2. பீ³ஜஸுத்தம்

54. ஸாவத்தி²னிதா³னம். ‘‘பஞ்சிமானி, பி⁴க்க²வே, பீ³ஜஜாதானி. கதமானி பஞ்ச? மூலபீ³ஜம், க²ந்த⁴பீ³ஜம், அக்³க³பீ³ஜம், ப²லுபீ³ஜம், பீ³ஜபீ³ஜஞ்ஞேவ பஞ்சமம். இமானி சஸ்ஸு, பி⁴க்க²வே, பஞ்ச பீ³ஜஜாதானி அக²ண்டா³னி அபூதிகானி அவாதாதபஹதானி ஸாராதா³னி [ஸாராதா³யீனி (கத்த²சி)] ஸுக²ஸயிதானி, பத²வீ [பட²வீ (ஸீ. ஸ்யா. கம். பீ.)] ச நாஸ்ஸ, ஆபோ ச நாஸ்ஸ; அபி நுமானி [அபி நு இமானி (ஸீ. பீ.)], பி⁴க்க²வே, பஞ்ச பீ³ஜஜாதானி வுத்³தி⁴ம் விரூள்ஹிம் வேபுல்லம் ஆபஜ்ஜேய்யு’’ந்தி? ‘‘நோ ஹேதம், ப⁴ந்தே’’. ‘‘இமானி சஸ்ஸு, பி⁴க்க²வே, பஞ்ச பீ³ஜஜாதானி அக²ண்டா³னி…பே… ஸுக²ஸயிதானி, பத²வீ ச அஸ்ஸ, ஆபோ ச அஸ்ஸ; அபி நுமானி, பி⁴க்க²வே, பஞ்ச பீ³ஜஜாதானி வுத்³தி⁴ம் விரூள்ஹிம் வேபுல்லம் ஆபஜ்ஜேய்யு’’ந்தி? ‘‘ஏவம், ப⁴ந்தே’’. ‘‘ஸேய்யதா²பி, பி⁴க்க²வே, பத²வீதா⁴து, ஏவம் சதஸ்ஸோ விஞ்ஞாணட்டி²தியோ த³ட்ட²ப்³பா³. ஸேய்யதா²பி, பி⁴க்க²வே, ஆபோதா⁴து, ஏவம் நந்தி³ராகோ³ த³ட்ட²ப்³போ³. ஸேய்யதா²பி, பி⁴க்க²வே, பஞ்ச பீ³ஜஜாதானி, ஏவம் விஞ்ஞாணம் ஸாஹாரம் த³ட்ட²ப்³ப³ம்’’.

‘‘ரூபுபயம், பி⁴க்க²வே, விஞ்ஞாணம் திட்ட²மானம் திட்டே²ய்ய, ரூபாரம்மணம் ரூபப்பதிட்ட²ம் நந்தூ³பஸேசனம் வுத்³தி⁴ம் விரூள்ஹிம் வேபுல்லம் ஆபஜ்ஜேய்ய. வேத³னுபயம் வா, பி⁴க்க²வே, விஞ்ஞாணம் திட்ட²மானம் திட்டே²ய்ய…பே… ஸஞ்ஞுபயம் வா, பி⁴க்க²வே, விஞ்ஞாணம் திட்ட²மானம் திட்டே²ய்ய…பே… ஸங்கா²ருபயம் வா, பி⁴க்க²வே, விஞ்ஞாணம் திட்ட²மானம் திட்டே²ய்ய, ஸங்கா²ராரம்மணம் ஸங்கா²ரப்பதிட்ட²ம் நந்தூ³பஸேசனம் வுத்³தி⁴ம் விரூள்ஹிம் வேபுல்லம் ஆபஜ்ஜேய்ய.

‘‘யோ, பி⁴க்க²வே, ஏவம் வதே³ய்ய – ‘அஹமஞ்ஞத்ர ரூபா அஞ்ஞத்ர வேத³னாய அஞ்ஞத்ர ஸஞ்ஞாய அஞ்ஞத்ர ஸங்கா²ரேஹி விஞ்ஞாணஸ்ஸ ஆக³திம் வா க³திம் வா சுதிம் வா உபபத்திம் வா வுத்³தி⁴ம் வா விரூள்ஹிம் வா வேபுல்லம் வா பஞ்ஞாபேஸ்ஸாமீ’தி, நேதம் டா²னம் விஜ்ஜதி.

‘‘ரூபதா⁴துயா சேவ, பி⁴க்க²வே, பி⁴க்கு²னோ ராகோ³ பஹீனோ ஹோதி. ராக³ஸ்ஸ பஹானா வோச்சி²ஜ்ஜதாரம்மணம் பதிட்டா² விஞ்ஞாணஸ்ஸ ந ஹோதி. வேத³னாதா⁴துயா சே… ஸஞ்ஞாதா⁴துயா சே… ஸங்கா²ரதா⁴துயா சே… விஞ்ஞாணதா⁴துயா சே, பி⁴க்க²வே, பி⁴க்கு²னோ ராகோ³ பஹீனோ ஹோதி. ராக³ஸ்ஸ பஹானா வோச்சி²ஜ்ஜதாரம்மணம் பதிட்டா² விஞ்ஞாணஸ்ஸ ந ஹோதி. தத³ப்பதிட்டி²தம் விஞ்ஞாணம் அவிரூள்ஹம் அனபி⁴ஸங்க²ச்சவிமுத்தம். விமுத்தத்தா டி²தம். டி²தத்தா ஸந்துஸிதம். ஸந்துஸிதத்தா ந பரிதஸ்ஸதி. அபரிதஸ்ஸம் பச்சத்தஞ்ஞேவ பரினிப்³பா³யதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதீ’’தி. து³தியம்.