1. நதும்ஹாகம்ஸுத்தம்

33. ஸாவத்தி²னிதா³னம். ‘‘யம், பி⁴க்க²வே, ந தும்ஹாகம், தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதி. கிஞ்ச, பி⁴க்க²வே, ந தும்ஹாகம்? ரூபம், பி⁴க்க²வே, ந தும்ஹாகம், தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதி. வேத³னா ந தும்ஹாகம், தம் பஜஹத². ஸா வோ பஹீனா ஹிதாய ஸுகா²ய ப⁴விஸ்ஸதி. ஸஞ்ஞா ந தும்ஹாகம்… ஸங்கா²ரா ந தும்ஹாகம், தே பஜஹத². தே வோ பஹீனா ஹிதாய ஸுகா²ய ப⁴விஸ்ஸந்தி. விஞ்ஞாணம் ந தும்ஹாகம், தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதி’’.

‘‘ஸேய்யதா²பி, பி⁴க்க²வே, யம் இமஸ்மிம் ஜேதவனே திணகட்ட²ஸாகா²பலாஸம் தம் ஜனோ ஹரேய்ய வா ட³ஹேய்ய வா யதா²பச்சயம் வா கரேய்ய. அபி நு தும்ஹாகம் ஏவமஸ்ஸ – ‘அம்ஹே ஜனோ ஹரதி வா ட³ஹதி வா யதா²பச்சயம் வா கரோதீ’’’தி? ‘‘நோ ஹேதம், ப⁴ந்தே’’. ‘‘தம் கிஸ்ஸ ஹேது’’? ‘‘ந ஹி நோ ஏதம், ப⁴ந்தே, அத்தா வா அத்தனியம் வா’’தி. ‘‘ஏவமேவ கோ², பி⁴க்க²வே, ரூபம் ந தும்ஹாகம், தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதி. வேத³னா ந தும்ஹாகம், தம் பஜஹத². ஸா வோ பஹீனா ஹிதாய ஸுகா²ய ப⁴விஸ்ஸதி. ஸஞ்ஞா ந தும்ஹாகம்… ஸங்கா²ரா ந தும்ஹாகம்… விஞ்ஞாணம் ந தும்ஹாகம், தம் பஜஹத². தம் வோ பஹீனம் ஹிதாய ஸுகா²ய ப⁴விஸ்ஸதீ’’தி. பட²மம்.