2. படிபதா³ஸுத்தம்

44. ஸாவத்தி²னிதா³னம். ‘‘ஸக்காயஸமுத³யகா³மினிஞ்ச வோ, பி⁴க்க²வே, படிபத³ம் தே³ஸேஸ்ஸாமி, ஸக்காயனிரோத⁴கா³மினிஞ்ச படிபத³ம். தம் ஸுணாத². கதமா ச, பி⁴க்க²வே, ஸக்காயஸமுத³யகா³மினீ படிபதா³? இத⁴, பி⁴க்க²வே, அஸ்ஸுதவா புது²ஜ்ஜனோ அரியானம் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானம் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ, ரூபம் அத்ததோ ஸமனுபஸ்ஸதி, ரூபவந்தம் வா அத்தானம்; அத்தனி வா ரூபம், ரூபஸ்மிம் வா அத்தானம். வேத³னம் அத்ததோ… ஸஞ்ஞம்… ஸங்கா²ரே… விஞ்ஞாணம் அத்ததோ ஸமனுபஸ்ஸதி, விஞ்ஞாணவந்தம் வா அத்தானம்; அத்தனி வா விஞ்ஞாணம், விஞ்ஞாணஸ்மிம் வா அத்தானம். அயம் வுச்சதி, பி⁴க்க²வே, ‘ஸக்காயஸமுத³யகா³மினீ படிபதா³, ஸக்காயஸமுத³யகா³மினீ படிபதா³’தி. இதி ஹித³ம், பி⁴க்க²வே, வுச்சதி ‘து³க்க²ஸமுத³யகா³மினீ ஸமனுபஸ்ஸனா’தி. அயமேவேத்த² அத்தோ²’’.

‘‘கதமா ச, பி⁴க்க²வே, ஸக்காயனிரோத⁴கா³மினீ படிபதா³? இத⁴, பி⁴க்க²வே, ஸுதவா அரியஸாவகோ அரியானம் த³ஸ்ஸாவீ அரியத⁴ம்மஸ்ஸ கோவிதோ³ அரியத⁴ம்மே ஸுவினீதோ, ஸப்புரிஸானம் த³ஸ்ஸாவீ ஸப்புரிஸத⁴ம்மஸ்ஸ கோவிதோ³ ஸப்புரிஸத⁴ம்மே ஸுவினீதோ, ந ரூபம் அத்ததோ ஸமனுபஸ்ஸதி, ந ரூபவந்தம் வா அத்தானம்; ந அத்தனி வா ரூபம், ந ரூபஸ்மிம் வா அத்தானம். ந வேத³னம் அத்ததோ… ந ஸஞ்ஞம்… ந ஸங்கா²ரே… ந விஞ்ஞாணம் அத்ததோ ஸமனுபஸ்ஸதி, ந விஞ்ஞாணவந்தம் வா அத்தானம்; ந அத்தனி வா விஞ்ஞாணம், ந விஞ்ஞாணஸ்மிம் வா அத்தானம். அயம் வுச்சதி, பி⁴க்க²வே, ‘ஸக்காயனிரோத⁴கா³மினீ படிபதா³, ஸக்காயனிரோத⁴கா³மினீ படிபதா³’தி. இதி ஹித³ம், பி⁴க்க²வே, வுச்சதி ‘து³க்க²னிரோத⁴கா³மினீ ஸமனுபஸ்ஸனா’தி. அயமேவேத்த² அத்தோ²’’தி. து³தியம்.