உபாதி³யதி. கிஞ்ச விஸினேதி, ந உஸ்ஸினேதி? ரூபம் விஸினேதி, ந உஸ்ஸினேதி; வேத³னம்… ஸஞ்ஞம்… ஸங்கா²ரே… விஞ்ஞாணம் விஸினேதி, ந உஸ்ஸினேதி. கிஞ்ச விதூ⁴பேதி, ந ஸந்தூ⁴பேதி? ரூபம் விதூ⁴பேதி, ந ஸந்தூ⁴பேதி; வேத³னம்… ஸஞ்ஞம்… ஸங்கா²ரே… விஞ்ஞாணம் விதூ⁴பேதி, ந ஸந்தூ⁴பேதி.

‘‘ஏவம் பஸ்ஸம், பி⁴க்க²வே, ஸுதவா அரியஸாவகோ ரூபஸ்மிம்பி நிப்³பி³ந்த³தி, வேத³னாயபி… ஸஞ்ஞாயபி… ஸங்கா²ரேஸுபி… விஞ்ஞாணஸ்மிம்பி நிப்³பி³ந்த³தி. நிப்³பி³ந்த³ம் விரஜ்ஜதி; விராகா³ விமுச்சதி. விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதி.

‘‘அயம் வுச்சதி, பி⁴க்க²வே, பி⁴க்கு² நேவாசினாதி ந அபசினாதி, அபசினித்வா டி²தோ நேவ பஜஹதி ந உபாதி³யதி, பஜஹித்வா டி²தோ நேவ விஸினேதி ந உஸ்ஸினேதி, விஸினேத்வா டி²தோ நேவ விதூ⁴பேதி ந ஸந்தூ⁴பேதி. விதூ⁴பேத்வா டி²தோ கிஞ்ச நேவாசினாதி ந அபசினாதி? அபசினித்வா டி²தோ ரூபம் நேவாசினாதி ந அபசினாதி; அபசினித்வா டி²தோ வேத³னம்… ஸஞ்ஞம்… ஸங்கா²ரே… விஞ்ஞாணம் நேவாசினாதி ந அபசினாதி. அபசினித்வா டி²தோ கிஞ்ச நேவ பஜஹதி ந உபாதி³யதி? பஜஹித்வா டி²தோ ரூபம் நேவ பஜஹதி ந உபாதி³யதி; பஜஹித்வா டி²தோ வேத³னம்… ஸஞ்ஞம்… ஸங்கா²ரே… விஞ்ஞாணம் நேவ பஜஹதி ந உபாதி³யதி. பஜஹித்வா டி²தோ கிஞ்ச நேவ விஸினேதி ந உஸ்ஸினேதி? விஸினேத்வா டி²தோ ரூபம் நேவ விஸினேதி ந உஸ்ஸினேதி; விஸினேத்வா டி²தோ வேத³னம்… ஸஞ்ஞம்… ஸங்கா²ரே… விஞ்ஞாணம் நேவ விஸினேதி ந உஸ்ஸினேதி. விஸினேத்வா டி²தோ கிஞ்ச நேவ விதூ⁴பேதி ந ஸந்தூ⁴பேதி? விதூ⁴பேத்வா டி²தோ ரூபம் நேவ விதூ⁴பேதி ந ஸந்தூ⁴பேதி; விதூ⁴பேத்வா டி²தோ வேத³னம்… ஸஞ்ஞம்… ஸங்கா²ரே… விஞ்ஞாணம் நேவ விதூ⁴பேதி ந ஸந்தூ⁴பேதி. விதூ⁴பேத்வா டி²தோ ஏவம்விமுத்தசித்தம் கோ², பி⁴க்க²வே, பி⁴க்கு²ம் ஸஇந்தா³ தே³வா ஸப்³ரஹ்மகா ஸபஜாபதிகா ஆரகாவ நமஸ்ஸந்தி –

‘‘நமோ தே புரிஸாஜஞ்ஞ, நமோ தே புரிஸுத்தம;

யஸ்ஸ தே நாபி⁴ஜானாம, யம்பி நிஸ்ஸாய ஜா²யஸீ’’தி. ஸத்தமம்;

8. பிண்டோ³ல்யஸுத்தம்

80. ஏகம் ஸமயம் ப⁴க³வா ஸக்கேஸு விஹரதி கபிலவத்து²ஸ்மிம் நிக்³ரோதா⁴ராமே. அத² கோ² ப⁴க³வா கிஸ்மிஞ்சிதே³வ பகரணே பி⁴க்கு²ஸங்க⁴ம் பணாமேத்வா புப்³ப³ண்ஹஸமயம் நிவாஸேத்வா பத்தசீவரமாதா³ய கபிலவத்து²ம் பிண்டா³ய பாவிஸி. கபிலவத்து²ஸ்மிம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ யேன மஹாவனம் தேனுபஸங்கமி தி³வாவிஹாராய. மஹாவனம் அஜ்ஜோ²கா³ஹேத்வா பே³லுவலட்டி²காய மூலே தி³வாவிஹாரம் நிஸீதி³.

அத² கோ² ப⁴க³வதோ ரஹோக³தஸ்ஸ படிஸல்லீனஸ்ஸ ஏவம் சேதஸோ பரிவிதக்கோ உத³பாதி³ – ‘‘மயா கோ² பி⁴க்கு²ஸங்கோ⁴ பபா³ள்ஹோ. ஸந்தேத்த² பி⁴க்கூ² நவா அசிரபப்³ப³ஜிதா அது⁴னாக³தா இமம் த⁴ம்மவினயம். தேஸம் மமம் அபஸ்ஸந்தானம் ஸியா அஞ்ஞத²த்தம் ஸியா விபரிணாமோ. ஸேய்யதா²பி நாம வச்ச²ஸ்ஸ தருணஸ்ஸ மாதரம் அபஸ்ஸந்தஸ்ஸ ஸியா அஞ்ஞத²த்தம் ஸியா விபரிணாமோ, ஏவமேவ ஸந்தேத்த² பி⁴க்கூ² நவா அசிரபப்³ப³ஜிதா அது⁴னாக³தா இமம் த⁴ம்மவினயம் தேஸம் மமம் அபஸ்ஸந்தானம் ஸியா அஞ்ஞத²த்தம் ஸியா விபரிணாமோ. ஸேய்யதா²பி நாம பீ³ஜானம் தருணானம் உத³கம் அலப⁴ந்தானம் ஸியா அஞ்ஞத²த்தம் ஸியா விபரிணாமோ, ஏவமேவ ஸந்தேத்த²…பே… தேஸம் மமம் அலப⁴ந்தானம் த³ஸ்ஸனாய ஸியா அஞ்ஞத²த்தம் ஸியா விபரிணாமோ. யம்னூனாஹம் யதே²வ மயா புப்³பே³ பி⁴க்கு²ஸங்கோ⁴ அனுக்³க³ஹிதோ, ஏவமேவ ஏதரஹி அனுக்³க³ண்ஹேய்யம் பி⁴க்கு²ஸங்க⁴’’ந்தி.

அத² கோ² ப்³ரஹ்மா ஸஹம்பதி ப⁴க³வதோ சேதஸா சேதோபரிவிதக்கமஞ்ஞாய – ஸேய்யதா²பி நாம ப³லவா புரிஸோ ஸமிஞ்ஜிதம் [ஸம்மிஞ்ஜிதம் (ஸீ. ஸ்யா. கம். பீ.)] வா பா³ஹம் பஸாரேய்ய பஸாரிதம் வா பா³ஹம் ஸமிஞ்ஜேய்ய ஏவமேவ – ப்³ரஹ்மலோகே அந்தரஹிதோ ப⁴க³வதோ புரதோ பாதுரஹோஸி. அத² கோ² ப்³ரஹ்மா ஸஹம்பதி ஏகம்ஸம் உத்தராஸங்க³ம் கரித்வா யேன ப⁴க³வா தேனஞ்ஜலிம் பணாமேத்வா ப⁴க³வந்தம் ஏதத³வோச – ‘‘ஏவமேதம், ப⁴க³வா; ஏவமேதம், ஸுக³த! ப⁴க³வதோ, ப⁴ந்தே, பி⁴க்கு²ஸங்கோ⁴ பபா³ள்ஹோ. ஸந்தேத்த² பி⁴க்கூ² நவா அசிரபப்³ப³ஜிதா அது⁴னாக³தா இமம் த⁴ம்மவினயம். தேஸம் ப⁴க³வந்தம் அபஸ்ஸந்தானம் ஸியா அஞ்ஞத²த்தம் ஸியா விபரிணாமோ. ஸேய்யதா²பி நாம வச்ச²ஸ்ஸ தருணஸ்ஸ மாதரம் அபஸ்ஸந்தஸ்ஸ ஸியா அஞ்ஞத²த்தம் ஸியா விபரிணாமோ, ஏவமேவ ஸந்தேத்த² பி⁴க்கூ² நவா அசிரபப்³ப³ஜிதா அது⁴னாக³தா இமம் த⁴ம்மவினயம் தேஸம் ப⁴க³வந்தம் அபஸ்ஸந்தானம் ஸியா அஞ்ஞத²த்தம் ஸியா விபரிணாமோ. ஸேய்யதா²பி நாம பீ³ஜானம் தருணானம் உத³கம் அலப⁴ந்தானம் ஸியா அஞ்ஞத²த்தம் ஸியா விபரிணாமோ, ஏவமேவ ஸந்தேத்த² பி⁴க்கூ² நவா அசிரபப்³ப³ஜிதா அது⁴னாக³தா இமம் த⁴ம்மவினயம், தேஸம் ப⁴க³வந்தம் அலப⁴ந்தானம் த³ஸ்ஸனாய ஸியா அஞ்ஞத²த்தம் ஸியா விபரிணாமோ. அபி⁴னந்த³து, ப⁴ந்தே, ப⁴க³வா பி⁴க்கு²ஸங்க⁴ம்; அபி⁴வத³து, ப⁴ந்தே, ப⁴க³வா பி⁴க்கு²ஸங்க⁴ம். யதே²வ ப⁴க³வதா புப்³பே³ பி⁴க்கு²ஸங்கோ⁴ அனுக்³க³ஹிதோ, ஏவமேவ ஏதரஹி அனுக்³க³ண்ஹாது பி⁴க்கு²ஸங்க⁴’’ந்தி.

அதி⁴வாஸேஸி ப⁴க³வா துண்ஹீபா⁴வேன. அத² கோ² ப்³ரஹ்மா ஸஹம்பதி ப⁴க³வதோ அதி⁴வாஸனம் விதி³த்வா ப⁴க³வந்தம் அபி⁴வாதே³த்வா பத³க்கி²ணம் கத்வா தத்தே²வந்தரதா⁴யி.

அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ யேன நிக்³ரோதா⁴ராமோ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா ததா²ரூபம் இத்³தா⁴பி⁴ஸங்கா²ரம் அபி⁴ஸங்கா²ஸி [அபி⁴ஸங்கா²ரேஸி (ஸ்யா. கம்.), அபி⁴ஸங்கா²யி (பீ.), அபி⁴ஸங்க²ரோதி (க.)] யதா² தே பி⁴க்கூ² (ஏகத்³வீஹிகாய ஸாரஜ்ஜமானரூபா யேனாஹம் [யேன ப⁴க³வா (?)] தேனுபஸங்கமேய்யும். தேபி பி⁴க்கூ² ) [( ) ஸீ. ஸ்யா. கம். போத்த²கேஸு நத்தி²] ஏகத்³வீஹிகாய ஸாரஜ்ஜமானரூபா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னே கோ² தே பி⁴க்கூ² ப⁴க³வா ஏதத³வோச –

‘‘அந்தமித³ம், பி⁴க்க²வே, ஜீவிகானம் யதி³த³ம் பிண்டோ³ல்யம். அபி⁴ஸாபோயம், பி⁴க்க²வே, லோகஸ்மிம் பிண்டோ³லோ விசரஸி பத்தபாணீதி. தஞ்ச கோ² ஏதம், பி⁴க்க²வே, குலபுத்தா உபேந்தி அத்த²வஸிகா, அத்த²வஸம் படிச்ச; நேவ ராஜாபி⁴னீதா, ந சோராபி⁴னீதா, ந இணட்டா, ந ப⁴யட்டா, ந ஆஜீவிகாபகதா; அபி ச கோ² ஓதிண்ணாம்ஹ ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி து³க்கோ²திண்ணா து³க்க²பரேதா அப்பேவ நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ அந்தகிரியா பஞ்ஞாயேதா²தி.

‘‘ஏவம் பப்³ப³ஜிதோ சாயம், பி⁴க்க²வே, குலபுத்தோ. ஸோ ச ஹோதி அபி⁴ஜ்ஜா²லு காமேஸு திப்³ப³ஸாராகோ³ ப்³யாபன்னசித்தோ பது³ட்ட²மனஸங்கப்போ முட்ட²ஸ்ஸதி அஸம்பஜானோ அஸமாஹிதோ விப்³ப⁴ந்தசித்தோ பாகதிந்த்³ரியோ. ஸேய்யதா²பி, பி⁴க்க²வே, ச²வாலாதம் உப⁴தோபதி³த்தம் மஜ்ஜே² கூ³த²க³தம், நேவ கா³மே கட்ட²த்த²ம் ப²ரதி, நாரஞ்ஞே கட்ட²த்த²ம் ப²ரதி. ததூ²பமாஹம், பி⁴க்க²வே, இமம் புக்³க³லம் வதா³மி கி³ஹிபோ⁴கா³ ச பரிஹீனோ, ஸாமஞ்ஞத்த²ஞ்ச ந பரிபூரேதி.

‘‘தயோமே, பி⁴க்க²வே, அகுஸலவிதக்கா – காமவிதக்கோ, ப்³யாபாத³விதக்கோ, விஹிம்ஸாவிதக்கோ. இமே ச பி⁴க்க²வே, தயோ அகுஸலவிதக்கா க்வ அபரிஸேஸா நிருஜ்ஜ²ந்தி? சதூஸு வா ஸதிபட்டா²னேஸு ஸுப்பதிட்டி²தசித்தஸ்ஸ விஹரதோ அனிமித்தம் வா ஸமாதி⁴ம் பா⁴வயதோ. யாவஞ்சித³ம், பி⁴க்க²வே, அலமேவ அனிமித்தோ ஸமாதி⁴ பா⁴வேதும். அனிமித்தோ, பி⁴க்க²வே, ஸமாதி⁴ பா⁴விதோ ப³ஹுலீகதோ மஹப்ப²லோ ஹோதி மஹானிஸம்ஸோ.

‘‘த்³வேமா, பி⁴க்க²வே, தி³ட்டி²யோ – ப⁴வதி³ட்டி² ச விப⁴வதி³ட்டி² ச. தத்ர கோ², பி⁴க்க²வே, ஸுதவா அரியஸாவகோ இதி படிஸஞ்சிக்க²தி – ‘அத்தி² நு கோ² தம் கிஞ்சி லோகஸ்மிம் யமஹம் உபாதி³யமானோ ந வஜ்ஜவா அஸ்ஸ’ந்தி? ஸோ ஏவம் பஜானாதி – ‘நத்தி² நு கோ² தம் கிஞ்சி லோகஸ்மிம் யமஹம் உபாதி³யமானோ ந வஜ்ஜவா அஸ்ஸம். அஹஞ்ஹி ரூபஞ்ஞேவ உபாதி³யமானோ உபாதி³யேய்யம் வேத³னஞ்ஞேவ… ஸஞ்ஞஞ்ஞேவ… ஸங்கா²ரேயேவ விஞ்ஞாணஞ்ஞேவ உபாதி³யமானோ உபாதி³யேய்யம். தஸ்ஸ மே அஸ்ஸ [அயம் (க.)] உபாதா³னபச்சயா ப⁴வோ; ப⁴வபச்சயா ஜாதி; ஜாதிபச்சயா ஜராமரணம் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வேய்யும். ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ அஸ்ஸா’’’தி.

‘‘தம் கிம் மஞ்ஞத², பி⁴க்க²வே, ரூபம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘யம் பனானிச்சம் து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம் கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதம், ப⁴ந்தே’’. ‘‘வேத³னா… ஸஞ்ஞா… ஸங்கா²ரா… விஞ்ஞாணம்…பே… தஸ்மாதிஹ, பி⁴க்க²வே, ஏவம் பஸ்ஸம்… நாபரம் இத்த²த்தாயாதி பஜானாதீ’’தி. அட்ட²மம்.

9. பாலிலேய்யஸுத்தம்

81. ஏகம் ஸமயம் ப⁴க³வா கோஸம்பி³யம் விஹரதி கோ⁴ஸிதாராமே. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய கோஸம்பி³ம் பிண்டா³ய பாவிஸி. கோஸம்பி³யம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ ஸாமம் ஸேனாஸனம் ஸம்ஸாமேத்வா பத்தசீவரமாதா³ய அனாமந்தேத்வா உபட்டா²கே அனபலோகேத்வா பி⁴க்கு²ஸங்க⁴ம் ஏகோ அது³தியோ சாரிகம் பக்காமி.

அத² கோ² அஞ்ஞதரோ பி⁴க்கு² அசிரபக்கந்தஸ்ஸ ப⁴க³வதோ யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மந்தம் ஆனந்த³ம் ஏதத³வோச – ‘‘ஏஸாவுஸோ, ஆனந்த³, ப⁴க³வா ஸாமம் ஸேனாஸனம் ஸம்ஸாமேத்வா பத்தசீவரமாதா³ய அனாமந்தேத்வா உபட்டா²கே அனபலோகேத்வா பி⁴க்கு²ஸங்க⁴ம் ஏகோ அது³தியோ சாரிகம் பக்கந்தோ’’தி. ‘‘யஸ்மிம், ஆவுஸோ, ஸமயே ப⁴க³வா ஸாமம் ஸேனாஸனம் ஸம்ஸாமேத்வா பத்தசீவரமாதா³ய அனாமந்தேத்வா உபட்டா²கே அனபலோகேத்வா பி⁴க்கு²ஸங்க⁴ம் ஏகோ அது³தியோ சாரிகம் பக்கமதி, ஏகோவ ப⁴க³வா தஸ்மிம் ஸமயே விஹரிதுகாமோ ஹோதி; ந ப⁴க³வா தஸ்மிம் ஸமயே கேனசி அனுப³ந்தி⁴தப்³போ³ ஹோதீ’’தி.

அத² கோ² ப⁴க³வா அனுபுப்³பே³ன சாரிகம் சரமானோ யேன பாலிலேய்யகம் [பாரிலேய்யகம் (ஸீ. பீ.)] தத³வஸரி. தத்ர ஸுத³ம் ப⁴க³வா பாலிலேய்யகே விஹரதி ப⁴த்³த³ஸாலமூலே. அத² கோ² ஸம்ப³ஹுலா பி⁴க்கூ² யேனாயஸ்மா ஆனந்தோ³ தேனுபஸங்கமிம்ஸு; உபஸங்கமித்வா ஆயஸ்மதா ஆனந்தே³ன ஸத்³தி⁴ம் ஸம்மோதி³ம்ஸு. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ஆயஸ்மந்தம் ஆனந்த³ம் ஏதத³வோசும் – ‘‘சிரஸ்ஸுதா கோ² நோ, ஆவுஸோ ஆனந்த³, ப⁴க³வதோ ஸம்முகா² த⁴ம்மீ கதா²; இச்சா²ம மயம், ஆவுஸோ ஆனந்த³, ப⁴க³வதோ ஸம்முகா² த⁴ம்மிம் கத²ம் ஸோது’’ந்தி.

அத² கோ² ஆயஸ்மா ஆனந்தோ³ தேஹி பி⁴க்கூ²ஹி ஸத்³தி⁴ம் யேன பாலிலேய்யகம் ப⁴த்³த³ஸாலமூலம் யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னே கோ² தே பி⁴க்கூ² ப⁴க³வா த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. தேன கோ² பன ஸமயேன அஞ்ஞதரஸ்ஸ பி⁴க்கு²னோ ஏவம் சேதஸோ பரிவிதக்கோ உத³பாதி³ – ‘‘கத²ம் நு கோ² ஜானதோ கத²ம் பஸ்ஸதோ அனந்தரா ஆஸவானம் க²யோ ஹோதீ’’தி? அத² கோ² ப⁴க³வா தஸ்ஸ பி⁴க்கு²னோ சேதஸா சேதோபரிவிதக்கமஞ்ஞாய பி⁴க்கூ² ஆமந்தேஸி – ‘‘விசயஸோ தே³ஸிதோ, பி⁴க்க²வே, மயா த⁴ம்மோ; விசயஸோ தே³ஸிதா சத்தாரோ ஸதிபட்டா²னா; விசயஸோ தே³ஸிதா சத்தாரோ ஸம்மப்பதா⁴னா; விசயஸோ தே³ஸிதா சத்தாரோ இத்³தி⁴பாதா³; விசயஸோ தே³ஸிதானி பஞ்சிந்த்³ரியானி; விசயஸோ தே³ஸிதானி பஞ்ச ப³லானி; விசயஸோ தே³ஸிதா ஸத்தபோ³ஜ்ஜ²ங்கா³; விசயஸோ தே³ஸிதோ அரியோ அட்ட²ங்கி³கோ மக்³கோ³. ஏவம் விசயஸோ தே³ஸிதோ, பி⁴க்க²வே, மயா த⁴ம்மோ. ஏவம் விசயஸோ தே³ஸிதே கோ², பி⁴க்க²வே, மயா த⁴ம்மே அத² ச பனிதே⁴கச்சஸ்ஸ பி⁴க்கு²னோ ஏவம் சேதஸோ பரிவிதக்கோ உத³பாதி³ – ‘கத²ம் நு கோ² ஜானதோ கத²ம் பஸ்ஸதோ அனந்தரா ஆஸவானம் க²யோ ஹோதீ’’’தி?

‘‘கத²ஞ்ச, பி⁴க்க²வே, ஜானதோ கத²ம் பஸ்ஸதோ அனந்தரா ஆஸவானம் க²யோ ஹோதி? இத⁴ பி⁴க்க²வே, அஸ்ஸுதவா புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபம் அத்ததோ ஸமனுபஸ்ஸதி. யா கோ² பன ஸா, பி⁴க்க²வே, ஸமனுபஸ்ஸனா ஸங்கா²ரோ ஸோ. ஸோ பன ஸங்கா²ரோ கிம்னிதா³னோ கிம்ஸமுத³யோ கிம்ஜாதிகோ கிம்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதேன பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ ஸங்க²தோ படிச்சஸமுப்பன்னோ. ஸாபி தண்ஹா அனிச்சா ஸங்க²தா படிச்சஸமுப்பன்னா. ஸாபி வேத³னா அனிச்சா ஸங்க²தா படிச்சஸமுப்பன்னா. ஸோபி ப²ஸ்ஸோ அனிச்சோ ஸங்க²தோ படிச்சஸமுப்பன்னோ. ஸாபி அவிஜ்ஜா அனிச்சா ஸங்க²தா படிச்சஸமுப்பன்னா. ஏவம்பி கோ², பி⁴க்க²வே, ஜானதோ ஏவம் பஸ்ஸதோ அனந்தரா ஆஸவானம் க²யோ ஹோதி.

‘‘ந ஹேவ கோ² ரூபம் அத்ததோ ஸமனுபஸ்ஸதி; அபி ச கோ² ரூபவந்தம் அத்தானம் ஸமனுபஸ்ஸதி. யா கோ² பன ஸா, பி⁴க்க²வே, ஸமனுபஸ்ஸனா ஸங்கா²ரோ ஸோ. ஸோ பன ஸங்கா²ரோ கிம்னிதா³னோ கிம்ஸமுத³யோ கிம்ஜாதிகோ கிம்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதேன பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ ஸங்க²தோ படிச்சஸமுப்பன்னோ. ஸாபி தண்ஹா… ஸாபி வேத³னா… ஸோபி ப²ஸ்ஸோ… ஸாபி அவிஜ்ஜா அனிச்சா ஸங்க²தா படிச்சஸமுப்பன்னா. ஏவம்பி கோ², பி⁴க்க²வே, ஜானதோ ஏவம் பஸ்ஸதோ அனந்தரா ஆஸவானம் க²யோ ஹோதி.

‘‘ந ஹேவ கோ² ரூபம் அத்ததோ ஸமனுபஸ்ஸதி, ந ரூபவந்தம் அத்தானம் ஸமனுபஸ்ஸதி; அபி ச கோ² அத்தனி ரூபம் ஸமனுபஸ்ஸதி. யா கோ² பன ஸா, பி⁴க்க²வே, ஸமனுபஸ்ஸனா ஸங்கா²ரோ ஸோ. ஸோ பன ஸங்கா²ரோ கிம்னிதா³னோ கிம்ஸமுத³யோ கிம்ஜாதிகோ கிம்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதேன பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ ஸங்க²தோ படிச்சஸமுப்பன்னோ. ஸாபி தண்ஹா… ஸாபி வேத³னா… ஸோபி ப²ஸ்ஸோ… ஸாபி அவிஜ்ஜா அனிச்சா ஸங்க²தா படிச்சஸமுப்பன்னா. ஏவம்பி கோ², பி⁴க்க²வே, ஜானதோ ஏவம் பஸ்ஸதோ அனந்தரா ஆஸவானம் க²யோ ஹோதி.

‘‘ந ஹேவ கோ² ரூபம் அத்ததோ ஸமனுபஸ்ஸதி, ந ரூபவந்தம் அத்தானம் ஸமனுபஸ்ஸதி, ந அத்தனி ரூபம் ஸமனுபஸ்ஸதி; அபி ச கோ² ரூபஸ்மிம் அத்தானம் ஸமனுபஸ்ஸதி. யா கோ² பன ஸா, பி⁴க்க²வே, ஸமனுபஸ்ஸனா ஸங்கா²ரோ ஸோ. ஸோ பன ஸங்கா²ரோ கிம்னிதா³னோ கிம்ஸமுத³யோ கிம்ஜாதிகோ கிம்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதே பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ ஸங்க²தோ படிச்சஸமுப்பன்னோ. ஸாபி தண்ஹா … ஸாபி வேத³னா… ஸோபி ப²ஸ்ஸோ… ஸாபி அவிஜ்ஜா அனிச்சா ஸங்க²தா படிச்சஸமுப்பன்னா. ஏவம்பி கோ², பி⁴க்க²வே, ஜானதோ…பே… ஆஸவானம் க²யோ ஹோதி.

‘‘ந ஹேவ கோ² ரூபம் அத்ததோ ஸமனுபஸ்ஸதி, ந ரூபவந்தம் அத்தானம், ந அத்தனி ரூபம், ந ரூபஸ்மிம் அத்தானம் ஸமனுபஸ்ஸதி; அபி ச கோ² வேத³னம் அத்ததோ ஸமனுபஸ்ஸதி, அபி ச கோ² வேத³னாவந்தம் அத்தானம் ஸமனுபஸ்ஸதி, அபி ச கோ² அத்தனி வேத³னம் ஸமனுபஸ்ஸதி, அபி ச கோ² வேத³னாய அத்தானம் ஸமனுபஸ்ஸதி; அபி ச கோ² ஸஞ்ஞம்… அபி ச கோ² ஸங்கா²ரே அத்ததோ ஸமனுபஸ்ஸதி, அபி ச கோ² ஸங்கா²ரவந்தம் அத்தானம் ஸமனுபஸ்ஸதி, அபி ச கோ² அத்தனி ஸங்கா²ரே ஸமனுபஸ்ஸதி, அபி ச கோ² ஸங்கா²ரேஸு அத்தானம் ஸமனுபஸ்ஸதி; அபி ச கோ² விஞ்ஞாணம் அத்ததோ ஸமனுபஸ்ஸதி, அபி ச கோ² விஞ்ஞாணவந்தம் அத்தானம், அபி ச கோ² அத்தனி விஞ்ஞாணம், அபி ச கோ² விஞ்ஞாணஸ்மிம் அத்தானம் ஸமனுபஸ்ஸதி. யா கோ² பன ஸா, பி⁴க்க²வே, ஸமனுபஸ்ஸனா ஸங்கா²ரோ ஸோ. ஸோ பன ஸங்கா²ரோ கிம்னிதா³னோ…பே… கிம்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதே பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ ஸங்க²தோ படிச்சஸமுப்பன்னோ. ஸாபி தண்ஹா… ஸாபி வேத³னா… ஸோபி ப²ஸ்ஸோ … ஸாபி அவிஜ்ஜா அனிச்சா ஸங்க²தா படிச்சஸமுப்பன்னா. ஏவம் கோ², பி⁴க்க²வே, ஜானதோ ஏவம் பஸ்ஸதோ அனந்தரா ஆஸவானம் க²யோ ஹோதி.

‘‘ந ஹேவ கோ² ரூபம் அத்ததோ ஸமனுபஸ்ஸதி, ந வேத³னம் அத்ததோ ஸமனுபஸ்ஸதி, ந ஸஞ்ஞம்… ந ஸங்கா²ரே… ந விஞ்ஞாணம் அத்ததோ ஸமனுபஸ்ஸதி; அபி ச கோ² ஏவம்தி³ட்டி² ஹோதி – ‘ஸோ அத்தா ஸோ லோகோ, ஸோ பேச்ச ப⁴விஸ்ஸாமி நிச்சோ து⁴வோ ஸஸ்ஸதோ அவிபரிணாமத⁴ம்மோ’தி. யா கோ² பன ஸா, பி⁴க்க²வே, ஸஸ்ஸததி³ட்டி² ஸங்கா²ரோ ஸோ. ஸோ பன ஸங்கா²ரோ கிம்னிதா³னோ…பே… ஏவம்பி கோ², பி⁴க்க²வே, ஜானதோ ஏவம் பஸ்ஸதோ அனந்தரா ஆஸவானம் க²யோ ஹோதி.

‘‘ந ஹேவ கோ² ரூபம் அத்ததோ ஸமனுபஸ்ஸதி, ந வேத³னம் … ந ஸஞ்ஞம்… ந ஸங்கா²ரே… ந விஞ்ஞாணம் அத்ததோ ஸமனுபஸ்ஸதி; நாபி ஏவம்தி³ட்டி² ஹோதி – ‘ஸோ அத்தா ஸோ லோகோ, ஸோ பேச்ச ப⁴விஸ்ஸாமி நிச்சோ து⁴வோ ஸஸ்ஸதோ அவிபரிணாமத⁴ம்மோ’தி. அபி ச கோ² ஏவம்தி³ட்டி² ஹோதி – ‘நோ சஸ்ஸம் நோ ச மே ஸியா நாப⁴விஸ்ஸம் ந மே ப⁴விஸ்ஸதீ’தி. யா கோ² பன ஸா, பி⁴க்க²வே, உச்சே²த³தி³ட்டி² ஸங்கா²ரோ ஸோ. ஸோ பன ஸங்கா²ரோ கிம்னிதா³னோ கிம்ஸமுத³யோ கிம்ஜாதிகோ கிம்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதேன பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ…பே… ஏவம்பி கோ², பி⁴க்க²வே, ஜானதோ ஏவம் பஸ்ஸதோ அனந்தரா ஆஸவானம் க²யோ ஹோதி.

‘‘ந ஹேவ கோ² ரூபம் அத்ததோ ஸமனுபஸ்ஸதி, ந வேத³னம்… ந ஸஞ்ஞம்… ந ஸங்கா²ரே… ந விஞ்ஞாணம் அத்ததோ ஸமனுபஸ்ஸதி…பே… ந விஞ்ஞாணஸ்மிம் அத்ததோ ஸமனுபஸ்ஸதி, நாபி ஏவம்தி³ட்டி² ஹோதி – ‘ஸோ அத்தா ஸோ லோகோ, ஸோ பேச்ச ப⁴விஸ்ஸாமி நிச்சோ து⁴வோ ஸஸ்ஸதோ அவிபரிணாமத⁴ம்மோ’தி; நாபி ஏவம்தி³ட்டி² ஹோதி – ‘நோ சஸ்ஸம் நோ ச மே ஸியா நாப⁴விஸ்ஸம் ந மே ப⁴விஸ்ஸதீ’தி; அபி ச கோ² கங்கீ² ஹோதி விசிகிச்சீ² அனிட்ட²ங்க³தோ ஸத்³த⁴ம்மே. யா கோ² பன ஸா, பி⁴க்க²வே, கங்கி²தா விசிகிச்சி²தா அனிட்ட²ங்க³ததா ஸத்³த⁴ம்மே ஸங்கா²ரோ ஸோ. ஸோ பன ஸங்கா²ரோ கிம்னிதா³னோ கிம்ஸமுத³யோ கிம்ஜாதிகோ கிம்பப⁴வோ? அவிஜ்ஜாஸம்ப²ஸ்ஸஜேன, பி⁴க்க²வே, வேத³யிதேன பு²ட்ட²ஸ்ஸ அஸ்ஸுதவதோ புது²ஜ்ஜனஸ்ஸ உப்பன்னா தண்ஹா; ததோஜோ ஸோ ஸங்கா²ரோ. இதி கோ², பி⁴க்க²வே, ஸோபி ஸங்கா²ரோ அனிச்சோ ஸங்க²தோ படிச்சஸமுப்பன்னோ. ஸாபி தண்ஹா அனிச்சா ஸங்க²தா படிச்சஸமுப்பன்னா. ஸாபி வேத³னா அனிச்சா ஸங்க²தா படிச்சஸமுப்பன்னா. ஸோபி ப²ஸ்ஸோ அனிச்சோ ஸங்க²தோ படிச்சஸமுப்பன்னோ. ஸாபி அவிஜ்ஜா அனிச்சா ஸங்க²தா படிச்சஸமுப்பன்னா. ஏவம் கோ², பி⁴க்க²வே, ஜானதோ ஏவம் பஸ்ஸதோ அனந்தரா ஆஸவானம் க²யோ ஹோதீ’’தி. நவமம்.

10. புண்ணமஸுத்தம்

82. ஏகம் ஸமயம் ப⁴க³வா ஸாவத்தி²யம் விஹரதி புப்³பா³ராமே மிகா³ரமாதுபாஸாதே³ மஹதா பி⁴க்கு²ஸங்கே⁴ன ஸத்³தி⁴ம். தேன கோ² பன ஸமயேன ப⁴க³வா தத³ஹுபோஸதே² பன்னரஸே புண்ணாய புண்ணமாய ரத்தியா பி⁴க்கு²ஸங்க⁴பரிவுதோ அஜ்ஜோ²காஸே நிஸின்னோ ஹோதி.

அத² கோ² அஞ்ஞதரோ பி⁴க்கு² உட்டா²யாஸனா ஏகம்ஸம் உத்தராஸங்க³ம் கரித்வா யேன ப⁴க³வா தேனஞ்ஜலிம் பணாமேத்வா ப⁴க³வந்தம் ஏதத³வோச – ‘‘புச்சே²ய்யாஹம், ப⁴ந்தே, ப⁴க³வந்தம் கிஞ்சிதே³வ [கஞ்சிதே³வ (?)] தே³ஸம், ஸசே மே ப⁴க³வா ஓகாஸம் கரோதி பஞ்ஹஸ்ஸ வேய்யாகரணாயா’’தி? ‘‘தேன ஹி த்வம், பி⁴க்கு², ஸகே ஆஸனே நிஸீதி³த்வா புச்ச² யதா³கங்க²ஸீ’’தி. ‘‘ஏவம், ப⁴ந்தே’’தி கோ² ஸோ பி⁴க்கு² ப⁴க³வதோ படிஸ்ஸுத்வா ஸகே ஆஸனே நிஸீதி³த்வா ப⁴க³வந்தம் ஏதத³வோச – ‘‘இமே நு கோ², ப⁴ந்தே, பஞ்சுபாதா³னக்க²ந்தா⁴, ஸேய்யதி²த³ம் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴’’தி.

‘‘இமே கோ² பன, பி⁴க்கு², பஞ்சுபாதா³னக்க²ந்தா⁴; ஸேய்யதி²த³ம் – ரூபுபாதா³னக்க²ந்தோ⁴…பே… விஞ்ஞாணுபாதா³னக்க²ந்தோ⁴’’தி. ‘‘ஸாது⁴, ப⁴ந்தே’’தி கோ² ஸோ பி⁴க்கு² ப⁴க³வதோ பா⁴ஸிதம் அபி⁴னந்தி³த்வா அனுமோதி³த்வா ப⁴க³வந்தம் உத்தரிம் பஞ்ஹம் அபுச்சி² –

‘‘இமே கோ² பன, ப⁴ந்தே, பஞ்சுபாதா³னக்க²ந்தா⁴ கிம்மூலகா’’தி? ‘‘இமே கோ², பி⁴க்கு², பஞ்சுபாதா³னக்க²ந்தா⁴ ச²ந்த³மூலகா’’தி…பே… தஞ்ஞேவ நு கோ², ப⁴ந்தே, உபாதா³னம் தே பஞ்சுபாதா³னக்க²ந்தா⁴ உதா³ஹு அஞ்ஞத்ர பஞ்சஹி உபாதா³னக்க²ந்தே⁴ஹி உபாதா³னந்தி? ‘‘ந கோ², பி⁴க்கு², தஞ்ஞேவ உபாதா³னம் தே பஞ்சுபாதா³னக்க²ந்தா⁴ நாபி அஞ்ஞத்ர பஞ்சஹி உபாதா³னக்க²ந்தே⁴ஹி உபாதா³னம், அபி ச யோ தத்த² ச²ந்த³ராகோ³ தம் தத்த² உபாதா³ன’’ந்தி. ‘‘ஸாது⁴, ப⁴ந்தே’’தி கோ² ஸோ பி⁴க்கு²…பே… உத்தரிம் பஞ்ஹம் அபுச்சி² –

‘‘ஸியா பன, ப⁴ந்தே, பஞ்சுபாதா³னக்க²ந்தே⁴ஸு ச²ந்த³ராக³வேமத்ததா’’தி? ‘‘ஸியா, பி⁴க்கூ²’’தி ப⁴க³வா அவோச – ‘‘இத⁴, பி⁴க்கு², ஏகச்சஸ்ஸ ஏவம் ஹோதி – ‘ஏவம்ரூபோ ஸியம் அனாக³தமத்³தா⁴னம், ஏவம்வேத³னோ ஸியம் அனாக³தமத்³தா⁴னம், ஏவம்ஸஞ்ஞோ ஸியம் அனாக³தமத்³தா⁴னம், ஏவம்ஸங்கா²ரோ ஸியம் அனாக³தமத்³தா⁴னம், ஏவம்விஞ்ஞாணோ ஸியம் அனாக³தமத்³தா⁴ன’ந்தி. ஏவம் கோ², பி⁴க்கு², ஸியா பஞ்சுபாதா³னக்க²ந்தே⁴ஸு ச²ந்த³ராக³வேமத்ததா’’தி? ‘‘ஸாது⁴, ப⁴ந்தே’’தி கோ² ஸோ பி⁴க்கு²…பே… உத்தரிம் பஞ்ஹம் அபுச்சி² –

‘‘கித்தாவதா நு கோ², ப⁴ந்தே, க²ந்தா⁴னம் க²ந்தா⁴தி⁴வசன’’ந்தி? ‘‘யம் கிஞ்சி, பி⁴க்கு², ரூபம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, அயம் வுச்சதி ரூபக்க²ந்தோ⁴. யா காசி வேத³னா… யா காசி ஸஞ்ஞா … யே கேசி ஸங்கா²ரா… யம் கிஞ்சி விஞ்ஞாணம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, அயம் வுச்சதி விஞ்ஞாணக்க²ந்தோ⁴. ஏத்தாவதா கோ², பி⁴க்கு², க²ந்தா⁴னம் க²ந்தா⁴தி⁴வசன’’ந்தி. ‘‘ஸாது⁴, ப⁴ந்தே’’தி கோ² ஸோ பி⁴க்கு²…பே… அபுச்சி² –

‘‘கோ நு கோ², ப⁴ந்தே, ஹேது கோ பச்சயோ ரூபக்க²ந்த⁴ஸ்ஸ பஞ்ஞாபனாய; கோ ஹேது கோ பச்சயோ வேத³னாக்க²ந்த⁴ஸ்ஸ பஞ்ஞாபனாய; கோ ஹேது கோ பச்சயோ ஸஞ்ஞாக்க²ந்த⁴ஸ்ஸ பஞ்ஞாபனாய; கோ ஹேது கோ பச்சயோ ஸங்கா²ரக்க²ந்த⁴ஸ்ஸ பஞ்ஞாபனாய; கோ ஹேது கோ பச்சயோ விஞ்ஞாணக்க²ந்த⁴ஸ்ஸ பஞ்ஞாபனாயா’’தி? ‘‘சத்தாரோ கோ², பி⁴க்கு², மஹாபூ⁴தா ஹேது, சத்தாரோ மஹாபூ⁴தா பச்சயோ ரூபக்க²ந்த⁴ஸ்ஸ பஞ்ஞாபனாய. ப²ஸ்ஸோ ஹேது ப²ஸ்ஸோ பச்சயோ வேத³னாக்க²ந்த⁴ஸ்ஸ பஞ்ஞாபனாய. ப²ஸ்ஸோ ஹேது ப²ஸ்ஸோ பச்சயோ ஸஞ்ஞாக்க²ந்த⁴ஸ்ஸ பஞ்ஞாபனாய. ப²ஸ்ஸோ ஹேது, ப²ஸ்ஸோ பச்சயோ ஸங்கா²ரக்க²ந்த⁴ஸ்ஸ பஞ்ஞாபனாய. நாமரூபம் ஹேது, நாமரூபம் பச்சயோ விஞ்ஞாணக்க²ந்த⁴ஸ்ஸ பஞ்ஞாபனாயா’’தி. ‘‘ஸாது⁴, ப⁴ந்தே’’தி கோ² ஸோ பி⁴க்கு²…பே… அபுச்சி² –

‘‘கத²ம் நு கோ², ப⁴ந்தே, ஸக்காயதி³ட்டி² ஹோதீ’’தி? ‘‘இத⁴, பி⁴க்கு², அஸ்ஸுதவா புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபம் அத்ததோ ஸமனுபஸ்ஸதி, ரூபவந்தம் வா அத்தானம்; அத்தனி வா ரூபம், ரூபஸ்மிம் வா அத்தானம்; வேத³னம்… ஸஞ்ஞம்… ஸங்கா²ரே… விஞ்ஞாணம்… அத்ததோ ஸமனுபஸ்ஸதி, விஞ்ஞாணவந்தம் வா அத்தானம்; அத்தனி வா விஞ்ஞாணம், விஞ்ஞாணஸ்மிம் வா அத்தானம். ஏவம் கோ², பி⁴க்கு², ஸக்காயதி³ட்டி² ஹோதீ’’தி. ‘‘ஸாது⁴, ப⁴ந்தே’’தி கோ² ஸோ பி⁴க்கு²…பே… அபுச்சி² –

‘‘கத²ம் பன, ப⁴ந்தே, ஸக்காயதி³ட்டி² ந ஹோதீ’’தி? ‘‘இத⁴, பி⁴க்கு², ஸுதவா அரியஸாவகோ அரியானம் த³ஸ்ஸாவீ அரியத⁴ம்மஸ்ஸ கோவிதோ³ அரியத⁴ம்மே ஸுவினீதோ, ஸப்புரிஸானம் த³ஸ்ஸாவீ ஸப்புரிஸத⁴ம்மஸ்ஸ கோவிதோ³ ஸப்புரிஸத⁴ம்மே ஸுவினீதோ ந ரூபம் அத்ததோ ஸமனுபஸ்ஸதி, ந ரூபவந்தம் வா அத்தானம்; ந அத்தனி வா ரூபம், ந ரூபஸ்மிம் வா அத்தானம்; ந வேத³னம்… ந ஸஞ்ஞம்… ந ஸங்கா²ரே… ந விஞ்ஞாணம் அத்ததோ ஸமனுபஸ்ஸதி, ந விஞ்ஞாணவந்தம் வா அத்தானம்; ந அத்தனி வா விஞ்ஞாணம், ந விஞ்ஞாணஸ்மிம் வா அத்தானம். ஏவம் கோ², பி⁴க்கு², ஸக்காயதி³ட்டி² ந ஹோதீ’’தி. ‘‘ஸாது⁴, ப⁴ந்தே’’தி கோ² ஸோ பி⁴க்கு²…பே… அபுச்சி² –

‘‘கோ நு கோ², ப⁴ந்தே, ரூபஸ்ஸ அஸ்ஸாதோ³, கோ ஆதீ³னவோ, கிம் நிஸ்ஸரணம்; கோ வேத³னாய… கோ ஸஞ்ஞாய… கோ ஸங்கா²ரானம்… கோ விஞ்ஞாணஸ்ஸ அஸ்ஸாதோ³, கோ ஆதீ³னவோ, கிம் நிஸ்ஸரண’’ந்தி? ‘‘யம் கோ², பி⁴க்கு², ரூபம் படிச்ச உப்பஜ்ஜதி ஸுக²ம் ஸோமனஸ்ஸம் – அயம் ரூபஸ்ஸ அஸ்ஸாதோ³. யம் ரூபம் அனிச்சம் து³க்க²ம் விபரிணாமத⁴ம்மம் – அயம் ரூபஸ்ஸ ஆதீ³னவோ. யோ ரூபஸ்மிம் ச²ந்த³ராக³வினயோ ச²ந்த³ராக³ப்பஹானம் – இத³ம் ரூபஸ்ஸ நிஸ்ஸரணம். யம் வேத³னம் படிச்ச… யம் ஸஞ்ஞம் படிச்ச… யே ஸங்கா²ரே படிச்ச… யம் விஞ்ஞாணம் படிச்ச உப்பஜ்ஜதி ஸுக²ம் ஸோமனஸ்ஸம் – அயம் விஞ்ஞாணஸ்ஸ அஸ்ஸாதோ³. யம் விஞ்ஞாணம் அனிச்சம் து³க்க²ம் விபரிணாமத⁴ம்மம் – அயம் விஞ்ஞாணஸ்ஸ ஆதீ³னவோ. யோ விஞ்ஞாணஸ்மிம் ச²ந்த³ராக³வினயோ ச²ந்த³ராக³ப்பஹானம் – இத³ம் விஞ்ஞாணஸ்ஸ நிஸ்ஸரண’’ந்தி. ‘‘ஸாது⁴, ப⁴ந்தே’’தி கோ² ஸோ பி⁴க்கு² ப⁴க³வதோ பா⁴ஸிதம் அபி⁴னந்தி³த்வா அனுமோதி³த்வா ப⁴க³வந்தம் உத்தரிம் பஞ்ஹம் அபுச்சி² –

‘‘கத²ம் நு கோ², ப⁴ந்தே, ஜானதோ, கத²ம் பஸ்ஸதோ இமஸ்மிஞ்ச ஸவிஞ்ஞாணகே காயே ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானானுஸயா ந ஹோந்தீ’’தி? ‘‘யம் கிஞ்சி, பி⁴க்கு², ரூபம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் ரூபம் – ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய பஸ்ஸதி. யா காசி வேத³னா… யா காசி ஸஞ்ஞா… யே கேசி ஸங்கா²ரா… யம் கிஞ்சி விஞ்ஞாணம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் விஞ்ஞாணம் – ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய பஸ்ஸதி. ஏவம் கோ², பி⁴க்கு², ஜானதோ ஏவம் பஸ்ஸதோ இமஸ்மிஞ்ச ஸவிஞ்ஞாணகே காயே ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானானுஸயா ந ஹோந்தீ’’தி.

தேன கோ² பன ஸமயேன அஞ்ஞதரஸ்ஸ பி⁴க்கு²னோ ஏவம் சேதஸோ பரிவிதக்கோ உத³பாதி³ – ‘‘இதி கிர போ⁴ ரூபம் அனத்தா, வேத³னா… ஸஞ்ஞா… ஸங்கா²ரா… விஞ்ஞாணம் அனத்தா; அனத்தகதானி கம்மானி கத²மத்தானம் [கதமத்தானம் (பீ.), கம்மத்தானம் (ஸ்யா. கம். க.)] பு²ஸிஸ்ஸந்தீ’’தி. அத² கோ² ப⁴க³வா தஸ்ஸ பி⁴க்கு²னோ சேதஸா சேதோ பரிவிதக்கமஞ்ஞாய பி⁴க்கூ² ஆமந்தேஸி –

‘‘டா²னம் கோ² பனேதம், பி⁴க்க²வே, விஜ்ஜதி யம் இதே⁴கச்சோ மோக⁴புரிஸோ அவித்³வா அவிஜ்ஜாக³தோ தண்ஹாதி⁴பதேய்யேன சேதஸா ஸத்து²ஸாஸனம் அதிதா⁴விதப்³ப³ம் மஞ்ஞேய்ய. இதி கிர, போ⁴, ரூபம் அனத்தா, வேத³னா… ஸஞ்ஞா… ஸங்கா²ரா… விஞ்ஞாணம் அனத்தா. அனத்தகதானி கம்மானி கத²மத்தானம் பு²ஸிஸ்ஸந்தீதி? படிபுச்சா²வினீதா கோ² மே தும்ஹே, பி⁴க்க²வே, தத்ர தத்ர தேஸு தேஸு த⁴ம்மேஸு.

‘‘தம் கிம் மஞ்ஞத², பி⁴க்க²வே, ரூபம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘வேத³னா… ஸஞ்ஞா… ஸங்கா²ரா… விஞ்ஞாணம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘யம் பனானிச்சம் து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதம், ப⁴ந்தே’’. தஸ்மாதிஹ…பே… ஏவம் பஸ்ஸம்…பே… நாபரம் இத்த²த்தாயாதி பஜானாதீ’’தி.

‘‘த்³வே க²ந்தா⁴ தஞ்ஞேவ ஸியம், அதி⁴வசனஞ்ச ஹேதுனா;

ஸக்காயேன து³வே வுத்தா, அஸ்ஸாத³விஞ்ஞாணகேன ச;

ஏதே த³ஸவிதா⁴ வுத்தா, ஹோதி பி⁴க்கு² புச்சா²யா’’தி. த³ஸமம்;

க²ஜ்ஜனீயவக்³கோ³ அட்ட²மோ.

தஸ்ஸுத்³தா³னம் –

அஸ்ஸாதோ³ த்³வே ஸமுத³யா, அரஹந்தேஹி அபரே த்³வே;

ஸீஹோ க²ஜ்ஜனீ பிண்டோ³ல்யம், பாலிலேய்யேன புண்ணமாதி.